Pe na Taaʻina Oe e Tagata Mafaufau Leaga?

“O LE tagata mafaufau leaga o ia lea e lē taitai vaai i se uiga lelei o se tagata, ma e lē mafai ona ia misia le mātauina o se uiga leaga. E pei lava ia o se lulu, e pupula i le pogisa, ae tauaso i le malamalama, e saʻili malie i manu ninii, ae lē taitai lava vaai i manu e sili ona lelei i le ai.” O lenei faamatalaga na faapea mai na faia e le failotu Amerika o le lona 19 senituri o Henry Ward Beecher. E toʻatele e ono manatu faapea ua faaataina ai ma le saʻo le agaga o loo i tagata mafaufau leaga o ona po nei. Ae o le faaupuga “tagata mafaufau leaga” e tupuga mai i Eleni anamua, lea e leʻi tau ina faaalia mai ai se tasi na faaalia lea uiga. Mo le tele o senituri, sa faasino atu i se ʻaufaifilosofia.

Na faapefea ona tuputupu aʻe le filosofia a Tagata Mafaufau Leaga? O le ā na latou aʻoaʻoina? Pe e lelei ona faaalia e se Kerisiano uiga o se Tagata Mafaufau Leaga?

Tagata Mafaufau Leaga Anamua—O Latou Tupuaga ma Talitonuga

Sa avea Eleni anamua ma ogatotonu o talanoaga ma fefaaaliaʻiga o manatu. I le tele o senituri seʻia oo mai i o tatou Aso Taatele, na talanoaina ai e tamāloloa e pei o Socrates, Plato, ma Aristotle ni filosofia lea na taʻutaʻua ai i latou. Sa iai se aafiaga loloto o a latou aʻoaʻoga i tagata, ma o loo maua pea na manatu i aganuu a atunuu i Sisifo.

Na finau Socrates (470-399 T.L.M.) faapea o le fiafiaga tumau e lē maua mai i le saʻilia o mea faitino po o le olioli i le faamalieina o faanaunauga faaletino. Na ia faailoa faapea o le fiafiaga moni e maua mai se olaga e tuutoina atu i le saʻilia o le amio lelei. Na manatu Socrates i le amio lelei o le mea e silisili ona lelei. Ina ia maua lea sini, na ia teena ai le matalasi o mea faaletino ma saʻiliʻiliga lē manaʻomia ona sa ia manatu e ono faatosina ese o ia e nei mea. Na ia ioe i le fuafua lelei ma le faafitia o faanaunauga totino o le tagata lava ia, ma ola i se olaga faigofie ma faamalieina i le tulaga ua iai.

Sa atiina aʻe e Socrates se ituaiga o aʻoaʻoga ua lauiloa o le auala a Socrates. E ui ina avatu e le toʻatele o tagata mafaufau o latou manatu ma saunia ni manatu e lagolago ai, sa faia e Socrates le mea e tuufaafeagai. Na te faalogo atu i manatu o isi faifilosofia ma saʻili ni mea e sesē ai o latou manatu. O lenei faiga e uunaʻia ai se uiga faitio ma le manatu faatauvaa i isi.

E aofia ai i soo o Socrates se faifilosofia e igoa ia Antisthenes (pe tusa o le 445-365 T.L.M.). O ia faatasi ai ma nisi na latou faaauilumaina aʻoaʻoga faavae a Socrates e ala i lo latou faapea mai o le amio lelei ua na o le pau lea o le mea lelei. E tusa ai ma o latou manatu o le saʻilia o le faamalieina sa lē na o se mea e faatosina ese ai ae o se ituaiga o mea leaga. Ona o lo latou matuā le mananaʻo e feutagaʻi ma tagata, ua latou faaalia ai le matuā manatu faatauvaa mo uso a tagata. Na oo ina lauiloa i latou o Tagata Mafaufau Leaga. O le igoa Tagata Mafaufau Leaga (Cynics) atonu na tupuga mai le upu Eleni o le (ky·ni·kosʹ) lea ua faamatalaina ai o latou uiga paū ma le faualuga. O lona uiga e “pei o se taʻifau.” *

