Po o E Faailoaina Atu Oe Lava i Isi?

‘Ou te lē popole lava i manatu o isi tagata!’ I taimi o le ita po o le lē malie, e lē taumatea ua e faia ai foʻi e oe lenei faaupuga mālosi. Peitaʻi, o le taimi lava e uma ai le faafoliga fiamālosi lea na pasae aʻe, ona amata loa lea ona e ono lagona le matuā popole. Aiseā? Auā o le toʻatele o i tatou e manatu mamafa moni lava i manatu o isi e uiga ia i tatou.

O LE mea moni, e tatau ona tatou manatu mamafa i faalogona o isi. Ae maise lava e ao ia i tatou o Kerisiano, o faifeʻau faauuina a Ieova le Atua, ona iai se manatu mamafa talafeagai i le vaʻaiga a isi ia i tatou. Ae maise lava, o i tatou o “mataaga i le lalolagi.” (1 Korinito 4:9) Tatou te maua le fautuaga manaia lava a le aposetolo o Paulo i le 2 Korinito 6:3, 4, (LF) e faapea: “Ua matou le tuuina atu se mea e tasi e tausuai ai, ina neʻi taʻuleagaina la matou galuega; a o mea uma lava ua faailoa ai i matou, o auauna a le Atua i matou.”

O le ā la lona uiga, o le faailoa atu o i tatou lava i isi? Pe o lona uiga ea ia tatou viiviia i tatou lava pe ia faatāuaina i tatou ma o tatou tomai? Leai. Peitaʻi e manaʻomia ai le faatatauina o upu o loo i le 1 Peteru 2:12: “Ia lelei a outou amio i luma o nuu ese, . . . latou te vaavaai ai i a outou amio lelei, ona latou vivii atu ai lea i le Atua.” E faailoa atu e Kerisiano i latou lava e ala i a latou amio! O le faia faapea, o le a maua ai le viiga, e lē mo i tatou, ae mo le Atua. E lē gata i lea, o le faailoa atu o i tatou i isi e ono maua ai foʻi aogā tōtino. Seʻi tatou iloiloina ni vala se tolu lea e mafai ona faamaonia ai le moni o lenei mea ia te oe.

O Sē e Ono Avea ma Pāʻaga Faaipoipo

Seʻi fai ma faaaʻoaʻoga, le matāʻupu o le faaipoipoga. O se meaalofa mai ia Ieova le Atua,  “o ia ua faaigoaina ai le aiga uma o i le lagi atoa ma le lalolagi.” (Efeso 3:15) Atonu o lou faanaunauga ia e faaipoipo i se aso. Afai o le tulaga lena, o le ā le tele o loo e faailoa atu ai oe o sē e ono avea ma pāʻaga faaipoipo? Ioe, o le ā le talaʻaga o loo e faia mo oe i le avea ai ma alii po o se tamaʻitaʻi Kerisiano nofofua?

O nisi atunuu e manatu mamafa tele ʻāiga i lenei mea. Mo se faaaʻoaʻoga, i Ghana, pe a mananaʻo ni tagata se toʻalua e faaipoipo, o le tū masani mo i laʻua ua fia faaipoipo le logo o o la mātua. Ona logo lea e mātua, o isi tagata o le ʻāiga. Ona taumafai loa lea o le ʻāiga o le tama e sāʻili mai i le vaipanoa o loo nonofo ai le talaʻaga o le teine. A oo loa ina talitonu mātua ua fetaui le teine, ona la logo lea o le ʻāiga o le teine i le manaʻo o le la tama tama e faaipoipo i le la tama teine. Ona siaki foʻi lea e le ʻāiga o le teine le talaʻaga o le tama a o leʻi ioe atu i le faaipoipoga. E iai le alagāupu a Ghana e faapea, “Ia fesili atu i ē latou te iloa lē e ono avea ma lau pāʻaga faaipoipo, a o e leʻi faaipoipo.”

