“O Outou Uma o le Au Uso Outou”
“O Outou Uma o le Au Uso Outou”
“Aua neʻi taʻua outou o rapi; auā e toatasi la outou aʻoaʻo; a o outou uma o le au uso outou.”—MATAIO 23:8, LF.
1. O le ā le mataupu e aogā ona tatou talanoaina?
“O AI ua onomea ona faasili le āva atu i ai, o se misionare po o se tagata Peteli?” o le fesili lea na fesili atu ai ma le lotomamā se fafine Kerisiano mai Asia i se tuafafine misionare mai Ausetalia. Sa ia fia iloa po o ai e tatau ona faasili i ai le faaaloalo, po o se misionare mai se isi atunuu po o se faifeʻau mai lo latou lava atunuu o loo auauna i le ofisa o le lālā a le Sosaiete o le Olo Matamata. Sa faateʻia le misionare i lena fesili mai se agaga mamā, o loo atagia ai se agaifanua e masani i le faamamafa o tulaga o tagata. Peitaʻi, o le fesili i le po o ai e sili, e puna mai se faanaunauga e fia iloa po o le ā le tulaga o tagata i faatulagaga o le pule ma le telē o a latou taaʻiga.
2. O le ā la tatou vaaiga e tatau ona tatou vaai ai i o tatou uso tapuaʻi?
2 E mautinoa lava, e lē fou lenei atugaluga. E oo foʻi i soo o Iesu sa iai lava sa latou finauga faifai pea i le po o ai o latou e sili. (Mataio 20:20-24; Mareko 9:33-37; Luka 22:24-27) Na ō mai foʻi i latou mai se agaifanua e masani i le faamamafa o tulaga o tagata, lena sa iai i le faiga o mea faa-Iutaia i le uluaʻi senituri. Talu ai la sa manatua e Iesu lena ituaiga o olaga, o lea na ia fautuaina ai ona soo: “Aua neʻi taʻua outou o rapi; auā e toatasi la outou aʻoaʻo; a o outou uma o le au uso outou.” (Mataio 23:8, LF ) O le suafa faaee faalotu e pei o le “Rapi,” e faauiga i le “Aʻoaʻo,” “e tele ina faagaee ai le faamaualuga ma se lagona o le fiasili ia i latou ua maua lena suafa, ae oo ai le fuā ma se lagona o le faatauvaa ia i latou e lē o maua; ma o le agaga atoa ma le faanaunauga o lea faiga ua feteenaʻi lea ma le ‘uiga maulalo o loo ia Keriso,’” o le manatu lea o le alii atamai faapitoa i mataupu faale-Tusi Paia o Albert Barnes. Ioe, e taumamao Kerisiano mai le faalagilagi atu o o latou ovasia faapea o “Le Afioga i le Toeaina o Pai ma Lafai,” i le faaaogāina o le upu “toeaina” e pei o se suafa faaee e faalialia ai. (Iopu 32:21, 22) I le isi itu, o toeaina o loo tausisia le agaga o fautuaga a Iesu latou te faaalia le āva i isi tagata o le faapotopotoga, e pei lava ona āva atu Ieova i ona tagata tapuaʻi faamaoni, e faapea foʻi ona āva atu Iesu Keriso i ona soo faamaoni.
Le Faaaʻoaʻoga a Ieova ma Iesu
3. Na faapefea ona āva atu Ieova i ana foafoaga agaga?
3 E ui lava o Ieova o “le Silisili ese,” ae mai lava i le amataga sa ia āva atu ai i ana foafoaga e ala i le faaaofia o i latou i mea na ia faia. (Salamo 83:18) Ina ua ia foafoaina le uluaʻi tagata, sa faaaofia e Ieova lona Alo pele e toʻatasi i le galuega e avea ma “tufuga.” (Faataoto 8:27-30; Kenese 1:26) Na oo foʻi ina valaaulia e Ieova ana agelu i le lagi e faaali mai ni o latou manatu i le auala e amata ai le faaumatiaina o le tupu amioleaga o Aapo ina ua Ia mautinoa o le a ia faia faapea.—1 Tupu 22:19-23.
4, 5. E faapefea ona āva Ieova i ana foafoaga faaletagata?
