Laveaʻiina i le Motu o  Robinson Crusoe

O ROBINSON CRUSOE o se tasi o motu e tolu i le Vasa Pasefika o loo faia aʻe ai le atumotu e taʻua o Juan Fernández, pe tusa ma le 400 maila [640 kilomita] le mamao ese mai le talafatai o Sili (Chile). * O le motu e 36 maila faatafafā [93 kilomita faatafafā] na mauaina lena igoa mai se tala taʻutaʻua o lona 18 o senituri na faaigoaina o Robinson Crusoe, na tusia e le alii tusitala Egelani o Daniel Defoe. O le tala atonu sa faavae i mea iloga na tutupu i se tagata Sikotilani o Alexander Selkirk, o lē na ola lava na o ia i le motu mo le fā tausaga.

Ua faapea mai se vaega o se laupapa faailoilo i le motu: “O le itu lenei sa vaavaai atu ai ma le naunau i lea aso ma lea aso mo le silia i le fā tausaga, le seila mai Sikotilani o Alexander Selkirk i le tafatafaʻilagi mo le vaa e laveaʻia o ia mai lona tuua toʻatasi.” Mulimuli ane, na laveaʻiina Selkirk ma avatu i lona nuu moni, i se lalolagi sa lē toe mafai ona faamalieina ai o ia ina ua mavae le taimi sa ia nofo ai i lona lava tamaʻi parataiso. Na lipotia mai mulimuli ane lona faapea mai: “Oi, si oʻu motu e, e pele ia te aʻu! Maʻimau e, pe ana ou lē tuua lava oe!”

I le mavae atu o tausaga, na faaaogāina ai le motu e fai ma kolone e faasala ai tagata, sa ʻaināina e nisi na faasalaina ai iinā o ē na faia “solitulafono faalotu” faasaga i le Lotu Katoliko. Pagā se suiga mai le motu e pei o se parataiso lea sa iloa muamua ai e Selkirk! Ae peitaʻi i aso nei, o loo fiafia ai lava ē o ʻaināina le motu i se siʻomaga filemu e lē o iloa i le tele o isi vaega o le lalolagi. O le olaga toʻafilemu lea e pei ona masani ai i aganuu a le tele o motu, e faigofie ai lava ona faia ni talanoaga ma so o se tasi lava i le motu.

I se tulaga aloaʻia, o le faitau aofaʻi o tagata o loo ʻaināina Robinson Crusoe, pe tusa ma le 500, ae i le tele o taimi o le tausaga, pe tusa na o le 400 tagata e nonofo ai i le motu. O se vaega o le mafuaaga ona o nisi tinā ma a latou fanau e nonofo i le atunuu o Sili i le vaitaimi o le tausaga e aʻe ai aʻoga, ae faatoʻā foʻi atu lava i le motu pe a oo i le taimi o tuuaga ina ia nonofo faatasi ma isi tagata uma o le aiga.

E ui lava i le matagofie o le siʻomaga e pei o se togālaau i Robinson Crusoe, ae iai lava ni tagata i le motu o loo iai se lagona gaogao mo mea faaleagaga ma o loo saili mo ni tali. Ua lagona e isi e peiseaī e manaʻomia ona laveaʻiina i latou i le itu faaleagaga.

Se Laveaʻiga Faaleagaga

Na amataina lena galuega laveaʻi faaleagaga pe tusa o le tausaga e 1979. O se fafine sa suʻesuʻeina le Tusi Paia ma Molimau a Ieova i Santiago, i Sili, na siitia atu i le motu ma amata ai ona aʻoaʻo i isi mea na ia aʻoaʻoina. I se taimi mulimuli ane, na asiasi atu ai se toeaina o se faapotopotoga i le motu mo ni mafuaaga tau galuega, ma faateʻia ai ina ua ia iloaina se vaega toʻalaiti o tagata suʻesuʻe o le Tusi Paia o loo agaʻigaʻi i luma faaleagaga ona o le fesoasoani a lena fafine. E oo ane i le taimi na toe asiasi atu ai le toeaina i le motu i le tolu masina mulimuli ane, ae ua nofosauni lenei faiaʻoga o le  Tusi Paia o loo nofo mamao ese, ma ni ana tagata suʻesuʻe se toʻalua, ina ia papatisoina, o lea na faia ai e le toeaina lo latou papatisoga. Mulimuli ane, na faaipoipo ai se tasi o nei Kerisiano faatoʻā uma ona papatiso, ma sa la faaauau ai faatasi ma lana tane i le sailia o isi sa manaʻomia ona laveaʻiina faaleagaga. Sa taʻimua le tane a lenei tuafafine i le fausiaina o se Maota o le Malo faatauvaa, lea o loo faaaogā pea e le vaega toʻalaiti i le motu. Mulimuli ane, ona o tulaga tau tamaoaiga, na la tuua ai le motu o Robinson Crusoe ma ō atu i se faapotopotoga i le ogatotonu o Sili, o iinā o loo faaauau ai pea ona la auauna ma le maelega ia Ieova.

