Ia Olaola Pea Lou “Faamoemoe i le Faaolataga”!
Ia Olaola Pea Lou “Faamoemoe i le Faaolataga”!
“Ia [iai] . . . le puloutau o le faamoemoe i le faaolataga.”—1 TESALONIA 5:8, LF.
1. E faapefea ona fesoasoani “le faamoemoe i le faaolataga” ina ia onosai ai?
O LE faamoemoe o le faasaoina e mafai ona fesoasoani i se tagata ia faamalosi ai pea e ui lava i tulaga sili ona mataʻutia. O se tagata ua āfaina i se vaa ua malepe ma o loo faaopeopea i se vaafaaola, e mafai ona tau umi atu se taimi e onosai ai pe afai na te iloa ua lalata ane se fesoasoani. I se tulaga talitutusa, mo le faitau afe o tausaga, o le faamoemoe i “le olataga mai ia Ieova” ua faatumauina ai tane ma fafine o le faatuatua i taimi o faafitauli, ma o lenei faamoemoe e leʻi faapea lava ua tuu sesē. (Esoto 14:13; Salamo 3:8; Roma 5:5; 9:33) Sa faatusa e le aposetolo o Paulo “le faamoemoe i le faaolataga” i “le puloutau” o le ofutau faaleagaga o se Kerisiano. (1 Tesalonia 5:8, LF; Efeso 6:17) Ioe, o lo tatou mautinoa faapea o le a faasaoina i tatou e le Atua, e puipuia ai o tatou tomai faalemafaufau ma e fesoasoani ia i tatou ina ia tatou faautauta ai pea e ui i mala, o teteega, ma faaosoosoga.
2. I ā auala ua avea ai “le faamoemoe i le faaolataga” ma vaega autū i le tapuaʻiga moni?
2 “O le faamoemoe i le lumanaʻi sa lē o se uiga masani o le lalolagi o tagata faapaupau,” le lalolagi lea na siʻomia ai Kerisiano o le uluaʻi senituri, o le faamatalaga lena a le International Standard Bible Encyclopedia. (Efeso 2:12; 1 Tesalonia 4:13) Peitaʻi, o “le faamoemoe i le faaolataga” o se vaega autū o le tapuaʻiga moni. E faapefea? Muamua, o le faaolataga o auauna a Ieova e fesootaʻi atu i lona lava suafa. Na tatalo le faisalamo o Asafo e faapea: “Le Atua o lo matou faaolataga e, ia e fesoasoani mai ia te i matou ona o lou suafa mamalu; ia e laveai mai foi ia te i matou.” (Salamo 79:9; Esekielu 20:9) E lē gata i lea, o le mautinoa i faamanuiaga na folafola mai e Ieova e matuā manaʻomia lava ina ia ati aʻe ai se faiā lelei ma ia. Sa faaupu faapenei e Paulo: “A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.” (Eperu 11:6) E lē gata i lea, na faamatala mai e Paulo faapea, o le faaolataga o ē salamō o le pogai autū lea mo le afio mai o Iesu i le lalolagi. Na ia folafola mai e faapea: “O le upu moni lenei, e tatau lava ona matuā talia, na maliu mai Keriso Iesu i le lalolagi, na te faaolaina o e agasala.” (1 Timoteo 1:15) Ma na faasino atu le aposetolo o Peteru i le faaolataga e faapea o ‘le iuga [po o le, iuga mulimuli] o lo tatou faatuatua.’ (1 Peteru 1:9) E manino mai la, e talafeagai ona faamoemoe atu mo le faaolataga. Ae o le ā moni lava le faaolataga? Ma o ā mea e manaʻomia ina ia maua ai?
O le ā le Faaolataga?
