Ia Folafola ma le Naunauta‘i le Tala Lelei
Ia Folafola ma le Naunautaʻi le Tala Lelei
“Ia malosi le loto, ia auauna i le Alii [Ieova].”—ROMA 12:11.
1, 2. O le ā le uiga e tauivi Kerisiano ina ia tausisia i lo latou avea o ni ē talaʻia le tala lelei?
UA FIAFIA lava si alii talavou i lana galuega fou. I lona uluaʻi aso i le galuega, ua ōliōli atu e faatalitalia faatonuga a lona pule. Ua lē manofo i le fia paʻi atu i lana uluaʻi galuega o le a fai ma ua matuā alu i ai lona ulu. Ua naunau lava e tuu atoa i ai lona faimea lelei.
2 E faapena tonu lava le auala e ono manatu ai foʻi i tatou o ni Kerisiano ia i tatou lava i le avea o ni tagata faigaluega fou. Talu ai o loo tatou faamoemoe ia ola e faavavau, e mafai la ona faapea atu o lea faatoʻā tau amata ona tatou galulue mo Ieova. E mautinoa lava le anoanoaʻi o a tatou galuega ua faatulaga mai e Lē na Foafoaina i tatou lea o le a tele ai pea mea tatou te faia seʻia oo i le faavavau. Peitaʻi o le uluaʻi tofiga lava na tuuina mai ia i tatou o le folafolaina lea o le tala lelei o lona Malo. (1 Tesalonia 2:4) O le ā so tatou lagona i lenei tofiga mai le Atua? I le pei o le alii talavou, tatou te mananaʻo e tuu atoa i ai lo tatou faimea lelei, ma le maelega, ma le olioli—ioe, ma le naunautaʻi!
3. O le ā e manaʻomia ina ia taulau manuia ai o se faifeʻau o le tala lelei?
3 Ua ioeina, o le tausisia o sea uiga mautinoa e mafai ona avea o se luʻi. E lē gata i la tatou faiva, ae tele foʻi isi o tatou tiute tauave, o nisi o na tiute atonu e alu ai lo tatou malosi faaletino ma faalogona ootia. O le tele lava o taimi, ua mafai ai ona tatou faafoeina nei mea a o talafeagai foʻi ona tatou uaʻi atu i le faiva. Peitaʻi, e mafai ona avea ma tauiviga faifai pea. (Mareko 8:34) Sa faamamafa mai e Iesu faapea o lo tatou taulau manuia o ni Kerisiano o le a manaʻomia ai taumafaiga malolosi.—Luka 13:24.
4. E mafai faapefea e popolega o aso taʻitasi ona aafia ai la tatou vaaiga faaleagaga?
4 Ona o le tele o meafai, e faigofie ai lava ona lagona le popole pe mafatia i nisi o taimi. O le “popole i mea a le olaga nei” e mafai ona tineia ai lo tatou maelega ma le agaga talisapaia mo gaoioiga faatiokarate. (Luka 21:34, 35; Mareko 4:18, 19) Ona o lo tatou tulaga faaletagata lē lelei atoatoa, tatou te ono tuua ai ‘lo tatou uluai alofa.’ (Faaaliga 2:1-4) O nisi o vala o la tatou auaunaga ia Ieova e oo ina avea ua na o se faasologa fai. Ua faapefea ona saunia mai e le Tusi Paia faalaeiauga manaʻomia mo i tatou ina ia tausia ai pea lo tatou aasa mo le faiva?
E Pei o “se Afi Mumū” i o Tatou Loto
5, 6. Sa faapeʻī le manatu o le aposetolo o Paulo i lona faaeaga o le talaʻi atu?
5 O le faiva ua tuuina mai e Ieova ia i tatou e matuā tautele naʻuā, ua lē tatau ai ona faatagaina se isi mea e suitulaga ane i ai. Sa vaai le aposetolo o Paulo i le talaʻiga o le tala lelei o se faaeaga e sili ona maualuga, ma sa ia manatu ia te ia lava o sē ua lē talafeagai ona tuu mai i ai lenei faaeaga. Na ia faapea mai: “Ua au mai ia te au, le aupito itiiti lava i le au paia uma, lenei lava alofa tunoa, ina ia ou folafola atu i nuu ese le oloa faulai o Keriso e le masuesueina lava; e faamalamalamaina atu foi i tagata uma le uiga o le sauniuniga o le mea lilo sa natia talu mai i tupulaga anamua i le Atua, o le na faia mea uma lava.”—Efeso 3:8, 9, LF.