 Aafiaga i o Latou Olaga

E ui ina manatu i talitonuga o le filosofia a Tagata Mafaufau Leaga e pei o le tetee atu i le matapeʻapeʻa ma le faamalieina o le tagata lava ia o se mea lelei, ae ua soona faamamafa naʻuā e Tagata Mafaufau Leaga o latou manatu. Na faamaonia lena mea i le olaga o se tasi o Tagata Mafaufau Leaga sa sili ona lauiloa—le faifilosofia o Diogenes.

Na fanau Diogenes i le 412 T.L.M. i Sinope, o se aai i le Sami Uliuli. Na la siitia atu ma lona tamā i Atenai, lea na ia faamasani atu ai i aʻoaʻoga a Tagata Mafaufau Leaga. Na aʻoaʻoina Diogenes e Antisthenes ma na mauaa ai loa ia te ia filosofia a Tagata Mafaufau Leaga. Sa ola Socrates i se olaga faigofie, ae o Antisthenes i se olaga e faasāsā naʻuā. Ae o Diogenes, sa ola o ia i se olaga e matuā faafitia ai ona lava faanaunauga. Ina ia faamamafaina lona teena o le faamalieina faaletino, e talitonu sa nofo Diogenes mo se taimi puupuu i se tapu!

I le saʻilia o le lelei silisili, e faapea le tala sa savali Diogenes i Atenai i le mūtinitini o le la ma se molī o loo mumū e saʻili se tagata amio lelei! O se ituaiga o amio faapena na tosina mai ai manatu o tagata ma sa avea o se auala na aʻoaʻo atu ai Diogenes ma isi Tagata Mafaufau Leaga. E faapea le tala na iai se taimi na fesili atu ai Alesana le Sili ia Diogenes po o le ā le mea o loo sili ona ia manaʻo i ai. Na taʻua faapea na pau lava le mea na manaʻo i ai Diogenes ina ia alu ese Alesana ina ia aua neʻi pupunia ai le susulu mai o le la!

Sa ola Diogenes ma isi Tagata Mafaufau Leaga o ni tagata ʻāisi. Sa leai so latou taimi mo faiā masani faaletagata, ma na latou teena foʻi tiute o se tagatanuu. Atonu ona o aafiaga mai manatu o Socrates i finauga, na avea ai i latou ma ē e matuā lē faaaloalo i isi. Na amata ona lauiloa Diogenes i ana faiga faalumaluma ae tutui. Na oo ina maua e Tagata Mafaufau Leaga le talaaga o le “pei o ni taʻifau,” ae o Diogenes lava ia sa iai lona igoa fai o Le Taʻifau. Na oti o ia i le pe tusa o le 320 T.L.M. ina ua pe ā ma le 90 tausaga le matua. O se maa faamanatu sa faia i le maamora o loo ta ai le faatagata o se taʻifau na faatūina i luga o lona tuugamau.

O nisi o vala o filosofia a Tagata Mafaufau Leaga na taliaina e isi tagata e ese foʻi o latou mafaufauga. Peitaʻi i se taimi mulimuli ane, sa faalumaina ai le aʻoaʻoga a Tagata Mafaufau Leaga ona o manatu faatuʻiese o Diogenes ma isi na mulimuli ane avea ma ona soo. O le iʻuga, na taapeape uma ai lava.

Tagata Mafaufau Leaga o Aso Nei—Pe e Tatau Ona E Faaalia Atu o Latou Ala?

Ua faamatalaina e le Oxford English Dictionary le tagata mafaufau leaga o aso nei e pei o “se tagata faasausili po o le saʻili masei. . . . O se tasi na te faaalia se uiga e lē talitonu i le faamaoni ma le lelei o uunaʻiga faaletagata ma gaoioiga, ma e masani ona latou faaalia atu e ala i le faatauemu ma le faitio; se faatauemu e saʻiliʻili masei.” O nei uiga ua faaalia i le lalolagi o loo siʻomia ai i tatou, ae e mautinoa, e lē taitai fetaui lelei i uiga faa-Kerisiano. Seʻi manatu i aʻoaʻoga ma mataupu silisili o le Tusi Paia o loo mulimuli mai.

