E Iai le Mana o le Faamoemoe i le Toetū
E Iai le Mana o le Faamoemoe i le Toetū
“Ua ou faaleaogaina mea uma . . . ina ia ou iloa [Iesu Keriso], ma le mana o lona toe tu mai.”—FILIPI 3:8-10.
1, 2. (a) I tausaga ua mavae, na faapefea ona faamatalaina e se tasi taʻitaʻi lotu le toetū? (e) O le a faapefea ona faatino le toetū?
I LE amatamataga o tausaga e faasolo mai le 1890, na lipotia ai e faasalalauga i le lautele se lauga mataʻina na lauga ai se taʻitaʻi lotu i Purukulini, Niu Ioka, i le Iunaite Setete o Amerika. Na ia saunoa faapea o le toetū o le a aofia ai le toe aoaoina ma le toe faaolaolaina o ivi uma ma aano sa faia aʻe ai le tino o se tagata, pe na faaumatia i se afi pe i se isi faalavelave, e tusa lava po ua ʻaina e se manu feʻai po ua liu fetalaisa. Na taʻua e le faifeʻau faapea, i se aso patino e 24 itula, o le a matuā lilofia ai le vanimonimo i lima, o vae, o tamatamaʻilima, o ivi, o uaua, ma paʻu o tino o le fia miliona o tagata ua maliliu. O le a saʻilia e nei vaega isi vaega o se tino lava e tasi. Ona ō mai lea o solu mai le lagi ma seoli ma ulu atu i totonu o nei tino ua toe faatutūina mai.
2 O se toetū e ala i le toe faamaopoopoina o uluaʻi atoma na fai ai le tino, o se manatu e lē talafeagai, ma e lē o iai i tagata se solu e lē mafai ona oti. (Failauga 9:5, 10; Esekielu 18:4) E lē manaʻomia e Ieova, le Atua o le toetū, ona ia tau faaputuputuina ni atoma o ni mea sa muaʻi fausia ai le tino o se tagata. E mafai ona ia toe faia ni tino fou mo i latou e toetutū mai. Na foaʻi atu e Ieova i lona Alo, o Iesu Keriso, le mana na te faatutū mai ai ē ua oti, ma se faamoemoe o le ola e faavavau. (Ioane 5:26) O lea na fetalai ai Iesu: “O aʻu nei o le toe tu ma le ola; o lē faatuatua mai ia te au, e ui lava ina oti, a e ola lava ia.” (Ioane 11:25, 26) Maʻeu se folafolaga faamāfanafanaloto! E faamalosia ai i tatou ina ia onosaia puapuaga ma ia tumau pea o ni Molimau faamaoni a Ieova e tusa lava pe fesagaʻi ma le oti.
3. Aiseā na manaʻomia ai e Paulo ona tū malosi atu mo le puipuia o le toetū?
3 E lē fesootaʻi le toetū ma le aʻoaʻoga faapea e iai i tagata se solu e lē mafai ona oti—o se manatu na faatulaʻi mai e le faifilosofia Eleni o Palato. O lea la, o le ā na tupu ina ua molimau atu le aposetolo o Paulo i tagata Eleni lauiloa i Areopako i Atenai, i lona faaataata atu Iesu, ma faapea atu na faatūina mai o ia e le Atua? E faapea le tala: “Ua faalogo e i latou i le toe tu mai o e ua oti, ona tauemu mai ai lea o isi.” (Galuega 17:29-34) E toʻatele i latou na vaai ia Iesu Keriso ua toe faatūina, sa soifua mai pea, ma e ui i tauemuga, ae na latou molimau mai ua toe faatūina o ia nai le oti. Peitaʻi, sa faafitia le toetū e aʻoaʻo pepelo o ē na auaufaatasi ma le faapotopotoga i Korinito. O lea na tū malosi atu ai Paulo mo le puipuia o lenei aʻoaʻoga faa-Kerisiano i le 1 Korinito mataupu e 15. O le suʻesuʻeina māeʻaeʻa o ona manatu e matuā faamaonia ai le mautinoa ma le mana o le faamoemoe i le toetū.
