Lipoti a Ē Faalauiloa le Malo

“E Matuā Telē lo Outou Iloa i le Tusi Paia”

INA ua tautala atu ma le lototele le tama e 12 tausaga le matua o Iesu i taʻitaʻi lotu i Ierusalema, sa “matuā ofo uma lava e na faalogo ia te ia i lona poto ma ana upu e tali.” (Luka 2:47) I se tulaga talitutusa i aso nei, e toʻatele auauna talavou a Ieova ua latou faaalia le matuā lototetele e tautatala atu i o latou faiaʻoga ma uō i le aʻoga e uiga i le Atua ma le Tusi Paia, ma e masani ona latou maua ni iʻuga logoleleia faapena.

O Tiffany e 14 ona tausaga, sa i le vasega lea sa taulaʻi atu se tasi o a latou talanoaga i le valoʻaga o le Tusi Paia i le 70 vāiasosā o tausaga, i le Tanielu 9:24-27. Na faamatala mai e le faiaʻoga ni nai mea moni e faatatau i fuaiupu ma teʻi ai lava ua faaiʻu le matāʻupu e aunoa ma le faamalamalamaina lelei.

Muamua lava, sa tau faatalatū Tiffany e sii lona lima. “Ae ona o nisi lava o māfuaʻaga,” o lana tala lea, “na matuā lē toʻa ai lava oʻu faalogona ona sa leʻi faamalamalama lelei maia fuaiupu. Ma na teʻi ai lava ua sii i luga loʻu lima.” Na māofa le faiaʻoga ona o le iai o se tasi e iai moni sona manatu i le matāʻupu, auā sa matuā faigatā lava i le toʻatele o tamaiti ona malamalama i le matāʻupu.

Ina ua tuu atu le avanoa e faamatala ai le valoʻaga, na tu i luga Tiffany ma tautala atu e aunoa ma le tau vaʻai i ni faamaumauga. Ina ua māeʻa lana faamatalaga, na matuā saō atoa le potu aʻoga. Na tau lagona e Tiffany sina lē toʻa. Ae faalogoina loa le patipati leotele o le vasega.

“E matuā mataʻina lava lena manatu Tiffany, e matuā mataʻina lava,” o le tala lea na faia pea lava pea e le faiaʻoga. Na ia ioeina faapea sa ia iloa e tatau lava ona iai nisi manatu e faatatau i na fuaiupu, ae o Tiffany le tagata muamua lava ua ia faamatalaina atu ma le manino ia te ia. Ina ua māeʻa le vasega, na ia fesili atu ai ia Tiffany pe na faapēfea ona telē lona iloa i le Tusi Paia.

“Talu ai o aʻu o se tasi o Molimau a Ieova,” o lana tali lea. “E tele taimi sa faamatala mai ai e oʻu mātua lena valoʻaga ia te aʻu ona faatoʻā ou malamalama ai lea.”

Sa māofa foʻi tamaiti o le vasega i lona poto i le Tusi Paia. Na faapea atu se tasi teineitiiti aʻoga ia Tiffany: “O lea la ua ou iloa nei le māfuaaga e ō atu ai outou Molimau a Ieova i lea fale i lea fale; talu ai e matuā telē lo outou iloa i le Tusi Paia.” Na folafola mai e isi o le a latou lē toe tau faifai ia te ia i ona talitonuga.

Ina ua taʻu atu e Tiffany i ona mātua le mea na tupu, na la manatu ai loa e tatau ona ia ofoina atu le tusi o Le Poto e Taʻitaʻia ai i le Ola e Faavavau i lona faiaʻoga. Ina ua ia faia faapea ma faaali atu i lona faiaʻoga le vaega o loo faamatala mai ai le valoʻaga a Tanielu, na talia ma le fiafia e le alii le tusi ma ia faafetaia le teine.

O le mea moni, pe afai e tautatala atu ma le lototetele talavou Kerisiano e uiga i mea na aʻoaʻoina ai i latou e o latou mātua e faatatau i le Atua ma le Tusi Paia, latou te avatu ai le viiga ma le mamalu ia Ieova ma faamanuiaga mo i latou lava.—Mataio 21:15, 16.