Le Mea e Ao Ona E Silafia e Uiga i Faiga Faataulāitu

O FAIGA faataulāitu i ona po nei e faigatā tele ona faamatala. O le māfuaʻaga, talu ai o i latou o loo faatinoina e matuā eseese lava auala o loo latou faia ai. E latou te lē talitonu faapea e iai se pule autū po o se aʻoaʻoga po o se tusi paia e autasia ai ni talitonuga. E eseese foʻi i a latou uputuu, a latou faatulagaga, a latou tū masani faaletapuaʻiga, ma o latou manatu i le po o lē fea atua latou te faamamaluina. Fai mai le manatu o se tasi tamaʻitaʻi tusitala: “Ua ofoina atu e le ʻaufaimea faalilolilo i tagata taʻitoʻatasi se ‘nofoaga maua fua o fefaaaliaʻiga’ o manatu.” Ae fai mai le isi tamaʻitaʻi tusitala: “E toetoe lava o mea uma e lē malilie faatasi i ai le Vaega e Faia Faiga Fou Faapaupau (Neo-Pagans).”

O manatu feteenaʻi e lē o se faafitauli lea mo le toʻatele o tagata. Fai mai se tasi tusi taʻiala mo ē o loo naunau e fia avea ma taulāitu o loo taulau manuia: “Pe a luʻia oe i ni faamatalaga e foliga mai e feteenaʻi, ia iloiloina nei faamatalaga ona fai lea o sau faaiʻuga po o lē fea o le a talitonuina. Ia e amanaʻia le uunaʻiga o loo tataʻia oe i le malamalamaga tonu. I se isi faaupuga, ia e saʻoloto e fai sau filifiliga mai tū masani faaletapuaʻiga ua lōmia ma tusi taʻiala o loo tusia ai tū masani faaletapuaʻiga, ina ia e filifili ai po o le ā le mea e te lagona e saʻo.”

Mo i latou e amanaʻiaina le agaga tonu o le mea moni, o se faafitauli ia i latou na manatu feteenaʻi. O le mea moni o le mea saʻo lena, lona uiga e moni. E lē fuaina le moni o ni mea ona faapea o mea ia e lagona e le tagata pe faamoemoe pe talitonu i ai e moni. Mo se faaaʻoaʻoga, i se tasi taimi na talitonu ai fōmaʻi faapea e mafai ona latou togafitia le fulū gau po o le niumonia e ala i le vaelua o se moa ola ona faataatitia lea o ona vaega i luga o le fatafata o le tagata maʻi. E aunoa ma se masalosalo, e toʻatele tagata mamaʻi na matuā talitonu lava o le a latou mālolosi mai lenei togafitiga. Peitaʻi, sa leʻi ōgatasi o latou talitonuga ma faamoemoega ma le mea moni—o se faiga faapena e lē togafitia ai le niumonia. E lē faatupuina e tagata le mea moni; e latou te tauivi ina ia malamalama i le mea moni.

E manatu le Tusi Paia faapea o ia o loo iai le upu moni e uiga i matāʻupu faaleagaga. A o iai Iesu Keriso i le lalolagi, na ia faapea atu ai i lona Tamā i le tatalo: “O lau afioga o le upu moni lea.” (Ioane 17:17) Na tusi mai le aposetolo o Paulo: “O tusi paia uma lava e mai le Agaga o le Atua ia.” (2 Timoteo 3:16) E lē ioe i ai le toʻatele o ē faatinoina faiga faataulāitu. Na i lo lea, latou te faatalitalia se faagaeega ma se taʻitaʻiga mai talafatu, o lotu anamua, e oo lava i tala lē moni e faavae i faiga faasaienisi. Ae po ua lē talafeagai ea ona seʻi toe iloiloina lava le mea o fai mai ai le Tusi Paia? Ae maise ai, e toetoe lava o le lalolagi aoao ua latou amanaʻia o lea tusi o se tusi e  paia. O se tasi foʻi o tusi faalelotu sili ona leva o loo tūmau mai pea. Sa tusia le Tusi Paia i se vaitaimi e aofia ai le 1,600 tausaga, peitaʻi o loo faaauau pea ona ōgatusa ana aʻoaʻoga. Seʻi o tatou faatusatusaina aʻoaʻoga a le Tusi Paia ma nisi o talitonuga taatele o loo faaalia i aso nei e i latou e lagolagoina faiga faataulāitu.