Faamaoniga Malosi o le Toetū o Iesu
4. O ā ni faamaoniga vaaitino i le toetū mai o Iesu na taʻu atu e Paulo?
4 Seʻi mātau le auala na amata ai e Paulo lana finauga. (1 Korinito 15:1-11) O le a pipii mau pea Kerisiano Korinito i le tala lelei o le faaolataga, seʻi vaganā ua leai se aogā o lo latou avea o ni tagata talitonu. Na maliu Keriso mo a tatou agasala, sa tanumia, ma toe faatūina mai. O le mea moni, sa faaali atu Iesu o lē na toetū mai, ia Kefa (Peteru), “ona iloa lea e le toasefulu ma le toalua.” (Ioane 20:19-23) Na vaaia o ia e nisi pe toʻa 500, atonu pe ina ua ia poloaʻi atu: ‘Ia fai ma soo.’ (Mataio 28:19, 20) Na vaaia o ia e Iakopo, e pei foʻi ona vaaia e isi uma aposetolo faamaoni. (Galuega 1:6-11) E latalata ane i Tamaseko, na faaali atu ai Iesu ia Saulo “e peiseai se tama fanau le au”—e peiseaī ua uma ona faatūina aʻe Saulo i le olaga agaga. (Galuega 9:1-9) Na oo ina talitonu tagata Korinito auā sa talaʻi atu Paulo ia i latou, ma latou talia ai le tala lelei.
5. O le ā le manatu na faaalia atu e Paulo o loo faamauina i le 1 Korinito 15:12-19?
5 Seʻi mātau mai le manatu faaalia o Paulo. (1 Korinito 15:12-19) Talu ai o loo talaʻia e i latou na vaaitino ua toe faatūina mai Keriso, e faapefea la ona fai mai e leai se toetū? Pe afai e leʻi toe faatūina Iesu nai le oti, e leai la se aogā o la tatou talaʻiga ma lo tatou faatuatua, o i tatou foʻi la o ni tagata pepelo o loo molimau e tetee atu i le Atua, e ala i lo tatou faapea atu na toe faatūina mai Keriso. Pe afai ua lē faatūina mai ē ua oti, ‘ua nofo sala pea la i tatou,’ ma o ē na oti o ia Keriso e tanumia pea i latou. E lē gata i lea, “afai e gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava.”
6. (a) O le ā na fai mai ai Paulo i le faamautinoaina o le toetū mai o Iesu? (e) O le ā “le toe fili,” ma o le a faapefea ona faaumatia?
6 Ua faamautinoa mai e Paulo le toetū o Iesu. (1 Korinito 15:20-28) E pei lava ona avea Keriso o le “faapolopolo” po o le uluaʻi fua o i latou ua momoe i le oti, e faapena foʻi ona toe faatutūina mai isi. E pei ona oo mai le oti ona o le lē usiusitai o le tagata o Atamu, ua faapena foʻi ona oo mai le toetū ona o se tagata—o Iesu. O i latou e ʻau ia te ia e tatau ona toe faatutūina i le taimi o lona faatasi mai. E “faaumatia e [Keriso] o alii sili uma, ma faipule uma, ma e malolosi” o loo tetee atu i le pule silisili ese a le Atua, ma pule ai e fai ma Tupu seʻia oo ina tuuina e Ieova fili uma i lalo o ona aao. E oo lava i “le toe fili”—le oti tuufaasolo mai ia Atamu—o le a faaumatia e ala i le aogā o le taulaga a Iesu. Ona toe faafoʻi atu lea e Keriso le Malo i lona Atua ma o lona Tamā, ma gauaʻi atu o ia lava i “le na tuuina i lalo ia te ia o mea uma, ina ia pule aoao le Atua i le aoao o mea.”
Papatiso mo Ē ua Oti?
7. O ai “ua papatisoina ina ia avea ma sui o e ua oti,” ma o le ā le uiga o lenei mea mo i latou?
7 Na fesiligia ē tetee i le toetū: “Pe faapefea e ua papatisoina [“ina ia avea,” NW] ma sui o e ua oti?” (1 Korinito 15:29) Sa leʻi uiga Paulo faapea e tatau ona papatisoina o ē o ola e fai ma sui o ē ua oti, auā e tatau i soo o Iesu ona taʻitoʻatasi le tagata lava ia ma aʻoaʻoina mea, ia talitonu, ma papatisoina loa. (Mataio 28:19, 20; Galuega 2:41) O Kerisiano faauuina “ua papatisoina ina ia avea ma sui o e ua oti” e ala i lo latou uia o se olaga lea e oo atu ai i le oti ma toe faatūina mai. O lenei ituaiga o papatisoga e amata pe a oo ina musuia e le agaga o le Atua le faamoemoe faalelagi i o latou agaga, ma e iʻu pe a faatutūina i latou mai le oti i le olaga agaga i le lagi lea e lē toe oo i ai le oti.—Roma 6:3-5; 8:16, 17; 1 Korinito 6:14.