Faapēfea atunuu i Sisifo, lea e masani lava ona faataga tagata e filifili a latou pāʻaga faaipoipo? E oo lava i atunuu na, o le a atamai mo le alii po o le tamaʻitaʻi Kerisiano taʻumatuaina ona sāʻilia ni faamatalaga faamaoni mai ia i latou e iloa lelei sē e ono avea ma pāʻaga faaipoipo, e pei o mātua po o ni uō taʻumatuaina. E tusa ai o le tusi o Le Ala e Maua ai le Fiafia i le Aiga, e ono fesili se tamaʻitaʻi talavou faapea: “‘O le ā le ituaiga o talaʻaga o loo iai i lenei tauleʻaleʻa? O ai ana uō? Pe na te faaalia ea le pulea totino? E faapeī ona ia feutagaʻi ma tagata matutua? O le ā le ituaiga o ʻāiga e tupuga mai ai o ia? E faapeī ona uiga i lona ʻāiga? O le ā lana vaʻaiga i tupe? Pe na te faaaogāsesēina ea le ava malosi? Pe o ia ea o sē e itaitagofie, pe e faasauā? O ā ni tiute tauave faalefaapotopotoga o loo ia tauavea, ma o faapeī ona ia taulimaina? Pe mafai ea ona ou faaaloalo loloto ia te ia?’—Levitiko 19:32; Faataoto 22:29; 31:23; Efeso 5:3-5, 33; 1 Timoteo 5:8; 6:10; Tito 2:6, 7.” *

O le a faapena foʻi ona manaʻo le tauleʻaleʻa e fiailoa e faatatau i so o se tamaʻitaʻi Kerisiano e fia faaipoipo i ai. E tusa ai o le Tusi Paia, sa faapena le naunau sa ia Poasa agaʻi ia Ruta, le tamaʻitaʻi na mulimuli ane faaipoipo atu i ai. Ina ua fesili atu Ruta: “Se a le mea ua e alofa mai ai ia te au, ma e silasila mai ai ia te au, o aʻu foi le tagata ese?” Na tali atu Poasa: “Ua uma ona faaali mai ia te au mea uma ua e faia.” (Ruta 2:10-12) Ioe, e lē gata sa mātauina tōtino lava e Poasa o Ruta o se tagata faamaoni, e tuuina atu atoa, ma o se teine galue mamafa, ae sa ia mauaina foʻi faamatalaga lelei mai i isi.

O le a faapena foʻi ona i ai ni aafiaga o lau amio i le vaʻaiga a isi pe e ona avea oe ma se pāʻaga faaipoipo talafeagai. O faapēfea la ona e faailoa atu oe i isi e faatatau i lenei mea?

I le Avea o se Tagata Faigaluega

O le fale faigaluega o le isi lea vaipanoa e mafai ona aogā ai ia te oe le tausia o se amio lelei. E ono toʻatele o loo tauvā mo galuega. O tagata faigaluega e lauiloa i le fouvale i pule ma fai ma masani le tuai i le galuega, ma e lē faamaoni  e tele lava ina tuli ma le galuega. E masani foʻi ona faamalōlō e kamupani ia tagata faigaluega ua iai le poto masani ina ia faaitiitia ai tupe faaalu. Pe a sāʻilia e tagata e leai ni galuega ni galuega fou, o le a latou iloa ane e siaki atu e kamupani ia nofoaga sa latou galulue ai muamua ina ia faamautinoa mai a latou gaoioiga masani latou te galulue ai, uiga faaalia, ma le poto masani. E toʻatele Kerisiano ua latou faailoa atu ma le manuia i latou i pule o galuega e ala ia latou amio faaaloalo, o teuga talafeagai, o le va feagai lelei ma isi, ma o latou uiga matilatila faa-Kerisiano.

O se tasi o nei uiga o le faamaoni—o se uiga o loo ave i ai le faamuamua e le tele o pule o galuega. Faapei o le aposetolo o Paulo, tatou te mananaʻo e “amio lelei i mea uma lava.” (Eperu 13:18) I se tasi o kamupani e eli ai minerale i Ghana, na lipotia mai ai ni gaoioiga faagaoi. E leʻi tulia lē na vaavaaia galuega o le faamamāina o minerale, o se Molimau a Ieova, ae peitaʻi na faamalōlō isi. Aiseā? Sa mātauina e i latou sa pulea le galuega lona faamaoni mo le tele o tausaga. Sa lauiloa foʻi lona galue mamafa ma lona faaaloalo i pule. Ioe, o lana amio saʻo sa faatūmauina ai lana galuega!

