Fesili Mai le ʻAufaitau

Pe e talia e Molimau a Ieova so o se vailaau faafomaʻi o faaaogā ai le toto?

O le tali faavae lava e lē talia e Molimau a Ieova le toto. E matou te talitonu maumauaʻi o le tulafono a le Atua e faatatau i le toto, e lē tatau ona suia ina ia faafetaui atu i manatu fesuisuiaʻi. Ae peitaʻi, ua mapuna aʻe ni finauga fou ona ua mafai nei e saienitisi ona vaevaeina le toto i ni vaega autū se fā ma ni vaega ninii o na vaega autū. I le faia o se filifiliga pe talia na vaega, e ao i se Kerisiano ona vaavaai i tala atu o aogā o togafitiga faafomaʻi e mafai ona maua, faapea ma lamatiaga. E tatau ona popole o ia i le mea o loo fai mai ai le Tusi Paia faapea ma ni aafiaga o lana faiā ma le Atua e Ona le Malosi Uma Lava.

O mataupu autū o loo talanoaina, e matuā faigofie lava. Ina ia fesoasoani e iloa ai le pogai ua faigofie ai, e ao ona iloiloina ni faamatalaga auʻiliʻili faale-Tusi Paia, faatalafaasolopito, ma le faafomaʻi.

Na taʻu atu e Ieova le Atua i lo tatou augātamā o Noa e tatau ona manatu i le toto o se mea e faapitoa. (Kenese 9:3, 4) Mulimuli ane, o le tulafono a le Atua na tuuina atu ia Isaraelu na atagia atu ai le paia o le toto: “Ai se tagata foi o sa Isaraelū, po o so se tagata ese . . . na te ʻaina sina toto lava; ou te fai moʻu fili lea tagata na te ʻaina le toto.” Ona o le teena o le tulafono a le Atua, e ono mafai ai e se tagata Isaraelu ona pisia ai ma isi, o lea na fetalai atili mai ai le Atua: “Ou [te] vavae ese ia te ia i lona nuu.” (Levitiko 17:10) Mulimuli ane, i se fonotaga na faia i Ierusalema, na poloaʻi mai ai le au aposetolo ma toeaina e tatau ona tatou ‘faamamao ma le toto.’ O le faia faapea, e tutusa lava lona tāua ma le faamamao mai feusuaʻiga lē mamā ma le ifo i tupua.—Galuega 15:28, 29.

O le ā e uiga i ai le ‘faamamao’ i tuā iinā? Sa leʻi ʻaina e Kerisiano le toto e tusa lava pe fou po ua toʻa; e latou te leʻi ʻaina foʻi se aano o se manu e leʻi faaalueseina le toto. E lē tatau foʻi ona faaaogāina ni meaʻai na faafefiloi ma le toto, e pei o sosisi e faia i le toto. O le faaaogāina o le toto i so o se auala lava faapena, o le a solia ai le tulafono a le Atua.—1 Samuelu 14:32, 33.

Sa lē popole le toʻatele o tagata i aso anamua i le ʻaina o le toto, e pei ona tatou iloa mai tusitusiga a Tetuliano (o lona lua ma lona tolu o senituri T.A.). I le tali atu i tuuaʻiga sesē faapea na faaaogāina e Kerisiano le toto, na taʻua ai e Tetuliano ni ituaiga o tagata sa latou faamauina ni maliega e ala i le tofoina o le toto. Sa ia mātauina foʻi e faapea “pe a faia se faafiafiaga i se malae mataaga, [o nisi] sa lagona le matuā fia feinu i le toto, sa latou talitalia le toto sa tafe mai i le tino o le tagata o loo faasalaina . . . e fai ma vaifofō o o latou maʻi māliu.”

O na faiga (e tusa lava pe na faia e nisi tagata o Roma ona o ni mafuaaga tau i le soifua mālōlōina) sa sesē lava mo Kerisiano. Na tusia e Tetuliano e faapea: “E matou te lē faaaofia ai foʻi le toto o ni manu i a matou taumafa masani. Sa faaaogā e tagata Roma meaʻai e iai le toto e fai ma tofo o le faamaoni o Kerisiano moni. Na faaopoopo mai Tetuliano: “Ou te fesili atu nei la ia te outou, o le ā le ituaiga o lea mea faapea, afai e te talitonu maumauaʻi o le a liliu ese ma le ʻinoʻino [Kerisiano] mai le toto o manu, o le a e manatu ai la ia i latou e faapea, o loo mananaʻo i le toto o tagata?”

