‘Ia E Faaolaina Oe Atoa ma i Latou o Ē Faalogologo ia te Oe’

“Ia e uaʻi atu pea ia te oe atoa ma lau aʻoaʻo atu. . . . O le faia o lenei mea o le a e faaolaina ai oe atoa ma i latou o ē faalogologo ia te oe.”—1 TIMOTEO 4:16, NW.

1, 2. O le ā e uunaia ai Kerisiano moni ina ia faaauau pea i la latou galuega faasaoola?

I SE nuu mamao ese i le itu i mātū o Taialani, o loo taumafai ai se ulugalii, o ni Molimau a Ieova, e faaaogā o la tomai na la aʻoaʻoina ai se gagana fou, e tautatala atu ai i tagata o se ituaiga o ē aumau i atumauga. Ina ia mafai ona tufa atu e lenei ulugalii le tala lelei o le Malo o le Atua i tagata o le nuu, e leʻi leva talu ai nei ona la aʻoaʻoina le gagana Lahu.

² “E faigatā ona faamatalaina le olioli ma le faamalieina ua ma maua i le galulue faatasi ma nei tagata lotofiafia,” o le faamatalaga lea a le tane. “E ma te lagona le faia moni lava o so ma sao i le faataunuuga o le Faaaliga 14:6, 7, i le folafolaina atu o tala o mea lelei ‘i atunuu uma, ma ituaiga, ma gagana eseese.’ E iai lava ni nai oganuu o loo totoe e leʻi oo atu i ai le tala lelei, ma e mautinoa lava o se tasi lenei o oganuu. Ua toetoe lava tele atu a ma suʻesuʻega faale-Tusi Paia e fai na i lo le tele e mafai ona ma gafatia.” E manino mai, o loo faamoemoe lenei ulugalii ina ia faasaoina e lē gata o i laua, ae faapea foʻi i latou o loo faalogologo atu ia i laʻua. I lo tatou avea o ni Kerisiano, pe lē o le mea foʻi lena o loo tatou faamoemoe uma atu i ai?

“Ia E Uaʻi Atu Pea ia te Oe”

3. Ina ia faasaoina isi, o le ā e ao ona tatou muaʻi faia?

³ Na fautuaina e le aposetolo o Paulo ia Timoteo ina, “Ia e uaʻi atu pea ia te oe atoa ma lau aʻoaʻo atu,” ma e faatatau foʻi lenei fautuaga i Kerisiano uma lava. (1 Timoteo 4:16, NW ) O le mea moni, ina ia fesoasoani i isi e maua le faaolataga, e ao ona tatou muaʻi uaʻi atu ia i tatou lava. E mafai faapefea ona tatou faia lenei mea? O se tasi o auala, e ao ona tatou mataala i taimi nei o loo tatou ola ai. Na tuuina mai e Iesu se faailoga e tele ni ona vala, ina ia iloa ai e ona soo le taimi e oo mai ai “le faaiʻuiʻuga o le faiga o mea.” Peitaʻi, na fetalai foʻi Iesu faapea, o le a tatou lē iloa tonu lava le taimi e oo mai ai le iʻuga. (Mataio 24:3, 36, faatusatusa i le NW ) E tatau faapefea ona tatou tali atu i lena mea moni?

4. (a) O le ā le uiga e tatau ona ia i tatou e faatatau i le taimi o totoe i lenei faiga o mea? (e) O le ā le uiga e tatau ona tatou alofia?