O Ai o Loo Nonofo i le Nofoaga o Agaga?

O se fesili faavae lenei i le finauga mo le malamalamaga faaleagaga, O ai o loo ʻaināina le nofoaga o agaga? A o avea le tele o taulāitu i ona po nei ma soo o se lotu e faaautū i mea faalenatura, ma tapuaʻia le tele o atua, ae o nisi taulāitu o loo tapuaʻi atu i se atua fafine sili ua avea ma faatinā o meaola uma, lea na te faatinoina vaega e tolu, o le tamaʻitaʻi, le tinā, ma le loomatua, ua fai lena ma sui o laasaga faavae o le olaga. O lana manamea o se atua e iai ni ona seu. O isi taulāitu e tapuaʻi faatasi atu i se atua tamāloa ma se atua fafine. Ua faapea mai se tasi alii tusitala: “O le Atua Fafine ma le Atua Tamāloa, ua faaali mai e avea o se faailoaga o mālosiʻaga faafafine ma mālosiʻaga faatamāloa faalenatura. E tofu i laʻua ma uiga tūtasi lea pe a tuufaatasia e iʻu ai i le autasi o foafoaga o le olaga.” Ua tusi mai le tasi tamaʻitaʻi tusitala: “O se tasi o filifiliga e sili ona tāua i Faiga Faataulāitu o lau filifiliga lea o atua (Atua Tamāloloa/Atua Fafine) o le a e lagolagoina. . . . E avatu e Faiga Faataulāitu ia te oe le saʻolotoga e te filifilia ai ma mulimuli ane e faamamaluina ai a oe lava faatusa o le Atua.”

E leai ma se tasi o nei manatu e lagolagoina e le Tusi Paia. Na tuutōina atu e Iesu Keriso lana faiva atoa i le aʻoaʻoina o isi e uiga ia Ieova, “le Atua moni e toatasi.” (Ioane 17:3) Ua faapea mai le Tusi Paia: “E silisili Ieova, e tusa ona matuā viia o ia; e sili foi ona matautia o ia i atua uma. Auā o atua uma o nuu o tupua lava ia.”—1 Nofoaiga a Tupu 16:25, 26.

Ae faapēfea le Tiapolo? E faamatala e le lomifefiloi o le Webster’s Ninth New Collegiate faiga faataulāitu o le “talanoaga ma le tiapolo.” E faigatā lava ona maua se taulāitu i aso nei o le a ioe mai i lenei faamatalaina, auā o le toʻatele lava o i latou e lē talitonu e oo lava i le iai o Satani le Tiapolo. O se tamaʻitaʻi talavou, o lē ua faamatalaina i le Irish Times e faapea o se “taulāitu e sili ona maualuga ma o le taʻitaʻi o se tasi o faalapotopotoga o taulāitu e sili ona mataʻina i totonu o Aialani,” o lana faamatalaga lenei: “O le talitonuga i le Tiapolo e faaalia mai ai le taliaina o le Faa-Kerisiano . . . e lē mafai e [Le Tiapolo] ona ʻaināina le vateatea pe afai ua lē o iai se Atua.”

Ua faamautinoa mai e le Tusi Paia le iai o le Tiapolo ma tuuaʻia o ia i le tele o mafatiaga ma mea faigatā i le lalolagi. (Faaaliga 12:12) Sa aʻoaʻo atu e Iesu e lē gata e iai le Tiapolo ae na ia faaalia foʻi e mafai e tagata ona latou faia ma le leʻi mafaufauina manaʻoga o le Tiapolo. Mo se faaaʻoaʻoga, na faapea mai ma le maumauaʻi taʻitaʻi lotu faafiaamiotonu o le uluaʻi senituri, o i latou o atalii o le Atua ma sa latou talitonu na latou faia le finagalo o le Atua. Peitaʻi e ese le mea na silafia e Iesu, o lē sa mafai ona ia silafia manatu o i o latou loto. Na tuusaʻo atu lana fetalaiga ia i latou: “O outou nai lo outou tamā le tiapolo, tou te fia faia foi mea e tuʻinanau i ai lo outou tamā.” (Ioane 8:44) E lē gata i lea, ua taʻua e le tusi o le Tusi Paia o le Faaaliga e faapea o loo “faasese [le Tiapolo] i le lalolagi uma.”—Faaaliga 12:9.

