Lipoti a Ē Faalauiloa le Malo

Olaga Fiafia Faaleʻāiga e Tōsina Mai ai Isi i le Atua

NA FAAMANUIAINA e Ieova ia Iosefa i le atamai ma le faautauta e sili ona tele. (Galuega 7:10) O le iʻuga, o le malamalama sa ia Iosefa na ‘lelei lea i le manatu o Farao ma le manatu o ana auauna uma.’—Kenese 41:37.

I se tulaga talitutusa i aso nei, ua tuuina mai e Ieova i ona tagata le malamalama ma le faautauta e ala i lo latou suʻesuʻeina o le Tusi Paia. (2 Timoteo 3:16, 17) O lenei atamai ma le faautauta ua fuaina mai ai fua lelei pe afai e faatatauina fautuaga e faavae mai le Tusi Paia. O a latou amio lelei e masani lava ona ‘lelei i manatu o i latou o loo matamata mai,’ e pei ona faamatala mai e mea na tutupu o loo mulimuli mai i Zimbabwe.

• Sa iai se fafine o ona tuāʻoi o ni Molimau a Ieova. E ui ina sa lē fiafia o ia i Molimau, ae sa ia fiafia i a latou amio, aemaise lava i lo latou olaga i le ʻāiga. Sa ia mātauina e lelei tele le faiā i le va o le tane ma lana avā ma o le la fanau e ese ma le usiusitaʻi. Sa ia mātauina faapitoa lava le alofa faapelepele o le tane i lana avā.

O se talitonuga taatele i nisi o aganuu i Aferika faapea afai e alofa le tane i lana avā, atonu la o loo faaaogā e le avā ni togafiti e “faapele” ai o ia. O lea na alu atu ai le fafine i le avā Molimau ma fesili atu ia te ia faapea: “E mafai faamolemole ona e aumai ia te aʻu le togafiti lena na e faaaogāina ina ia faapena ona alofa mai ai foʻi laʻu tane ia te aʻu e pei lava foʻi ona sili ona alofa lau tane ia te oe?” Na tali le Molimau e faapea: “Oi, ioe, o le a ou aumaia ia te oe a taeao i le aoauli.”

I le aso na sosoo ai, na asiasi atu ai le tuafafine i lona tuāʻoi ma lana “togafiti.” O le ā lena togafiti? O le Tusi Paia, faatasi ai ma le lōmiga o Le Poto e Taʻitaʻia ai i le Ola e Faavavau. Ina ua māeʻa ona tilofaʻia faamatalaga mai le tusi o Le Poto i le matāʻupu “Atiina aʻe o se Aiga e Viia ai le Atua,” na ia faapea atu i le fafine: “O le ‘togafiti’ lenei o loo ma faaaogāina ma laʻu tane e ‘faapele’ ai e le tasi le isi, ma o le māfuaʻaga lena e matuā alofa ai lava le tasi i le isi.” Na amata se suʻesuʻega faale-Tusi Paia, ma na vave lava ona agaʻigaʻi i luma le fafine i le faailoa atu o lona tuuina atu ia Ieova e ala i le faatofuina i le vai.

• E toʻalua ni paeonia faapito na tofia i se tamaʻi faapotopotoga e latalata i le tuāʻoi i mātū i sasaʻe o Zimbabwe ma Mozambique e atoa le lua vāiaso e lē o ō i le faiva i lea fale i lea fale. Aiseā? Ona sa ō atu tagata e faalogologo atu i a laʻua faamatalaga. Na faamatala mai e le tasi o na paeonia le māfuaʻaga na tupu ai lenei mea: “Sa ma faimalaga atu mo le iva maila ina ia faia se suʻesuʻega faale-Tusi Paia i ʻāiga ma se tagata naunau fiafia. Sa lē faigofie mo i maʻua ona oo atu i lena nofoaga. Na ao ona ma savalia se auala palapalā, ma sa ao foʻi ona ma sopoʻia se vai e tatafe e oo atu lona loloto i o ma ūa. E aofia ai le faapaleniina o o ma lavalava ma seevae i luga o ma ulu, tauasa atu i le vai, ma toe fai lelei lavalava pe a taunuu i le isi itū.

“Sa matuā māofa tuāʻoi o le tagata naunau fiafia i lo ma māʻelegā. E aofia ai ia i latou na mātauina lenei mea le taʻitaʻi o se faalapotopotoga faalelotu i lena vaipanoa. Na ia faapea atu i ana tagata lotu: ‘Pe tou te lē fia māʻelegā ea pei o la tama talavou Molimau a Ieova?’ I le aso na sosoo ai, e toʻatele tagata lotu a lena tamāloa na ō mai i lo ma fale i le fia iloa o le māfuaʻaga ua ma matuā maumauaʻi ai. E lē gata i lena, i le isi lua vāiaso na sosoo ai, na matuā toʻatele ai lava tagata na asiasi mai ua lē maua ai foʻi ma se taimi e sauniunia ai ni a ma meaʻai!”

O se tasi o i latou na asiasi atu i le fale o paeonia i lena lua vāiaso o le taʻitaʻi lotu. Seʻi tomānatu i le ʻoliʻoli na iai i paeonia ina ua ia taliaina se suʻesuʻega faale-Tusi Paia i le ʻāiga!