4 O loo afio Ieova o le Pule Silisili Ese i le vateatea aoao. (Teuteronome 3:24) E lē tau manaʻomia fua ona ia tāpā mai ni manatu o tagata. Peitaʻi, ua ia faatuatuanaʻi lava na mamalu ae sagaʻi mai ona o lona amanaʻia o i latou. Na pese le faisalamo: “O ai ea sē tusa ma Ieova lo tatou Atua, o lē faamaualugaina e ia lona afioaga? O lē faamaulaloina e ia ia ia e silasila mai i le lagi atoa ma le lalolagi. Na te faatulaiina mai le tagatālautele nai le efuefu.”—Salamo 113:5-8.
5 A o leʻi faatamaʻiaina Sotoma ma Komoro, sa muamua ona faafofoga atu Ieova i fesili a Aperaamo, ma sa ia faamalieina le lagona o Aperaamo e uiga i le faamasinotonu. (Kenese 18:23-33) E ui lava ua leva ona silafia e Ieova le iʻuga o talosaga a Aperaamo, ae sa ia onosai pea e faafofoga atu ia Aperaamo ma talia ona manatu.
6. O le ā na iʻu i ai le faaalia e Ieova o lona āva ina ua fesiligia e Sapakuka se fesili?
6 Sa faafofoga atu foʻi Ieova ia Sapakuka lea na fesili ane: “Ieova e, ou te valaau seia afea, a e te le faafofoga mai?” Pe sa silasila ea Ieova i le fesili faapea o se luʻi i lana pule? E leai, sa ia silasila i fesili a Sapakuka o ni fesili sa talafeagai lelei, o lea na ia faaalia ai lana fuafuaga ina ia lagaina Kaletaia e faaoo atu le sala faafaamasinoga. Sa ia faamautinoa atu i le perofeta e faapea ‘o lenei faamasinoga na valoia e oo mai lava, e le faatuai mai.’ (Sapakuka 1:1, 2, 5, 6, 13, 14; 2:2, 3) I lona manatu mamafa i atugaluga o Sapakuka ma tali ane ia te ia, sa faaalia ai e Ieova lona āva i le perofeta. O le iʻuga, sa toe lototele ai le perofeta na tau lē mautonu, ma ia toe maua ai le olioli, faatasi ma lona faatuatua atoatoa atu i le Atua o lona faaolataga. Ua atagia mai lenei tulaga i le tusi faagaeeina a Sapakuka lea e faamalosia ai lo tatou faatuatua ia Ieova i aso nei.—Sapakuka 3:18, 19.
7. Aiseā ua mataʻina ai le matafaioi a Peteru lea na faatino i le Penetekoso o le 33 T.A.?
7 O Iesu Keriso le isi faaaʻoaʻoga lelei o le faaalia o le faaaloalo i isi. Na fetalai atu Iesu i ona soo e faapea o “se faafiti foi ia te au i luma o tagata, ou te faafitia foi o ia i luma o loʻu Tamā.” (Mataio 10:32, 33) Peitaʻi, i le po na faalataina ai o ia, sa sosola ese ai ona soo uma mai ia te ia, ma e faatolu foʻi ona faafitia o ia e le aposetolo o Peteru. (Mataio 26:34, 35, 69-75) Sa ati le silasila a Iesu i tua atu o foliga vaaia ma ia amanaʻia ai faalogona loloto o Peteru, lona salamō moni. (Luka 22:61, 62) I le na o le 51 aso mulimuli ane, na faamamaluina ai e Keriso lenei aposetolo na toe salamō, e ala i lona tofia o ia e fai ma sui o soo e 120 o Iesu i le aso o le Penetekoso, ma tuu atu ia te ia na te faaaogā le uluaʻi “ki o le malo.” (Mataio 16:19; Galuega 2:14-40) Sa tuu atu ia Peteru se avanoa e ‘liua ai ma faamalosi i ona uso.’—Luka 22:31-33.
Ia Āva Atu i Tagata o le Aiga
8, 9. E mafai faapefea e se tane ona faataʻitaʻi atu ia Ieova ma Iesu, a o ia avatu le āva i lana avā?
8 E lelei i tane ma mātua ona faataʻitaʻi ia Ieova ma Iesu Keriso i le faatinoina o le pule mai le Atua. Na timaʻi mai Peteru: “Ia faapea outou tane, ia nonofo faatasi ma [a outou avā] ma le poto, ia ava i le avā, auā o le ipu ia ua sili ona vaivai ia te oe.” (1 Peteru 3:7, LT ) Seʻi faapea o loo e uuina se iputuuteu e faaeteetegatā lava, e manino lelei mai le sili atu ona mataʻetaʻe na i lo se ipu laupapa. Pe o le a lē sili ea ona e matuā uuina ma le faaeteete? E mafai e se tane ona faia faapena e ala i lona faataʻitaʻi atu ia Ieova, i le faalogologo atu i manatu faaalia o si ana avā pe a filifili i ni mataupu faaleaiga. Ia manatua, na faaalu e Ieova se taimi e fefulifulisaʻi ai o la manatu ma Aperaamo. Ona o le tulaga lē lelei atoatoa, e ono lē taulau ai i se tane ona vaai i le ata atoa o le mataupu. Po ua lē atamai ea la mo ia ona āva i lana avā e ala i lona tilofaʻia ma le faamaoni o sona manatu?
