Ia Āva i Ē ua Tofia e Pule ia te Outou

“Ia outou ava i tagata uma; ia alolofa atu i le au uso; ia matatau i le Atua; ia ava i le tupu.”—1 PETERU 2:17.

1, 2. O le ā le vaaiga a tagata i le pule i aso nei? Aiseā?

“UA PULE lava tamaiti latou. Ua leai se faaaloalo i mātua,” o le tagi tālatala mai lea a se tinā. “Ua Luʻia le Pule” o se tusitusiga o loo faapipii i se taavale. Ua na o ni faaataga mai na e lua o se tulaga atonu ua e silafia o loo taatele i aso nei. O le leai o se faaaloalo i mātua, faiaʻoga, pule o galuega, ma tagata o galulue i ofisa o le malo, ua taatele i le lalolagi aoao.

² Atonu e na ona faamimigi lava o tauʻau o nisi ma faapea mai, ‘Ia, e maʻimau fua loʻu faaaloalo ia i latou o iai le pule.’ O nisi taimi, e ono faigatā ai ona faafitia lena faamatalaga. Ua tatou fesagaʻi ma le solo mai pea lava pea o tala i faiga piʻopiʻo a i latou o galulue i ofisa o le malo, o pule o galuega matapeʻapeʻa, o faiaʻoga e lē lava ni agavaa, ma mātua o loo faileagaina a latou fanau. E fiafia lava, ona e toʻaitiiti ni Kerisiano o loo ia i latou lena foʻi vaaiga i ē o iai le pule i totonu o le faapotopotoga.—Mataio 24:45-47.

3, 4. Aiseā e tatau ai i Kerisiano ona faaaloalo ia i latou o iai le pule?

³ Ona o i tatou o Kerisiano, ua ia i tatou la se “mafuaaga malosi” (NW) e ao ai ona faaaloalo ia i latou o avea ma pule faalemalo. Sa timaʻi mai le aposetolo o Paulo i Kerisiano ina ia “usiusitai tagata uma i faipule silisili; auā e leai se pule pe a le mai le Atua; o pule uma lava o loo fai nei, ua faatuina e le Atua.” (Roma 13:1, 2, 5; 1 Peteru 2:13-15) Na faaalia foʻi e Paulo se mafuaaga aogā e ao ai ona usiusitai i pule i aiga: “O outou fafine, ia outou usiusitai atu i a outou lava tane, pei ona tatau i le Alii. O outou le fanau, ia outou faalogo i o outou mātua i mea uma; auā o le mea mālie lea i le Alii.” (Kolose 3:18, 20) Ua tatau ma onomea lo tatou āva atu i toeaina o le faapotopotoga auā ‘ua tofia i latou e le Agaga Paia e fai ma leoleo, ina ia leoleo atu i le ekalesia a le Atua.’ (Galuega 20:28) O lo tatou faaaloalo la ia Ieova e māfua ai ona tatou āva i pule faaletagata. I le tulaga masani, o le āva atu i le pule a Ieova o se mea e faamuamua pea i o tatou olaga.—Galuega 5:29.

⁴ A o teu i o tatou mafaufau le pule silisili ese a Ieova, seʻi o tatou talanoaina ni faaaʻoaʻoga o nisi na lē faaaloalo ia i latou sa iai le pule, atoa foʻi ma nisi sa faaaloalo.

O le Lē Faaaloalo e Iʻu ai i le Lē Mauaina o le Finagalo Malie

5. O le ā le uiga lē faaaloalo na faaalia e Mekala ia Tavita, ma o le ā na taʻitaʻia atu i ai?

⁵ Mai le talaaga o le tupu o Tavita, e mafai ona tatou iloa ai po o le ā le silafaga a Ieova ia i latou o ē manatu faatauvaa i le pule mai le Atua. Ina ua momoli atu e Tavita le atolaau o le feagaiga i Ierusalema, o Mekala lana avā, “ua na iloa Tavita le tupu, o loo osooso ma sivasiva i luma o Ieova, ona ʻinoʻino lea o ia ia te ia i lona loto.” Sa tatau ia Mekala ona ia amanaʻia Tavita e lē gata o le ulu o le aiga ae o le tupu foʻi o le nuu. Peitaʻi, sa ia faaleo mai ona lagona i ni faaupuga tutui: “Ua mamalu nauā i le asō le tupu o Isaraelu, le na  faalelavalavā i le asō i luma o auauna fafine a ana auauna, e pei ona faalelavalavā se ulavale.” O le iʻuga o lenei mea, sa matuā lē mafai ona fanauina mai e Mekala ni fanau.—2 Samuelu 6:14-23.

