Pe Mafai Ona Uigā Atili Lou Olaga?

E LĒ o taimi uma e fua ai le aogā moni o se mea i ona foliga mai. O le tupe pepa pito sili ona telē ua faasalalauina i le Iunaite Setete ua tusia ai le aogā e $10,000. Peitaʻi, o le pepa lea e lolomi ai lenei tupe pe na o ni nai sene lona tau.

Pe iai ea se taimi ua e tau mānatu ai pe mafai e fasi pepa o loo iai se aogā itiiti ona aumaia se uigā moni i lou olaga? E toʻatele tagata ua latou manatu e mafai. E faitau miliona tagata ua galulue faasoloatoa i le ao ma le po ina ia saʻilia ni tupe se tele e mafai ona latou maua. O nisi taimi o le saʻilia o tupe ua galo ai lava i nisi lo latou soifua mālōlōina, o a latou uō, e oo lava i o latou aiga. Mo le ā le aogā? Pe mafai ea e tupe—po o mea tatou te faatauina i tupe—ona aumaia ai se faamalieina moni ma le tumau?

Fai mai nisi tagata suʻesuʻe, o le tele o lo tatou saʻilia o le faamalieina e fua i mea faitino, o le itiiti foʻi lena o se avanoa tatou te ono maua ai. Ua faapea mai le manatu o se alii tusitala i nusipepa o Alfie Kohn, “o le mea moni lava e lē faatauina le faamalieina. . . . O tagata latou te faasilisilia le ʻoa i le olaga ua tele ina latou tofo i le maoaʻe o le faateleina o popolega ma mafatiaga faapea foʻi le matuā paʻū maulalo o lo  latou lava lelei.”—International Herald Tribune.

E ui atonu ua iloa e tagata suʻesuʻe e iai se isi mea e manaʻomia mo se olaga uigā na i lo tupe, peitaʻi o le toʻatele lava o tagata e lē ioe i lena manatu. E matuā lē faateʻia ai lava i na uiga, talu ai o i latou o nonofo i atunuu tamaoaiga atonu ua matuā tuʻipala e le anoanoaʻi pe ā ma le 3,000 faasalalauga faatosina o mea faatau i le aso. O nei faasalalauga o loo faatosina atu ina ia faatau ai ni taavale po o ni lole, ae tumau pea le feʻau autū o loo momoli mai ai: ‘Ia faatau le oloa lenei, ona sili atu lea o lou fiafia.’

O le ā le iʻuga o le faaauilumaina faifai pea o le faatāuaina o meafaitino? Ioe, ua masani lava ona faatuatuanaʻi ai aogā faaleagaga! E tusa ai o se lipoti i le mekasini o le Newsweek, talu ai nei na folafola mai ai e le akiepikopō o Cologne, i Siamani e faapea, “i lo tatou sosaiete, ua lē o toe avea le Atua ma autū o talanoaga.”

Pe atonu ua alu atoa lou malosi i le saʻilia o mea e ola ai. Atonu e iai ou lagona ua lē o toe tele sou taimi e fai ai se isi mea. Peitaʻi, mai lea taimi i lea taimi, atonu e te lagona ai e tatau lava ona iai se isi mea e sili atu i le olaga na i lo le faifai pea ona pisi seʻia oo lava ina faamutaina au gaoioiga ona ua aafia lou soifua mālōlōina pe ona ua pulapula lagoto foʻi lou soifua.

Pe mafai ea e le uaʻi atili atu i mataupu faaleagaga ona faateleina ai lou faamalieina? O le ā se mea o le a uigā atili ai lou olaga?