Le Lalolagi Fou—Pe o le a E Iai Iinā?

“E leai se mea lelei ia te i latou, na ona ia olioli le tagata, ma ia fai mea lelei i lona olaga nei. I le ma lea, ia taitasi le tagata ma ʻai, ma inu, ma fiafia i mea lelei i ana galuega uma; o le mea foaiina mai lea e le Atua.”—FAILAUGA 3:12, 13.

1. Aiseā e mafai ai ona mautinoa o tatou faamoemoega e uiga i le lumanaʻi?

E TOʻATELE tagata ua manatu i le Atua e Ona le Mālosi Uma Lava faapea o se Atua e sauā, e soona inainā. Peitaʻi, o le mau o loo taʻua i luga o se upu moni o le a e mauaina i lana Afioga faagaeeina. E ōgatusa ma lona avea ma “Atua fiafia” ia lona tuuina o o tatou uluaʻi mātua i se parataiso i le lalolagi. (1 Timoteo 1:11, NW; Kenese 2:7-9) A o sāʻili atu ina ia malamalama i le lumanaʻi lea e folafola mai e le Atua mo ona tagata, e lē tatau ona faateʻia i tatou i le iloaina o tulaga o le a aumaia ai ia i tatou le fiafiaga tūmau.

2. O ā nisi o mea o loo e nofo faatalitali atu i ai?

² I le matāʻupu na muamua atu, sa tatou iloiloina ai taimi e tolu mai taimi e fā ia o loo valoia mai ai e le Tusi Paia “le lagi fou ma le lalolagi fou.” (Isaia 65:17) O se tasi o na valoaga maufaatuatuaina o loo faamauina i le Faaaliga 21:1. O fuaiupu o loo sosoo mai ua taʻu mai ai le taimi o le a suia faafuaseʻi ai e le Atua e Ona le Mālosi Uma Lava tulaga o le lalolagi ina ia iai se faaleleiga. O le a ia soloiesea loimata o le faavauvau. O le a lē toe iai ni tagata e maliliu ona o le soifuaga matua, o maʻi, po o faalavelave faafuaseʻi. O le faanoanoa, le auē, ma tigā o le a mavae atu. Maʻeu se faamoemoega  fiafia! Ae pe mafai ea ona tatou mautinoa o le a oo mai na mea, ma o le ā se aafiaga o i tatou i le taimi lava lenei ona o lena faamoemoega?

Māfuaʻaga mo le Talitonu Mautinoa

3. Aiseā e mafai ai ona tatou faatuatuaina folafolaga a le Tusi Paia e faatatau i le lumanaʻi?

³ Mātau le auala o loo faaauau mai ai le Faaaliga 21:5. O loo sii mai ai fetalaiga a le Atua, lea e afio i lona nofoālii faalelagi, ma faalauiloa mai: “Faauta, ou te faia ia fou mea uma lava.” O lena folafolaga tauatua e sili atu ona lelei na i lo se isi lava folafolaga o se tutoʻatasi faalemālō, so o se iʻugafono i aso nei mo ni aiā tatau, po o so o se faanaunauga faaletagata mo le lumanaʻi. O se folafolaga e matuā mautinoa lona maufaatuatuaina mai Lē ua faapea mai le Tusi Paia, “e le mafai ona tala pepelo.” (Tito 1:2) O le mea masani lava, e ono iai ni ou lagona faapea e leai se isi mea e toe manaʻomia, o lea ua tatou fiafia nei i lenei faamoemoe matagofie ma faatuatua atu i le Atua. Peitaʻi e lē manaʻomia ona tatou taofi ai loa iinā. E tele nisi mea e tatau ona tatou aʻoaʻoina e faatatau i lo tatou lumanaʻi.

4, 5. O ā valoaga o le Tusi Paia ua uma ona talanoaina e mafai ona faamālosia atili ai lo tatou mautinoa e faatatau i mea o i le lumanaʻi?

