Pe Mafai Ona E Maua le Filemu o le Mafaufau?

I tuā i le 1854, na tusia ai e se alii tusitala Amerika o Henry Thoreau se faamatalaga e faapea: “E anoanoaʻi tagata o loo ola i ni olaga o mafatiaga ae lē leoa.”

E iai faamaoniga e iloa ai, i ona vaitaimi, o le toʻatele o tagata sa latou lē maua se filemu o le mafaufau. Peitaʻi, o mea na sa tutupu i le toetoe 150 tausaga ua mavae. Po ua ese ea le tulaga o mea i aso nei? Pe o le mea o loo faatatau mai pea upu a Thoreau i aso nei? Ae faapefea oe lava ia? Po o faamalieina oe, ma e maua le filemu? Po o le mea o loo e lagona le lē saogalemu, le lē mautinoa i le lumanaʻi, o loo e ‘mafatia lē leoa’ lava pe a toe faaupu le faamatalaga a Thoreau?

E FAANOANOA lava, ona e tele mea i le lalolagi ua tumau ai ona aveesea mai i tagata le filemu o le mafaufau. Seʻi o tatou taʻua na o ni nai faataʻitaʻiga. I le tele o atunuu, o le leai o ni galuega ma le itiiti o tupe maua ua oo mai ai le mativa ma aumaia ai ma le fememeaʻi tau i le tamaoaiga. I isi atunuu, e toʻatele tagata ua faaalu uma le tele o lo latou malosi i le saʻilia o ʻoa ma meafaitino. Peitaʻi, e masani lava, o le olaga faatavā o loo aofia ai, ua aumaia ai popolega, ae lē o le filemu. O maʻi, taua, solitulafono, lē faamasinotonu, ma mafatiaga ua aveesea ai foʻi le filemu mai tagata.

Sa Latou Saʻilia le Filemu o le Mafaufau

E toʻatele tagata e lē o naunau e onosaʻia le tulaga ua iai nei le lalolagi. O Atonio * sa avea ma taʻitaʻi i tagata faigaluega i se falegaosimea telē lava i São Paulo, i Pasili. I lona faamoemoe ia faaleleia tulaga o le soifuaga, sa fai ai sana vaega i solo tetee, peitaʻi sa leʻi aumaia ai e lenei mea ia te ia le filemu o le mafaufau.

O nisi ua faamoemoe faapea o le faaipoipoga o le a aumaia ai sina toʻafimālie i o latou olaga, ae atonu ua latou toe salamō ai. Sa avea Mareko o se tagata faipisinisi taulau manuia. Sa auai o ia i faiga faapolotiki ma oo ina avea ma pulenuu o se aai tamaoaiga. Peitaʻi, sa matuā leagafaia lava le olaga o lona aiga. Ina ua tuua e lana fanau le aiga, sa teteʻa foʻi o ia ma lana avā ona o ni feeseeseaʻiga sa lē mafai ona toe faaleleia.

O Keresona, o se tamaitiiti na nofonofo solo i magaala i Salvador, i Pasili, sa manaʻo e fia tofotofo i mea eseese. Sa faasolosolo lava ona alu atu mai lea aai i lea aai, e suʻesuʻe  lifi atu lava i aveloli. E leʻi leva ae avea loa ma se tagata ua pulea e vailaau faasāina, ua ia gaoia foʻi mea a tagata e totogi ai ana amioga leaga nei. E tele ni taimi na puʻe ai o ia e leoleo. Peitaʻi, e ui i ona uiga malolosi ma le sauā, ae sa faanaunau lava Keresona mo se filemu i lona mafaufau. Pe iai ea se taimi o le a mafai ai ona ia maua lea filemu?

E maliu le tinā o Vania a o laitiiti lava o ia, ma na faatino ai loa e Vania tiute tauave i le aiga, e aofia ai le tausia o si ona uso laitiiti e maʻi. Sa alu Vania i le lotu peitaʻi na iai ona lagona ua tuulafoaʻia o ia e le Atua. E mautinoa lava sa leai se filemu o lona mafaufau.

Sa faapena foʻi Masele. Na pau lava le mea na manaʻo ai Masele o faafiafiaga. Sa fiafia e fai pātī ma isi talavou—e sisiva, inu ʻava malosi, ma faaaogā vailaau faasāina. I se tasi aso, na la fufusu ai ma se isi tama talavou ma lavea ai le tama talavou lea. Mulimuli ane, sa ia manumalo mai ona lagona faanoanoa i le mea na ia faia ma tatalo atu ai i le Atua mo se fesoasoani. Sa manaʻo foʻi o ia i se filemu o le mafaufau.

O nei mea na tutupu ua faataʻitaʻia mai ai nisi o tulaga e mafai ona faaleagaina ai le filemu o le mafaufau. Pe sa iai ea se auala na ono mafai ai e le taʻitaʻi o tagata faigaluega, le faipolotiki, le tamaitiiti sa nofonofo solo i magāala, le teineitiiti sa pologa i le tele o ana feʻau, ma le tagata faipātī, ona maua se filemu o le mafaufau lea sa latou saʻilia? Pe iai ea se mea tatou te aʻoaʻoina mai tulaga na tutupu ia i latou? O le tali i na fesili uma e lua o le ioe, e pei ona o le a tatou tagaʻi i ai i le mataupu o sosoo mai.

[Faamatalaga pito i lalo]

[Ata i le itulau 3]

Po o e moomoo ea mo le filemu o le mafaufau?