9 I vaipanoa ua matuā mauaa ai le manatu e na o le tane lava e pule, e ao ai i se tane ona ia manatua atonu o loo taumafai si ana avā e lototele ina ia faaleo mai ona lagona loloto. Ia faataʻitaʻi i le auala sa feutagaʻi ai Iesu Keriso ma ona soo, se vaega o ē o le a avea ma lana faatoʻānofotane i le lumanaʻi, a o iai o ia i le lalolagi. Sa ia faapelepeleina i latou, i lona amanaʻiaina o tulaga e gata mai ai so latou mafai i le itu faaletino ma le faaleagaga a o latou leʻi faaleo maia o latou manaʻoga. (Mareko 6:31; Ioane 16:12, 13; Efeso 5:28-30) E lē gata i lea, ia faaalu se taimi e mātau ai mea o loo fai e lau avā mo oe ma lou aiga, ona faailoa atu lea i ai o lou agaga talisapaia i au upu ma au gaoioiga. E tutusapau Ieova ma Iesu i lo la talisapaia, i lo la faamālō, ma lo la faamanuia atu i ē ua tatau i ai. (1 Tupu 3:10-14; Iopu 42:12-15; Mareko 12:41-44; Ioane 12:3-8) Ina ua avea le tane a se fafine Kerisiano mai Asia ma Molimau a Ieova, ona faapea mai lea o le fafine: “Sa masani lava ona faasasaʻo le savali a laʻu tane e muamua teisi lava i luma ae tuu mai ia te aʻu mea uma ou te tausaʻe atu. I le taimi nei ua ia tauaveina a ma ato ma faaali mai lona talisapaia o aʻu galuega o loo fai i le fale!” E mafai ona avea sina upu o le talisapaia moni ma fesoasoani tele i lau avā ina ia ona lagona ai o loo faatāuaina o ia.—Faataoto 31:28.
10, 11. O le ā se mea e mafai e mātua ona aʻoaʻoina mai le faaaʻoaʻoga matagofie a Ieova i le feutagaʻi ai ma le nuu fouvale o Isaraelu?
10 E tatau i mātua ona faataʻitaʻi atu i le Atua, pe a feutagaʻi ma a latou fanau, aemaise lava pe a manaʻomia ni aʻoaʻiga. “Ua aoai mai lava Ieova ia Isaraelu atoa ma Iuta” ina ia liliu ese mai o latou ala leaga, peitaʻi sa latou “faamaaa i o latou ua.” (2 Tupu 17:13-15) Na oo lava ina taumafai tagata Isaraelu e “pepelo ia te ia i o latou gutu, ma ua latou faaʻoleʻole ia te ia i o latou laulaufaiva.” E toʻatele mātua e ono oo i ai le lagona faapea o le auala lena o loo amioaʻi ai a latou fanau i nisi taimi. Na “tofotofo lava i le Atua” le fanauga a Isaraelu, ma faatigā ia te ia. Peitaʻi, sa “alofa mutimuti vale [Ieova], ua ia faamagaloina a latou amio leaga; na ia le faaumatia ai i latou.”—Salamo 78:36-41.
11 Na oo lava ina ʻaiʻoi atu Ieova i le fanauga a Isaraelu: “O mai ia, ina tatou filifili ia, e ui lava ina pei o ofu mūmū a outou agasala, e sisina ia e pei o le kiona.” (Isaia 1:18) E ui lava sa leʻi iai se sesē o Ieova, ae na ia valaaulia lava le nuu fouvale ina ia foʻi ane ma latou toe faasaʻoina mea. Maʻeu se uiga matagofie mo mātua e faataʻitaʻi i ai a o feutagaʻi ma a latou fanau! Pe a tulaʻi mai se tulaga e manaʻomia ai lena mea, ia faamamaluina i latou e ala i le faalogologo atu i la latou foʻi itu o le mataupu, ma ia fefulifulisaʻi ma i latou i le pogai e tatau ai ona latou faia se suiga.
