Le Auala e Mafai ai Ona Uigā Atili Lou Olaga

E FAAPEA se faataoto faaanamua: “Aua e te galue faapuapuaga ia mauoloa ai; tuu ia o lou lava taofi. E te tulimatai atu ea i le mea ua leai? auā e faia lava e ia ona apaau; e pei o le aeto ona lele atu [lea] o ia i le lagi.” (Faataoto 23:4, 5) I se isi faaupuga, e lē atamai lo tatou faavaivaia o i tatou lava i le taumafai e fia mauʻoa, auā e mafai ona lele ese le tamaoaiga e pei o apaʻau o se aeto.

E pei ona faaalia e le Tusi Paia, e mafai ona vave mou atu le tamaoaiga faaletino. E mafai ona mou ese i se po e tasi pe a oo mai se mala faalenatura, pe pāʻu faafuaseʻi ifo le tamaoaiga, po o isi lava tulaga lē mailoa e tutupu. E lē gata i lea, e oo lava i ē ausia ni manuia faaletino e masani ona iʻu ina faanoanoa ai. Seʻi manatu i le mea na tupu ia Ioane, o lana galuega sa aofia ai lona faafiafiaina o tagata faipolotiki, o tagata taʻutaʻua i taaloga, ma tagata o aigatupu.

Fai mai se faamatalaga a Ioane: “Sa matuā tuu atoa loʻu malosi i laʻu galuega. Na sologa lelei loʻu tulaga tau tupe, sa ou nofo i faletalimalo taugatā, o nisi foʻi taimi ou te alu ai i laʻu galuega i se vaalele faapitoa. I le taimi muamua sa ou fiafia i ai, ae na faasolosolo mālie lava ina ou fiu. O tagata sa ou taumafai e faafiafia sa foliga mai e matuā papaʻu se uigā i o latou olaga. Sa leai ma se uigā moni i loʻu olaga.”

E pei ona iloa e Ioane, o se olaga e aunoa ma ni mea faaleagaga e faatāuaina e lē faamalieina lea. I lana Lauga taʻutaʻua i luga o le Mauga, na faaalia ai e Iesu Keriso le auala e tofo ai i le fiafiaga e faavavau. Na ia fetalai: “Amuia ē iloa o latou manaʻoga faaleagaga; auā e ō latou le malo o le lagi.” (Mataio 5:3, NW ) E manino mai la, e atamai le faamuamuaina o mataupu faaleagaga i le olaga. Peitaʻi, e iai isi vala e mafai foʻi ona fesoasoani mai ina ia uigā atili ai le olaga.

E Matuā Tāua Lou Aiga ma Au Uō

Pe e te ono fiafia ea i le olaga pe ana fai e leai ni tou fesootaʻiga ma lou aiga ma leai ni au uō mamae? E manino lava e leai. Sa faia i tatou e Lē na Foafoaina Mea faatasi ma se manaʻoga ina ia alofa atu ma ia alofagia mai. O se tasi lena o māfuaaga na faamatilatila ai e Iesu le tāua o le ‘alofa atu i o tatou tuaoi, ia pei o i tatou lava ia i tatou.’ (Mataio 22:39) O le aiga o se meaalofa mai  le Atua e saunia maia se faatulagaga talafeagai lelei mo le faaalia o le alofa lē manatu faapito.—Efeso 3:14, 15.

E mafai faapefea e o tatou aiga ona fesoasoani mai ina ia uigā atili ai o tatou olaga? E mafai ona faatusaina se aiga autasi i se togālaau matagofie o loo maua ai le faafouina mai popolega o le olaga i aso taʻitasi. E faapena foʻi i totonu o le aiga, e mafai ona tatou maua se faauōga e faafouina ai ma le māfana lea e aveesea ai lagona o le tuuatoʻatasi. E mautinoa lava, e lē otometi ona saunia mai e se aiga lena mapusaga. Peitaʻi, a o tatou faamalosia fusi o faiā faaleaiga, e atili ai ona tatou vāvālalata le tasi i le isi, ma atili ai ona faatamaoaigaina le olaga. Mo se faataʻitaʻiga, o taimi ma le uaʻi atu lea tatou te faaalu e faaalia ai le alofa ma le faaaloalo i a tatou paaga faaipoipo o ni faapolopolo aogā i aso taʻitasi e mafai ona selesele mai ai le ʻoa o faamanuiaga i le iʻuga.—Efeso 5:33.

