Fai Faiva mo Tagata i le Sami o Ainea

O LE atunuu o Eleni i le itū i mātū ma sisifo, o le motu o Kereta i saute, ma Take i le itū i sasaʻe, ua ufitia ai e le Sami o Ainea (Aegean) se vaega tele o le itū i sasaʻe o le Metitirani. Sa avea lenei nofoaga ma amataga o ni atunuu tetele anamua, ma ua tutū solo ai i le Sami o Ainea ia motu tetele ma motu laiti. Ona o le foliga lē gatasitasi o motu, ua tūtū solo mai ai ātufalega papaʻe laiti ua feilafi mai i le lā, na faagaeeina ai se tasi tusi solo e faatusaina na motu i ni “solofanua maa ua tutū fulufulu o o latou tuāua.”

E lētioa ona avea nei motu o se tasi o nofoaga sili ona lauiloa e tōsina atu i ai turisi o le lalolagi! Ua faaopoopo atu lo latou matagofie faaletino, i uiga sili ona lelei o tane ma fafine o ē o loo nonofo ma galulue ai iinā. O ni tagata e lē fia faalialiavale ma e talimalo, ae e lē faalagolago i nisi, ua faaopoopo atu ai e nei tagata se uiga ua tutasi ai lenei vaipanoa.

O le toʻatele o tagata o nei motu e maua mea e ola ai e ala i faiga faiva i le Sami o Ainea. Ae peitaʻi, o se isi ituʻāiga o ‘faiga faiva’ tāua ua aumaia ai le anoanoaʻi o iʻuga lelei i lena vaipanoa. O le “fai faiva i tagata,” ua feasiasiaʻi ai i motu o le Sami o Ainea le ʻaufaievagelia o le tala lelei o le Malo o le Atua, i le faia o soo Kerisiano.—Mataio 4:18, 19; Luka 5:10.

I le tusa ma le 19 senituri ua mavae, na asiasi atu ai le ʻaufaievagelia Kerisiano i motu o le Sami o Ainea. I le tusa ma le 56 T.A., na mālōlō puupuu ai le aposetolo o Paulo i motu o Lésvos, Kioi, Samo, Ko, ma Roto ina ua toe foʻi atu mai lana malaga faamisionare lona tolu. Ona o se tagata talaʻi māʻelegā, ma le mautinoa sa talaʻi ai Paulo i ni tagata o le motu. (Galuega 20:14, 15, 24; 21:1, 2) Mulimuli ane ina ua mavae le lua tausaga na faafalepuipuiina ai o ia i Roma, e foliga mai na asiasi atu o ia i Kereta ma auai i le galuega faa-Kerisiano iinā. E latalata i le faaiʻuga o le uluaʻi senituri, na faaaunuuaina ai le aposetolo o Ioane i le motu o Patamo “ona o le afioga a le Atua ma le mau ia Iesu.” (Faaaliga 1:9) O ā iʻuga lelei ua maua e ē folafola le tala lelei i aso nei i na motu?

Tauiviga Tauia o le Talaʻiga

O le talaʻi i nei vaega o motu e faigatā ma e tele mea e manaʻomia ai. E manaʻomia ai se taumafaiga mālosi ma ni faataulagaina tōtino. O nisi motu e matuā vāvāmamao lava. I nisi o motu e seāseā ona iai ni auala e femalagaaʻi ai i le ʻea ma le sami, a o isi, e matuā leai lava, aemaise lava i le vaitaimi o le tau mālūlū. E ono sou le sami aemaise pe a āgi le meltemia—o matagi mālolosi mai mātū i vaitaimi patino o le tausaga. E lē gata i lea, o nuu i le tele o motu e tutū mamao ese ma e faigatā ona oo atu i ai ona o le matuā faigatā ona uia o ia auala pefu e lē faatāina. O nisi nuu e pau lava le auala e mafai ona oo atu i ai o le ui atu lea i le sami i vaa laiti.

