Talaaga o le Soifuaga

Na Fesoasoania Aʻu e Foʻia Loʻu Matamuli

UA FAAMATALAINA E RUTH L. ULRICH

Sa ou lē lavā onosai ma ou tagi ai i luma lava o le faitotoʻa o le fale o le failotu. Na seʻi faatoʻā uma lava ona ia fai mai ni faitioga lē saʻo faasaga ia Charles T. Russell, o lē sa auauna o le uluaʻi peresitene o le Watch Tower Bible and Tract Society. Seʻi oʻu faamatala atu po o le ā le mea na oo i ai i loʻu faia o asiasiga faapena i tagata ae ua na o aʻu o se teineitiiti.

NA OU fanau mai i se aiga e ese le mapolotu i se faatoʻaga i Nebraska, i le Iunaite Setete o Amerika, i le 1910. E faitau faatasi e lo matou aiga le Tusi Paia i taeao ma po uma pe a uma taumafataga. O Tamā sa vaavaaia le Aʻoga Aso Sa a le Lotu Metotisi i le aai laʻitiiti o Winside, e tusa ma le fa maila [6 kilomita] le mamao mai la matou faatoʻaga. Sa iai la matou taavale solofanua e fai pupuni o faamalama, ina ia mafai ai ona matou auai i le lotu i le taeao o le Aso Sa e tusa lava po o le ā le tulaga o le tau.

Ina ua tusa ma le valu oʻu tausaga, na oo ai ina maʻi pipili loʻu tuagane pepe ma na ave ai o ia e Tinā i se falemaʻi i Iowa mo togafitiga. E ui lava i lana tausiga matuā lelei, ae na oti lava loʻu tuagane a o la iai iinā. Ae peitaʻi, i le taimi lena a o iai i Iowa, na feiloaʻi ai Tinā ma se Tagata Aʻoga o le Tusi Paia e pei ona faaigoaina ai Molimau a Ieova i lena taimi. E tele ni a la talanoaga na faia, ma sa oo lava ina ō Tinā ma lea tamaʻitaʻi i nisi o sauniga a Tagata Aʻoga o le Tusi Paia.

Ina ua foʻi mai Tinā i le aiga, sa ia aumaia nisi o tusi o le Studies in the Scriptures, ia sa faasalalauina e le Sosaiete o le Olo Matamata. Sa leʻi pine ae talitonu o ia e faapea, sa aʻoaʻoina e Tagata Aʻoga o le Tusi Paia le upu moni ma faapea e lē saʻo le aʻoaʻoga i le lē mafai ona oti o le solu ma le faapuapuagatiaina o tagata amioleaga e faavavau.—Kenese 2:7; Failauga 9:5, 10; Esekielu 18:4.

Ae peitaʻi, sa matuā lē fiafia lava Tamā, ma sa ia tetee i taumafaiga a Tinā e auai i sauniga a Tagata  Aʻoga o le Tusi Paia. Sa ia aveina pea i maʻua ma loʻu tuagane matua o Clarence i le lotu. Peitaʻi, a lē iai Tamā i le fale, e matou te suʻesuʻeina ai ma Tinā le Tusi Paia. O le iʻuga, sa maua ai e i maʻua le fanau le avanoa lelei e faatusatusa ai aʻoaʻoga a Tagata Aʻoga o le Tusi Paia ma aʻoaʻoga a la matou lotu.

Sa ma auai e lē aunoa ma Clarence i le aʻoga Aso Sa i le falesā, ma sa ia tuuina atu ni fesili sa lē mafai e le faiaʻoga ona taliina. Ina ua ma ō atu i le fale, sa ma faamatala atu lenei mea i lo ma tinā, ma o lenei mea na taʻitaʻi atu ai i ni talanoaga uumi e uiga i nei mataupu. I le iʻuga, na ou lafoaʻi ai le lotu ae amata ona auai i sauniga a Tagata Aʻoga o le Tusi Paia faatasi ma Tinā, ma e leʻi umi lava mulimuli ane ae faia foʻi faapena e Clarence.

Feagai ai ma le Matamuli

I a Setema, 1922, na ma auai ai ma Tinā i le tauaofiaga iloga a Tagata Aʻoga o le Tusi Paia i Cedar Point, i Ohio. O loo mafai pea ona ou vaaia i loʻu mafaufau lena faailoilo na fofola mai i o matou luma a o faalaeiauina e Joseph F. Rutherford, le peresitene o le Sosaiete o le Olo Matamata i lena taimi le silia i le 18,000 i latou na auai i upu sa tusia i luga o lea faailoilo e faapea: “Ia Faalauiloa le Tupu ma le Malo.” Sa matuā faagaeetia ai aʻu ma oo mai ai le lagona o le fia taʻu vave atu loa i isi le tala lelei o le Malo o le Atua.—Mataio 6:9, 10; 24:14.