⁴ E ono fesili ifo i tatou taʻitoʻatasi, ‘Po o oʻu faaaogāina  ea po o le ā lava se taimi o totoe mo lenei faiga o mea, ina ia faasaoina ai aʻu ma ē o faalogologo mai ia te aʻu? Po o le mea o loo oʻu manatu faapea, “Talu ai tatou te lē o iloa tonu le taimi o le a oo mai ai le iʻuga, o le a ou lē soona popole tele la i ai”?’ E iai le lamatiaga o le uiga lona lua. E matuā feteenaʻi lava ma le timaʻiga lenei a Iesu: “Ia outou nofo sauni ai; auā o le itu aso tou te le manatunatu ai, e sau ai le Atalii o le tagata.” (Mataio 24:44) E mautinoa lava e lē o le taimi lenei e mou atu ai lo tatou aasa mo le auaunaga a Ieova pe saili atu ai i le lalolagi mo se tulaga saogalemu po o le faamalieina.—Luka 21:34-36.

5. O ā faaaʻoaʻoga na faataatitia e molimau anamua a Ieova a o leʻi oo mai i taimi o uluaʻi Kerisiano?

⁵ O se isi auala e mafai ona tatou faaalia ai o loo tatou uaʻi atu ia i tatou lava, e ala lea i le onosai ma le faamaoni o ni Kerisiano. Sa onosai pea auauna a le Atua i aso ua mavae, e tusa lava pe sa latou faatalitalia le oo vave ane o se laveaʻiga pe leai. Ina ua uma ona sii mai faaaʻoaʻoga a molimau anamua a o leʻi oo mai i taimi o uluaʻi Kerisiano, e pei o Apelu, Enoka, Noa, Aperaamo, ma Sara, ona faapea mai lea o Paulo: “E lei maua [e i latou] mea na folafolaina, a ua iloa ai e i latou a e mamao, ma latou talia ma le fiafia, ma latou taʻutino mai o tagata ese i latou ma le aumau i le lalolagi.” Latou te leʻi lolo atu i so o se faanaunauga mo se olaga taugāmālie, e leʻi maileia foʻi i latou i omiga o amioga lē mamā sa taatele i o latou aso, peitaʻi sa latou naunautaʻi e tulimataʻia le faataunuuga o “mea na folafolaina.”—Eperu 11:13, LF; 12:1.

6. Na faapefea i le manatu o Kerisiano o le uluaʻi senituri i le faaolataga ona aafia ai le ala sa latou ola ai?

 ⁶ Na manatu foʻi Kerisiano o le uluaʻi senituri ia i latou o ni “tagata ese” i lenei lalolagi. (1 Peteru 2:11) E ui lava ina faasaoina mai le faaumatiaga o Ierusalema i le 70 T.A., ae sa leʻi taofia ai e Kerisiano moni lo latou talaʻi atu pe lolo atu i se ala masani o le olaga. Na latou iloa e iai se faaolataga sili o loo faatalia maia ē e tumau ma le faamaoni. O le mea moni, i tuā lava i le 98 T.A., na tusi ai le aposetolo o Ioane: “E mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”—1 Ioane 2:17, 28.

7. Ua faaalia faapefea e Molimau a Ieova lo latou tutumau i nei ona po?

⁷ I ona po nei, ua finafinau ai foʻi Molimau a Ieova i galuega faa-Kerisiano, e ui lava ina latou fetaiaʻi ai ma sauāga ogaoga. Po ua faalēaogā ea lo latou tutumau? E mautinoa lava e leai, auā ua faamautinoa mai e Iesu i tatou e faapea: “O lē tumau seia oo i le gataaga, e faaolaina lea,” e tusa lava po o lena mea e tupu i le iʻuga o le faiga tuai o mea po o le iʻuga o le olaga o se tasi o loo iai i le taimi nei. I le toetū, o le a manatua ai e Ieova ma tauia ana auauna faamaoni uma ua maliliu.—Mataio 24:13; Eperu 6:10.

