Fesili Mai le ʻAufaitau

E tolu Evagelia o loo faamatala maia le faitioga na fai e faatatau i le uuina o Iesu i se uu taugatā. Pe na toʻatele ni aposetolo na faitio, pe sa na o Iuta lava?

Ua tatou maua lenei mea na tupu o loo faamatala mai i Evagelia a Mataio, Mareko, ma Ioane. E foliga mai o Iuta na taʻimua i le faitioga, ona iai lea ma nisi aposetolo na lagolago atu ia te ia. E faaalia mai e lenei mea na tupu, le pogai e mafai ai ona tatou lotofaafetai ona o le iai o tala e fā a Evagelia. O mea na tusitusia e tusitala taʻitasi sa saʻo lelei, ae sa lē tutusa auʻiliʻiliga na aumaia e i latou uma. O le fefaatusatusaaʻi o tala e tutusa i se mea na tupu, e mafai ai ona tatou maua se vaʻaiga e sili atu ona atoatoa, se vaʻaiga e sili atu ona auʻiliʻili o le tele o mea tutupu.

O le tala i le Mataio 26:6-13, (LF) o loo taʻu mai ai le nofoaga—o le fale o Simona le lepela, i Petania—ae lē o taʻu maia le igoa o le fafine na amata liligiina le uu manogi i le ao o Iesu. Ua faamatala mai e Mataio faapea: “Ua iloa e le au soo, ona tiga ai lea o latou loto” ma faitio faapea sa ono mafai ona faatau atu le suāuu ma maua mai ai ni tupe e foaʻi atu i ē matitiva.

O loo faaaofia mai e le tala a Mareko le tele o na auʻiliʻiliga. Ae ua ia toe taʻua le tataʻeina e le fafine o le fagu. Sa iai i le fagu le suāuu manogi o se “nato,” atonu o se suāuu na faatau mai Initia. E tusa ai o le faitioga, o loo lipotia mai e Mareko faapea, “sa i ai nisi na tiga ai o latou loto,” ma ‘latou muimui i le fafine.’ (Mareko 14:3-9) O loo faaalia la e tala e lua faapea e sili atu i le toʻatasi le aposetolo na aafia i le faitioga. Ae na faapēfea ona amata?

O Ioane, lea na molimau vaaitino i ai, sa ia faaopoopo mai ni auʻiliʻiliga tāua. O loo ia taʻua le igoa o le fafine—o Maria, le uso o Mareta ma o le tuafafine o Lasalo. Ua saunia mai foʻi e Ioane lenei auʻiliʻiliga, lea e mafai ona tatou vaʻai i ai o se faaatoaga o le manatu na i lo o se manatu e feteenaʻi: “Ua ia uu ai vae o Iesu, ma sōloi ona vae i lona lauulu.” I le tuufaatasia o tala, e mafai ai ona tatou iloa, atonu na liligiina e Maria le uu, lea ua faamautinoa mai e Ioane faapea o se “nato” maoʻi, i le ao ma aao (vae) o Iesu. Sa māfana tele Ioane ia Iesu o lea sa masani ona tigā tele ai lona loto i uiga lē lelei na faaalia ia te Ia. Tatou te faitau faapea: “Ona fai ane lea o le tasi o ona soo, o Iuta le Sekara, o lē faalata ia te ia, ‘Pe se a le mea na le faatau ai lena uu manogi i tenari e tolu selau, ma avatu ai i e matitiva?’”—Ioane 12:2-8, LF.

O le mea moni, sa avea Iuta o se “tasi o ona soo,” ae mafai ona e iloaina le matuā tigā o le loto o Ioane ona o se tasi i lenei tulaga, ae ua fuafua e faalataina Iesu. Sa faia e le tagata faaliliu o Dr. C. Howard Matheny se faamatalaga e uiga i le Ioane 12:4 e faapea: “O le veape o loo faamatalaina ai le taimi nei faifai pea, o le ‘ua toeitiiti ona’ [po o le, “sa toeitiiti ona,” NW] ma le veape o loo faamatalaina se gaoioiga maʻoti i le taimi nei,’ o le ‘ina ia faalataina’ [po o le, “sa toeitiiti ona faalataina,” NW], o na veape uma e lua e faaalia ai se gaoioiga faifai pea. O lenei itu e faaalia ai faapea, o le faalataina o Iesu e Iuta sa lē o se gaoioiga na faafuaseʻi pe na teʻi lava ua faapogai aʻe, auā o lea sa mafaufauina lelei ma fuafuaina mo le tele o aso.” Na faaopoopo mai e Ioane le malamalamaga e faapea, sa faitio Iuta, e lē faapea ona “ua alofa o ia i e matitiva, a ona o ia o le gaoi, ua ia te ia foi le ete tupe, ma na avea mea na fafao ai.”

E foliga mai la e talafeagai le faapea atu, o Iuta le gaoi, o ia lea na amataina le faitioga auā na semanū e tele atu nisi tupe na te gaoia pe ana fai e faatau atu le uu taugatā ma maua mai ai le tupe e tuu i le pusa tupe lea sa ia vaavaaia. O le taimi lava na lāgā ai e Iuta lana faitioga, atonu na iai nisi aposetolo na ioeina faapea o le manatu e foliga e talafeagai. Peitaʻi, o Iuta lava le taufaaoso autū o le faitioga.