Ia Faatuatua i Afioga Faavaloaga a le Atua!

“O loo ia te i tatou foi le upu o le valoaga e sili lona mausali.”—2 PETERU 1:19.

1, 2. O le ā le uluaʻi valoaga na faamauina, ma o le ā se tasi o fesili na lāgā ai?

O IEOVA le Puna o le uluaʻi valoaga na faamauina. Ina ua uma ona agasala Atamu ma Eva, ona fetalai atu lea o le Atua i le gata: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:1-7, 14, 15) E tele ni senituri o le a mavae ona faatoʻā malamalama atoatoa lea i na afioga faavaloaga.

² Sa iai i lena uluaʻi valoaga se faamoemoe moni mo tagata agasala. Mulimuli ane na faaalia mai ai e le Tusi Paia e faapea o Satani le Tiapolo o “le gata tuai” lea. (Faaaliga 12:9) Ae o ai o le a avea ma Fanau folafolaina a le Atua?

Le Sāʻiliga mo le Fanau

3. Na faapēfea ona faaalia e Apelu le faatuatua i le uluaʻi valoaga?

³ I le lē pei o lona tamā, sa faaalia e le tagata amio Atua o Apelu, le faatuatua i le uluaʻi valoaga. E foliga mai sa iloa lelei e Apelu o le a manaʻomia le faamaligiina o le toto mo le ufiufia o agasala. O lea na uunaʻia ai o ia e le faatuatua e ofoina atu se taulaga o manu lea sa faamaonia le taliaina e le Atua. (Kenese 4:2-4) Peitaʻi, sa tūmau pea ona leʻi iloa po o ai le Fanau folafolaina.

4. O le ā le folafolaga na tuuina mai e le Atua ia Aperaamo, ma o le ā na faaalia ai e faatatau i le Fanau folafolaina?

⁴ Pe ā ma le 2,000 tausaga talu ona mavae atu taimi o Apelu, ae tuuina mai loa e Ieova i le augātamā anamua o Aperaamo lenei folafolaga faavaloaga: “O le mea lea ou te matuā faamanuia ai ia te oe, ma ou matuā faatoateleina lava lau fanau e pei o fetu o le lagi . . . o lau fanau foi e manuia ai atu nuu uma lava o le lalolagi.” (Kenese 22:17, 18) O na afioga sa faafesootaʻi atu ai Aperaamo i le faataunuuga o le uluaʻi valoaga. Na faaalia ai o le Fanau lea o le a na faaumatiaina galuega a Satani, o le a aliaʻi mai i le gafa o Aperaamo. (1 Ioane 3:8) “E lei masalo vale [Aperaamo] ma le le faatuatua i le mea na folafolaina e le Atua” ma sa faapena foʻi isi molimau a Ieova o ē na soifua i tua atu a o leʻi oo mai i taimi o uluaʻi Kerisiano, o molimau ia “na le maua e i latou le mea na folafolaina.” (Roma 4:20, 21; Eperu 11:39) Na i lo lea, sa latou faatuatua pea i afioga faavaloaga a le Atua.

5. Ia te ai na faataunuu i ai le folafolaga a le Atua e uiga i le Fanau, ma aiseā ua e tali mai faapena?

⁵ Na faailoa e le aposetolo o Paulo le Fanau folafolaina a le Atua ina ua ia tusi mai e faapea: “Na fetalaia mai folafolaga ia Aperaamo, ma so lana fanau; e lei faapea mai, ‘O le fanau, peiseai e toatele,’ a e toatasi, ‘O so lau fanau’, o Keriso lava lea.” (Kalatia 3:16) O le Fanau lea sa tatau ona faamanuiaina ai atunuu, sa leʻi aofia ai fanau uma lava a Aperaamo. O ē na tupuga mai i lona atalii o Isamaeli ma ē na tupuga mai i ona atalii ia na fananau mai ia Kitura, sa leʻi faaaogā mo le faamanuiaina o tagata. O le Fanau  o faamanuiaga na auala mai i lona atalii o Isaako, ma Iakopo le atalii o lona atalii. (Kenese 21:12; 25:23, 31-34; 27:18-29, 37; 28:14) Na faaalia e Iakopo faapea o le a usiusitaʻi atu “nuu” o le ituʻāiga o Iuta ia Sailo, peitaʻi na mulimuli ane faasino patino atu le Fanau i le gafa o Tavita. (Kenese 49:10; 2 Samuelu 7:12-16) Na faatalitalia e tagata Iutaia o le uluaʻi senituri se tagata e toʻatasi e oo mai e avea ma Mesia, po o Keriso. (Ioane 7:41, 42) Ma o le valoaga a le Atua e uiga i le Fanau, sa faataunuuina i lona Alo, o Iesu Keriso.