8. O le ā e mafai ona mautinoa i ai Kerisiano e tusa lava pe fasiotia i latou e Satani ma ana ʻau?
8 E pei ona faaalia i upu a Paulo, o le faamoemoe i le toetū e mafai ai e Kerisiano ona manumalo ai pea i lamatiaga pe oo lava foʻi i le oti ona o le faatinoina o le talaʻiga o le Malo. (1 Korinito 15:30, 31) Ua latou iloa e mafai lava e Ieova ona toe faatutūina mai i latou pe afai na te faataga Satani ma ana ʻau e fasiotia i latou. E na o le Atua e mafai ona ia faaumatia o latou ola, i Kena, lea ua fai ma faailoga o le faaumatiaga e faavavau.—Luka 12:5.
Se Manaʻoga Ina ia Mataala
9. Afai e tatau ona iai i le faamoemoe i le toetū se mana e faatumauina ai o tatou ola, o le ā la e ao ona tatou alofia?
9 Na faatumauina Paulo ona o le faamoemoe i le toetū. A o iai o ia i Efeso, atonu na lafo o ia e ona fili i le malae o taaloga ina ia tau ma manu feʻai. (1 Korinito 15:32) Pe afai o le mea lena na tupu, e mautinoa sa faasaoina mai ai o ia, e pei ona laveaʻiina Tanielu mai leona. (Tanielu 6:16-22; Eperu 11:32, 33) Talu ai sa faamoemoe o ia i le toetū, sa leʻi faaalia ai e Paulo le uiga lea sa i aposetate o Iuta i aso o Isaia. Na latou faapea mai: “Ina tatou aai ia, ma inu; auā [o] a taeao tatou te oti ai.” (Isaia 22:13) Afai e tatau ona iai i le faamoemoe i le toetū se mana e faatumauina ai o tatou ola e pei ona sa tupu ia Paulo, e ao la ona tatou alofia i latou o loo iai lena agaga lē ati aʻe. “Aua neʻi faaseseina outou,” na lapataʻi ai Paulo. “O le feoai ma e amio leaga e leaga ai amio lelei.” (1 Korinito 15:33) O le mea moni, o lenei mataupu silisili e faatatau atu i tafa eseese o le olaga.
10. E mafai faapefea ona olaola pea lo tatou faamoemoe i le toetū?
10 Na faapea atu Paulo i ē sa masalosalo i le toetū: “Ina ala mai ia i le amiotonu, a e aua neʻi agasala; auā ua pouliuli nisi i la le Atua; ou te faapea atu ia te outou e faamā ia te outou.” (1 Korinito 15:34) I nei “ona po o le iuga,” e manaʻomia ona tatou gaoioi ia ōgatusa ma le poto saʻo e uiga i le Atua ma Keriso. (Tanielu 12:4; Ioane 17:3) O le auala lenei o le a olaola ai pea lo tatou faamoemoe i le toetū.
O le ā le Tino e Faatūina Mai Ai?
11. Na faapefea ona faataʻitaʻia mai e Paulo le toetū o Kerisiano faauuina?
11 Na sosoo ma le sagaʻi atu o Paulo i nisi o fesili. (1 Korinito 15:35-41) Atonu pe i le taumafai o se tagata fiailoa e faatupuina masalosaloga i le toetū, e ono fesili ai: “Pe faapefea ona toe tutū mai o e ua oti? Se a foi le uiga o le tino latou te o mai ai?” E pei ona faaalia e Paulo, pe a totō se fatu i le palapala, o le a iʻu ina pē a o suia e avea ma tamaʻi laau. E faapena foʻi le tatau i se tagata ua faauuagagaina ona oo i ai le oti. E pei lava ona tupu aʻe se laau mai se fatu ua iai sona tino fou, e faapena foʻi i le tino e toe faatūina ai se Kerisiano faauuina, e tatau ona ese mai lona tino faaletagata sa iai. E ui lava e iai pea ona uiga totino ma mafaufauga lea sa iai a o leʻi maliu, ae o lea ua faatūina aʻe o se foafoaga fou ma i se tino agaga ina ia mafai ai ona ola i le lagi. I le tulaga masani, o i latou e faatutūina i le lalolagi o le a faatutūina mai i ni tino faaletagata.
