Lagolago Mausalī A‘oa‘oga a le Atua
Lagolago Mausalī Aʻoaʻoga a le Atua
“Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”—FAATAOTO 3:5, 6.
1. Ua faapēfea ona tatou feagai ma le poto faaletagata i se tulaga sa leʻi faapea muamua?
I LE taimi nei, e tusa ma le 9,000 nusipepa o aso taʻitasi o loo faasalalauina i le lalolagi aoao. I tausaga taʻitasi e tusa ma le 200,000 tusi fou e lōmia i le na o le Iunaite Setete lava ia. E tusa ai o se tasi fua faatatau, e oo mai ia Mati o le 1998, pe ā ma le 275 miliona itūlau ua faaaluina i polokalame o le Web i le Initineti. E faapea se faamatalaga, o loo faatuputupulaʻia pea lenei fuainumera i se fua e 20 miliona itūlau i le masina. I se tulaga sa leʻi faapea muamua, e mafai ona maua e tagata le toetoe lava o faamatalaga i so o se matāʻupu. E ui e iai vala aogā o lenei tulaga, ae iai foʻi faafitauli ua faapogaia e le matuā anoanoaʻi o nei faamatalaga.
2. O ā faafitauli e mafai ona iʻu i ai ona ua faigofie ona maua le fau ma soloi o faamatalaga?
2 O nisi tagata ua pei e ola i faamatalaga eseese, e mananaʻo lava e faamalie se faanaunauga o loo gālala e fia iloa faamatalaga fou uma ae lafoaʻi ai mea e sili atu ona tāua. O isi ua latou sāʻilia ni nai faamatalaga e faatatau i ni matāʻupu lavelave o le olaga ona latou manatu loa lea o i latou o ni tagata atamamai faapitoa i na matāʻupu. I le na o sina malamalamaga faatapulaa ua latou maua, latou te ono faavae aʻe ai ni filifiliga tāua e mafai ona toe āfaina ai lava i latou po o isi foʻi. Ma e masani lava ona oo ai i le lamatiaga o le iloaina o faamatalaga sesē pe lē saʻo aʻiaʻi. E masani lava ona leai se auala maufaatuatuaina e tilofaʻia ai pe saʻo aʻiaʻi ma paleni le fau ma soloi o faamatalaga.
3. O ā lapataʻiga ua maua i le Tusi Paia e faatatau i le sāʻilia o le atamai faaletagata?
3 Ua leva ona avea le fia iloa o se uiga faaletagata. I tuā lava foʻi i aso o le tupu o Solomona, na mātauina le i ai o lamatiaga ona o le tele o taimi e alu i le sāʻilia o faamatalaga lē aogā po o faamatalaga e āfaina ai. Na faapea mai Solomona: “Ia aʻoaʻoina oe . . . e leai se iuga i tusi o tusi e tele; o le suesue tele foi i upu e vaivai ai le tino.” (Failauga 12:12) I senituri mulimuli ane, na tusi atu ai le aposetolo o Paulo ia Timoteo: “Ia e tausi i le mea na tuuina atu ia te oe, ma ʻaloʻalo ese i upu leaga ma le le aoga, ma finauga i mea ua igoa pepelo ai o le poto; o isi o e na taofi ai, ua sese ai i latou i le upu o le faatuatua.” (1 Timoteo 6:20, 21, LT) Ioe, e manaʻomia e Kerisiano i aso nei ona ʻalofia le fia iloa fua o manatu e āfaina ai.
4. O le ā se tasi o auala e mafai ona tatou faaalia ai lo tatou faatuatua ia Ieova ma ana aʻoaʻoga?
4 E lelei foʻi i tagata o Ieova ona latou utagia upu a le Faataoto 3:5, 6: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” O le faatuatua ia Ieova e aofia ai le teʻena o so o se manatu e feteenaʻi ma le Afioga a le Atua, pe puna mai i o tatou lava mafaufauga pe puna mai i o tatou uso a tagata. Ina ia puipuia lo tatou itū faaleagaga, e tāua tele ona tatou toleniina o tatou tomai faalemafaufau ina ia mafai ona tatou mātaulia faamatalaga e āfaina ai ona teʻena lea. (Eperu 5:14) Seʻi o tatou talanoaina nisi o puna o na faamatalaga.
