Faalogo i Mea o Fai Mai ai le Agaga
Faalogo i Mea o Fai Mai ai le Agaga
“E faalogo foi o outou taliga i le upu i o outou tua, pe a outou afe ane i le itu taumatau pe afe ane i le itu tauagavale, e faapea mai, O le ala lava lenei, ia outou savavali ai.”—ISAIA 30:21.
1, 2. Ua faapēfea ona fesootaʻi mai Ieova i tagata a o faagasolo senituri?
I LE motu o Puerto Rico o loo faatū ai le faʻata vaʻai mamao e pito sili ona telē i le lalolagi, e faaaogā i faasalalauga a leitiō ma o se faʻata vaʻai mamao foʻi e sili ona tele mea e mafai ona ia apoina mai. Ua faitau sefulu tausaga, o faamoemoe saienitisi ina ia latou mauaina ni feʻau mai ni foafoaga ola o i nisi paneta, e ala i le faaaogāina o lenei meafaigaluega sili ona telē. Peitaʻi, e leʻi iai lava ni feʻau faapena na mauaina. Ae o le mea e mālie ai, ona e iai feʻau manino mai se nofoaga e ese mai le nofoaga o tagata, ma o na feʻau e mafai e so o se tasi o i tatou ona maua i so o se taimi—e aunoa ma le faaaogāina o se meafaigaluega lavelave. O nei feʻau e aumai i se Puna e sili atu ona maualuga na i lo so o se isi lava foafoaga ola ua mafaufauina e tagata faapea o iai i se isi paneta e ese mai le lalolagi. O ai le Puna o na fesootaʻiga, ma o ai o loo latou mauaina? O le ā o fai mai ai na feʻau?
2 Ua iai i faamaumauga a le Tusi Paia tala eseese i taimi na mafai ai e tagata ona latou faalogoina moni feʻau mai le Atua. O nisi taimi sa momoli mai nei feʻau e foafoaga agaga sa auauna o ni avefeʻau a le Atua. (Kenese 22:11, 15; Sakaria 4:4, 5; Luka 1:26-28) E faatolu taimi na lagonaina ai le siʻufofoga o Ieova lava ia. (Mataio 3:17; 17:5; Ioane 12:28, 29) Na fetalai mai foʻi le Atua e ala mai i tagata sa fai ma perofeta, o le toʻatele lava na latou tusitusia mea sa ia faagaeeina i latou e taʻu mai. I aso nei, ua ia i tatou le Tusi Paia, lea o loo aofia ai se faamaumauga tusitusia o le tele o nei fesootaʻiga, faapea foʻi aʻoaʻoga a Iesu ma ona soo. (Eperu 1:1, 2) Ua faaoo moni mai lava e Ieova faamatalaga i ana foafoaga faaletagata.
3. O le ā le fuafuaga o feʻau a le Atua, ma o le ā le mea o loo faatalitalia mai ia i tatou?
3 O nei feʻau faagaeeina uma mai le Atua e itiiti lava se mea o faaalia maia e faatatau i le vateatea faitino. O loo taulaʻi atu nei feʻau i matāʻupu e sili atu ona tāua, lea e iai so latou taaʻiga i o tatou olaga i le taimi nei ma i le lumanaʻi. (Salamo 19:7-11; 1 Timoteo 4:8) E faaaogā e Ieova nei feʻau e faamatala mai ai lona finagalo ma ofoina mai ai lana taʻitaʻiga. O le auala lena ua faataunuu ai upu a le perofeta o Isaia e faapea: “E faalogo foi o outou taliga i le upu i o outou tua, pe a outou afe ane i le itu taumatau pe afe ane i le itu tauagavale, e faapea mai, O le ala lava lenei, ia outou savavali ai.” (Isaia 30:21) E lē faamālosia i tatou e Ieova ina ia faalogo atu i lana “upu.” E pule lava i tatou pe tatou te fia mulimuli i taʻiala a le Atua ma savavali i ona ala. O le māfuaʻaga lena ua timaʻi mai ai le Tusi Paia ia i tatou ina ia faalogo atu i fesootaʻiga ma Ieova. I le tusi o Faaaliga, e faafitu ona taʻua le faalāʻeiʻauga ina ia “faalogo mai ia . . . i le mea ua fetalai mai ai le Agaga.”—Faaaliga 2:7, 11, 17, 29; 3:6, 13, 22.
