O Fea E te Maua ai le Filemu o le Mafaufau?

E tele eseesega i le va o o tatou vaitaimi ma taimi o Thoreau, lea na taʻua i le mataupu na muamua atu. O se tasi o eseesega tele ona i aso nei, ua matuā fau ma soloi fautuaga i auala e maua ai le filemu o le mafaufau. O fomaʻi o le mafaufau ma tusitala o tusi e mafai e le tagata lava ia ona suʻe i ai mo vaifofō—e oo lava i tusitala o nusipepa—ua ofoina mai ni o latou manatu. Atonu pe iai ni aogā o a latou fautuaga mo sina taimi puupuu; peitaʻi ina ia maua ni vaifofō e umi ona aogā, e manaʻomia ai se mea e sili atu ona loloto. O le mea lena na iloa e i latou sa taʻua i le mataupu na mavae atu.

O ATONIO, Mareko, Keresona, Vania, ma Masele e eseese uma lava talaaga na soifua mai ai ma e eseese foʻi o latou faafitauli. Ae pe ā ma le tolu ni mea e tutusa uma ai latou. Muamua, sa iai se taimi na ‘leai ai so latou faamoemoe, sa aunoa foi ma le Atua i le lalolagi.’ (Efeso 2:12) Lona lua, sa latou moomoo mo se filemu o le mafaufau. Ma lona tolu, na maua uma e i latou le filemu o le mafaufau lea sa latou mananaʻo ai ina ua latou taliaina se suʻesuʻega faale-Tusi Paia ma Molimau a Ieova. A o latou agaʻigaʻi pea i luma, na oo ina latou iloa ai o loo naunau mai le Atua ia i latou. O le mea moni, e pei ona taʻu atu e Paulo i tagata i Atenai i ona vaitaimi, “e le mamao [le Atua] ma i tatou taitoatasi.” (Galuega 17:27) O le matuā talitonu  ma le mautinoa i lenei manatu o se vala autū lena i le mauaina o le filemu o le mafaufau.

Aiseā ua Itiiti ai le Filemu?

E lua mafuaaga autū ua aumai e le Tusi Paia mo le leai o se filemu i le lalolagi—pe o le filemu i le mafaufau po o le filemu i le va o tagata. O le mafuaaga muamua o loo faamatala mai i le Ieremia 10:23: “E le o i le tagata lona ala, e le o i le tagata e savali ona faatonuina le mea e ui ai o ia.” E lē o iai i le tagata le atamai, e lē o ia te ia foʻi le tofa mamao na te pulea ai o ia lava e aunoa ma se fesoasoani, ma e na o le pau lava le fesoasoani e iai lona aogā moni, o lea e maua mai le Atua. O tagata o ē lē saili atu i taʻiala a le Atua o le a lē taitai ona latou maua le filemu tumau. O le mafuaaga lona lua mo le leai o se filemu o loo mātauina mai upu a le aposetolo o Ioane: “O le lalolagi uma o loo nofo toilalo i loo leaga.” (1 Ioane 5:19) Pe a aunoa ma se taʻitaʻiga tauatua, e fiu lava taumafaiga a le tagata e fia maua le filemu ae o le a faalēaogāina pea e gaoioiga a le peresona e lē o vaaia ae o loo iai moni lava—ma matuā malosi—‘o lē o leaga,’ o Satani.

Mo nei mafuaaga e lua—e lē o saʻili atu le toʻatele o tagata i taʻiala a le Atua ma o loo matuā aafia foʻi Satani i meafai i le lalolagi—ua oo ai le fanau a tagata i sona aotelega i se tulaga faanoanoa. Ua lelei ona faamatala mai e le aposetolo o Paulo lea tulaga: “Ua oi faatasi, ma oono faatasi mea uma lava na faia, ua oo mai lava i ona po nei.” (Roma 8:22) O ai e mafai ona tetee atu i lena fua faatatau? I atunuu mauʻoa faapea foʻi atunuu matitiva, ua avea faafitauli i aiga, solitulafono, faamasinogalētonu, feteenaʻiga i le va o tagata, lē mautinoa o tulaga o le tamaoaiga, feitagaʻiga i le va o lanu ma ituaiga, faiga faatigā, maʻi, ma le tele o isi mea, ua aveesea mai ai i tagata le filemu o le mafaufau.