6. Na faapeʻī le silasila a Ieova i le lē faaaloalo o Koru mo lē na Ia faauuina?

⁶ O se faaaʻoaʻoga sili ona leaga o le lē āva i taʻitaʻiga faatiokarate na tofia mai e le Atua, o Koru. Ona o se sā Koatō, maʻeu se faaeaga sa ia olioli ai o le auauna atu ia Ieova i le falefetafai! E ui i lea, sa ia vaavaai masei ia Mose ma Arona, o ē na faauuina e le Atua e taʻitaʻia le fanauga a Isaraelu. Sa auaufaatasi Koru ma isi alii sili o Isaraelu ma latou māteletele atu ai ia Mose ma Arona e faapea: “Ua paia le faapotopotoga uma lava, o loo ia te i latou foi o Ieova, o lenei, se a ea le mea ua oulua faasili ai oulua i le faapotopotoga a Ieova?” Na faapeī le silasila a Ieova i le uiga na faaalia e Koru ma ē na lagolagoina o ia? Na silasila le Atua i la latou gaoioiga o se lē āva foʻi lea ia Ieova lava ia. Ina ua uma ona vaavaai atu i le foloina e le eleele o tagata uma na latou aufaatasi, ona faaumatia ai lea o Koru ma alii sili e 250 i le afi mai ia Ieova.—Numera 16:1-3, 28-35.

7. Pe iai ea se mafuaaga na tatau ai i “aposetolo silisili” ona latou faitioina le pule a Paulo?

⁷ I le faapotopotoga Kerisiano o le uluaʻi senituri, sa iai i latou o ē na lē faaaloalo i le pule faatiokarate. Sa faaalia e “aposetolo silisili” i le faapotopotoga i Korinito se uiga lē faaaloalo ia Paulo. Sa latou faitioina lona tomai na tautala atu ai, i le faapea mai: “O lona tino pe a nofo mai e vaivai lea, ma lana upu e faatauvaa lea.” (2 Korinito 10:10; 11:5) E tusa pe sa avea Paulo o se failauga mataʻina pe leai, ae sa tatau lava ona faaalia ia te ia le faaaloalo ona o ia o se aposetolo. Ae pe na faatauvaa moni ea lauga a Paulo? O ana lauga lautele o loo faamauina i le Tusi Paia e faamaonia ai lona avea o se failauga aasa. Ioe, o le la talanoaga puupuu lava lea na fai ma Herota Akeripa II, o lē na “silafia . . . suega uma lava o loo ia Iutaia,” na iʻu ai ina faapea atu le tupu ia Paulo: “Ua e manatu o se mea itiiti e te faaliliuina ai aʻu e fai ma Kerisiano”! (Galuega 13:15-43; 17:22-34; 26:1-28, LF) Peitaʻi, sa tuuaʻia e aposetolo silisili i Korinito o ia faapea e faatauvaa ana lauga! Na faapeʻī le silasila a Ieova i o latou uiga? I se feʻau na auina atu mo ovasia o le faapotopotoga i Efeso, na viiviia ai e Iesu Keriso ē na mumusu e faatosinaina ese e i latou ‘na fai mai o aposetolo a e leai.’—Faaaliga 2:2.

Faaaloalo e Ui Lava i Lē Lelei Atoatoa

8. Na faaalia faapefea e Tavita lona faaaloalo i le pule na tuuina e Ieova ia Saulo?

⁸ E tele faaaʻoaʻoga i le Tusi Paia o i latou na āva atu i ē sa iai le pule, e ui lava sa faaaogāsesē e i latou nei la latou pule. O Tavita se tasi o na faaaʻoaʻoga lelei. O le tupu o Saulo, o lē na auauna i ai Tavita, sa oo ina lotovale o ia i mea na mafai ona ausia e Tavita ma saili ai e fasiotia o ia. (1 Samuelu 18:8-12; 19:9-11; 23:26) Peitaʻi, e ui lava sa iai ni avanoa na te ono fasiotia ai Saulo, ae na faapea mai Tavita: “Ia faamamao e Ieova ia te au, ina neʻi faaoo loʻu lima i le ua faauuina e Ieova.” (1 Samuelu 24:3-6; 26:7-13) Na iloa lava e Tavita sa sesē Saulo, peitaʻi na ia lafo atu ia Ieova na te faamasinoina o ia. (1 Samuelu 24:12, 15; 26:22-24) Na te leʻi faia se upuvale e uiga ia Saulo pe upuvale saʻo atu foʻi ia te ia.

