O Ē Faasagatau i le Atua o le a Lē Manumalo!

“Latou te sii mai le taua ia te oe, a e latou te le manumalo ia te oe.”—IEREMIA 1:19.

1. O le ā le tofiga na maua e Ieremia, ma o le ā le umi sa faaauau ai lana galuega?

NA TOFIA e Ieova le talavou o Ieremia e avea ma perofeta i nuu ese. (Ieremia 1:5) Na tupu lenei mea i le taimi o le nofoaʻiga a Iosia le tupu lelei o Iuta. Sa faaauau mai le faiva faaperofeta a Ieremia i vaitaimi o le vevesi a o lumanaʻi le faatoʻilaloina o Ierusalema e Papelonia ma oo mai lava i le ave faatagataotauaina o tagata o le Atua.—Ieremia 1:1-3.

2. Sa faapēfea e Ieova ona ia faamālosia Ieremia, ma o le ā na uiga i ai le faasagatau i lena perofeta?

² O feʻau faafaamasinoga ia sa tatau ia Ieremia ona faalauiloa atu sa mautinoa le tulaʻi mai ai o teteega. O le pogai lea, sa faamālosia ai o ia e le Atua mo mea o loo i le lumanaʻi. (Ieremia 1:8-10) Mo se faataʻitaʻiga, sa faamālosia le loto o le perofeta e ala i upu nei: “Latou te sii mai le taua ia te oe, a e latou te le manumalo ia te oe; auā o aʻu ou te ia te oe e laveai ia te oe, ua fetalai mai ai Ieova.” (Ieremia 1:19) O le faasagatau la ia Ieremia e tusa ua faasagatau i le Atua. I aso nei, o loo iai se vaega o auauna e pei o se perofeta a Ieova, o la latou galuega e talitutusa ma le galuega a Ieremia. I le pei o ia, o loo latou faalauiloa atu ma le faamālosi afioga faavaloʻaga a le Atua. Ma o lenei feʻau e aafia ai tagata taʻitoʻatasi uma ma atunuu a lē mo le lelei e mo le leaga, e faalagolago i la latou tali atu i ai. I le pei o aso o Ieremia, e iai i latou o loo faasagatau i le Atua e ala i le tetee atu i ana auauna ma a latou galuega ua tofia mai e le Atua.

Ua Osofaʻia Auauna a Ieova

3. Aiseā ua osofaʻia ai auauna a Ieova?

³ Ua osofaʻia tagata o Ieova talu mai lava le amataga o le senituri lona 20. I  le tele o atunuu, ua taumafai ai tagata faufau leaga ina ia faalavelaveina—pe ia taofia—le folafolaina o le tala lelei o le Malo o le Atua. Ua uunaʻia a latou gaoioiga e lo tatou Tetee sili, le Tiapolo, “o loo fealualuai o ia e pei o se leona tagi, ua saili se tasi e ʻaina e ia.” (1 Peteru 5:8) Ina ua faaiʻuina “taimi atofaina o nuu ese” i le 1914, na faanofo ai loa e le Atua lona Alo e avea ma Tupu fou o le lalolagi, faatasi ai ma le faatonuga lenei: “Ia pule oe i totonu o e ita ia te oe.” (Luka 21:24, NW; Salamo 110:2) I le faatinoina o lana pule, na tuliesea ai e Keriso Satani mai le lagi ma tāofiofia o ia i le lalolagi. I le iloaina ua saasaa lona taimi, ua faasasao atu ai e le Tiapolo lona lotoa i Kerisiano faauuina ma a latou aumea. (Faaaliga 12:9, 17) O le ā ua iʻu i ai osofaʻiga faifai pea a i latou nei o loo faasagatau i le Atua?

4. O ā puapuaga na oo i tagata o Ieova i le vaitaimi o le Taua Muamua a le Lalolagi, ae o le ā na tupu i le 1919 ma le 1922?

