Ua Faapēfea Ona Faagaoioia le Agaga o le Atua i Aso Nei?

NA PIPILI o ia talu lava ona fanau mai. I aso taʻitasi, sa nofo ai o ia i le faitotoʻa o le malumalu ua igoa i le Matagofie ma faatoga atu mo ni meaalofa mai ia i latou o ē ulu atu i le malumalu. Peitaʻi, i se tasi aso, na maua ai e lenei tagata ʻaisi e lē atoatoa le mālosi o lona tino se meaalofa e matuā sili atu na i lo ni nai tupe siliva. Sa faamālōlōina o ia!—Galuega 3:2-8.

E ui na ‘faatuina o ia i luga’ e aposetolo o Peteru ma Ioane ina ia ‘faamalosia ona vae,’ ae la te leʻi fia maua se viiga mo le faamālōlōga. Aiseā? O Peteru lava ia na faamatala mai: “Sema e, o outou Isaraelu e, se a le mea tou te ofo ai i lenei mea? Se a foi tou te pulatoa mai ai ia te i maʻua, peiseai o so maʻua mana, ma sa maʻua amio Atua ua savali ai o ia nei?” O le mea moni lava, na taufai iloa uma e Peteru ma Ioane faapea, e lē o so la mālosi, ae o le agaga paia o le Atua na mafai ai ona faia se mea faapena.—Galuega 3:7-16; 4:29-31.

I lena taimi, sa saunia na “mea mamana” ina ia faaalia ai sa iai le lagolagosua a le Atua i le faapotopotoga fou Kerisiano. (Eperu 2:4) Ae ina ua uma ona faataunuu le fuafuaga o na mea, ona “faaleaogaina” lea e pei ona taʻua e le aposetolo o Paulo. * (1 Korinito 13:8) O lea, tatou te lē o toe vaʻaia i aso nei i le faapotopotoga Kerisiano moni so o se faamālōlōga na taʻitaʻia e le Atua, o feʻau faavaloʻaga, po o le tutulia o temoni.

Ae pe o le uiga ea o lenei mea faapea, e lē o toe faagaoioia le agaga paia o le Atua? E matuā leai lava! Seʻi o tatou talanoaina nisi o auala sa faagaoioia ai le agaga o le Atua i le uluaʻi senituri ma o loo faagaoioia ai foʻi i o tatou aso.

‘Le Agaga e Tupu Mai ai le Upu Moni’

O se tasi o galuega a le agaga paia o le Atua, o le taulogologo mai, ia faasusulu mai, ia faaalialia mai upu moni. A o toeitiiti lava oo i lona maliu, na fetalai Iesu i ona soo: “Ua totoe ia te au mea e tele e fai atu ai ia te outou, a e tou te le mafaia ona talia i nei ona po. A e a maliu mai o ia, o le Agaga lea e tupu mai ai le upu moni, e taʻitaʻi e ia ia te outou i upu moni uma.”—Ioane 16:12, 13.

‘O le Agaga e tupu mai ai le upu moni’ sa liligiina ifo i le Penetekoso e 33 T.A. ina ua papatisoina i le agaga paia le toʻa 120 o soo na faapotopoto i se afeafe aupitoaluga i Ierusalema. (Galuega 2:1-4) Sa iai le aposetolo o Peteru faatasi ma i latou na auai atu mo lena tausamiga faaletausaga. Ina ua faatumulia i le agaga paia, na “tulai” ai Peteru ma faalautele, pe faamanino atu, nisi o upu moni e uiga ia Iesu. Mo se faaaʻoaʻoga, sa ia toe taʻua le auala ‘na siitia ai Iesu le Nasareta i luga i le aao taumatau o le Atua.’ (Galuega 2:14, 22, 33) O le agaga o le Atua na uunaʻia ai foʻi Peteru e folafola atu ma le lototele i lana ʻaufaalogologo Iutaia e faapea: “Ia matuā iloa e le aiga uma o Isaraelu, o Iesu lava lena na faasatauroina e outou, ua faia lea e le Atua ma Alii ma Keriso.” (Galuega 2:36) O le iʻuga o le feʻau a Peteru lea na faagaeeina e le agaga, e tusa ma le toluselau tagata o ē “na talia lana upu ma le fiafia” ma papatisoina. I lenei auala, sa fesoasoani atu ai le agaga paia o le Atua ina ia taʻitaʻi atu i latou i le upu moni.—Galuega 2:37-41.

Ua galue foʻi le agaga paia o le Atua o se aʻoaʻo ma se faamanatu. Na fetalai Iesu e faapea: “O le Fesoasoani, o le Agaga Paia lea, e auina mai e le Tamā i loʻu igoa, o ia lava na te aʻoaʻo ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou.”—Ioane 14:26.