12. O le ā le uiga o faaupuga “tino faalelagi” ma “tino faalelalolagi”?
12 E pei ona taʻua e Paulo, e ese le tino o le tagata mai tino o manu. E oo foʻi i tino o manu lava latou e eseese foʻi mai le isi ituaiga i le isi ituaiga. (Kenese 1:20-25) O “tino faalelagi” o foafoaga agaga e ese i lo latou mamalu mai “tino faalelalolagi” e iai aano. E iai foʻi eseesega i le mamalu o le la, le masina, ma fetu. Peitaʻi o ē faauuina e toe faatutūina ua ia i latou se mamalu e sili mamao atu.
13. E tusa ai o le 1 Korinito 15:42-44, o le ā e lūlūina ai a o le ā e faatūina mai ai?
13 I le taʻua o eseesega, na toe faapea mai ai Paulo: “E faapea foi le toe tutū mai o e ua oti.” (1 Korinito 15:42-44) Na ia faapea mai: “E luluina ma le pala, e toe faatuina mai ma le le pala.” Iinei atonu o loo faauiga ai upu a Paulo i le ʻaufaauuina o se vaega. I le lūlūina ma le pala i le oti, e faatutū aʻe ai ma le lē pala, ua saʻoloto mai le agasala. E ui ina lē faamamaluina e le lalolagi, ae ua toe faatutūina i latou i le ola faalelagi ma faaalia mai faatasi ma Keriso i le mamalu. (Galuega 5:41; Kolose 3:4) I le oti, e lūlūina ai i “le tino faaletino” ae faatūina i “le tino faaleagaga.” Talu ai e mafai ona tupu lenei mea i Kerisiano faauuagagaina, e mafai la ona tatou mautinoa e mafai foʻi ona faatutūina isi i le ola i luga o le lalolagi.
14. Na faapefea ona faia e Paulo se faaeseesega i le va o Keriso ma Atamu?
14 Na sosoo ai ma le faia e Paulo o se faaeseesega i le va o Keriso ma Atamu. (1 Korinito 15:45-49) Na avea Atamu, le uluaʻi tagata, “ma tagata ola.” (Kenese 2:7) “O le Atamu mulimuli”—Iesu—“o le Agaga faaola o ia.” Na ia foaʻi mai lona soifua e fai ma taulaga togiola, muamua lava mo se lelei o ona soo faauuina. (Mareko 10:45) Ona o i latou o ni tagata, sa latou ‘foliga ai i lē faaleeleele,’ ae pe a toe faatutūina, o le a pei i latou o le Atamu mulimuli. Ioe, o le taulaga a Iesu o le a manuia ai tagata usiusitai uma, e aofia ai i latou e faatutūina i le lalolagi.—1 Ioane 2:1, 2.
15. Aiseā e lē toe faatutūina aʻe ai Kerisiano faauuina i o latou tino faaletino, ae ua faapefea ona toe faatutūina aʻe i latou i le taimi o le faatasi mai o Iesu?
15 Pe a maliliu Kerisiano faauuina, e lē toe faatutūina aʻe i latou i le tino faaletino. (1 Korinito 15:50-53) E lē mafai e se tino e pala e iai aano ma le toto ona fai mo latou se tino lē pala ma fai ma tofi le Malo i le lagi. O nisi o le ʻaufaauuina o le a lē manaʻomia ona latou momoe umi i le oti. Pe a faaiʻuina ma le faamaoni o latou olaga i le lalolagi a o faagasolo le faatasi mai o Iesu, o le a “liua [i latou] e faafuasei lava, o le emo o le mata.” O le a vave ona faatutūina aʻe i latou i le ola agaga e lē pala ma i le mamalu. Mulimuli ane, o le faitau aofaʻi o le “faatoanofotane” faalelagi a Keriso e 144,000.—Faaaliga 14:1; 19:7-9; 21:9; 1 Tesalonia 4:15-17.
Manumalo i le Oti!
16. E tusa ai o faamatalaga a Paulo ma uluaʻi perofeta, o le ā o le a tupu i le oti lea na tuufaasolo mai le tagata agasala o Atamu?
