Olaga Lelei Atoatoa e Lē na o se Miti!

Se lalolagi lelei atoatoa—o le ā lona uiga ia te oe? Seʻi tagaʻi faalemafaufau i se sosaiete o tagata o le a iai e aunoa ma ni solitulafono, le faaaogāina o vailaau faasāina, o oge, le mativa, po o le lē faamasinotonu. E olioli tagata uma i se tulaga sili ona mālōlōina lelei i faalogona ma le tino. E leai se faanoanoa po o se lē fiafia auā e oo lava i le oti ua soloiesea. Pe o se tulaga talafeagai ea le moomoo mo sea lalolagi?

E LĒ faapea ua lē amanaʻia le agaʻi i luma o le atamai faasaienisi ma le faatekinisi ua iai, peitaʻi o le toʻatele o tagata e lē o matuā talitonu faapea o le atamai faaletagata po o lona atamai tau aʻoaʻoga, o le a aumaia ai se lalolagi lelei atoatoa lea o le a ola ai tagata uma i le filemu ma le fiafia. I le isi itu, o le faanaunauga lē mafaafitia o le tagata, o le manaʻo e faaleleia mea ma ia faasaʻo le tulaga lē lelei atoatoa o iai. O le mea moni, o le iai o ni moomooga faivavale o le a lē fesoasoani i tagata ua leai ni aiga e nonofo ai ma ē matitiva, o le a lē faamalieina ai foʻi i latou e lē atoatoa le malosi o le tino ma ē mamaʻi o loo moomoo atu mo se mapusaga mai o latou mafatiaga. O se lalolagi lelei atoatoa e lē teʻi lava ua oo mai e ala i ni gaoioiga sogasogā a tagata. E ui lava i puapuaga ma mafatiaga o loo iai i le taimi nei, peitaʻi, e iai mafuaaga maumaututū e talitonu ai ua matuā lalata mai lava le ituaiga lalolagi lea e te ono taʻua o le lalolagi lelei atoatoa.

Pe a e manatu i se olaga lelei atoatoa, atonu e tau lou mafaufau i le soifuaga o Iesu Keriso. Sa lē na o Iesu le tagata lelei atoatoa na soifua mai i le lalolagi. O Atamu ma Eva, lea na foafoaina i le faatusa o le Atua, sa la ola foʻi i se olaga lelei atoatoa i se parataiso. Peitaʻi ane, na la melea lenei tulaga sili ona lelei ona o lo la fouvale i lo la Tamā faalelagi. (Kenese 3:1-6) E ui i lea, sa tuuina e Lē na Foafoaina Mea i loto o tagata se faanaunauga ina ia ola e faavavau. E molimau le Failauga 3:11 i lena manatu: “Ua faia e [le Atua] mea uma lava e matagofie i o latou lava tausaga; ua tuuina foi e ia le [“faavavau,” NW] i o latou loto; a e le mailoa e le tagata le galuega ua faia e le Atua mai le amataga e oo i le gataaga.”

A o tataʻi atu e le lē lelei atoatoa ma le agasala le fanau a tagata i se olaga o le “iu vale” ma le “faapologaina e le iu vale,” ae seʻi mātau upu faamāfanafanaloto a le aposetolo o Paulo: “O loo faatalitali mea uma na faia ma le naunau i le faaalia mai  o atalii o le Atua. Auā ua faatoilaloina mea uma na faia i le iu vale, (e le o lona loto lea, a e peitai ona o ia na na faatoilaloina ai,) ma le faamoemoe ia tuusaunoa ia lava mea na faia ia le faapologaina e le iu vale, a e oo i le saolotoga o le fanau a le Atua e manuia ai.” (Roma 8:19-21) Ua faamanino mai e le Tusi Paia, o sauniuniga a le Atua mo le toe faafoʻisia o le olaga lelei atoatoa faaletagata ua mafai ona maua e ala mai ia Iesu Keriso.—Ioane 3:16; 17:3.

E lē gata i lenei faamoemoe ofoofogia mo le lumanaʻi, ae ua ia i tatou uma le avanoa mo le agaʻigaʻi ai i luma faaleagaga, ma ia faailoa atu lo tatou agaʻigaʻi i luma e oo lava i le taimi nei.