Se Lalolagi ua Pulea e Satani
5. O le ā se isi puna o manatu e āfaina ai, ma o ai o loo i tua o lenei puna?
5 Ua avea le lalolagi o se puna olaola o manatu e āfaina ai. (1 Korinito 3:19) Na tatalo Iesu Keriso i le Atua e faatatau i ona soo e faapea: “Ou te le ole atu ina ia e ave ese ia te i latou i le lalolagi, a ia e tausi ia te i latou mai lē o loo leaga.” (Ioane 17:15, LF) O le talosaga a Iesu ina ia puipuia ona soo mai “lē o loo leaga” i lona silafiaina o taaʻiga o loo faia e Satani i le lalolagi. E lē otometi ona puipuia i tatou mai taaʻiga leaga a lenei lalolagi ona ua avea i tatou o ni Kerisiano. Na tusi mai Ioane: “Ua tatou iloa e mai le Atua lava i tatou, a o le lalolagi uma o loo nofo toilalo i loo leaga.” (1 Ioane 5:19) Aemaise lava i lenei vaega faaiʻu o aso e gata ai, e tatau ona faatalitalia o le a matuā faatumulia e Satani ma ana temoni le lalolagi i faamatalaga e āfaina ai.
6. E mafai faapēfea e le lalolagi o faafiafiaga ona faapogaia le avea o amioga lē tatau o se mea noa?
6 E tatau foʻi ona faatalitalia o nisi o nei faamatalaga e āfaina ai e ono foliga mai e peiseaī e lē āfaina. (2 Korinito 11:14) Mo se faaaʻoaʻoga, seʻi manatu i le lalolagi o faafiafiaga, ma ana faaaliga i televise, o tifaga, o mūsika, ma tusitusiga. E ioe le toʻatele faapea, i le tele o tulaga, e iai ni faafiafiaga patino o loo lagolagoina ai faiga matagā, e pei o amioga lē mamā, o faiga sauā, ma le faaaogāsesēina o vailaau faasāina. Pe a faatoʻā matamata se ʻaumaimoa i se faafiafiaga e matuā matagā lava amioga o faaali mai ai, atonu o le a matuā faateʻia i latou. Peitaʻi, o le matamata pea lava pea i ai e iʻu ai lava ina avea o se mea noa. Aua lava neʻi o tatou manatu e taliaina pe e lē āfaina se faafiafiaga o loo lagolagoina manatu e āfaina ai.—Salamo 119:37.
7. O le ā le ituʻāiga o atamai faaletagata e mafai ona tafiesea o tatou lagona mautinoa i le Tusi Paia?
7 Seʻi manatu i le isi puna o faamatalaga e ono āfaina ai—le taifanaʻe o manatu o loo lōmia e nisi saienitisi ma tagata aʻoga atamamai o ē ua latou fesiligia le moni aʻiaʻi o le Tusi Paia. (Faatusatusa i le Iakopo 3:15.) E masani ona aliaʻi mai na tusitusiga i mekasini lauiloa ma tusi taʻutaʻua, ma e mafai ona tafiesea ai lagona mautinoa i le Tusi Paia. O nisi tagata ua fai ma a latou vaisū le taʻuleagaina o le pule a le Afioga a le Atua e ala i le lē mafaitaulia o o latou masalosaloga. E faapena foʻi se lamatiaga na iai i aso o le ʻauaposetolo, e pei ona manino mai i upu a le aposetolo o Paulo: “Ia outou, neʻi faatagataotauaina outou e se tasi i le poto le aoga e faasese ai, e tusa ma le uputuu a tagata, e tusa ma mataupu muamua a le lalolagi, a e le tusa ma mataupu a Keriso.”—Kolose 2:8, LT.
O Fili o le Upu Moni
8, 9. O faapēfea ona faaalia mai le faaaposetasi i aso nei?