Pe afai e iai ni a tatou fanau, e tatau ona tatou taumafai malosi e saunia le siʻomaga saʻo e tausia aʻe ai i latou. Atonu e manaʻomia ni taumafaiga malolosi e faaaluina ai se taimi ma i latou, le tatalaina pea o laina o fesootaʻiga, ma le tuuina atu ia i latou o faatonuga faaleagaga. Peitaʻi o na taimi ma taumafaiga e mafai ona aumaia ai ia i tatou le tele o le faamalieina. O mātua o loo taulau manuia latou te vaai i a latou fanau o se faamanuiaga, o se tofi mai le Atua e tatau ona tausia lelei.—Salamo 127:3.

E mafai foʻi e uō lelei ona saosaolaumea i le aumaia o se olaga e faamalieina ma uigā. (Faataoto 27:9) E mafai ona tele ni uō tatou te maua e ala i le faaalia o lagona faaleuso. (1 Peteru 3:8) O uō moni e fesoasoani i le faamalosia o i tatou pe a tatou faavaatuʻia. (Failauga 4:9, 10) Ma o “le uō moni . . . ua avea o se uso ua fanau mai pe a oo i aso vale.”—Faataoto 17:17, NW.

Maʻeu se faamalieina e maua i se faauōga moni! E atili matalasi le vaai atu i se lagoto, e atili susua se taumafataga, ma atili mālie se musika pe a lua olioli faatasi ai ma se uō. O le mea moni, o se aiga e māfana ma ni uō e maufaatuatuaina ua na o ni vala na se lua o se olaga uigā. O ā isi sauniuniga ua faia e le Atua ina ia mafai ai ona uigā atili o tatou olaga?

Faamalieina lo Tatou Manaʻoga Faaleagaga

E pei ona taʻua i le amataga, sa faafesootaʻi atu e Iesu Keriso le fiafiaga i le nofouta i lo tatou manaʻoga faaleagaga. Ua foafoaina i tatou faatasi ai ma se tomai e mafaufau ai i tulaga faaleagaga ma tulaga tauamio. O lea ua taʻua ai e le Tusi Paia “le tagata faaleagaga” ma “le tagata lilo o le loto.”—1 Korinito 2:15; 1 Peteru 3:3, 4.

I se faamatalaga a le Expository Dictionary of New Testament Words, na tusia e W. E. Vine, o le fatu faafaatusa e faasino lea i le “gaoioiga atoa faalemafaufau ma amioga tatau a se tagata, e lē gata i mafaufauga a o faalogona ootia foʻi.” Mo se faamalamalamaga, ua faapea mai atili Vine: “I se isi faaupuga, ua faaaogā le fatu e faafaatusa i ai le nofoaga lilo e puna mai ai le uiga moni o i le loto o le tagata.” O le tusitusiga lava foʻi lea o loo taʻua ai faapea o “le loto, a o iai i se tulaga sili ona loloto i totonu, o iinā e iai le ‘tagata lilo,’ . . . le tagata moni.”

E mafai faapefea ona tatou faamalieina manaʻoga o “le tagata faaleagaga,” po o “le tagata lilo,” lona uiga, o “le tagata lilo o le loto”? Tatou te uia se laasaga tāua i le faia o lenei mea ma faamalieina o tatou manaʻoga faaleagaga pe afai tatou te amanaʻia le manatu autū sa taʻua e le faisalamo faagaeeina o lē na pese: “Ia outou iloa o Ieova o ia lava le Atua; o ia na faia i tatou, ua fai i tatou mona; o lona nuu i tatou, o le lafu mamoe ua ia fagaina.” (Salamo 100:3) O le amanaʻiaina o lenei mea ua talafeagai ona tatou faia ai se faaiʻuga faapea e ao ona tatou tala atu se tala i le Atua. Pe afai tatou te mananaʻo e faaaofia i tatou faatasi ma ‘lona nuu ma le lafu mamoe ua ia fagaina,’ e tatau la ona tatou gaoioi e ōgatasi ma lana Afioga, le Tusi Paia.