Ua Aliaʻi Mai le Mesia!

6. (a) O le ā lo tatou malamalamaga i le valoaga o vaiasosa e 70? (e) O anafea ma na faapēfea ona ‘faaiu e Iesu agasala’?

⁶ Na faamauina e le perofeta o Tanielu se valoaga matuā tāua e faatatau i le Mesia. I le uluaʻi tausaga o le nofoaʻiga a Tariu le Metai, na ia iloa ai ua latalata ina iʻu le 70 tausaga o le faatafunaga o Ierusalema. (Ieremia 29:10; Tanielu 9:1-4) A o tatalo Tanielu, na alu ane ai le agelu o Kaperielu ma faaali ane e faapea ‘ua atofaina vaiasosa e fitugafulu e faaiu ai agasala.’ O le a fasiotia le Mesia i le ogatotonu o le 70 vaiasosa. Na amata mai le “fitugafulu vaiasosa o le tausaga” i le 455 T.L.M., ina ua ‘aauina atu [e le tupu Peresia o Aretaseta I] le poloaʻiga ia toe ati aʻe Ierusalema.’ (Tanielu 9:20-27; Moffatt; Neemia 2:1-8) O le a aliaʻi mai le Mesia pe a mavae vaiasosa e 7 ma isi vaiasosa e 62. O nei tausaga e 483 sa amata faitau mai i le 455 T.L.M. e oo atu i le 29 T.A., ina ua papatisoina Iesu ma faauuina o ia e le Atua e avea ma Mesia, po o Keriso. (Luka 3:21, 22) Sa ‘faaiu e Iesu agasala’ e ala i le foaʻiina atu o lona soifua e fai ma togiola i le 33 T.A. (Mareko 10:45) Maʻeu ni māfuaʻaga talafeagai mo le atiina aʻe o se faatuatua i afioga faavaloaga a le Atua! *

7. I le faaaogāina o le Tusi Paia, taʻu mai auala na faataunuu ai e Iesu valoaga e faatatau i le Mesia.

⁷ O le faatuatua i afioga faavaloaga a le Atua e mafai ai ona tatou mātaulia le Mesia. Mai valoaga e tele e faatatau i le Mesia o loo faamauina i Tusitusiga Eperu, e feololo ni valoaga sa faatatau tuusaʻo atu ia Iesu e tusitala o Tusitusiga Kerisiano Eleni. Seʻi fai se faataʻitaʻiga: Sa fanau mai Iesu i se taupou i Peteleema. (Isaia 7:14; Mika 5:2; Mataio 1:18-23; Luka 2:4-11) Na valaʻauina o ia nai Aikupito, ma sa fasiotia pepe ina ua mavae lona fanau mai. (Ieremia 31:15; Hosea 11:1; Mataio 2:13-18) Sa tauaveina e Iesu o tatou maʻi. (Isaia 53:4; Mataio 8:16, 17) E pei ona sa valoia, na afio atu o ia i Ierusalema e tietie atu i se tamaʻi asini. (Sakaria 9:9; Ioane 12:12-15) Sa faataunuuina upu a le faisalamo ina ua mavae le faasatauroina o Iesu, ina ua vaevaeina e fitafita ona ofu mo i latou lava ma faia se vili i lona ofu tino. (Salamo 22:18; Ioane 19:23, 24) O le lē gauia o ivi o Iesu ma le tutuiina o ia i le tao na faataunuu ai foʻi valoaga. (Salamo 34:20; Sakaria 12:10; Ioane 19:33-37) Ua na o ni faaaʻoaʻoga nei o valoaga i le Mesia na faatatau atu ia Iesu e tusitala faagaeeina o le Tusi Paia. *

Ia Viia le Tupu Faa-Mesia!