4. Pe talafeagai ea ona faatalitalia le fetalai tuusaʻo mai o le Atua mai le lagi i o tatou aso?
4 I aso nei, e lē o fetalai tuusaʻo mai Ieova ia i tatou mai le afioʻaga faalelagi. E oo lava i taimi anamua a o tusia le Tusi Paia, e seāseā tutupu nei fesootaʻiga ma se mālosiʻaga e lē faaletagata, o nisi taimi e va i senituri faatoʻā toe tupu. A o faagasolo senituri, e masani lava ona fesootaʻi mai Ieova i ona tagata i ni auala e lē tuusaʻo. E faapena le tulaga o loo iai i o tatou aso. Seʻi o tatou talanoaina auala e tolu o loo fesootaʻi mai ai Ieova ia i tatou i aso nei.
“O Tusi Paia Uma Lava e Mai le Agaga”
5. O le ā le meafaigaluega autū o loo faaaogā e Ieova e fesootaʻi mai ai i aso nei, ma e faapēfea ona tatou maua mai ai aogā?
5 O le meafaigaluega autū i fesootaʻiga a le Atua ma tagata o le Tusi Paia lea. Ua faagaeeina le Tusi Paia e le Atua, ma o mea uma lava o i ai e mafai ona faamaonia le aogā ia i tatou. (2 Timoteo 3:16) O loo i ai i le Tusi Paia le anoanoaʻi o faaaʻoaʻoga o tagata moni o ē na faia a latou lava filifiliga saʻoloto pe faalogo atu i le siʻufofoga o Ieova pe leai. O na faaaʻoaʻoga ua faamanatu mai ai ia i tatou le pogai e matuā tāua ai le faalogo atu i le mea o fai mai ai le agaga o le Atua. (1 Korinito 10:11) E iai foʻi i le Tusi Paia le atamai aogā, o loo aumaia ai ia i tatou fautuaga i nisi taimi pe a tatou fesagaʻi ma le faia o ni filifiliga i le olaga. E tai pei lava o loo afio mai le Atua i o tatou tua, ma fetalai mai i o tatou taliga upu nei: “O le ala lava lenei, ia outou savavali ai.”
6. Aiseā ua silisili ai lava le Tusi Paia na i lo isi uma tusitusiga?
6 Ina ia mafai ona faalogo atu i mea o fai mai ai le agaga e ala mai itūlau o le Tusi Paia, e tatau la ona tatou faitauina e lē aunoa. O le Tusi Paia ua lē na o se tusi e lelei ona tusiaina ma e taʻutaʻua, e pei o le tele o tusi o loo maua i aso nei. O le Tusi Paia na faagaeeina e le agaga ma o loo maua ai finagalo o le Atua. Ua faapea mai le Eperu 4:12: “O loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, o loo vaevae foi e oo lava i le vavaeeseina o le loto ma le agaga, o gaugātino foi ma aano o ivi, o loo faamasino foi i manatu ma filifiliga o le loto.” A o tatou faitauina le Tusi Paia, o ana faamatalaga e mafai ona ati i o tatou mafaufauga lilo ma uunaʻiga o o tatou loto e pei o le ati a se pelu, ma faaalia mai ai le tele ua ōgatusa ai o tatou ola ma le finagalo o le Atua.
7. Aiseā e matuā tāua ai le faitauina o le Tusi Paia, ma o le ā le tele ua faalāʻeiʻauina i tatou e faia ai faapea?
7 O “manatu ma filifiliga o le loto” e mafai ona suia a o faagasolo taimi, ma e faapena foʻi pe a tatou aafia i ni mea e tutupu i o tatou olaga—o mea lelei atoa ma tulaga faigatā. Pe afai e lē faifai pea ona tatou suʻesuʻeina le Afioga a le Atua, o le a iʻu ina lē toe ōgatusa o tatou mafaufauga, uiga, ma faalogona ma matāʻupu silisili a le Atua. O lea, ua timaʻi mai le Tusi Paia ia i tatou: “Ina tofotofo [“pea,” NW] ia outou ia te outou, po ua outou i le faatuatua; ina suesue ifo [“pea,” NW] ia ia te outou; pe tou te le iloa ea o outou loto.” (2 Korinito 13:5) Pe afai tatou te fia faaauau pea ona faalogologo atu i mea o fai mai ai le agaga, e tatau ona tatou utagia le fautuaga ina ia faitau i aso taʻitasi le Afioga a le Atua.—Salamo 1:2.