3. O le ā le ituaiga o faaolataga na tofo i ai auauna a Ieova o aso anamua?
3 I Tusitusiga Eperu, e masani ona faauiga atu le “faaolataga” i le laveaʻi po o le faasao mai tigā pe mai ni faiga sauā, po o le vave oti ae leʻi taitai le soifua. Mo se faataʻitaʻiga, i le taʻua o Ieova ‘o le faaola,’ na faapea mai ai Tavita: “O le Atua o loʻu papa, . . . ma loʻu malu, o loʻu faaola, e te faaola ia te au ai le sauaga. Ou te valaau ia Ieova, e tusa ona viia o ia; o lea a faaolaina ai aʻu ai e ita mai ia te au.” (2 Samuelu 22:2-4) Sa iloa e Tavita e faafofoga Ieova pe a alalaga atu Ana auauna faamaoni mo se fesoasoani.—Salamo 31:22, 23; 145:19.
4. O le ā le faamoemoe mo le lumanaʻi na iai i auauna a Ieova a o leʻi oo mai i taimi o uluaʻi Kerisiano?
4 Sa iai foʻi i auauna a Ieova o ē na soifua a o leʻi oo mai i taimi o uluaʻi Kerisiano lena faamoemoe i se olaga i le lumanaʻi. (Iopu 14:13-15; Isaia 25:8; Tanielu 12:13) O le mea moni, o le tele o folafolaga i laveaʻiga o loo maua i Tusitusiga Eperu o ni folafolaga faavaloaga i se faaolataga e sili atu—lea e taʻitaʻia atu i le ola e faavavau. (Isaia 49:6, 8; Galuega 13:47; 2 Korinito 6:2) I aso o Iesu, e toʻatele tagata Iutaia sa faamoemoe atu mo le ola e faavavau, peitaʻi na latou mumusu e talia Iesu e avea ma auala i le faataunuuina o lo latou faamoemoe. Na fetalai atu Iesu i taʻitaʻi lotu o ona taimi: “E suesue outou i Tusi, auā ua outou manatu tou te maua ai le ola faavavau; o Tusi foi ia o loo molimau ia te au.”—Ioane 5:39.
5. O le ā le uiga autū o le faaolataga?
5 Ua faaalia e le Atua e ala mai ia Iesu, le ata atoa o le uiga o le faaolataga. E aofia ai le faasaʻoloto mai le pule a le agasala, mai saisaitiaga i lotu sesē, mai le lalolagi o loo pulea e Satani, mai le fefe i tagata, atoa ma le saʻoloto mai le mataʻu i le oti. (Ioane 17:16; Roma 8:2; Kolose 1:13; Faaaliga 18:2, 4) I le uiga autū lava, o le faaolataga mai le Atua mo ana auauna faamaoni, e lē gata ina faasino atu i le laveaʻiina mai tigā ma mafatiaga, ae faasino atu foʻi i le avanoa e maua ai le ola e faavavau. (Ioane 6:40; 17:3) Na aʻoaʻo mai Iesu faapea o le faaolataga mo le “lafu mamoe itiiti,” e faauiga atu i le faatutūina aʻe o i latou i le olaga faalelagi ina ia auai faatasi ma Keriso i le pulega o le Malo. (Luka 12:32) Mo le isi vaega o totoe o tagata, o lo latou faaolataga e faauiga atu i le toe faafoʻisia o i latou i se olaga lelei atoatoa ma le faiā ma le Atua lea na maua e Atamu ma Eva i le faatoaga o Etena a o la leʻi agasala. (Galuega 3:21; Efeso 1:10) O le ola e faavavau i na tulaga faaparataisoina o le uluaʻi fuafuaga lena a le Atua mo tagata. (Kenese 1: 28; Mareko 10:30) Ae mafai la faapefea ona iai se toe faafoʻisiaga i na tulaga?
Le Faavae mo le Faaolataga—Le Togiola
6, 7. O le ā le matafaioi a Iesu i lo tatou faaolataga?
