Pe E te Talitonu i Mea e Lē Mafai Ona E Vaai i Ai?

PE A faapea mai se tasi, ‘Ou talitonu i na o mea lava ou te vaai i ai,’ e lē o le uiga moni lena o lana tala. O le mea moni, tatou te talitonu uma i mea tatou te lē mafai ona vaai i ai.

Mo se faaaʻoaʻoga, i le aʻoga e te ono faia ai se faataʻitaʻiga e fuafua e faamaonia ai le iai o le malosiaga faamaneta. E ono faapea lona faiga: Lūlū solo penu uʻamea i luga o se laupepa. Ona tuu lea o le pepa i luga o le maneta. Pe a e tago e luelue le pepa, o le a faafuaseʻi lava ona faapotopoto faatasi penu uʻamea i luga tonu o pole o le maneta ma faapea ai ona faatulaga e tusa ai o le malosiaga  faamaneta. Afai e te faia lena mea, pe e mafai ona e vaai moni i le malosiaga faamaneta? E leai, ae o lana taaʻiga o penu uʻamea o loo iloa atu, ua avatu ai ia te oe se faamaoniga mautinoa o loo iai le malosiaga faamaneta.

Tatou te taliaina e aunoa ma le fesiligia isi mea e lē mafai ona tatou vaaia. Pe a tatou vaai atu i se ata matagofie po o le mātauina foʻi o se ata e manaia lona mamanuina, e leai ma so tatou masalosalo i le iai o le tagata tusiata po o le tagata na mamanuina. O lea pe a tilotilo atu i se āfu po o le faataupupula atu i le goto ifo o le la, pe lē tatau ea ona uunaʻia ai i tatou e tau lava ina iloiloina le mea moni faapea o na mea o galuega ia a se Tusiata Sili po o sē Sili na Mamanuina ata?

Le Mafuaaga e Lē Talitonu ai Nisi

O le mea e faateʻia ai, ua taofia e nisi le talitonu atu i le Atua ona o mea na latou aʻoaʻoina i lotu. E moni lenei mea i se tamāloa Nōue na aʻoaʻoina faapea e susunuina e le Atua tagata amioleaga i le afi i hele. Na matuā lē malamalama le tamāloa i se ituaiga o Atua na te faasaunoa i tagata i se auala faapena, o lea na ia lē talitonu ai e iai se Atua.

Peitaʻi, mulimuli ane, na malie le tamāloa ina ia sailiili i le Tusi Paia, e ala i le fesoasoani a se tasi o Molimau a Ieova. Na matuā māofa o ia ina ua ia aʻoaʻoina faapea e lē o aʻoaʻo le Tusi Paia faapea o le a faataugaina tagata amioleaga i se afi i hele. Ua faatusaina e le Tusi Paia le oti i le moe. I le tuugamau, tatou te lē lagona ai se tigā; tatou te lē toe iloa lava se mea. (Failauga 9:5, 10) Na aʻoaʻoina foʻi e le tamāloa faapea o tagata ia ua faamasinoina e le Atua faapea ua matuā mataʻutia le leaga ma e lē mananaʻo e suia o latou olaga o le a iai pea i le tuugamau e faavavau. (Mataio 12:31, 32) O le isi vaega uma o loo maliliu o le a toe faatutūina mai i le taimi atofaina a le Atua, faatasi ma le faamoemoega o le mauaina o le ola e faavavau i tulaga o se Parataiso. (Ioane 5:28, 29; 17:3) E fetaui lenei faamatalaga. E ōgatusa lelei ma le faamatalaga a le Tusi Paia faapea o le “Atua, o le alofa lava ia.” (1 Ioane 4:8) Na faaauau le suʻesuʻeina o le Afioga a le Atua e lenei tamāloa lotofaamaoni, ma i se taimi, na ia lagona ai le alofa i le Atua o le Tusi Paia.

Ua teena e nisi le iai o Sē na Foafoaina Mea e agaalofa ona o le taatele o mafatiaga ma faiga piʻopiʻo. Latou te ioe faatasi ma se tasi tamāloa mai Suetena na ia faasino atu i le lagi i se tasi taimi ma fesili: “E faapefea ona iai se Atua silisili ese, e anoanoaʻi mea na te foai o loo i lugā, ae o loo tatou fesagaʻi ma le tele o faiga piʻopiʻo ma le amioleaga i lalo nei?” Talu ai e leai se isi na mafai ona ia taliina lana fesili, na avea ai foʻi o ia ma se tasi e lē talitonu o loo soifua le Atua. Mulimuli ane na amata ona ia suʻesuʻeina le Tusi Paia ma Molimau a Ieova. Na ia aʻoaʻoina faapea o loo saunia mai e  le Afioga a le Atua tali faamalieloto i le fesili ua autausagā o iai, Aiseā e faataga ai e le Atua puapuaga? *