Taumafai e Fuafua Lelei

Sa manatu Iesu Keriso i le lelei atoatoa o se mataupu e tāua tele, o le ala foʻi lea na ia fetalai atu ai i lana aofia toʻatele: “O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.” (Mataio 5:48) Pe na faatalitalia moni ea e Iesu i tatou o le a lē ponā i lenei faiga o mea amioleaga? E leai. E mautinoa lava e tatau ona tatou taumafai e ati aʻe uiga o le lima foai, le agalelei, ma le alofa i o tatou uso a tagata, peitaʻi e masani lava ona tatou lē taulau e faia le mea tonu. E oo lava i se tasi o aposetolo o Iesu na tusi mai: “Afai tatou te taʻu atu a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava. Pe afai tatou te faapea, Tatou te lei agasala, ua tatou fai ai o ia ma pepelo, e le o i totonu ia te i tatou lana afioga.”—1 Ioane 1:9, 10, LF.

E ui i lea, e mafai ona tatou faaleleia le auala tatou te manatu ai ia i tatou lava ma feutagaʻi ai ma isi, a o alofia le soona faamamafa naʻuā. O ai e mafai ona mauaina se fua e sili atu ona lelei mo le mauaina o se uiga totino paleni ma fuafua lelei na i lo le fua lea e maua i le Afioga a le Atua, le Tusi Paia? O le atiina aʻe o na uiga e pei o le olioli ma le lotomaulalo o le a fesoasoani mai ina ia lelei ai a tatou faiā ma isi i le galuega, ma a tatou paaga faaipoipo, faapea ma o tatou mātua po o fanau. Na timaʻi mai le aposetolo o Paulo i Kerisiano: “Ia outou olioli i le Alii e le aunoa; ou te toe fai atu, ia outou olioli. Ia iloa lo outou agamalu e tagata uma lava.”—Filipi 4:4, 5.

Aogā o le Fuafua Lelei

Pe a e fuafua lelei i mea e te faatalitalia ma alofia lou faatigāina ma faatoʻilaloina oe lava e ala i lou manaʻo ia lelei atoatoa mea uma, ona e maua lea o se mea aogā mo oe lava faapea foʻi isi. O le iloaina o mea moni e te gafatia, e aofia ai lou mafaufau i mea e te mafaia moni ma mea e talafeagai, e te manaʻo e fai. Manatua, na foafoaina e le Atua i tatou ina ia ola i le lalolagi ma maua le lotomalie i galuega uigā e maua ai aogā e i tatou faapea ma isi.—Kenese 2:7-9.

Pe afai ua e soona tagisā ni mea mai ia te oe, aiseā e te lē sulu atu ai ia Ieova i le tatalo? O lou mauaina o le finagalo malie o le Atua o le a avea o se mapusaga tele mo oe. E silafia e Ieova lo tatou fausaga ma lo tatou tulaga lē lelei atoatoa, e lē o ia foʻi la o se tasi e lē fuafua lelei pe faigatā ona faamalie. Ua faamautinoa mai le faisalamo ia i tatou: “E faapei ona alofa mutimuti vale o le tamā i lana fanau, e faapea lava ona alofa mutimuti vale o Ieova i e matatau ia te ia. Auā ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:13, 14) Maʻeu so tatou lotofaafetai ona o loo feutagaʻi le Atua ma tagata i se ala alofa mutimutivale faapena! Na te silafia mea e  gata ai lo tatou mafai, peitaʻi e mafai pea ona tautele i tatou i lana silafaga e pei o le fanau pele.

Na i lo le vilivilitaʻi ia lelei atoatoa mea uma, maʻeu le sili atu ona atamai pe a ati aʻe le faautautaga faaleagaga ma se vaaiga paleni! E lē gata i lea, e mafai ona tatou mautinoa e leai se tasi e mafai ona ia taofia Ieova mai le faataunuuina o lana fuafuaga ina ia siitia le fanau a tagata i le lelei atoatoa i le pulega a le Malo o le Atua. Ae o le ā le uiga o le lelei atoatoa faaletagata?

