Ia Maua le Faamāfanafanaga i le Mana o Ieova

“O le tele o manatunatu i loʻu loto ua fiafia ai loʻu agaga ona o faamafanafanaga mai ia te oe.”—SALAMO 94:19.

MO I latou uma lava o loo moomoo i ni faamaisega, o loo i le Tusi Paia upu faamāfanafana. E lētioa lava la taʻua e le World Book Encyclopedia e faapea “e anoanoaʻi tagata e liliu atu i le Tusi Paia mo faamāfanafanaga, faamoemoega, atoa ma le taʻitaʻiga i taimi o faafitauli atoa ma le lē mautonu.” Aiseā?

Auā na faagaeeina le Tusi Paia e Lē na Foafoaina i tatou, e agalelei, “o le Atua foi e ana le faamafanafanaga uma,” o Lē “na te faamafanafanaina mai ia te i matou i lo matou puapuaga uma lava.” (2 Korinito 1:3, 4) O Ia o ‘le Atua e tupu mai ai le faamafanafanaga.’ (Roma 15:5) Ua faataatia e Ieova le faaaʻoaʻoga i le saunia o le auala o le mapusaga mo i tatou uma. Ua ia auina mai lona Alo pele e toʻatasi, o Keriso Iesu, i le lalolagi ina ia aumai ia i tatou le faamoemoe ma le faamāfanafanaga. Na aʻoaʻo mai Iesu e faapea: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.” (Ioane 3:16) E faamatalaina e le Tusi Paia Ieova e faapea o ia o “lē tauaveina a tatou avega i aso taʻitasi, o le Atua moni o lo tatou faaolataga.” (Salamo 68:19, NW) O tagata la e matataʻu i le Atua e mafai ona fai atu ma le mautinoa e faapea: “Ou te tuu Ieova i oʻu luma e le aunoa; auā o i loʻu itu taumatau o ia, e le faagaeetia ai lava aʻu.”—Salamo 16:8.

O fuaitau faapena o le Tusi Paia e faaalia ai le loloto o le alofa o Ieova le Atua mo le fanau a tagata. Ua manino mai le iai o lona finagalo atoatoa—faapea foʻi lona tomai—e saunia ai le anoanoaʻi o faamāfanafanaga atoa ma le faaitiitia o o tatou tigā i taimi o puapuaga. “Na te avatua le malosi i e ua vaivai; a o e ua leai se malosi, na te faatuputele i ai le malosi.” (Isaia 40:29) E mafai la faapēfea, ona tatou maua faamāfanafanaga i le mana o Ieova?

O Āuga e Faafouina ai o le Tausiga a Ieova

Na tusia e le faisalamo e faapea: “Ia e tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia [“tautevateva,” NW].” (Salamo 55:22) Ioe, o loo naunau mai Ieova le Atua i le ʻāiga faaletagata. Sa faamautinoa atu e le aposetolo o Peteru i Kerisiano o le uluaʻi senituri e faapea: “O loo manatu mai o ia [le Atua] ia te outou.” (1 Peteru 5:7) Sa faamamafa e Iesu Keriso le faatāua o loo tuu atu e le Atua i tagata e ala i lona fetalai mai: “E le faataulia ea manu iti e lima gafua i asari e lua? E leai foi so latou e tasi ua galo i luma o le Atua. A o outou lauulu lava ua faitaulia uma ia. Aua tou te matatau; ua sili outou i manu iti e tele.” (Luka 12:6, 7, LF) E matuā tāua lava i tatou i le Atua, o le mea lea na te amanaʻia ai e oo lava i mea iti e uiga ia i tatou. Na te silafia mea e oo lava ia i tatou e tatou te lē iloaina ona e matuā naunau loloto mai ia i tatou taʻitoʻatasi.

O le iloaina o lenei naunau tōtino mai o Ieova sa faamaonia le avea ma faamāfanafanaga ia Sulana, le tamaʻitaʻi talitane talavou lea sa taʻua i le matāʻupu muamua. Na toeitiiti lava pule o ia i lona ola ae feiloaʻi loa ma Molimau a Ieova. Ona ia talia ai lea o se suʻesuʻega faale-Tusi Paia, lea sa fesoasoani ia te ia ina ia faamasani atu ai ia Ieova o se peresona moni o loo naunau mai mo lona lelei. Na pāʻia e lenei mea lona loto, uunaʻia ai o ia e suia le auala sa ia ola ai ma tuuina atu o ia i le Atua. Sa avatu ai foʻi ia Sulana le manatu mautinoa ia te ia lava ia, lea sa ia manaʻomia ina ia tūmau ai pea ma le onosaʻi e ui lava i faafitauli ma maua ai se vaʻaiga saʻo i le olaga. Fai mai lana faamatalaga i le taimi lenei: “Ua ou mautinoa, o le a lē taitai ona tuulafoaʻia aʻu e Ieova. Ua ou iloaina le moni o le mea o loo tusia i le 1 Peteru 5:7. O loo faapea mai: ‘Ia tuuina atu ia [Ieova] mea uma tou te popole ai, auā o loo manatu mai o ia ia te outou.’”