⁴ Seʻi toe tepa i le manatu na faamanino mai e le matāʻupu na muamua atu e tusa ai o folafolaga a le Tusi Paia i le lagi fou ma le lalolagi fou. Na valoia mai e Isaia lena faiga fou o mea, ma na iai se faataunuuga o lana valoaga ina ua toe taliu tagata Iutaia i lo latou nuu moni ma toe faavae le tapuaʻiga moni. (Esera 1:1-3; 2:1, 2; 3:12, 13) Peitaʻi, pe na pau ea lena o mea na faasino atu i ai le valoaga a Isaia? E mautinoa e leai! O mea sa ia valoia o le a faataunuu i se tulaga e sili atu ona mataʻina i le lumanaʻi o loo mamao ese atu. Aiseā ua tatou faia ai lena faaiʻuga? Ona o mea o loo tatou faitau ai i le 2 Peteru 3:13 ma le Faaaliga 21:1-5. O loo faasino atu na fuaitau i le lagi fou ma le lalolagi fou o le a manuia ai Kerisiano i le lalolagi aoao.

⁵ E pei ona taʻua muamua atu, e faafā ona faaaogā e le Tusi Paia le fuaitau “lagi fou ma le lalolagi fou.” Ua tatou talanoaina le tolu o nei faaaogāina ma ua tatou mauaina ai ni faaiʻuga faalāʻeiʻau. Pe a tuusaʻo le manatu, ua valoia mai e le Tusi Paia faapea, o le a soloiesea e le Atua le amioleaga ma isi pogai o mafatiaga ona ia faamanuia atili mai lea i le fanau a tagata o i lana faiga fou o mea ua folafola mai.

6. O le ā o valoia mai e le valoaga lona fā lea e taʻua ai le “lagi fou ma le lalolagi fou”?

⁶ Seʻi o tatou iloilo nei le faaaogāina lea o loo totoe o le faaupuga “lagi fou ma le lalolagi fou,” i le Isaia 66:22-24: “E pei ona tumau i oʻu luma o le lagi fou ma le lalolagi fou ou te faia, ua fetalai mai ai Ieova, e faapea ona tumau o a outou fanau ma lo outou igoa. O lea masina faatoa vaaia, ma lea masina faatoa vaaia, o lea sapati ma lea sapati e o mai ai tagata uma lava e ifo mai i oʻu luma, ua fetalai mai ai Ieova. Latou te o atu foi, ma latou matamata i tino o tagata oti ē sa fouvale ia te au; auā e le mamate o latou ilo, e le tineia foi lo latou afi; e inosia foi i latou e tagata uma lava.”

7. Aiseā e tatau ai ona tatou faapea atu o le a iai se faataunuuga o le Isaia 66:22-24 i aso o lumanaʻi?

⁷ Sa iai se faatatauga o lenei valoaga i tagata Iutaia o ē na toe faafoʻisia i lo latou laueleele, peitaʻi o le a iai se isi faataunuuga. O lena faataunuuga sa tatau ona faataunuu ina ua mavae le tele o tausaga talu ona tusia le tusi lona lua a Peteru ma le tusi o Faaaliga, auā o na tusi ua faasino atu i le “lagi fou ma le lalolagi fou” i le lumanaʻi. E mafai ona tatou nofo tatali atu mo lena faataunuuga sili ma le atoatoa i le faiga fou o mea. Seʻi manatu i nisi o tulaga e mafai ona tatou nofo tatali atu i ai ina ia ʻoliʻoli ai.

8, 9. (a) I le ā le uiga o le a “tumau” ai pea tagata o le Atua? (e) O le ā le faauigaina o le valoaga faapea o le a tapuaʻi auauna a Ieova mai “lea masina faatoa vaaia, ma lea masina faatoa vaaia, o lea sapati ma lea sapati”?