⁴ Sa feagai auauna faauuina a Ieova ma le tele o tofotofoga o le faatuatua a o faagasolo le Taua Muamua a le Lalolagi. Sa tauemua i latou ma taufaaleaga i ai, sa tulituliloa e tagata faatupu vevesi, ma sasaina foʻi i latou. E pei lava ona valoia mai e Iesu, sa ‘inosia foi latou e nuu uma.’ (Mataio 24:9) A o vevesi le taua, sa faaaogā e fili o le Malo o le Atua osofaʻiga lava foʻi ia sa faaaogā e tetee atu ai ia Iesu Keriso. Sa latou faavasegasesēina tagata o Ieova faapea o ni tagata tetee i le mālō, ma sa latou osofaʻia tuusaʻo lava le faauluuluga o le faalapotopotoga vaʻaia a le Atua. Ia Me 1918, na tuuina atu ai tusi saisai  mo le puʻeina o le peresitene o le Sosaiete o le Olo Matamata o J. F. Rutherford, ma le toʻafitu o ana aumea vāvālalata. Sa tuuina atu i nei tane e toʻavalu ni faasalaga ogaoga faafalepuipui ma sa aauina atu i le falepuipui a le mālō i Atlanta, Georgia, i le Iunaite Setete o Amerika. I le iva masina mulimuli ane na toe faasaʻolotoina mai ai i latou. Ia Me 1919 na faaiʻuina ai e le faamasinoga o tagi a le itumalo faapea sa faaituʻau ona faia le faamasinoga o ē na mōlia, ma o lea na toe suia ai le iʻuga o le faamasinoga. Sa fuafuaina le toe faia o se isi faamasinoga, ae mulimuli ane na aveesea e le mālō ana tuuaʻiga, ma faasaʻoloto atoatoa mai ai loa le uso o Rutherford ma ana aumea. Sa toe faaauau a latou gaoioiga, ma o tauaofiaga sa faia i Cedar Point, Ohio, i le 1919 ma le 1922 sa avatu ai se mālosi faafouina i le galuega talaʻi o le Malo.

5. Sa faapeī le tulaga na iai Molimau a Ieova i lalo o le mālō a le ʻau Nasi i Siamani?

⁵ Na amata aliaʻi mai pulega faatautalatasi mai le1930 seʻia oo i le 1939, ma autasi ai Siamani, Italia, ma Iapani e galulue faatasi (Axis). I le amataga o lena sefulu tausaga, na mānu aʻe ai sauāga ogaoga faasaga i tagata o le Atua, sa matilatila ai lava le ʻau Nasi i Siamani. Sa iai faasāsāga. Sa suʻeina fale o ʻāiga, ma ave faapagota i latou sa nonofo ai. E faitauafe na lafoina i nofoaga o faasalaga ona sa latou mumusu e lafoaʻia lo latou faatuatua. O le taua e faasagatau atu ai i le Atua ma ona tagata sa fuafua ina ia matuā soloiesea uma ai Molimau a Ieova i lena oganuu o faiga faapolotiki pulepuletutū. * Ina ua auai atu Molimau i faamasinoga sa faia i Siamani ina ia sāʻilia la latou aiā tatau, sa saunia ai e le Reich’s Ministry of Justice (Matagaluega o le Faamasinoga a le Malo a le ʻAu Nasi i Siamani) se faamatalaga umī lava ina ia faamautinoa e lē taulau taumafaiga a Molimau. E faapenei le faamatalaga: “E lē avea le iai o tapulaa faaletulafono ma itu o le a lē mafai ai ona lē taulau le faamasinoga; e ui lava i na papuipui faaletulafono, ae tatau lava ona latou sāʻili i se auala ina ia mafai ona faataunuu ai a latou avega tauave tāua.” O le uiga o lenei manatu e leai se faamasinotonu e tatau ona faia. Sa tautū pea le ʻau Nasi faapea o gaoioiga a Molimau a Ieova sa faatupu faalavelave, ma sa ‘faavevesi ai le faagasologa o le Faiga Malo Faa-Sosalisi a le Atunuu.’

6. O ā taumafaiga sa fai ina ia taofia ai la tatou galuega i le vaitaimi o le Taua Lona Lua a le Lalolagi ma mulimuli mai ai?