8 E mafai e aposetate ona faaulu mai se isi faamataʻuga i lo tatou itū faaleagaga. Na muaʻi taʻu mai e le aposetolo o Paulo e faapea, o le a aliaʻe le faaaposetasi mai ē o faapea mai o ni Kerisiano. (Galuega 20:29, 30; 2 Tesalonia 2:3) I le faataunuuga o ana upu, ina ua maliliu le ʻauaposetolo, sa amata loa le faaaposetasi sili seʻia oo ina tupu aʻe Kerisinetoma. I aso nei, e leai se faaaposetasi sili o faatinoina i totonu o tagata o le Atua. Peitaʻi, e iai lava nisi ua ō ese mai ia i tatou, ma e iai nisi o i latou ua maumauaʻi pea e taʻuleagaina Molimau a Ieova e ala i le faasalalauina o pepelo ma faamatalaga lē moni. O nisi ua latou auaufaatasi ma isi vaega ina ia faamaopoopo sa latou tetee mai i le tapuaʻiga mamā. I le faia faapea, ua latou ʻau ai ma lē na muamua lava avea ma aposetate, o Satani.
9 O nisi aposetate o loo faatetele pea ona latou faaaogāina ituʻāiga eseese o le anoanoaʻi o fesootaʻiga, e aofia ai le Initineti, ina ia faasalalauina atu faamatalaga sesē e uiga i Molimau a Ieova. O le iʻuga, pe a taumafai tagata loto faamaoni e sāʻiliʻili i o tatou talitonuga, atonu latou te tau atu ai i faamatalaga taufaaleaga a aposetate. E oo lava i nisi Molimau ua latou autiloina ma le leʻi fuafuaina nei faamatalaga e āfaina ai. E lē gata i lea, e iai nisi taimi e fai ai e aposetate ni a latou vaega i polokalame a televise po o leitiō. O le ā le ala atamai e ao ona uia pe a fua atu i lenei mea?
10. O le ā le uiga atamai e faafetaiaʻia ai faamatalaga taufaaleaga a aposetate?
10 Na faatonuina e le aposetolo o Ioane Kerisiano ina ia aua neʻi o latou taliaina aposetate i o latou fale. Na ia tusi atu: “Pe a alu atu ia te outou se tasi a e le molia lenei lava aʻoaʻoga, aua tou te talia o ia i o outou fale, aua foi tou te ofo alofa ia te ia; auā o sē ofo alofa atu ia te ia, e faatasi ai o ia ma ana galuega leaga.” (2 Ioane 10, 11, LF) O le ʻalofiaina o fesootaʻiga uma e faia ma nei tagata tetee o le a puipuia ai i tatou mai o latou mafaufauga leaga. O lo tatou iloaina o aʻoaʻoga a aposetate e ala mai auala eseese tau fesootaʻiga faaonaponei ua tutusa lelei lona leaga ma le taliaina o se aposetate moni e ulu mai i o tatou fale. Ia aua lava neʻi o tatou faataga le uiga fia iloa e maileia ai i tatou i sea ala malaia!—Faataoto 22:3.
I Totonu o le Faapotopotoga
11, 12. (a) O le ā se puna o manatu e āfaina ai i le faapotopotoga i le uluaʻi senituri? (e) Na faapēfea ona lē taulau i nisi Kerisiano ona latou maumauaʻi e lagolagoina aʻoaʻoga a le Atua?
11 Seʻi manatu i le isi mea lea e ono puna mai ai manatu e āfaina ai. E ui e leai se faanaunauga ina ia aʻoaʻo atu ni mea sesē, ae mafai e se Kerisiano tuuina atu ona ia amata se masani o le soona tautala lē mafaufau. (Faataoto 12:18) Ona o lo tatou tulaga lē lelei atoatoa, e iai lava taimi o le a sesē ai i tatou uma i le faaaogāina o o tatou laulaufaiva. (Faataoto 10:19; Iakopo 3:8) E foliga mai, i aso o le aposetolo o Paulo, sa iai nisi o le faapotopotoga na lē taulau i le puleaina o o latou laulaufaiva ma aafia ai i ni taugāupu. (1 Timoteo 2:8) Sa iai isi na soona tautū i o latou lava manatu ma oo atu ai i le tulaga o lo latou luʻia o le pule a Paulo. (2 Korinito 10:10-12) O se agaga faapena na iʻu ai i ni feteenaʻiga sa lē tatau ona tupu.