Na faapēfea ona galue le agaga paia o se aʻoaʻo? Na faalotomatala e le agaga o le Atua mafaufau o le ʻausoo i mea sa latou muaʻi faalogo i ai mai ia Iesu, peitaʻi sa leʻi malamalama atoatoa i ai. Mo se faaaʻoaʻoga, na iloa e le ʻauaposetolo a o faagasolo le faamasinoga o Iesu, na ia fetalai atu ai i le  tagata Roma sa avea ma kovana o Iutaia, o Ponotio Pilato e faapea: “E le mai le lalolagi nei loʻu malo.” Peitaʻi, i le taimi na afio aʻe ai Iesu i le lagi ina ua silia ma le 40 aso mulimuli ane, sa sesē pea le manatu o aposetolo faapea o le a faavaeina le Malo i le lalolagi. (Ioane 18:36; Galuega 1:6) E foliga mai, na faatoʻā mafai e aposetolo ona latou malamalama atoatoa i le uiga o fetalaiga a Iesu ina ua mavae le liligiina ifo o le agaga paia o le Atua i le Penetekoso e 33 T.A.

Na galue foʻi le agaga o le Atua e fai ma faamanatu e ala i le toe fafagu mai i le mafaufau o aʻoaʻoga eseese a Iesu. Mo se faataʻitaʻiga, o valoʻaga i le maliu ma le toetū mai o Keriso, na iai sona faauigaga fou lea na manaʻomia ai le fesoasoani a le agaga paia. (Mataio 16:21; Ioane 12:16) O le manatuaina o aʻoaʻoga a Iesu na mafai ai e le ʻauaposetolo ona latou lototetele e tali puipui atu i lo latou tulaga i luma o tupu, o faamasino, ma taʻitaʻi lotu.—Mareko 13:9-11; Galuega 4:5-20.

E lē gata i lea, na fesoasoani le agaga paia o le Atua e tataʻi atu uluaʻi Kerisiano i oganuu fuatele mai i le faiva. (Galuega 16:6-10) O le agaga o le Atua na uunaʻia ai foʻi uluaʻi Kerisiano e faia so latou sao i le tusiaina o le Afioga a le Atua, le Tusi Paia, ina ia aogā i tagata uma. (2 Timoteo 3:16) E manino lava la, sa gaoioi le agaga paia i le tele o auala eseese i le uluaʻi senituri. Sa leʻi na ona saunia mai mo le faatinoina o vavega.

Le Agaga Paia i o Tatou Aso

Ua faapena foʻi ona galue le agaga paia mo se lelei o Kerisiano moni i o tatou aso. Na faamaonia lenei manatu i se vaega toʻaitiiti o tagata aʻoga o le  Tusi Paia i Allegheny, Pennsylvania, i le Iunaite Setete o Amerika, i le ʻafa mulimuli o le lona 19 senituri. Sa faanaunau atu nei tagata aʻoga māʻelegā o le Tusi Paia ina ia iloa “le upu moni.”—Ioane 8:32; 16:13.

O se tasi sui o lenei vaega, o Charles Taze Russell, na ia faapea mai e uiga i lana sāʻiliʻiliga mo le upu moni o le Tusi Paia: “Sa ou tatalo . . . ina ia mafai ona ou aveesea mai loʻu loto ma loʻu mafaufau so o se manatu ou te faia e aunoa ma soʻu malamalamaga atoatoa ina neʻi avea ma toʻatugā ma ia taʻitaʻia atu aʻu e lona agaga ina ia maua se malamalamaga tatau.” Sa faamanuia le Atua i lenei tatalo lotomaulalo.

A o sāʻiliʻili ma le naunautaʻi Russell ma ana aumea i le Tusi Paia, e tele ni mea na oo ina manino mai ai. Na faamatala mai e Russell faapea: “Na matou iloa ai, mo le tele o senituri, e anoanoaʻi lotu mavae ma vaega sa latou vaevaeina talitonuga a le Tusi Paia ia i latou lava, ma fenumiaʻi faatasi ai i latou i taumatematega ma sesē faaletagata.” O lenei gaoioiga na iʻu ai i le mea na ia taʻua o “le faauigaga sesē o le upu moni.” O le mea moni lava, sa tanumia upu moni o le Tusi Paia i lalo o se faaputuga o aʻoaʻoga faapaupau na sa faapalapalāina ai Kerisinetoma mo le tele o senituri. Peitaʻi sa maumauaʻi pea Russell ina ia ona aʻoaʻoina ma faalauiloa atu le upu moni.

