Ua Sili Lava Ieova i o Tatou Loto

“O LOO finagalo [“fiafia,” NW] Ieova i e matatau ia te ia,” na tusi ai le faisalamo. O le mea moni, e ʻoliʻoli Lē na Foafoaina Mea i le mātauina o ana auauna faaletagata taʻitoʻatasi a o latou finafinau e sapasapaia ana tapulaa amiotonu. E faamanuia e le Atua ana auauna faamaoni, faalāʻeiʻau i latou, ma faamāfanafanaina i latou i taimi e atuatuvale ai. Na te silafia e lē lelei atoatoa ona tagata tapuaʻi, o lea ua talafeagai ma i latou ia mea na te faatalitalia mai ia i latou.—Salamo 147:11.

Atonu e leai se faafitauli mo i tatou i le talitonu faapea e matuā sili le alofa o Ieova mo ana auauna uma i se tulaga lautele. Peitaʻi, o nisi e foliga mai ua soona faamamafa naʻuā i o latou lava vāivaiga ma ua latou talitonu ai faapea e lē taitai lava alofa Ieova ia i latou. Latou te ono faia se faaiʻuga faapea: “Ua ou matuā lē lelei atoatoa lava ua faigata ai mo Ieova ona alofa mai ia te aʻu.” E mautinoa, e iai uma lava o tatou faalogona lē lelei mai lea taimi i lea taimi. Ae o nisi e foliga mai ua latou faaauau pea ona tau faasaga i lagona o le lē toe aogā.

Lagona o le Mafatia

I taimi o le Tusi Paia e toʻatele tagata faamaoni na tigā i lagona o le matuā loto mafatia. Na ʻinoʻino Iopu i le olaga ma na ia lagona faapea ua tuulafoaʻiina  o ia e le Atua. O Hana, o lē na avea ma tinā o Samuelu, na matuā mafatia lava o ia i se tasi taimi ona o lona lē fanau ma tagi auēuē ai. Na “matuā punou lava i lalo” Tavita, ma na mafatia Epaferoti ona ua faanoanoa ona uso i tala o lona maʻi.—Salamo 38:6; 1 Samuelu 1:7, 10; Iopu 29:2, 4, 5; Filipi 2:25, 26.

Ae faapēfea Kerisiano i aso nei? Atonu o maʻi, le olaga matua, po o isi lava tulaga tōtino e taofia ai nisi mai le faia o le tele o loo latou mananaʻo ai i le auaunaga paʻia. O lenei mea e ono iʻu ai i lo latou faia o le faaiʻuga faapea ua lē taulau ona latou ausia tulaga o loo faatalitalia mai e Ieova ma o latou uso talitonu. Ae o nisi o loo faaauau pea ona tuuaʻia i latou lava ona o mea sesē ua tuanaʻi, ma masalosalo ai po ua faamagaloina i latou e Ieova. Atonu o nisi e tupuga mai ni ʻāiga e tele naʻuā ni faafitauli ma ua latou talitonu ai, ona ua pau lava e lē tatau ona alofa se isi ia i latou. E faapēfea ona tupu lenei mea?

O nisi e ola aʻe i ʻāiga e taatele ai uiga o le manatu faapito, fai upu faatigā, ma le fefe ae lē o le alofa. Atonu latou te lē taitai iloa se tamā o lē e matuā alofa ia i latou, o lē sāʻili mo ni avanoa e viia ma faalāʻeiʻau ai, o lē na te lē amanaʻia masei itiiti ma e nofosauni e faamagalo e oo lava i mea sesē matuiā, ma o lona māfana e lagona ai e le ʻāiga atoa le saogalemu. Talu ai e leʻi iai lava ia i latou se tamā faalelalolagi e alofa, e faigatā foʻi la mo i latou ona malamalama i le uiga o le iai o se Tamā faalelagi e alofa.

Mo se faataʻitaʻiga, na tusi Fiti e faapea: “Na aafia mālosi loʻu olaga laʻitiiti ma loʻu talavou e le uiga lē alofa o loʻu tamā. * E lē taitai ona ia aumaia se faamālō, ma ou te leʻi taitai lagona se vāvālalata atu ia te ia. O le mea moni, i le tele o taimi, sa ou fefe ai ia te ia.” O le iʻuga, o loo iai pea ia Fiti, o lē ua 50 ma ona tupu ona tausaga, faalogona o le lē agavaa. Ma na faamatala mai faapea e Makerita: “E fetauaʻi ma lē alolofa oʻu mātua. Ina ua amata ona ou suʻesuʻeina le Tusi Paia, sa fai ma faafitauli ia te aʻu le mafaufau pe faapeī se tamā alofa.”