12 O nisi taimi na faifai tetele ai lava nei lagona lē femalilieaʻi seʻia oo i ni “finauvalega,” ma faavevesi ai le fīlēmū o le faapotopotoga. (1 Timoteo 6:5; Kalatia 5:15) Na tusi mai Paulo, e faatatau ia i latou na faapogaia nei finauga: “Afai e aʻoaʻo ese se tasi, ma le le gauai i upu e ola ai a lo tatou Alii o Iesu Keriso, ma aʻoaʻoga e tatau ma le amio Atua, ua faafefeteina o ia, ua le iloa se mea, a ua se maʻi lona suesue ma lona finau i upu e tupu mai ai le mataua, ma le misa, ma upu faaleaga, ma masalosalo leaga.”—1 Timoteo 6:3, 4, LF.
13. O ā amioga sa amioaʻi ai le toʻatele o Kerisiano i le uluaʻi senituri?
13 O le mea e fiafia ai, i vaitaimi o le ʻauaposetolo, o le toʻatele lava o Kerisiano sa faamaoni ma taulaʻi atu pea o latou manatu i le galuega o le faalauiloaina o le tala lelei o le Malo o le Atua. Sa latou pisi e tausia “e mātua oti ma fafine ua oti a latou tane i o latou tiga” ma puipuia foʻi i latou lava ‘ina neʻi pisia mai i le lalolagi,’ ma sa lē maʻimauina o latou taimi e finau vale ai i upu. (Iakopo 1:27) Sa latou ʻalofia “le feoai ma e amio leaga” e oo lava i totonu o le faapotopotoga Kerisiano, ina ia leoleomalu ai lo latou itū faaleagaga.—1 Korinito 15:33; 2 Timoteo 2:20, 21.
14. Pe afai tatou te lē faaeteete, e mafai faapēfea e fetufaaʻiga masani o manatu ona oo ina avea ma finauga leaga?
14 E faapena foʻi i tulaga ia sa faamatalaina i le palakalafa e 11, e lē o ni mea e masani ona tutupu i faapotopotoga a Molimau a Ieova i aso nei. Peitaʻi, e lelei lava ona tatou amanaʻia le ono tutupu mai o na finauga valea. O le mea moni, o se mea masani le talanoa i tala o loo i le Tusi Paia pe tau mānatu foʻi i vala o le lalolagi fou folafolaina lea e leʻi faaalia mai. Ma e leai se mea e leaga ai le fetufaʻi o manatu i ni matāʻupu e fitoi tonu i le tagata lava ia, e pei o lāʻei ma teuga po o filifiliga i faafiafiaga. Peitaʻi, pe afai o le a tatou tūtūaai i o tatou lava taofi ma tatou feita pe a lē ioeina e isi o tatou manatu, e ono iʻu ai ina fevaevaeaʻi le faapotopotoga i ni nai mea iti. O sina faamatalaga faatauvaa na amata mai e peiseaī e lē āfaina ae iʻu lava ina matuā āfaina ai.
Leoleoina Mea ua Tuuina Mai ia i Tatou
15. O le ā le telē e mafai ona āfaina ai i tatou faaleagaga i “aʻoaʻoga a temoni,” ma o le ā le fautuaga ua ofoina mai i le Tusi Paia?
15 Ua lapataʻi mai le aposetolo o Paulo: “O loo taʻutino mai e le Agaga, e o ese nisi i le faatuatua i tausaga amuli, latou te faalogo i agaga e faasese ma aʻoaʻoga a temoni.” (1 Timoteo 4:1, LF) Ioe, o manatu e āfaina ai e avea o se faamataʻuga matuiā. E manino lava, o le māfuaʻaga lea na ʻaiʻoi atu ai Paulo i lana uō pele o Timoteo: “Timoteo e, ia e tausi i le mea na tuuina atu ia te oe. Ia ʻaloʻalo ese i upu leaga ma le le aoga, ma finauga i mea ua igoa pepelo ai o le iloa; o isi o e na taofi ai, ua sese ai i latou i le faatuatua.”—1 Timoteo 6:20, 21, LF.
16, 17. O le ā le mea ua tuuina mai e le Atua ia i tatou, ma e tatau faapēfea ona tatou leoleomaluina?