8. O ā upu a le aposetolo o Paulo ua fesoasoani mai ina ia tatou iloiloina ai i tatou lava e tusa ai o le faitauina o le Tusi Paia?
8 O se faamanatu tāua lenei mo ē o loo faitauina le Tusi Paia: Ia lava se taimi e faaaluina e matuā faagoto ifo ai i lou loto mea o e faitauina! Mo se taumafaiga ina ia usitaʻia le fautuaga e faitau le Tusi Paia i aso taʻitasi, o le a tatou lē mananaʻo ai e faatopelau le faitauina o ni matāʻupu e aunoa ma se malamalama i le aano tonu o mea o tatou faitauina. E ui ina matuā tāua le faitauina e lē aunoa o le Tusi Paia, peitaʻi e lē tatau ona faaautū tasi o tatou faanaunauga i le na o le tausisia o se faasologa; e ao ona iai so tatou faanaunauga moni e aʻoaʻoina mea e uiga ia Ieova ma ana fuafuaga. E tusa ai o lenei manatu, atonu e lelei ona tatou faaaogā upu nei a le aposetolo o Paulo mo se iloiloga a le tagata ia te ia lava. I lana tusi i ona uso Kerisiano, na ia faapea atu ai: “Ou te tootuli . . . i le Tamā, ina ia foaiina ia te outou . . . ia nofo mau foi o Keriso i o outou loto i le faatuatua; ina ia mauaa ma faavaeina outou i le alofa, ia mafai ai ona iloa lelei e outou atoa ma le au paia uma, o le uiga o le lautele, ma le umi, ma le loloto, ma le maualuga, ia iloa foi le alofa o Keriso ua silisili ese e le mailoa, ia faatutumuina outou i le tumu uma lava o le Atua.”—Efeso 3:14, 16-19, LF.
9. E mafai faapēfea ona tatou ati aʻe ma faalolotoina lo tatou faanaunauga e aʻoaʻoina mea mai ia Ieova?
9 O le mea moni, o nisi o i tatou na ola mai lava e lē fiafia e faitautusi, a o isi o la latou vaisū le faitautusi. Peitaʻi, po o ā lava o tatou tulaga taʻitoʻatasi, ae mafai ona tatou ati aʻe ma faalolotoina lo tatou faanaunauga e aʻoaʻoina mea mai ia Ieova. Na faamatala mai e le aposetolo o Peteru faapea, e tatau ona tatou naunau mo le poto faale-Tusi Paia, ma sa ia ioeina o sea faanaunauga e tatau lava ona atiina aʻe. Na ia tusi mai: “Faapei o tama meamea faatoa fanau mai, ia naunau outou i le suāsusu faaleagaga e le suia [“o le upu,” LT], ina ia outou tutupu ai i le faaolataga.” (1 Peteru 2:2) E matuā tāua le pulea e le tagata o ia lava pe afai tatou te fia faatupuina se “naunau” mo le suʻesuʻeina o le Tusi Paia. E pei lava ona mafai ona tatou faatupuina se manaʻo mo se meaʻai fou pe a tofo soo i ai, e faapena foʻi i o tatou uiga agaʻi i le faitautusi ma le suʻesuʻe, e mafai ona faaleleia atili pe afai tatou te puleaina i tatou lava ina ia mulimuli i se faasologa faifai pea.
“Mea e ʻAi i Ona Itu Aso”
10. O ai e faia aʻe ai le vasega o “le auauna faamaoni ma le mafaufau,” ma o loo faapēfea ona faaaogāina i latou e Ieova i aso nei?
10 O le isi auala o loo faaaogā e Ieova e fetalai mai ai ia i tatou i aso nei o loo faaalia mai e Iesu i le Mataio 24:45-47. Sa ia taʻua ai iinā le faapotopotoga o Kerisiano faauuagagaina—“le auauna faamaoni ma le mafaufau” ua tofia latou e saunia mai “mea e ʻai [faaleagaga] i ona itu aso.” I lo latou tulaga o ni tagata taʻitoʻatasi, ua avea tagata o lenei vasega ma “auauna” a Iesu. O i latou nei, faatasi ai ma “le motu o tagata e toatele” o “isi mamoe,” ua latou maua faalāʻeiʻauga ma taʻiala. (Faaaliga 7:9; Ioane 10:16) O le tele o nei meaʻai i ona itū aso e tatau ai o loo maua e ala mai i lōmiga tusitusia, e pei o Le Olomatamata, le Ala Mai!, ma isi lōmiga. E iai ma isi meaʻai faaleagaga ua faasoasoa mai e ala i lauga ma faataʻitaʻiga i tauaofiaga, o fonotaga, ma sauniga a le faapotopotoga.
