Uaʻi Atu i Afioga Faavaloaga a le Atua mo o Tatou Aso

“Ia e iloa, le atalii e o le tagata, auā o ona po o le iuga e taunuu ai le faaaliga.”—TANIELU 8:17.

1. O le ā e finagalo Ieova ina ia iloa e tagata uma lava e faatatau i o tatou aso?

E LĒ taofiofia e Ieova ia te ia lava le malamalamaga i mea o le a tutupu i le lumanaʻi. Na i lo lena, o ia o Lē Faaalia mealilo. O le mea moni, e finagalo o ia ina ia iloa e i tatou uma ua tatou iai nei i siʻui o “ona po o le iuga.” Maʻeu se tala matuā tāua mo le ono piliona o tagata o loo soifua nei i le lalolagi!

2. Aiseā ua faapopoleina ai tagata e faatatau i se lumanaʻi o le fanau a tagata?

² Pe faateʻia ea i le iloa faapea ua lata mai le iʻuga o lenei lalolagi? E mafai e le tagata ona savali i luga i le masina, peitaʻi i le tele o nofoaga e lē mafai ona savalivali o ia i auala o lenei paneta e aunoa ma le fefe. E mafai ona ia faatumu le fale i ni meafale faaonaponei, ae lē mafai ona ia faaitiitia le faatupulaʻia o ʻāiga malepelepe. E mafai ona ia faatupuina le anoanoaʻi o faamatalaga ma le poto, ae lē mafai ona ia aʻoaʻoina tagata ina ia nonofo faatasi ma le fīlēmū. O nei taumafaiga lē taulau ua lagolagoina ai le anoanoaʻi o faamaoniga faale-Tusi Paia e faapea ua tatou ola nei i ona po o le iʻuga.

3. O anafea na muaʻi faaaogā ai i le lalolagi upu “ona po o le iuga”?

³ O na upu e sili ona mataʻina—“ona po o le iuga”—sa muaʻi faaaogā i le lalolagi i le pe tusa ma le 2,600 tausaga ua mavae e le agelu o Kaperielu. Na faalogo atu se perofeta a le Atua, o lē sa tetemū a o faapea mai Kaperielu: “Ia e iloa, le atalii e o le tagata, auā o ona po o le iuga e taunuu ai le faaaliga.”—Tanielu 8:17.

O ‘Ona Po Nei o le Iuga’!

4. O ā isi faaupuga ia o loo faasino atu ai le Tusi Paia i ona po o le iʻuga?

⁴ E faaono ona taʻua i le tusi o Tanielu faaupuga, “ona po o le iuga” ma “ona po ua tuupoina e oo ai le iuga.” (Tanielu 8:17, 19; 11:35, 40; 12:4, 9) E fesootaʻi atu i “aso e gata ai” lea sa valoia mai e le  aposetolo o Paulo. (2 Timoteo 3:1-5) O le vaitaimi lenei sa faasino atu i ai fetalaiga a Iesu Keriso e faapea o le taimi o lona “faatasi mai” o se Tupu ua faanofotupuina i le lagi.—Mataio 24:37-39, NW.

5, 6. O ai i latou ua “fetaufetuliai” solo a o faagasolo ona po o le iʻuga, faatasi ai ma le ā le iʻuga?

⁵ Ua taʻua i le Tanielu 12:4 e faapea: “O oe Tanielu e, ia e pupuni o ia upu, ma faamaufaailogaina le tusi, seia oo i ona po o le iuga; e fetaufetuliai tagata e toatele, e tupu tele foi le malamalama.” O le tele lava o mea na tusia e Tanielu sa leʻi faaalia pe faamalamalamaina i tagata mo le tele o ni senituri. Ae faapēfea aso nei?

