Faaaʻoaʻoga Lelei—Po o E Maua Mai ai ni Aogā?

“UA AVEA ai outou ma faaaʻoaʻo i e ua faatuatua uma lava o i Maketonia atoa ma Akaia.” Na tusi atu e le aposetolo o Paulo nei upu i Kerisiano faamaoni o loo nonofo i Tesalonia. O le faaaʻoaʻoga na latou faataatia mo uso talitonu o se mea moni e sili ona lelei. E ui i lea, sa tali atu lava tagata Tesalonia i le faaaʻoaʻoga na faataatia e Paulo ma ana aumea. Na faapea mai Paulo: “E lei oo atu la matou tala lelei ia te outou na o le upu, a o le mana, ma le Agaga Paia, atoa ma le mautinoa lava. Ua outou iloa la matou amio ona o outou, a o matou i ai ma outou. Sa outou faaaʻoaʻo mai foi ia te i matou.”—1 Tesalonia 1:5-7.

Ioe, e tele atu mea na faia e Paulo na i lo ana lauga. O lona lava olaga sa avea o se lauga—o se faaaʻoaʻoga o le faatuatua, tumau, ma le faataulagaina totino. Ona o lena, na oo ai ina avea Paulo ma ana aumea o se taaʻiga malosi i olaga o tagata Tesalonia, i le uunaʻia o i latou ina ia taliaina le upu moni “i le puapuaga tele.” E ui i lea, e lē na o Paulo ma ana aumea galulue sa avea o ni taaʻiga lelei i na tagata talitonu. Sa avea foʻi o se faalaeiauga ia faaaʻoaʻoga a isi o ē na tumau i puapuaga. Na tusi atu Paulo i tagata Tesalonia e faapea: “Le au uso e, na outou faaaʻoaʻo i ekalesia a le Atua o i Iutaia, o loo ia Keriso Iesu; auā o outou foi na tigaina outou i ia lava mea i tagata o lo outou lava nuu, faapei ona tigaina o i latou foi ia Iutaia.”—1 Tesalonia 2:14.

Keriso Iesu—Le Faaaʻoaʻo Sili

E ui ina sa faataatia e Paulo se faaaʻoaʻoga e ono ma tatau ona faataʻitaʻi i ai, ae sa leʻi taulau o ia i le faasino atu ia Iesu Keriso e avea ma faaaʻoaʻoga autū e ao i Kerisiano ona mulimuli ai. (1 Tesalonia 1:6) O Keriso sa avea ma o loo avea pea ma o tatou Faaaʻoaʻo sili. Na tusi faapea le aposetolo o Peteru: “Na valaauina outou ona o lea lava mea; aua na tigaina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagaaao.”—1 Peteru 2:21.

Peitaʻi, na faaiʻuina le soifuaga o Iesu o se tagata i le toeitiiti 2,000 tausaga ua tuanaʻi. I le taimi nei o loo “afio [o ia] i le malamalama e le masao i ai se tasi” o se foafoaga agaga e lē mafai ona maliu. I le avea ma lena ituaiga o foafoaga agaga, “e lei vaaia o ia e se tasi tagata, e le mafai foi ona vaai i ai.” (1 Timoteo 6:16) E faapefea la ona tatou faaaʻoaʻo ia te ia? O se tasi o auala o le suʻesuʻeina o tala e fa o loo i le Tusi Paia e uiga i le soifuaga o Iesu. Ua saunia mai e Evagelia le malamalama e uiga i ona uiga, gasologa o lona soifuaga, ma ona “manatu.” (Filipi 2:5-8) E mafai ona maua se malamalamaga faaopoopo e ala i le suʻesuʻeina ma le faaeteete o le tusi Le Tagata Silisili o Ē Uma na Soifua Mai, lea o loo talanoa ai mea na tutupu i le soifuaga o Iesu i se auala e sili ona auʻiliʻili ma i le faasologa o taimi na tutupu ai. *

O le faaaʻoaʻoga a Iesu o le faataulagaina totino na iai sona aafiaga malosi i le aposetolo o Paulo. Na ia taʻu atu i Kerisiano i Korinito e faapea: “Ou te matuā fiafia lava e faauma aʻu mea, ia faaumatia foi aʻu ona o outou agaga.” (2 Korinito 12:15) Maʻeu se uiga pei o Keriso! A o tatou manatunatu i faaaʻoaʻoga lelei atoatoa a Keriso, e tatau foʻi ona uunaʻia ai i tatou ina ia faaaʻoaʻo ia te ia i ala o o tatou lava olaga.