6 O uiga mautinoa o Paulo i lana faiva, ua avea o se faaaʻoaʻoga e sili ona lelei mo i tatou. I lana tusi atu i uso i Roma, na ia taʻua ai: “Ou te naunau ai, ia ou folafola le tala lelei.” Sa leʻi mā o ia i le tala lelei. (Roma 1:15, 16) Sa ia te ia le uiga saʻo ma sa naunau e faaauau lana faiva.
7. I lana tusi atu i uso i Roma, o le ā sa lapataʻia ai i latou e Paulo?
7 Sa amanaʻia e le aposetolo o Paulo le manaʻoga mo le tausisia o se vaaiga maelega, o lea na ia timaʻia ai Kerisiano i Roma: “Aua le faavaivai i le filigā, ia malosi le loto, ia auauna i le Alii [Ieova].” (Roma 12:11) O le upu Eleni ua faaliliuina i le “faavaivai” e tauave ai le manatu o le “paiē, faatuutuu.” E ui atonu tatou te lē faavaivai moni i la tatou faiva, ae manaʻomia e i tatou uma ona mataalia i so o se āuga e vave ona aliali mai o le paiē faaleagaga, ma faia loa fetuutuunaʻiga talafeagai i o tatou uiga pe afai tatou te mātauina ua ia i tatou na āuga.—Faataoto 22:3.
8. (a) O le ā na avea e peiseai o “se afi mumū” i le loto o Ieremia, ma aiseā? (e) O le ā se lesona e mafai ona tatou aʻoaʻoina mai le mea na tupu ia Ieremia?
8 E mafai foʻi ona fesoasoani mai le agaga o le Atua ia i tatou pe a tatou faavaivai. Mo se faataʻitaʻiga, i se tasi taimi na faavaivai ai le perofeta o Ieremia, ma mafaufau ai o le a faamuta ana galuega faaperofeta. Na oo lava ina faapea mai o ia e faatatau ia Ieova: “Ou te le taʻutaʻuina o ia, ma ou le toe tautala i lona suafa.” Pe na avea ea lenei uiga o se faamaoniga o se matuā vaivai faaleagaga o Ieremia? E leai. O le mea moni, o le malosi o le itu faaleagaga o Ieremia, lona alofa mo Ieova, ma lona maelega mo le upu moni na faamalosia ai o ia e faaauau pea ana valovaloga. Ua ia faamatala mai: “O [i] loʻu loto [le afioga a Ieova] e peiseai o se afi mumū sa i ai, ua punitia i oʻu ivi, ua lailoa aʻu i onosai, ua ou le mafaia lava.” (Ieremia 20:9) O se uiga faalenatura le oo i auauna faamaoni a le Atua o le lotovaivai mai lea taimi i lea taimi. Ae pe a latou tatalo atu ia Ieova mo le fesoasoani, o le a ia faitauina o latou loto ma foaʻi mai ma le lē faatuaoia lona agaga paia pe afai, i le pei o Ieremia, ua latou teulotoina ana afioga.—Luka 11:9-13; Galuega 15:8.
“Aua Tou te Tineia le Agaga”
9. O le ā e mafai ona punitia ai le galuega a le agaga paia mo i tatou?
9 Na timaʻi le aposetolo o Paulo i uso i Tesalonia: “Aua tou te tineia le Agaga.” (1 Tesalonia 5:19) Ioe, o gaoioiga ma uiga e feteenaʻi ma mataupu silisili faale-Atua e mafai ona punitia ai le galuega a le agaga paia mo i tatou. (Efeso 4:30) Ua iai i Kerisiano i aso nei le tofiga e talaʻia le tala lelei. E tatou te matuā faaaloalogia lenei faaeaga. E lē o se mea tatou te ofo ai pe a ʻinoʻino mai i la tatou galuega talaʻi i latou e lē iloa le Atua. Peitaʻi pe afai e faatalalē ma le loto i ai se Kerisiano i lana faiva, e ono iʻu ai i lona taofia o le galue mai o le agaga o le Atua.