6 Ua na o le taulaga togiola a Keriso e mafai ona maua ai le faaolataga e faavavau. Aiseā? Ua faamatala mai e le Tusi Paia faapea ina ua agasala Atamu, na ia “faatauina atu” ai o ia lava ma ē uma e tupuga mai ia te ia i le lumanaʻi, e aofia ai tatou, i le agasala—ona manaʻomia ai lea le faia o se togiola pe afai e tatau ona iai se faamoemoe moni mo tagata. (Roma 5:14, 15; 7:14) O le saunia e le Atua o se togiola mo tagata uma sa faaatagia mai lea i taulaga sa faia i manu i lalo o le Tulafono Faa-Mose. (Eperu 10:1-10; 1 Ioane 2:2) O Iesu e ana le taulaga lea na faataunuu ai na ata faavaloaga. Na faasilasila e le agelu a Ieova a o leʻi fanau mai Iesu e faapea: “E faaola e ia lona nuu ai a latou agasala.”—Mataio 1:21; Eperu 2:10.
7 Sa fanau faavavega mai Iesu i le taupou o Maria, ma ona o ia o le Alo o le Atua, sa leʻi tuufaasolo mai ai ia te ia le oti mai ia Atamu. O lenei mea moni faatasi ai ma lona soifuaga faamaoni lelei atoatoa ua māfua ai ona maua e lona soifuaga le aogā lea sa manaʻomia e faatauina ai le fanau a tagata mai le agasala ma le oti. (Ioane 8:36; 1 Korinito 15:22) I lona lē pei o isi uma tagata, sa leʻi faasalaina ai Iesu ina ia oo i ai le oti ona o le agasala. Sa afio mai o ia i le lalolagi ma se fuafuaga ina ia “foaiina atu lona ola e fai ma togiola e sui aʻi tagata e toatele.” (Mataio 20:28) I le faia faapea, ua mafai ai e le Iesu lea ua toe faatūina nei ma ua faanofotupuina, ona iai i se tulaga na te avatua ai le faaolataga ia i latou uma ua ausia mea o faafinagaloina e le Atua.—Faaaliga 12:10.
O le ā e Manaʻomia Ina ia Maua ai le Faaolataga?
8, 9. (a) Na faapefea ona tali atu Iesu i le fesili a se alii talavou mauʻoa e faatatau i le faaolataga? (e) Na faapefea ona faaaogā e Iesu lenei avanoa e aʻoaʻo atu ai i ona soo?
8 I se tasi aso, na fesili atu ai se alii talavou mauʻoa Isaraelu ia Iesu: “Se a se mea ou te faia ina ia ou maua ai le ola faavavau?” (Mareko 10:17) Atonu e atagia mai i lana fesili le ituaiga o mafaufauga sa taatele i tagata Iutaia i ona vaitaimi—e tāpā mai e le Atua galuega lelei patino, ma e ala i le faatinoina o se aofaʻiga e lava o na galuega, e mafai ai e se tasi ona maua le faaolataga mai le Atua. Peitaʻi o lena ituaiga o tuutōina tau ina fai, e mafai ona tupu aʻe mai ni faanaunauga manatu faapito. O na galuega sa lē taulau ona saunia ai se faamoemoe mautinoa o le faaolataga, auā e leai se tagata lē lelei atoatoa e mafai moni ona ia ausia tapulaa a le Atua.
9 I le tali atu i le fesili a le tamāloa, sa na ona faamanatu atu lava e Iesu ia te ia e faapea, e tatau ona ia usitaia poloaʻiga a le Atua. Na vave ona faamautinoa atu e le alii talavou ia Iesu faapea sa ia tausia na poloaʻiga talu lava ina o itiiti. O lana tali mai na lagona ai e Iesu lona alofa ia te ia. Na fetalai atu Iesu ia te ia: “E tasi le mea e le o ia te oe. Ina alu ia, faatau atu au mea uma, ma avatu i e ua matitiva, ona e maua lea o le oa i le lagi; i le ē sau ai, ma mulimuli mai ia te au.” Peitaʻi, na alu ese ma le tigā le alii talavou, “auā ua tele ana oloa.” Ina ua mavae lena, ona faamamafa atu lea e Iesu i ona soo e faapea, o le soona naunau atu i ʻoa a lenei lalolagi e faalavelavea ai le mauaina o le faaolataga. Na ia toe faapea mai e leai se tasi e mafai ona mauaina le faaolataga e ala i ni ana lava taumafaiga. Peitaʻi na faamautinoa atili atu e Iesu ia i latou e faapea: “E le mafaia e tagata, na o le Atua; auā e mafaia mea uma e le Atua.” (Mareko 10:18-27, LF; Luka 18:18-23) E mafai faapefea ona maua le faaolataga?