⁶ I le vaitaimi o le Taua Lona Lua a le Lalolagi, sa faasāina ma taofiofia le galuega a tagata o le Atua i Ausetalia, Kanata, ma isi atunuu o le Taupulega a Peretania—i Aferika, Asia, ma atumotu o le Karipiane ma le Pasefika. I le Iunaite Setete, sa faapogaia ai e fili o ē sa mālolosi a latou taaʻiga, atoa ma i latou sa talasesēina ‘le tulafono ina ia faatiga ai.’ (Salamo 94:20) Peitaʻi sa finauina i faamasinoga matāʻupu e pei o le faʻalo i le fuʻa ma tulafono a vaipanoa sa faasāina ai le talaʻiga i lea fale i lea fale, ma o iʻuga lelei o na faamasinoga i le Iunaite Setete sa ati aʻe ai se pā mālosi o le lagolagosua mo se saʻolotoga tau tapuaʻiga. E faafetaia Ieova, ona sa leʻi manumalo taumafaiga a le fili. Ina ua māeʻa le taua i Europa, sa toe tatalaina faasāsāga. Sa faasaʻolotoina le faitauafe o Molimau na taofia i nofoaga o faasalaga, peitaʻi e leʻi iʻu ai iinā le tauiviga. E leʻi leva lava talu ona mavae le Taua Lona Lua a le Lalolagi, ae amata loa le Taua Faaupufai. Sa faapogaia e atunuu o Europa i Sasaʻe nisi omiga agaʻi i tagata o Ieova. Sa faia gaoioiga faalemālō ina ia faalavelavea ma taofia ai la tatou galuega o le molimau atu, ia taofia ai le tufatufaina o lōmiga faale-Tusi Paia, ma faasāina ai le toe faia o ni a tatou tauaofiaga i nofoaga faitele. E toʻatele sa faafalepuipui po o le ave i nofoaga o galuega mamafa.

Faaauau le Galuega Talaʻi!

7. O ā mea na tutupu i Molimau a Ieova i Polani, Rusia, atoa ma isi atunuu i tausaga e leʻi mamao tele atu?

⁷ A o mavae atu le faitau sefulu o tausaga, sa toe tatalaina le galuega talaʻi o le Malo. E ui sa iai pea Polani i pulega faa-Komunisi, ae na faataga e le mālō le faia o ni tauaofiaga e taʻitasi aso i le 1982. Sa faia ni tauaofiaga faava-o-atunuu iinā i le 1985. Sa sosoo ai ma ni tauaofiaga tetele faava-o-atunuu i le 1989, lea sa auai atu i ai le faitau afe mai Rusia ma Ukraine. O le tausaga lena na faamaonia ai faaletulafono Molimau  a Ieova i Hagakeri ma Polani. O le tau e āfu ai mea i le 1989, na solo ai i lalo le Pā i Perelini. I ni nai masina mulimuli ane, na tatou maua ai le faamaoniga faaletulafono i Siamani i Sasaʻe, ma e leʻi leva lava mulimuli ane sa faia ai loa se tauaofiaga faava-o-atunuu i Perelini. Ma i le amataga o le sefulu tausaga mulimuli o le lona 20 senituri, sa faia ai ni taumafaiga ina ia faia ni fesootaʻiga tōtino ma uso i Rusia. Sa fesootaʻi atu i nisi o sui o le mālō i Moscow, ma i le 1991, na lesitalaina ai faaletulafono Molimau a Ieova. Talu mai lena taimi ua matuā saosaoa le tuputupu aʻe o le galuega i Rusia atoa foʻi ma mālō ia sa avea muamua ma vaega o Soviet Union.

8. O le ā na tupu i tagata o Ieova i le 45 tausaga na sosoo ai talu mai le iʻuga o le Taua Lona Lua a le Lalolagi?

⁸ A o faaitiitia sauāga i nisi vaipanoa, ae sa faateteleina i isi vaega. I le 45 tausaga na sosoo ai talu mai le iʻuga o le Taua Lona Lua a le Lalolagi, e tele atunuu sa mumusu e aloaʻia faaletulafono Molimau a Ieova. E lē gata i lena, sa faasāsāina i tatou pe i la tatou galuega foʻi i atunuu e 23 i Aferika, 9 i Asia, 3 i Amerika Latina, 8 i Europa, ma le 4 i nisi o atumotu patino.

9. O le ā sa feagai ma auauna a Ieova i Malawi?

⁹ Sa feagai Molimau a Ieova i Malawi ma sauāga ogaoga na amata mai i le 1967. Ona o lo latou tulaga solitū o ni Kerisiano moni, sa lē faatauina ai e o tatou uso talitonu i lena atunuu ni pepa a vaega faapolotiki. (Ioane 17:16) Ina ua mavae se fonotaga a le Malawi Congress Party i le 1972, sa toe faaauau foʻi sauāga faamoʻamoʻa. Sa tutuliesea uso mai o latou ʻāiga ma teʻena mai galuega. E faitau afe na sosola ese mai le atunuu ina ia ʻalofia ai le fasiotia. Ae pe na manumalo ea i latou na faasagatau atu i le Atua ma ona tagata? E matuā leai lava! Ina ua mavae se tulaga tuufaafeagai na iai, na lipotia mai se tumutumuga e 43,767 o le ʻautalaʻi o le Malo i Malawi i le 1999, ma le silia i le 120,000 sa auai i tauaofiaga itumalo iinā. Ua fausia foʻi se ofisa fou o le lālā i le aai laumua.