E ala mai itūlau o le Zion’s Watch Tower and Herald of Christ’s Presence, na lototele ai Russell ma ana aumea e taʻusalaina aʻoaʻoga sesē faalotu lea na taʻuvalea ai le Atua. Na latou faapea mai—i se faaeseesega ma manatu taatele faalotu—o le solu e mafai ona oti, pe a tatou feoti tatou te ō atu i le tuugamau, ma o Ieova ua na o ia le Atua moni ma ua lē avea ai o ia ma vaega o se Tasitolu.

Ae pei ona e tau mātau mai, o lena faaalialia o aʻoaʻoga sesē na feita ai taʻitaʻi lotu o Kerisinetoma. I le naunau e taofiofia pea o latou tulaga maualuluga, na faamaopoopo ai e le toʻatele o taʻitaʻi lotu o le Katoliko ma le lotu Porotesano ni taumafaiga e fuafua ina ia taʻuleagaina ai Russell. Peitaʻi sa leʻi faamaamulu ai o ia ma ana aumea. Sa latou sāʻili atu ma le talitonu maumauaʻi i le agaga o le Atua mo se taʻitaʻiga. Na faapea mai Russell: “O le faamautinoaga mai lo matou Alii e faapea . . . o le agaga paia o le Tamā, lea e auina mai ona o Iesu lo tatou Togisala, o le Puluvaga ma o le Ulu, o le a avea ma o matou aʻoaʻo.” Ma na aʻoaʻo moni mai lava le agaga paia! Na faaauau ona inuina e nei tagata aʻoga faamaoni o le Tusi Paia vai mamā o le upu moni mai le Tusi Paia, ma latou folafola atu na upu moni i le lalolagi aoao.—Faaaliga 22:17.

Ua silia nei ma le senituri o nofo sauni pea le faalapotopotoga i ona po nei a Molimau a Ieova e tali atu i taʻitaʻiga a le agaga paia o le Atua. A o faasolosolo pea ona faapupula mai e le agaga o Ieova lo latou malamalama faaleagaga, ua faapena foʻi ona lotomalilie Molimau e faia ni fetuutuunaʻiga manaʻomia e faatatauina ai le malamalamaga fou ua iai.—Faataoto 4:18.

“E Fai Foi Outou ma Molimau ia te Au”

Sa faaalia mai e Iesu le isi foʻi faailoaga o le agaga paia o le Atua ina ua ia fetalai atu i ona soo: “O le a maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au . . . i le tuluʻiga o le lalolagi.” (Galuega 1:8) O loo  faatatau mai pea i aso nei le folafolaga a Iesu e na te foaʻiina mai i ona soo le “mana” ma le “Agaga Paia” ina ia mafai ai ona latou faatinoina la latou galuega na tofia mai e le Atua.

I lo latou tulaga o se vaega, ua lauiloa ai Molimau a Ieova i la latou galuega talaʻi. (Tagaʻi i le pusa.) O le mea moni, ua silia i le 230 atunuu ma vaega o atumotu o loo taʻutaʻu atu i ai e Molimau a Ieova le feʻau o le upu moni. I lalo o so o se tulaga e mafaufauina, e aofia ai le lamatiaina o o latou ola i nofoaga o faiga taua, latou te sii aʻe ai ma le lototele o latou leo ina ia lagolago atu i le Malo o le Atua. O lo latou māʻelegā mo le faiva faa-Kerisiano e aumaia ai se faamaoniga mālosi e faapea, o loo faagaoioia le agaga paia i aso nei. Ma ua manino mai o loo faamanuia e Ieova le Atua a latou taumafaiga.

Mo se faaaʻoaʻoga, i le tausaga talu ai, e silia ma le tasi le piliona itula na faaaluina i le talaʻiga o le tala lelei o le Malo o le Atua. Faatasi ai ma ā iʻuga? E tusa ma le 323,439 tagata na faailogaina lo latou tuuina atu i le Atua e ala i le papatisoina i le vai. E lē gata i lea, e 4,433,884 suʻesuʻega faale-Tusi Paia e faia i ʻāiga i vaiaso taʻitasi sa faia ma tagata fou lotofiafia. Pe a tuufaatasi mea uma, e tusa ma le 24,607,741 tusi, 631,162,309 mekasini, ma le 63,495,728 o polosiua ma tamaʻitusi na ofoina atu. Maʻeu se molimau mālosi i le faagaoioia o le agaga o le Atua!

Le Agaga o le Atua ma Oe

Pe a tali lelei mai se tasi i le tala lelei, ua faaōgatusa lona olaga ma tapulaa a le Atua, ma faaalia mai lona faatuatua i le sauniuniga o le togiola, ona tatala atu lea i ai o le avanoa mo lona mauaina o se tulaga mamā faatasi ma le Atua. O i latou na sa faapea atu i ai le aposetolo o Paulo: “O le Atua . . . ua foaʻi mai lona [a]gaga [p]aia ia te outou.”—1 Tesalonia 4:7, 8; 1 Korinito 6:9-11.

