Lipoti a Ē Faalauiloa le Malo

Oo Ina Iloaina le Atua Alofa

I LE 16 o tausaga o se tamāloa Pasili e igoa ia Atonio, na oo ai ia te ia ni faalogona lē mautinoa e uiga i le olaga. O faalogona lē mautinoa na taʻitaʻi atu ai o ia i le faaaogāsesēina o fuālaau faasāina ma le ava malosi. Sa mafaufau pea o ia e uiga i le pule i lona ola. O taimi na sa ia manatua ai mea na taʻu atu e lona tinā ia te ia e faapea: “O le Atua, o le alofa lava ia.” (1 Ioane 4:8) Ae o fea o iai lenei Atua alofa?

I lona taumafai ina ia manumalo mai lona faaaogāsesēina o mea e pei o fuālaau faasāina ma le ava malosi, na sāʻili ai e Atonio se fesoasoani mai le patele a le aai. E ui lava sa oo ina matuā toaga ia Atonio i le Lotu Katoliko, ae sa iai pea le tele o ana fesili. Mo se faaaʻoaʻoga, o fetalaiga a Iesu, “E iloa foi e outou le mea moni, e tuu saʻoloto foi outou e le upu moni” sa faanenefu pea ia te ia. (Ioane 8:32) O le ā le ituaiga o saʻolotoga na folafola mai e Iesu? Sa lē mafai e le lotu ona saunia mai ni tali faamalie loto i ana fesili. Mulimuli ane, na tafetafea mālie ese atu lava Atonio ma toe foʻi i lana uluaʻi masaniga. O le mea moni, na oo ina matuā leaga lava lana masani.

Ae i le taimi lea, na amata ai e le avā a Atonio, o Maria, ona suʻesuʻe le Tusi Paia ma Molimau a Ieova. Sa leʻi teena e Atonio le suʻesuʻega a lana avā, ae sa le manatu mamafa o ia e uiga i Molimau i le manatu e faapea “o se lotu mai Amerika o loo auauna mo le lelei o le faiga malo a Amerika.”

E aunoa ma le faavaivaia, sa faataatitia solo ai e Maria i le fale ia kopi o mekasini o Le Olomatamata ma le Ala Mai! o loo faatomua mai ai mataupu na te manatu atonu e fiafia i ai Atonio. Talu ai e fiafia tele Atonio e faitau, sa ia vaai faatopetope ai i mekasini i se isi taimi pe a lē iai lona toʻalua iinā. Mo le uluaʻi taimi i lona olaga, sa ia maua ai tali i ana fesili faale-Tusi Paia. E na te manatua foʻi e faapea: “Sa ou mātauina le alofa ma le agalelei na faaalia mai e laʻu avā ma Molimau ia te aʻu.”

E oo ane i le taulotoaʻiga o le 1992, na filifili ai Atonio e faapea ua manaʻo foʻi o ia e suʻesuʻe le Tusi Paia ma Molimau a Ieova. Ae peitaʻi, sa faaauau pea ona ia faaaogāsesēina ia fualaau faasāina ma le inu tele i le ava malosi. I le leva o le tasi po a o la foʻi mai ma lana uō mai se tasi aai, na taofia ai i laʻua e leoleo. Ina ua maua e leoleo ni cocaine ia Atonio, sa latou sasaina o ia. Na ato o ia e le tasi leoleo i le palapala ma tuu atu le gutu o le fana e faalatalata i ona foliga. Na alaga atu le isi leoleo, “Se fasioti loa.”

A o taoto Atonio i le palapala, sa ia toe manatua lona olaga. E na o le pau lava le mea lelei sa mafai ona ia manatua, o lona aiga ma Ieova. Sa faia sana tatalo puupuu, ma ʻaiʻoi atu ia Ieova mo se fesoasoani. Na teʻi lava ua ō ese leoleo ae tuua o ia. Sa alu o ia i le aiga ma le talitonu o Ieova na puipuia o ia.

Sa amata ona suʻesuʻe e Atonio le Tusi Paia ma le maelega faafouina. Sa faifailēmū lava ona faia suiga i lona olaga ina ia faafiafia ai Ieova. (Efeso 4:22-24) E ala i le atiina aʻe o le pulea tōtino, sa amata loa ona ia tauivi ma ona faafitauli tau i fuālaau faasāina. Ae ui i lea, sa oo lava foʻi ina ia manaʻomia se fesoasoani faafomaʻi. I le lua masina na iai i le nofoaga e togafitia ai tagata sa oo i tulaga faapena, na ia maua ai le avanoa e faitau ai nisi o lomiga faale-Tusi Paia, e aofia ai le tusi, o Le Poto e Taʻitaʻia ai i le Ola e Faavavau. Sa tufa atu e Atonio i isi tagata mamaʻi mea na ia aʻoaʻoina mai nei tusi.

Ina ua teʻa i tua Atonio mai le falemaʻi, sa faaauau pea ona ia suʻesuʻeina le Tusi Paia ma Molimau. I aso nei, ua auauna faatasi ai Atonio, Maria, la laʻua fanau teine e toʻalua ma le tinā o Atonio ia Ieova o se aiga fiafia ma le autasi. Fai mai Atonio: “Ua ou malamalama nei i le uiga moni o upu ‘o le Atua o le alofa lava ia.’”

[Ata i le itulau 8]

Talaʻiga i Rio de Janeiro