O i Tatou o Ni Ē Faatuatua

Atiina Aʻe le Faatuatua e Ala i Suʻesuʻega Faale-Tusi Paia i Initia

E MAI atumauga maualuluga i le itū i mātū o le Himalaya ua ufitia i le kiona, e oo atu i matāfaga vevela i le itū i saute o le Vasa Initia, o Initia o se atunuu e tele mea e eseese ai, i le laueleele ma lotu. O lona faitau aofaʻi e sili atu i le tasi le piliona, e tusa ma le 83 pasene o tagata, o Hinitu, 11 pasene, o Musalimi, ma o le isi vaega uma e tele lava ina faia aʻe i ē ua taʻua o Kerisiano, Sikhs, Puta, ma Jains. E maua e tagata uma le saʻolotoga e tapuaʻi ai. Ua faapea mai le World Book Encyclopedia: “E faia e lotu se vaega tāua i le auala o olaga o tagata Initia.”

O le ola e tusa ai ma lo latou faatuatuaga faa-Kerisiano, ua faamatalaina lelei ai Molimau a Ieova i Initia e faapea, o lo latou faitau aofaʻi e sili atu i le 21,200. I le pei o a latou aumea faaleagaga i isi vaega o le lalolagi, ua manatu ai Molimau i Initia e faapea o se faaeaga e fesoasoani ai i o latou tuāʻoi e ati aʻe se faatuatua mālosi i le Afioga a le Atua, le Tusi Paia. (2 Timoteo 3:16, 17) Seʻi manatu i le auala na maua ai e se tasi ʻāiga i Chennai i le itū i saute o Initia le poto i upu moni o le Tusi Paia.

I le taimi muamua a e latou te leʻi feiloaʻi ma Molimau a Ieova, na matuā aafia ai lava lenei ʻāiga i gaoioiga faa-Katoliko i le faia o vavega ma faamālōlōga, i le faapea mai na latou vaʻaia ni faaaliga, tautala i gagana ese, ma faamālōlō maʻi. Sa lauiloa i latou i le lotu ma le nuu atoa, sa oo foʻi ina faalagilagi e tagata nisi o le ʻāiga e faapea o “swami,” o lona uiga o le “alii.” Ona oo lea i le tasi aso, na asiasi atu ai se Molimau i le ʻāiga ma faailoa atu ia i latou mai le Tusi Paia e faapea, o Iesu o le Alo o le Atua, ae lē o le Atua e Ona le Malosi Uma Lava, e pei ona talitonuina e le toʻatele. Na faailoa atu foʻi e le Molimau ia i latou o le suafa o le Atua o Ieova ma e faapea o le fuafuaga a Ieova mo le lalolagi o le faia lea e avea ma parataiso matagofie.—Salamo 83:18; Luka 23:43; Ioane 3:16.

Talu ai latou te faatāuaina le Afioga a le Atua ma e fiafia i mea na latou faalogo i ai, na malilie ai tagata o le ʻāiga e faia se suʻesuʻega faale-Tusi Paia e lē aunoa ma Molimau a Ieova. O lenei mea na tauemua ai i latou e tagata na latou masani i le lotu. Ae peitaʻi, na tūmau pea ona maumauaʻi le ʻāiga e faaauau la latou suʻesuʻega faale-Tusi Paia. A o faateleina lo latou poto ma oo ai ina mālosi lo latou faatuatua, na faamutaina loa ona toe auai i faiga sesē a le latou lotu. I aso nei ua avea ai tagata e toʻatolu o le ʻāiga ma Molimau papatisoina māʻelegā ma o le tinā o loo auauna o se paeonia lagolago i so o se taimi lava e mafai ai ona fai o lea mea.

O le Faatuatua e Manumālō ai i le Lē Atoatoa o le Mālosi o le Tino

O Sunder Lal, o se tamāloa talavou e nofo i se nuu i Punjab, sa manaʻomia se faatuatua matuā telē ma le lototele ina ia mafai ai ona tufa atu le tala lelei o le Malo o le Atua i isi. (Mataio 24:14) O le tasi o māfuaʻaga ona ua ia tuʻua talitonuga i atua e toʻatele a lona ʻāiga ma le nuu ae tapuaʻi i le Atua moni o Ieova. O le isi mea, o Sunder Lal e leai ni vae.