I tauaofiaga na faia mai le 1922 e oo i le 1928, na talia ai se faasologa o iʻugafono, ma sa tuufaatasia ai na feʻau i le faitau sefulu miliona o sāvali na tufatufaina atu e Tagata Aʻoga o le Tusi Paia i le lalolagi aoao. O loʻu fuaitino sa paee ma faasasaʻo—sa latou faatusaina aʻu o se taʻifau paee ma saoasaoa—ma sa ou teleaʻi atu mai lea fale i lea fale i le tufatufaina atu o nei feʻau o loo lomia i sāvali. Sa ou matuā fiafia lava i lenei galuega. Ae peitaʻi, o le talanoa atu i aiga, e faailoa totino atu i isi e uiga i le Malo o le Atua, sa o se tulaga ese foʻi lena.

E pei ona outou silafia, sa ou matuā matamuli lava, sa oo ina ou matuā fefe lava pe a valaaulia e Tinā ni tagata se toʻatele o le aiga i tausaga taʻitasi. Ou te sola i loʻu potu ma nofo ai lava iinā. I se tasi aso, sa manaʻo ai Tinā e puʻe se ata o le aiga atoa, ma sa ia fai mai ia te aʻu ou te sau i fafo. Ona o loʻu lē fia auai ma i latou, sa ou faataiō ai a o ia toso mai aʻu i fafo ma loʻu potu.

Ae peitaʻi na oo mai le aso na ou tuuina ai ma le maumauaʻi ni lomiga faale-Tusi Paia i totonu o laʻu  ato. Ou te faapea ifo pea lava, “Ou te lē mafaia ona fai o lenei mea,” a o le isi taimi ou te faapea ifo ai ia te aʻu lava, “E tatau lava ona ou faia.” Ma na iʻu lava ina ou alu ou te talaʻi. Mulimuli ane, na ou matuā fiafia lava ina ua mafai ona ou maua le lototele ou te alu ai. O le mea sa sili ona ou olioli ai, o le maua o le lotomalie ina ua faataunuuina le galuega, ae lē o le faatinoina o lea galuega. O le taimi lena na ou feiloaʻi ai i le failotu lea na ou taʻua i le amataga ma sa ou alu ese ai ma loʻu tagi. A o mavae atu taimi, o le fesoasoani a Ieova na mafai ai ona ou talanoa atu i tagata i o latou fale, ma sa faateleina ai loʻu olioli. Ona oo lea i le 1925, sa faailogaina ai loʻu tuuina atu ia Ieova i le papatisoga i le vai.

Amataina le Faiva Faataimi Atoa

Ina ua 18 oʻu tausaga, sa ou faatauina mai ai se taavale i se tupe na tuuina mai e le uso o loʻu tinā ua maliu ma na amata ai loa ona ou paeonia, e pei ona taʻua ai le auaunaga faataimi atoa. Ina ua mavae le lua tausaga, i le 1930, na ma talia ai ma laʻu paga paeonia se tofiga e talaʻi ai. O le taimi foʻi lena na amata ai ona paeonia Clarence. E leʻi pine lava mulimuli ane na ia talia ai se valaaulia e auauna i Peteli, i le ofisa ulu o Molimau a Ieova i le lalolagi i Brooklyn, Niu Ioka.

E tusa o le taimi lena na teteʻa ai o ma mātua, o lea na ma nonofo ai ma Tinā i se taavale toso (karaveni) na fausia, ma na amata ai ona ma paeonia faatasi. O le taimi tonu lena na amata ai le Paʻū Maulalo o le Tamaoaiga i le Iunaite Setete. O le faaauau pea i le galuega paeonia, sa avea moni lava lea o se luʻi, ae sa ma filifili ina ia aua neʻi o ma faamavae. Sa ma faafesuiaʻi ia lomiga faale-Tusi Paia e maua mai ai moa, fuāmoa, ma fua o faatoʻaga, faapea mea e pei o maa molīuila tuai ma alamini ua lafoaʻi. O maa molī tuai ma alamini sa ma faatauina atu ma maua mai ai tupe na faatau ai le penisini mo le taavale ma ia faafetaiaʻia ai isi tupe faaalu. Sa ou aʻoaʻoina foʻi le faagaʻoina o le taavale ma le suia o le suāuu ina ia sefe ai le tupe. Sa ma iloa le faamaoni o Ieova i lana folafolaga, i le tatalaina o le auala e fesoasoani ai ia i maʻua i le foʻia o toʻatugā.—Mataio 6:33.