Na aʻoaʻoina e lenei tamāloa faamaoni faapea o le iai o le amioleaga e lē faapea ua faamaonia ai le leai o se Atua o soifua. Ina ia faataʻitaʻi: Atonu e fau e se tagata se naifi ina ia faaaogā e tipi ai aano o manu. E ono faatau mai e se tagata lena naifi ma faaaogā, e lē ina ia tipi ai aano o manu, ae ina ia fasiotia ai se isi. O le mea moni faapea o le faaaogāsesē o le naifi e lē faamaonia ai faapea e lē o iai lē na faia le naifi. I se tulaga talitutusa, o le mea moni faapea o le lē faaaogāina o le lalolagi e tusa ai o lona fuafuaga na mafaufauina ai, e lē faapea ai e lē o iai Sē na Foafoaina Mea.

O loo aʻoaʻo le Tusi Paia faapea e lelei atoatoa galuega a le Atua. “E le o [ia te ia] se amioletonu, o le amiotonu ma le amio saʻo lava ia.” (Teuteronome 32:4) E avatu e le Atua meaalofa e lelei i tagata, ae ua faaaogāsesēina nisi o meaalofa, ua māfua ai le anoanoaʻi o mafatiaga. (Iakopo 1:17) Peitaʻi, o le a faaiʻuina e le Atua mafatiaga. Pe a mavae lena, “o e agamalu, e fai mo latou le nuu; . . . e nonofo ai pea i latou.”—Salamo 37:11, 29.

Na lagona e le tamāloa Suetena lea na taʻua muamua le lotomomomo pe a vaai atu i mafatiaga o uso a tagata. O le mea moni, o lona manatu alofa mo isi ua faamaonia ai le iai o le Atua. E faapefea?

Mo le toʻatele o tagata, pau lava le manatu e ese mai le talitonu i le Atua o le talitonu lea i le evolusione. E aʻoaʻo e faiaʻoga o le evolusione le “faasaoina o ē sili ona malolosi”—e tauivi tagata faapena foʻi ma manu i o latou ituaiga eseese ina ia faasaoina. O ē sili ona malolosi e feola; a o ē sili ona vaivai e feoti ma mamate. Latou te fai mai, o le faasologa lena o le natura o mea. Ae afai o le “natura” lava lea o ē vaivai o le feoti po o le mamate ina ia tuua ai na o ē malolosi, e faapefea la ona tatou faamatalaina le mea moni faapea, pei lava o le tamāloa Suetena, o nisi o tagata malolosi o loo momomo i le vaai atu i mafatiaga o o latou uso a tagata?

Taumafai ia Iloa le Atua

E lē mafai ona tatou vaaia le Atua ona e leai sona tino faaletagata. E ui i lea, e finagalo le Atua ia tatou taumafai ia iloa o ia. O se tasi o auala tatou te faamasani atu ai ia te ia e ala i le mātauina o ana galuega ofoofogia—o “ata” ma “mamanu” o le foafoaga. Ua faapea mai le Tusi Paia i le Roma 1:20: “O mea [a le Atua] e le vaaia talu ona faia o le lalolagi, e vaaia lava ia i le mafaufau i mea na faia, o lona mana faavavau lava lea ma lona Atua.” Ioe, o le tau lava ina suʻesuʻe o se ata po o se mea na mamanuina e mafai ona fesoasoani ia te oe e maua ai le malamalama i uiga o le tusiata, o le manatunatu loloto i galuega mamana a le Atua e mafai ona fesoasoani ia te oe ina ia matuā masani lelei ma ona uiga totino.

O le mea moni, e lē mafai ona tatou taliina uma fesili e atuatuvale ai le olaga i le tau lava ina vaai atu i galuega ofoofogia a le Atua. Ae e mafai ona tatou maua tali i na fesili e ala i le sailiili i le Afioga a le Atua, le Tusi Paia. O le faitauina o le Tusi Paia faatasi ma se utaga poto na mafai ai e tamāloloa e toʻalua na taʻua muamua ona faia le la faaiʻuga faapea o loo soifua le Atua ma e manatu mai o ia i mea o loo tutupu ia i tatou.

[Faamatalaga pito i lalo]

[Ata i le itulau 28]

Is There a Creator Who Cares About You?

[Faamatalaga i Ata i le itulau 28]

J. Hester and P. Scowen (AZ State Univ.), NASA