Le Mea e Maua ai le Filemu o le Mafaufau

Ina ua suʻesuʻeina e Atonio, Mareko, Keresona, Vania, ma Masele le Afioga a le Atua, le Tusi Paia, na latou aʻoaʻoina ai mea na mafua ai ona suia o latou olaga. O se faataʻitaʻiga, na latou aʻoaʻoina e iai se aso o le a ese ai le tulaga o loo iai le lalolagi. Ua lē na o se faamoemoe faanenefu lenei, e faapea o le a suia i le lelei mea uma lava i le iʻuga. O se talitonuga e moni, ua lelei ona faavaeina e faapea, e iai se fuafuaga a le Atua mo le fanau a tagata lea e oo lava i aso nei, ua mafai ona tatou maua mai ai aogā i lena fuafuaga pe afai tatou te faia lona finagalo. Sa latou faatatauina i o latou olaga mea na latou aʻoaʻoina mai le Tusi Paia, ma toe sologa lelei ai mea mo i latou. Sa latou mauaina ai se fiafiaga ma se filemu e sili atu na i lo mea na latou mafaufauina e ono iai.

Ua lē o toe auai Atonio i solo tetee ma femisaʻiga i le va o tagata faigaluega. Ua ia iloa o suiga e maua mai na faiga ua mo na o sina taimi e lē tumau. Ua aʻoaʻoina nei e lē sa muaʻi avea ma taʻitaʻi o tagata faigaluega mea e uiga i le Malo o le Atua. O le Malo lea o loo tatalo i ai le faitau miliona o tagata pe a latou fai faatauloto le Tatalo a le Alii (po o, Lo Matou Tama e,) ma faapea atu i le Atua: “Ia oo mai lou malo.” (Mataio 6:10a) Na aʻoaʻoina e Atonio, o le Malo o le Atua o se pulega moni faalelagi o le a na aumaia le filemu moni i le fanau a tagata.

Na aʻoaʻoina e Mareko e tatau ona ia faatatauina fautuaga atamai a le Tusi Paia i le mataupu o le faaipoipoga. O le iʻuga, ua toe autasia nei lenei tagata sa avea muamua o se faipolotiki ma lana avā. O loo tulimataʻia foʻi e ia le taimi, ua lē o toe umi ona oo mai lea, o le a suia ai e le Malo o le Atua lenei faiga o mea matapeʻapeʻa ma le manatu faapito a le lalolagi, i se faiga o mea e sili atu ona lelei. Ua matuā loloto atu nei lona malamalamaga i le fuaiupu o le Tatalo a le Alii lea e faitauina faapenei: “Ia faia lou finagalo, I le lalolagi e pei ona faia i le lagi.” (Mataio 6:10e) Pe a faia le finagalo o le Atua i le lalolagi, ona tofo ai lea o le fanau a tagata i se ituaiga o olaga sa leʻi vaaia muamua lava.

Ae faapefea Keresona? E lē o toe maumausolo o ia ma avea o se gaoi. O lenei talavou na muaʻi nofonofo solo i magaala, ua uigā moni nei lona olaga auā o loo ia faaaogā lona malosi e fesoasoani atu  ai i isi tagata ina ia latou maua le filemu o le mafaufau. E pei ona faaalia mai e nei mea tutupu, o le suʻesuʻeina o le Tusi Paia ma faatatauina mea o fai mai ai e mafai ona matuā suia ai le olaga o se tagata i se tulaga e sili atu ona lelei.

Filemu o le Mafaufau i se Lalolagi ua Tumu i Faalavelave

O le tagata autū o talafaasolopito i le faatinoina o le finagalo o le Atua o Iesu Keriso lea, ma pe a suʻesuʻe e tagata le Tusi Paia faatasi ma Molimau a Ieova, latou te aʻoaʻoina ai le tele o mea e uiga ia te ia. I le po na fanau mai ai o ia, na usu ai e agelu viiga o le Atua: “O le viiga i le Atua i mea aupitoaluga; ma le manuia [“filemu,” NW] i le lalolagi i tagata ua alofagia e ia!” (Luka 2:14) A o tuputupu aʻe Iesu, sa mamafa i lona finagalo le faaleleia o olaga o tagata. Sa malamalama o ia i o latou faalogona ma faaalia le tele o lona alofa mutimutivale mo ē puapuagatia ma ē mamaʻi. Ma, i le ōgatusa ma upu a agelu, sa ia aumaia sina filemu o le mafaufau i ē agamalū. I le iʻuga o lana faiva, na ia fetalai atu ai i ona soo: “Ou te tuuina atu ia te outou le manuia [“filemu,” NW]; o loʻu manuia [filemu] ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”—Ioane 14:27.