E Faamāfanafanaina i le Faamoemoe e Faavae i le Tusi Paia

O se auala patino lava o loo saunia ai e le Atua faamāfanafanaga e ala mai lea i lana Afioga tusia, o loo iai se faamoemoe matagofie mo le lumanaʻi. Na tusia e le aposetolo o Paulo e faapea: “O mea uma foi na tusia anamua, na tusia ia e aʻoaʻo mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi.” (Roma 15:4) Sa faamalamalama manino mai e Paulo le sootaga i le va o le faamoemoe moni ma le faamāfanafanaga ina ua ia tusi mai: “O . . . le Atua lo tatou Tamā, o le ua alofa mai ia te i tatou, ma na foai mai le faamatala loto faavavau, ma le faamoemoe lelei i le alofa tunoa, ia faamafanafana atu e ia i o outou loto, ma ia faatumauina outou i galuega lelei uma ma upu lelei uma.” (2 Tesalonia 2:16, 17) O lenei “faamoemoe lelei” e aofia  ai le avanoa o le ola lelei atoatoa, e fiafia, ma e lē uma, i luga o se lalolagi parataiso.—2 Peteru 3:13.

O le faamoemoe pupula ma le mautinoa lena sa faalāʻeiʻauina ai Laimoni, le pipili na pulea e le ʻava mālosi, lea sa taʻua i le matāʻupu muamua. O le faitauina o lōmiga faale-Tusi Paia a Molimau a Ieova, sa ia fiafia ai ina ua ia aʻoaʻoina e uiga i le lalolagi fou i lalo o le Malo o le Atua, lea o le a toe faaleleia atoatoa ai lona soifua mālōlōina. Sa ia faitauina le folafolaga pupula o loo i le Tusi Paia e uiga i le faamālōlōga faavavega lea o loo faapea mai: “Ona faapupulaina ai lea mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū.” (Isaia 35:5, 6) Sa faia e Laimoni ni suiga tetele, ina ia taʻuagavaaina ai mo le ola i lena Parataiso. Sa ia fulitua i le ʻava mālosi ma sa mātauina e ona tuāʻoi ma ē latou te masani lona suiga. I le taimi nei o loo ia taulimaina le tele o suʻesuʻega faale-Tusi Paia, ma fetufaaʻi ma isi i faamāfanafanaga e maua mai le faamoemoe o loo i le Tusi Paia.

Le Vaega a le Tatalo

Pe a iai se mea e mafatia ai o tatou loto, tatou te maua faamāfanafanaga e ala i le tatalo atu ia Ieova. O le auala lena e aveesea ai o tatou popolega. I taimi o a tatou talosaga, e ono faamāfanafanaina i tatou e ala i le manatua o mea o loo fai mai ai le Afioga a le Atua. O le salamo aupito i umi o loo i le Tusi Paia e faatusaina i se tatalo matagofie. Na pese lē na fatuina e faapea: “Ieova e, ua ou manatu i au faamasinoga talu anamua, ona faamafanafanaina ai lea o aʻu.” (Salamo 119:52) I tulaga aupito i faigatā, ae maise lava pe a aafia ai le soifua mālōlōina, e masani ona leai se tali faigofie e mafai ona maua. Tatou te lē mafai i lo tatou lava mālosi, ona iloa tonu le mea e maua mai ai se fesoasoani. O le toʻatele lava ua latou iloa afai ua uma mea e mafai ona fai e le mālosi o le tagata, o le liliu atu i le Atua e ala i le tatalo e maua ai le tele o faamāfanafanaga ma, i nisi taimi, e maua ai vaifofō e leʻi faatalitalia.—1 Korinito 10:13.

O āuga faamāfanafana nei o le tatalo na oo ia Peti, lea sa faatopetope atu i se potu o le falemaʻi mo faalavelave faafuaseʻi. Ina ua toe mālosi, fai mai lana faamatalaga: “Sa ou tatalo atu ia Ieova ma matuā ou aʻoaʻoina e tuu atu loʻu ola i ona aao, ma faatuatua ia te ia e fai po o le ā lava lona finagalo. I lena taimi atoa, sa ou toʻa lelei; sa oo ia te aʻu le fīlēmū mai le Atua lea o loo taʻua i le Filipi 4:6, 7.” Maʻeu le faamāfanafanaina ai o i tatou uma lava i nei fuaiupu! Iinā o loo tōmatauina ai i tatou e Paulo e faapea: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia [“fīlēmū,” NW] foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”

Le Agaga Paia o se Faamāfanafana

I le po a o lumanaʻi lona maliu, sa faamanino atu e Iesu i ona aposetolo e faapea ua lē o toe umi ona ia tuʻua lea o i latou. Sa latou lē fiafia ma faanoanoa ai i lenei mea. (Ioane 13:33, 36; 14:27-31) I le iloaina o lo latou manaʻoga faaauau mo faamāfanafanaga, na folafola atu e Iesu e faapea: “Ou te fai atu foi i le Tamā, ona foai mai ai lea e ia ia te outou le tasi Fesoasoani [po o, se faamāfanafana], ina ia tumau pea o ia ia te outou e faavavau.” (Ioane 14:16; faamatalaga i lalo, NW) Iinei sa faasino atu ai Iesu i le agaga paia o le Atua. E faaopoopo atu i isi mea, sa faamāfanafanaina e le agaga o le Atua le ʻauaposetolo i taimi o o latou faaosoosoga ma faamālosia i latou e faaauau ona latou faia le finagalo o le Atua.—Galuega 4:31.