O uiga faapena, e tusa lava po o ā le māfuaʻaga, e mafai ona uiga faapea o la tatou auaunaga i le Atua e uunaʻia i nisi o taimi, e lē na o le alofa, ae ona ua matuā lagona le nofosala ma le fefe. E foliga mai o le mea silisili tatou te mafaia, e lē lava lea e faamalieina ai. O le faanaunauga ina ia faamalieina Ieova ma o tatou uso talitonu tatou te ono lagona ai lo tatou lē mafaia ona faia o mea uma tatou te mananaʻo e fai. O le iʻuga, e ono lē taulau ai i o tatou sini, tuuaʻia i tatou lava, ma lagona ai faapea ua leai se faamoemoe.

O le ā e mafai ona faia? Atonu e manaʻomia ona tatou faamanatu ia i tatou lava le matuā agalelei o loo ia Ieova. O se tasi sa malamalama i lenei vala alofa o uiga o le Atua, o le aposetolo o Ioane.

“Ua Sili Lava le Atua i o Tatou Loto”

I le faaiʻuga o le uluaʻi senituri T.A., na tusi atu ai Ioane i ona uso talitonu e faapea: “O le mea foi lea ua tatou iloa ai ua i le upu moni i tatou, e mautinoa foi o tatou loto i ona luma, auā pe afai e faasala o tatou loto ia i tatou, ua sili lava le Atua i o tatou loto, ua silafia foi e ia mea uma.” Aiseā na tusi ai e Ioane nei upu?—1 Ioane 3:19, 20.

Na iloa ma le manino e Ioane e mafai e se auauna a Ieova ona lagona e lona loto le taʻusalaina o ia. Atonu na oo foʻi ia Ioane na faalogona. I le avea ai o se alii talavou ma se uiga aasa, na faasaʻoina ai Ioane e Iesu Keriso i nisi o taimi ona o le soʻona faitio i a latou feutagaʻiga ma isi. O le mea moni, na avatu e Iesu ia Ioane ma lona uso o Iakopo ‘le igoa Poaneki, o lona uiga, O tagata faititili.’—Mareko 3:17; Luka 9:49-56.

I le isi 60 tausaga na sosoo ai, na faaalia ai e Ioane le agamalū ma avea ai ma se Kerisiano paleni, agaalofa, ma alofa mutimutivale. E oo ane i le taimi na ia tusia ai lana uluaʻi tusi faagaeeina, o le toe aposetolo o loo soifua pea, sa ia iloa e lē faasalaina e Ieova ana auauna taʻitoʻatasi ona o masei iti uma. Na i lo lea, o ia o se Tamā e māfana, matuā agalelei, aao mafola, ma alofa mutimutivale, o lē e matuā loloto lona alofa mo ē uma e alolofa ia te ia ma tapuaʻi ia te ia i le upu moni. Na tusi Ioane e faapea: “O le Atua, o le alofa lava ia.”—1 Ioane 4:8.

E ʻOliʻoli Ieova i la Tatou Auaunaga ia te Ia

E silafia e le Atua o tatou vāivaiga ma sesē na tuufaasolo mai, ma na te amanaʻiaina lenei tulaga. Na tusi Tavita e faapea: “Ua silafia lava e ia le mea na fai aʻi i tatou; ua manatu ia o le efuefu lava i tatou.” E malamalama Ieova i le aafiaga mai lo tatou talaʻaga lea ua tatou faapenei ai. O le mea moni, e sili lona silafia o lo tatou tulaga na i lo tatou lava.—Salamo 103:14.

 Na te silafia faapea o le toʻatele o i tatou e mananaʻo ina ia faaalia uiga e ese mai le tulaga o loo iai, ae ua lē mafai ona tatou manumalo mai lo tatou lē lelei atoatoa. E mafai ona faatusatusa atu lo tatou tulaga i le mea sa tupu i le aposetolo o Paulo, o lē na tusi: “Ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia.” O i tatou uma o loo iai i le tauiviga lava lena e tasi. I nisi o tulaga e ono iʻu ai lenei mea i le taʻusalaina o i tatou lava e o tatou loto.—Roma 7:19.