Sa faasolosolo mālie pea ona tuputupu aʻe le vaega toʻalaiti i le motu a o laveaʻiina isi mai lotu sesē. Ae peitaʻi, talu ai sa tatau ona siitia atu tamaiti aʻoga i le atunuu o Sili mo a latou aʻoga maualuluga, na faaitiitia ai le vaega i le toʻalua tuafāfine papatiso ma se teine talavou se toʻatasi. E faatoʻateleina le vaega i le taimi e tuua ai aʻoga pe a toe foʻi atu i le motu nisi tinā. E avea lena ma itu na toe aasa ai nai Kerisiano e toʻatolu ia e nonofo mamao ese ai pea iinā i le tausaga atoa. Ona o galuega fitā a nei tuafāfine, ua lauiloa ai Molimau a Ieova i Robinson Crusoe. O le mea moni, e iai nisi tagata o le motu ua faasagatau atu i la latou galuega ma taumafai e uunaʻia isi ia tetee i le feʻau o le Malo. Ae peitaʻi, o fatu o le upu moni o le Tusi Paia na totō i lotofaamaoni ua faaauau pea ona tutupu aʻe.

Faamalosiau ia i Latou ua Laveaʻiina

E faatasi i le tausaga ona asia le motu e se ovasia femalagaaʻi. E faapeī le tulaga o le asiasi atu i ni nai Molimau i se motu o loo tū mamao ese? Ua faapenei ona faamatalaina e se tasi ovasia matagaluega lana uluaʻi asiasiga i Robinson Crusoe:

“Sa matuā matagofie lenei malaga. Na amata i le 7 i le taeao ina ua matou tuua Valparaiso ma tietie atu i se taavale i le malae vaalele o Cerrillos i Santiago. Na faaee i matou i se tamaʻi vaalele e toʻafitu le pasese. E 2 itula ma le 45 minute le umi o le malaga, ae matou vaai mamao atu i se tumutumu mauga e aliali aʻe mai luga o ao. A o matou latalata atu, na matou vaaia ai loa le motu—o se faupuʻega uigaese o papa i le ogatotonu o le vasa. Sa foliga mai e peiseaī o loo opeopea i le vasa tele, e pei o se vaa ua leiloa i le sami.

“Ina ua matou tulaueleele, na ave i matou e se vaa i le nuu. Sa ʻosoʻoso solo aʻe mai le sami le anoanoaʻi o papa ia na faia aʻe ai tamaʻi  motu sa fai ma nofoaga e mālōlō i ai seal taufulufulua e taʻua o Juan Fernández. O seal taufulufulua o ni meaola e puipuimaluina ona ua matuā faaitiitia lava. Sa faafuaseʻi ona lele ane se mea i tafatafa o le vaa ma toe galoma atu i le sami. O se iʻa lele, o ona ʻapaʻapa putuputu sa pei o ni apaʻau. Sa foliga mai e fiafia tele o ia e oso aʻe mai le sami ina ia puʻeina iniseti. O le mea moni, i nisi taimi e puʻe ai foʻi e isi iʻa le iʻa lele lenei; o lona punapuna aʻe e ono uaʻi mai i ai iʻa o loo aai i tino o isi iʻa, o loo nofosauni e folo patatō lenei iʻa lele a o paʻū ifo i le sami.

“Ia ona matou taunuu loa lea i le nuu o San Juan Bautista (St. John the Baptist). Sa fai lava si toʻatele o tagata o le motu sa tutū ai iinā i le uafu, a lē o le faatalitali i ni a latou uō e asiasi ane, ia pe na o le fia iloa lava po o ai ni tagata atonu o taunuu ane i lena taimi. Sa matou māofa lava i le matagofie o le siʻomaga—o le mauga malualii maamaai e taʻua o El Yunque (The Anvil), e ufitia i le mutia lanumeamata malosi e pei se veloveta, ae i ona tua atu o le vanimonimo lanumoana māninoa e teuteuina autafa i le anoanoaʻi o ao sinasina.

“E leʻi pine ae matou mātauina loa nai o matou uso ma tuafāfine Kerisiano ma a latou fanau o faatali mai mo i matou i le uafu. O le taimi lena o tuuaga a aʻoga, o lea sa toʻatele atu ai le vaega lea na i lo o le mea e masani ai. Ina ua uma a matou feofoofoaʻiga ma le māfana, ona ave atu ai lea o i matou i se fale matagofie o le a avea ma o matou aiga mo le vaiaso atoa.

