O Fea e Mafai Ona E Liliu Atu i ai mo Fautuaga Lelei?

Ua avea “faalapotopotoga mo fautuaga” ma pisinisi e maua ai le faitau piliona ma piliona o tālā i le tausaga. E mananaʻo tagata i le fesoasoani. Na mātauina e se tasi e atamai i mataupu tau le mafaufau o Heinz Lehmann e faapea: “[I le olaga o tagata i aso nei] e iai faaletonu i aʻoaʻoga ma le vafealoaʻi. Ua lē toe tutusa le tāua o lotu e pei ona sa iai. Ua matuā faaitiitia foʻi le mautū o aiga . . . , ma ona o lea ua na o le vevesi o tagata.” Na faapea mai le tusitala o Eric Maisel: “O i latou na saili atu i faipelē, faifeau po o fōmaʻi mo se fesoasoani i faafitauli faalemafaufau, faaleagaga ma le faaletino ua latou vaai atu nei i tusi o loo aumaia ai fautuaga mo le atiina aʻe ina ia maua mai ai ni tali.”

NA FAATUINA e le Faalapotopotoga o Fomaʻi o le Mafaufau i Amerika (American Psychological Association) se vaega suʻesuʻe latou te sailiilia lenei faalapotopotoga lauolaola. Na faapea mai lenei vaega e ui o loo iai se “avanoa telē ina ia fesoasoani i tagata taʻitoʻatasi ia latou malamalama ia i latou lava ma isi . . . , o faaupuga ma ulutala o loo faaauilumaina nei polokalame ua matuā faatuputupulaʻia le faateleina atu o faamatalaga na i lo le tulaga moni o loo iai.” Na faapea mai se tusitala i le Toronto Star: “Ia faaeteete i le tele o faiga taufaasesē e faapea o faiga faaleagaga ma faalelotu. . . . Ia faaeteete aemaise lava i tusi e aumaia ai fautuaga, o lipine po o seminā o loo soona ofo mai ai le anoanoaʻi o fautuaga mo sina taimi puupuu lava, ma sina taumafaiga po o le pulea totino.” E mautinoa, e matuā toʻatele lava i latou o loo saili moni e lagolago i ē o loo manaʻomia le fesoasoani. Peitaʻi, o le mea moni o loo tupu e faanoanoa ai ona o nisi o tagata lē faamaoni o loo faaaogāina le tuua toʻatasi ma mafatiaga o loo fesagaʻi ma tagata ina ia maua ai ni a latou mea, ma e leai se fesoasoani po o se vaifofō moni o loo ofoina atu.

I le mātau atu i lenei mea, o le ā se puna autū o fesoasoani e mafai ona tatou faatuatuaina? O fea e mafai ona tatou maua ai fautuaga aogā o le a faaauau pea ona aogā?

Puna o le Taʻitaʻiga e Tumau

Na taʻua e le faifeau Amerika o le senituri lona 19 o Henry Ward Beecher o faapea: “O le Tusi Paia o le faafanua a le Atua e faafoe ai oe, ia taofia ai oe mai le tutaʻia i le taʻele o le sami, ma e faasino atu ai ia te oe le mea o iai le taulaga, ma le auala e te oo ai iinā e aunoa ma le oso i luga o maa ma papa.” Na faapea mai se tasi tamāloa e uiga i le Tusi Paia: “E leai ma se tasi e oo i le tulaga na te lē toe manaʻomia ai le Tusi Paia; e faalauteleina pea ma faalolotoina lo tatou malamalamaga i le tusi a o faagasolo o tatou olaga.” Aiseā e ao ai ona e matuā manatunatu i lenei puna?

I le faailoaina atu o ia lava, ua faapea mai ai le Tusi Paia: “O tusi paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.” (2 Timoteo 3:16, 17) O mea o loo iai i le Tusi Paia e tupuga mai le Puna o le ola, o Ieova le Atua. (Salamo 36:9) Ona o lea,  e matuā iloa lava e ia le mea na faia mai ai i tatou, e pei ona faamanatu mai e le Salamo 103:14 ia i tatou e faapea: “Ua silafia lava e ia le mea na fai aʻi i tatou; ua manatu ia o le efuefu lava i tatou.” O lea la, e mafai ona ia i tatou le mautinoa atoatoa i le tāua o le Tusi Paia.