E tele atu nisi mea na faia e Iesu na i lo le na ona avea ma sē faia mea lelei mo tagata. Sa ia faatusatusa atu o ia lava i se leoleo mamoe, ma na ia faatusaina ona soo agamalū i ni mamoe ina ua ia fetalai atu: “Ua ou sau ina ia latou maua le ola, ia maua atili ai lava. O aʻu le leoleo mamoe lelei. E tuu atu e le leoleo mamoe lelei o lona ola mo mamoe.” (Ioane 10:10, 11, LF ) Ioe, i se faaeseesega ma le toʻatele o taʻitaʻi i aso nei o ē muamua ona uaʻi atu ma faasilisilia i latou lava, o Iesu na ia foaʻi mai lona soifua mo ana mamoe.

E mafai faapefea ona aogā ia i tatou le mea na faia e Iesu? E toʻatele ua masani i upu nei: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.” (Ioane 3:16) O le faaalia o le faatuatua ia Iesu e manaʻomia ai, muamua lava, le poto e uiga ia te ia ma lona Tamā, o Ieova. O le poto e uiga i le Atua ma Iesu Keriso e mafai ona taʻitaʻia atu ai i se faiā māfana ma Ieova le Atua, lea o le a fesoasoani ia i tatou e maua ai le filemu o le mafaufau.

Na fetalai Iesu: “O aʻu mamoe e faalogo mai i latou i loʻu leo, ua ou iloa foi i latou, ua latou mulimuli mai foi ia te au; ou te avatu foi le ola faavavau ia te i latou; latou te le fano lava e oo i le faavavau, e le mafai lava e se tasi ona fao ia te i latou ai loʻu lima.” (Ioane 10:27, 28) Maʻeu ni fetalaiga alofa ma le faamāfanafanaloto! E ui sa fetalaia e Iesu na upu i le toetoe lua afe tausaga ua mavae, ae o lea lava o loo matuā uigā i aso nei e pei ona sa iai i tuā iinā. Ia aua lava neʻi galo, o loo soifua pea ma gaoioi Iesu Keriso, o loo pule nei i le avea o le Tupu ua faanofotupuina o le Malo faalelagi a le Atua. O loo manatu mamafa mai pea o ia i ē agamalū o loo moomoo mo se filemu o le mafaufau, e pei lava foʻi ona sa ia faia a o femaliuaʻi i le lalolagi i tausaga e tele ua tuanaʻi. E lē gata i lea, o loo avea pea o ia ma Leoleo Mamoe i ana mamoe. Pe afai tatou te mulimuli ia te ia, o le a ia fesoasoani mai ia i tatou e foaʻi mai le filemu o le mafaufau, lea e aofia ai se faatalitaliga mautinoa o le vaai atu i le filemu atoatoa i le lumanaʻi—lea o le a uiga i le lē toe iai o ni faiga sauā, taua, ma solitulafono.

O aogā moni e maua mai le iloaina ma le talitonu faapea, e ala mai ia Iesu, o le a fesoasoani mai ai Ieova ia i tatou. E te manatua foʻi Vania lea a o teineitiiti sa tuua o ia ma ni tiute tauave mamafa ma manatu ai ua faagaloina o ia e le Atua? I le taimi nei, ua iloa e Vania e lē o tuulafoaʻia o ia e le Atua. Ua ia faapea mai: “Ua ou iloa nei o le Atua o se peresona moni lava e iai ona uiga faapelepele. O lona alofa na uunaʻia ai o ia e auina mai lona Alo i le lalolagi e foaʻi mai mo i tatou le ola. E tāua tele le iloa o lenei mea.”