8. E mafai faapefea ona tatou faaalia lo tatou talisapaia o le tutumau o Kerisiano o aso ua mavae?

⁸ E lē gata i lea, tatou te fiafia ona sa leʻi manatu mamafa Kerisiano faamaoni o aso anamua mo na o so latou lava faaolataga. E mautinoa, o i tatou o ē ua aʻoaʻoina e uiga i le Malo o le Atua e ala mai i a latou taumafaiga, ua tatou lotofaafetai ona sa latou tutumau pea i le tauaveina o le tofiga mai ia Iesu e faapea: “O lenei, ia outou o atu e fai nuu uma lava ma soo, . . . ia outou aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) A o tatala mai pea le avanoa ia i tatou, e mafai ona tatou faaalia atu lo tatou agaga faafetai e ala i le talaʻi atu i isi o ē leʻi faalogo i le tala lelei. Ae peitaʻi, o le talaʻi ua na o se uluaʻi laasaga lena i le faia o soo.

‘Ia Uaʻi i Lau Aʻoaʻo Atu’

9. E mafai faapefea e se vaaiga mautinoa ona fesoasoani ia i tatou ina ia amata ai ni suʻesuʻega faale-Tusi Paia?

⁹ O lo tatou tofiga e lē na o le talaʻiga e aofia ai, ae atoa foʻi ma le aʻoaʻo atu. Na poloaʻia i tatou e Iesu ina ia aʻoaʻo atu i tagata ia latou tausi i mea uma na ia poloaʻiina. E moni, i nisi oganuu, e toʻaitiiti i latou e foliga mai e mananaʻo e aʻoaʻoina e uiga ia Ieova. Peitaʻi o le iai o se vaaiga lē mautinoa i le oganuu e mafai ona taofiofia ai a tatou taumafaiga ina ia amataina ni suʻesuʻega faale-Tusi Paia. O Yvette, o se paeonia i se oganuu na taʻua e nisi tagata faapea e lē fua mai, sa ia mātauina le mafai e nisi tagata sa asiasi atu i lena oganuu, o ē sa lē ia i latou lena vaaiga lē mautinoa, ona latou amataina ni suʻesuʻega faale-Tusi Paia i aiga. Ina ua ia te ia foʻi la lena vaaiga mautinoa, na faapena ai foʻi ona maua e Yvette ni tagata o ē na mananaʻo e suʻesuʻeina le Tusi Paia.

10. O le ā la tatou matafaioi autū i le avea o ni faiaʻoga o le Tusi Paia?

¹⁰ O nisi Kerisiano atonu e faatalatū e ofo atu se suʻesuʻega faale-Tusi Paia i tagata lotofiafia ona e lē o ia i latou se lagona e mafai ona latou faia se suʻesuʻega. O le mea moni lava, e eseese le tele o loo iai o tatou tomai. Peitaʻi e lē tau manaʻomia ona matuā maoaʻe ni o tatou tomai ina ia taulau ai lo tatou avea o ni faiaʻoga o le Afioga a le Atua. E mamana le feʻau mamā a le Tusi Paia, ma na fetalai Iesu e iloa lelei lava e i latou pei ni mamoe le leo o le Leoleo Mamoe moni pe a latou faalogoina. O lo tatou tiute la, o le tau lava ina faaoo atu le feʻau a le Leoleo Mamoe Lelei, o Iesu, i se tulaga e sili ona manino tatou te mafaia.—Ioane 10:4, 14.

11. E mafai faapefea ona e uigā atili i lau fesoasoani atu i se tagata suʻesuʻe o le Tusi Paia?

¹¹ E mafai faapefea ona e faaoo atu le feʻau a Iesu i se tulaga e sili atu ona uigā? O le mea muamua e amata ai, ia e faamasani i mea o loo fai mai ai le Tusi Paia e uiga i le mataupu o loo talanoaina. Ia e malamalama muamua lava i le mataupu a o e leʻi aʻoaʻoina atu isi. E lē gata i lea, taumafai e tausisia se siʻomaga mamalu ae faaleuō i le taimi o le suʻesuʻega. O tagata suʻesuʻe, e aofia ai i latou o ē laiti lava, e sili atu ona lelei lo latou aʻoaʻoina o mea pe afai o loo toʻafimālie o latou mafaufau ma faaalia atu foʻi e le faiaʻoga ia i latou le faaaloalo ma le agalelei.—Faataoto 16:21.