O le mea moni, o loo iai i le Tusi Paia le anoanoaʻi o mataupu silisili ma taʻiala e mafai ona faatatauina ma le aogā i so o se tulaga lava e te ono oo i ai. E ala mai le Tusi Paia ua fetalai mai ai le Atua ia i tatou e faapea: “O le ala lava lenei, ia outou savavali ai.” (Isaia 30:21) Pe mafai e le Tusi Paia ona faamalieina manaʻoga o tagata taʻitoʻatasi i aso nei? Seʻi o tatou vaai.

E Faamalieina e le Tusi Paia o Tatou Manaʻoga . . .

I le Feagai ai ma Popolega. Ua taʻu mai ia i tatou e le Tusi Paia e faapea: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:6, 7) Pe ua faamaonia ea le aogā o le tatalo i le feagai ai ma popolega tau i faalogona e fesootaʻi atu i faigatā tau le tamaoaiga, faaleagaina faaleituaiga ma faamatalaga faatiga, po o le maliu o se tasi e pele? Seʻi manatu i mea na tutupu o loo mulimuli mai.

Na faapea mai Jackie ina ua ia iloa e uiga i le faaleagaina i faiga faaleituaiga o lana tama teine: “E lē mafai e upu ona faamatalaina faalogona o le nofosala i le leai o se malosi e puipuia ai le tama a se tasi. Sa ao ona ou tau faasaga i faalogona o le tiga matuitui, ita faamoemoe, ma le matauʻa. Na amata ona faaleagaina e nei faalogona loʻu olaga. Sa ou manaʻomia vave lava le fesoasoani a Ieova ina ia leoleo i loʻu loto.” Ina ua māeʻa ona faitauina ma toe faitau le Filipi 4:6, 7, ona ia galue mamafa loa lea e faatatau lana fautuaga. “Ou te tatalo i aso uma, i le talosaga pea lava pea ina ia ou lē faatagaina le lofitūina o aʻu lava e faalogona lē lelei, ma na fesoasoani mai Ieova ia te aʻu ina ia ati aʻe se loto e toʻafilemu ma fiafia. Ou te lagonaina moni lava le filemu i totonu ia te aʻu,” na faapea mai ai Jackie.

E te ono oo foʻi oe i se tulaga ua lē mafai ai e lou tomai ona pulea pe foʻia, ma e aumaia faatasi e lena mea popolega tau i faalogona. E ala i le mulimuli i le timaʻiga a le Tusi Paia ina ia tatalo, e mafai ai ona e faafetaiaʻia ma le manuia. Na faalaeiau mai le faisalamo ia i tatou i upu nei: “Ia e tuuina atu lou ala ia Ieova, ma faatuatua ia te ia, ona faia lava lea e ia.”—Salamo 37:5.

Mo Faalaeiauga. Na faia e le faisalamo lenei faaupuga ona o lona talisapaia: “Ieova e, ou te fiafia i le mea e tu ai lou maota, o le mea foi e afio ai lou mamalu. Ua tu oʻu vae i le mea laugatasi; ou te faamanu atu ia Ieova i totonu o faapotopotoga.” (Salamo 26:8, 12) Ua faalaeiauina i tatou i le Tusi Paia ina ia faapotopoto faatasi e lē aunoa e tapuaʻi ia Ieova. E faapefea ona faamalieina e lenei faatasitasiga ou manaʻoga? O le ā na mauaina mai e isi?

Na faapea mai Becky: “E lē auauna oʻu mātua ia Ieova, la te tetee mai la ia te aʻu pe a ou taumafai e fai so o se mea e fesootaʻi atu ma le auaunaga i le Atua. E matuā telē se taumafaiga ou te faia ina ia auai ai i sauniga.” Na lagona e Becky faapea e tele faamanuiaga ua oo atu ia te ia ona sa ia faamalosia o ia lava ina ia auai i sauniga faa-Kerisiano e lē aunoa. “E faamalosia e sauniga loʻu faatuatua, ina ia mafai ona ou tetee atu i omiga i le avea ai o se teine aʻoga, se afafine, ma o se auauna a Ieova. E matuā ese lava tagata i le Maota o le Malo mai tamaiti i le aʻoga! Latou te manatu mamafa ma fesoasoani, ma o a matou talanoaga e masani lava ona faalaeiau ai. O i latou o ni uō moni.”