Seʻi fai ma faaaʻoaʻoga le motu o Icaria. E lē mafai e le ʻautalaʻi o le tala lelei o le Malo e toʻa 11 i le faapotopotoga laʻitiiti iinā ona galueaʻiina nuu uma i lena motu ma motu laiti e latalata ane. I lea, e ō mai ai uso ma tuafāfine Kerisiano mai Samo e fesoasoani e talaʻi atu i tagata i Icaria, faapea ma i latou i motu o Phournoi, Patamo, ma Lipsos. Talu ai  nei i le taimi o se tauiviga faapena e lua aso, na mafai ai e Molimau ona tufa atu mekasini e 650, polosiua e 99, ma tusi e 25 e faatatau i matāʻupu faale-Tusi Paia! Sa faateʻia i latou ina ua feiloaʻi atu i tagata e matuā lē iloa po o ai Ieova, sa ʻaiʻoi ane tagata ia i latou ina ia nonofo pea e aʻoaʻo atili i latou i le Tusi Paia. Na taʻu atu e se tamaʻitaʻi i se tasi Molimau e faapea: “Ia, o lea o le a tou ō nei. Ae o loo tele pea ni aʻu fesili e uiga i le Tusi Paia. O ai o le a fesoasoani mai ia te aʻu?” Na folafola atu e le tuafafine Kerisiano o le a tulitatao atu pea lona naunau e ala i le faaaogāina o le telefoni, ma na amata ai se suʻesuʻega faale-Tusi Paia i lena auala.

Ina ua asiasi atu se ovasia femalagaaʻi i Icaria, sa ia fuafuaina e tasi lava le faaiʻuga o le vāiaso e galueaʻiina ai le motu atoa. Sa ia faamaopoopoina le fesoasoani a le tusa ma le 30 le ʻautalaʻi o le Malo mai Samo. Sa totogi e uso na asiasi atu lo latou nonofo i se faletalimalo mo po e lua ma totogiina ni taavale mālolosi e mafai ona faaʻaai uma paʻu e fa e faaaogā. Na matuā mamafa timuga mo aso e lua, ma o le tala o le tau mo le faaiʻuga o le vāiaso sa ʻauāoa. Ae sa leʻi faatagaina e uso lena mea e taofia ai i latou, i le manatuaina o upu i le Failauga 11:4: “O le na te manatunatu i le matagi e le lulu saito e ia; o le na te vaavaai foi i ao e le selesele lava o ia.” Mulimuli ane, na faasolo ina feoloolo le tau, ma ina ua uma ona galueaʻiina le motu atoa i la latou feʻau tāua, na toe foʻi atu uso i o latou ʻāiga ma le fiafia ma loto ua faamalieina.

Na faia foʻi e le ʻautalaʻi e toʻa 16 o ē e nonofo i le motu o Andros se tauiviga sili ina ia galueaʻiina le motu atoa. Ina ua taunuu atu ni uso se toʻalua i se nuu e tū mamao ese, sa la filifili e talaʻi atu i tagata uma lava na ʻaināina le nuu. Sa la talanoa atu i tagata o i o latou ʻāiga, i luga o auala, ma i fanua. Sa la asiasi atu foʻi i le ofisa o leoleo ma tuu ai lōmiga. I le mautinoa na la feiloaʻi atu i tagata uma o le nuu, na sauni ai loa o le a ō ese. A o la ō ese mai le malae autu, na la iloa ai le patele o le Lotu Orthodox a Eleni o sau. Ina ua iloa e leʻi avatua i ai se molimau, sa la ofo atu loa i ai se sāvali, lea na ia talia ma le fiafia. O lea na la mautinoa ai e leai se tasi na misi i le la tauiviga o le talaʻiga!