Latou te Sāʻiliʻili i se Mea e Faalani Ai

10. E faapei o le mea na tupu ia Tanielu, o le ā ua faia e i latou o ē tetee i aso nei i tagata o Ieova?

¹⁰ Ua lē mafai e aposetate, o taʻitaʻi lotu, ma isi ona onosaʻia la tatou feʻau mai le Afioga a le Atua. Ona o omiga mai vaega faalotu a Kerisinetoma, ua taumafai ai tagata tetee i se auala faapea e faaletulafono, ina ia taʻusaʻoina ai la latou taua faasaga ia i tatou. O ā faufauga ua faaaogā i nisi taimi? Manatu i le mea lenei, o le ā sa fai e le ʻaufaatupu faalavelave e osofaʻia ai le perofeta o Tanielu? I le Tanielu 6:4, 5, tatou te faitau ai e faapea: “Ona tausaili lea e alii silisili ma alii sili ina ia maua se mea a le malo e faalani ai se sala ia Tanielu; a ua le maua e i latou se mea e faalani ai po o se mea leaga e tasi; auā sa faamaoni o ia, ua le maua foi sona sese e tasi, po o se mea leaga. Ona faapea atu ai lea o ia tagata, E le maua e i tatou se mea leaga i lenei Tanielu, pe afai tatou te le maua se mea ia te ia i le tulafono a lona Atua.” E faapena foʻi aso nei, o loo sāʻilia e ē tetee se mea e faalani ai. Latou te faia ni faamatalaga logologoā e faatatau i ni “lotu taufaasesē mataʻutia” ona taumafai lea e faavasega atu ai ma Molimau a Ieova o se tasi o ia lotu. E ala i ni faamatalaga lē lelei, ni masalosaloga, ma ni faamatalaga sesē, ua latou osofaʻia ai la tatou tapuaʻiga ma lo tatou tausisi i matāʻupu silisili tauatua.

11. O ā faamatalaga lē saʻo ua faia e nisi e tetee i Molimau a Ieova?

¹¹ I nisi atunuu, e lē mananaʻo lotu ma faiga faapolotiki e taʻutino mai faapea o loo tatou faia le ituaiga “lotu e lelei ma le faamaoni i luma o le Atua.” (Iakopo 1:27, LF ) E ui lava o loo faatinoina nei a tatou gaoioiga faa-Kerisiano i atunuu e 234, ae ua faapea mai le ʻautetee e lē o i tatou o se “lotu aloaʻia.” I ni nai aso a o lumanaʻi le tauaofiaga faava-o-atunuu i le 1998, na sii mai ai e se nusipepa a Atenai se faamatalaga a se faifeʻau o le lotu Orthodox i Eleni e faapea o “[Molimau a Ieova] e lē o se ‘lotu aloaʻia,’” e ui lava ina feteenaʻi lena ma le faaiʻuga a le Faamasinoga o Aiā Tatau a Tagata i Europa. I ni nai aso mulimuli ane, na lipotia mai ai e se isi nusipepa i le aai lava lena se faamatalaga a se taʻitaʻi lotu e faapea: “E lē mafai ona avea [Molimau a Ieova] o ‘se faapotopotoga Kerisiano,’ auā e aunoa ma se mea e tutusa ai i latou ma le faatuatuaga Kerisiano i le peresona o Iesu Keriso.” E matuā ofoofogia lenei mea, ona e leai lava se isi vaega faalotu o sili atu ona latou faatāuaina le faataʻitaʻi atu ia Iesu na i lo Molimau a Ieova!