8. O ai Lē ua Mai Anamuā Ona Aso, ma na faapēfea ona faataunuu le valoaga lea e faamauina i le Tanielu 7:9-14?

⁸ I le uluaʻi tausaga o le nofoaʻiga a Pelesara le tupu o Papelonia, na faaali atu ai e Ieova i lana perofeta o Tanielu se faalepo ma ni faaaliga mataʻina. Na muamua vaʻaia e le perofeta ni manu feʻai tetele se fā. Na taʻu mai e le agelu a le Atua ia i latou faapea o na manu feʻai o “tupu ia e toafa,” e faaalia ai o loo faaāta e nei manu malo mālolosi o le lalolagi o le a auauaʻi lo latou tutū mai. (Tanielu 7:1-8, 17) Na sosoo ai ma le vaʻaia e Tanielu o Ieova, o “Lē ua mai anamuā ona aso,” o loo afio ma le mamalu i lona nofoālii. I le matuā ogoogo o le faamasinoina o manu feʻai, na ia aveesea ai le pule mai ia i latou ma faaumatia le manu feʻai lona fā. Ona tuu atu lea o le pule e faavavau i “nuu uma, ma atu nuu, ma gagana eseese” ma faaee atu i “Lē e pei o le Atalii o le tagata.” (Tanielu 7:9-14) Maʻeu se valoaga ofoofogia e fesootaʻi atu i le faanofotupuina o “le  Atalii o le tagata,” o Iesu Keriso, i le lagi i le tausaga e 1914!—Mataio 16:13.

9, 10. (a) O ā mea sa faasino atu i ai vaega eseese o le tupua na iloa i le faalepo? (e) O le a faapēfea ona e faamatalaina le faataunuuga o le Tanielu 2:44?

⁹ Sa iloa e Tanielu faapea, o le Atua o loo “aveeseina e ia o tupu, e tofia foi e ia o tupu.” (Tanielu 2:21) I lona faatuatua ia Ieova, o “le na te faaalia mea ua lilo,” na faailoa mai ai e le perofeta le uiga o le faalepo a le tupu Papelonia o Nepukanesa e faatatau i le tupua tele. Sa faasino atu vaega eseese o le tupua i le tulaʻi mai ma le toe paʻūū atu o na malo mālolosi o le lalolagi e pei o Papelonia, Metai ma Peresia, Eleni ma Roma. Na faaaogā foʻi e le Atua Tanielu na te otooto maia mea o le a tutupu i le lalolagi i lena taimi seʻia oo mai i o tatou aso ma faasolo atu i le lumanaʻi.—Tanielu 2:24-30.

¹⁰ Na faapea mai le valoaga: “O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.” (Tanielu 2:44) Ina ua faaiʻuina “tausaga o nuu ese” i le 1914, na faavaeina ai e le Atua le Malo faalelagi o le a taʻitaʻia e Keriso. (Luka 21:24; Faaaliga 12:1-5) E ala i le mana tauatua na taavale ese ai le “maa” o le Malo Faa-Mesia, mai le “mauga” o le pulega silisili ese aoao a le Atua. Ia Amaketo, o le a taia ai e lena maa le tupua ma nutililiia ai. I le avea o se mauga faalemalo o loo aafia ai “le lalolagi uma,” o le a tūmau ai e faavavau le Malo Faa-Mesia.—Tanielu 2:35, 45; Faaaliga 16:14, 16. *

11. O le ā sa faataʻimua mai e le liliuga o Iesu, ma o le ā se aafiaga o lena vaʻaiga ia Peteru?

¹¹ Sa manatu Iesu i le pulega a lona Malo, a o ia fetalai atu i ona soo: “O loo tutū mai iinei nisi e le oo ia te i latou le oti, seia latou vaaia le Atalii o le tagata ua sau i lona malo.” (Mataio 16:28) I le ono aso mulimuli ane, na avaʻe ai e Iesu ia Peteru, Iakopo ma Ioane ma latou agaʻi atu i se mauga maualuga, ma o iinā na liua ai o ia i o latou luma. A o ufitia aposetolo i se ao pupula, na tulei mai le Atua e faapea: “O loʻu Atalii pele lena, ou te fiafia ia te ia; ia outou faalogo ia te ia.” (Mataio 17:1-9; Mareko 9:1-9) Maʻeu se faataʻimuaga o le mamalu o le Malo o Keriso! E lētioa lava faasino atu Peteru i lena vaʻaiga mataʻina ma faapea mai: “O loo ia te i tatou foi le upu o le valoaga e sili lona mausali.”—2 Peteru 1:16-19. *