O ā nisi mea e mafai e se Kerisiano ona fai ina ia faailoa atu ai o ia i nofoaga o galuega? Faamasani ia maua le tomai i so o se galuega e tuu atu e fai. (Faataoto 22:29) Ia galue filigā ma fai mea lelei. (Faataoto 10:4; 13:4) Ia faaaloalo atu i lou pule ma lē e vaavaaia lau galuega. (Efeso 6:9) O le tausi taimi, le faamaoni, le fai mea māeʻa, atoa ma le galue mamafa, o uiga na e faatāuaina e pule o galuega, ma o uiga foʻi na e fesoasoani ia te oe i le suʻeina o galuega e tusa lava pe ua tau leai ni galuega.

Faaeaga i le Faapotopotoga

I le taimi nei, na i lo se isi lava taimi ua manaʻomia lava tane taʻumatuaina e taʻimua i le faapotopotoga Kerisiano. O le ā le māfuaʻaga? Na valoia mai e Isaia e faapea: “Ia faalautele le mea e tu ai lou fale ie; ia fālōina ie puipui o mea e te nofo ai.” (Isaia 54:2) O loo faaauau ona tupu aʻe le faapotopotoga a Ieova i le lalolagi atoa, e tusa o le faataunuuga o lenei valoaga.

Afai la o oe o se tane Kerisiano, o le a faapēfea ona e faailoaina atu oe lava o sē ua agavaa e auauna i se matāfaioi tofiaina? Manatu i le faaaʻoaʻoga a le tauleʻaleʻa o Timoteo. Na lipotia mai e Luka e uiga ia Timoteo faapea “ua taʻuleleia o ia e le au uso i Lusa ma Ikonio.” Ioe, ona o lana amio lelei, sa faailoa atu ai e lenei tauleʻaleʻa talavou ia lava i isi i aai eseese e lua. O lea la na valaʻaulia ai e Paulo ia Timoteo la te ō i le faiva femalagaaʻi.—Galuega 16:1-4.

E faapēfea e se tane i aso nei ona ‘naunau i le faiva o le epikopo [“ovasia,” NW]’ i se auala talafeagai, faaleatua? O le mea moni lava ia, e lē auala i le tauvā mo tulagā tofi ae e ala i le ati aʻe o uiga faaleagaga e manaʻomia mo le faatinoina o na tiute tauave. (1 Timoteo 3:1-10, 12, 13; Tito 1:5-9) E mafai foʻi ona ia faaalia mai e “manao o ia i le galuega lelei” e ala i le faia o se sao atoatoa i le galuega talaʻi ma le faia o soo. (Mataio 24:14; 28:19, 20) O i latou e faailoa mai i latou o ni tane Kerisiano e faatuatuaina, latou te matuā naunau lava i le lelei o o latou uso faaleagaga. Latou te mulimuli i le fautuaga a le aposetolo o Paulo: “Ia tufatufa atu ni a outou mea i le mativa o le au paia, ia tausisi i le alofa i tagata ese.” (Roma 12:13) O le faia faapea, o le a ‘faailoa’ moni ai lava e se tane Kerisiano ‘o ia o se auauna a le Atua.’

I Taimi Uma Lava

O le faailoaina atu o i tatou i isi e lē uiga i le faatagā foliga atu po o le avea ma “e faafiafia i tagata.” (Efeso 6:6) O le mea moni lava, o lona uiga o le faailoa atu lea o i tatou i Lē na Foafoaina i tatou, o Ieova le Atua, e ala i le mulimulituʻi i ana tulafono ma matāʻupu silisili. Afai e te ati aʻe lou tulaga faaleagaga ma faamālosia le lua faiā ma Ieova le Atua, o le a mātauina e isi se faaleleiga i le auala e te feagai ai ma tagata o lou ʻāiga, o ē tou te faigaluega faatasi, atoa ma uso Kerisiano. O le a latou mātauina foʻi lou paleni atoa ma le maumauaʻi, le lelei o lou faavasegaina o mea, lou tomai e taulimaina ai tiute tauave, atoa ma lou lotomaulalo. O le a faapogaia e lenei mea lo latou alolofa ma faaaloalo ia te oe, ae o le mea e sili ona tāua, o le a maua ai le faamaoniga a Ieova le Atua ona ua e faailoa atu oe lava i isi!

[Faamatalaga pito i lalo]

[Ata i le itulau 19]

E toʻatele mātua e sāʻilia ma le atamai le talaʻaga o se tasi e fia faaipoipo atu i ai so la alo tama po o se alo teine foʻi

[Ata i le itulau 20]

O se uso o loo faailoa atu o ia mo faaeaga o le auaunaga e ala i le amanaʻiaina o isi