11. E faapēfea ona tatou faamaonia atu lo tatou talisapaia o mea o fai mai ai le agaga e ala mai “le auauna faamaoni ma le mafaufau”?
11 O faamatalaga ua saunia mai e “le auauna faamaoni ma le mafaufau” ua fuafuaina e faamālosia ai lo tatou faatuatua ma toleni ai o tatou tomai faalemafaufau. (Eperu 5:14) O na fautuaga atonu e aumai faalauaʻitele ina ia mafai ai e le tagata lava ia ona faia se faatatauga tōtino ia te ia lava. Mai lea taimi i lea taimi, tatou te maua foʻi fautuaga e tusa ai o ni vala patino o a tatou amioga. O le ā le uiga e tatau ona ia i tatou pe afai tatou te fia faalogologo moni atu lava i mea o fai mai ai le agaga e ala mai le vasega o le auauna? Ua tali mai le aposetolo o Paulo: “Ia outou usiusitai i o outou taʻitaʻi ma outou gauai i ai.” (Eperu 13:17) O le mea moni, o tane uma o loo iai i lenei tulaga e lē lelei atoatoa i latou. Peitaʻi, e ui i so latou lē lelei atoatoa, ae fiafia pea Ieova e faaaogā ana auauna faaletagata e taʻitaʻia i tatou i lenei taimi o le iʻuga.
Taʻitaʻiga Mai o Tatou Lotofuatiaifo
12, 13. (a) O le ā le isi puna o taʻitaʻiga ua foaʻi mai e Ieova ia i tatou? (e) O le ā se taaʻiga lelei e mafai e le lotofuatiaifo ona taaʻia ai e oo lava i tagata e lē o ia i latou le poto saʻo e uiga i le Afioga a le Atua?
12 Ua foaʻi mai e Ieova ia i tatou le isi puna o taʻitaʻiga—o tatou lotofuatiaifo. Na ia foafoaina le tagata faatasi ai ma se faalogona i le loto e lagona ai le saʻo ma le sesē. O se vaega o o tatou uiga masani. I lana tusi i uso i Roma, na faamatala atu ai e le aposetolo o Paulo e faapea: “Pe a fai fua e nuu ese e le o i ai le tulafono o mea e tusa ma le tulafono, e ui ina le o i ai le tulafono, ua avea i latou ma tulafono ia te i latou; o i latou ia ua iloa mai ai le galuega o le tulafono ua tusia i o latou loto, e ō faatasi ai foi o latou loto fuatia ifo, o loo fefaaleagai foi, pe fefaatonuai o latou manatu.”—Roma 2:14, 15.
13 O le toʻatele o ē e lē iloa Ieova, e iai nisi o mea ua latou faaōgatusa ai o latou mafaufauga ma gaoioiga, ma matāʻupu silisili a le Atua i le saʻo ma le sesē. E peiseaī sa latou faalogo atu i se leo o loo tau lē lagona mai totonu, o loo taʻitaʻiina i latou i le ala saʻo. Pe afai e moni lenei mea i le tulaga o i latou e lē o iai le poto saʻo e uiga i le Afioga a le Atua, maʻeu la se tele e tatau ai i lena leo mai totonu ona tautala atu i le tulaga o Kerisiano moni! E mautinoa lava, o se lotofuatiaifo faa-Kerisiano ua faamamāina e le poto saʻo o le Afioga a le Atua ma o loo gaoioi e ōgatusa ma le agaga paia o Ieova, e mafai ona saunia maia taʻitaʻiga e maufaatuatuaina.—Roma 9:1.
14. E mafai faapēfea e se lotofuatiaifo ua toleniina i le Tusi Paia ona fesoasoani ia i tatou ina ia mulimuli atu i le taʻitaʻiga a le agaga o Ieova?