12. E mafai faapefea ona e faamautinoa o loo malamalama le tagata suʻesuʻe i mea o loo e aʻoaʻoina ai o ia?

¹² I lou avea o se faiaʻoga, e te lē manaʻo e na ona taʻu atu mea moni i le tagata suʻesuʻe ona ia aʻo faatauloto  lea. Ia fesoasoani ia te ia ina ia malamalama i mea o loo ia aʻoaʻoina. O aʻoaʻoga a le tagata suʻesuʻe, o mea na tutupu i lona olaga, ma le faamasani i le Tusi Paia, o le a aafia ai lona malamalama i mea o loo e fai atu ai. O lea la, atonu e te fesili ifo ia te oe lava, ‘Po o malamalama ea o ia i le uiga moni o mau na taʻua i le mataupu o le suʻesuʻega?’ E mafai ona e utufia mai ona lagona e ala i le fesiligia o ni fesili e lē mafai ona taliina i le na o se ioe pe leai, ae o ni tali e manaʻomia ai se faamatalaga. (Luka 9:18-20) Ae iai foʻi nisi tagata suʻesuʻe e matamumuli tele e fesili atu i o latou faiaʻoga. Ona faagasolo ai lava lea o le suʻesuʻega e aunoa ma se malamalamaga atoatoa i mea o loo aʻoaʻoina ai i latou. Ia faalaeiau le tagata suʻesuʻe e fai mai ni ana fesili ma taʻu mai ia te oe pe afai e lē o malamalama atoatoa o ia i nisi manatu.—Mareko 4:10; 9:32, 33.

13. E mafai faapefea ona e fesoasoani i le tagata suʻesuʻe ia avea o se faiaʻoga?

¹³ O se fuafuaga tāua mo le faia o suʻesuʻega faale-Tusi Paia o le fesoasoani lea i le tagata suʻesuʻe ia avea o se faiaʻoga. (Kalatia 6:6) Mo lena fuafuaga, pe a toe autalu le lua suʻesuʻega, e te ono fesili atu ai ia te ia e faamatala mai ia te oe se manatu autū i ni upu faigofie, e peiseaī o loo ia faamatalaina atu lea manatu i se isi tagata o loo faalogologo i ai mo le uluaʻi taimi. Mulimuli ane, pe a oo ina agavaa o ia e faia se sao i le faiva, e mafai ona e valaaulia o ia lua te galulue faatasi i le fanua. E mautinoa o le a fiafia o ia lua te galulue faatasi, ma o lena tulaga o le a fesoasoani ia te ia e atili toʻa ai ona faalogona seʻia oo ina nofosauni o ia e auai atu i le faiva e aunoa ma oe.

Ia Fesoasoani i le Tagata Suʻesuʻe ia Avea ma Uō a Ieova

14. O le ā lou sini autū o se faiaʻoga, ma o le ā se mea o le a faaopoopo atu i lou taulau manuia i le ausiaina o lena sini?

¹⁴ O le sini autū o Kerisiano taʻitoʻatasi o loo avea ma faiaʻoga o le fesoasoani atu i le tagata suʻesuʻe ia iai se la faauōga ma Ieova. O le a e faataulauina lenei mea e lē gata i au upu ae i lau faaaʻoaʻoga foʻi. O le aʻoaʻo atu e ala i faaaʻoaʻoga e telē lava sona aafiaga i loto o tagata suʻesuʻe. E mautinoa lava le leotele atu o gaoioiga na i lo o upu, aemaise i le tulaga o le totōina o uiga i amioga tatau ma le faagaeeina o le agaga maelega i le loto o le tagata suʻesuʻe. Pe a vaai mai o ia i au upu ma au gaoioiga o loo puna mai se faiā lelei ma Ieova, atonu o le a atili ai ona uunaia o ia e ati aʻe foʻi lena faiā mo ia lava.