Pe leaga ea lena mea? E leai, auā o lo tatou nofouta i le iloa e tāua i le Atua le auala tatou te amioaʻi ai, e avea lena ma itu e uigā atili ai o tatou olaga. E faalaeiauina ai i tatou ina ia avea o ni tagata e sili atu ona lelei—o se sini e matuā telē sona aogā. “Amuia le tagata o lē mataʻu ia Ieova, o loo o fiafia tele i ana poloaiga,” o le faamatalaga lea a le Salamo 112:1. O le mataʻu faaaloalo i le Atua ma le usiusitai ma le lotoatoa i ana poloaʻiga e mafai ona uigā atili ai o tatou olaga.

Aiseā e faamalieina ai i tatou e le usiusitai i le Atua? Talu ai e iai so tatou lotofuatiaifo, o se meaalofa ua tuuina mai e le Atua i tagata uma. O le lotofuatiaifo o se mea lea na te iloiloina amioga tatau, ma faailoa maia pe talia pe lē talia foʻi se mea ua tatou faia po o se mea o tatou mafaufau e fai. Ua tatou tofo uma lava i le mafatiaga o le iai o  se lotofuatiaifo ua ōia. (Roma 2:15) Ae mafai foʻi e o tatou lotofuatiaifo ona tauia i tatou. Pe a tatou gaoioi ma le lē manatu faapito i le Atua ma o tatou uso a tagata, tatou te lagona le fiafia ma le faamalieina. Tatou te iloa ai, “e sili le manuia o le na te foai atu, i lo le na te talia mai.” (Galuega 20:35) E iai se māfuaaga tāua mo lenei mea.

Na faia i tatou e Lē na Foafoaina Mea i se auala ia mafai e faanaunauga ma manaʻoga o o tatou uso a tagata ona aafia ai i tatou. O le fesoasoani atu i isi e tupu aʻe ai se fiafiaga i o tatou lava loto. E lē gata i lea, ua faamautinoa mai e le Tusi Paia ia i tatou faapea, pe a tatou foaʻi atu ni mea i se tasi o iai se manaʻomia, e silasila i ai le Atua i lenei gaoioiga o se mea lelei ua faia ia te ia.—Faataoto 19:17.

E ese mai le aumaia ai o le faamalieina o le loto, ae pe mafai ea e le uaʻi atu i o tatou manaʻoga faaleagaga ona fesoasoani ia i tatou i se auala aogā? E talitonu se tagata faipisinisi mai Sasaʻe Tutotonu e igoa ia Laimoni, e mafai. Fai mai o ia: “O loʻu sini autū lava, o le suʻeina o tupe. Ae mai lava i le taimi na talia ai i loʻu loto le iai o se Atua ma o loo faailoa mai e le Tusi Paia ona moomooga, o iinā lava na suia ai aʻu. O le suʻeina o mea e ola ai i aso nei ua tulaga lua i loʻu olaga. E ala i loʻu taumafai e faafiafia le Atua, ua aveesea ai ia te aʻu lagona leaga o le ita. E ui na maliu si oʻu tamā i se misa na fai, ae lē o iai soʻu manaʻo e fia tauimasui atu ia i latou na tuuaʻia ai.”

E pei ona iloa e Laimoni, o le tausia lelei o manaʻoga o “le tagata faaleagaga” e mafai ona pē ai manuʻa ogoogo o faalogona ootia. Peitaʻi ane, seʻiloga ua tatou faafetaiaʻia faafitauli o aso taʻitasi, ona faatoʻā mafai lea ona avea le olaga o se mea e atoatoa ona faamalieina ai.