⁸ Ua faaalia mai e le Faaaliga 21:4 o le a lē toe iai se oti. E ioe i lena manatu le fuaitau o i le Isaia matāʻupu e 66. E mafai ona tatou iloa mai le fuaiupu e 22 faapea, e silafia e Ieova o le a tūmau le lagi fou ma le lalolagi fou, e lē iai na o mo sina vaitaimi faatapulaa. E lē gata i lea, o le a tūmau ona tagata; o le a “tumau” i latou i ona luma. O mea ua māeʻa ona faia e le Atua mo ona tagata filifilia e aumaia ai ia i tatou se māfuaʻaga tatou te mautinoa ai. Ua fesagaʻi Kerisiano moni ma sauāga ogaoga, e oo lava i ni taumafaiga māʻelegā valea ina ia tafiesea i latou. (Ioane 16:2; Galuega 8:1) Peitaʻi, e oo lava i fili sili ona mālolosi o tagata o le Atua, e pei o le emeperoa Roma o Neru, ma Adolf Hitler, ua lē mafai ona la liaʻieseina atoatoa tagata faamaoni o  le Atua, o ē o loo tauaveina lona suafa. Ua faasaoina mai e Ieova le faapotopotoga a ona tagata, ma tatou te mautinoa e mafai ona ia faatūmauina pea e faavavau.

⁹ I se tulaga tutusa, o i latou o ē faatuatua i le Atua i le avea ma vaega o le lalolagi fou, le sosaiete o tagata tapuaʻi moni i le lalolagi fou, o le a faaauau pea ona latou taʻitoʻatasi ma tūtūmau auā o le a latou tuuina atu le tapuaʻiga mamā i Lē na Foafoaina Mea uma lava. O le a lē avea o se tapuaʻiga e seāseā faia ma faia i so o se auala. O Tulafono a le Atua lea na saunia mo Isaraelu e ala atu ia Mose, sa tāpā ai nisi o gaoioiga faaletapuaʻiga e ao ona faia i masina taʻitasi, e pei ona faailogaina e le masina fou, ma i vaiaso taʻitasi, e pei ona faailogaina i le aso o le Sapati. (Levitiko 24:5-9; Numera 10:10; 28:9, 10; 2 Nofoaiga a Tupu 2:4) O loo faasino atu la le Isaia 66:23 i le tapuaʻiga e faaauau pea ona faia e lē aunoa i le Atua, mai lea vaiaso i lea vaiaso ma lea masina i lea masina. O le a lē iai iinā ni tagata e lē talitonu o loo soifua le Atua, o le a lē iai foʻi ni faiga pepelo faalotu. ‘O le a o mai ai tagata uma lava e ifo mai i luma’ o Ieova.

10. Aiseā e mafai ai ona e talitonu ma le mautinoa o le a lē tūmau ona faaleagaina le lalolagi fou e tagata amioleaga?

¹⁰ Ua faamautinoa mai e le Isaia 66:24 ia i tatou faapea, o le a lē taitai ona iai i se tulaga lamatia le fīlēmū ma le amiotonu o le lalolagi fou. O le a lē faaleagaina e tagata amioleaga. Seʻi manatua o loo faapea mai le 2 Peteru 3:7, o loo lumanaʻi mai ia i tatou “le aso e faamasino ai ma fano ai tagata faalematau.” O ē o le a faaumatia o i latou ia faalēmataʻu. E leai se mea leaga e oo mai i ē lē sala, e lē pei o le mea e masani ona tupu i taua a tagata, e sili atu ona toʻatele tagata lautele e lavevea na i lo le aofaʻi o fitafita na tau. Ua faamautinoa mai e le Faamasino Sili ia i tatou faapea, o le a avea lona aso ma faatafunaga mo ē faalēmataʻu.