O le mauaina o le agaga o le Atua e iʻu ai i le tele o faamanuiaga lelei. O ā ituʻāiga o faamanuiaga? O se tasi o mea, ua faapea mai le Afioga faagaeeina a le Atua: “O le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le amio mamā.” (Kalatia 5:22, 23, LF ) O lea la, o le agaga paia o le Atua o se uunaʻiga mālosi mo mea lelei, e mafai ai e se tasi ona ia faaalia mai uiga faale-Atua.

E lē gata i lea, pe afai e te faitauina le Tusi Paia ma faatatauina mea o loo e aʻoaʻoina, e mafai ona fesoasoani atu le agaga o le Atua ia te oe ina ia tuputupu aʻe lou tomai e te atamai ai, e faapoto ai oe, e te malamalama ai, e fai ai au filifiliga, ma e mafaufau ai. Na maua e le tupu o Solomona “le poto ma le loto matala e matuā tele lava, ma le loto e oo i mea e tele” auā sa ia taumafai e faafiafia le Atua na i lo le faafiafiaina o tagata. (1 Tupu 4:29) Talu ai o Ieova na foaʻiina le agaga paia ia Solomona, e mautinoa la o le a ia lē taofia lona agaga paia mai ia i latou o ē sāʻili ina ia faafiafia o ia i aso nei.

E fesoasoani foʻi le agaga paia o le Atua i Kerisiano ina ia latou tetee atu ia Satani ma temoni, i lenei faiga o mea amioleaga, ma faanaunauga agasala o o latou tino augavale. E faapēfea ona mafai lena mea? Ua tali mai le aposetolo o Paulo: “Ou te mafaia mea uma lava ona o ia ua faamalosi mai ia te au.” (Filipi 4:13, LF ) Atonu e lē aveesea e le agaga paia puapuaga po o tofotofoga; peitaʻi, e mafai ona fesoasoani atu ia te oe ina ia e onosaʻia na mea. E ala i le faalagolago atu i le agaga o le Atua, e mafai ai ona tatou maua le “matuā tele o le mana” ina ia fesagaʻia so o se faalavelave po o se mafatiaga.—2 Korinito 4:7; 1 Korinito 10:13.

Pe a e iloiloina faamaoniga uma, e itiiti lava sina masalomia faapea o loo gaoioi le agaga paia o le Atua i aso nei. E faamālosia e le agaga o Ieova ana auauna ina ia molimau atu e faatatau i ana fuafuaga sili. O loo faaauau pea ona ia faaalia mai pupula o le malamalama faaleagaga, ma faamālosia ai lo tatou faatuatua, e ala i le fesoasoani mai ina ia tatou tūtūmau ona faamaoni atu i Lē na Foafoaina i tatou. Maʻeu so tatou lotofaafetai ona o loo faamaoni pea le Atua i lana folafolaga e ala i le auina mai o lona agaga paia i ana auauna faamaoni i aso nei!

[Faamatalaga pito i lalo]

[Pusa i le itulau 10]

Faamatalaga a Isi e Faatatau i Molimau a Ieova

“A o taumafai isi lotu e totogi ni tagata faufautua ina ia faatōsina maia tagata e auai i sauniga lotu po o le taumafai ona taulimaina matāʻupu faaonaponei e pei o faiga faatauātane ma le faapaʻūtama, ae o Molimau e matuā lē lolo atu lava i se ituʻāiga o lalolagi ua suia faapena. O loo latou faatinoina pea la latou galuega talaʻi i le lalolagi aoao.”—The Orange County Register o Orange County, Kalefonia, Iunaite Setete o Amerika.

“Pe a tuu mai i le tulaga o le faalauiloaina atu o le faatuatua, e itiiti lava ni lotu o loo māʻelegā . . . e pei o Molimau a Ieova i le faia faapea.”—The Republic o Columbus, Indiana, Iunaite Setete o Amerika.

“Ua na o latou lava tagata o loo ō atu i lea fale i lea fale ma ‘le tala lelei,’ i le faatatauina o matāʻupu silisili o le Tusi Paia.”—Życie Literackie, Polani.

“I se tauiviga sili ona maoaʻe o le talaʻiga, ua faaoo atu ai e Molimau a Ieova le feʻau a Ieova i le lalolagi atoa.”—News-Observer, Tamaqua, Pennsylvania, Iunaite Setete o Amerika.

[Ata i le itulau 9]

O le agaga paia o le Atua e maua ai le poto faaleagaga,

. . . e uunaʻia atili ai uiga lelei faa-Kerisiano,

. . . ma lagolagoina i tatou i le galuega talaʻi i le lalolagi aoao