9. (a) Sa faapeʻī lagona o Tavita a o agaleagaina o ia e Saulo? (e) E faapefea ona tatou iloa sa moni le faaaloalo o Tavita mo Saulo?

⁹ Pe sa mafatia ea Tavita a o agaleagaina o ia? Na alaga atu Tavita ia Ieova: “O e saua . . . ua sailiili e fasioti ia te au.” (Salamo 54:3) Sa sasaa atu lona loto ia Ieova: “Loʻu Atua e, ia e laveai mai ia te au i e ua ita mai ia te au . . . ua faapotopoto ē malolosi ia agaleaga mai ia te au; Ieova e, e le ona o loʻu solitulafono, po o saʻu agasala. Ua leai saʻu pagota, a ua latou taufetuli mai, ma latou sauniuni. Ia e tulai mai e faafetaiai mai ia te au, ma e silasila mai.” (Salamo 59:1-4) Pe na oo ea ia  te oe na lagona—e leai lava sau measesē na faia i se tasi o iai le pule, ae ua fai pea mana masani le faatigā mai ia te oe? Sa leʻi taofia e Tavita lona faaalia o le faaaloalo ia Saulo. Ina ua oti Saulo, na i lo le olioli ai o Tavita, sa ia fatuina se pese e auē ai: “O Saulo ma Ionatana sa pele ma agafaafiafia i laua ina o soifua mai . . . sa sili o la tele taalise i aeto, sa sili foi o la fitafita i leona. Afafine o Isaraelu e, ia fetagisi outou ia Saulo.” (2 Samuelu 1:23, 24) Maʻeu se faaaʻoaʻoga matagofie o le faaaloalo moni mo lē na faauuina e Ieova, e ui lava sa matuiā mea leaga a Saulo na faia ia Tavita!

10. O le ā le faaaʻoaʻoga matagofie na faataatia e Paulo i le āva atu i le pule mai le Atua a le vaega pule, ma o le ā na taʻitaʻia atu i ai?

¹⁰ I vaitaimi o uluaʻi Kerisiano, ua tatou maua ai foʻi ni faaaʻoaʻoga mataʻina o i latou na āva i pule mai le Atua. Seʻi fai Paulo ma faaaʻoaʻoga. Sa ia faaalia le faaaloalo i filifiliga a le vaega pule o le faapotopotoga Kerisiano i le uluaʻi senituri. I le asiasiga mulimuli a Paulo i Ierusalema, na fautuaina ai o ia e le vaega pule ina ia faamamāina lona tino e tusa o faiga faalesauniga ina ia faaali atu ai i isi e lē o iai ni ona faalogona ita i le Tulafono Faa-Mose. Sa ono manatu ifo Paulo: ‘O uso na sa latou faatonuina muamua aʻu ou te tuua Ierusalema ina ua lamatia loʻu ola. Ae o lenei ua mananaʻo ia ou faaalia atu i le lautele ou te faaaloalo i le Tulafono Faa-Mose. Ua uma ona ou tusia se tusi i uso i Kalatia e fautuaina ai i latou ina ia taumamao mai le tausia o le Tulafono. Afai nei ou te alu atu i le malumalu, atonu o le a faauigasesē e isi aʻu gaoioiga, ma mafaufau ai faapea o loo oʻu faifaimea faatasi ma i latou o le vasega o ē ua peritomeina.’ Peitaʻi e foliga mai sa leʻi manatu faapena Paulo. Talu ai sa leʻi aafia ai se faagutugutulua i mataupu silisili faa-Kerisiano, o lea na ia faaaloalo ai ma usitai atu i fautuaga a le vaega pule o le uluaʻi senituri. O le iʻuga vave na oo i ai, sa tatau ona laveaʻia Paulo mai se motu o tagata tetee a Iutaia, ma na mulimuli ane taofia o ia i le falepuipui mo le lua tausaga. I le iʻuga, sa faataunuu ai le finagalo o le Atua. Sa molimau atu Paulo i alii maualuluga i Kaisareia ona momoli atu lea e le malo i Roma ina ia molimau atu ia Kaisara lava ia.—Galuega 9:26-30; 21:20-26; 23:11; 24:27; Kalatia 2:12; 4:9, 10.