Mo se faataʻitaʻiga, na aʻoaʻo e Iesu i tatou faapea e ao ona tatou faalagolago i le folafolaga a le Atua ina ia saunia mai mea faaletino. Ae sili atu le mea  na faia e Iesu na i lo lena. Na ia faaalia se faatuatua faapena ma se mautinoa ia Ieova i aso uma. Na ia fetalai e faapea: “E fai lua o alope, e fai foi mea e momoe ai manu felelei; a o le Atalii o le tagata, e leai se mea e moe ai o ia.” (Mataio 6:25; 8:20) Pe o pulea ea lou mafaufau ma au gaoioiga e le manatu mamafa i mea faitino? Pe o faamaonia mai ea e lou olaga faapea o loo e saʻilia muamua le Malo? Ae faapefea lou manatu atu i le auaunaga ia Ieova? Pe e faapei ona faia e lo tatou Faaaʻoaʻo, o Iesu? O loo faaalia i le Tusi Paia faapea e leʻi tau ina talaʻi e Iesu le maelega ae na ia faaalia foʻi le maelega aasa i le tele o vala. (Ioane 2:14-17) E lē gata i lea, maʻeu se faaaʻoaʻoga lelei na faataatia e Iesu pe a fua atu i le alofa! Ioe, na ia faataulagaina lona lava ola mo ona soo! (Ioane 15:13) Pe o e faaaʻoaʻo ia Iesu i le faaalia o le alofa i ou uso Kerisiano? Pe o e faatagaina ea le lē lelei atoatoa o nisi e faalavelave ai lou alofa mo i latou?

I lo tatou tauivi e mulimuli i le faaaʻoaʻoga a Keriso, i nisi o taimi o le a tatou lē taulau ai. Ae mautinoa o loo faamalieina Ieova i a tatou taumafaiga ina ia “oofu i le Alii o Iesu Keriso.”—Roma 13:14.

‘Fai ma Faaaʻoaʻo i le Lafu Mamoe’

Pe o iai ni tagata i le faapotopotoga i aso nei e mafai ona avea ma ni faaaʻoaʻo mo i tatou? E mautinoa lava o loo iai! Aemaise lava o uso ua tofia i tulaga e tauaveina ai tiute e tatau lava ona latou faataatia se faaaʻoaʻo. Na taʻu atu e Paulo ia Tito, o lē na auauna i faapotopotoga i Kereta ma o lē sa ia tofia ni ovasia, faapea, o toeaina tofia uma lava e ao ona avea o se “tasi e le mataʻuleagaina.” (Tito 1:5, 6) Na faapena lava foʻi ona apoapoaʻi le aposetolo o Peteru i “toeaina” ina ia avea ma “faaaʻoaʻo i le lafu mamoe.” (1 Peteru 5:1-3) Ae faapefea i latou o loo auauna o ni auauna o le faiva? E tatau foʻi ona avea i latou ma “e ua lelei ona fai o le faiva o le tiakono.”—1 Timoteo 3:13.

O le mea moni, e lē o se manatu saʻo le faatalitalia faapea o toeaina uma lava po o auauna o le faiva o le a tū matilatila lo latou tomai i vala uma o le faiva faa-Kerisiano. Na taʻu atu e Paulo i Kerisiano i Roma e faapea: “O loo eseese foi a tatou mea e tufaina mai i le alofa tunoa ua foaiina mai ia te i tatou.” (Roma 12:6) E tofu uso eseese ma vala eseese e lelei ai. E lē talafeagai le faatalitalia faapea o le a gaoioi ma faia mai e toeaina ni faamatalaga i se uiga lelei atoatoa. “O mea e tele e sese ai i tatou uma,” ua faapea mai ai le Tusi Paia i le Iakopo 3:2. “A lē sese se tasi i le upu, o le tagata lea ua sao, na te mafaia foi ona taofi i le tino uma.” Peitaʻi, e ui i o latou vaivaiga, e mafai lava e toeaina, pei o Timoteo ona, ‘fai ma faaaʻoaʻo i e ua faatuatua, i le upu, ma le amio, ma le alofa, ma le loto, ma le faatuatua, ma le amio mamā.’ (1 Timoteo 4:12, LF) Pe a faia faapea e toeaina, o le a vave lava ona faatatauina e le lafu le apoapoaʻiga a le Eperu 13:7: “Ia outou manatua o outou taʻitaʻi, . . . ia outou faaaʻoaʻo i lo latou faatuatua, ma ia mafaufau i le iuga o a latou amio.”