Alu i le Tofiga Faamisionare

I le 1946, na valaaulia ai aʻu ou te auai i le vasega lona fitu o le Aʻoga Faale-Tusi Paia a le Sosaiete a le Olomatamata o Kiliata, lea sa faatūina e latalata i South Lansing, Niu Ioka. I le taimi lena, sa ma paeonia faatasi ai ma Tinā mo le sili atu i le 15 tausaga, peitaʻi sa leʻi manaʻo o ia e faalavelave i loʻu avanoa e maua ai se toleniga mo le galuega faamisionare. O lea na ia faamalosiʻau mai ia te aʻu ina ia talia le faaeaga e auai i le Aʻoga o Kiliata. Ina ua uma le faauuga, na avea ai Martha Hess mai Peoria, Illinois, ma aʻu paga paeonia. Sa tofia i maʻua faatasi ma isi tuafāfine e toʻalua i Cleveland, Ohio, mo le tasi le tausaga a o faatalitali ai mo se tofiga i se isi atunuu.

Na oo mai lena tofiga i le 1947. Na tofia ai i maʻua ma Martha i Hawaii. Talu ai sa faigofie ona malaga atu i nei motu, na alu atu ai Tinā ma nofo latalata mai ia i maʻua i le aai o Honolulu. Sa oo ina lē lelei lona soifua mālōlōina, o lea sa faia ai lava laʻu galuega faamisionare ma fesoasoani atu foʻi ia Tinā. Sa mafai ona ou tausia o ia seʻia oo ina maliu i Hawaii i le 1956, i le 77 o ona tausaga. Ina ua matou taunuu atu iinā, sa na o le 130 Molimau i Hawaii, ae e oo ane i le taimi na maliu ai Tinā, ua sili atu i le afe, ma sa lē toe manaʻomia ai ni misionare.

O lea, na ma maua ai ma Martha se tusi mai le Sosaiete o le Olo Matamata e ofo mai ai ia i maʻua se tofiga i Iapani. O le mea muamua lava na ma popole i ai, pe faamata e mafai i le matutua lea ua ma iai ona aʻoaʻoina le gagana Iapani. O le taimi lena ua 48 oʻu tausaga, a o Martha sa na o le fa tausaga e laʻitiiti ai ia te aʻu. Ae sa ma tuu atu le mataupu i aao o Ieova ma talia le tofiga.

Ina ua faatoʻā uma lava le tauaofiaga faava-o-atunuu i le 1958 i le Yankee Stadium ma Polo Grounds i le aai o Niu Ioka, na ma ō atu ai loa i Tokyo e ala i se vaa. Na matou fetaiaʻi ma se afā a o ma latalata atu i le taulaga i Yokohama, o iinā na  faafeiloaʻi ai i maʻua e Don ma Mabel Haslett, Lloyd ma Melba Barry, ma isi misionare. I le taimi lena, sa na o le 1,124 Molimau i Iapani.

Sa amata loa lava ona ma aʻoaʻoina le gagana Iapani ma auai i le faiva mai lea fale i lea fale. I le faaaogāina o le alafapeta faa-Peretania, na ma tusia ai i ni pepa a ma taulimaga faa-Iapani ia o le a ma faitauina. I le tali mai, e faapea mai ai i latou e ona fale, “Yoroshii desu” pe e faapea mai, “Kekko desu,” ia na ma aʻoaʻoina le uiga e faapea, “O lena e lelei.” Ae sa ma lē iloa i taimi uma pe na fiafia moni lē e ona le fale pe leai, talu ai o na upu, sa faaaogā foʻi e faaalia ai le lē talia. O le uiga o na upu sa faalagolago i le ituaiga o leo sa faaaogā po o foliga vaaia o lē ona le fale. Sa umi se taimi o ma taumafai e aʻoaʻo le faaliliuina o nei faaupuga.