10. (a) E mafai faapefea i manatu o o tatou uso a tagata ona aafia ai i tatou? (e) O le ā le vaaiga maualuga e faatatau i la tatou faiva ua faamatala mai i le 2 Korinito 2:17?
10 E iai nisi i fafo atu o le faapotopotoga Kerisiano atonu e manatu i la tatou faiva ua na o se tufatufaga o lomiga. O isi atonu e faia se faaiʻuga sesē faapea ua na ona tatou ō atu lava i lea fale i lea fale ina ia maua mai ni foaʻi tauofo. Pe afai tatou te faataga na manatu sesē e faaaafia ai o tatou uiga, e ono faaitiitia ai e lenei mea lo tatou uigā i le faiva. Na i lo le faataga o na mafaufauga e faaaafia ai i tatou, seʻi o tatou tausisia le vaaiga lea e iai ia Ieova ma Iesu e faatatau i la tatou faiva. Na faaleo e le aposetolo o Paulo lena vaaiga maualuga ina ua ia folafola mai: “O i matou nei, e le pei o le toatele o e o faafilogia le afioga a le Atua; a ua matou tautalatala atu mai le loto lelei, mai le Atua foi, o i luma o le Atua, o i matou ua ia Keriso.”—2 Korinito 2:17.
11. O le ā na mafai ai e uluaʻi Kerisiano ona tutumau i le maelega e ui lava i sauāga, ma e ao faapefea i la latou faaaʻoaʻoga ona aafia ai i tatou?
11 E leʻi leva atu lava le maliu o Iesu, ae fesagaʻi loa ona soo i Ierusalema ma se vaitaimi o sauāga. Sa faamataʻuina i latou ma poloaʻia ina ia taofia le talaʻi atu. Peitaʻi, ua faapea mai le Tusi Paia sa “tutumu foi i latou uma i le Agaga Paia, ma ua tautala atu i le afioga a le Atua ma le loto tele.” (Galuega 4:17, 21, 31, LF ) O upu a Paulo ia Timoteo i ni tausaga mulimuli ane ua faataʻitaʻia ai le manatu mautinoa e tatau i Kerisiano ona tausisia. Na faapea atu Paulo: “Ua le foaiina mai e le Atua ia te i tatou le agaga e mataʻu ai, a o le agaga e faamalosi ai, ma alofa ai, ma pulea ai o tatou loto. O lenei, aua e te mā i le molimau i lo tatou Alii, po o ona o aʻu o loo noanoatia ona o ia; a ia tiga faatasi i tatou ona o le tala lelei, e tusa ma le mana o le Atua.”—2 Timoteo 1:7, 8, LF.
O le ā se Mea o Tatou Nofo Aitalafu ai i o Tatou Tuaoi?
12. O le ā le mafuaaga autū tatou te talaʻia ai le tala lelei?
12 Ina ia iai se uiga talafeagai i la tatou faiva, e ao lava ona ia i tatou se uunaʻiga saʻo. Aiseā tatou te talaʻi ai? O le mafuaaga autū lea e mātauina i upu a le faisalamo: “E faafetai atu foi ia te oe [Ieova] ou tagata amio Atua. E tautalatala atu i latou i le mamalu o lou malo, ma taʻutaʻu atu i lou mana; ina ia faailoa atu i le fanau a tagata ana mea mamana, ma le mamalu matagofie o lona malo.” (Salamo 145:10-12) Ioe, tatou te talaʻi ina ia viiviia ai Ieova i le lautele ma faapaia ai lona suafa i luma o tagata uma. E tusa lava pe toʻaitiiti tagata e faalogo mai ia i tatou, ae o lo tatou folafola atu ma le faamaoni o le feʻau o le faaolataga e aumaia ai le viiga ia Ieova.