⁶ I nei ona po o le iʻuga, ua “fetaufetuliai” solo ai i itūlau o le Afioga a le Atua, le Tusi Paia, le toʻatele o Kerisiano faamaoni. O le ā le iʻuga? Ona o le faamanuia a Ieova i a latou taumafaiga, ua matuā faateleina ai le poto saʻo. Mo se faataʻitaʻiga, ua faamanuiaina Molimau faauuina a Ieova i le malamalamaga lea ua mafai ai ona latou malamalama faapea, na avea Iesu Keriso ma Tupu faalelagi i le tausaga e 1914. I le ōgatusa ma upu a le aposetolo o loo faamauina i le 2 Peteru 1:19-21, ua ‘naunau atu ai i le upu o le valoaga’ na uso faauuina ma a latou aumea faamaoni, ma ua latou matuā mautinoa lava o ona po nei o le iʻuga.

7. O ā nisi o tala ua tutasi ai le tusi o Tanielu?

⁷ E tele vala ua tutasi ai le tusi o Tanielu. O loo faamatalaina ai se tupu na ia faamataʻu atu faapea ia fasiotia ona tagata popoto ona ua lē mafai ona latou faaalia mai ma faamatala lana faalepo lea sa latou iso ai, peitaʻi na mafai e le perofeta a le Atua. O tauleleʻa e toʻatolu o ē na mumusu e ifo atu i se faatusa maualugā na lafoina i se ogaumu na matuā aasa lava, peitaʻi na faasaoina mai ai i latou e aunoa ma se āfaina. A o faagasolo se fiafia tele, na iloa atu ai e le faitau selau o tagata se lima o tusia ni upu sa lē malamalama i ai se isi, i le pa puipui o le maota o le tupu. Na faia e ni tagata amioleaga se faufauga ina ia lafo ai se tamāloa matua i le lua o leona, peitaʻi na toe aveina aʻe o ia e aunoa ma sina māʻosia. E fā manu feʻai sa vaʻaia i le faaaliga, ma na latou faaatagia maia ni uiga faavaloaga o ni mea e oo mai lava i ona po o le iʻuga.

8, 9. E mafai faapēfea ona aogā le tusi o Tanielu ia i tatou, ae maise lava i le taimi nei, i ona po o le iʻuga?

⁸ E manino mai, o loo aofia ai i le tusi o Tanielu ni vaega se lua e matuā eseese lava. O le tasi vaega o ni tala, o le isi vaega o ni valoaga. E mafai e vaega uma e lua ona ati aʻe ai lo tatou faatuatua. Ua faailoa mai e tala ia i tatou faapea e faamanuiaina e Ieova le Atua i latou o ē tausisia le faamaoni ia te ia. Ma o vaega o valoaga e ati aʻe ai le faatuatua i le faaalia mai faapea, ua leva lava ona muaʻi silafia e Ieova le gasologa o le talafaasolopito mo le faitau senituri—pe faitau meleniuma foʻi.

⁹ O valoaga eseese ua faamauina e Tanielu e taulaʻi atu ai manatu i le Malo o le Atua. A o tatou mātauina le faataunuuga o na valoaga, e faamālosia ai lo tatou faatuatua atoa foʻi ma lo tatou mautinoa e faapea o loo tatou ola nei i ona po o le iʻuga. Peitaʻi e iai nisi tagata faitio latou te tetee ia Tanielu, i le faapea mai o valoaga o loo i le tusi lea e taʻua ai lona igoa, o le mea moni lava na faatoʻā tusia ina ua uma ona tutupu mea ia e foliga mai o o latou faataunuuga na. Afai e moni na tuuaʻiga, o le a lāgā ai la ni fesili e ao ona manatu mamafa i ai e faatatau i mea ua valoia mai i le tusi o Tanielu e tusa ai o ona po o le iʻuga. E fesiligia foʻi e tagata masalosalo le moni o tala o loo i le tusi. O lea la, seʻi o tatou faia se iloiloga.

Ua Faamasinoina!