Pe E te Faaalia le Faaaloalo?

11. E mafai faapefea ona tatou faaalia le faaaloalo i pule faalemalo?

¹¹ Pe e te faaalia le faaaloalo ua tatau ai ia i latou o iai le pule? Ua poloaʻia Kerisiano ina ia “avatu i tagata uma lava a latou mea, . . . o le faaaloalo i e ua tatau i ai le faaaloalo.” O le mea moni, o lo tatou gauaʻi atu i “faipule silisili” e aofia ai e lē na o le totogi o a tatou lafoga ae tatou te āva i faipule e ala i a tatou amio ma upu. (Roma 13:1-7) Pe a feagai ma ni tagata faigaluega i ofisa o le malo o ē atonu e soona faia i tatou, e faapeʻī la tatou tali atu i ai? I le Setete o Chiapas i Mekisikō, na fāoa ai e le pulega a se tasi aai ia laueleele e fai ai faatoʻaga e ana e ni aiga se toʻa 57 o Molimau a Ieova, talu ai le lē faia o se vaega a nei Kerisiano i ni aso faamanatu faalotu. I taimi uma lava sa fai ai fono ina ia foʻia le mataupu, sa lavalava mamā lava ma onomea Molimau, ma sa tautatala atu pea i le āva ma le faaaloalo. E silia ma le tausaga mulimuli ane, ae aumai le faaiʻuga ua manumalo o tatou uso. O o latou uiga faaalia sa faaaloalogia ai i latou e nisi o ē na mātau ane, na oo ai lava i le tulaga ua mananaʻo foʻi latou e avea o ni Molimau a Ieova!

12. Aiseā e tāua ai i se avā ona “faaaloalo loloto” i lana tane lē talitonu?

¹² E mafai faapefea ona e faaalia le faaaloalo mo le pule ua aumaia e le Atua i totonu o le aiga? Ina ua māeʻa ona talanoaina le faaaʻoaʻoga a Iesu a o agaleagaina o ia, ona faapea mai lea o le aposetolo o Peteru: “Ia faapea outou fafine, ia usiusitai i a outou lava tane, afai foi e le faalogo nisi i le upu, ia maua i latou i le amio lelei a avā, a e leai se upu, pe a latou vaai ane i a outou amio mamā ma le faaaloalo [“loloto,” NW ].” (1 Peteru 3:1, 2; Efeso 5:22-24) Iinei ua faamamafa ai e Peteru le tāua o le gauaʻi atu o se avā i lana tane ma le “faaaloalo loloto,” e ui lava o nisi tane atonu e seāseā o latou faia ni mea e ono tatau ai ia i latou lena faaaloalo. O uiga faaaloalo o se avā na te ono maua mai ai le loto o lana tane lē talitonu.

13. E mafai faapefea ona āva atu avā i a latou tane?

¹³ I fuaiupu uma o siʻomia ai nei mau, ua tataʻi ai e Peteru o tatou manatu i le faaaʻoaʻoga a Sara, lea sa avea lana tane o Aperaamo o se faaaʻoaʻoga  matilatila o le faatuatua. (Roma 4:16, 17; Kalatia 3:6-9; 1 Peteru 3:6) Pe tatau ea i avā e talitonu a latou tane ona itiiti lo latou āva atu i ai, na i lo o avā ia e lē talitonu a latou tane? E faapefea pe afai e te lē ioeina manatu o lau tane i nisi mataupu? Na tuuina mai e Iesu nisi fautuaga e mafai ona faatatauina i se tulaga lautele iinei: “Ai se na te tauanau mai lua te o ma ia i le maila e tasi, ina o ia oulua ma ia i maila e lua.” (Mataio 5:41) Pe e te āva ea i lau tane e ala i lou lagolagoina o ona moomooga? Pe a foliga mai e faigatā tele lena tulaga, ia faailoa atu ia te ia ou faalogona e uiga i le mataupu. Aua e te nofo lava oe ma faapea ifo o la na te iloa ou faalogona. Peitaʻi pe a e faailoa atu ou manaʻoga ia te ia, ia faia i se auala faaaloalo. Ua timaʻi mai le Tusi Paia ia i tatou: “Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata e taitoatasi uma.”—Kolose 4:6.