12. Aiseā ua avea ai le taimi lenei ma taimi sili e faaalia ai lo tatou faatuatua i afioga faavaloaga a le Atua?

¹² O “le upu o le valoaga” e foliga mai e aofia ai e lē gata o valoaga i Tusitusiga Eperu e faatatau i le Mesia ae o le fetalaiga foʻi a Iesu faapea, o le a afio mai o ia i “le mana ma le mamalu tele.” (Mataio 24:30) O le liliuga sa faamautinoa mai ai le moni o le afioga faavaloaga e faatatau i le afio mai faamamaluina o Keriso i le mana o le Malo. E lē pine, ona avea lea o lona faaali mai i le mamalu, ma faaumatiaga mo tagata lē faatuatua, ae o ni faamanuiaga mo i latou o loo faaalia le faatuatua. (2 Tesalonia 1:6-10) O le faataunuuga o le valoaga a le Tusi Paia e faamaonia ai o “aso [nei] e gata ai.” (2 Timoteo 3:1-5, 16, 17; Mataio 24:3-14) I le avea ma Faaoosala Sili a Ieova, ua tulaʻi ai Mekaeli, o Iesu Keriso lea, e sauniuni e aumaia le iʻuga i lenei faiga amioleaga o mea a o faagasolo le “puapuaga tele.” (Mataio 24:21; Tanielu 12:1) E mautinoa lava la, o le taimi lenei e faaalia atu ai o loo tatou faatuatua i afioga faavaloaga a le Atua.

Ia Tūmau le Faatuatua i Afioga Faavaloaga a le Atua

13. O le ā e mafai ona fesoasoani ia i tatou ina ia tūmau lo tatou alofa i le Atua ma ia faaolaola pea lo tatou faatuatua i lana afioga?

¹³ E mautinoa sa tatou fiafia ina ua faatoʻā tatou iloa faataunuuga o afioga faavaloaga a le Atua. Ae talu mai lena taimi po ua tau mou atu ea lo tatou faatuatua ma maalili lo tatou alofa? Tau lava ina ia lē taitai ona pei i tatou o Kerisiano i Efeso o ē na ‘tuua lo latou uluai alofa.’ (Faaaliga 2:1-4) E tusa lava po o le ā le umi talu ona tatou auauna ia Ieova, e mafai lava ona oo ia i tatou na mafatiaga seʻi vaganā ua tatou ‘muaʻi saili pea le malo o le Atua ma lana amiotonu’ ina  ia faaputu ai ʻoa i le lagi. (Mataio 6:19-21, 31-33) O le suʻesuʻeina māʻelegā o le Tusi Paia, le faia e lē aunoa o se sao i sauniga faa-Kerisiano, ma le māʻelegā i le galuega talaʻi o le Malo, o le a fesoasoani ia i tatou ina ia tūmau ai pea lo tatou alofa mo Ieova, mo lona Alo, ma le Tusi Paia. (Salamo 119:105; Mareko 13:10; Eperu 10:24, 25) O le iʻuga, o le a faaolaola ai pea e lenei mea lo tatou faatuatua i afioga a le Atua.—Salamo 106:12.