10. I le ā le uiga ua tuuaʻia ai le tusi o Tanielu?

¹⁰ Seʻi faapea o lea e te iai i se fale faamasino, o loo e auai i se faamasinoga. E maumauaʻi lava le lōia a le mālō faapea o lē ua mōlia, e nofosala i le taufaasesē. I se tulaga faapena, o loo faatulaga mai le tusi a Tanielu o se tusi e saʻo aʻiaʻi na tusia e se perofeta Eperu o lē na soifua i senituri lona fitu ma le lona ono T.L.M. Peitaʻi, e finau mālosi mai le ʻaufaitio faapea e taufaasesē le tusi. Seʻi o tatou tilofaʻia muamua la pe ōgatusa tala o loo tusia i le tusi ma mea moni o talafaasolopito.

11, 12. O le ā na tupu i le moliaga faapea o Pelesara sa na o se tagata o ni talafatu e lē moni?

¹¹ Seʻi faapea o loo tatou talanoaina le mea e mafai ona taʻua o le tupu e lē o iai. O loo faaalia i le Tanielu mataupu e 5 faapea sa pule Pelesara o se tupu i Papelonia i le taimi na faatoʻilalo ai le aai i le 539 T.L.M. Ua teʻena e le ʻaufaitio lenei manatu talu ai e leai ma se isi faamaumauga o taʻua ai le igoa o Pelesara seʻi vaganā ai le Tusi Paia. Na i lo le taʻua o Pelesara, sa faailoa mai e tusitala o talafaasolopito anamua e faapea o Naponita o le tupu mulimuli lea o Papelonia.

 ¹² Peitaʻi, i le tausaga e 1854, na maua ai ni fagu ʻele mai ni toegā o mea na faaleagaina o le aai Papelonia anamua o Uro lea e iai i le atunuu ua taʻua i aso nei o Irake. O nei faamatalaga sa tusia i nei fagu ʻele na aofia ai se tatalo lea sa faasino atu ai le tupu o Naponita ia “Pelesarusa, loʻu atalii ulumatua.” E oo lava i le ʻaufaitio na latou ioeina le manatu: O le Pelesara lenei o loo taʻua i le tusi o Tanielu. O le mea la lea sa manatu i ai o le tupu e lē o iai, o le mea moni lava e leʻi faapea na lē iai, ae sa na ona leʻi iai i faamaumauga a le lalolagi. Ua na o se tasi lenei o le anoanoaʻi o faamaoniga o le moni aʻiaʻi o tusitusiga a Tanielu. O se faamaoniga lenei o le avea moni o le tusi o Tanielu o se vaega o le Afioga a le Atua lea ua talafeagai ona tatou uaʻi totoʻa atu nei loa lava i ai, i ona po o le iʻuga.

13, 14. O ai Nepukanesa, ma o ai le atua sesē sa faapitoa ona ia tuutōina atu i ai?

¹³ O se vaega tāua o le tusi o Tanielu, o valoaga ia e aofia ai le faasologa mai o mālō mālolosi o le lalolagi ma gaoioiga a nisi o o latou pule. O se tasi o pule, atonu e mafai ona taʻua o se toa o lē sa ia fausia se emepaea. I le avea o ia ma aloalii o le malo o Papelonia, na latou faatoʻilaloina ai ma lana vaegāʻau ʻautau a Farao Neko o Aikupito i Karekimisa. Peitaʻi na iai se feʻau na oo atu i le perenise manumalo a Papelonia ma ia tuʻua ai loa le faaumaina o le taua i ana taʻitaʻiʻau. Ina ua logotala ua maliu lona tamā o Napopolasa, na nofoia ai loa e lenei talavou e suafa ia Nepukanesa le nofoālii i le 624 T.L.M. I tausaga e 43 o lana nofoaʻiga, sa ia fausia ai se emepaea lea sa aofia ai oganuu na uluaʻi nofoia e Asuria, ma na ia faalautele atu foʻi lana pulega i Suria ma Palesitina e oo ifo i tuāʻoi o Aikupito.