I aso nei, e toʻaitiiti lava ni tagata o le a manatu faapea, ua aafia tulafono a le Atua e Ona le Malosi Uma Lava pe afai e fautuaina e se fomaʻi le tuiina o le toto. Ona e mautinoa o loo mananaʻo Molimau a Ieova ina ia ola pea, ua tatou maumauaʻi ai e usiusitai i le tulafono a Ieova e faatatau i le toto. O le ā le uiga o lenei mea e tusa ai ma faiga faafomaʻi i aso nei?

A o avea ma tu masani le tuiina o le toto atoa ina ua mavae le Taua Lona Lua a le Lalolagi, sa iloa ai e Molimau a Ieova le feteenaʻi o lenei mea ma le tulafono a le Atua—ma o loo tumau pea ona tatou talitonu i lena mea. Ae peitaʻi, i le faagasologa o taimi, ua suia togafitiga faafomaʻi. I aso nei, ua lē o toe faaaogāina e le tele o tuiga toto le toto atoa ae o se tasi o ona vaega autū: (1) sela mūmū; (2) sela papaʻe; (3) platelets; (4) plasma (serum), le vaega faasuavaia. E faalagolago i le tulaga o le tagata maʻi, atonu e fautuaina ai e fomaʻi le tuiina atu i ai o sela mūmū, sela papaʻe, platelets, po o plasma. O le tuiina o nei vaega autū o le toto, ua mafai ai ona vaevaeina se paina (lita) toto se tasi i le toʻatele o maʻi. E manatu Molimau a Ieova e faapea, o le taliaina o le toto atoa po o se vaega o na vaega autū e fā o le toto, ua solia ai le tulafono a le Atua. E manino lava, o le tausisia o lenei tulaga e faavae i le Tusi Paia ua puipuia ai i latou mai le tele o lamatiaga, e aofia ai faamaʻi e pei o le ate fefete ma le AIDS, lea e mafai ona pipisi mai e ala i le toto.

Ae peitaʻi, talu ai e mafai ona faagasolo le vaevaeina o le toto e sili atu i na mea autū, ua mapuna aʻe ai ni fesili e uiga i vaega ninii e maua mai i vaega autū o le toto.  E faapefea ona faaaogāina na vaega ninii, ma o le ā e ao i se Kerisiano ona manatunatu i ai i le filifilia o na mea?

O le toto e lavelave. E oo lava i le plasma—lea e 90 pasene o le vai—e tauaveina le tele o homone (hormones), le masima, o porotini eseese (enzymes), ma niuturiane (nutrients), e aofia ai minerale ma le suka. E tauaveina foʻi e le vaega faasuavaia o le toto (plasma) polotini e pei o le albumin, ma mea e pogai ai ona toʻa le toto pe a lavea, ma vailaau (antibodies) e tetee atu ai i faamaʻi. E tuueseeseina e tagata popoto faapitoa ma faaaogā le tele o polotini mai plasma. Mo se faaaʻoaʻoga, o vaega o le toto e mafai ai ona toʻa le toto (clotting factor VIII), ua tuiina atu ia i latou ua lē mafai ona toʻa le tafe o le toto. Pe afai foʻi ua maua se tasi i nisi o faamaʻi patino, atonu o le a fautuaina e fomaʻi le tuiina o gamma globulin (immunoglobulin) ua aveesea mai le plasma o le toto o tagata ua uma ona puipuia o latou toto. O isi polotini faasuavai o le toto, ua faaaogāina faafomaʻi, ae o le faiga lea o loo taʻua i luga ua faataʻitaʻia mai ai le auala e ono faagasolo ai se vaega autū (plasma) o le toto ina ia maua ai vaega ninii. *