15. (a) Aiseā e tāua ai ona ati aʻe e le tagata suʻesuʻe se uunaiga saʻo mo le auauna atu ia Ieova? (e) E mafai faapefea ona e fesoasoani i le tagata suʻesuʻe ia faaauau pea ona agaʻigaʻi i luma faaleagaga?

¹⁵ E te manaʻo i le tagata suʻesuʻe e auauna ia Ieova ona e lē gata na te manaʻo e faasaoina o ia mai ia Amaketo, ae ona e alofa foʻi ia te Ia. O le fesoasoani atu ia te ia e ati aʻe se uunaiga lelei faapena, o le a e ati aʻe ai i mea e lē mu i le afi, na o le a gafatia ai le tetee atu i tofotofoga o lona faatuatua. (1 Korinito 3:10-15) O se uunaiga sesē, e pei o se faanaunauga lē talafeagai ina ia faataʻitaʻi mai le tagata suʻesuʻe ia te oe pe i se isi lava tagata, o le a lē maua ai e ia se malosi e tetee atu i taaʻiga lē faa-Kerisiano, na te lē maua ai foʻi le lototele e faia ai le mea saʻo. Manatua, o le a lē faavavau ai pea ona avea oe mona faiaʻoga. A o e maua la le avanoa, e mafai ona e faalaeiau o ia ina ia atili vavalalata atu ia Ieova e ala i le faitauina o le Afioga a le Atua i aso taʻitasi ma mafaufau i ai. I lenei auala o le a faaauau ai ona ia ave i fale “matua o upu e ola ai” mai le Tusi Paia ma lomiga faale-Tusi Paia e tusa lava po ua leva ona faauma le lua suʻesuʻega.—2 Timoteo 1:13.

16. E mafai faapefea ona e aʻoaʻoina le tagata suʻesuʻe ina ia tatalo mai lona loto?

¹⁶ E mafai foʻi ona e fesoasoani i le tagata suʻesuʻe ina ia atili vavalalata ia Ieova e ala i le aʻoaʻoina o ia e tatalo mai lona loto. E mafai faapefea ona e faia lenei mea? Atonu e te ono faasino o ia i le tatalo faaaʻoaʻo a Iesu, faapea foʻi le tele o tatalo ma le loto atoa o loo faamaumauina i le Tusi Paia, e pei o tatalo o loo tusia i salamo. (Salamo 17, 86, 143; Mataio 6:9, 10) E lē gata i lea, pe a faalogo lau tagata suʻesuʻe a o e tatalo i amataga ma faaiʻuga o le suʻesuʻega, o le a ia mātauina ai ou faalogona agaʻi ia Ieova. O lea, e tatau i au tatalo ona atagia atu ai pea ou lagona faamaoni ma le saʻoloto, faapena foʻi ma lou paleni faaleagaga ma i faalogona.

Ia Taumafai e Faasao Mai Lau Fanau

17. E mafai faapefea e mātua ona fesoasoani i a latou fanau ina ia tumau i le ala i le faaolataga?

¹⁷ O le mea moni lava, o tagata o o tatou aiga, o isi na tagata tatou te mananaʻo ia faasaoina. E toʻatele fanau a mātua Kerisiano o loo lotofaamaoni  ma ‘mausali i le faatuatua.’ E ui i lea, o isi atonu e lē o matuā mauaa le upu moni i o latou loto. (1 Peteru 5:9; Efeso 3:17; Kolose 2:7) E toʻatele nisi o nei talavou ua faasolosolo aʻe ina matutua, ma latou tuua ai ala faa-Kerisiano. Pe afai o oe o se matua, o le ā se mea e mafai ona e fai ina ia faaitiitia ai le ono oo ia te oe o na iʻuga? Muamua lava, e mafai ona e taumafai e faatupu aʻe se siʻomaga lelei faaleaiga. O le lelei o se olaga faaleaiga e fua i ai le faavae mo se vaaiga saʻo i le tulaga pule, le talisapaia o mea e tatau ona faatāua, ma ni faiā fiafia ma isi. (Eperu 12:9) O lea, o faiā māfana i totonu o le aiga e mafai ona avea ma nofoaga autū e tuputupu aʻe ai se tamaitiiti i se la faiā lelei ma Ieova. (Salamo 22:10) O aiga e malolosi latou te faifaimea faatasi o se vaega—e tusa lava pe tatau ai i mātua ona faataulaga o latou taimi na sa ono mafai ona faaaogā mo ni o latou lava lelei totino. I lenei auala e mafai ai ona avea oe ma faaaʻoaʻoga i lau fanau e aʻoaʻo ai i latou ia faia ni filifiliga tonu i le olaga. Mātua e, o mea e sili ona moomia e lau fanau mai ia te oe, e lē o ni lelei faaletino, ae o oe—lou taimi, lou malosi, ma lou alofa. Po o e avatuina ea i lau fanau nei mea?