“E alofa mutimuti vale ma alofa fua mai Ieova; e tele gese lona toasa, a e tele lona alofa. E le aoai mai pea lava ia; e le faamoemoe foi lona toasa e faavavau.” (Salamo 103:8, 9) Ua faatonuina Kerisiano ina ia ‘faaaʻoaʻo i le Atua.’ (Efeso 5:1) Afai e filifili le Atua Silisili Ese e faaalia le alofa ma le matuā tele o le alofa mutimutivale na i lo le “faasausili po o le saʻiliʻili masei,” e mautinoa e tatau i Kerisiano ona taumafai e faia foʻi faapea.

O Iesu Keriso, lē na ia toe faaalia mai Ieova, ‘ua tuuina mai e ia le faaaʻoaʻo mo tatou, ina ia tatou mulimuli atu i ona tulagaaao.’ (1 Peteru 2:21; Eperu 1:3) I nisi o taimi, e faaalialia ai e Iesu aʻoaʻoga sesē a lotu ma molimauina e tusa ai o mea leaga o loo tutupu i le lalolagi. (Ioane 7:7) E ui i lea, na ia fai atu upu faamālō i tagata faamaoni. Mo se faataʻitaʻiga, na ia fetalai e uiga ia Natanielu e faapea: “Faauta, o le Isaraelu moni, e leai sona pepelo.” (Ioane 1:47) Pe a faia e Iesu se vavega, i nisi o taimi e uaʻi atu ai o ia i le faatuatua o lē o loo faia i ai. (Mataio 9:22) Ma ina ua manatu nisi faapea o le meaalofa a se tasi fafine e faaalia ai lona talisapaia sa faalialiavale, sa leʻi mafaufau leaga Iesu e tusa ai o uunaʻiga na ia faia ai faapea ae na fetalai atu: “O nuu uma i le lalolagi e talaʻiina atu i ai lenei tala lelei, e taʻua ai le mea ua faia e lenei fafine, e faamanatu aʻi ia te ia.” (Mataio 26:6-13) Sa avea Iesu o se uō maufaatuatuaina ma o se aumea māfana i ona soo, na “alofa ia i latou ua oo i le gataaga.”—Ioane 13:1.

Talu ai sa lelei atoatoa Iesu, e ono faigofie lava la ona ia maua ni masei o tagata lē lelei atoatoa. Na  i lo le faaalia o se agaga lē talitonuina ma saʻiliʻili masei, ae na ia saʻili e faafouina tagata.—Mataio 11:29, 30.

O le “[alofa] e talitonu i mea uma.” (1 Korinito 13:7) E matuā eseese lena faamatalaga pe a faatusatusa atu i manatu o tagata mafaufau leaga, o ē latou te fesiligia uunaʻiga ma gaoioiga a isi. O le mea moni, ua faatumulia le lalolagi i tagata e iai o latou uunaʻiga lilo; o lea o loo iai se manaʻoga mo le mataala. (Faataoto 14:15) E ui i lea, e nofosauni le alofa e talitonu ona e faatuatuaina, ae lē masalosalo naʻuā.

E alofa le Atua ma faatuatuaina ana auauna. E sili atu ona ia silafia mea e gata mai ai lo latou mafai na i lo i latou lava. Peitaʻi, e lē taitai feagai Ieova ma ona tagata i se auala masalosalo, ma na te lē faatalitalia foʻi se mea e sili atu na i lo le mea latou te mafaia. (Salamo 103:13, 14) E sili atu i lena, e saʻili le Atua i uiga lelei o loo i tagata, ma i se auala maufaatuatuaina, na te tuuina atu ai ia i latou faaeaga ma le pule i ana auauna faamaoni, e ui ina lē lelei atoatoa.—1 Tupu 14:13; Salamo 82:6.