¹⁴ O le tuutōina tau tapuaʻiga o Nepukanesa sa taulaʻi patino atu ia Matuka, o le atua sili o Papelonia. Sa tuuina atu e le tupu le viiga ia Matuka i ana manumalo uma. I Papelonia, na fausia ai ma faamatagofie e Nepukanesa malumalu o Matuka ma le anoano o isi atua o Papelonia. O le tupua auro lea sa faatūina e lenei tupu Papelonia i le laugatasi o Turo, atonu sa faia mo le faaeaeaina o Matuka. (Tanielu 3:1, 2) Ma e foliga mai e faalagolago tele Nepukanesa i valovaloga mo le fuafuaina o ana gaoioiga faafitafita.

15, 16. O le ā na faia e Nepukanesa mo Papelonia, ma o le ā na tupu ina ua ia mitaʻi mai lona tulaga silisili?

¹⁵ Ina ua māeʻa le fausiaina o pa maualuluga sautualua sa siʻo ai Papelonia lea sa amata ona fausia e lona tamā, ona faia lea e Nepukanesa le aai laumua sa foliga mai e lē mafaatoʻilaloina. Ina ia faamalie lana masiofo mai Metai, o lē sa moomoo i atumauga ma vaomatua o i lona atunuu, fai mai le tala na fausia ai e Nepukanesa se togālaau e tautau—o se tasi o mea ofoofogia e fitu sa iai i le lalolagi i na ona po. Sa ia faia Papelonia e avea o le aai na pito sili ona mālosi le pa sa siʻo ai i lena taimi. Ma e maʻeu lona faamaualuga sa iai i lena nofoaga o le tapuaʻiga sesē!

¹⁶ “E le o Papelonia tele ea lenei, na aʻu faia?” o le mitaʻi mai lea a Nepukanesa i se tasi aso. Peitaʻi e tusa ai ma le Tanielu 4:30-36, “a o tautala mai le tupu,” na faafuaseʻi ona valea o ia. Ina ua lē toe talafeagai ona avea o ia ma tupu mo le fitu tausaga, sa ʻai o ia i le mutia, e pei lava ona valoia e Tanielu. Ona toe faafoʻisia lea o lona malo ia te ia. Pe e te silafia le uiga tāua faavaloaga o nei mea uma? Pe mafai ona e faamatala mai pe faapēfea i le faataunuuga sili o lenei valoaga ua leva ona faataunuu ona faaauau pea seʻia oo ina tatou oo mai i nei ona po o le iʻuga?

Talanoaina Vaega o se Valoaga

17. E faapēfea ona e faamatalaina le faalepo faavaloaga lea na tuuina mai e le Atua ia Nepukanesa i le lona lua o tausaga o lana nofoaʻiga o se pule o le mālō mālosi o le lalolagi?

¹⁷ Seʻi o tatou talanoaina nei vaega o se valoaga o i le tusi o Tanielu. I le lona lua o tausaga o le nofoaʻiga a Nepukanesa o se pule o le malo mālosi o le lalolagi e tusa ai o valoaga a le Tusi Paia  (606/605 T.L.M.), na tuuina mai ai ia te ia e le Atua se faalepo sa matuā atuatuvale ai. E tusa ai ma le Tanielu mataupu e 2, o le faalepo sa aofia ai se tupua tele lava, o lona ulu o le auro, o le fatafata ma lima o le ario, o le manava ma ogavae o le apamemea, o vae o le uʻamea, o tapuvae o uʻamea e fefiloi ma omea. O le ā sa faaāta mai e vaega eseese o le tupua?

18. O le ā sa fai ma sui o le ulu auro, le fatafata ma lima ario, ma le manava ma ogavae apamemea, o le tupua lea na iloa i le faalepo?

¹⁸ Na taʻu atu e le perofeta a le Atua ia Nepukanesa: “Le tupu e, . . . o le ulu auro o oe lava lea.” (Tanielu 2:37, 38) Sa faauluulu ia Nepukanesa le augātupu lea na puleaina le Emepaea o Papelonia. Na faatoʻilaloina e Metai ma Peresia, lea sa faaāta mai e le fatafata ma lima ario o le tupua. Ona sosoo mai lea o le Emepaea o Eleni, lea na faaāta mai e le manava ma ogavae apamemea. Na faapēfea ona amata mai lena mālō mālosi o le lalolagi?

