Aiseā e Ao ai Ona Foʻia le Manaʻo ia Lelei Atoatoa Mea Uma?

Po o masani ona e tauivi e faia le mea e sili ona lelei e te mafai? E mautinoa, o lou faia faapea e tele ina e maua ai aogā mo oe faapea i latou o loo tou feutagaʻi. Peitaʻi, e iai nisi ua latou soona faamamafa foʻi le faatinoina o mea, ma ua avea ai o nisi e mananaʻo ia lelei atoatoa mea uma. O le ā e faaalia mai i lena uiga?

O SE tasi o uiga o le faaupuga “manaʻo ia lelei atoatoa mea uma” o “se mafaufauga lea faapea e lē tatau ona iai se mea e masepu lona faatinoina.” Atonu ua e fetaiaʻi ma tagata e iai lena mafaufauga. E mafai ona e iloa, o le tele naʻuā o mea latou te faatalitalia mai isi e mafai ona faapogaia ai faafitauli e tele, e tupu aʻe ai ni lagona o le lē faamalieina ma le lotovaivai. O le toʻatele o tagata e paleni o latou mafaufau latou te ioe, o le manaʻo ia lelei atoatoa mea uma e ala i le soona faatalitalia ma le lē talafeagai o mea i vala uma o le olaga, o se uiga e lē logoleleia moni. O se uiga e manaʻomia ona foʻia. Peitaʻi, o le faafitauli lea e iai, pe a tuu mai i o tatou lava uiga po o mafaufauga, atonu e faigatā ai ona mātauina o loo iai se faanaunauga mo lena manaʻo ia lelei atoatoa mea uma, o lea la ua avea ai o se luʻi e tatau ona foʻia.

O Nelesoni, e tele naʻuā ni ona tiute tauave ma tele foʻi ona faafitauli o loo tau foʻia. Mai lea taimi i lea taimi, na te iloilo totoʻa ai fuainumera faamaumau, ma e sili ona ia faatāua oloa e mafai ona gaosiaina. E masani ona ia te ia le manatu faapea, o le manaʻo ia lelei atoatoa mea uma o se uiga e matuā talafeagai mo le taulau manuia i le tulaga faatautavā o loo iai i galuega. E ui ina iai nisi latou te talisapaia le galue māeʻaeʻa o Nelesoni, ae ua avea lona manaʻo ia lelei atoatoa mea uma ma pogai o faafitauli i lona soifua mālōlōina, e pei o le ulu tigā ma faalogona mafatia. Faamata o pei ou uiga o Nelesoni?

Ua aafia foʻi talavou i le uiga o le manaʻo ia lelei atoatoa mea uma. A o laitiiti Rita, o se teine mai Rio de Janeiro, sa fiafia e alu i le aʻoga. Sa ia taumafai e lē aliali atu ona faanaunauga maualuluga sa iai, peitaʻi o le mea moni lava, sa matuā leaga faia ona faalogona pe a lē sili ona togi i le aʻoga. Ua faapea mai Rita: “Mai lava i loʻu teineitiiti, sa ou faatusatusa atu ai aʻu i isi o ē na tele o latou taimi, ae o aʻu e tele lava ina ou mafatia ma faatatope loʻu faia o mea uma. Sa lē taitai ia te aʻu se lagona faapea e iai se taimi ou te mālōlō ai auā sa iai lava mea na tatau ona fai i taimi uma.”

 A o teineitiiti Maria, sa masani ona tagi i le ita pe a lē mafai ona ia tusia lelei se ata e pei ona mafai e isi. E lē gata i lea, i ana sailiiliga ina ia matuā lelei atoatoa lona tomai tau musika, sa masani lava ona mafatia ona lagona ma popole na i lo le fiafia i lona tāina o musika pe pese foʻi. O le isi teine Pasili, o Tania le igoa, o lē na taumafai ma le faaeteete e ʻalofia le agaga faatavā, na ia taʻutino mai, ae i lena lava taimi sa ia faataatitia pea ni tapulaa na matuā maualuluga lava mo ia, e lē gata i le aʻoga ae i le aiga foʻi. Sa ia te ia le lagona, seʻi vaganā lava ua lelei atoatoa ana galuega, ona faatoʻā fiafia tele atu lea o tagata ia te ia. E lē gata i lea, e iai taimi sa faatalitalia ai e Tania ni mea se tele mai isi tagata, lea na avea ma pogai o ona lagona ita ma faanoanoa.