Pe Iai Nisi Faiga Faamaneta e Lelei?

O le mea moni, o faiga faamaneta, e masani lava ona fesootaʻi atu i faiga faalilolilo. * E toʻatele tagata  i aso anamua ma ona po nei e talitonu o faiga faamaneta ia e faatino e taulāitu ua faatino ina ia faaleagaina ai isi. Ua faapea mai nisi, ua iai i taulāitu le mana e faaoo atu ai ni tigā matuitui ma e oo lava ina oti ai e ala i faiga faamaneta. Ua masani lava ona tuuaʻia taulāitu ona o le lē mafaitaulia o faalavelave, e aofia ai maʻi, o oti, ma le faaleagaina o ni mea totō.

E matuā tetee lava taulāitu o aso nei i na tuuaʻiga. E ui ina ioe e iai nisi taimi e tulaʻi mai ai se taulāitu leaga na te faia ni mea faatevolo, ae o le toʻatele lava e maumauaʻi mai, o a latou faiga faamaneta ua faaaogā e aumaia āuga lelei, ae lē faaleagaina ai. E aʻoaʻo e taulāitu Wicca faapea, o aafiaga o faiga faamaneta o le a maua mai ai aogā sautuatolu i le tagata o loo faatinoina, ma ua latou taʻua faapea, o se gaoioiga autū i le faia o ni faamalaiaga. O faaaʻoaʻoga o lenei gaoioiga e taʻua o faiga faamaneta lelei, e aofia ai mea e faaaogā e puipuia ai oe, e faamamā ai lou fale mai ni mālosiʻaga leaga na tuu ai e tagata sa latou nofoia muamua le fale, e faapogai ai se tagata ina ia gau mai lona alofa ia te oe, e lagolagoina ai faamālōlōga ma le soifua mālōlōina, e taofia ai le ono faateʻa o oe mai lau galuega, ma e maua ai foʻi tupe. O le fesootaʻi atu o na ituaiga o mālosiʻaga e tele i faiga faataulāitu, ua lē o se mea e ofo ai le taatele mai.

Ae peitaʻi, e lē o faaeseesea mai e le Tusi Paia ni faiga faamaneta e lelei ma ni faiga faamaneta e leaga. I le Tulafono lea na tuu atu ia Mose, na faamanino mai ai e le Atua lona tulaga. Na ia fetalai: “Aua foi le fai togafiti faataulāitu.” (Levitiko 19:26) Ua tatou faitauina foʻi: “Aua neʻi iloa ia te oe . . . o se iite i ao o le lagi, po o se saili faailoga, po o se taulāitu, po o se ʻapele, po o se fesili atu i aitu.”—Teuteronome 18:10, 11.

Aiseā na fetalai mai ai faapena le Atua? E lē faapea e finagalo o ia ina ia taofia mai ia i tatou se mea e aogā. Na tuuina atu e Ieova nei tulafono i ona tagata talu ai sa ia alofa ia i latou ma na te leʻi manaʻo ia faapologaina i latou i le matataʻu ma faiga faaagaga. Na i lo lea, ua ia valaʻaulia ana auauna ina ia faalatalata atu ia te ia mo mea latou te manaʻomia. O ia o Lē Foaʻi mai “mea lelei uma e foaifuaina mai, atoa ma mea alofa uma e atoatoa ona lelei.” (Iakopo 1:17) Na faamautinoa atu e le aposetolo o Ioane i ona uso talitonu e faapea: “O mea uma foi tatou te ole atu ai, e maua mai [le Atua], auā ua tatou tausi i ana poloaiga, tatou te faia foi mea e lelei i ona luma.”—1 Ioane 3:22.

Ae Faapēfea Agaga Leaga?