19, 20. O ai Alesana le Sili, ma o le ā se vaega na ia faatinoina ina ia avea ai Eleni ma mālō mālosi o le lalolagi?

¹⁹ I le senituri lona fā T.L.M., sa faatino ai e se tauleʻaleʻa talavou se vaega mataʻina i le faataunuuga o le valoaga a Tanielu. Na ola mai o ia i le 356 T.L.M., ma na faaigoa o ia e le lalolagi ia Alesana le Sili. Ina ua tagatavaleina lona tamā, o Filipo, i le 336 T.L.M., sa soloaʻi ane Alesana, i le 20 o ona tausaga, i le nofoālii o Maketonia.

²⁰ I le tau amatamataga o Me i le 334 T.L.M., na amata ai e Alesana se tauiviga o le faatoʻilaloina. O lana vaegāʻau toʻaitiiti ae lava saunia e 30,000 fitafita savavali ma le 5,000 o ē tietie i solofanua. I le Vaitafe o Granicus i mātū i sisifo o Asia Itiiti (o Take i aso nei), na manumalo ai Alesana i lana uluaʻi taua na faasagatau atu ai ia Peresia i le 334 T.L.M. E oo ane i le 326 T.L.M. ua pulea e lenei toa manumalo sa lē faavaivai, tagata Peresia ma faasolo atu ai lava i le itū i sasaʻe seʻia oo i le Indus River, lea o loo tū i Pakisitana i aso nei. Peitaʻi na faiaʻina Alesana i lana taua mulimuli a o iai i Papelonia. Ia Iuni 13, i le 323 T.L.M., ina ua faatoʻā 32 tausaga ma masina e 8 lona matua, na malolo ai Alesana i le fili pito sili ona mataʻutia, o le oti. (1 Korinito 15:55) Peitaʻi, e ala i ana manumalo, na avea ai Eleni ma malo mālosi o le lalolagi, e pei ona valoia mai i le valoaga a Tanielu.

21. E lē gata i le Emepaea o Roma, ae o le ā le isi mālō mālosi o le lalolagi na faaāta mai e vae uʻamea o le tupua na iloa i le faalepo?

²¹ O le ā ua faaāta mai e vae uʻamea o le tupua tele? Sa faaāta mai ai Roma pei se uʻamea lea na nutililiia ma faatoʻilaloina le Emepaea o Eleni. I le leai o se faaaloalo mo le Malo o le Atua lea sa folafola atu e Iesu Keriso, na fasiotia ai e fitafita Roma Iesu i luga o le satauro i le 33 T.A. I se taumafaiga e faataʻape le Faa-Kerisiano moni, na sauāina ai e Roma soo o Iesu. Peitaʻi, o vae uʻamea o le tupua na iloa i le faalepo a Nepukanesa sa faaāta mai ai e lē gata i le Emepaea a Roma, ae faapena foʻi ma lona mālō faapolotiki na tupuga mai ai—le Malo Mālosi o le Lalolagi, o Amerika ma Peretania.

22. E faapēfea ona fesoasoani mai ia i tatou le tupua lea na iloa i le faalepo ina ia tatou iloa ua tatou iai i siʻui o ona po o le iʻuga?