E Mafai Ona Tatou Maua ‘le Filemu Mai le Atua’

I lenei lalolagi sili ona pisi, e itiiti lava ni aso e mavae atu i se tulaga sologa mālie. E tutupu faalavelave, e lē taulau ni fuafuaga sa fai, ma faatigā mai tagata ia i tatou. O lape nei e ono tafiesea ai lo tatou fiafiaga. Ia i latou o loo auauna ia Ieova le Atua, ua folafola mai i ai e le Tusi Paia se faamalieina o le loto—‘le filemu mai le Atua.’ E faapefea ona tatou mauaina lenei filemu?

Na tusi mai le aposetolo o Paulo: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le filemu foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:6, 7, faatusatusa i le NW.) Na i lo le taumafai e tauivi na o i tatou lava o tatou faafitauli, e manaʻomia ona tatou finafinau i le tatalo, ia lafo atu i le Atua o tatou popolega o aso taʻitasi. (Salamo 55:22) O le a faateleina le faatuatua faapea e tali mai o ia i na ōlega e ala mai lona Alo, o Iesu Keriso, a o tatou tutupu aʻe pea i le itu faaleagaga ma tatou malamalama i le auala e fesoasoani mai ai le Atua ia i tatou.—Ioane 14:6, 14; 2 Tesalonia 1:3.

Pe a uma ona faatupu aʻe lo tatou mautinoa ia Ieova le Atua, o le “faafofoga tatalo,” ua atili lelei ai ona tatou faafetaiaʻia puapuaga, e pei o maʻi faaumiumi, le soifua matua, po o le faavauvau. (Salamo 65:2) Peitaʻi, mo se olaga e uigā moni lava, e tatau foʻi ona tatou manatunatu i le lumanaʻi.

Ia Olioli i le Faamoemoe o Fotuaʻi Mai

Ua folafola mai e le Tusi Paia “le lagi fou ma le lalolagi fou,” o se pulega amiotonu faalelagi e manatu mai o le a pulea se aiga o tagata usiusitai. (2 Peteru 3:13) I lena lalolagi fou ua folafola mai e  le Atua, o le a suia taua ma faamasinoga lē tonu, i le filemu ma le faamasinotonu. Ua lē na o se moomooga lenei e vave ona mou ese, ae o se talitonuga maumauaʻi e mafai ona faamalosia i aso taʻitasi. O se tala lelei moni lava ma e mautinoa o se māfuaaga e olioli ai.—Roma 12:12; Tito 1:2.

O Ioane, lea na taʻua i le amataga, ua ia lagona nei le sili atu ona uigā lona olaga. Fai mai a ia: “E ui i le taimi muamua sa lē taitai oʻu fiafia i lotu, ae sa ou talitonu pea i le Atua. Na faatoʻā fai lava saʻu gaoioiga i lenei talitonuga ina ua asiasia aʻu e ni Molimau a Ieova se toʻalua. Sa ou tuʻifesilia i laʻua i fesili e pei o le, ‘Aiseā ua tatou iai iinei? O ā ni o tatou faamoemoega mo le lumanaʻi?’ O a la tali faamalieloto mai le Tusi Paia na faatoʻā ou lagona ai mo se taimi muamua, ua iai se fuafuaga i loʻu olaga. Sa na o se amataga lena. Na ou faatupu aʻe se gālala mo le upu moni lea na oo ai ina suia uma mea ou te faatāuaina. E ui lava ou te lē o toe mauʻoa faaletino, ae ua ou lagona e peiseaī ua ou milionea faaleagaga.”

I le pei o Ioane, atonu po ua tele ni tausaga o e faatalalē i lou malosi faaleagaga. Peitaʻi, o le atiina aʻe o le ‘poto i le loto,’ e mafai ai ona e toe faaolaolaina lena malosi. (Salamo 90:12) I lou maumauaʻi faatasi ma au taumafaiga, e mafai ai ona e maua le olioli moni, le filemu ma le faamoemoe. (Roma 15:13) Ioe, ma mafai ai foʻi ona atili uigā lou olaga.

[Ata i le itulau 6]

E mafai e le tatalo ona aumaia ia i tatou ‘le filemu mai le Atua’

[Ata i le itulau 7]

Pe e te silafia le mea e mafai ona maua ai se olaga faaleaiga e sili ona faamalieina?