16 E mafai faapēfea ona tatou maua aogā i aso nei mai lenei lapataʻiga alofa? Sa iai se mea na tuuina atu ia Timoteo—se mea tāua na te tausia ma puipuia. O le ā lea mea? Ua faamatala mai e Paulo faapea: “O matua o upu e ola ai, na e faalogologo mai ai ia te au, ia e taofia i le faatuatua ma le alofa ia Keriso Iesu. O le mea lelei ua tuuina atu ia te oe, ia e tausia i le fesoasoani o le Agaga Paia o loo nofo i totonu ia i tatou.” (2 Timoteo 1:13, 14) Ioe, o mea na tuuina atu ia Timoteo sa aofia ai “matua o upu e ola ai,” o “aʻoaʻoga e tatau ma le amio Atua.” (1 Timoteo 6:3) Ina ia ōgatusa ma nei upu, ua maumauaʻi ai Kerisiano i aso nei e puipuia lo latou faatuatua ma le upu moni atoatoa lea ua tuuina atu ia i latou.
17 O le leoleomaluina o lena mea ua tuuina mai e aofia ai le atiina aʻe o mea e pei o masaniga lelei i le suʻesuʻeina o le Tusi Paia, ma le finafinau i le tatalo, a o taumafai ‘ia agalelei i tagata uma lava, ae maise i le aiga o le faatuatua.’ (Kalatia 6:10, LF; Roma 12:11-17) Ua timaʻi atili mai Paulo: “Ia e tausisi atu i le amiotonu, ma le amio Atua, ma le faatuatua, ma le alofa, ma le onosai, ma le agamalu. Ia e tau le taua lelei i la le faatuatua, tago atu ia i le ola faavavau, na valaauina ai foi oe, ma ua e taʻutino atu i le taʻutinoga lelei i luma o molimau e toatele.” (1 Timoteo 6:11, 12) E faaaogā e Paulo fuaitau e pei o le “tau le taua lelei” ma le “tago atu” e manino mai ai le tatau ona tatou gaoioi ma le naunautaʻi ma maumauaʻi e teʻena taaʻiga e āfaina ai lo tatou itū faaleagaga.
E Manaʻomia le Faautauta
18. E mafai faapēfea ona tatou faaalia le paleni faa-Kerisiano i lo tatou feagai ai ma faamatalaga o le olaga nei?
18 O le mea moni, i le tauina o le taua lelei o le faatuatua, e manaʻomia le faautauta. (Faataoto 2:11; Filipi 1:9) Mo se faataʻitaʻiga, e lē o se mea talafeagai le lē faatuatuaina o faamatalaga uma o le olaga nei. (Filipi 4:5; Iakopo 3:17) E lē o manatu uma faaletagata e feteenaʻi ma le Afioga a le Atua. Sa faasasasasa atu fetalaiga a Iesu i manaʻoga o tagata mamaʻi, ina ia sāʻili se fōmaʻi agavaa—o se tomai faapitoa faalelalolagi. (Luka 5:31) E ui sa leʻi matuā maoaʻe se atamai i togafitiga faafōmaʻi i aso o Iesu, ae sa ia ioeina le iai o se aogā e maua mai le fesoasoani a se fōmaʻi. E faaalia e Kerisiano i aso nei le paleni e tusa ai o faamatalaga o le olaga nei, peitaʻi latou te teʻena le sāʻiliʻili atu i so o se mea e ono āfaina ai i latou faaleagaga.
19, 20. (a) E faapēfea ona gaoioi ma le faautauta toeaina pe a fesoasoani atu ia i latou o ē soona tāutala ma le lē atamai? (e) E faapēfea ona feagai le faapotopotoga ma i latou o ē maumauaʻi pea e faaauilumaina aʻoaʻoga sesē?
19 E matuā tāua foʻi le faautauta i le vaega a toeaina pe a tofia e fesoasoani atu ia i latou o ē soona tāutala ma le lē atamai. (2 Timoteo 2:7) I nisi taimi, atonu e aafia ai tagata o le faapotopotoga i ni fefinauaʻiga i ni nai mea laiti lava ma ni finauga ona o masalosaloga. Ina ia puipuia le autasi o le faapotopotoga, e tatau i toeaina ona latou vave tilofaʻia na faafitauli. I le taimi lava e tasi, latou te ʻalofia le soona masalosalovale i o latou uso ma ia lē vavevave e manatu faapea o o latou uso o ni aposetate.