Olaga Lelei Atoatoa e Sili Atu na i lo le Manaʻo e Lelei Atoatoa Mea Uma

O le lelei atoatoa e lē faauiga i le avea o sē manaʻo ia lelei atoatoa mea uma. O i latou ua faaeaina e ola i le Parataiso i le lalolagi i le pulega a le Malo o le Atua e mautinoa lava e lē o ni tagata e tagisā ma faafiaamiotonu naʻuā. O se tasi o manaʻoga mo le faasaoola atu i le puapuaga tele o le talisapaia lea ma le lotoatoa o le taulaga togiola, e pei ona faailoa mai e le motu o tagata e toʻatele mai atunuu uma lea e faamatalaina e le aposetolo o Ioane faapea: “O i ai le faaolataga i lo tatou Atua, o lē tietie i le nofoālii, atoa ma le Tamai Mamoe!” (Faaaliga 7:9, 10, 14) O le a lotofaafetai ē uma e faasaoina mai le puapuaga tele o loo faaloloʻi mai, talu ai sa lotomalie Keriso e maliu mo i latou faapea tagata uma o loo faaalia le faatuatua ia te ia. O lana taulaga alofa ua faataatia ai le faavae mo le aumaia o se mapusaga tumau mai o latou tulaga lē lelei atoatoa ma vaivaiga.—Ioane 3:16; Roma 8:21, 22.

O le a faapeī le olaga lelei atoatoa? Na i lo o uiga faatavā ma faanaunauga manatu faapito, ae o le a iai i tagata le alofa ma le agalelei, lea e avea ai le olaga o se mea e aogā ona ola ai, ua tafiesea ai popolega ma lagona matamuli. Peitaʻi, o le a lē avea foʻi le olaga lelei atoatoa o se mea e fiu ai, pe fāʻatu ai. E lē o aumaia e le Afioga a le Atua auiliiliga uma o mea e uiga i le Parataiso, ae o loo faamatala mai ai le ituaiga o olaga e mafai ona tatou faatalitalia: “Latou te faia fale, ma latou mau ai; latou te totō tovine, ma latou aai i o latou fua. Latou te le fai fale ina ia mau ai nisi; latou te le totō ina ia ʻai ai nisi; auā e pei o aso o le laau aso o loʻu nuu; e uma lava i e ua filifilia e aʻu o mea na faia e o latou lima. Latou te le galulue fua, latou te fananau, a e le tupu ai le atuatuvale.”—Isaia 65:21-23.

Na i lo le tau mānatu po o ā ituaiga o faafiafiaga, o faleoloa e fai ai faatauga, ni matātā faaonaponei, po o ituaiga o auala mo femalagaaʻiga o le a saunia e le Malo, seʻi e tagaʻi faalemafaufau i lou olioli ai i le faataunuuga o nei afioga: “E aai faatasi le luko ma le tamai mamoe, e ʻaina ʻau o saito e le leona e pei o le povi; a o le gata e fai mana mea e ʻai le efuefu; latou te le faia se mea leaga, latou te le faaumatia foi se mea i loʻu mauga paia uma lava, ua fetalai mai ai Ieova.” (Isaia 65:25) Maʻeu le ese o le olaga lelei atoatoa o le a iai, mai le olaga o loo e maua i aso nei! Pe a oo ina avea oe o se tasi o i latou ua faitaulia e onomea ona ola ai i lena taimi, o le a ia te oe la se mafuaaga e te mautinoa ai o le a naunau fiafia mai lou Tamā alofa faalelagi ia te oe ma lou aiga. “Ia e fiafia lava oe ia Ieova, ona foaiina lea e ia ia te oe o mea e manao i ai lou loto.”—Salamo 37:4.

O le olaga lelei atoatoa ua lē na o se miti. O le fuafuaga alofa a Ieova e faatatau i le fanau a tagata o le a faataunuuina atoatoa. E mafai e oe ma lou aiga ona iai faatasi ma i latou o le a siitia i le lelei atoatoa faaletagata ma ola e faavavau i le lalolagi fou a le Atua. Ua valoia e le Tusi Paia faapea: “E fai lava le nuu mo tagata amiotonu, e nonofo ai pea i latou.”—Salamo 37:29.

[Ata i le itulau 6]

E mafai ona tatou faaleleia le auala tatou te manatu ai ia i tatou lava faapea ma isi, e ala i le alofia o le manaʻo ia lelei atoatoa mea uma po o le faamaliegatā

[Ata i le itulau 7]

Aiseā e te lē faaata ai i lou mafaufau faapea, o lea o loo e olioli i ni tulaga filemu ma le amiotonu i totonu o le Parataiso?