Ia manatua pea le mea lenei: O le mea e sili atu ona tāua na i lo le auala tatou te vaʻai ai ia i tatou lava o le auala e silasila ai Ieova ia i tatou. So o se taimi lava e silasila mai ai o ia o loo tatou taumafai e faafiafia o ia, e na te tali mai e lē na o le faamalieina ae ma le ʻoliʻoli. (Faataoto 27:11) E ui ina foliga mai e itiiti lava mea o loo tatou ausia i la tatou lava vaʻai, o lo tatou naunau ma le uunaʻiga lelei e faafiafiaina ai o ia. E oo lana silasila i tua atu o mea e mafai ona tatou faia; na te malamalama i mea tatou te mananaʻo e fai; e nofouta foʻi o ia i o tatou moomooga ma o tatou faanaunauga. E silasila Ieova i o tatou loto.—Ieremia 12:3; 17:10.

Mo se faaaʻoaʻoga, o le toʻatele o Molimau a Ieova e lotovaivai ma matamumuli o tagata ua latou naunau e ola i se olaga e lē fia faalialia. Mo i latou na, o le talaʻia o le tala lelei mai lea fale i lea fale e mafai ona avea o se luʻi e faavaivaia ai. E ui i lea, o le uunaʻia e se faanaunauga ina ia auauna i le Atua ma fesoasoani i tuāʻoi, e oo lava foʻi i ē lotovaivai ua latou aʻoaʻoina le auala e faafeiloaʻi ai o latou tuāʻoi ma talanoa atu e uiga i le Tusi Paia. Latou te ono lagona faapea e itiiti se mea ua latou faataunuuina, ma o lenei faalogona e ono fāoa ai lo latou ʻoliʻoli. E ono faapea ifo o latou loto e lē o tāua le latou talaʻiga i le lautele. Ae mautinoa le ʻoliʻoli o Ieova i taumafaiga sili a i latou na o loo faia i la latou auaunaga. E sili atu i lena, latou te lē o mautinoa po o āfea, ma i fea o le a tupu aʻe, olaola, ma fua mai ai fatu o le upu moni ua uma ona lūlū.—Failauga 11:6; Mareko 12:41-44; 2 Korinito 8:12.

O isi Molimau o loo mafatia i maʻi faaumiumi po o le faasolo ina matua. Mo i latou na, o le auai i sauniga e lē aunoa i le Maota o le Malo e mafai ona oo mai ai tigā ma popolega. O le faalogologo atu i se lauga e faatatau i le galuega talaʻi e ono faamanatu atu ai ia i latou galuega sa masani ona latou faia muamua ma mea o loo latou mananaʻo pea e fai, e ui ua taofiofia i latou ona o tulaga faamaʻia ua iai. E ono iai ia i latou na ni popolega mamafatū o le nofosala ona ua latou lē mafai ona mulimuli i le fautuaga i le tele o loo latou mananaʻo ai. E ui i lea, e mautinoa le tautele ia Ieova o lo latou faamaoni ma lo latou tūmau. Pe afai latou te tūmau i le faamaoni, na te lē faagaloina o latou talaʻaga faamaoni.—Salamo 18:25; 37:28.

Ia “Mautinoa Foi o Tatou Loto”

E oo ane i le taimi ua oo ai Ioane i le tulaga matua, ua tatau ona ia matuā malamalama i le matuā agalelei o le Atua. Manatua na ia tusi e faapea: “Ua sili lava le Atua i o tatou loto.” E lē gata i lena, na faalāʻeiʻauina i tatou e Ioane ina “mautinoa foi o tatou loto.” O le ā na uiga i ai Ioane e tusa o nei upu?

E tusa ai o le Vine’s Expository Dictionary of Old and New Testament Words, o le veape Eleni ua faaliliuina o le “mautinoa” o lona uiga “ia faaaogāina faamatalaga faatauanau, ina ia faatalitonu.” I se isi faaupuga, ina ia mautinoa o tatou loto, e manaʻomia ona tatou faatauanau i o tatou loto, ina ia talitonu faapea e alofa Ieova ia i tatou. E faapēfea?

O Fiti e pei ona taʻua i le amataga o lenei matāʻupu, sa auauna o se toeaina i se tasi o faapotopotoga a Molimau a Ieova mo le silia i le 25 tausaga ma ua ia iloaina faapea o suʻesuʻega tōtino e mafai ona faamautinoa atu ai i lona loto le alofa o Ieova. “Ou te suʻesuʻeina ma le faaeteete le Tusi Paia ma a tatou lōmiga e lē aunoa. Ua fesoasoani lenei mea ia te aʻu ina ia lē mafaufau ai pea i le taimi ua teʻa ae tausia se vaʻaiga manino e faatatau i lo tatou lumanaʻi matagofie. I nisi o taimi, e lofitūina ai aʻu e mafaufauga e uiga i taimi ua teʻa, ma ou lagona ai faapea e lē taitai mafai ona alofa mai le Atua ia te aʻu. Peitaʻi, i se tulaga lautele, ua ou iloa ai o le suʻesuʻe e lē aunoa e faamālosia ai loʻu loto, e faateleina  ai loʻu faatuatua, ma e fesoasoani ia te aʻu ina ia ʻoliʻoli ma ia paleni.”