Ioe, e ala i le mulimuli i le taʻitaʻiga a le Tusi Paia ina ia faapotopoto faatasi e lē aunoa, e mafai ai e Ieova ona faamalieina o tatou manaʻoga mo ni faalaeiauga. O iinā tatou te molimauina ai le moni o upu a le faisalamo e faapea: “O le Atua, o lo tatou malu ia ma lo tatou malosi; e fai o ia ma fesoasoani silisili i puapuaga.”—Salamo 46:1.

Mo Galuega Faamalieina ma Aogā. Ua fautua mai le Tusi Paia e faapea: “Ia outou tumau, ma le le faagaeetia, ia alualu lo outou faamalosi i le galuega a le Alii ma le le aunoa, ina ua outou iloa e le se mea faaleaoga lo outou tautiga i le Alii.” (1 Korinito 15:58)  Pe e faamalieina moni ai ea “i le galuega a le Alii”? Pe e faataunuuina ea e le faiva faa-Kerisiano se mea e tāua?

Na faamatala mai e Amelia ona lagona e faapea: “Sa ou suʻesuʻeina le Tusi Paia ma se ulugalii sa tauāu ina teteʻa. Sa ou fesoasoani foʻi i se fafine o lē na fasiotia lana tama teine i se faiga sauā tele. Na puapuagatia le fafine i le lē mautonu i le tulaga o le tagata oti. I nei mea e lua na tutupu, o le faatatauina o mataupu silisili o le Tusi Paia na aumaia ai le filemu ma le faamoemoe i o latou olaga. Ou te lagonaina le matuā olioli ma le faamalieina auā ua fai saʻu vaega e fesoasoani ai ia i latou.” Na faapea mai Scott: “Afai e iai se mea lelei na tupu ia te oe i le faiva i le fanua, po ua amata se suʻesuʻega faale-Tusi Paia fou, po o maua sina taulau manuia i le molimau lē fuafuaina, o le a e talanoa e uiga i na mea i tausaga o loo sau. O faalogona ma le fiafia lava foʻi lena e toe faamanatu mai e taimi uma e talanoaina ai! O le faiva e maua mai ai le olioli silisili ma tumau.”

E manino mai, o le faatatauina o le taʻitaʻiga a le Tusi Paia ina ia avea o ni faifeau tiotio ua faamalie ai le manaʻoga o nei tagata taʻitoʻatasi mo se galuega faamalieina ma le tāua. E valaaulia foʻi oe ina ia auai i lenei galuega o le aʻoaʻoina o isi e faatatau i ala ma mataupu silisili a le Atua, i le taimi e tasi, e te maua ai foʻi aogā.—Isaia 48:17; Mataio 28:19, 20.

Maua Aogā Mai le Afioga a le Atua

E mautinoa, o le Tusi Paia o le puna maufaatuatuaina lea o taʻitaʻiga aogā i le lalolagi i aso nei. Ina ia maua mai ai aogā, e manaʻomia ona tatou faia ni taumafaiga talafeagai. E tatau ona tatou faitau i ai, suʻesuʻe i ai, ma mafaufau loloto i ai e lē aunoa. Na timaʻi mai Paulo e faapea: “Ia e mafaufau i ia mea, ia e faamasani ai; ina ia iloa ai e tagata uma lou alualu i luma.” (1 Timoteo 4:15, LF; Teuteronome 11:18-21) Ua faamautinoa mai e le Atua faapea afai e te galue e faatatauina ana fautuaga o loo maua i le Tusi Paia, o le a e taulau manuia. Na ia folafola mai e faapea: “Ia e faatuatua ia Ieova . . . Ia e manatua o ia i ou ala uma, ona faatonuina ai lea e ia lava ou ala.”—Faataoto 3:5, 6.

[Ata i le itulau 31]

O le mulimuli i fautuaga a le Tusi Paia e faamalieina ai le olaga