E pei lava ona avea le plasma o le toto ma pogai o vaega eseese, e mafai la ona vaevaeina isi vaega autū o le toto (o sela mūmū, sela papaʻe, o platelets) ina ia maua ai vaega ninii. Mo se faaaʻoaʻoga, e mafai ona avea ia sela papaʻe ma puna o polotini (inteferons ma interleukins), ma faaaogāina e togafitia ai nisi o faamaʻi pipisi e māfua i vairusi ma maʻi o le kanesa. E mafai ona vaevaeina ia platelets ina ia aveesea ai vaega e mafai ona pē ai le manuʻa. E iai foʻi isi vailaau ua gaosia (atonu e na o le amatamataga) ua mafai ona aveesea mai vaega autū o le toto e lē o le tuiina o na vaega autū; ae tele lava ina aafia ai ni vaega o na vaega ninii. Pe tatau i Kerisiano ona talia nei vaega ninii i togafitiga faafomaʻi? E lē mafai ona matou fai atua se tali. E lē o aumaia i le Tusi Paia ni faamatalaga auʻiliʻili, o lea e tatau ai i se Kerisiano ona faia lana lava faaiʻuga e tusa ai ma lona lotofuatiaifo i le silafaga a le Atua.

O le a teena e nisi so o se mea e faia mai i le toto (e oo lava i vaega ninii ua fuafuaina e saunia ai se puipuiga mo sina taimi puupuu). O le auala lena o loo latou malamalama ai i le poloaʻiga a le Atua ina ia ‘faamamao mai le toto.’ Ua latou manatu e faapea o lana tulafono ia Isaraelu e manaʻomia ai ona ‘sasaaina i le eleele’ le toto lea ua aveesea mai se meaola.’ (Teuteronome 12:22-24) Aiseā e matuā tāua ai lena mea? Ia, ina ia sauniunia paluga faasuavaia o gamma globulin, o mea e faaaogā ina ia toʻa ai le toto, ma isi mea faapena, e manaʻomia ai ona aumaia le toto ma faamamāina. Ae peitaʻi, e teena lava e nisi Kerisiano na faiga, e pei lava ona latou teena ia le tuiina saʻo o le toto po o ona vaega autū e fā. E tatau ona faaalia le faaaloalo i la latou filifiliga ua faia ma le faamaoni e tusa ma o latou lava lotofuatiaifo.

E ese foʻi filifiliga a isi Kerisiano. E latou te teena foʻi le tuiina saʻo o le toto atoa, sela mūmū, sela papaʻe, platelets, po o plasma. Peitaʻi, atonu e latou te faatagaina se fomaʻi e togafitia i latou mai se vaega laitiiti na aveesea mai vaega autū. E oo lava i lenei mea, e ono iai foʻi ni feeseeseaʻiga. Atonu e talia e se tasi Kerisiano le tuiina o le gamma globulin, ae atonu e na te talia pe lē talia foʻi se tui e iai se mea na aveesea mai sela mūmū po o sela papaʻe. I nei mea uma lava la, o le ā e ono taʻitaʻiina ai nisi Kerisiano e faia se faaiʻuga e faapea, e mafai ona latou talia ni vaega ninii o le toto?

 I le “Fesili Mai le ʻAufaitau” i le Watchtower o Iuni 1, 1990, na mātauina ai e faapea, o loo faagasolo atu vaega ninii mai porotini o le plasma o le toto o se fafine e maʻitaga i le toto o lana pepe o loo tuputupu aʻe i totonu o lona manava. I lea faiga, ua tuufaasolo atu ai e se tinā i lana tama ia immunoglobulins, ma saunia ai se faiga tāua e puipuia ai. A o nofo ese le pepe mai le tinā, e faaauau pea e sela mūmū la latou faataamilosaga masani o le olaga, e faagaoioia ai i le taimi lea le vaega lea o loo tauaveina ai le okesene. O se vaega matuā tāua o lea mea ua oo ina avea ma suāvai samasama (bilirubin), lea e ui atu i le fanua o le pepe i le tinā ma lafoaʻia faatasi ai ma otaota o le tino o le tinā. Atonu e manatu nisi Kerisiano e faapea, talu ai o vaega ninii o le toto e mafai ona tuufaasolo atu i se isi tagata i lenei faatulagaga masani, e mafai la ona latou talia se vaega laitiiti o le toto ia e maua mai sela mūmū.