12. I le tauina o la tatou taua faaleagaga, o le ā e ao ona tatou faia?

 ¹² Tatou te taumafai e puipuia ma faavaeina faaletulafono le tala lelei. (Filipi 1:7) E lē gata i lena, tatou te lē lolo atu pe faavaivaia lo tatou pipii mau i tapulaa amiotonu a le Atua. (Tito 2:10, 12) I le pei o Ieremia, tatou te ‘fusi i o tatou sulugatiti ma fai atu mea uma o loo fai mai ai Ieova ia i tatou,’ ia ʻaua neʻi faatagaina i latou o loo faasagatau i le Atua e faamataʻuina i tatou. (Ieremia 1:17, 18) Ua manino ona faailoga mai e le Afioga Paia a Ieova le ala saʻo tatou te ui ai. ʻAua lava neʻi o tatou mananaʻo e faalagolago atu i le “lima [vaivai] o le tagata” po o le sāʻili i le “paolo o Aikupito,” o lona uiga, o lenei lalolagi. (2 Nofoaiga a Tupu 32:8; Isaia 30:3; 31:1-3) I le tauina o la tatou taua faaleagaga, e ao ona tatou faatuatua atu pea ia Ieova ma o tatou loto atoa, tuu atu ia te ia na te faatonuina o tatou ala, ae ʻaua le faalagolago i so tatou lava atamai. (Faataoto 3:5-7) Seʻi vaganā lava ua tatou maua le lagolago mai a Ieova ma tuu atu ia te ia na te leoleoina i tatou, ona tatou ‘le faia fua’ lea o a tatou galuega uma.—Salamo 127:1.

Sauāina ae Lē Maluelue Ai

13. Aiseā e faapea atu ai na lē taulau osofaʻiga faasatani faasaga ia Iesu?

¹³ O le faaaʻoaʻoga sili lava i le tuutōina atu lē maluelue ia Ieova o Iesu lea, o lē sa tuuaʻia sesē faapea e tetee i pulega ma faapea sa ia faavevesia le faatulagaga maopoopo o mea sa iai. Ina ua māeʻa ona iloiloina le matāʻupu e faatatau ia Iesu, sa ioe loa Pilato e faasaʻoloto o ia. Peitaʻi ona o uunaʻiga mai taʻitaʻi lotu, na alalaga atu ai le motu o tagata, ina ia faasatauro ia Iesu, e ui lava e leai sana agasala. Na i lo Iesu, sa latou mananaʻo e faasaʻoloto mai Parapa—o se tagata sa tuuina i le falepuipui ona o le tetee i le mālō atoa ma le fasioti tagata! Sa toe taumafai atu Pilato ia liliu manatu lē faavaea o tagata tetee, peitaʻi na iʻu lava ina lolo atu o ia i le manaʻo o tagata. (Luka 23:2, 5, 14, 18-25) E ui lava na maliu Iesu i luga o se lāʻau, peitaʻi na matuā lē taulau atoatoa le osofaʻiga faasatani na sili ona  leaga faasaga i le Alo lē sala o le Atua, auā na faatūina e Ieova Iesu ma faanofo o ia i Lona lava itu taumatau. Ma i le aso Penetekoso 33 T.A., e ala i le Iesu faamamaluina, na liligi ifo ai le agaga paia ma faavae ai loa le faapotopotoga Kerisiano—“se foafoaga fou.”—2 Korinito 5:17, faatusatusa i le NW; Galuega 2:1-4.

14. O le ā na iʻu i ai ina ua taumafai taʻitaʻi lotu Iutaia e tetee i soo o Iesu?

¹⁴ E leʻi leva lava talu mai lena taimi ae faamataʻuina loa e taʻitaʻi lotu le ʻauaposetolo, peitaʻi sa lē mafai e nā soo o Keriso ona taofia lo latou tautatala i mea na latou vāʻai ma faalogo i ai. Sa tatalo atu faapenei soo o Iesu: “[Ieova] e, ia e silasila i lo latou faamatau mai; ma ia e foai mai i au auauna, ina ia latou matuā tautatala i lau afioga ma le loto tele.” (Galuega 4:29, LF ) Na tali mai Ieova i la latou tatalo faatauanau e ala i le faatūtūmuina o i latou i le agaga paia ma faamālosia i latou e faaauau i lo latou folafola atu ma le lē fefefe. E leʻi umi ae toe faatonuina foʻi le ʻauaposetolo e ʻaua le toe talaʻi, peitaʻi sa tali atu Peteru ma isi aposetolo e faapea: “E tusa ona sili o lo matou anaana i le Atua i lo matou anaana i tagata.” (Galuega 5:29) E leʻi mafai e faamataʻuga, le puʻeina faapagota, atoa ma le sasaina ona faavaivaia ai i latou mai le faalautele atu o la latou galuega o le Malo.