13. O le ā ua faagaeetia ai i tatou e taʻu atu i isi le faamoemoe o le faaolataga?
13 Tatou te talaʻi foʻi ona tatou te alolofa i tagata ma ina ia alofia ai lo tatou nofosala i le toto. (Esekielu 33:8; Mareko 6:34) E fesootaʻi i lenei manatu upu a Paulo ina o tautala e uiga ia i latou e lē o iai i le faapotopotoga Kerisiano: “Ua ou nofo aitalafu i tagata Eleni atoa ma nuu ese, o ē popoto atoa ma ē valelea.” (Roma 1:14, NW ) Sa lagona e Paulo lona nofo aitalafu i tagata i le folafola atu o le tala lelei ia i latou, talu ai e finagalo le Atua ina ia “faaolaina o tagata uma lava.” (1 Timoteo 2:4) I aso nei, ua tatou lagona ai lena lava alofa ma ua avea o sa tatou avega tauave i o tatou tuaoi. O le alofa o Ieova mo le fanau a tagata na uunaʻia ai o ia e auina mai lona Alo i le lalolagi ina ia maliu mo i latou. (Ioane 3:16) O se faataulaga tele lena! Tatou te faataʻitaʻi i le alofa o Ieova pe a tatou faaalu se taimi ma taumafaiga e taʻu atu ai i isi le tala lelei o le faaolataga e faavae i le taulaga a Iesu.
14. E faapefea ona faamatala e le Tusi Paia le lalolagi lea e i fafo atu o le faapotopotoga Kerisiano?
14 E manatu Molimau a Ieova i o latou uso a tagata o nisi e ono mafai ona iai i lo latou ʻauuso Kerisiano. E ao ona tatou talaʻi atu ma le lototele, peitaʻi o lo tatou lototele e lē faia faafinau. O le mea moni, e faaaogā e le Tusi Paia ni faaupuga malolosi a o tautala faalauaʻitele e faatatau i le lalolagi. O le upu “lalolagi” lava ia o loo faaaogā i se faauigaga lē lelei e Paulo ina ua ia tautala e faatatau i “le poto o lenei lalolagi” ma “tuʻinanau faalelalolagi.” (1 Korinito 3:19; Tito 2:12) Na faamanatu atu foʻi e Paulo i Kerisiano Efeso e faapea, a o latou savavali “e tusa ma le tu a lenei lalolagi,” sa latou “oti” faaleagaga. (Efeso 2:1-3) O nei faamatalaga ma isi faamatalaga faapena o loo ōgatusa ma upu a le aposetolo o Ioane: “O le lalolagi uma o loo nofo toilalo i loo leaga.”—1 Ioane 5:19.
15. E tusa ai o tagata e lē o iai i le faapotopotoga Kerisiano, o le ā e lē tatau ona tatou faia, ma aiseā e lē tatau ai?
15 Peitaʻi, ia manatua, o na faamatalaga e faasino faalauaʻitele atu i le lalolagi lea ua vavae ese mai le Atua, ae lē i tagata taʻitoʻatasi. E lē faafiapopoto Kerisiano e muaʻi faamasino po o le a faapeʻī le tali mai a so o se tagata i le galuega talaʻi. E lē o ia i latou se faavae mo le faaigoaina o so o se tagata faapea o se ʻoti. E lē ia i tatou se aiā e taʻu atu ai po o le ā le iʻuga o le a iai pe a afio mai Iesu e tuueseese “mamoe” mai “ʻoti.” (Mataio 25:31-46) O Iesu le faamasino tofia; e lē o tatou. E lē gata i lea, ua faaalia i mea tutupu o nisi na matuā aafia i ni amioga sili ona matagā ua latou taliaina nei le feʻau a le Tusi Paia, ua suia, ma avea o ni Kerisiano e ola i ni olaga mamā. O lea la, e ui tatou te lē mananaʻo e auaufaatasi ma nisi tagata patino, peitaʻi tatou te lē faatalatū ai e talanoa atu ia i latou e uiga i le faamoemoe o le Malo pe a maua se avanoa. O loo tautala le Tusi Paia e faatatau i nisi o ē, a o avea pea ma ni tagata lē talitonu, sa “saunia i le ola e faavavau.” Na mulimuli ane avea i latou ma tagata talitonu. (Galuega 13:48) E lē taitai mafai ona tatou iloa po o ai ua saunia seʻi vaganā ua tatou molimau atu i ai—atonu i ni taimi se tele. O le manatuaina o lena mea, e tatou te feutagaʻi ai ma i latou o ē leʻi taliaina le feʻau o le faaolataga i se uiga “agamalu” ma le “ava,” i le faamoemoe atonu e iai nisi o i latou o le a talilelei mai i le feʻau o le ola.—2 Timoteo 2:25; 1 Peteru 3:15.