Po ona o le mea moni e faapea talu ai e eseese manatu ma filifiliga e faavae i le lotofuatiaifo, o lea la e faalētāua ai lenei mataupu? E leai. E matuā tāua lava. Peitaʻi, e iai se tulaga faavae faigofie. Ua faaalia i le mataupu o i luga e faapea, e teena uma e Molimau a Ieova le tuiina saʻo o le toto atoa, faapea ma ona vaega autū. Ua faatonuina e le Tusi Paia Kerisiano ina ia ‘faamamao i latou mai i mea e fasia mo tupua, ma le toto, ma mea titina, ma le faitaaga.’ (Galuega 15:29) E lē gata i lea, pe a oo i le filifilia o ni vaega ninii mai vaega autū o le toto, e tatau i Kerisiano taʻitoʻatasi ona faia sana lava faaiʻuga ma le faaeteete pe a uma ona mafaufau loloto i lenei mea faatasi ma le tatalo.

E toʻatele tagata o le a lotomalilie e talia so o se togafitiga e foliga mai e maua vave ai ni aogā, e oo lava i se togafitiga ua iloa e lamatia ai e pei o lea e faaaogā ai ia vaega o le toto. O le Kerisiano faamaoni e taumafai e maua se vaaiga lautele ma sili atu ona paleni lea e aofia ai ni mea e sili atu na i lo o na o vala faaletino. E talisapaia e Molimau a Ieova taumafaiga ina ia maua ni tausiga lelei faafomaʻi, ma e latou te manatunatu ma le faaeteete i lamatiaga ma aogā o so o se togafitiga. Ae peitaʻi, pe a oo loa i mea e faia mai i le toto, e latou te faatāuaina faapitoa lava le mea o fetalai mai ai le Atua ma la latou lava faiā totino ma lo tatou Foai Ola.—Salamo 36:9.

Maʻeu se faamanuiaga mo se Kerisiano o le iai lea o lea ituaiga o mautinoa e pei o le faisalamo, o lē na tusia e faapea: “Auā o Ieova le Atua o le la lava ia ma le talita; e foaiina mai e Ieova le alofa tunoa ma le manuia; e le taofia e ia se mea lelei i e ua sao lo latou savavali. Ieova e, . . . amuia le tagata ua faatuatua ia te oe.”—Salamo 84:11, 12.

[Faamatalaga pito i lalo]

[Pusa i le itulau 30]

FESILI UA FAUTUAINA MO LE FOMAʻI

Pe afai e te fesagaʻi ma se taʻotoga po o se togafitiga e ono aafia ai se vaega o le toto, ia fesili atu:

Po o iloa uma e fomaʻi ma le ʻaufaigaluega o loo aafia ai e faapea, i le avea o se tasi o Molimau a Ieova, ou te faatonu atu ai ina ia aua neʻi tuiina mai ia te aʻu se toto, (e tusa lava po o le toto atoa, sela mūmū, sela papaʻe, platelets, po o plasma o le toto) i so o se tulaga lava?

Afai e fautuaina mai so o se vailaau atonu e faia mai i le plasma o le toto, sela mūmū po o sela papaʻe, po o platelets, ia fesili:

Po o faia le vailaau mai se tasi o vaega autū e fa o le toto? Afai o faia ai, pe mafai ona e faamatala mai le auala o faia ai?

O le ā le tele e ono faaaogāina ai lenei vailaau ua faia mai i le toto, ma i le ā le auala?

Afai e faatagaina aʻu e loʻu lotofuatiaifo e talia lenei vaega, o ā ni lamatiaga faafomaʻi o aafia ai?

Afai e uunaʻia aʻu e loʻu lotofuatiaifo e teena lenei vaega, o ā nisi o togafitiga e mafai ona faaaogā?

Pe a uma ona ou manatunatu atili i lenei mataupu, o afea e mafai ona ou faailoa atu ai ia te oe laʻu faaiʻuga?