E Mautinoa le Faamoemoe i le Toetū!
E Mautinoa le Faamoemoe i le Toetū!
“O loo ia te au le faamoemoe i le Atua . . . o le a [iai] le toe tutū mai.”—GALUEGA 24:15.
1. Aiseā e mafai ai ona tatou faamoemoe i le toetū?
UA AUMAIA e Ieova ia i tatou ni māfuaaga aogā mo le faamoemoe i le toetū. Ua ia i tatou lana folafolaga o le a faatutūina mai ē ua oti, e toe tutū i le ola. Ma e mautinoa lava le faataunuuina o lana fuafuaga e tusa ai o i latou ua maliliu. (Isaia 55:11; Luka 18:27) O le mea moni, ua leva ona faaalia mai e le Atua lona mana e faatutūina ai ē ua oti.
2. E mafai faapefea ona aogā ia i tatou le faamoemoe i le toetū?
2 O le faatuatua i le sauniuniga a le Atua mo le faatutūina o ē ua oti e ala i lona Alo, o Iesu Keriso, e mafai ona faatumauina ai i tatou i taimi o mafatiaga. O le mautinoa o le faamoemoe i le toetū e mafai foʻi ona fesoasoani mai ina ia tatou tausisia le faamaoni i lo tatou Tamā faalelagi e tusa pe oo ai i le oti. E mautinoa, o le a faamalosia lo tatou faamoemoe i le toetū a o tatou talanoaina ni toe faafoʻisiaga i le ola ua faamauina i le Tusi Paia. O nei vavega uma sa faataunuu e ala i le mana mai le Alii Pule Silisili Ese o Ieova.
Na Latou Maua o Latou Tagata Oti e Ala i le Toetū
3. O le ā na faia e Elia i le mana na tuuina atu ia te ia, ina ua oti le tama a se fafine Sarefata o lē ua oti lana tane?
3 I se autaluga mataʻina o le faatuatua na faaalia e molimau a Ieova anamua a o leʻi oo mai i taimi o uluaʻi Kerisiano, na tusi ai le aposetolo o Paulo e faapea: “Na maua mai e fafine o latou tagata oti ina ua toe tu mai.” (Eperu 11:35; 12:1) O se tasi o na fafine o se fafine mativa ua oti lana tane sa i le aai o Sarefata i le laufanua o Foinie. Talu ai lona talimalo i le perofeta a le Atua o Elia, sa faavavega ai ona iai pea lana falaoamata ma lana suāuu i le taimi o le oge lea atonu na semanū e feoti ai i laʻua ma lana tama. Mulimuli ane ina ua oti lana tama, sa faataoto e Elia le tama i luga o le moega, ua tatalo, ona faō faatolu lea o ia i luga o le tama, ma ʻaiʻoi atu: “Ieova e, loʻu Atua, ia e faafoisia mai le agaga o lenei tama i totonu ia te ia.” O le Atua na faapogaia le solu, po o le ola, e toe foʻi ane i totonu o le tama. (1 Tupu 17:8-24) Seʻi manatu la i le olioli o lena fafine ua oti lana tane a o tauia lona faatuatua i lenei toetū na uluaʻi faamauina—le toetū mai o si ana tama pele e toʻatasi!
4. O le ā le vavega na faatino e Elisaia i Sunema?
4 O le isi fafine na ia maua lana tagata oti e ala i le toetū, o le fafine sa nofo i le aai o Sunema. O ia o le avā a se toeaina matua lava, ma sa faaalia e lenei fafine lona agalelei i le perofeta o Elisaia ma lana auauna. Sa tauia o ia i le mauaina o sana tama. Peitaʻi, i ni tausaga mulimuli ane, sa ia faavave atu e logo i le perofeta ua oti lana tama i lo la fale. Ina ua uma ona tatalo Elisaia ma faia nisi gaoioiga, “ona mafanafana lea o le tino o le tama.” “Ona mafatua faafitu ai lea o le tama, ua pupula ae foi mata o le tama.” E mautinoa lava o lenei toetū na aumaia ai le olioli tele i le tinā faapea foʻi si ana tama. (2 Tupu 4:8-37; 8:1-6) Ae maʻeu se fiafiaga e sili atu pe a toe faatūina i latou i le ola i le lalolagi e ala i le “toe tu mai e sili ona lelei”—le toetū lea latou te maua ai le avanoa e lē toe oti ai lava! Maʻeu se pogai mo le lotofaafetai i le Atua alofa o le toetū, o Ieova!—Eperu 11:35.