14. Ua faapēfea ona tauia Kerisiano faauuina mo lo latou faatuatua i afioga faavaloaga a Ieova?

¹⁴ E pei lava ona sa faataunuuina afioga faavaloaga a le Atua i taimi ua teʻa, e mafai foʻi faapena ona tatou faatuatua i mea o valoia mai ai mo le lumanaʻi. Mo se faataʻitaʻiga, ua avea nei le faatasi mai o Keriso i le mamalu o le Malo o se mea moni, ma ua tofo Kerisiano faauuina o ē sa faatuatua seʻia oo i le oti i le faataunuuga o le folafolaga faavaloaga: “O lē manumalo, ou te avatua ia te ia e ʻai i le laau o le ola o i totonu o le parataiso [a] le Atua.” (Faaaliga 2:7, 10; 1 Tesalonia 4:14-17) E foaʻi atu e Iesu i nei tagata manumalo le faaeaga ina ia “ʻai i le laau o le ola” i le “parataiso [faalelagi a] le Atua.” Pe a toe tutū mai i latou ma e ala ia Iesu Keriso, latou te maua ai le ola e lē mafai ona oti ma le tino e lē pala ua foaʻi atu i ai e Ieova, “le Tupu o le vavau, o le o soifua pea lava, o le le o vaaia, o le Atua e toatasi.” (1 Timoteo 1:17, LF; 1 Korinito 15:50-54; 2 Timoteo 1:10) Maʻeu se taui sili mo lo latou alofa e lē mavae i le Atua ma lo latou faatuatua lē maluelue i ana afioga faavaloaga!

15. O ai i latou na faataatia i ai le faavae o le “lalolagi fou,” ma o ai a latou aumea?

¹⁵ E leʻi umi talu ona toe tutū aʻe le ʻaufaauuina faatuatua sa maliliu ina ia iai i le “parataiso [a] le Atua” i le lagi, ae faasaʻolotoina loa le isi vaega o le Isaraelu faaleagaga sa totoe i le lalolagi, mai ia “Papelonia o le aai sili,” le emepaea o lotu sesē a le lalolagi. (Faaaliga 14:8; Kalatia 6:16) Sa faataatia ia i latou na le faavae o le “lalolagi fou.” (Faaaliga 21:1) Ona fanau mai lea o “se nuu,” ma sa atiina aʻe e avea o se parataiso faaleagaga lea o loo lauolaola i le lalolagi aoao i aso nei. (Isaia 66:8) O iinā o loo lolofi mai ai i le taimi lava lenei, o “aso e gata ai,” se vao tele o aumea pei ni mamoe a le Isaraelu faaleagaga.—Isaia 2:2-4; Sakaria 8:23; Ioane 10:16; Faaaliga 7:9.

Ua Valoia Mai le Lumanaʻi o le Fanau a Tagata i Afioga Faavaloaga a le Atua

16. O ā faamoemoega mo i latou o loo lagolagoina ma le faamaoni ē faauuina?

¹⁶ O ā faamoemoega mo i latou o loo lagolagoina ma le faamaoni ē faauuina? Ua faatuatua foʻi  i latou i afioga faavaloaga a le Atua, ma ua latou faamoemoe e ulu atu i le lalolagi Parataiso. (Luka 23:39-43) O iinā o le a latou feinu mai ai i “le vaitafe manino o le vai o le ola” lea e faatūmauina ai le ola, ma o le a faamālōlōina i latou i ‘lau o laau’ ua totō i tafatafa ane. (Faaaliga 22:1, 2) Pe afai o ia te oe se faamoemoe ofoofogia faapena, tau ina ia faaauau pea ona e faaalia se alofa loloto mo Ieova ma faatuatua atu i ana afioga faavaloaga. Tau ina ia e iai faatasi ma i latou o ē tofo i le ʻoliʻoli o le a lē mataofiofia o le ola e faavavau i le lalolagi Parataiso.

17. O ā faamanuiaga o le a aofia ai i le olaga i le lalolagi Parataiso?

¹⁷ E lē mafai e tagata lē lelei atoatoa ona faamatalaina le ituʻāiga o olaga o le a iai i le lalolagi Parataiso o loo fotuaʻi mai, peitaʻi ua aumaia e afioga faavaloaga a le Atua se malamalamaga ia i tatou e faatatau i faamanuiaga o loo teuina i lena taimi mo tagata usiusitaʻi. Pe a pule le Malo o le Atua e aunoa ma se faalavelavea ma faia lona finagalo i le lalolagi e pei ona faia i le lagi, o le a leai ni tagata—e leai foʻi ni manu—e taufeai e “faia se mea leaga, latou te le faaumatia foi se mea.” (Isaia 11:9; Mataio 6:9, 10) O le a ʻaināina le lalolagi e tagata agamalū, ma o le a “faafiafia foi i latou ia te i latou ona o le manuia e tele.” (Salamo 37:11) O le a lē toe iai le anoanoaʻi o ni tagata matelāina, auā “o le a anoanoaʻi saito i le lalolagi; I tumutumu o mauga o le a fau ma soloi ai.” (Salamo 72:16, NW ) O le a lē toe maligi loimata o le faanoanoa. E lē toe iai se maʻi, e oo lava i le oti o le a lē toe iai. (Isaia 33:24; Faaaliga 21:4) Seʻi faaāta ifo faalemafaufau—e lē toe iai ni fōmaʻi, leai ni fuālaau ma vailaau, leai ni falemaʻi po o nofoaga mo maʻi o le mafaufau, leai ni falelauasiga. Maʻeu ni faamoemoega ofoofogia!