16 Na faalauiloa mai ma le manumalo e Paulo faapea, o le a faaumatia le oti e faavavau. (1 Korinito 15:54-57, LF) Pe a oo ina suia le tino e pala ma le tino e oti i le tino e lē pala ma e lē toe oti, ona faataunuu ai lea o nei upu: “Ua faaumatia le oti i le manumalo.” “Le oti e, o fea o i ai lou manumalo? Le oti e, o fea o i ai lou tui?” (Isaia 25:8; Hosea 13:14) O le agasala o le tui lea ua māfua ai le oti, ma o le malosi o le agasala le Tulafono, lea na faasalaina ai tagata agasala i le oti. Peitaʻi o le taulaga ma le toetū mai o Iesu, o le a lē toe manumalo ai le oti lea na tuufaasolo mai le tagata agasala o Atamu.—Roma 5:12; 6:23.
17. E faapefea ona faatatau mai upu o le 1 Korinito 15:58 i aso nei?
17 Na faapea mai Paulo: “O lenei, oʻu uso pele e, ia outou tumau, ma le le faagaeetia, ia alualu lo outou faamalosi i le galuega a le Alii ma le le aunoa, ina ua outou iloa e le se mea faaleaoga lo outou tautiga i le Alii.” (1 Korinito 15:58) E faatatau mai na upu i le vaega totoe faauuina i aso nei ma i “isi mamoe” a Iesu e tusa lava pe maliliu i nei aso e gata ai. (Ioane 10:16) Ua lē o faalēaogāina lo latou tautigā i le folafolaina o le Malo, auā o loo faatalitali mai se toetū ia i latou. Ona o i tatou la o auauna a Ieova, seʻi faateleina pea mea tatou te faia i le galuega a le Alii a o faatalitalia le aso e mafai ai ona tatou alalaga ma le olioli: “Le oti e, o fea o i ai lou manumalo?”
Ua Faataunuuina le Faamoemoe o le Toetū!
18. O le ā le malosi sa iai le faamoemoe o Paulo i le toetū?
18 Ua faamautinoa mai e upu a Paulo ua faamauina i le 1 Korinito mataupu e 15, o le faamoemoe i le toetū sa iai sona mana i lona olaga. Na ia matuā mautinoa i le toe faatūina o Iesu mai le oti ma o le a faapea foʻi ona iai isi o le a toe saʻoloto mai tuugamau o le fanau a tagata. Po o ia te oe ea lena talitonuga malosi? Sa vaai Paulo i lelei manatu faapito ua o ni “otaota” ma sa ia “faaleaogaina mea uma” ina ia ona ‘iloa Keriso, ma le mana o lona toe tu mai.’ Sa lotomalie le aposetolo e oo ia te ia le ituaiga o oti lea na maliu ai Keriso ona sa ia faamoemoe atu i le mauaina o le “toe tu [“vave,” NW] mai.” E taʻua foʻi “o le uluai toe tu,” e toe faatutūina ai soo faauuina e 144,000 o Iesu. Ioe, e faatutūina i latou i le olaga agaga i le lagi, ae peitaʻi “o e totoe o e ua oti” o le a faatutūina i le lalolagi.—Filipi 3:8-11; Faaaliga 7:4; 20:5, 6.
19, 20. (a) O ai tagata o loo faamauina i le Tusi Paia o le a faatutūina e ola i le lalolagi? (e) O le toetū mai o ai o loo e nofo tatali atu i ai?
19 O le faamoemoe i le toetū ua avea o se mea moni mamalu mo ē faauuina sa faamaoni pea seʻia oo i le oti. (Roma 8:18; 1 Tesalonia 4:15-18; Faaaliga 2:10) O ē faasaoola mai “le puapuaga tele” o le a latou tagaʻi atu i le faataunuuina o le faamoemoe o le toetū i luga o le lalolagi a o “avae foi e le sami e na oti sa i ai, ua avae foi e le oti ma seoli e na oti sa i ai.” (Faaaliga 7:9, 13, 14; 20:13) O i latou e faatutūina e ola i le lalolagi o le a aofia ai Iopu, o lē na mafatia ina ua toesea e le oti ona atalii e toʻafitu ma afafine e toʻatolu. Maʻeu sona olioli o le a iai a o ia toe faafeiloaʻia i latou—ma e maʻeu so latou fiafiaga o le a iai auā o le a faaopoopo mai ma isi tama e toʻafitu ma isi teine lalelei e toʻatolu!—Iopu 1:1, 2, 18, 19; 42:12-15.