Isi Faaaʻoaʻoga i Aso Nei

I le faitau sefulu tausaga ua mavae, e lē mafaitaulia isi na faaalia le avea o i latou ma faaaʻoaʻoga lelei. Ae faapefea le faitau afe o misionare faataulagaina totino o ē ua latou “tuua o fale, po o uso, po o tuafāfine, po o le tamā, po o le tinā, po o le fanau, po o fanua” ina ia faataunuu le tofiga faa-Kerisiano i atunuu ese? (Mataio 19:29, LF ) Seʻi manatu foʻi i ovasia femalagaaʻi ma o latou faletua, o tane ma fafine o loo auauna o ni ē tauofo i ofisa o le Sosaiete o le Olo Matamata, ma paeonia o loo auauna atu i faapotopotoga. Pe mafai e na faaaʻoaʻoga ona uunaʻia ai isi? E manatua pea e se tasi faievagelia Kerisiano i Asia se misionare mai le vasega lona valu a le Aʻoga Faale-Tusi Paia a le Olomatamata o Kiliata. Na ia faapea mai sa “lotomalie [lenei uso faamaoni] e fesagaʻi ma le mumu mai o namu ma le mataʻutia o le vevela o le tau. . . . O le mea e sili atu ona maofa ai o lona tomai e faia ai taulimaga i le faa-Saina ma le faa-Malay e ui e sau mai Egelani.” O ā āuga o lenei faaaʻoaʻoga lelei? Na faapea mai le uso: “O lona toʻafimālie ma le mautinoa na faagaee ai aʻu ou te manaʻo e avea ma misionare pe a ou matua.” E lē o se mea e faateʻia ai, na avea lenei uso ma misionare.

 Ua iai i le Watch Tower Publications Index se lisi o le anoanoaʻi o talaaga o soifuaga o tagata sa aliali mai lea i le mekasini o Le Olomatamata ma le Ala Mai! Ua taʻua mai i nei tala ni tagata na latou lafoaʻia galuega totogi ma sini faalelalolagi, manumalo i vaivaiga, faia ni suiga matilatila i o latou uiga totino, tausia se uiga mautinoa a o fesagaʻi ma puapuaga, ma le faaalia o le filigā, tumau, alofa faamaoni, lotomaulalo, ma se agaga faataulagaina totino. Na tusi se tasi tagata faitau e tusa ai o nei faamaumauga e faapea: “Ona o na tala ua atili ai ona avea aʻu ma se Kerisiano e agamalu ma lotofaafetai a o oʻu faitauina mea na fesagaʻi ma isi, ma ua fesoasoani ia te aʻu e lē ina ia manatu tele ai ia te aʻu lava po o le manatu faapito.”

E faaopoopo atu i lena, aua neʻi faagaloina faaaʻoaʻoga lelei i lau lava faapotopotoga: o ulu o aiga o ē e taulau i le tausia o manaʻoga faaletino ma faaleagaga o o latou aiga; tuafāfine—e aofia ai ma tinā nofo toʻatasi—o ē latou te taulimaina omiga o le tausia o le fanau a o faapena foʻi ona faia se vaega olaola i le faiva; o ē matutua ma ē vaivai o loo faaauau pea ma le faamaoni e ui i le faatuputupulaʻia pea o faafitauli ma le faalētonu o le soifua mālōlōina. Pe e lē o uunaʻia ea oe e na faaaʻoaʻoga?

O le mea moni, ua faatumulia le lalolagi i faaaʻoaʻoga leaga. (2 Timoteo 3:13) E ui i lea, seʻi manatu i le apoapoaʻiga a Paulo i Kerisiano na nonofo i Iutaia. Ina ua māeʻa ona toe taʻua amio lelei ua fai ma faaaʻoaʻo a le toʻatele o tane ma fafine faatuatua anamua, ona augani atu lea o le aposetolo o Paulo ia i latou e faapea: “O lenei, o i tatou foi, o loo ua vagavagaia e le faapotopotoga o e matamata mai e faapea ona toatele, ina tatou . . . taufetuli ma le onosai i le ala tanu o i o tatou luma, ma ia vaavaai atu ia Iesu, o lē na te taʻitaʻiina ma le na te faaatoatoaina le faatuatua.” (Eperu 12:1, 2) O Kerisiano i aso nei o loo vagavagaia e se ‘faapotopotoga e toatele’ o faaaʻoaʻoga lelei—e lē gata i aso anamua ae faapea foʻi ma aso nei. Pe o e mauaina moni ni aogā mai ia i latou? E mafai pe afai e te maumauaʻi e avea ma se “faaaʻoaʻo [e lē] i le leaga, na o le lelei.”—3 Ioane 11.

[Faamatalaga pito i lalo]

[Faamatalaga faaopoopo i le itulau 20]

E lē o se vaaiga saʻo le faatalitalia faapea o toeaina uma po o auauna o le faiva o le a tū matilatila o latou tomai i vala uma o le faiva faa-Kerisiano

[Ata i le itulau 21]

O toeaina e ao ona fai ma “faaaʻoaʻo i le lafu mamoe”