5. Na faapefea ona aafia Elisaia i se vavega e oo lava i le taimi na maliu ai o ia?
5 E oo lava ina ua maliu Elisaia ma tanuina, sa faamamanaina e le Atua ona ivi e ala i le agaga paia. Tatou te faitau ai e faapea: “Sa latou [ni tagata Isaraelu] tanu le tagata, faauta foi, ua latou iloa le ʻau [a tagata Moapi]; ona latou lafo ai lea o le tagata i le tuugamau o Elisaia; ua oo ifo le tagata [oti], ua papai i ivi o Elisaia, ona toe ola ai lea o ia, ua tu i luga ona vae.” (2 Tupu 13:20, 21) Maʻeu se maofa ma le fiafia atonu na oo i lena tamāloa! Seʻi mafaufau i le olioli o le a tatou tofo i ai pe a oo ina toe faatutūina i le ola ē pele ia i tatou, ina ia ōgatusa ma le fuafuaga lē masuia a Ieova le Atua!
Na Faatūina e le Alo o le Atua Ē na Oti
6. O le ā le vavega na faatino e Iesu i tala ane o le aai o Naina, ma e ono aafia faapefea i tatou i lenei mea?
6 Ua aumaia ia i tatou e le Alo o le Atua, o Iesu Keriso, ni māfuaaga mautinoa mo le talitonu e mafai ona toe faatutūina mai ē ua oti, faatasi ai ma le faamoemoe o le ola e faavavau. O se mea na tupu e lata ane i le aai o Naina e mafai ona fesoasoani ia i tatou e iloa ai e mafai ona faia se vavega faapena e ala i le mana mai le Atua. I se tasi aso, na fetaiaʻi ai Iesu ma se solo o ni tagata o loo lauē ma fata mai le tino maliu o se tauleʻaleʻa e agaʻi atu i fafo o le aai mo le tanuga. E na o ia lava le tama a se fafine ua oti lana tane. Na fetalai atu Iesu i le fafine: “Aua e te tagi.” Ona ia paʻi atu lea i le fata ma fetalai atu: “Le taulealea e, ou te fai atu ia te oe, Ina tulai ia.” Ona nofo ai lea i luga o le tama, ua tautala. (Luka 7:11-15) E mautinoa lava o lenei vavega ua matuā faamautūina ai lo tatou talitonuga e faapea e mautinoa lava le faamoemoe i le toetū.
7. O le ā le mea na faia i le afafine o Iairo?
7 Seʻi manatu foʻi, i se mea na aafia ai Iairo, o se pule i le sunako i Kapanaumi. Sa ia talosaga atu ia Iesu ina ia afio ane ma fesoasoani i si ona afafine pele e 12 tausaga le matua, o lē sa tai oti. E leʻi umi lava ae taʻu ane loa ua oti le teine. I lona faamalosiʻau atu i le tamāloa mafatia o Iairo ina ia faatuatua, na ō atu faatasi ai Iesu ma ia i lona aiga, ma tau atu i se motu o tagata o loo taufai tagituʻi mai. Sa latou tapisa ina ua fetalai atu Iesu ia i latou: “E [leʻi] oti le teine, ua na ona moe.” O le mea moni lava ua oti o ia, ae o lea o le a faaali atu e Iesu faapea, e mafai ona faatutūina tagata i le ola e pei lava ona mafai ona toe fafagu mai i latou mai se moe gase sa iai. Na aapa atu o ia i le lima o le teine ona fetalai lea: “Funa e, ina tulai ia.” O le taimi lava lea na tulaʻi ai o ia, ona “matuā ofo ai lea o ona mātua.” (Mareko 5:35-43; Luka 8:49-56) E mautinoa lava, o le a “matuā ofo” tagata o aiga pe a toe faatutūina ē pele ia i latou i se lalolagi parataiso.