“Sa o se vaiaso na matuā faapitoa lava, ma na matou iloa o le a vave ona mavae atu le taimi. Sa manaʻomia ona matou faaaogā lelei o matou taimi. I lena lava aso, na uma loa la matou taumafataga o le aoauli, matou asiasi atu loa i se suʻesuʻega faale-Tusi Paia o lē sa leʻi umi se taimi ae avea loa ma o matou tuafafine faaleagaga ma o se vaega o le parataiso faaleagaga a le Atua. Sa matuā fiafia lava o ia ae sa fai foʻi si ona gatete. O lea ua latalata mai le taimi e faataunuuina ai lona sini ua leva ona faatali i ai, o le papatisoga. Sa matou talanoaina ma ia nisi o faamatalaga talafeagai ina ia mafai ona agavaa ai o ia e avea ma tagata talaʻi o le tala lelei. I le aso na sosoo ai, na auai ai o ia i le galuega talaʻi mo le uluaʻi taimi. O le aso lona tolu, sa amata ai loa ona matou talanoaina ma ia mea e manaʻomia mo le papatisoga. A o leʻi iʻu le vaiaso, na papatisoina ai o ia.

“Sa matuā lelei le lagolagoina o sauniga na faia a o faagasolo le vaiaso, o le fuainumera pito i toʻatele sa auai, e toʻa 14. I aso taʻitasi sa faia ai ni fuafuaga mo le auaunaga i le fanua, o toe asiga, suʻesuʻega faale-Tusi Paia, ma asiasiga faaleoleo mamoe. Maʻeu se faalaeiauga mo tuafāfine o ē o loo faia pea na o i latou lava la latou galuega i le tausaga atoa!”

E sili atu ona faigatā mo tane i le motu ona talia le upu moni, atonu ona o le omia i mea e manaʻomia mai i a latou galuega o loo maua ai a latou seleni. O le galuega autū o le puʻeina lea o ula sami, lea e manaʻomia ai le uaʻi totoʻa atu i ai. E faia foʻi se vaega a le manatu faaituʻau i uiga lē lelei e faaalia mai e le toʻatele. Ae peitaʻi e iai le faamoemoe o le a sili atu ni tagata o le motu, o tane faapea ma fafine, o le a tali mai i le lumanaʻi.

E oo mai i le taimi lenei, e toʻasefulu tagata ua laveaʻiina i le motu e ala i le oo ina latou iloa le upu moni ma fuafuaga a Ieova le Atua. Talu mai lena taimi, na tuua ai e nisi o i latou le motu ona o mafuaaga eseese. Ae peitaʻi pe nonofo ai i le motu pe leai, ae e matuā tāua lava lo latou laveaʻiina faaleagaga na i lo o le laveaʻiina o Alexander Selkirk. Ua latou mauaina nei le parataiso faaleagaga i so o se mea lava atonu o latou nonofo ai. O tuafāfine o loo nonofo ai pea i le motu ma a latou fanau, o loo olioli i lo latou siʻomaga e pei o se togālaau, ae e sili atu i lena, ua latou maua le faamoemoe o le ola ai pe a faaliliuina le lalolagi atoa e avea ma parataiso moni e tusa ai ma uiga taʻitasi o le upu.

O Loo Faaauau Pea le Galuega Laveaʻi

I le tulaga faaletino, o loo nonofo mamao ese lenei vaega toʻalaiti o Molimau a Ieova i Robinson Crusoe, mai le toʻatele o o latou uso ma tuafāfine faaleagaga. Peitaʻi, e lē o ia i latou se lagona faapea ua tuulafoaʻia i latou, e pei ona sa lagona ai le tamāloa Sikotilani o Selkirk. E ala i le aauina atu pea ia i latou o lomiga faatiokarate, le lafoina atu faatolu i le tausaga o vitiō o fonotaga ma tauaofiaga mai le lālā a le Sosaiete o le Olo Matamata i Sili, ma le asiasiga a le ovasia matāgaluega i tausaga taʻitasi, ua latou fesootaʻi vavalalata ai pea ma le faalapotopotoga a Ieova. O lea, o loo faaauau pea ona avea i latou o se vaega maelega o le “au uso [atoa] o i le lalolagi.”—1 Peteru 5:9.

[Faamatalaga pito i lalo]

[Faafanua/​Ata i le itulau 9]

(Tagaʻi i le lomiga mo le ata atoa)

SILI

Santiago

LE MOTU O ROBINSON CRUSOE

San Juan Bautista

El Yunque

VASA PASEFIKA

MOTU O SANTA CLARA

[Ata i le itulau 8]

Le mauga malualii maamaai e taʻua o El Yunque (The Anvil)

[Ata i le itulau 9]

Ina ua iloa atu le motu, sa matou vaaia ai se faupuʻega mataʻina o papa i le ogatotonu o le vasa

[Ata i le itulau 9]

Le nuu o San Juan Bautista (St. John the Baptist)

[Ata i le itulau 9]

O motu laiti ua fai ma nofoaga e mālōlō i ai “seal” taufulufulua ma leona sami

[Ata i le itulau 10]

Na matou felelei i se tamaʻi vaalele mai Santiago, i Sili

[Ata i le itulau 10]

Le talafatai gaoā o le Motu o Robinson Crusoe

[Ata i le itulau 10]

Le Maota o le Malo faatauvaa i le motu

[Faamatalaga i Ata i le itulau 9]

Faafanua o Sili: Mountain High Maps® Copyright © 1997 Digital Wisdom, Inc.