Musika e Fiafia i ai le Atua

O musika ua faamatalaina o “le taleni pito i sili ona leva ma masani i ai.” E pei lava o le gagana, ua avea musika ma meaalofa iloga ua faaesea ai tagata mai manu. E faagaee e musika faalogona. E mafai ona mālie i le faalogo a taliga, ma tumau pea i le mafaufau. E sili atu i lena, o musika e mafai ona faafiafiaina ai le Atua.

E PEI ona faailoa mai e le Tusi Paia, sa fiafia tagata Isaraelu i musika. Sa avea musika o “se taleni taatele i taimi o le Tusi Paia anamua,” o le manatu lena o le Unger’s Bible Dictionary. I le avea ma vaega o le olaga i aso fai soo, sa faamatilatila ai musika e usuina ma musika fai faaili i la latou tapuaʻiga. Ae o leo lava o tagata sa tele ina faaaogāina.

Na tofia e le tupu o Tavita ni sui mai sa Levī “e fai pesega” i le fale fetafaʻi, a o leʻi faapaiaina le malumalu na fausia e Solomona, lona atalii. (1 Nofoaiga a Tupu 6:31, 32) Ina ua taunuu i Ierusalema le atolaau o le feagaiga, lea na faaāta ai le afio ai o Ieova, na fuafua ai e Tavita mo nisi o sa Levī “e faamanatunatu ai, ma faafetai, ma vivii ia Ieova.” Na latou tuu faatasia a latou viiga na usuina ma “napeli, ma kitara, . . . ua faatagitagi i sumepalo, . . . [ma] pu.” O nei tamāloloa sa “taʻuina atu o latou igoa, e vivii atu ia Ieova, auā e faavavau lava lona alofa.”—1 Nofoaiga a Tupu 16:4-6, 41; 25:1.

O le fuaitau ‘e faavavau lava le alofa o Ieova’ ua aliaʻe soo i Salamo, le tusi o le Tusi Paia ua sili ona fesootaʻi ma musika. Mo se faataʻitaʻiga, o loo faia aʻe ai le vaega lona lua o fuaiupu taʻitasi e 26 o le Salamo 136. Na iloa e se tasi fai tōfā o le Tusi Paia faapea: “Ona o le puupuu o le auala o loo faaupuina ai e faigofie ai lava ona taʻua. O tagata uma lava ua latou faalogo i ai, e mafai ona latou manatua.”

O faatomuaga o salamo ua faaalia ai le matuā salalau atu o le faaaogāina o mea fai musika. I le Salamo e 150 o loo taʻua ai le pu, kitara,  topa, faaili, ma sumepalo, e faaopoopo atu i napeli. E ui i lea, o le mea autū e manaia ai, o leo ia o tagata. Ua timaʻi mai le fuaiupu e 6: “Ia vivii atu ia Ioa o mea uma lava e mānava. Ia outou vivii atu ia Ioa.”

Talu ai e faailoa atu e musika o tatou faalogona, i taimi o le Tusi Paia, sa uunaia ai auēga po o pese faamatala e manatunatuga faanoanoa. Peitaʻi, o lenei ituaiga o pesega, sa faatapulaa i ituaiga eseese o musika a Isaraelu. “E na o se auēga e sili ona filifili ai e faaaogā le faiga lea o le solo a lē i se fati o se musika po o le fesuiaʻiga foʻi o le leo ma le faamamafa mai i se tautalaga,” e pei ona faaalia ai e le lomifefiloi o le Tusi Paia le Insight on the Scriptures. *

Na usuina e Iesu ma ona aposetolo faamaoni viiga ia Ieova i le po a o lumanai lona maliu, e aunoa ma se masalosalo sa usuina ai upu o Salamo a Aleli. (Salamo 113-118) Maʻeu le faamālosia ai o soo o Iesu i lenei mea ina ia faafesagaʻia le maliu o lo latou Matai! E sili atu i lena, e tatau ona faalolotoina la latou faaiʻuga ia tumau o ni auauna faamaoni a le Pule Silisili Ese o le vateatea aoao, o Ieova, a o latou usuina faalima le tali “auā e faavavau lava lona alofa.”—Salamo 118:1-4, 29.