8. O le ā na faia e Iesu i le tuugamau o Lasalo?
8 E fā aso talu ona maliu Lasalo ae oo atu loa Iesu i lona tuugamau ma faatonu ina ia aveese le maa sa i le gutu o le ana. Ina ua uma lana tatalo i luma o le lautele ina ia iloa ai e i latou na matamata ane o lea sa ia faalagolago atu i le mana mai le Atua, ona fetalai atu lea o Iesu i se leotele: “Lasalo e, ina sau ia i fafo.” Ona sau ai lea o ia i fafo! Sa fusifusia pea ona lima ma ona vae i fusi na tanu ai, ma na ufitia foʻi ona mata i le solosolo. Na fetalai atu Iesu: “Tatala ia ia te ia, ina tuu atu ia e alu.” I le vaaia o lenei vavega, na iʻu ai ina faatuatua ia Iesu le toʻatele o i latou na iai iinā e faamāfanafana i tuafāfine o Lasalo, o Maria ma Mareta. (Ioane 11:1-45) Po ua lē avea ea lenei tala e faatumulia ai oe i le faamoemoe atonu o le a toe faatutūina mai i le ola ē pele ia te oe i totonu o le lalolagi fou a le Atua?
9. Aiseā e mafai ai ona tatou mautinoa ua mafai nei e Iesu ona faatutūina mai ē ua oti?
9 A o faafalepuipui Ioane le Papatiso, sa aauina atu e Iesu ia te ia se feʻau faalototele: “Ua pupula tauaso, . . . ua faatutūina o e na oti.” (Mataio 11:4-6) Talu ai sa faatutūina e Iesu ē na oti a o iai i le lalolagi, e mautinoa lava la lona mafai ona faia faapea i le avea o se foafoaga agaga malosi ua iai le mana mai le Atua. O Iesu o “le toe tu ma le ola,” ma e maʻeu le faamāfanafanaloto o le iloaina faapea, i le lumanaʻi lata mai o le a “faalogo ai i lona leo o i latou uma ua i tuugamau, ma latou o mai ai”!—Ioane 5:28, 29; 11:25.
O Isi Toetū e Faamalosia ai lo Tatou Faamoemoe
10. E faapefea ona e faamatalaina le toetū muamua lea na lipotia mai le faia e se aposetolo?
10 Ina ua aauina e Iesu ona aposetolo e talaʻi le Malo, na ia fetalai atu i ai: “[Ia] faatutū i e ua oti.” (Mataio 10:5-8) O le mea moni, ina ia faia lenei mea, sa tatau ona latou faalagolago i le mana o le Atua. I Iopa i le 36 T.A., na oti ai le fafine amioatua o Toreka (Tapita). O ana galuega lelei sa aofia ai le faia o ofu tetele mo fafine matitiva ua oti a latou tane, o i latou na sa sili ona taufai tagiauē i lona maliu. Sa sauniunia e soo lona tino mo le tanuga ona latou aami atu lea i le aposetolo o Peteru, atonu mo se faamaisega. (Galuega 9:32-38) Sa ia tutuli i fafo tagata uma na iai i le afeafe aupito a luga, ona tatalo lea ma faapea atu: “Tapita e, ina tu ia i luga.” Sa pupula ona mata, ua nofo i luga, ona tago atu lea o Peteru i lona lima, ua faatū ia te ia. O se toetū muamua lenei na lipotia mai le faia e se aposetolo, lea na faapogai ai le toʻatele o tagata na avea ma ē talitonu. (Galuega 9:39-42) Ua aumaia ai foʻi ia i tatou se isi māfuaaga mo le faamoemoe i le toetū.
11. O le ā le toetū mulimuli o loo i faamaumauga a le Tusi Paia?
11 O le toetū mulimuli o loo i faamaumauga a le Tusi Paia, o lea na faia i Teroa. Ina ua afea e Paulo iinā i lana malaga lona tolu faamisionare, sa faaumiumi ai lava lana lauga ua oo i le valuapo. Pe atonu sa vaivai pe ona o le vevela i le tele o molī ma le tumutumu o tagata sa iai i le nofoaga o le sauniga, na iʻu ai ina moegase se tauleʻaleʻa e igoa ia Eutiko ma paʻū ifo mai se faamalama o le fogafale tolu o le fale sa nofo ai. Na “sii ae foi o ia ua oti,” ae leʻi na ona matapogia. Na faō atu Paulo i luga o Eutiko, ua fusi ia te ia, ma faapea atu i ē na matamata ane: “Soia le fetagisi, auā o loo ia te ia lona ola.” Sa uiga le faamatalaga a Paulo faapea ua toe faafoʻisia mai le ola o le tauleʻaleʻa. Na ‘matuā olioli i latou’ na iai iinā. (Galuega 20:7-12) I aso nei, ua matuā faamāfanafanaina auauna a le Atua i le iloa faapea, o le a tofo a latou aumea sa iai muamua i le auaunaga a le Atua, i le faataunuuina o le faamoemoe i le toetū.