18. (a) O le ā le mea na faamautinoa atu ia Tanielu? (e) O le ā o le a fai ma “tofi” o Tanielu?

¹⁸ E oo lava i tuugamau o tagata o le a faagaogaoina auā o le a faatutūina mai i latou sa maliliu ai. O le faamoemoe lena sa iai i le tagata amiotonu o Iopu. (Iopu 14:14, 15) Sa faapena foʻi le perofeta o Tanielu, auā na taʻu atu e le agelu a Ieova ia te ia le faamautinoaga lenei faamāfanafanaloto: “O oe ia e alu atu seia oo i le iuga; auā e te malolo, e te tu mai foi i lou tofi pe a oo i le iuga o aso.” (Tanielu 12:13) Sa auauna faamaoni Tanielu i le Atua seʻia oo i le iʻuga o lona olaga. O loo mālōlō nei o ia i le oti, ae o le a “tu” o ia i le “toe tutū mai o e amiotonu” a o faagasolo le Pulega Faa-Meleniuma a Keriso. (Luka 14:14) O le ā o le a fai ma “tofi” o Tanielu? I le faataunuuga o lana valoaga e faatatau i le Parataiso, o loo faaalia ai e le valoaga a Esekielu faapea o le a tofu tagata uma lava o Ieova ma se nofoaga, e oo foʻi i le laueleele o le a vaevaeina tutusa ma i se faiga e maopoopo lelei. (Esekielu 47:13–48:35) O le a iai la se nofoaga o Tanielu i le Parataiso, ae peitaʻi o lona tofi iinā o le a tele nisi mea e aofia ai na i lo le na o se laueleele. O le a aofia ai lana matāfaioi e tusa o fuafuaga a Ieova.

19. O le ā e manaʻomia mo le ola i le Parataiso i le lalolagi?

¹⁹ Ae faapēfea oe ma sou tofi? Pe afai e te faatuatua i le Afioga a le Atua, le Tusi Paia, e mautinoa lava o le a e moomoo mo se olaga i le lalolagi Parataiso. Atonu foʻi o le a e faaātaina lou iai iinā, o loo e ʻoliʻoli i le tele o ana faamanuiaga, o loo e tausia lelei le laueleele, ma e ʻoliʻoli i le faafeiloaʻia o ē na maliliu. Aemaise ai, o le Parataiso o le nofoaga lena mo le fanau a tagata. Na foafoaina e le Atua le uluaʻi ulugalii faaletagata ina ia la ola i se nofoaga faapena. (Kenese 2:7-9) Ma o lona finagalo ina ia ola e faavavau tagata usiusitaʻi i le Parataiso. Pe o le a e gaoioi ea e ōgatusa ma le Tusi Paia ina ia mafai ai ona avea oe o se tasi o le faitau piliona o ē o le a iʻu ina ola ai i le lalolagi Parataiso? E mafai pe afai e te alofa moni i lo tatou Tamā faalelagi, o Ieova, ma ia tūmau lou faatuatua i afioga faavaloaga a le Atua.

[Faamatalaga pito i lalo]

O le a Faapēfea Ona E Tali?

• O le ā le uluaʻi valoaga, ma o ai le Fanau folafolaina?

• O ā nisi o valoaga faa-Mesia na faataunuuina ia Iesu?

• O le a faapēfea ona faataunuuina le Tanielu 2:44, 45?

• O le ā le lumanaʻi mo le fanau a tagata lea e faasino atu i ai afioga faavaloaga a le Atua?

[Fesili mo le Suʻesuʻega]

[Ata i le itulau 18]

Po o e faamoemoe e ola i le lalolagi Parataiso?