E ui ina tāua le iai o le agavaa, le filigā, ma se uiga o le faamalieina totino, peitaʻi o faalogona sesē, e pei o le fefe neʻi lē taulau, e ono iʻu i ai ona o le faatutū o sini e lē faigofie ona ausia. E ono faatutū e mātua ma isi ni tapulaa ina ia matuā lelei atoatoa iʻuga o aʻoga pe i taaloga, ae o na tapulaa e matuā faigatā lava i talavou ona ausia. Mo se faaaʻoaʻoga, sa maualuluga iʻuga na faatalitalia e le tinā o Riko mo ia, sa manaʻo lona tinā ia avea o ia ma fomaʻi, ia tātā piano, ma ia tele ni gagana e mafai ona ia tautala ai. Pe mafai ea ona e mātau mai, o le soona faamamafa o nei faanaunauga, e mafai ona iʻu ai i faafitauli po o lagona tigā?

Aiseā e Alofia ai le Manaʻo ia Lelei Atoatoa Mea Uma?

O loo manaʻomia tele le galue ina ia matilatila ni iʻuga e maua, le ausiaina o tapulaa maualuluga o le saʻo aʻiaʻi ma le matuā silisili ona lelei. O lea e tatau ai i tagata ona tauvā i le sailia o galuega. O le isi vala o loo pogai ai ona tauivi le toʻatele e galulue malosi o le fefefe lea neʻi mamulu atu se galuega o loo maua ai mea mo le tausiga o le olaga. O nisi tagata faigaluega ua pei o le tagata afeleti o lē matuā tetele ni faataulaga na te faia ina ia mafai ona ia faatū se matātiʻa fou. O lea, pe a faigatā se tausinioga o sauni atu i ai, e ono uunaʻia ai o ia e matuā toe tauivi atili, pe atonu ia faaaogāina ni vailaau e faaleleia atili ai lona malosi ma—e iai lona faamoemoe—ia manumalo. Na i lo se uunaʻiga aogā e faia le mea e silisili ona lelei e mafai, ae ua avea le manaʻo ia lelei atoatoa mea uma, ua faapogaia ai le oo i tagata o le “fefe neʻi lē taulau” pe “uunaʻia ai foʻi ia avea ma tagata e numera tasi.”—The Feeling Good Handbook.

E ioeina, o nisi ua lagona faapea o mea latou te ono faia i tomai i matātā eseese pe i taaloga e mafai lava ona faaleleia i taimi uma. E ui i lea, e tusa ai o se manatu o Dr. Robert S. Eliot, “o le manaʻo ia lelei atoatoa mea uma, o se faanaunauga e lē taitai mafai ona ausia.” Ua ia toe faapea mai: “O se uiga o loo iai faatasi ma lagona nofosala, le taumafai e tetee atu i ni faitioga, ma le matamuli ina neʻi faifaia.” Maʻeu la le moni o upu a le tupu poto o Solomona: “Ona ou manatunatu lea i galuega tiga uma, ma galuega manuia uma; a ua matauaina le tagata ona o lea mea e lē la te tuaoi. O le mea faatauvaa foʻi lea, ma le ʻai i le matagi.”—Failauga 4:4.

O le ā e mafai ona e faia pe afai ua e tau mātele atu i lena uiga? Pe moni ea, o le atili fosi o au taumafaiga, o le atili foʻi lea ona e tigāina ai? Pe e te manaʻo ea ia e lē soona tagisā ae ia e faatoʻatoʻa lelei? O le ā le uiga o le manatu, ia lelei atoatoa? Pe e te lē o faanaunau ea ina ia faaaogā atoatoa ou tomai a o loo e alofia le manaʻo ia lelei atoatoa mea uma? Pe afai e mafai e tagata lē lelei atoatoa ona faaaogā o latou tomai mai le Atua e saili ai mea mo le lelei o isi, seʻi faaāta la i le mafaufau mea e mafai e tagata ona ausia i lalo o tulaga lelei atoatoa ma le taʻitaʻiga tauatua!

[Ata i le itulau 4]

E ono mananaʻo mātua po o isi ia lelei atoatoa le faia o mea uma, ae mea ane e lē mafai e talavou ona ausia lena itu