18. O ā ituaiga o fesili e ao i mātua ona fesoasoani i a latou fanau ina ia maua i ai ni tali?

¹⁸ E lē tatau lava i mātua Kerisiano ona manatu mautinoa faapea, o le a otometi lava ona avea a latou fanau o ni Kerisiano. O Tanielu, o se toeaina o le faapotopotoga ma o se tamā e toʻalima lana fanau, ua ia faapea mai: “E tatau i mātua ona faaalu se taimi e fesoasoani ai ina ia aveese lagona lē mautonu na o loo puʻe mai e a latou fanau mai le  aʻoga ma isi nofoaga. E tatau ona latou onosai e fesoasoani atu i a latou fanau ina ia maua tali i fesili e pei o nei: ‘Po o tatou ola moni ea i taimi o le iʻuga? Pe iai moni lava se lotu moni e tasi? Aiseā e lē o se aumea lelei ai se uō i le aʻoga lea e foliga mai o se tagata lelei? Pe sesē lava i taimi uma le faia o ni feusuaʻiga a o leʻi faaipoipo?’” Mātua e, e mafai ona e faalagolago atu ia Ieova na te faamanuia mai i au taumafaiga, auā e naunau mai foʻi o ia mo se lelei o lau fanau.

19. Aiseā e sili ai ona lelei pe a suʻesuʻe lava mātua ma a latou fanau?

¹⁹ O nisi mātua atonu e ia i latou le lagona faapea e lē fetaui le toe suʻesuʻe o i latou ma a latou lava fanau. Peitaʻi ane, e lē manaʻomia ona ia te oe na lagona, auā e leai lava se isi e sili atu ona lelei i le faatonuina o lau fanau na i lo oe lava. (Efeso 6:4) O le suʻesuʻe ma lau lava fanau o le a mafai ai ona avea oe o se tasi e muamua lava iloa mea o i o latou loto ma mafaufau. Pe sau moni mai i o latou loto a latou faamatalaga po ua na o ni mea e tau ina fai e aunoa ma se lagona? Po o latou talitonu moni lava i mea o loo latou aʻoaʻoina? Pe o moni Ieova ia i latou? E na o le pau le auala e te maua ai tali i nei fesili ma isi foʻi fesili tāua, pe afai e te suʻesuʻe lava oe ma lau fanau.—2 Timoteo 1:5.