Toetū—Se Faamoemoe ua Leva
12. O le ā le talitonuga maumauaʻi na faaleo atu e Paulo ina ua tulaʻi i luma o le kovana Roma o Filiki?
12 Ina ua tulaʻi Paulo mo lona faamasinoga i luma o le kovana Roma o Filiki, na molimau atu o ia: “O loo [oʻu] talitonu i mea uma lava ua tusia i le tulafono atoa ma le au perofeta; o loo ia te au le faamoemoe i le Atua . . . o le a toe tutū mai e ua amiotonu atoa ma e ua amioletonu.” (Galuega 24:14, 15) E faapefea i vaega o le Afioga a le Atua, e pei o “le tulafono,” ona faasino atu i le faatutūina o ē ua oti?
13. Aiseā e mafai ai ona faapea atu sa faaataata mai e le Atua le toetū ina o ia fofoga mai le uluaʻi valoaga?
13 Sa faaataata mai e le Atua lava ia se toetū ina ua ia fofoga mai le uluaʻi valoaga i Etena. Ina ua faasilasilaina le faasalaga o “le gata tuai,” o Satani le Tiapolo, na fetalai atu le Atua: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Faaaliga 12:9; Kenese 3:14, 15) O le tuʻimomomoina o le mulivae o le fanau a le fafine sa faauiga i le fasiotia o Iesu Keriso. Pe afai o le a tuʻimomomoina e lena Fanau le ulu o le gata i se taimi mulimuli ane, e tatau la ona toe faatūina Keriso mai le oti.
14. Ua faapefea ona avea Ieova “e le o le Atua ia o e ua oti, a o e ola”?
14 Na folafola mai e Iesu: “O le faatuina o e ua oti, ua faailoa mai lea mea e Mose i le laau talatala i lona taʻua o le Alii o le Atua o Aperaamo, o le Atua foi o Isaako, o le Atua foi o Iakopo. E le o le Atua ia o e ua oti, a o e ola; auā ua ola uma ia te ia.” (Luka 20:27, 37, 38; Esoto 3:6) Ua feoti uma Aperaamo, Isaako, ma Iakopo, peitaʻi o le fuafuaga a le Atua ina ia toe faatutūina mai i latou sa matuā mautinoa le faataunuuina, o lea i lana silafaga e pei lava o loo ola mai pea i latou.
15. Aiseā na maua ai e Aperaamo se māfuaaga mo lona talitonu i le toetū?
15 Sa ia Aperaamo se māfuaaga mo le faamoemoe atu i le toetū, auā ina ua matutua lava i laʻua ma lana avā o Sara ma ua feoti foʻi i laʻua e tusa ai o so la malosi e mauaina ai se fanau, sa faavavega ona toe faaolaolaina e le Atua o la malosi faafanautama. Sa pei lenei mea o se toetū. (Kenese 18:9-11; 21:1-3; Eperu 11:11, 12) Ina ua tusa ma le 25 tausaga o le la tama, o Isaako, ona poloaʻiina lea e le Atua ia Aperaamo ina ia faaaogā Isaako e fai ai le taulaga. Peitaʻi, a o sauni le sasau atu a Aperaamo i le naifi e fasiotia ai Isaako, ae taofia loa e se agelu a Ieova lona lima. Sa “manatu [Aperaamo] e mafaia e le Atua ona toe faatu mai [Isaako] nai e ua oti, o lea foi na ia toe maua mai ai o ia, ua fai lea ma faatusa.”—Eperu 11:17-19; Kenese 22:1-18.
16. O le ā lea o loo moe nei Aperaamo i le oti ma faatalitali i ai?
16 Sa faamoemoe Aperaamo i se toetū mai i le pulega a le Mesia, le Fanau folafolaina. I lana silafaga mai le lagi a o leʻi avea ma tagata, na mātauina ai e le Alo o le Atua, le faatuatua o Aperaamo. I le avea la o Iesu Keriso o se tagata, na ia fetalai atu ai i tagata Iutaia: “O Aperaamo lo outou tamā, na matuā fiafia o ia ina a iloa e ia loʻu nei aso.” (Ioane 8:56-58; Faataoto 8:30, 31) O loo moe nei Aperaamo i le oti, ma faatalitali i le toetū i le ola i le lalolagi i lalo o le pulega a le Malo Faa-Mesia a le Atua.—Eperu 11:8-10, 13.