10. O ā tuutuuga e ao ona tatou ausia ina ia maua ai le faaolataga?
10 O le faaolataga o se meaalofa mai le Atua, ae lē otometi ona oo mai. (Roma 6:23) E iai ni tuutuuga autū patino e ao i tagata taʻitoʻatasi ona ausia ina ia agavaa ai mo lena meaalofa. Na fetalai Iesu: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.” Na toe fai mai atili le aposetolo o Ioane: “O lē faatuatua i le Alo, ua ia te ia le ola faavavau; a o lē lē faatuatua i le Alo e le iloa e ia le ola.” (Ioane 3:16, 36) E manino la, e finagalo le Atua ina ia faatuatua ma usiusitai tagata uma taʻitoʻatasi o ē o loo faamoemoe e maua le faaolataga e faavavau. E tatau i tagata taʻitoʻatasi ona filifili ina ia talia le togiola ma mulimuli atu i tulagaaao o Iesu.
11. E mafai faapefea e se tagata lē lelei atoatoa ona maua le finagalo malie o Ieova?
11 Talu ai tatou te lē lelei atoatoa, e lē o so tatou faanaunauga masani la le usiusitai ma e lē mafai ona atoatoa le faatinoina o lo tatou usiusitai. O le pogai lena na saunia ai e Ieova se togiola ina ia ufiufi ai a tatou agasala. E ui i lea, e ao ona tatou tauivi pea lava pea ina ia ola e ogatusa ma ala o le Atua. E pei ona sa taʻu atu e Iesu i le alii talavou mauʻoa, e ao ona tatou tausisia poloaʻiga a le Atua. O le faia faapea e maua ai e lē gata o le finagalo malie o le Atua, ae o le olioli tele, auā “e le mamafa foi ana poloaiga”; ae o “se mea e faafouina” ai. (1 Ioane 5:3; Faataoto 3:1, 8, faatusatusa i le NW) Peitaʻi, e lē faigofie ona pipii atu pea i le faamoemoe o le faaolataga.
‘Ia Faamalolosi Ona Finau mo le Faatuatua’
12. E faapefea e le faamoemoe i le faaolataga ona faamalosia ai se Kerisiano ina ia tetee atu i faaosoosoga i amioga lē mamā?
12 Sa manaʻo le soo o Iuta e tusi atu i uluaʻi Kerisiano e uiga i “le faaolataga ua tuu tele [ia i latou].” Peitaʻi ane, o amioga leaga sa taatele i na vaitaimi na uunaia ai o ia e fautuaina ona uso ina ia ‘faamalolosi ona finau mo le faatuatua.’ Ioe, ina ia maua le faaolataga, e lē lava le iai o le faatuatua, le pipii atu i le faatuatuaga moni faa-Kerisiano, ma le usiusitai pe afai o sologa lelei le tulaga o mea uma. O lo tatou tuutōina ia Ieova e ao ona lava le malosi e fesoasoani ia i tatou ina ia tetee atu ai i faaosoosoga ma taaʻiga i amioga lē mamā. Peitaʻi, o amioga faaleituaiga soonafai ma le matuā sili ona matagā, le lē faaaloalo i le pule, o fevaevaeaʻiga, ma masalosaloga sa matuā faaleagaina ai amioga ma mafaufauga o le faapotopotoga i le uluaʻi senituri. Ina ia fesoasoani ia i latou e manumalo mai na faanaunauga, na uunaia ai e Iuta ona uso Kerisiano ina ia matuā manino i o latou mafaufau lo latou sini: “O outou le au pele e, ia outou ati ae ia te outou i lo outou faatuatua e silisili ona paia, o le Agaga Paia tou te tatalo ai; ia outou faatumau ia te outou i le alofa o le Atua, ma faatalitali atu i le alofa mutimutivale o lo tatou Alii o Iesu Keriso, e oo atu i le ola faavavau.” (Iuta 3, 4, 8, 19-21) O le faamoemoe o le mauaina o le faaolataga e mafai ona faamalosia ai i latou i la latou taua ina ia tumau i le amio mamā.