O Kalauta—o se motu laʻitiiti e i le vaega pito i lalo o Kereta e na o le 38 tagata e ʻaināina—e manatu i ai o le faatausiʻusiʻuga i saute o Europa. (Galuega 27:16) Na faaaluina e se ovasia femalagaaʻi ma lona faletua, faapea ma se isi ulugalii, le tolu aso e talaʻi ai iinā. Ina ia faasao a latou tupe, na latou momoe ai i se faleʻie. Sa oo atu le tala lelei i tagata uma o le nuu, ma sa ʻoliʻoli uso ona sa lē faailogalotu tagata iinā. E latou te leʻi faalogo lava i se tala—lelei pe e leaga—e uiga i Molimau a Ieova. Na talia e tagata o le nuu, e aofia ai ma le patele tusi e 19 ma polosiua e 13. A o toe foʻi atu Molimau i Kereta i se vaa laʻitiiti, sa oo ina sou le sami, ma lamatia ai o latou ola. Na faapea mai i latou: “Sa matou faafetai ia Ieova ona sa matou taunuu saogalemu i o matou ʻāiga, ae sa matou vivii atu foʻi i a te ia ona o le faatagaina o i matou e faamamaluina lona suafa i lenei faatausiʻusiʻuga i saute o Europa.”

O Patamo o le motu lea na tusia ai e le aposetolo o Ioane le tusi mulimuli o le Tusi Paia, o Faaaliga. Sa leai se Molimau a Ieova i Patamo seʻia oo i se taimi lata mai nei. Sa faamaopoopoina lelei e uso mai Samo se tauiviga mo le talaʻiga. Sa latou iloa e ono latou fetaiaʻi ma ni teteega mataʻutia ona o le motu, e matuā toʻatele ai lava tagata o le Lotu Orthodox a Eleni. O ni tuafāfine se toʻalua na la molioo atu le tala lelei i se tamaʻitaʻi, sa valaʻaulia i laʻua i totonu o lona fale. Sa fesili atu pea le tane a le tamaʻitaʻi po o ai na aauina mai tuafāfine i lo la fale. Ina ua la faamatala atu e faapea o loo la asiasi atu i fale uma, na ia toe fesili atu: “E te lua faamaoni e leʻi auina mai oulua e nisi o tuāʻoi iinei?” O le avā, o lē na ia iloa e  uiga i Molimau a Ieova a o iai i Sāia, na ia faamatala mulimuli ane i tuafāfine le mea na tupu i lena taeao. Na faapea atu o ia: “Sa ou tatalo ia Ieova, e pei ona ou faia i isi aso, ina ia aauina mai e ia ni Molimau i le motu. Sa ʻata aamu laʻu tane ia te aʻu. Ina ua ou vaʻai atu ia te oulua i le faitotoʻa, sa faateʻia aʻu faapea foʻi ma laʻu tane. O le pogai lena o lona fesili atu pea po o ai na aauina mai oulua i lo ma fale.” Na faia loa lava se suʻesuʻega faale-Tusi Paia ma le tamaʻitaʻi. Sa faia le suʻesuʻega e ala i le telefoni mo le sefulu masina, e ui lava sa taugatā tele e lē gata i le tuafafine ae faapea foʻi le fafine fiafia. Na papatisoina o ia ma e na o ia le Molimau i lena motu lea na faaaunuua ai le aposetolo o Ioane i le 1,900 tausaga ua mavae.

“Fai Faiva” i Taulaga

O vaa laʻu pasese mo tagata tafafao, e āfea le tele o taulaga o motu o Ainea i tau māfanafana uma lava, e aumaia le anoanoaʻi o tagata tafafao maimoa. O lea, ua maua ai e Molimau a Ieova se avanoa tutasi e oo atu ai i tagata o le tele o atunuu ma gagana. E teuina e faapotopotoga ia lōmiga faale-Tusi Paia i le tele o gagana eseese, ma e faitau afe mekasini e tufa atu e tagata talaʻi i turisi. O nisi vaa laʻu pasese e āfea ia lava taulaga i vāiaso taʻitasi, ua maua ai e uso le avanoa aupito sili ona lelei e faia ai toe asiga ma oo lava ina faia ni suʻesuʻega faale-Tusi Paia ma nisi o le ʻauvaʻa.