20 Maʻeu se faamanuiaga o le a iai pe a oo ina toe faatutūina mai e ola i le lalolagi, o Aperaamo ma Sara, Isaako ma Repeka—ioe, ma le isi anoano e aofia ai “le au perofeta uma”! (Luka 13:28) O se tasi o na perofeta o Tanielu, o lē na folafola i ai le toe faatūina i le taimi o le pulega Faa-Mesia. E pe ā nei ma le 2,500 tausaga o mālōlō pea Tanielu i le tuugamau, ae ala mai i le mana o le toetū, o le a lē pine ona ‘tu mai lea o ia mo lona tofi’ o se tasi o “alii sili i le lalolagi uma.” (Tanielu 12:13; Salamo 45:16) Maʻeu se faagaeetia o le a iai i le toe faafeiloaʻia mai e lē gata o ē faamaoni o aso anamua, aemaise foʻi si ou lava tamā, tinā, atalii, afafine, po o isi e pele ia te oe na toesea ona o le fili o le oti!
21. Aiseā e lē tatau ai ona tatou faatalatū i le faia o mea lelei mo isi?
21 O nisi o a tatou uō ma ē pele ia i tatou atonu ua fia sefulu tausaga o auauna i le Atua ma ua loa foʻi lo latou soifua. O le soifuaga matua e ono faafaigatā ai mo i latou ona fesagaʻia luʻi o le olaga. Maʻeu se gaoioiga alofa o le avatu ia i latou po o le ā lava se fesoasoani e mafai ona tatou faatinoina i le taimi nei lava! Ona tatou lē faanoanoa ai lea i le iloaina sa leʻi taulau ona tatou faia ni gaoioiga lelei mo i latou pe a teʻi ua aafia i latou i le oti. (Failauga 9:11; 12:1-7; 1 Timoteo 5:3, 8) E mafai ona tatou mautinoa o le a lē faagaloina e Ieova mea lelei o loo tatou faia mo isi, e tusa lava po o le ā lo latou matutua po o ā foʻi o latou tulaga. Na tusi Paulo: “Ia faatatau i mea e tutupu i lea aso ma lea aso, i tagata uma lava, aemaise i le aiga o le faatuatua.”—Kalatia 6:10, LF; Eperu 6:10.
22. A o leʻi faataunuuina le faamoemoe i le toetū, o le ā e tatau ona tatou maumauaʻi e fai?
22 O Ieova “o le Tamā e ona le alofa mutimuti vale, o le Atua foi e ana le faamafanafanaga uma.” (2 Korinito 1:3, 4) O lana Afioga e faamāfanafana ma fesoasoani ia i tatou ina ia tatou faamāfanafana atu foʻi i isi e ala i le faamoemoe mamana o le toetū. A o tatou leʻi oo atu e molimauina le faataunuuga o lena faamoemoe e ala i le toetutū aʻe o ē na oti ina ia ola i le lalolagi, seʻi tau ina ia pei i tatou o Paulo, o lē sa faatuatua i le toetū. Aemaise lava, tau ina ia tatou faataʻitaʻi ia Iesu, o lē sa matuā faamaonia lona faamoemoe i le mana o le Atua e toe faatūina ai o ia. O i latou o i tuugamau ua toe o se āga nei ona faalogo atu lea i le siʻufofoga o Keriso ma latou toe ō mai ai. Ia avea ia lenei faamoemoe tatou te maua ai le faamāfanafanaga ma le olioli. Ae laualuga i nei mea uma, tau ina ia tatou faafetaia Ieova, o lē na faia le sauniuniga ina ia manumalo i le oti e ala mai i lo tatou Alii o Iesu Keriso!
O le ā Lau Tali?
• O ā ni faamaoniga vaaitino o le toetū o Iesu na faailoa mai e Paulo?
• O le ā “le toe fili,” ma e faapefea ona faaumatiaina?
• I le tulaga o Kerisiano faauuina, o le ā e lūlūina a o le ā e faatūina mai?
• O ai tagata o loo taʻua i le Tusi Paia e te manaʻo e feiloaʻi atu i ai pe a toe faatutūina mai e ola i le lalolagi?
[Fesili mo le Suʻesuʻega]
[Ata i le itulau 16]
Na tū malosi atu le aposetolo o Paulo mo le puipuia o le toetū
[Ata i le itulau 20]
O le toetutū mai o Iopu, lona aiga, ma le toʻatele o isi o le a faapogaia ai le olioli e lē gata mai!