13. E mafai faapefea ona tatou faaalia e tatou te lē o misia le fuafuaga o le alofa tunoa o le Atua?
13 E faatalitalia e Ieova le Atua ni faaaʻoaʻoga lelei o amioga tatau mai ia i latou o ē o le a ia foaʻi atu i ai le faaolataga. (1 Korinito 6:9, 10) Peitaʻi ane, o le pipii atu i tapulaa o amioga tatau a le Atua, e lē faauiga atu i le faamasinosino fua i isi. E lē o tatou e filifilia le taunuuga e faavavau o o tatou uso a tagata. Na i lo lea, o le Atua o le a na faia lena mea, e pei ona taʻu atu e Paulo i tagata Eleni i Atenai: “Ua faatuina e ia le aso e faamasinoina ai le lalolagi ma le tonu, e le tagata ua tofia e ia”—o Iesu Keriso. (Galuega 17:31; Ioane 5:22) Pe afai o loo tatou ola i lo tatou faatuatua i le togiola a Iesu, e leai la se pogai tatou te matataʻu ai fua i le oo mai o le aso o le faamasinoga. (Eperu 10:38, 39) O le mea tāua, e lē tatau lava ona tatou “talia le alofa tunoa o le Atua [la tatou leleiga ma ia e ala i le togiola] ma misia ai lona fuafuaga” e ala i lo tatou lolo atu e faaosoosoina i ni mafaufauga ma amioga sesē. (2 Korinito 6:1, NW) E lē gata i lea, o le fesoasoani i isi ina ia maua le faaolataga, tatou te faaalia ai ua tatou lē misia le fuafuaga o le alofa mutimutivale o le Atua. E mafai faapefea ona tatou fesoasoani ia i latou?
Tufaina Atu le Faamoemoe o le Faaolataga
14, 15. O ai na tofia e Iesu e faasalalauina atu le tala lelei o le faaolataga?
14 I lona toe sii mai o upu a le perofeta o Ioelu, na tusi ai Paulo: “E faaolaina i latou uma o e valaau i le suafa o le Alii [Ieova].” Ona ia faaopoopo mai lea: “O lenei, pe faapefea ona latou valaau atu i le ua latou le faatuatua i ai? pe faapefea foi ona latou faatuatua i le ua latou le faalogo atu i ai? pe faapefea foi ona latou faalogo atu, pe a leai se talaʻi atu?” I nisi fuaiupu mulimuli ane, o loo taʻua ai e Paulo faapea e lē faafuaseʻi ona oo mai le faatuatua; na i lo lea, “e tupu le faatuatua i le taulogologo atu,” o lona uiga, “i le afioga [e uiga i] le Keriso lea.”—Roma 10:13, 14, 17; Ioelu 2:32.
15 O ai o le a aumaia “le afioga a le Keriso” i atunuu? Na tofia atu e Iesu lena galuega i ona soo—i latou ua uma ona aʻoaʻoina i lena “afioga.” (Mataio 24:14; 28:19, 20; Ioane 17:20) Pe a tatou auai i le galuega talaʻi o le Malo ma le faia o soo, ua tatou faia ai le mea tonu lava na tusi faatatau i ai le aposetolo o Paulo, ae i le taimi lea, o loo ia sii mai ai upu a Isaia: “E matagofie naua o latou vae o e au mai le tala lelei i le manuia!” E tusa lava pe toʻatele latou te lē talia le tala lelei o loo tatou avatu, ae “matagofie” lava o tatou vae i le silasila mai a Ieova.—Roma 10:15; Isaia 52:7.