16. O le ā se tasi o mafuaaga tatou te mananaʻo ai e ati aʻe le tomai o “le aʻoaʻo atu”?
16 O le atiina aʻe o tomai o ni faiaʻoga o le a faateleina ai lo tatou naunautaʻi e folafola le tala lelei. Mo se faataʻitaʻiga: O se taaloga po o se fāʻagatama manaia, atonu e lē fiafia i ai se tagata e lē iloa taalo ai. Ae i le tagata lea e iloa lelei taalo ai, e matuā fiafia ai lava. E faapena foʻi i Kerisiano o loo atiina aʻe le tomai o “le aʻoaʻo atu” ona faateleina lo latou olioli i le faiva. (2 Timoteo 4:2; Tito 1:9) Na fautua atu Paulo ia Timoteo: “Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te talaʻitonuina le upu moni.” (2 Timoteo 2:15, LF ) E mafai faapefea ona tatou ati aʻe o tatou tomai tau aʻoaʻo atu?
17. E mafai faapefea ona tatou faatupu aʻe se “naunau” i le poto faale-Tusi Paia, ma o le a faapefea ona aogā lena poto i la tatou faiva?
17 O se tasi o auala o le aveina atili i fale o le poto saʻo. Ua faalaeiau mai le aposetolo o Peteru ia i tatou: “Faapei o tama meamea faatoa fanau mai, ia naunau outou i le suāsusu faaleagaga e le suia, ina ia outou tutupu ai i le faaolataga.” (1 Peteru 2:2, LF) O se pepe e ola mālōlōina e vave tele lona naunau i le suāsusu. Peitaʻi, o se Kerisiano atonu e manaʻomia ona ia faatupu aʻe sona “naunau” i le poto faale-Tusi Paia. E mafai ona faatino lenei mea e ala i le ati aʻe o masaniga lelei tau suʻesuʻe ma le faitautusi. (Faataoto 2:1-6) E manaʻomia taumafaiga ma le pulea totino pe afai tatou te mananaʻo e avea i tatou o ni faiaʻoga tomai o le Afioga a le Atua, ae o na taumafaiga e aumaia ai ni taui. O le fiafiaga e maua mai le iloiloina o le Afioga a le Atua o le a faamalosia ai o tatou loto i le agaga o le Atua, ma tatou naunautaʻi ai e tufa atu i isi mea ua tatou aʻoaʻoina.
18. E mafai faapefea e sauniga faa-Kerisiano ona faaauupegaina ai i tatou e taulima ma le tonu le upu moni?
18 E iai foʻi se vaega tāua tele a sauniga faa-Kerisiano i lo tatou faaaogāina ma le tomai o le Afioga a le Atua. Pe a faitauina mau o le Tusi Paia a o faia lauga lautele ma isi talanoaga faale-Tusi Paia, e lelei pe a tatou mulimuli atu i ai i a tatou lava Tusi Paia. E atamai mo i tatou ona uaʻi lelei atu i vaega o sauniga, e aofia ai vaega o loo talanoaina patino ai la tatou galuega talaʻi. Aua lava neʻi o tatou manatu māmā i le aogā o faataʻitaʻiga, atonu pe i lo tatou faataga o o tatou mafaufau e tafatafao solo. O iinā foʻi e manaʻomia ai le pulea totino ma le uaʻi atu. (1 Timoteo 4:16) O sauniga faa-Kerisiano e ati aʻe ai lo tatou faatuatua, e fesoasoani ia i tatou e faatupu aʻe se naunau mo le Afioga a le Atua, ma toleni ai i tatou ia avea ma ē folafola ma le naunautaʻi le tala lelei.