E molimau Masele i le moni o le la faiā ma le Atua. Fai mai se faamatalaga a lenei tagata sa fai mana vaisū i taimi muamua le faipātī: “E masani lava ona lē iloa e talavou se mea e fai, ona iʻu ane  lea ua latou faamanuʻaina i latou lava. O nisi ua faaaogāina vailaau faasāina, e pei ona sa ou faia. Ou te faamoemoe o le a toʻatele nisi talavou e faamanuiaina o latou olaga e pei ona ou oo i ai, e ala i lo latou aʻoaʻoina o le upu moni e uiga i le Atua ma lona Alo.”

E ala i se suʻesuʻega māeʻaeʻa o le Tusi Paia, na ati aʻe ai e Vania ma Masele se faatuatua malosi i le Atua ma lo la mautinoa i lona naunau e fesoasoani mai ia i laʻua i le taulimaina o o la faafitauli. Pe afai tatou te faia le mea na la fai—suʻesuʻe le Tusi Paia ma faatatauina mea o fai mai ai—o le a tatou mauaina ai se vaega tele o le filemu o le mafaufau, e pei foʻi ona la faia. O le a faatatau moni mai lava ia i tatou faalaeiauga a le aposetolo o Paulo: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”—Filipi 4:6, 7.

Mauaina o le Filemu Moni i Aso Nei

O loo taʻitaʻiina atu e Iesu Keriso tagata o ē gālala mo upu moni i le ala e oo atu ai i le ola e faavavau i se lalolagi parataiso. A o ia taʻitaʻia atu i latou i le tapuaʻiga mamā a le Atua, ua latou tofo ai i le filemu lava lea e tasi o loo faamatalaina i le Tusi Paia e faapea: “E nonofo foi loʻu nuu i le mea e manuia ai, ma fale e saogalemu ai, ma mapusaga e filemu ai.” (Isaia 32:18) Ae ua na o se tofo lena i le filemu o le a latou olioli ai i le lumanaʻi. Ua tatou faitau e faapea: “O e agamalu, e fai mo latou le nuu; e faafiafia foi i latou ia te i latou ona o le manuia e tele. E fai lava le nuu mo tagata amiotonu, e nonofo ai pea i latou.”—Salamo 37:11, 29.

Pe mafai ea la ona tatou maua le filemu o le mafaufau i aso nei? Ioe. E lē gata i lea, e mafai ona tatou mautinoa i le lumanaʻi ua lē o toe mamao, o le a faamanuia mai ai le Atua i tagata usiusitaʻi i le foaʻi mai i ai o le filemu lea sa leʻi faapea ona iai muamua. Aiseā la, e te lē ole atu ai loa ia te ia i le tatalo e foaʻi mai ia te oe lona filemu? Pe afai o iai ni ou faafitauli o aveesea ai lou filemu, ia tatalo atu i le auala lea na tatalo ai le tupu o Tavita: “Ua faateleina puapuaga o loʻu loto; ia e aveeseina aʻu i mea ou te tiga ai. Ia e silasila mai i loʻu puapuaga ma loʻu tiga; ma ia e faamagaloina aʻu agasala uma lava.” (Salamo 25:17, 18) Ia e mautinoa e faafofoga mai le Atua i na tatalo. Na te faaloaloa lona aao ma foaʻi mai le filemu i ē uma o loo saʻili atu ma le lotofaamaoni. Ua faamautinoa mai ma le alofa ia i tatou: “E latalata mai Ieova ia i latou uma o e valaau ia te ia, o i latou uma o e valaau ia te ia ma le faamaoni. E faia e ia le mea e manao i ai o e matatau ia te ia; e faafofoga foi o ia i la latou alaga atu, ma faaolaina i latou.”—Salamo 145:18, 19.

[Faamatalaga faaopoopo i le itulau 5]

E lē o iai i le tagata le atamai, e lē o ia te ia foʻi le tofa mamao na te pulea ai o ia lava e aunoa ma se fesoasoani, ma e na o le pau lava le fesoasoani e iai lona aogā moni, o lea e maua mai le Atua

[Faamatalaga faaopoopo i le itulau 6]

O le poto e uiga i le Atua ma Iesu Keriso e mafai ona taʻitaʻia atu ai i se faiā māfana ma Ieova le Atua, lea o le a fesoasoani ia i tatou e maua ai le filemu o le mafaufau

[Ata i le itulau 7]

O le usitaʻia o fautuaga a le Tusi Paia e maua ai se olaga filemu faaleaiga