14. O le ā e aofia ai i le faaalia o le āva i mātua?

¹⁴ Ae faapefea outou le fanau? Ua poloaʻi mai le Afioga a le Atua: “O outou le fanau, ia outou faalogo i o outou mātua i le Alii, auā o le mea tonu lava lea. Ia e ava i lou tamā ma lou tinā; (o le uluai tulafono lea ua i ai le mea ua folafolaina).” (Efeso 6:1-3) Seʻi mātau, o le usitai i ou mātua ua taʻua faapea e tutusa lava ma lou ‘ava atu i lou tama ma lou tinā.’ O le upu Eleni ua faaaogā mo le “ava” e aumaia ai le uiga o le “ia faaaloalogia” pe “faatulaga le tāua o se mea.” O lea, o le usiusitai e tele isi mea e manaʻomia ai na i lo le tau ina faataunuu ma le musuā tulafono a mātua, na e te manatu i ai e lē talafeagai. Ua poloaʻia oe e le Atua ina ia maualuga lou faaaloalogia o ou mātua ma ia faatāuaina a la taʻiala.—Faataoto 15:5.

15. E mafai faapefea e fanau ona tausisia lo latou faaaloalo e tusa lava pe latou te lagona sa faia e o latou mātua se measesē?

¹⁵ Pe afai e faia e ou mātua se mea e ono faaitiitia ai lou faaaloalogia o i laʻua, ona ā lea? Taumafai e manatu i mataupu i le auala o loo manatu foʻi i ai laʻua. Pe lē o laʻua ea na ‘fanau maia oe’ ma saunia mea mo oe? (Faataoto 23:22) Pe lē o uunaʻia ea i laʻua e lo la alofa mo oe? (Eperu 12:7-11) Ia e tautala atu ma le faaaloalo i ou mātua, ia faamatala atu i se uiga agamalu ou  faalogona. Tusa lava pe la te tali mai i se auala e te lē fiafia ai, ia e taumamao pea mai le tautala lē faaaloalo atu ia i laʻua. (Faataoto 24:29) Manatua le auala na tausisia ai e Tavita lona faaaloalo mo Saulo e ui lava ina see ese le tupu mai le usitaia o fautuaga a le Atua. Ia e ole atu ia Ieova e fesoasoani mai ina ia mafai ona e feutagaʻi ma ou faalogona. Na faapea mai Tavita: “Ia outou momoli atu o outou loto i ona luma; o lo tatou malu o le Atua lea.”—Salamo 62:8; Auega 3:25-27.

Ia Āva ia i Latou o Taʻimua

16. O le ā se lesona e mafai ona tatou aʻoaʻoina mai faaaʻoaʻoga a aʻoaʻo pepelo ma agelu?

¹⁶ Ua tofia toeaina o le faapotopotoga e le agaga paia, peitaʻi o loo iai pea i latou i le tulaga lē lelei atoatoa ma faia measesē. (Salamo 130:3; Failauga 7:20; Galuega 20:28; Iakopo 3:2) O le iʻuga, e ono oo ai i nisi o le faapotopotoga ni lagona lē fiafia i toeaina. O ā uiga e tatau ona tatou faaalia pe a tatou lagona e iai se mea i le faapotopotoga e lē o saʻo lelei ona taulimaina, pe atonu foʻi o le foliga mai lena ia te oe? Seʻi mātau le eseesega i le va o aʻoaʻo pepelo i le uluaʻi senituri ma agelu: “Ua faamalosi, ua finau vale, ma ua latou [aʻoaʻo pepelo] lē fefefe i ē ua mamalu ae ua upu leaga i ai, peitaʻi o agelu, e ui ina sili atu i latou i le malosi ma le mana, ae ua latou lē molimau lava se upu leaga ia i latou, ua lē faia faapea ona o lo latou faaaloalo mo Ieova.” (2 Peteru 2:10-13, NW ) A o upuvale aʻoaʻo pepelo i “ē ua mamalu”—o toeaina na tuuina i ai le pule i le faapotopotoga Kerisiano o le uluaʻi senituri—peitaʻi o agelu sa lē taitai ona upuvale i aʻoaʻo pepelo o ē na faapogaia le lē autasi i le va o uso. I le iai o agelu i se tulaga maualuga ma na sili atu lo latou naunau i le faamasinoga tonu na i lo tagata, o lona uiga sa latou iloa lelei foʻi mea na tutupu i le faapotopotoga. Peitaʻi, “ona o lo latou faaaloalo mo Ieova,” na latou lafo atu ai le faamasinoga i le Atua.—Eperu 2:6, 7; Iuta 9.