11. O le ā le iʻuga na faaalia e Isaia faapea o le a maua e so o se tasi e tetee atu i le Atua ma lana tapuaʻiga?

¹¹ O le a iloa e i latou amiotonu e faasaoina le moni o le afioga faavaloaga a le Atua. I le fuaiupu e 24 o loo valoia mai ai faapea, o le a avea “tino o tagata oti ē sa fouvale ia” Ieova ma faamaoniga o lana faamasinoga. O le gagana tuusaʻo sa faaaogā e Isaia atonu e faateʻia ai. Peitaʻi, e ōgatusa lava ma le mea moni o talafaasolopito. I fafo atu o pā o Ierusalema anamua sa iai faatafunaga mo lapisi, ma e iai nisi taimi, sa lafo atu foʻi i ai tinooti o tagata solitulafono sa faasalaina ma lē talafeagai i ai ni falelauasiga aloaʻia. * O iinā sa lē umi lava ae faamamā ese ai e anufe ma le afi na olaola pea, e lē gata i lapisi ae faapea foʻi na tinooti. E foliga mai, o mafaufauga faaāta o Isaia e faataʻitaʻia mai ai le iʻuga mulimuli lava o le faamasinoga a Ieova i tagata e faia le agasala.

 O Mea ua Ia Folafola Mai

12. O ā faailoaga atili ua aumaia e Isaia e tusa ai o le olaga i le lalolagi fou?

¹² Ua taʻu mai e le Faaaliga 21:4 ia i tatou nisi o mea o le a lē iai i le faiga fou o loo fotuaʻi mai. Peitaʻi ane, o ā mea o le a iai iinā? E faapeī le olaga o le a iai? Pe mafai ona tatou maua so o sina tau faaāta mai e maufaatuatuaina? Ioe. O loo faamatala faavaloaga mai e le Isaia matāʻupu e 65 tulaga o le a tatou ʻoliʻoli ai pe afai e faamaonia i tatou e Ieova e ola ai iinā i le uiga moni pe a faia e ia le lagi fou ma lalolagi fou. O i latou e faamanuiaina i se nofoaga e faavavau i le lalolagi fou o le a lē toe ola matutua ma oo atu ai i le oti. Ua faamautinoa mai e le Isaia 65:20 ia i tatou e faapea: “E le toe i ai i lea mea le tama meamea, po o le toeaina ua le atoatoa ona aso; auā e oti le taulealea ua selau ona tausaga; a o le ua agasala ua selau ona tausaga, e fetuuina o ia.”

13. E faapēfea ona faamautinoa mai e le Isaia 65:20 ia i tatou faapea o le a maua e tagata o le Atua le saogalemu?

¹³ Ina ua faataunuu lenei valoaga i tagata o Isaia, sa faauiga atu i le saogalemu o pepe i le nuu. E leai ni fili na ō mai i totonu, e pei ona sa faia e tagata Papelonia i se tasi taimi, ina ia latou aveesea pepe ma fasiotia tama tane o ē na iai i le tauosoosoga o lo latou mālosi i le olaga. (2 Nofoaiga a Tupu 36:17, 20) I le lalolagi fou o loo fotuaʻi mai, o le a malupuipuia tagata, o le a saogalemu, ma mafai ona latou ʻoliʻoli i le olaga. Pe afai e filifili se tagata e fouvale atu i le Atua, o le a lē faatagaina o ia e faaauau pea ona ola. O le a aveesea o ia e le Atua. Ae faapēfea pe afai o le tagata agasala lea e fouvale, ua selau tausaga lona matua? O le a oti o ia e pei o se “taulealea” pe a fua atu i le iai o se olaga e lē gata mai.—1 Timoteo 1:19, 20; 2 Timoteo 2:16-19.

14, 15. E faavae mai le Isaia 65:21, 22, o ā gaoioiga tauia e mafai ona e nofo tatali atu i ai?