14 O se lotofuatiaifo lelei, ua toleniina i le Tusi Paia, e mafai ona faamanatu maia ia i tatou le ala e finagalo le agaga tatou te savavali ai. E iai taimi atonu e lē maʻoti lelei mai ai faamatalaga a le Tusi Paia po o lōmiga faale-Tusi Paia, i se tulaga patino ua oo ia i tatou. E ui i lea, e mafai e o tatou lotofuatiaifo ona faaleo atu se lapataʻiga, e lapataʻia ai i tatou mai se ala leaga tatou te ono uia. I tulaga faapena, o le lē amanaʻiaina o uunaiga a o tatou lotofuatiaifo, o lona uiga, o le lē amanaʻiaina lena o mea o loo fetalai mai ai le agaga o Ieova. Ae i se isi itū, o le faamasani e faalagolago atu i o tatou lotofuatiaifo faa-Kerisiano ua toleniina, e mafai ai ona tatou faia filifiliga atamai e tusa lava pe lē o iai se taʻiala patino o tusitusia mai. Peitaʻi, e tāua tele ona teu i mafaufau faapea, pe afai e lē o saunia e le Atua se matāʻupu silisili, po o se tulafono, o le a lē talafeagai la ona faaaogā fua filifiliga a o tatou lava lotofuatiaifo i isi o tatou uso Kerisiano i ni matāʻupu ua matuā manino mai e fitoi tonu i le tagata lava ia.—Roma 14:1-4; Kalatia 6:5.
15, 16. O le ā e mafai ona faapogaia ai le lē toe gaoioi lelei o o tatou lotofuatiaifo, ma e mafai faapēfea ona tatou puipuia le ono tupu o lena mea?
15 O se lotofuatiaifo mamā ua toleniina i le Tusi Paia, o se meaalofa lelei mai le Atua. (Iakopo 1:17) Peitaʻi e tatau ona tatou puipuia lenei meaalofa mai aafiaga e faaleagaina ai pe afai e tatau ona faagaoioia lelei e avea ma meafaigaluega e puipuia le saogalemu i amioga tatau. Pe afai e mulimuli atu i tū masani, o aganuu, ma masaniga a o tatou vaipanoa e feteenaʻi ma tapulaa a le Atua, e mafai ona faapogaia ai le lē toe gaoioi lelei o o tatou lotofuatiaifo ma lē taulau ai ona tataʻia i tatou i le ala saʻo. Atonu ua tatou lē mafai ona faia se faaiʻuga saʻo i ni matāʻupu, ma ono faasesēina foʻi i tatou e talitonu faapea o se gaoioiga leaga, o le mea moni lava o se gaoioiga lelei lena.—Faatusatusa i le Ioane 16:2.
16 Pe afai e faaauau pea ona tatou lē amanaʻia lapataʻiga a o tatou lotofuatiaifo, o le a oo ina fāi ifo lava le mālosi o lona leo seʻia oo ina tatou matuā maaa pe lē toe tali mai o tatou lotofuatiaifo e tusa ai o amioga tatau. Na tautala le faisalamo e uiga i na tagata ina ua ia faapea mai: “Ua lololo o latou loto e pei o le gaʻo.” (Salamo 119:70) O nisi o ē ua lē amanaʻiaina le fagufagu mai a o latou lotofuatiaifo ua mou atu so latou tomai e mafaufau lelei ai. E lē o toe taʻitaʻia i latou e mataupu silisili faale-Atua ma ua lē mafai ona latou faia ni filifiliga talafeagai. Ina ia ʻalofia sea tulaga, e tatau ai ona tatou nofouta i taʻitaʻiga a o tatou lotofuatiaifo faa-Kerisiano e tusa lava po o ni matāʻupu e foliga mai e lē matuiā naʻuā.—Luka 16:10.
Amuia i Latou o Ē Faalogo ma Usiusitaʻi
17. A o tatou faalogo atu i ‘le upu o i o tatou tua’ ma utagia o tatou lotofuatiaifo ua toleniina i le Tusi Paia, o le a faapēfea ona faamanuiaina i tatou?
17 A o tatou faamautūina se masaniga o le faalogologo atu i ‘le upu o i o tatou tua’—e pei ona saunia e ala mai le Tusi Paia ma le auauna faamaoni ma le mafaufau—ma a o tatou utagiaina faamanatu a o tatou lotofuatiaifo ua toleniina i le Tusi Paia, o le a faamanuia mai Ieova ia i tatou i lona agaga. O le iʻuga, o le a faateleina e le agaga paia lo tatou tomai e mauaina ai ma malamalama i mea o loo fetalai mai ai Ieova ia i tatou.
18, 19. E mafai faapēfea ona aogā ia i tatou le taʻitaʻiga a Ieova i la tatou faiva ma o tatou olaga tōtino?