E Mafai Ona Tatou Mautinoa i le Lagolagosua a Ieova
19. Aiseā e tāua tele ai le faia e lē aunoa o se sao i le galuega talaʻi?
19 O Kerisiano o ē “malosi le loto” ma naunau e folafola atu le tala lelei, e tauivi ina ia faia e lē aunoa so latou sao i le faiva. (Efeso 5:15, 16) E moni, e fesuisuiaʻi tulaga o mea, ma e lē o tagata uma e mafai ona tutusa se aofaʻiga o taimi latou te faaalu i lenei galuega faasaoola. (Kalatia 6:4, 5) Peitaʻi, atonu o le mea e sili atu ona tāua na i lo le aofaʻiga o taimi tatou te faaalu i le galuega talaʻi, o le faifai pea lea ona tatou talanoa atu i isi e uiga i lo tatou faamoemoe. (2 Timoteo 4:1, 2) O le tele tatou te talaʻi ai, o le tele foʻi lena o le a tatou talisapaia ai le tāua o lenei galuega. (Roma 10:14, 15) O le a faatuputele ai lo tatou alofa mutimutivale ma lagona faaleuso pe a tatou fetaiaʻi e lē aunoa ma tagata lotofaamaoni o loo oi ma mapuitigā ma ua leai so latou faamoemoe.—Esekielu 9:4; Roma 8:22.
20, 21. (a) O le ā le galuega o loo folasia mai pea mo i tatou? (e) O loo faapefea ona lagolagoina e Ieova a tatou taumafaiga?
20 Ua tuuina mai e Ieova le tala lelei ia i tatou. O le uluaʻi tofiga lenei ua tatou maua mai ia te ia i lo tatou avea o se “au faigaluega” faatasi ma ia. (1 Korinito 3:6-9) Tatou te naunau e faataunuu ma le lotoatoa lenei tiute tauave mai le Atua, i se tulaga e sili ona lelei tatou te mafai. (Mareko 12:30; Roma 12:1) O loo iai pea i le lalolagi le toʻatele o tagata e lelei o latou loto, o loo gālala mo le upu moni. O loo tele pea galuega e fai, peitaʻi e mafai ona tatou mautinoa le lagolago mai a Ieova a o tatou faataunuuina la tatou faiva.—2 Timoteo 4:5.
21 Ua ofo mai e Ieova ia i tatou lona agaga ma faaauupegaina i tatou i “le pelu a le Agaga,” le Afioga a le Atua. O lana fesoasoani ua mafai ai ona tatou faaaogā o tatou gutu e “faamalosi ona tautala atu ma faailoa atu le mea lilo a le tala lelei.” (Efeso 6:17-20, LF ) Talosia e fai mai ia i tatou faamatalaga ia na tusi atu ai le aposetolo o Paulo i Kerisiano i Tesalonia: “E lei oo atu la matou tala lelei ia te outou na o le upu, a o le mana, ma le Agaga Paia, atoa ma le mautinoa lava.” (1 Tesalonia 1:5) Ioe, tau ina ia tatou folafola atu ma le naunautaʻi le tala lelei!
Se Autaluga Puupuu
• Talu ai popolega o le olaga, o le ā e mafai ona tupu i lo tatou maelega i le faiva?
• I le ā le auala e tatau ai i lo tatou faanaunauga e folafola atu le tala lelei ona pei o “se afi mumū” i o tatou loto?
• O ā uiga lē mautinoa agaʻi i le faiva e tatau ona tatou alofia?
• I se tulaga faalauaʻitele, e tatau faapefea ona tatou manatu ia i latou e lē tutusa o tatou talitonuga?
• E faapefea ona fesoasoani mai Ieova ia i tatou ina ia tausisia lo tatou maelega i le galuega talaʻi?
[Fesili mo le Suʻesuʻega]
[Ata i le itulau 9]
E faataʻitaʻi atu Kerisiano i le maelega o Paulo ma Ieremia
[Ata i le itulau 10]
O lo tatou naunautaʻi i le faiva ua uunaʻia e lo tatou alofa i le Atua ma tuaoi