¹⁴ Na i lo le matuā uaʻi atu e tau mafaufau ai pe o le a faapēfea ona tafiesea le tagata e faia agasala ma le loto i ai, ua faamatala mai e Isaia tulaga o le soifuaga o le a taatele i totonu o le lalolagi fou. Taumafai e faaāta i lou mafaufau faapea o loo e iai iinā. O mea atonu e muamua lava tau i ai lou mafaufau o mea ia e te naunau tōtino i ai. Ua faapea ona faamatalaina e Isaia na mea i le fuaiupu e 21 ma le 22: “Latou te faia fale, ma latou mau ai; latou te totō tovine, ma latou aai i o latou fua. Latou te le fai fale ina ia mau ai nisi; latou te le totō ina ia ʻai ai nisi; auā e pei o aso o le laau aso o loʻu nuu; e uma lava i e ua filifilia e aʻu o mea na faia e o latou lima.”

¹⁵ Pe afai e leʻi iai sou tomai tau faufale pe e te leʻi faia foʻi se togālaau, ua taʻu mai e le valoaga a Isaia se aʻoaʻoga o loo faatalia maia oe. Ae pe o le a e lotomalie ea e aʻoaʻoina mea, faatasi ai ma le fesoasoani mai i ni tagata ua agavaa e aʻoaʻoina oe, atonu o ni ou tuāʻoi agalelei o ē fiafia e fesoasoani atu ia te oe? Sa leʻi taʻua e Isaia pe faamata o le a iai ni faamalama tetele o lou fale e lē toe punipunia i ni tioata ae o le a faaaogā polasisi, ina ia mafai ai ona e ʻoliʻoli i le āgi mālū mai o fisaga o le teropika, po o ni faamalama tioata e mafai ona tatala i tua ina ia e mātauina atu ai vaitau fesuisuiaʻi. Pe o le a e faafoliga ea lou fale ia faatū faalāʻumiʻumi lona taualuga ina  ia faatafe ifo ai i lalo le timu ma le kiona a o paʻūū ifo? Pe faamata o le tau i le vaipanoa o loo e alaala ai e ono manaʻomia ai se taualuga mafola—e pei o nisi o taualuga o fale i Sasaʻe Tutotonu—o se taualuga e mafai ona tou faapotopoto ai ma lou ʻāiga i ni a outou taumafataga fiafia ma talatalanoa?—Teuteronome 22:8; Neemia 8:16.

16. Aiseā e mafai ai ona faatalitalia le aumaia e le lalolagi fou o se faamalieina tūmau?

¹⁶ O le mea e sili atu ona tāua na i lo le iloaina o na auiliiliga, o le a iai sou lava fale. O le a avea o se fale mo oe lava—e lē pei o aso nei atonu e te pologa i le fauina o le fale ae faataigāmālie e le isi tagata. Ua faapea mai foʻi le Isaia 65:21, o le a e totō ma taumafa i fua o le laueleele. E manino lava, o lena ua aotele mai ai le tulaga lautele o mea. O le a e maua se faamalieina atoatoa mai au taumafaiga, o fua o au lava galuega mamafa. O le a mafai ona e faia lena mea i se olaga umi—“e pei o aso o le laau.” E talafeagai lelei lena manatu i le faamatalaina o le ‘fou o mea uma lava’!—Salamo 92:12-14.

17. O le ā le folafolaga o le a sili ona faalāʻeiʻauina ai mātua?

¹⁷ Afai o oe o se matua, o le a pāʻia lou loto i upu nei: “Latou te le galulue fua, latou te fananau, a e le tupu ai le atuatuvale; auā o le fanau ua faamanuia e Ieova i latou, atoa ma i latou e tutupu mai ia te i latou. A o lei valaau lava i latou, ou te tali atu; a o tautala mai i latou, ou te faalogo atu lava.” (Isaia 65:23, 24) Pe e te iloa mai ni mea na tutupu ia te oe, le tigā o le ‘fanau mai ma tupu ai le atuatuvale’? E lē manaʻomia ona tatou lisiina le faasologa o faafitauli atonu o loo iai i fanau ma oo ai le atuatuvale i mātua ma isi. Ua faapena foʻi ona tatou mātauina le alu uma o taimi o mātua i a latou lava galuega, o gaoioiga eseese, po o faafiafiaga, ae ua itiiti ai se taimi latou te faaaluina faatasi ma a latou fanau. I se faaeseesega, ua faamautinoa mai e Ieova ia i tatou faapea, o le a faafofoga mai ma tali mai o ia i o tatou manaʻoga, e na te faatalitalia foʻi.