16, 17. O le ā le fuafuaga valalua o loo faataunuuina e la tatou galuega talaʻi?
16 O le faataunuuina o lenei tofiga e faataulau ai ni fuafuaga tāua se lua. Muamua, e ao ona talaʻia le tala lelei ina ia faamamaluina ai le suafa o le Atua ma iloa ai e i latou o loo fia maua le faaolataga le itu e liliu atu i ai. Sa malamalama Paulo i lenei vala o le tofiga. Na ia faapea mai: “Auā ua faapea ona poloai mai o le Alii [Ieova] ia te i matou, Ua ou tofia oe e fai ma malamalama o nuu ese, ina ia avea oe ma faaolataga e oo i tuluʻiga o le lalolagi.” O lea, ona o i tatou o soo o Keriso, e ao ai ia i tatou taʻitoʻatasi ona faia so tatou sao i le avatuina o le feʻau o le faaolataga i tagata.—Galuega 13:47; Isaia 49:6.
17 Lona lua, o le talaʻia o le tala lelei e faataatia ai le faavae mo le faamasinoga amiotonu a le Atua. E tusa ai o lena faamasinoga, na fetalai Iesu: “Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ʻoti.” E ui o le faamasinoga ma le tuueseeseina o le a fai “pe a sau le Atalii o le tagata i lona mamalu,” peitaʻi o le galuega talaʻi o loo saunia ai mo tagata i aso nei le avanoa latou te amanaʻia ai uso faaleagaga o Keriso ma galulue ai e lagolagoina na uso mo lo latou lava foʻi faaolataga e faavavau.—Mataio 25:31-46.
Ia Tausisia Pea le “Mautinoa i le Faamoemoe”
18. E mafai faapefea ona tatou faaolaolaina pea lo tatou “faamoemoe i le faaolataga”?
18 O le faia ma le filigā o so tatou sao i le galuega talaʻi o se auala foʻi lea e fesoasoani mai ai ia i tatou ina ia olaola pea lo tatou faamoemoe. Na tusi mai Paulo: “Ua matou mananao tele ina ia outou taitasi ma faaali mai lea lava filigā, ina ia mautinoa [i] le faamoemoe e oo i le gataaga.” (Eperu 6:11) O lea, tau ina ia tatou taʻitoʻatasi ma pulouina “le puloutau o le faamoemoe i le faaolataga,” ma manatua ai faapea “e lei tofia i tatou e le Atua i le toasa, a ia maua le faaolataga ona o lo tatou Alii o Iesu Keriso.” (1 Tesalonia 5:8, 9, LF) Seʻi o tatou utagiaina foʻi le timaʻiga a Peteru: “Ia outou fusi ae i sulugatiti o outou mafaufau, ia faautauta, ia atoatoa ona faamoemoe i le alofa tunoa e molia mai ia te outou.” (1 Peteru 1:13) O i latou uma e faia faapea o le a vaai atu i le faataunuuina atoatoa o lo latou “faamoemoe i le faaolataga”!
19. O le ā o le a tatou talanoaina i le mataupu o sosoo mai?
19 Ae i le taimi nei, o le ā le vaaiga e tatau ona tatou vaai ai i le taimi lea o loo totoe o lenei faiga o mea? E mafai faapefea ona tatou faaaogā lena taimi ina ia maua ai le faaolataga mo i tatou lava ma isi? O le a tatou talanoaina nei fesili i le mataupu o sosoo mai.
Pe Mafai Ona E Faamatala?
• Aiseā e ao ai ona tatou faaolaolaina pea lo tatou “faamoemoe i le faaolataga”?
• O le ā e aofia ai i le faaolataga?
• O le ā e ao ona tatou fai ina ia maua ai le meaalofa o le faaolataga?
• O le ā e faataulauina e la tatou galuega talaʻi lea e ogatusa ma le fuafuaga a le Atua?
[Fesili mo le Suʻesuʻega]
[Ata i le itulau 10]
E sili atu nisi mea e uiga i ai le faaolataga na i lo le tau ina laveaʻiina mai le faaumatiaga