I le tau māfanafana o le 1996, na molimau atu ai se tuafafine, o ia o se tagata talaʻi faataimi atoa i le motu o Roto i se tamāloa talavou mai Iamaika e faigaluega i se vaa laʻu pasese e masani ona asiasi atu i lena taulaga i Aso Faraile uma lava. O le isi Aso Faraile na sosoo ai, na valaʻaulia ai le tamāloa ina ia auai i se tauaofiaga itumalo sa faia i le motu. O le iai o se Tusi Paia faa-Peretania, na mafai ai ona fesoasoani le tuafafine paeonia i le tamāloa ina ia malamalama i nisi o upu moni o le Tusi Paia na aumaia i le polokalame. Na matuā faafiafiaina le tamāloa talavou i le alofa māfana na faaalia atu e Molimau i le tauaofiaga. I le Aso Faraile na sosoo ai, na ia valaʻaulia ai ni paeonia se toʻalua i le vaa. Na ave e paeonia ni lōmiga faa-Peretania ma le faa-Sepania. E leʻi atoa se itula ae ua gaogao a la ato talaʻi! Na suʻesuʻe e le tamāloa talavou mai Iamaika le Tusi Paia seʻia oo i le faaiʻuga o le tau māfanafana. I le isi tau māfanafana na toe foʻi atu ai o ia ma sa nofosauni e toe faaauau lana suʻesuʻega. Ae i le taimi lea, na filifili ai o ia e sui lana galuega ina ia mafai ai ona agaʻigaʻi i luma faaleagaga. Ona  ia toe alu foʻi lea. Maʻeu le fiafia o uso i Roto ina ua iloa e faapea, na papatisoina lenei tamāloa talavou i le amataga o le 1998!

Mauaina o ni “Iʻa” e Feofeoaʻi Solo

E lauiloa le Sami o Ainea i le anoanoaʻi o iʻa e feofeoaʻi solo, e pei o satini ma saʻulā, e fesopoaʻi i lona sami ma iʻu atu ai i upega o tagata fai faiva tomai. I se auala talitutusa, ua maua ai e le ʻaufaievagelia o le Malo le tele o lototalileleia i le lotolotoi o tagata faigaluega e femalagaaʻi o ē ua siitia atu i Eleni mai le tele o atunuu o Europa i Sasaʻe.

O Rezi, se teineitiiti, sa sefulu tausaga lona matua ina ua ia uluaʻi faitau e uiga ia Ieova ma ana fuafuaga i Le Olomatamata ma le Ala Mai! I le taimi lena a o iai i Alapania. I le tolu tausaga mulimuli ane, na siitia atu ai o ia ma lona ʻāiga i le motu o Roto. I se tasi aso, na tatalo atu ai Rezi ia Ieova e fesoasoani mai ia te ia i le sāʻilia o ona tagata i lona nuu fou. I le aso na sosoo ai na sau ai lona tamā i le fale ma mekasini masani, Le Olomatamata ma le Ala Mai!, ma sa fiafia tele ai Rezi. Na feiloaʻi Rezi ma le tuafafine lea na ia ave mekasini i lona tamā, ma e leʻi pine ae amataina loa se suʻesuʻega i le tusi o le Poto e Taʻitaʻia ai i le Ola e Faavavau. I nisi taimi, e talosaga atu ai o ia ina ia fai faatolu lana suʻesuʻega i lena lava aso! Ina ua mavae masina e lua na avea ai o ia ma tagata talaʻi e leʻi papatiso, ma ia Mati i le 1998, na papatisoina ai o ia i le 14 o ona tausaga. O le aso lava lena na amata ai ona paeonia lagolago o ia, ma i le ono masina mulimuli ane na tusia ai lona igoa e avea o se paeonia sauatoa, po o se faifeʻau faataimi atoa.