Se Molimau Mai le Tulafono ma Salamo
17. Na faapefea i ‘mea ua tusia i le tulafono’ ona faasino atu i le toetū mai o Iesu Keriso?
17 Sa ōgatusa le faamoemoe o Paulo i le toetū ma ‘mea ua tusia i le tulafono.’ Na fetalai atu le Atua i le fanauga a Isaraelu: “[Ia] outou au mai . . . le fusi saito o mea ua faapolopoloina o lo outou seleselega i le faitaulaga. E luluina foi e ia [ia Nisani 16] o le fusi saito i luma o Ieova, ina ia talia mo outou.” (Levitiko 23:9-14) Atonu sa tau le mafaufau o Paulo i lenei tulafono, ina ua ia tusi: “Ua toe faatuina mai Keriso i e ua oti, ua avea ma faapolopolo o e ua momoe.” I le avea ma “faapolopolo,” na toe faatūina ai Iesu ia Nisani 16, 33 T.A. Mulimuli ane, a o faagasolo lona faatasi mai, o le a toetutū ai ē ‘faapolopolo mulimuli’—ona soo faauuagagaina.—1 Korinito 15:20-23; 2 Korinito 1:21; 1 Ioane 2:20, 27.
18. Na faaalia faapefea e Peteru o le toetū o Iesu na valoia mai i Salamo?
18 E lagolagoina foʻi e Salamo le toetū. I le aso o le Penetekoso 33 T.A., na sii mai ai e le aposetolo o Peteru upu a le Salamo 16:8-11, i le faapea mai: “Ua fai mai Tavita [e uiga ia Keriso], Na ou iloa atu le Alii i oʻu luma e le aunoa; auā o i loʻu itu taumatau o ia, ina neʻi faagaeetia aʻu. O le mea lea ua fiafia ai loʻu loto, ma olioli ai loʻu laulaufaiva; e malolo ai foi loʻu tino ma le faatalitali; auā e te le tuua aʻu i le tuugamau; e te le tuu atu foi lou tagata paia ia oo i ai le pala.” Na toe faapea mai Peteru: “Ua muai iloa e [Tavita], ma ua fai mai foi i le toe tu mai o le Keriso, ua le tuua o ia i Seoli, ua le oo foi le pala i lona tino. O Iesu lava lena ua toe faatuina e le Atua.”—Galuega 2:25-32.
19, 20. O anafea na sii atu ai e Peteru upu mai le Salamo 118:22, ma na faapefea ona fesootaʻi atu lenei mea i le maliu ma le toetū mai o Iesu?
19 I ni aso mulimuli ane, na tulaʻi ai Peteru i luma o le ʻau Saniterini ma ia toe sii atu foʻi upu mai le Salamo. Ina ua fesiligia pe na faapefea ona ia faamālōlōina se tagata ʻaisi na pipili, na faapea atu le aposetolo: “Ia iloa e outou uma, atoa ma le nuu uma o Isaraelu, o le suafa o Iesu Keriso o le Nasareta, o le na faasatauroina e outou, o le ua toe faatuina e le Atua nai e ua oti, o ia lava ua tu mai ai lenei tagata ua malolo i o outou luma. O le maa lenei [o Iesu] na faaleaogaina e outou tufuga fai fale, ua avea ia ma maa tulimanu aupitoaluga. E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata, e mafaia ona faaolaina ai o i tatou.”—Galuega 4:10-12.
20 Iinei o loo sii atu ai e Peteru upu mai le Salamo 118:22, ma faatatau atu mea o loo taʻua ai i le maliu ma le toetū mai o Iesu. Ona o uunaʻiga malolosi mai o latou taʻitaʻi lotu, na teena ai e tagata Iutaia ia Iesu. (Ioane 19:14-18; Galuega 3:14, 15) ‘O le faaleaogaina e tufuga fai fale o le maa’ na iʻu ai i le maliu o Keriso, peitaʻi o ‘le maa ua avea ma maa tulimanu aupitoaluga’ sa faaatagia mai ai lona toe faatūina i le mamalu faaleagaga i le lagi. E pei ona valoia mai e le faisalamo, ‘o lenei mea ua faia e Ieova lava ia.’ (Salamo 118:23) O le faatulagaina o “le maa” e avea ma Ulu o le tulimanu, sa aofia ai le siitiaina o ia e avea ma Tupu Tofia.—Efeso 1:19, 20.