15. O ai Kamalielu, ma o le ā le fautuaga na ia avatu i tagata lotu sa tetee i soo o Iesu?

¹⁵ Sa faapēfea ona tali ane i ai taʻitaʻi lotu? “Ona matuā lotoa ai lea, ua latou taupulepule e fasioti [le ʻauaposetolo].” Peitaʻi, sa iai faatasi ma i latou se aʻoaʻo Tulafono e suafa ia Kamalielu, o se Faresaio, ma sa faaaloalogia o ia e tagata uma. Ina ua tuu le ʻauaposetolo i fafo atu o le fale o le ʻau Saniterini mo sina taimi puupuu, sa ia fautua atu ai i na tagata lotu tetee: “Outou Isaraelu e, ia outou ma mea a outou faia i nei tagata. . . . Ou te fai atu ia te outou, faamamao ia ma nei tagata, ma ia tuu pea ia te i latou; auā afai ua tupu mai tagata lena sauniga ma lena galuega, e faaumatia ia; a e afai ua tupu mai le Atua, tou te le mafai ona faaumatia; ina neʻi iloa ua outou fai taua i le Atua lava.”—Galuega 5:33-39.

O Auupega ua Fuafua e Faasagatau Mai ia i Tatou e Lē Manuia

16. I au lava upu, e faapēfea ona e faamatalaina le faamautinoaga ua tuuina mai e Ieova i ona tagata?

¹⁶ Sa saʻo lelei le fautuaga a Kamalielu, ma tatou te talisapaia lea tulaga pe a faia e nisi ni faamatalaga mo lo tatou lelei. Tatou te ioeina foʻi le mauaina o le saʻolotoga e tapuaʻi ai ona o ni faaiʻuga faafaamasinoga na faia e faamasino fai mea tonu. O le mea moni, o lo tatou pipii mau atu i le Afioga a le Atua e lē fiafia ai taʻitaʻi lotu o Kerisinetoma ma isi taʻitaʻi o Papelonia le Aai Tele, le emepaea o lotu sesē a le lalolagi. (Faaaliga 18:1-3) E ui lava ina faasagatau mai ia i tatou i latou na atoa ma isi ua latou taaʻia, ae ua ia i tatou le faamautinoaga lenei: “O auupega uma e faia e tau ma oe e le manuia ia; o laulaufaiva uma e finau atu ia te oe i le faamasinoga e te faasalaina ia; o le tofi lena o auauna a Ieova, o a latou amiotonu foi mai ia te au lea, ua fetalai mai ai Ieova.”—Isaia 54:17.

17. E ui lava ina faasagatau mai ē tetee ia i tatou, ae aiseā tatou te lototetele ai?

¹⁷ O loo faasagatau mai o tatou fili ia i tatou e aunoa ma se māfuaʻaga tatau, peitaʻi e lē aveesea ai lo tatou lototetele. (Salamo 109:1-3) ʻAua lava neʻi o tatou faatagaina i latou o ē feita i la tatou feʻau faale-Tusi Paia e faafefeina i tatou ina ia lafoaʻia ai lo tatou faatuatua. E ui lava tatou te faatalitalia o le a aasa atili la tatou taua faaleagaga, ae ua tatou iloa lava le iʻuga o le a oo i ai. I le pei o Ieremia, o le a tatou mātauina le faataunuuina o upu faavaloaga: “Latou te sii mai le taua ia te oe, a e latou te le manumalo ia te oe; auā o aʻu ou te ia te oe e laveai ia te oe, ua fetalai mai ai Ieova.” (Ieremia 1:19) Ioe, ua tatou iloa o ē faasagatau i le Atua o le a lē manumalo!

[Faamatalaga pito i lalo]

O le a Faapēfea Ona E Tali?

• Aiseā ua osofaʻia ai auauna a Ieova?

• I ā auala ua faasagatau ai ē tetee i tagata o Ieova?

• Aiseā e mafai ai ona tatou mautinoa o ē faasagatau i le Atua o le a lē manumalo?

[Fesili mo le Suʻesuʻega]

[Ata i le itulau 17]

Sa faamautinoa atu ia Ieremia o le a faatasi Ieova ma ia

[Ata i le itulau 18]

O ē na faasaoina mai nofoaga o faasalaga

[Ata i le itulau 18]

O tagata faatupu faalavelave i Molimau a Ieova

[Ata i le itulau 18]

J. F. Rutherford ma ana aumea

[Ata i le itulau 21]

I le tulaga o Iesu, o ē sa faasagatau i le Atua sa leʻi manumalo