Seʻia oo atu i le 1992, sa iai se faasologa masani o le olaga o Sunder Lal. Sa galue o ia o se fesoasoani i se fōmaʻi ma auai atu ma lona lava ʻāiga i le tapuaʻiga i le tele o atua eseese e ala i le taʻitaʻiga a lo latou faifeʻau (guru) na filifilia. O lea i le tasi po, na paʻū ai o ia a o sopoʻia se ala o le nofoaafi. Na solia o ia i se nofoaafi ma mumutu ese uma ai ona vae e lua e amata mai i ogavae. E ui lava sa ola o ia, ae o lona olaga atoa sa iai i se tulaga ua matuā faaleagaina. O le mea moni, sa matuā mafatia ai ia Sunder Lal ma oo ai lava ina manatu e pule i lona ola. Sa lagolagosua  lava lona ʻāiga, ae o lona lumanaʻi sa foliga mai ua leai se faamoemoe.

Ona asiasi atu lea o se tasi o Molimau a Ieova ia Sunder Lal ma faaali atu ia te ia mai le Tusi Paia e faapea ua folafola mai e le Atua e faia le lalolagi ma parataiso fiafia ma o le a ia avatu i tagata uma o ē alolofa ma matataʻu ia te ia le soifua mālōlōina lelei atoatoa. Na malie ia Saunder Lal e faia se suʻesuʻega faale-Tusi Paia, ma e tasi le tausaga na ia suʻesuʻe ai ma le filigā. Sa valaʻaulia o ia ina ia auai i sauniga faa-Kerisiano ma na iʻu lava ina alu i ai e ala i le tietie i tua o le uila a sana uō. E ui lava o se tietiega tigā, ae sa telē le taui. O mea na ia aʻoaʻoina i ana suʻesuʻega tōtino o le Tusi Paia, sa faamautinoaina a o ia feiloaʻi atu i isi o ē talitonu moni i folafolaga i le Afioga a le Atua ma ola e tusa ai ma aʻoaʻoga a le Tusi Paia.

Sa amata loa e Sunder Lal ona tufa atu le tala lelei i ona tuāʻoi, ma i le 1995 na papatisoina ai o ia. I le taimi muamua, na auai o ia i le faiva i le fanua e ala i le savali i ona lima, sa ia tau tosoina ai o ia lava mai lea fale i lea fale i lona nuu, ma o lana auala masani lava lena e fealuaʻi ai. Ae i le taimi nei, ua ia maua se meaalofa mai ona uso faaleagaga—o se uila vilivae e tolu paʻu ua faaauupegaina faapitoa lava ina ia “viliina” e lima. Ona o le fesoasoani a lana uila vilivae e tolu paʻu, ua mafai ai i le taimi nei ona alu na o ia mo se malaga e fitu maila (12 kilomita) ina ia auai i sauniga a le faapotopotoga. I nisi taimi e alu ai lava na o ia i le loloto o timuga; o nisi taimi e oo ai le vevela o le tau i le sili atu i le 110 tikerī Fahrenheit (43°C).

E lē gata i le auai i sauniga, e faia foʻi e Sunder Lal le tele o suʻesuʻega faale-Tusi Paia ma isi o ē manaʻomia le fesoasoani e atiaʻe ai se faatuatua mālosi i le Atua moni, o Ieova. O le mea moni, o le toʻafitu o ē na latou suʻesuʻe muamua ua papatisoina nei, e faapea foʻi le toʻatolu o isi tagata na ia feiloaʻi atu i ai muamua ae sa latou suʻesuʻe ma isi uso Molimau.

‘O le faatuatua’ e tusa ai ma le faamatalaga a le Tusi Paia, ‘e lē o i tagata uma.’ (2 Tesalonia 3:2) Ae mo i latou “ua saunia i le ola faavavau,” e mafai e le suʻesuʻeina e lē aunoa o le Afioga a le Atua ona atiina aʻe se faatuatua mālosi. (Galuega 13:48, LF) O se suʻesuʻega faapena e mafai foʻi ona faapupulaina ai mata i se faamoemoe e uiga i se lumanaʻi matagofie—o se mea o loo faatuatua i ai le aofaʻiga ua faatoʻateleina o tagata i Initia.

[Faafanua i le itulau 30]

(Tagaʻi i le lomiga mo le ata atoa)

AFGANISTAN

PAKISITANA

NEPALE

BHUTAN

SAINA

BANGLADESH

MYANMAR

LAOS

TAIALANI

VIETINAME

CAMBODIA

SRI LANKA

INITIA

[Faamatalaga i Ata i le itulau 30]

Mountain High Maps® Copyright © 1997 Digital Wisdom, Inc.