12. (a) Aiseā e tatau ai ona tatou alofia le faasilisilia o le āva i a tatou fanau na i lo Ieova? (e) O le ā e manaʻomia pe afai tatou te fia faaaloalogia le tulaga mamalu o a tatou fanau a o aʻoaʻia i latou?
12 O le mea moni, e iai taimi e manaʻomia ai e fanau ni fautuaga malolosi. O le a lē mananaʻo mātua ia pei o Eli, o lē ‘na faasili i ona atalii na i lo Ieova.’ (1 Samuelu 2:29) Peitaʻi, e manaʻomia lava ona iloa mai e talavou e iai se uunaʻiga alofa i le faasaʻoga. E tatau ona mafai ona latou talisapaia faapea, e alolofa o latou mātua ia i latou. Ua timaʻi mai Paulo i tamā: “Aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a [Ieova].” (Efeso 6:4) E ui o lea e faamautinoa mai le pule faamātua, ae o le manatu o loo faatāua o le manaʻomia lea i le tamā ona ia amanaʻia le tulaga mamalu o le fanau e ala i lona lē faaita o le fanau ona o ona uiga soona māteletele. Ioe, o le amanaʻiaina o le tulaga mamalu o le fanau e manaʻomia ai le taimi ma taumafaiga a mātua, peitaʻi o le iʻuga e fua mai i le faia faapea e matuā tauia ai faataulaga uma na faia.
13. O le ā le manatu o le Tusi Paia e faatatau i tagata ua matutua i se aiga?
13 O le faaalia o le āva i tagata o le aiga e tele isi mea e aofia ai na i lo le tau ina faamamalu e se tasi lana avā ma le fanau. Fai mai se alagāupu faa-Iapani: “Pe a e matua, ia e usitai i lau fanau.” O le uiga o lena alagāupu e faapea, e tatau i mātua ua matutua ona taumamao mai le soona faamamafa naʻuā o la latou pule faamātua ae tatau ona latou amanaʻia manatu o fai mai ai a latou fanau ua matutua. E ui ina faale-Tusi Paia mo mātua ona āva i a latou fanau e ala i le faalogologo lelei atu i o latou manatu, ae e lē tatau ai lava i fanau ona faaalia se uiga lē faaaloalo i tagata matutua o le aiga. Ua faapea mai le Faataoto 23:22: “Aua foi e te ʻinoʻino i lou tinā pe a loomatua o ia.” Sa tausisi le tupu o Solomona i lenei faataoto ma ia āva ai i lona tinā a o faalatalata atu lona tinā e ole atu ia te ia. Sa faatulaga e Solomona se nofoa i le itu taumatau o lona lava nofoālii, ma sa faalogologo atu o ia i lona tinā matua o Patesepa, i mea sa fia taʻu ane e Patesepa ia te ia.—1 Tupu 2:19, 20.
14. E mafai faapefea ona tatou āva atu i tagata ua loa o latou soifua i le faapotopotoga?
14 I totonu o lo tatou aiga potopoto faaleagaga, ua tatou maua ai se tulaga lelei e “tausolomua” ai i le faaalia o le āva ia i latou ua matutua o le faapotopotoga. (Roma 12:10) Atonu latou te lē o toe gafatia le faia o le tele o mea e pei ona sa latou mafaia i aso ua mavae, ma atonu latou te lagona ai se lē fiafia. (Failauga 12:1-7) E iai se tasi tuafafine matua lava, o ia o se Molimau faauuina, sa faataotolia i le falemaʻi, sa ia faaalia mai ni lagona lē fiafia faapena i se tasi taimi: “Ua tuai ona oo mai loʻu oti seʻi oʻu toe foʻi e fai aʻu galuega.” Mo tagata matutua faapena, e mafai ona aogā lo tatou faaalia i ai o le amanaʻia ma le āva ua tatau i ai. Sa poloaʻia le fanauga a Isaraelu: “Ia e tulai atu i luma o le ua ulu sinā, ia e ava foi i luma o le toeaina.” (Levitiko 19:32) Ia faaalia le magafagafa e ala i le feutagaʻi ma ē matutua i se auala latou te lagona ai o loo manaʻomia ma talisapaia i latou. O le “tulai atu” e mafai ona aofia ai foʻi le saofaʻi, ma faalogologo atu a o latou faamatala mai tala i mea na mafai ona latou faataulauina i tausaga ua teʻa. O iinā o le a tatou faamamaluina ai ē ua āfu o latou soifua ma faaʻoaina ai o tatou lava olaga faaleagaga.