²² O se suʻesuʻega faaeteete e faamaonia ai ua tatou iai i siʻui o ona po o le iʻuga, auā ua tatou pāʻia nei tapuvae o le tupua na iloa i le faalepo, lea e fai i le uʻamea ma le omea. O nisi faigā malo i aso nei ua pei ni uʻamea pe pulepuletutū, a o isi e pei ni omea. E ui lava i le tulaga maʻaleʻale o le omea, lea e faia aʻe ai “le fanau a tagata,” ae ua i pulega pei ni uʻamea se tiute e latou te tuu atu se avanoa i tagata lautele ina ia faaleo mai ni o latou manatu i faigā malo ia o loo pulea i latou. (Tanielu 2:43; Iopu 10:9) O le mea moni, o pulega fia pulepuletutū ma tagata lautele ua matuā lē mafai ona faifaimea faatasi lava e pei ona lē mafai ona pipii faatasi lelei le uʻamea ma le omea. Peitaʻi, ua toe o se āga ona aumaia lea e le Malo o le Atua le iʻuga i lenei lalolagi ua vaevaeina ona o faiga faapolotiki.—Tanielu 2:44.

23. O le a faapēfea ona e faamatalaina le faalepo ma faaaliga ia na vaʻaia e Tanielu i le tausaga muamua o le nofoaʻiga a Pelesara?

²³ I le matāʻupu e 7 o le valoaga mālosi a Tanielu ua tataʻi mai ai foʻi i tatou i ona po o le iʻuga. O loo faamatala mai ai se mea na tupu i le tausaga muamua o le nofoaʻiga a le tupu Papelonia o Pelesara. Ae i le 70 ma ona tupu o tausaga o Tanielu, na ia iloa ai se “miti ma faaaliga i lona moega.” Pagā sona atuatuvale i na faaaliga! “Faauta foi,” o lana alaga lea. “O matagi e fa o le lagi ua pesi tetele atu i le sami tele. Ona o ae ai lea mai le sami o manu feai tetele e fa, ua eseese le tasi i le tasi.” (Tanielu 7:1-8, 15) Maʻeu ni manu feʻai a mataʻutia!  O le manu feʻai muamua ua pei se leona ae fai ona apaʻau, ma le lona lua e pei o se urosa. Ona sosoo mai lea ma le nameri e fā ona apaʻau ma ona ulu e fā! O le manu feʻai lona fā e mataʻutia lona mālosi, e iai ona nifo uʻamea tetele ma isi ona nifo e sefulu i lona ulu. I le va o ona nifo e sefulu ua tupu aʻe ai se nifo “itiiti” e iai ona “mata e pei o mata o le tagata” ma “le gutu ua tautalatala i upu faasausili.” Pagā ni meaola ina a matagā!

24. E tusa ai o le Tanielu 7:9-14, o le ā na vaʻaia e Tanielu i le lagi, ma o le ā e faasino atu i ai lenei faaaliga?

²⁴ Ua liliu atu nei faaaliga a Tanielu i le lagi. (Tanielu 7:9-14) Ua iloa atu “Lē ua mai anamuā ona aso,” o Ieova le Atua, o loo afio mamalu o ia i le nofoālii o se Faamasino. “Ua afe ni afe o e auauna ia te ia, e mano ni mano o e laulaututū i ona luma.” I lona matuā faamasinoina o manu feʻai, ua aveesea ai e le Atua le pule mai ia i latou ae faaumatia le manu feʻai lona fā. O le pulega e faavavau i luga “o nuu uma, ma atu nuu, ma gagana eseese” ua tuuina atu i “Lē e pei o le Atalii o le tagata.” E faasino atu lenei faaaliga i ona po o le iʻuga atoa ma le faanofotupuina o le Atalii o le tagata, o Iesu Keriso, i le tausaga e 1914.

25, 26. O ā fesili e ono lāgā pe a tatou faitauina le tusi o Tanielu, ma o le ā le lōmiga e mafai ona fesoasoani i le taliina o na fesili?

²⁵ E mautinoa lava le tuufesili o le ʻaufaitau o le tusi o Tanielu. Mo se faataʻitaʻiga, o le ā e fai ma sui o manu feʻai e fā o le Tanielu mataupu e 7? O le ā se faamalamalamaga o “vaiasosa e fitugafulu” lea na valoia mai i le Tanielu 9:24-27? Ae faapēfea le Tanielu mataupu e 11 ma le feteenaʻiga na valoia mai i le va o “le tupu o le itu i matu” ma “le tupu o le itu i toga”? O le ā se mea e mafai ona tatou faatalitalia mai nei tupu i ona po o le iʻuga?