O Anela, lea na toeitiiti maliu lana tane i se faalavelave matuiā, sa mafai ona taulau manuia lona feagai ai ma mafatiaga ma faigatā uma o lona tulaga. O le ā sa fesoasoani ia te ia? Fai mai lana faamatalaga: “Pe ana lē seanoa le fesoasoani a le agaga paia o Ieova, semanū e lē mafai ona matou sao mai i mea na oo ia i matou ma tūmau ai i le mālosi. O le mea moni ua faaalia le mālosi o Ieova e ala i o tatou vāivaiga, ma ua faamaonia o ia o lo tatou malu i taimi o puapuaga.”

Se ʻAuuso o Faamāfanafanaga

Po o le ā lava le tulaga o tagata taʻitoʻatasi i le olaga, po o ā lava tulaga tigā e tutupu mai, e ao ona mafai ona maua faamāfanafanaga i le ʻauuso o loo iai i le faapotopotoga a Ieova. E saunia e le ʻauuso  le lagolagosua faaleagaga ma le fesoasoani mo i latou o loo aufaatasi atu i ai. O iinā, e mafai ona maua ai e se tasi se vaega alolofa, e manatu mamafa, ma ni uō e faamāfanafana mai, o ē nonofosauni ma naunau e fesoasoani ma faamāfanafana i isi i taimi o mafatiaga.—2 Korinito 7:5-7.

Ua aʻoaʻoina sui o le faapotopotoga ina ia “agalelei . . . i tagata uma lava, aemaise [latou] i le aiga o le faatuatua.” (Kalatia 6:10, LF) O le aʻoaʻoina e faavae i le Tusi Paia lea ua latou mauaina ua uunaʻia ai i latou e faaalia le alofa faaleuso ma faapelepele le tasi i le tasi. (Roma 12:10; 1 Peteru 3:8) Ua uunaʻia uso ma tuafāfine faaleagaga i le faapotopotoga ina ia agalelei, faamāfanafana, ma alofa mutimutivale.—Efeso 4:32.

O Siō ma Repeka, lea na maliu le la tama tama, sa la mauaina le ituʻāiga lagolagosua lena e faamāfanafanaina ai mai tagata o le faapotopotoga Kerisiano. Na la faapea mai: “Sa fesoasoani mai Ieova atoa ma lana faapotopotoga alofa ia i maʻua i o ma taimi faigatā. Sa ma mauaina le faitau selau o tusi, o telefoni, o feʻau faamāfanafana. Na faapogaia e lenei mea lo ma talisapaia o le tautele o lo tatou ʻauuso. A o ma mafatia i le mea na tupu, e toʻatele faapotopotoga taulalata mai sa fesoasoani mai ia i maʻua, i le saunia o taumafa ma le faamamāina o le fale.”

Ia Faamāfanafanaina!

Pe a amata ona pesi mai matagi o tulaga faigatā, ma faaauau ona totō ifo ma le lē motusia uaga o puapuaga, ua nofosauni le Atua e saunia le puipuiga e faamāfanafanaina ai. O le auala lenei o loo faamatalaina ai o ia e se tasi o salamo i le avea ai o sē na te saunia le lafitaga e faamāfanafanaina ai: “E ufiufi ifo o ia ia te oe i ona apaau, e te sulufai foi i lalo o ona apaau.” (Salamo 91:4) O le faataʻitaʻiga o loo iinei atonu o loo faasino atu i se aeto. O se vaʻaiga i se manulele na te iloa atu se lamatiaga ona faaloloa atu lea o ona apaʻau e puipui ai lana toloaʻi. I se uiga la e sili atu, e avea Ieova o Lē e Puipuia moni i latou e sulufaʻi atu ia te ia.—Salamo 7:1.

Afai e te fia aʻoaʻoina atili mea e uiga i le Atua, ona uiga tōtino, ana fuafuaga, atoa ma lona tomai e saunia ai faamāfanafanaga, e valaʻaulia oe ina ia e suʻesuʻeina lana Afioga. E fiafia Molimau a Ieova e fesoasoani atu ia te oe i lena taumafaiga. Ioe, e te mafai foʻi ona e maua faamāfanafanaga i le mana o Ieova!

[Ata i le itulau 7]

E mafai e le faamoemoe faale-Tusi Paia mo le lumanaʻi ona saunia faamāfanafanaga