‘Ia Tausolomua i le Faaalia o le Faaaloalo’
15. O le ā e mafai ona faia e toeaina ina ia faamamaluina ai tagata o le faapotopotoga?
15 E ola fiafia tagata o le faapotopotoga pe a faataatia e toeaina se faaaʻoaʻoga lelei mo i latou. (1 Peteru 5:2, 3) E ui i a latou faasologa pisi, ae tausolomua lava toeaina alolofa e faalatalata atu i talavou, i ulu o aiga, i tinā nofofua, i tinā tausiaiga, ma i ē ua loa lo latou soifua, e tusa lava pe o fesagaʻi i latou na ma ni faafitauli pe leai. E faalogologo atu toeaina i lagona o loo faaali mai e tagata o le faapotopotoga, ma faamālō atu i ai mo ni mea ua mafai ona latou faataunuu. O se toeaina mataalia na te faia ni faamatalaga talisapaia e faatatau i se uso po o se tuafafine, ua tusa lena o loo ia faataʻitaʻi atu ia Ieova, o lē talisapaia ana foafoaga i le lalolagi.
16. Aiseā e tatau ai ona tatou manatu i toeaina o nisi ua tatau i ai le faaaloalo faatasi ma isi i le faapotopotoga?
16 I le faataʻitaʻi atu ia Ieova, e faataatia ai e toeaina se faaaʻoaʻoga lelei i le faatatauina o le timaʻiga a Paulo: “Ia fefaapelepeleai i le fealofani o uso; ia tausolomua ona ava o le tasi i le tasi.” (Roma 12:10) Atonu e faafaigatā lenei mea mo toeaina o loo nonofo i atunuu ia e masani i le faamamafa o tulaga o tagata. Mo se faaaʻoaʻoga, i se tasi atunuu Asia, e lua upu mo le “uso,” o le upu e faaaogā i tagata maualuluga ma le upu mo tagata lautele. E leʻi leva nei ona suia, ae i le taimi muamua, sa faaaogā ai lava e tagata o le faapotopotoga le upu mo ē maualuluga e faasino atu ai i toeaina ma tagata matutua, ae faaaogā le taʻu mo le lautele e faasino atu ai i isi. Peitaʻi, sa faalaeiauina i latou ina ia faaaogā le upu mo le lautele i taimi uma talu ai, e pei ona fetalai Iesu i ona soo, “o outou uma o le au uso outou.” (Mataio 23:8) E ui lava atonu i isi atunuu e lē faapea le matuā iloga mai ai o lenei faaeseesega, ae manaʻomia lava e i tatou uma ona nofouta i le faanaunauga faaletagata o le manaʻo e faia ni faaeseesega i tulaga o tagata.—Iakopo 2:4.
17. (a) Aiseā e tatau ai i toeaina ona avea o ē faigofie ona faalatalata atu i ai isi? (e) O ā auala e mafai e toeaina ona faataʻitaʻi atu ai ia Ieova a o feutagaʻi ma tagata o le faapotopotoga?
17 O le mea moni, na faalaeiau mai Paulo ia i tatou e iai ni toeaina e tatau ona tatou “faaluaina atu i ai o le taui,” peitaʻi o i latou lava o uso. (1 Timoteo 5:17) Pe afai e mafai ona tatou ‘faalatalata atu ma le faamalosi [“saʻoloto,” NW] i le nofoālii o le alofa tunoa’ o le Pule Silisili Ese Aoao, pe lē tatau ea foʻi la ona mafai ona tatou faalatalata atu i toeaina, o ē o loo tatau ona faataʻitaʻi atu ia Ieova? (Eperu 4:16; Efeso 5:1) Atonu e fua e ovasia le tele o loo mafai ona faalatalata atu ai tagata ia i latou, e ala i lo latou manatu i le tele o loo ō atu ai isi ia i latou e saili mo ni fautuaga pe faatutū atu ni o latou manatu. Ia aʻoaʻoina se lesona mai le auala o loo faaaofia ai e Ieova isi i ana galuega. Na te faamamaluina isi e ala i le faasafua atu i ai o tiute tauave. E tusa lava pe atonu o ni manatu e faatutū mai e se isi Molimau e foliga mai e lē fetaui, ae tatau lava i toeaina ona latou talisapaia le faaali mai o lagona o loo atugalu ai na tagata. Seʻi manatua le auala sa feutagaʻi ai Ieova ma fesili iloilo a Aperaamo faapea foʻi le alaga a Sapakuka i ona lagona tigā.