Mea Tutupu na Faamāfanafanaina ai Loʻu Loto

A o taumafai pea e aʻoaʻoina le gagana, sa ou asiasi atu ai i se tasi aso i se fale e nonofo ai tagata e faigaluega i le Kamupanī a le Mitsubishi ma feiloaʻi ai ma se tamaʻitaʻi e 20 tausaga le matua. Sa agaʻigaʻi o ia i luma i le poto o le Tusi Paia ma na papatisoina i le 1966. I se tausaga mulimuli ane, sa amata ai ona paeonia o ia ma sa leʻi pine mulimuli ane ae tofia e avea ma paeonia faapito. Talu mai ai lava na taimi, o loo auauna ai pea o ia o se paeonia faapito. Sa avea pea o se mea e faagaeetia ai aʻu e vaai atu i le auala o loo faaaogāina ai lona taimi ma le malosi mai lava a o talavou i le faiva faataimi atoa.

O le faia o se tulaga mautū mo le upu moni o le Tusi Paia o se luʻi e matuā telē lava aemaise lava i tagata e nonofo i atunuu e lē o ni Kerisiano. Ae peitaʻi, e faitau afe ua manumalo i lenei luʻi, e aofia ai ma nisi o i latou na matou suʻesuʻe i le Tusi Paia. Ua latou lafoaʻia fata faitaulaga taugatā a Puta ma fata a Sinitō e masani ona maua i fale i Iapani. Talu ai i nisi taimi, e faauiga sesē e aiga na gaoioiga e faapea o le lē faaaloalo mo tuaʻa ua maliliu,  e manaʻomia ai la e tagata fou le lototele e faia ai lenei mea. O a latou gaoioiga lototetele ua faamanatu mai ai faaaʻoaʻoga a uluaʻi Kerisiano o ē na lafoaʻia a latou mea sa fesootaʻi atu ma tapuaʻiga sesē.—Galuega 19:18-20.

Ou te manatua se tasi tagata suʻesuʻe o le Tusi Paia, o se fafine tausi aiga, o lē sa fuafua e ō ese ma lona aiga mai Tokyo. Sa manaʻo o ia e siitia atu i se fale fou sa lē maua ai ni mea e fesootaʻi ma tapuaʻiga faapaupau. O lea na ia faailoa atu ai i lana tane e uiga i ona manaʻoga, ma sa lagolagosua ma le lotomalie i ai o ia. Sa faailoa mai e le fafine ma le matuā fiafia lava ia te aʻu e uiga i lena mea, ae sa ia manatuaina i lena taimi lona teuina o se mea tuuteu telē sa faia i maa mora taugatā na ia faatauina auā na faapea mai e mautinoa e maua ai le fiafia i le aiga. Talu ai sa ia masalomia le iai o ni fesootaʻiga a lea mea ma tapuaʻiga sesē, na ia taʻeiina ai le mea tuuteu i le samala ma lafoaʻi.

I le vaai atu i lenei fafine ma isi o lafoaʻia ma le lotomalie a latou mea taugatā sa fesootaʻi ma tapuaʻiga sesē ma toe amataina ma le lototele se olaga fou i le auaunaga ia Ieova, sa avea o se mea sa sili ona tauia, ma faamalie loto ua oo ia te aʻu. Ou te faafetai ai e lē aunoa ia Ieova ona ua mafai ona ou olioli i le sili atu ma le 40 tausaga i le auaunaga faamisionare i Iapani.

“Vavega” i Aso Nei

Pe a ou toe tepa i tua i le sili atu i le 70 tausaga i le faiva faataimi atoa, ua ou māofa i mea ua foliga mai ia te aʻu o ni vavega i aso nei. I le avea o se talavou sa oo i ai le matamuli, sa leʻi tāitāi ona oo ia te aʻu se manatu e faapea, e mafai ona ou faaaluina loʻu olaga atoa e tausolomua ona talanoa atu i tagata e uiga i se Malo o le toʻatele o tagata e lē mananaʻo e fia faalogo e uiga i ai. Peitaʻi, e lē gata ina mafaia ona ou faia o lena mea, ae ua mafai foʻi ona ou vaaia le faitau selau po o le faitau afe foʻi o isi o faia lena lava mea. Ma ua latou faia i se auala matuā uigā lava, o lea o Molimau e sili laʻitiiti aʻe lava i le tasi le afe o ē sa iai i Iapani ina ua ou taunuu atu i le 1958, ua tupu aʻe ma ua sili atu i le 222,000 i aso nei!