Na usuina e uluaʻi Kerisiano i Efeso ma Kolose “salāmo, ma pese . . . i le [“Atua,” NW

]” (lona uiga moni lava o, “pese faalelotu”). Na latou faaopoopo atu i ai ‘pese faaleagaga’ sa usuina i o latou loto. (Efeso 5:19; Kolose 3:16) E ala i pesega ma faamatalaga, na latou faaaogā ai ma le talafeagai o latou gutu e faailoa atu viiga. Pe e leʻi faailoa ea e Iesu faapea “o le tele o mea i le loto e tautala mai ai le gutu”?—Mataio 12:34.

Musika e Lē Fiafia i ai le Atua

E lē o musika uma o loo taʻua i le Tusi Paia e fiafia i ai le Atua. Seʻi manatu i le mea na tupu i le Mauga o Sinai, lea na maua ai e Mose le Tulafono, e aofia ai Tulafono e Sefulu. Ina ua toe taliu mai i lalo Mose nai le mauga, o le ā le mea na ia lagonaina? “E le o le leo o e alalaga ina ua malo,” “e le o le leo foi o e alalaga ina ua lafoia,” ae “o le leo o le pese.” O le musika lenei sa fesootaʻi atu i le ifoga i tupua, o se faiga na māfua ai le lē fiafia o le Atua ma iʻu ai i le feoti o le pe tusa o le 3,000 o i latou na faia na musika.—Esoto 32:18, 25-28.

E ui ina mafai e tagata ona fatuina, tāina, ma fiafia i ituaiga uma o musika, ae e lē faapea ai o musika uma e fiafia i ai le Atua. Aiseā e lē faapea ai? Na faamatala e le aposetolo Kerisiano o Paulo e faapea: “Ua agasala tagata uma lava, ma ua le oo i le mamalu o le Atua.” (Roma 3:23, LF

) O tu faapaupau na faia ina ia fuatele le eleele, le aʻoaʻoga i le solu faaletagata e ola pea, ma le faamamaluina o Maria e avea ma “tinā o le Atua” e masani lava ona taʻua i matua o pesega. Peitaʻi, o nei talitonuga ma tu e lē faamamaluina ai le Atua o le upu moni, auā e feteenaʻi na aʻoaʻoga ma le mea o loo faaalia i lana Afioga faagaeeina, le Tusi Paia.—Teuteronome 18:10-12; Esekielu 18:4; Luka 1:35, 38.

Faia se Filifiliga Atamai i Musika

O le filifilia o musika o loo maua i le taimi nei e faigatā tele. O faavaa o compact disc ua fuafuaina ina ia uunaia ai tagata faatau e faatau ituaiga uma o pese ua puʻeina. Ae afai e manaʻo se tagata tapuaʻi o le Atua e faafiafiaina o Ia, o le a ia faaalia le faaeteete ma filifili ma le atamai ina ia alofia musika usu ma musika faaili ua faagaeeina mai e aʻoaʻoga sesē faalotu pe e uaʻi atu i amioga lē mamā ma faiga faatemoni.

O Alapati, o lē sa auauna o se misionare Kerisiano i Aferika, na ioe mai faapea sa itiiti lava se avanoa na ia maua e tāina ai le piano iinā. Peitaʻi, sa ia faalogologo pea lava pea i nisi o lipine fonokalafi na puʻeina na malaga atu ma ia. I lona atunuu, o loo asiasi atu ai nei Alapati i faapotopotoga Kerisiano o se ovasia femalagaaʻi. Ua faaitiitia lona taimi e faaalu e faalogologo ai i musika. “O fātuga lava a Beethoven ou te fiafia tele i ai,” o lana tala lea. “I le faagasolo mai o tausaga, sa ou aoaoina ai ana lipine o musika mo aufaaili tetele, o musika solo, o sonata, ma musika a aufaaili e toʻafā tagata faifaaili.” O le faalogologo atu i na musika na maua ai e ia le fiafia tele. O le mea moni, e tofu lava le tagata ma lana ituaiga o musika e fiafia i ai, ae mo Kerisiano e teu i o tatou mafaufau le fautuaga a Paulo: “Pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.”—1 Korinito 10:31.