18. E mafai faapefea ona faataʻitaʻi atu toeaina ia Ieova i le faasaʻoina o i latou o manaʻomia se fesoasoani?
18 O nisi uso Kerisiano latou te manaʻomia ni fetuutuunaʻiga. (Kalatia 6:1) Peitaʻi, o loo tāua pea i latou i le silafaga a Ieova, ua onomea ona feutagaʻi ma i latou i se tulaga mamalu. Na faapea mai se tasi uso Molimau: “Pe a faaalia mai e se tasi o aumaia se fautuaga le faaaloalo ia te aʻu, ou te lagona foʻi le saʻoloto e faalatalata atu ia te ia.” O le toʻatele lava o tagata e talilelei mai i fautuaga pe a feutagaʻi ma i latou i se uiga mamalu. Atonu e tele se taimi e alu ai, peitaʻi o le faalogo atu i lagona o i latou ua uia laasaga sesē e atili faigofie ai foʻi mo i latou ona talia ni fautuaga o manaʻomia. Ia teu i mafaufau le auala na fefulifulisaʻi ai pea lava pea Ieova ma le fanauga a Isaraelu ona o lona alofa mutimutivale ia i latou. (2 Nofoaiga a Tupu 36:15; Tito 3:2) O fautuaga e tuuina atu i se uiga malamalama ma le tigā alofa o le a pāʻia ai loto o i latou o loo manaʻomia le fesoasoani.—Faataoto 17:17; Filipi 2:2, 3; 1 Peteru 3:8.
19. O le ā le vaaiga e tatau ona tatou vaai ai i tagata e lē o ia i latou le talitonuga faapei o Kerisiano?
19 O lo tatou faaalia o le ava i isi e faasalafa atu foʻi ia i latou e ono avea ma o tatou uso faaleagaga i se taimi o i luma. Atonu e lē vave ona talia mai e na tagata la tatou feʻau i le taimi nei, peitaʻi e manaʻomia pea ona tatou onosai ia i latou ma ia amanaʻia lo latou tulaga mamalu o ni tagata. O Ieova “ua le finagalo ia fano se tasi, a ia oo uma lava i le salamo.” (2 Peteru 3:9) Po ua lē tatau ea ona tatou faataʻitaʻi atu i le silafaga a Ieova? I le amanaʻiaina o tagata lautele, e mafai ai ona tatou faaāva le ala mo le avatuina o se molimau pe afai tatou te taumafai pea e faaalia uiga faaletuaoi. O le mea moni, tatou te taumamao mai le ituaiga o faauōga lea e ono aofia ai mea e lamatia ai faaleagaga. (1 Korinito 15:33) Peitaʻi, e mafai ona tatou faaalia le “agalelei” faaletagata ma ia lē ʻinoʻino i tagata o ē e lē tutusa o tatou talitonuga.—Galuega 27:3.
20. O le ā le mea e tatau i le faaaʻoaʻoga a Ieova ma Iesu Keriso ona uunaʻia i tatou e fai?
20 Ioe, e faitaulia e Ieova ma Iesu Keriso i tatou uma taʻitoʻatasi o nisi ua onomea i ai le faaaloalo. Tau ina ia tatou manatua pea le auala o loo la gaoioi ma faapena foʻi ona la taulamua ai i le faaalia o le faaaloalo o le tasi i le isi. Ma tau ina ia teu pea i loto fetalaiga a lo tatou Alii o Iesu Keriso e faapea: “O outou uma o le au uso outou.”—Mataio 23:8.
O le a Faapefea Ona E Tali?
• O le ā le vaaiga e tatau ona e vaai ai i isi ou uso tapuaʻi?
• E faapefea i le faaaʻoaʻoga a Ieova ma Iesu ona uunaʻia ai oe e āva atu i isi?
• E mafai faapefea i tane ma mātua ona latou āva atu i isi?
• O le manatu o toeaina i o latou uso Kerisiano o ni o latou lava uso, e uunaʻia ai i latou e gaoioi i ā auala?
[Fesili mo le Suʻesuʻega]
[Ata i le itulau 18]
Ia e āva i lau avā e ala i upu o le agaga talisapaia
[Ata i le itulau 18]
Ia e faamamaluina lau fanau e ala i lou faalogologo atu ia i latou
[Ata i le itulau 18]
Ia e feutagaʻi ma tagata o le faapotopotoga i se uiga mamalu