Sa suʻesuʻe se uso i le motu o Ko ma ni tagata mai Rusia. Ina ua ia fesili atu ia i latou pe iai ni a latou uō o ē e mananaʻo e suʻesuʻe le Tusi Paia, na latou faasino atu o ia i se ulugalii mai Aminia—o Leonidas ma lana avā o Ophelia—i se nuu pe ā ma le 20 maila [30 kilomita] le mamao. Sa faateʻia lava uso. Na avatu e le ulugalii mai Aminia se taga e tumu i lōmiga faale-Tusi Paia i le gagana Aminia ma le faa-Rusia na lōmia e le Sosaiete o le Olo Matamata! Na la faamatala atu e faapea, na la suʻesuʻe le Tusi Paia ma Molimau a Ieova ma na agaʻigaʻi i luma i le tulaga ua avea o ni tagata talaʻi e leʻi papatisoina. Ona o tulaga fesouaʻiina faapolotiki ma faigatā tau tamāoʻāiga, na la tuʻua ai lo la nuu moni. O le taimi lava na la taunuu ai i Ko, na amata ai ona la suʻesuʻe ma le tinā ma le tuafafine o Leonidas, o ē na muaʻi iai iinā. Na faafuaseʻi lava ona maua suʻesuʻega faale-Tusi Paia e tolu a le Molimau—o le tasi sa faia ma Ophelia, o le tasi sa faia ma Leonidas, ma le isi o lona tinā ma lona tuafafine. O lenei mea sa manaʻomia ai ona faimalaga i se uilaafi mo le 40 maila [60 kilomita] i le alu ma le toe foʻi mai e faatolu i le vāiaso. I ni nai masina mulimuli ane, na papatisoina ai Leonidas ma lana avā. Maʻeu se taui ona o le agaga faataulagaina totino o uso i le faapotopotoga i lena vaipanoa!

E Faatupu e Ieova

Ua iloatino faamanuiaga a Ieova i taumafaiga lē faavaivai a le sili atu i le 2,000 tagata tiotio o ē faalauiloa le Malo i nei motu o le Ainea. I le taimi nei, ua iai ia faapotopotoga e 44 ma vaega e 25 o Molimau a Ieova iinā. Mai vaega, e 17 e faia i gagana a isi atunuu ese, talu ai o le finagalo o Ieova “ina ia faaolaina o tagata uma lava, ma ia oo ina iloa lelei le upu moni.” (1 Timoteo 2:4) E lē gata i lea, o paeonia faapito e 13 o loo latou faia se taumafaiga mālosi faateleina ina ia oo atu ai i le isi toʻatele o tagata i na oganuu mamao ese.

Mo le tele o senituri, sa avea ai le Sami o Ainea o se ogatotonu o taualumaga faaleaganuu ma fefaatauaʻiga tau tamāoʻāiga. I nai sefulu tausaga na seʻi mavae atu, na avea ai le Sami o Ainea ma nofoaga e sili ona naunau i ai mo maimoaga mo le faitau selau afe o turisi. Ae o le mea e sili ona tāua, i le avea ma ē “fai faiva i tagata,” ua maua ai e i latou o ē faalauiloaina le Malo i nei motu le tele o tagata lotofaamaoni e naunau e vivii atu ia Ieova. I se auala sili, ua latou tali faatasi atu ai i le valaʻaulia faavaloaga e faapea: “Latou te avatu le faaneeneega ia Ieova, ma latou taʻu atu lona viiga i nuu tu matāfaga.”—Isaia 42:12.

[Faafanua i le itulau 22]

(Tagaʻi i le lomiga mo le ata atoa)

ELENI

TAKE

Lésvos

Kioi

Samo

Icaria

Phournoi

Patamo

Ko

Roto

Sami o Ainea

Kereta

[Ata i le itulau 23]

Le motu o Lésvos

[Ata i le itulau 24]

Le motu o Patamo

[Ata i le itulau 24]

Le motu o Kereta