20. E mafai faapefea e mātua ona la faia le suʻesuʻega faaleaiga o se taimi e olioli ai ma e aogā?

²⁰ E mafai faapefea ona tou tausisia la outou polokalame o le suʻesuʻega faaleaiga pe a oo ina amata? Fai mai le faamatalaga a Iosefa, o ia o se toeaina o le faapotopotoga ma e iai sana fanau talavou o le tama ma le teine, e faapea: “I le pei o isi uma lava suʻesuʻega faale-Tusi Paia, e tatau ona avea le suʻesuʻega faaleaiga o se mea e olioli ai, o se mea e tulimataʻia e tagata taʻitoʻatasi. Ina ia ausia lena sini i lo matou aiga, e lē mafai ona matou soona maumaututū ai i le tulaga o le taimi. E mafai ona atoa se itula o la matou suʻesuʻega, ae tusa lava foʻi pe na o le taʻi sefulu minute o nisi suʻesuʻega mai lea taimi i lea taimi, ae o lena lava e fai le suʻesuʻega. O se tasi o mafuaaga ua avea ai la matou suʻesuʻega o se mea e sili ona tulimataʻia e le fanau i le vaiaso, ona e matou te faatinoina ai taga o tala ia o loo i le tusi o Laʻu Tusi o Tala o Le Tusi Paia. * O le loloto o lagona faaalia ma le malamalamaga e maua mai ai e sili atu ona tāua na i lo le aofaʻi o ni palakalafa matou te talanoaina.”

21. O ā taimi e ono aʻoaʻoina ai e mātua a latou fanau?

²¹ Ioe, o le aʻoaʻoina o lau fanau e lē tulia i le faia o ni suʻesuʻega aloaia. (Teuteronome 6:5-7) O le uso Molimau i Taialani lea na taʻua i le amataga o le mataupu, ua faapea mai o ia: “Ou te manatua lelei le fai ma masani a loʻu tamā le ave o aʻu ma te ō i le galuega talaʻi i a ma uilavilivae, i vaega mamao ese o le oganuu a la matou faapotopotoga. E mautinoa lava, o faaaʻoaʻoga lelei a o matou mātua faatasi ai ma lo la aʻoaʻoina o i matou i so o se tulaga, lea na fesoasoani mai ia i matou ina ia filifili e ulu atu i le faiva faataimi atoa. Ma o loo tumau pea ona uigā lesona na aʻoaʻoina mai ai. O loo oʻu galue pea i vaega mamao ese o le fanua!”

22. O le ā o le a iʻu i ai lou ‘uaʻi atu ia te oe atoa ma lau aʻoaʻo atu’?

²² I se aso e lē o toe umi, i le taimi tonu lava, o le a afio mai ai Iesu e faaoo le sala o le faamasinoga a le Atua i luga o lenei faiga o mea. O lena mea mataʻutia o le a tupu, o le a matuā agiagia lava i le talafaasolopito aoao, peitaʻi o le a faaauau pea e auauna faamaoni a Ieova ona auauna atu ia te ia a o latou taulaʻi atu i le faaolataga e faavavau. Po o e faamoemoe ea e te iai faatasi ma i latou, faatasi ma lau fanau ma au tagata suʻesuʻe o le Tusi Paia? Ia manatua la: “Ia e uaʻi atu pea ia te oe atoa ma lau aʻoaʻo atu. Ia tumau i ai, auā o le faia o lenei mea o le a e faaolaina ai oe atoa ma i latou o ē faalogologo ia te oe.”—1 Timoteo 4:16, NW.

[Faamatalaga pito i lalo]

Pe Mafai Ona E Faamatala?

• O ā o tatou uiga e tatau ona iai, talu ai tatou te lē iloa le taimi tonu o le faamasinoga a le Atua?

• I ā auala e mafai ona tatou ‘uaʻi atu ai pea i la tatou aʻoaʻo atu’?

• E mafai faapefea ona e fesoasoani i se tagata suʻesuʻe ina ia avea ma uō a Ieova?

• Aiseā e tāua ai ona faaalu e mātua se taimi ina ia aʻoaʻoina ai a latou fanau?

[Fesili mo le Suʻesuʻega]

[Ata i le itulau 15]

E faaleleia atili le aʻoaʻoina o se mea pe a iai se siʻomaga mamalu ma le faaleuō

[Ata i le itulau 18]

O le faatinoina o tala faale-Tusi Paia, e pei o le faamasinoina e Solomona o fafine talitane e toʻalua, e avea ai suʻesuʻega faaleaiga o ni taimi e olioli ai