E moni, atonu e lē mafai e le faitauga Tusi Paia ma le manatunatu loloto i ai ona suia ai lou tulaga o loo iai. Peitaʻi, e mafai ona suia ai le auala tatou te vaʻai ai i lo tatou tulaga o loo iai. O le aveina i totonu i o tatou loto o manatu mai le Afioga a le Atua e fesoasoani ia i tatou e mafaufau i le auala e pei ona ia mafaufau ai. E sili atu i lena, o le suʻesuʻe e mafai ai ona tatou tuputupu aʻe i le malamalama e uiga i le matuā agalelei o le Atua. E mafai ai ona faasolosolo ina tatou taliaina le manatu faapea e lē tuuaʻia i tatou e Ieova i lo tatou siʻomaga sa iai a o laiti, ma na te lē tuuaʻia i tatou ona o lo tatou tulaga faamaʻia. Na te silafia faapea o avega o loo tauaveina e le toʻatele o i tatou—tau i faalogona pe faaletino—e masani ona lē māfua mai ia i tatou lava, ma na te amanaʻia ma le agaalofa lenei mea.

Ae faapēfea Makerita, lea na taʻua i le amataga? Ina ua oo ina ia iloa Ieova, o le suʻesuʻeina o le Tusi Paia sa matuā aogā tele foʻi ia te ia. Sa pei o ia o Fiti, sa ao ona suia lona manatu e tusa o le tulaga e tatau ona iai se tamā. O le tatalo na fesoasoani ia Makerita ina ia tāaofaʻi manatu sa ia aʻoaʻoina mai ana suʻesuʻega. “Muamua lava ou te manatu ia Ieova o se uō vāvālalata, talu ai sa sili atu loʻu masani i uō agaalofa na i lo se tamā agaalofa. Sa faasolosolo mālie ona ou aʻoaʻoina ina ia sasaa atu oʻu faalogona, masalosaloga, popolega, ma faafitauli ia Ieova. Sa ou talanoa soo atu ia te ia i le tatalo, i le taimi e tasi ou te faafesootaʻia ai mea fou uma ua ou aʻoaʻoina e uiga ia te ia. Ina ua mavae sina taimi, na atiina aʻe ai oʻu faalogona mo Ieova i se tulaga maoaʻe lea ua seāseā ai lava tulaʻi mai se faafitauli i le manatu faapea o ia o loʻu Tamā agaalofa,” o le tala lea a Makerita.

Faasaʻoloto Mai Popolega Uma

Po o le ā lava le umi o le a iai lenei faiga tuai o mea amioleaga, e leai ma se tasi e mafai ona faamoemoe e saʻoloto mai popolega. Mo nisi Kerisiano o le uiga o lenei mea faapea o lagona o popolega po o le masalosalo o le tagata lava ia e ono toe tupu ma faapogaia ai ni puapuaga. Ae e mafai ona tatou mautinoa e silafia e Ieova o tatou uunaʻiga lelei ma le galuega fitā o loo tatou tuuina atu i le auaunaga. O le a ia lē faagaloina lava le alofa o loo tatou faaalia mo lona suafa.—Eperu 6:10.

I le lalolagi fou o loo fotuaʻi mai i lalo o le Malo Faa-Mesia, ua faatalitalia le faasaʻoloto o tagata faamaoni uma mai avega a le faiga o mea a Satani. Maʻeu se mapusaga o le a iai! Ona tatou vaʻaia ai lea o nisi foʻi faamaoniga o le auala e matuā agalelei ai Ieova. Seʻia oo atu i lena taimi, tau ina ia faamautinoa e tagata uma faapea “ua sili lava le Atua i o tatou loto, ua silafia foi e ia mea uma.”—1 Ioane 3:20.

[Faamatalaga pito i lalo]

[Faamatalaga faaopoopo i le itulau 30]

O Ieova e lē o sē pule sauā ae o se Tamā e māfana, e matuā agalelei, ma alofa mutimutivale

[Faamatalaga i le itulau 31]

O le suʻesuʻeina o le Afioga a le Atua e fesoasoani ia i tatou ina ia mafaufau ai e pei o ia