17. E faapefea ona aafia lou faatuatua pe a fesagaʻi ma faafitauli e te lagona ai faapea ua faia e toeaina se measesē?

¹⁷ E tusa lava po ua lē o taulimaina se mea i le auala e tatau ona taulima ai, pe lē tatau ea ona tatou faatuatua atu ia Iesu Keriso o ia o le Ulu o loo soifua o le faapotopotoga Kerisiano? Po ua ia lē silafia mai ea mea o loo tutupu i lana lava faapotopotoga i le lalolagi aoao? Pe lē tatau ea ona tatou faaaloalo i lana auala o loo taulimaina ai le mataupu ma amanaʻia lona tomai e pulea lelei ai mea? O le mea moni lava, ‘o ai ea i tatou e faamasinosino ai fua i o tatou tuaoi?’ (Iakopo 4:12, LF; 1 Korinito 11:3; Kolose 1:18) Aiseā e lē lafo atu ai ou popolega ia Ieova i au tatalo?

18, 19. O le ā e mafai ona e fai pe a e lagona ua faia e se toeaina se measesē?

¹⁸ Ona o le lē lelei atoatoa faaletagata, e ono aliaʻe ai toʻatugā ma faafitauli. Atonu e oo lava ina iai ni taimi e faia ai e se toeaina se mea sesē, ma tigā ai faalogona o nisi. O lo tatou soona māteletele i na tulaga o le a lē suia ai le tulaga o mea. Atonu e na ona faateteleina ai o le faafitauli. O i latou e iai le faautautaga faaleagaga o le a faatalitali ia Ieova na te faasaʻoina mea ma faaoo  mai po o le ā lava se aʻoaʻiga e ono manaʻomia i lana lava taimi ma i lana auala.—2 Timoteo 3:16; Eperu 12:7-11.

¹⁹ Ae faapefea pe a iai nisi mataupu e te mafatia ai? Na i lo le talanoa atu i isi i le faapotopotoga, aiseā e te lē faalatalata atu ai ma le faaaloalo i toeaina mo se fesoasoani? E aunoa ma se uiga faitio, ia e faamatala atu aafiaga ua oo ai ia te oe. Ia iai pea le “fealofani” ma i latou, ma ia tumau pea lou faaaloalo a o sasaa atu ou faalogona ia i latou. (1 Peteru 3:8) Aua e te taumafai e fai ni faaupuga tutui, ae ia e faatuatuaina lo latou taʻumatuaina faa-Kerisiano. Ia talisapaia so o se faalaeiauga faale-Tusi Paia latou te ono ofoina mai ma le agalelei. Ae pe a foliga mai e manaʻomia nisi laasaga mo le faasaʻoina, ia e mautinoa o le a taʻitaʻia e Ieova toeaina ina ia fai le mea e lelei ma saʻo.—Kalatia 6:10; 2 Tesalonia 3:13.

20. O le ā o le a tatou talanoaina i le mataupu o sosoo mai?

²⁰ E ui lava i lea, e iai foʻi se isi vala e ao ona talanoaina e tusa ai o le āva ma le faaaloalo atu ia i latou ua iai le pule. Pe lē tatau ea ia i latou ua iai le pule ona faaaloalo foʻi i ē o loo latou vaavaaia? Seʻi o tatou iloiloina lena fesili i le mataupu o sosoo mai.

O le a Faapefea Ona E Tali?

• O le ā se mafuaaga lelei o ia i tatou e āva atu ai ia i latou o iai le pule?

• O le ā le silasila a Ieova ma Iesu ia i latou e lē o faaaloalo i le pule mai le Atua?

• O ā faaaʻoaʻoga matagofie ua tatou iloa o i latou na āva atu i ē sa iai le pule?

• O le ā e mafai ona tatou fai pe a foliga mai ua faia se measesē e se tasi o loo pule ia i tatou?

[Fesili mo le Suʻesuʻega]

[Ata i le itulau 12]

Sa faaaloalo loloto Sara i le pule a Aperaamo ma na fiafia ai

[Ata i le itulau 13]

Sa leʻi faaaloalo Mekala i le pule a Tavita o le ulu o le aiga ma o le tupu

[Ata i le itulau 15]

“Ia faamamao . . . ia te au, ina neʻi faaoo loʻu lima i le ua faauuina e Ieova.”

[Ata i le itulau 16]

Aiseā e lē lafo atu ai ou popolega ia Ieova i au tatalo?