18. Aiseā e mafai ai ona e faatalitalia lou ʻoliʻoli faatasi ma manu i le lalolagi fou?

¹⁸ A o e mafaufau i ni mea e te ono ʻoliʻoli ai i le lalolagi fou, seʻi faaāta i lou mafaufau le vaʻaiga o loo taʻua mai i le afioga faavaloaga a le Atua: “E aai faatasi le luko ma le tamai mamoe, e ʻaina ʻau o saito e le leona e pei o le povi; a o le gata e fai mana mea e ʻai le efuefu; latou te le faia se mea leaga, latou te le faaumatia foi se mea i loʻu mauga paia uma lava, ua fetalai mai ai Ieova.” (Isaia 65:25) Ua taumafai tagata tusiāta e vali se ata o lena vaʻaiga, peitaʻi o lenei mea ua lē na o se faamatalaga e faaāta i le mafaufau na fuafuaina faatasi ma se faauigaina a le tusiāta lava ia. O lenei vaʻaiga o le a avea o se mea moni lava. O le a tūmau le fīlēmū i tagata ma o le a iai foʻi le fīlēmū faatasi ma manu. Ua faaaluina e le toʻatele o tagata e suʻesuʻe i olaga o manu ma i latou e fiafia tele i manu, tausaga e sili ona lelei o o latou olaga, ina ia aʻoaʻoina mea  e uiga i ni ituaiga o manu pe na o le tasi foʻi se ituaiga o meaola. I se faaeseesega, seʻi manatu i mea o le a mafai ona e aʻoaʻoina pe a oo ina lē toe fefefe manu i tagata. Ona mafai lea ona e faalatalata atu e oo lava i manulele ma meaola ninii lea sa masani ona avea ma o latou nofoaga mau le togāvao po o vaomatua tetele—ioe, e te mātauina, aʻoaʻoina mai ai, ma ʻoliʻoli faatasi ma i latou. (Iopu 12:7-9) O le a mafai ona e faia ma le saogalēmū lena mea, e aunoa ma se lamatia o oe i se tagata po o se manu. Ua fetalai mai Ieova: “Latou te le faia se mea leaga, latou te le faaumatia foi se mea i loʻu mauga paia uma lava.” Maʻeu se suiga o le a iai mai mea o loo tatou vaʻaia ma tofo i ai i aso nei!

19, 20. Aiseā e fai ai lava sina ese o tagata o le Atua mai le toʻatele o tagata i aso nei?

¹⁹ E pei ona muaʻi taʻua, e lē o mafai e tagata ona valoia mai ma le saʻo le lumanaʻi, e ui lava i popolega ua taatele e uiga i le meleniuma fou. O lena mea ua iʻu ai i lagona tigā, le lē mautonu, po o le mafatia o le toʻatele o tagata. Na tusi mai le faatonu o se iunivesite i Kanata, o Peter Emberley, e faapea: “E toʻatele [tagata mātutua] o lea faatoʻā latou faafesagaʻia fesili autū o le soifuaga. O ai aʻu? O le ā le mea o loo oʻu tauivi moni atu i ai? O le ā se meaalofa ou te tuuina mo le isi augātupulaga? O loo latou tauivi i o latou tausaga faatagata matua e ausia se tulaga maopoopo ma se uiga moni i o latou olaga.”