E toʻatele taulāitu e ioe faatasi ma le Tusi Paia i le manatu lenei: E iai agaga leaga. I se tasi tusigātala, o loo lapataʻi mai ai se alii o lē faaauilumaina faiga faataulāitu e faapea: “O loo iai Aitu: O loo iai i latou i le lalolagi lē vaʻaia lea e tutusa ma lo tatou lalolagi, lea e tumu i meafaiola. . . . O upu ‘Tamaʻi Temoni,’ ‘Agaga Leaga’ ma ‘Temoni’ o lena lava e saʻo. E mālolosi tele i latou. . . . O ituaiga o aitu e sili ona atamamai . . . latou te mafai (pe afai e iai se tasi e  naunau e faataga i latou) ona ulu mai i lo tatou lalolagi. . . . E mafai ona latou ulu i totonu o lou tino . . . , e oo lava ina latou puleaina faamālosi oe. Ioe, ua tutusa pau lava lenei mea ma tala anamua e faatatau i le ulutinoina o tagata e Temoni.”

I aso anamua o le Tusi Paia, sa faaleagaina ai e temoni tagata i auala eseese. O nisi o i latou na aafia sa lē mafai ona tautatala, o nisi na tauaso, o nisi na gaoioi e peiseaī ua valelea, ma nisi na ulu i ai ni mālosiʻaga ua sili atu na i lo le mālosi faaletagata. (Mataio 9:32; 12:22; 17:15, 18; Mareko 5:2-5; Luka 8:29; 9:42; 11:14; Galuega 19:16) I nisi taimi na tuputupu aʻe lagona tigā a o faifai pea ona tele temoni e ulutino i se tasi tagata i le taimi lava e tasi. (Luka 8:2, 30) E mautinoa lava la, e iai se māfuaʻaga lelei ua lapataʻia ai e Ieova tagata ina ia ʻalo ese mai faiga faataulāitu ma isi faiga faalilolilo.

Le Tapuaʻiga e Faavae i le Upu Moni

E toʻatele tagata ua tōsina atu i faiga faataulāitu i aso nei talu ai e foliga mai e leai se āfaina, e agalelei, ma o se faiga faaletapuaʻiga e faavae i le natura o mea. Ua taliaina i nisi vaipanoa. E lē o se mea e mataʻu i ai. Na i lo lea, ua avea o se mea masani. I nofoaga ua taʻitaʻia ai e le saʻolotoga faaletapuaʻiga le toʻatele o tagata e talia e oo lava i faiga e matuā lē mafai ona faamatalaina, e telē se aloaʻia ua mafai ona maua ai e faiga faataulāitu.

Ioe, ua avea lotu e peiseaī o se nofoaga autū o fefaatauaʻiga, lea e saʻoloto ai tagata e filifili se lotu e fetaui ma o latou manaʻoga, e pei lava o le tagata o loo faatauina se pea seevae. Peitaʻi i le isi itu, e na o le lua lava filifiliga na fetalai i ai Iesu. Na ia fetalai: “Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.” (Mataio 7:13, 14) O le mea masani lava, tatou te saʻoloto e filifili i le ala tatou te savavali ai. Peitaʻi, talu ai o loo i se tulaga lamatia lo tatou lelei e faavavau, ua matuā tāua ai lava lena filifiliga. Ina ia ausia le malamalamaga faaleagaga, e ao lava ona tatou tuliloaina le ala o le upu moni—le ala lea e na o le Afioga a le Atua, le Tusi Paia, o loo maua ai.

[Faamatalaga pito i lalo]

[Ata i le itulau 5]

E toʻatele tagata i aso nei latou te manatu i faiga faataulāitu o se faiga faalelotu e faavae i le natura o mea, ma e lē āfaina ai se isi

[Ata i le itulau 6]

E masani lava ona fesootaʻi atu faiga faamaneta i faiga faalilolilo

[Ata i le itulau 6]

Po o faia ea ma le lē iloa e i latou o loo faatinoina faiga faataulāitu manaʻoga o le Tiapolo?

[Ata i le itulau 7]

O loo faaalia mai e le Tusi Paia le ala o le upu moni