²⁶ Ua foaʻi mai e Ieova le malamalamaga i na matāʻupu i ana auauna faauuina o loo iai i le lalolagi, i “le au paia a lē Silisili ese,” e pei ona faaigoa ai latou i le Tanielu 7:18. E lē gata i lea, ua faia e “le auauna faamaoni ma le mafaufau” se sauniuniga mo i tatou ina ia maua ai se malamalamaga atili i tusitusiga faagaeeina a le perofeta o Tanielu. (Mataio 24:45) Ua maua nei lenei sauniuniga e ala i le tatalaina mai talu ai nei o le tusi Pay Attention to Daniel’s Prophecy! O lenei lōmiga e matagofie ona ata ma e 320 ona itūlau o loo talanoaina ai vala taʻitasi o le tusi o Tanielu. O loo talanoaina ai valoaga taʻitasi e faatupuina le faatuatua ma tala taʻitasi na faamaumauina e le perofeta pele o Tanielu.

Le Uiga Moni mo o Tatou Aso

27, 28. (a) O le ā le mea moni e uiga i le faataunuuga o valoaga i le tusi a Tanielu? (e) O le ā le vaitaimi lenei o loo tatou ola ai, ma o le ā e ao ona tatou faia?

²⁷ Seʻi mātau le manatu tāua lenei: O valoaga uma lava i le tusi o Tanielu ua faataunuuina seʻi vaganā ai ni nai auʻiliʻiliga laiti. Mo se faaaʻoaʻoga, ua tatou vaʻaia nei le tulaga o le lalolagi lea sa faaatagia mai e tapuvae o le tupua na vaʻaia i le faalepo, o loo faamatalaina i le Tanielu mataupu e 2. Sa tatalaina fusi o le pogati lāʻau o loo taʻua i le Tanielu mataupu e 4, i le taimi na faanofotupu ai le Tupu Faa-Mesia, o Iesu Keriso, i le tausaga e 1914. Ioe, e pei ona valoia i le Tanielu mataupu e 7, ona tauaaoina atu loa lea e Lē ua Mai Anamuā Ona Aso le pule i le Atalii o le tagata.—Tanielu 7:13, 14; Mataio 16:27–17:9.

²⁸ O aso e 2,300 o loo taʻua i le Tanielu matāʻupu e 8 faapea foʻi aso e 1,290 ma le 1,335 o loo taʻua i le matāʻupu e 12 ua mavae uma atu—ua teʻa atu ma i tatou i le faagasologa mai o taimi. O se suʻesuʻega i le Tanielu matāʻupu e 11 e faaalia ai o le feteenaʻiga i le va o “le tupu o le itu i matu” ma “le tupu o le itu i toga” ua oo atu nei i ona laasaga faaiʻu. O nei mea uma e faaopoopo atu i le faamaoniga faale-Tusi Paia e faapea, o loo tatou ola nei i siʻui o ona po o le iʻuga. I le mafaufau atu i lo tatou tulaga tutasi i lenei faagasologa o taimi, o le ā e ao ona tatou maumauaʻi e fai? E aunoa ma se fesiligia, e ao ona tatou uaʻi atu i afioga faavaloaga a Ieova le Atua.

O le a Faapēfea Ona E Tali?

• O le ā le mea o loo finagalo le Atua ia iloa e tagata uma e faatatau i o tatou aso?

• E mafai faapēfea e le tusi o Tanielu ona faatupuina lo tatou faatuatua?

• O ā vaega o le tupua lea na iloa i le faalepo a Nepukanesa, ma o ā mea ua faaāta mai e nei vaega?

• O le ā e talafeagai ona mātauina e uiga i le faataunuuga o valoaga ia o loo maua i le tusi o Tanielu?

[Fesili mo le Suʻesuʻega]