20 Na faamatala e Paulo le agaga lea e tatau ona avatu ai se fesoasoani. Na ia faapea mai: “Le au uso e, afai e maua se tagata i se tasi agasala, o outou o i la le Agaga, ia outou faafoi mai le ua faapeaina ma le loto o le agamalu.” (Kalatia 6:1) I lona tautala faapitoa e faatatau i Kerisiano o ē tauivi ma masalosaloga, na tusi ai Iuta e faapea: “Ia outou alolofa atu i nisi o e ua faaletonu; a o isi ia outou faaola ia i latou ma le mataʻu, ia seʻi ia te i latou mai le afi.” (Iuta 22, 23, LF) O le mea moni, pe afai ua faafia ona avatu timaʻiga ae maumauaʻi pea se tasi e lagolagoina aʻoaʻoga sesē, e manaʻomia loa i toeaina ona latou faia se gaoioiga maumaututū ina ia puipuia ai le faapotopotoga.—1 Timoteo 1:20; Tito 3:10, 11.
Faatumuina o Tatou Mafaufau i Mea e Viia
21, 22. O ā mea e tatau ona tatou filifili lelei i ai, ma o ā mea e tatau ona tatou faatumu ai o tatou mafaufau?
21 E taumamao le faapotopotoga Kerisiano mai upu leaga “e aati pei o se papala.” (2 Timoteo 2:16, 17; Tito 3:9) E moni lena mea e tusa lava po o na upu e atagia mai ai le “atamai” faaleolaga nei e taufaasesē, o faamatalaga taufaaleaga a aposetate, po o le soona tautala lē mafaufau i totonu o le faapotopotoga. E moni e aogā le iai o se faanaunauga lelei ina ia aʻoaʻoina ni mea fou, peitaʻi o se uiga fia iloa lē pulea e mafai ona faailoa mai ai ia i tatou ni manatu tatou te āfaina ai. Tatou te lē vālea i togafiti a Satani. (2 Korinito 2:11) Ua tatou iloa o loo ia faia taumafaiga mālolosi uma e faatōsina ese ai i tatou ma tatou faapalapala ai i la tatou auaunaga i le Atua.
22 Ona o ni faifeʻau lelei, seʻi o tatou lagolagoina ma le mausalī le aʻoaʻoga a le Atua. (1 Timoteo 4:6) Tau ina ia tatou faaaogā ma le atamai o tatou taimi e ala i le filifilia lelei o faamatalaga o loo fafagaina ai o tatou mafaufau. A faia faapea, ona lē faigofie ai lea ona faasesēina i tatou i faamatalaga taufaaleaga o loo uunaʻia e Satani. Ioe, seʻi o tatou manatunatu pea i “mea uma ua moni, o mea uma ua taʻuleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foi o se isi amio lelei, po o se tasi mea e viia.” Pe afai tatou te faatumu o tatou mafaufau i na mea, o le a tatou maua le fīlēmū mai le Atua.—Filipi 4:8, 9.
O le ā na Tatou Aʻoaʻoina?
• E ono avea faapēfea le atamai faaleolaga nei ma faamataʻuga i lo tatou itū faaleagaga?
• O le ā e mafai ona tatou fai ina ia puipuia ai i tatou mai faamatalaga e āfaina ai a aposetate?
• O le ā le ituʻāiga o tautala e tatau ona ʻalofia i totonu o le faapotopotoga?
• E faapēfea ona faaalia le paleni faa-Kerisiano pe a feagai ai ma le anoanoaʻi o faamatalaga i aso nei?
[Fesili mo le Suʻesuʻega]
[Faamatalaga i le itulau 9]
E tele mekasini ma tusi taʻutaʻua e feteenaʻi ma mea faa-Kerisiano o loo tatou faatāuaina
[Faamatalaga i le itulau 10]
E mafai e Kerisiano ona fetufaʻi o latou manatu e aunoa ma le tūtūaai i o latou lava taofi