Ua Faatumauina e le Faamoemoe i le Toetū
21, 22. O le ā le faamoemoe na faaleo mai e Iopu, e pei ona tusia i le Iopu 14:13-15, ma e mafai faapefea e lenei faamoemoe ona faamāfanafana i ē o faavauvau i aso nei?
21 E ui tatou te leʻi vaaitino lava i se tasi ua toe faatūina mai le oti, ae ua tatou iloa nisi o tala a le Tusi Paia e faamautinoa ai ia i tatou le toetū. O lea la, e mafai ai ona tatou maua le faamoemoe na faaleo mai e le tagata amiotonu o Iopu. Ina o puapuagatia o ia, sa ia augani mai: “E! fia natia aʻu e oe i le tuugamau ma ia e [Ieova] faaliloina aʻu, . . . ia e atofaina mai se aso mo aʻu, ma ia e manatua mai ai aʻu. Afai e oti le tagata, e toe ola mai ea o ia? . . . Ia e valaau mai, ona ou tali atu ai lea ia te oe; ia e finagalo alofa i le galuega a ou aao.” (Iopu 14:13-15) O le a ‘finagalo alofa le Atua i galuega a ona aao,’ i lona matuā naunau e faatūina mai Iopu. Maʻeu se faamoemoe ua aumaia ai ia i tatou!
22 Atonu e gasegase tigāina se tagata o se aiga e matataʻu i le Atua, e pei ona sa maʻi tigāina Iopu, ma atonu e oo ai lava ina apoia e le fili o le oti. Atonu e maligi loimata o ē faanoanoa ona o le faavauvau, e pei foʻi ona tutulu Iesu ona o le maliu o Lasalo. (Ioane 11:35) Ae maʻeu le faamāfanafanaloto o le iloaina, o le a valaau mai le Atua ona tali atu lea o i latou o loo ia manatua! O le a peiseaī ua toe taliu mai i latou mai se faigamalaga—e lē toe mamaʻi pe iai lava se isi mea e toe faalētonu i le tino, ae i le soifua mālōlōina lelei.
23. Ua faapefea ona faaleo mai e nisi lo latou mautinoa i le faamoemoe o le toetū?
23 O le maliu o se tinā Kerisiano faamaoni ua loa lona soifua, na uunaʻia ai ana aumea talitonu e tusi atu faapea: “Faamolemole, ia talia mai a matou faamaisega loloto ona o le toesea o si o outou tinā. O le a na o sina taimi puupuu lava, ona tatou toe faafeiloaʻi atu lea ia te ia—i ona foliga lalelei ma lona malosi atoatoa!” Na faapea mai ni mātua ua maliu so la alo tama: “Maʻeu so ma tulimataʻia o le aso o le a toe ala mai ai Iasoni! O le a ia fetepaaʻi solo i ona autafa ma vaai atu i le Parataiso lea ua leva ona ia moomoo i ai. . . . Maʻeu se uunaʻiga malosi mo i matou o ē alolofa ia te ia ina ia matou iai foʻi iinā.” Ioe, e maʻeu foʻi so tatou agaga faafetai ona o le mautinoa o le faamoemoe i le toetū!
O le ā Lau Tali?
• E mafai faapefea ona aogā ia i tatou le sauniuniga a le Atua mo le faatutūina o ē ua oti?
• O ā mea tutupu ua faamauina i le Tusi Paia e aumaia ai ia i tatou se māfuaaga mo le faamoemoe i le toetū?
• Aiseā e mafai ai ona faapea atu o le toetū o se faamoemoe ua leva?
• O le ā le faamoemoe ua tatou maua e faatatau i ē ua oti ua faatumauina ai i tatou?
[Fesili mo le Suʻesuʻega]
[Ata i le itulau 10]
O lona mana mai ia Ieova, na mafai ai e Elia ona toe faafoʻisia le ola o le tama a se fafine ua oti lana tane
[Ata i le itulau 12]
Ina ua toe faatūina e Iesu le afafine o Iairo, sa matuā taufai ofo mātua o le teine
[Ata i le itulau 15]
I le aso o le Penetekoso 33 T.A., na molimau atu ai ma le lototele le aposetolo o Peteru e faapea, sa toe faatūina Iesu mai le oti