²⁰ Ua e malamalama i le pogai ua faapena ai le tulaga o mea mo le toʻatele o tagata. Atonu latou te sāʻilia le faafiafiaina i le olaga e ala i le faia o ni mausa ua masani ai po o ni ituaiga o tafaoga ma faafiafiaga. Peitaʻi, latou te lē iloa po o le ā o taatia mai i le lumanaʻi, o lea la, e leai se tāua, se tulaga maopoopo, po o se uiga moni o le olaga ia i latou. Seʻi faatusatusa nei le eseesega o lena olaga mai lau vaʻaiga i le olaga, pe a fua atu i mea ua uma ona tatou talanoaina. Ua e silafia i totonu o le lagi fou ma le lalolagi fou ua folafola mai e Ieova, o le a mafai ona tatou vaavaai solo ma faapea ifo mai o tatou loto, ‘E moni lava, ua faia ia fou e le Atua mea uma lava!’ Maʻeu so tatou ʻoliʻoli o le a iai!

21. O le ā le vala masani tatou te maua i le Isaia 65:25 ma le Isaia 11:9?

²¹ E lē o se faualuga le faaāta i le mafaufau o le ola ai i le lalolagi fou a le Atua. O loo ia valaʻaulia i tatou, ua oo lava foʻi ina uunaʻia i tatou, ina ia tapuaʻi atu ia te ia i le taimi nei ma agavaa ai mo le ola pe a ‘latou le faia se mea leaga, ma latou le faaumatia foi se mea i lona mauga paia uma lava.’ (Isaia 65:25) Ae pe sa e silafia ea, na taʻua muamua e Isaia se faamatalaga faapena ma o lea na ia faaaofia mai ai se vala e matuā tāua lava i lo tatou ʻoliʻoli moni i le lalolagi fou? Ua faapea mai le Isaia 11:9: “Latou te le faia se mea leaga, latou te le faaumatia foi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.”

22. O lo tatou talanoaina o valoaga e fā a le Tusi Paia e tatau ona faamālosia ai la tatou filifiliga e faia le ā?

²² “O le malamalama o Ieova.” Pe a oo ina faia ia fou e le Atua o mea uma lava, o le a maua ai e i latou e ʻaināina le lalolagi le poto saʻo e uiga ia te ia ma lona finagalo. O le a tele atu isi mea e aofia ai na i lo le tau ina aʻoaʻoina mea mai ituaiga eseese o manu. E aofia ai lana Afioga faagaeeina. Mo se faaaʻoaʻoga, seʻi toe mānatu i le tele o mea ua tatou mātauina mai le iloiloina o le na o le fā valoaga ia o loo taʻua ai le “lagi fou ma le lalolagi fou.” (Isaia 65:17; 66:22; 2 Peteru 3:13; Faaaliga 21:1) Ua ia te oe ni māfuaʻaga lelei mo le faitauina o le Tusi Paia i aso taʻitasi. Po o se vala ea lena o lau faasologa masani? Afai e leai, o ā ni fetuutuunaʻiga e mafai ona e faia ina ia mafai ai ona e faitauina i aso taʻitasi sina vaega o mea o loo fetalai mai ai le Atua? O le a e iloa ai, e lē gata ina e nofo tatali e ʻoliʻoli i le lalolagi fou, ae o le a faateleina foʻi le fiafia e te mauaina i le taimi nei lava, e pei ona sa maua e le faisalamo.—Salamo 1:1, 2.

[Faamatalaga pito i lalo]

O le a Faapēfea Ona E Tali Mai?

• Aiseā e mafai ai ona tatou faapea atu o loo valoia mai e le Isaia 66:22-24 mea o i le lumanaʻi?

• O le ā se mea o loo sili ona e nofo tatali i ai mai mea ua taʻua i valoaga i le Isaia 66:22-24 ma le Isaia 65:20-25?

• O ā ni māfuaʻaga ua e mautinoa ai e uiga i lou lumanaʻi?

[Fesili mo le Suʻesuʻega]

[Ata i le itulau 15]

Na valoia mai e Isaia, Peteru, ma Ioane vala o le “lagi fou ma le lalolagi fou”