“O aʻu o Ieova o le suesue i le loto, o le tofotofo i manatu, ina ia tuuina atu i tagata taitasi e tusa ma ona ala, e tusa foi ma le fua o ana amioga.” (Ieremia 17:10) E mafai e Ieova ona faitauina ma le saʻo le loto o se tagata. Tatou te lē mafaia. O lea la, e manaʻomia ona tatou faaeteete i le faauiga sesē o ni uunaʻiga patino a isi.

O le faatagaina o se agaga mafaufau leaga e mauaa ia i tatou ma mulimuli ane ona pulea ai o tatou mafaufauga, e iai lona avanoa mo le faatupu aʻe o fevaevaeaʻiga i le va o i tatou ma uso talitonu. E mafai ona faavevesiina ai le filemu o le faapotopotoga Kerisiano. Seʻi o tatou mulimuli la i le faaaʻoaʻoga a Iesu, o lē sa iai le vaaiga saʻo ae e mautinoa i ana feutagaʻiga ma ona soo. Na avea o ia ma a latou uō faatuatuaina.—Ioane 15:11-15.

“Pei ona outou loto i tagata ona ia latou faia ia te outou, ia faapea lava ona outou faia ia te i latou.” (Luka 6:31) E tele auala e faatatauina ai le fautuaga lenei a Iesu Keriso. Mo se faataʻitaʻiga, tatou te mananaʻo uma lava ia tautatala mai tagata ia i tatou i se auala agalelei ma le faaaloalo. E mautinoa foʻi la, e ao foʻi ona tatou talanoa atu i isi i se auala agalelei ma le faaaloalo. E oo lava foʻi i le taimi na faailoa atu ai ma le malosi e Iesu le sesē o aʻoaʻoga a taʻitaʻi lotu, na te leʻi faia lava faapea i se auala faatauemu.—Mataio 23:13-36.

Auala e Tetee Atu ai i Manatu Mafaufau Leaga

Afai tatou te oo i le lē fiafia ona o isi, e ono faigofie lava ona tatou faatagaina i tatou lava e aafia i manatu mafaufau leaga. E mafai ona tatou tetee atu i lena manatu e ala i le talisapaia o le feagai ai o Ieova ma ona tagata lē lelei atoatoa i se auala faatuatuaina. E mafai ona fesoasoani lenei mea ia i tatou ina ia talia isi tagata tapuaʻi o Ieova e tusa o le tulaga o loo latou iai—o ni tagata lē lelei atoatoa o loo taumafai e fai le mea ua tonu.

O mea tigā e oo i nisi e ono taʻitaʻia atu ai i latou i le lē talitonuina o isi tagata. E moni e lē o se mea atamai le tuuina atu uma o lo tatou faatuatuaga i tagata lē lelei atoatoa. (Salamo 146:3, 4) Peitaʻi, i le faapotopotoga Kerisiano, e toʻatele o loo mananaʻo moni e avea ma puna o faalaeiauga. Seʻi tau ina mafaufau i le faitau afe o i latou o loo pei o ni tinā, tamā, tuafāfine, uso, ma o ni fanau ia i latou ua leiloloa o latou lava aiga. (Mareko 10:30) Seʻi manatu i le toʻatele o i latou ua avea o ni uō moni i taimi o mafatiaga. *—Faataoto 18:24.

E lē o manatu mafaufau leaga ae o le alofa faaleuso e mātaulia ai soo o Iesu, auā na ia fetalai: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) O lea seʻi o tatou faaalia le alofa, ma seʻi o tatou uaʻi atu i uiga lelei o uso Kerisiano. O le faia faapea o le a fesoasoani ia i tatou e alofia ai uiga o se Tagata Mafaufau Leaga.

[Faamatalaga pito i lalo]

[Ata i le itulau 21]

Le Tagata Mafaufau Leaga sili ona lauiloa, o Diogenes

[Faamatalaga i Ata]

Mai le tusi Great Men and Famous Women