Ina ua ma faatoʻā taunuu atu ma Martha i Iapani,  na tofia i maʻua ma te nonofo i le ofisa o le lālā i Tokyo. I le 1963 na fausia ai i lena lava nofoaga se fale fou o le lālā e ono ona fogafale, ma talu mai lena taimi sa ma nonofo ai lava iinā. Ia Novema 1963 sa matou iai faatasi ma le toʻa 163 o ē sa iai mo le lauga o le faapaiaga na faia e la matou ovasia o le lālā, o Lloyd Barry. E oo ane i le taimi lena ua matou ausia le 3,000 Molimau i Iapani.

O se mea sa fiafia tele ai le vaai atu i le matuā faatuputeleina o le galuega talaʻi o le Malo, ua oo i le sili atu i le 14,000 i le 1972 ina ua faamāeʻaina se lālā fou telē i le aai o Numazu. Ae e oo ane i le 1982 ua iai le sili atu i le 68,000 o ē folafola o le Malo i Iapani, ma na toe fausia ai se isi fale o le lālā e sili atu ona telē i le aai o Ebina, pe ā ma le 50 maila [80 kilomita] le mamao mai Tokyo.

I lena taimi, na toe faafouina ai le fale muamua sa iai le lālā i le ogatotonu o Tokyo. Mulimuli ane, na avea ai ma fale e nonofo ai le sili atu i le 20 misionare o ē na auauna i Iapani mo le 40, po o le 50 tausaga po o le sili atu foʻi, e aofia ai i maʻua ma laʻu paga mo le tele o tausaga, o Martha Hess. Ua nonofo ai foʻi i lo matou fale se fomaʻi ma lona toʻalua o se tamaʻitaʻi tausimaʻi. Ua la tausia i matou, i le vaaia ma le agalelei o o matou manaʻoga tau i le soifua mālōlōina. E leʻi leva tele atu, na toe faaopoopo mai i le ʻaufaigaluega se isi tamaʻitaʻi tausimaʻi, ma o tuafāfine Kerisiano e ō mai e fesoasoani i le tausia o i matou i le ao. E toʻalua sui o le aiga Peteli i Ebina e feauauaʻi ona ō mai e saunia mea taumafa ma faamamā lo matou fale. O le mea moni, ua agalelei mai Ieova ia i matou.—Salamo 34:8, 10.

Na oo mai se mea e sili ona tāua i loʻu olaga faamisionare ia Novema i le tausaga ua mavae, i le 36 tausaga talu ona mavae le faapaiaina o le fale lea ua nonofo ai nei le toʻatele o i matou ua loa ona auauna faamisionare. Ia Novema 13, 1999, sa ou iai faatasi ma le sili atu i le 4,486 e aofia ai ma le faitau selau o Molimau ua loa tausaga mai atunuu e 37 o ē na auai i le faapaiaina o fale na faatetelēina o le lālā o le Watch Tower Bible and Tract Society i Ebina i Iapani. I le taimi nei, ua iai le tusa ma le 650 i lena aiga i le lālā.

I le toetoe lava 80 tausaga talu ona amata ona ou alu atu ma le matamuli mai lea fale i lea fale e tufa atu feʻau a le Tusi Paia, ua avea ai Ieova ma fesoasoani malosi ia te aʻu. Sa ia fesoasoani ia te aʻu e foʻia loʻu matamuli. Ua ou talitonu maumauaʻi e faapea, e mafai ona faaaogā e Ieova so o se tasi o lē e tuu atu lona faatuatuaga ia te ia, e oo lava ia i latou e matuā matamumuli e pei o aʻu. Ma maʻeu se olaga faamalieina na ou maua i le talanoa atu i tagata e lē masani ai e uiga i lo matou Atua, o Ieova!

[Ata i le itulau 21]

Matou ma Tinā ma Clarence, sa asiasi mai ia i maʻua mai Peteli

[Ata i le itulau 23]

Sui o la matou vasega o loo faia a matou suʻesuʻega i le lotoā o le Aʻoga o Kiliata latalata i South Lansing, Niu Ioka

[Ata i le itulau 23]

Tauagavale: O aʻu, Martha Hess, ma tinā, i Hawaii

[Ata i le itulau 24]

Taumatau: O sui o lo matou aiga o misionare i Tokyo

[Ata i le itulau 24]

I lalo: Maʻua ma laʻu paga mo le tele o tausaga, o Martha Hess

[Ata i le itulau 25]

O fale o lo matou lālā ua faatetelēina i Ebina, na faapaiaina ia Novema i le tausaga ua mavae