 Musika ma le Tuuina Atu

O le mea sa sili ona fiafia i ai Susi o musika. “Na amata ona ou tāina le piano i le 6 o oʻu tausaga, le vaiolini i le 10 o oʻu tausaga, ma mulimuli ane o le napeli i le 12 o oʻu tausaga,” o lana tala lea. Mulimuli ane na auai atu Susi i le Royal College of Music i Lonetona, Egelani, ina ia aʻoga ai i le tāina o le napeli. Sa aʻoga o ia mo le fa tausaga i se ta napeli lauiloa mai Sepania ma se isi tausaga faaopoopo i le Paris Conservatoire, ma mauaina ai se faailoga taualoa i musika faapea ma ni tipiloma i le avea o se ta napeli ma o se faiaʻoga ta piano.

Na auai atu Susi i se faapotopotoga o Molimau a Ieova i Lonetona. O iinā na ia maua ai le naunau moni ma le alofa i le va o uso Molimau. Na faasolosolo mālie ona tuputupu aʻe lona alofa mo Ieova, ma o lona maelega mo lana auaunaga na uunaia ai o ia ina ia sailia ni auala e auauna ai ia te ia. O lenei mea na taʻitaʻia atu ai i le tuuina atu ma le papatisoga. “O se olaga tuuina atu le avea o le musika o se galuega, o lea, o se olaga tuuina atu e lē o se mea fou ia te aʻu,” o le tala lea a Susi. Na faaitiitia lona taimi mo le auai i koneseti ina ua ia auai atu i le faiva faa-Kerisiano o le talaʻia o le tala lelei o le Malo o le Atua i le usitaʻi atu i le faatonuga a Iesu.—Mataio 24:14; Mareko 13:10.

Nei la ua faatapulaa lona taimi e faaaluina e tāina ai musika, o ā ona faalogona? E ioe o ia faapea: “O nisi o taimi ou te lagona ai le lotovaivai ona ua lē o toe tele soʻu taimi o faaalu e faataʻitaʻi ai, ae o loo tāina pea aʻu mea faifaaili ma fiafia i musika. O musika o se meaalofa mai ia Ieova. Ua sili atu ona ou fiafia i musika i le taimi lenei ona ua ou faamuamuaina lana auaunaga i loʻu olaga.”—Mataio 6:33.

Musika e Viia ai le Atua

O Alapati ma Susi faatasi ai ma le toeitiiti ono miliona o isi Molimau a Ieova o loo faaauau pea ona vivii atu ia Ieova le Atua i musika. I sauniga faa-Kerisiano o loo faia i Maota o le Malo i atunuu e 234, e amata ma faaiʻu a latou sauniga, i nofoaga o loo faataga ai, e ala i le usuina o pese ia Ieova. I ituaiga o leo eseese, o fātuga matagofie e avatu ai i pese e faavae mai le Tusi Paia viiga o Ieova le Atua.

O i latou uma i le aofia e sii aʻe o latou leo i le pese ma le māfana faapea o Ieova o se Atua e manatu mai (Pese 44). Latou te usuina se pese o viiga ia Ieova (Pese 190). O a latou pese e mātaulia ai le olioli ma tiute tauave a le ʻauuso Kerisiano, olaga faa-Kerisiano, ma uiga faa-Kerisiano. E faaopoopo atu i lo latou fiafia ia ituaiga eseese o faiga o musika e faaaogā e Molimau mai Ausetalia, Amerika i Mātū, Amerika i Saute, Asia ma Europa, pe a fatuina pese. *

“Ia outou pepese atu ia Ieova i le pese fou; le lalolagi uma e, ia outou pepese atu ia Ieova. Ia outou pepese atu ia Ieova, ia outou faafetaia lona suafa,” o upu tomua o se vii mamalu na tusia i aso o le faisalamo. “Ia outou talaʻi atu lana faaolataga i lea aso ma lea aso. Ia outou taʻutaʻu atu lona mamalu i nuu ese, ma ona vavega i nuu uma lava.” (Salamo 96:1-3) O le mea lena o loo faia e Molimau a Ieova i lou vaipanoa, ma latou te valaauliaina oe ina ia e auai atu i le usuina o lenei viiga. O le a matuā taliaina lelei oe i a latou Maota o le Malo, lea e mafai ai ona e aʻoaʻoina le auala e vivii ai ia Ieova i musika e faafiafiaina ai o ia.

[Faamatalaga pito i lalo]

[Ata i le itulau 28]

Usuina o viiga ia Ieova