18 O le a faalototeleina foʻi i tatou e le agaga o Ieova e fesagaʻia ma le atamai atoa ma le lototele ni tulaga faigatā e tulaʻi mai. E pei o le tulaga o le ʻauaposetolo, e mafai e le agaga o le Atua ona uunaʻia o tatou tomai faalemafaufau ma fesoasoani mai ia i tatou ina ia gaoioi ma tautala e ōgatusa ma matāʻupu silisili o le Tusi Paia. (Mataio 10:18-20; Ioane 14:26; Galuega 4:5-8, 13, 31; 15:28) O le galulue faatasi o le agaga o Ieova faatasi ai ma a tatou lava taumafaiga, o le a aumaia ai ia i tatou le taulau manuia a o tatou faia filifiliga tāua i le olaga, ma aumaia ai ia i tatou le lototele e faatinoina na filifiliga. Mo se faaaʻoaʻoga, atonu e te mafaufau e toe fetuunaʻi le olaga o loo e ola ai ina ia faatele se taimi e te faaaluina i mea faaleagaga. Pe atonu foʻi e te fesagaʻi ma ni filifiliga tāua o le a suia ai lou olaga, e pei o le filifilia o se pāʻaga, le mafaufau pe talia se galuega ua ofo mai, pe faatau se fale. Na i lo le faataga o o tatou faalogona ootia faaletagata e avea ma vala autū i le faia o a tatou filifiliga, e tatau ona tatou faalogo atu i mea o fai mai ai le agaga o le Atua, ma ia gaoioi e ōgatusa ma lana taʻitaʻiga.
19 Tatou te talisapaia moni lava ituʻāiga o faamanatu agalelei ma fautuaga o loo tatou maua mai isi uso Kerisiano, e aofia ai toeaina. Peitaʻi, e lē manaʻomia ona tatou tau faatalitali lava i taimi uma mo isi e faamanatu maia mea ia i tatou. Pe afai tatou te iloa le ala atamai e uia, ma iloa po o ā fetuunaʻiga e manaʻomia ona tatou faia i o tatou uiga ma amioga ina ia faamalieina le finagalo o le Atua, ia tatou gaoioi loa. Na fetalai Iesu: “Afai ua outou iloa ia mea, amuia outou pe a outou faia.”—Ioane 13:17.
20. O le ā le faamanuiaga e maua e i latou o ē faalogo i ‘le upu o i o latou tua’?
20 E manino lava, ina ia iloa pe faapēfea ona faafiafia le finagalo o le Atua, e lē tau manaʻomia e Kerisiano ona faalogo atu i se siʻufofoga moni mai le lagi, e lē tau manaʻomia foʻi ona asiasi mai se agelu ia i latou. Ua faamanuiaina i latou i le mauaina o le Afioga tusitusia a le Atua ma taʻitaʻiga alofa e ala mai lana vasega faauuina o loo iai i le lalolagi. Pe afai latou te utagia ma le faaeteete lenei ‘upu o i o latou tua’ ma mulimuli atu i le taʻitaʻiga a o latou lotofuatiaifo ua toleniina i le Tusi Paia, o le a latou taulau manuia i le faia o le finagalo o le Atua. Ona mautinoa ai lea o le a latou vaʻaia le faataunuuina o le folafolaga a le aposetolo o Ioane: “O lē fai le finagalo o le Atua, e tumau lea e faavavau.”—1 Ioane 2:17.
Se Autaluga Puupuu
• Aiseā e fesootaʻi mai ai Ieova i ana foafoaga faaletagata?
• E mafai faapēfea ona aogā ia i tatou se polokalame o le faitauina e lē aunoa o le Tusi Paia?
• E tatau faapēfea ona tatou tali atu i le taʻitaʻiga mai le vasega o le auauna?
• Aiseā e lē tatau ai ona tatou lē amanaʻia faatonuga a se lotofuatiaifo ua toleniina i le Tusi Paia?
[Fesili mo le Suʻesuʻega]
[Faamatalaga i le itulau 13]
E lē tau manaʻomia e tagata se meafaigaluega lavelave ina ia maua ai feʻau mai le Atua
[Faamatalaga i le itulau 15]
E fetalai mai Ieova ia i tatou e ala mai i le Tusi Paia ma “le auauna faamaoni ma le mafaufau”
[Faamatalaga i Ata i le itulau 13]
Courtesy Arecibo Observatory/David Parker/Science Photo Library