Aiseā e Fuafua Tatau ai Mea Tatou te Faatalitalia?

O FAAMOEMOEGA ua taunuu ma moomooga ua taulau e aumaia ai ia i tatou se lagona o le faamalieina. Peitaʻi e ioeina le mea moni, o le tele o o tatou moomooga ma mea tatou te faatalitalia e lē taunuu i le taunuuga sa tatou faanaunau i ai. O ni mea lē lelei na tutupu soo i le olaga e mafai ona oo mai ai lagona ita ia i tatou lava faapea foʻi ma isi. Ua tonu la le manatu o se tagata poto: “O le faamoemoe ua tuai ona taunuu e faanoanoa ai le loto.”—Faataoto 13:12.

O ā nisi o vala e mafai ona taʻitaʻia atu ai i faalogona tigā? E mafai faapefea ona tatou taumafai ia fuafua tatau mea tatou te faatalitalia? E lē gata i lea, aiseā e aogā ai mo i tatou le faia faapea?

Mea e Faatalitalia ma Lagona Tigā

Ona o le saoasaoa tele o le olaga i aso nei, o le tele lava tatou te taumafai e faafetaui atu i ai, o le mamao foʻi lea e foliga mai ua tatou paʻū atu ai i tua. E mafai ona matuā alu uma ai lo tatou taimi ma lo tatou malosi, ma pe a tatou lē taulau e fai se mea na tatou fuafua e fai, ona leaga faia ai lava lea o o tatou faalogona. E oo lava ina amata ai ona tatou lagona e peiseai ua tatou faia se mea leaga i isi tagata. O Cynthia, o se avā ma o se tinā ua malamalama lelei i omiga o le avea ma se matua, ua ia faapea mai: “O le lē tausisi i le faatonuina o laʻu fanau ma oʻu lagona e peiseai e lē o lelei ona ou toleniina i latou e matuā lagona ai le ita.” O Stephanie, o se tamaʻitaʻi talavou, ua faapea mai e faatatau i ana aʻoaʻoga: “E lē lava soʻu taimi e fai ai mea uma ou te manaʻo e fai, ma e oo mai ai lagona o le fiu ia te aʻu.”

O le tele o ni mea lē talafeagai e faatalitalia e faigofie lava ona oo i le itu ua manaʻo ia lelei atoatoa mea, ma e mafai ona matuā tigā ai. Ua taʻutino mai e Peni, o se alii talavou ua faaipoipo e faapea: “Pe a ou iloiloina aʻu gaoioiga, oʻu mafaufauga, po o faalogona, e masani lava ona ou toe iloa ai ni auala sa tatau ona sili atu ona lelei. Ou te faatalitalia lava ia lelei atoatoa mea uma, ma o iinā loa e oo atu ai i le lē onosai, lagona fiu, ma lagona tigā.” O Kaila, o se avā Kerisiano, ua faapea mai o ia: “O tagata e mananaʻo ia lelei atoatoa mea uma e lē taitai tau o latou mafaufau i ni tulaga e lē taulau ai. O matou la e iai lea uiga e matou te mananaʻo ia avea i matou o ni tinā ma o ni avā e silisili ona lelei i mea uma. E tatau ona tele ni mea e mafai ona matou faia ona faatoʻā o matou fiafia lea, lona uiga, matou te matuā ilitata lava i ni taumafaiga e lē fua mai.”

O le isi foʻi vala e mafai ona taʻitaʻia atu i lagona tigā o le tagata lava ia, pe afai o loo i se tulaga leaga lona soifua mālōlōina ma oo i le soifuaga matua. O le faigatā ona fegaoioiaʻi ma le fai ifo o le malosi e ono matilatila mai ai o tatou vaivaiga ma atili ai ona oo mai lagona tigā. Fai mai le taʻutinoga a Elisapeta: “Ou te lagona le lē manofo ona ua lē mafai ona ou faataulauina mea sa matuā faigofie ma sologa lelei le faiga a o oʻu leʻi maʻi.”

O mea na muaʻi taʻua o se faataʻitaʻiga lena o mea e mafai ona faamaʻiteina lagona tigā. Ma pe afai e lē puleaina, e mafai e na faalogona ona taʻitaʻia atu ai i tatou i se talitonuga faapea, e lē o talisapaia i tatou e isi. O lea la, o ā ni auala aogā e mafai ona tatou uia ina ia manumalo mai ai i lagona tigā ma ati aʻe ai le uiga o le fuafua tatau o mea e faatalitalia?

Auala e Ati Aʻe ai le Uiga o le Fuafua Tatau o Mea e Faatalitalia

Muamua, ia manatua e fuafua tatau Ieova ma finagalo malamalama. Ua faamanatu mai e le Salamo 103:14 ia i tatou: “Ua silafia lava e ia le mea na fai aʻi i tatou; ua manatu ia o le efuefu lava i tatou.” I lona silafiaina o o tatou tomai ma vaivaiga, ua faatalitalia ai e Ieova mai ia i tatou na o mea tatou te mafaia. Ma o se tasi o mea o loo ia tāpā mai ia i tatou o le “feooai ma [lo tatou] Atua ma le loto faamaulalo.”—Mika 6:8.

Ua faalaeiauina foʻi i tatou e Ieova ina ia liliu  atu ia te ia i le tatalo. (Roma 12:12; 1 Tesalonia 5:17) Ae faapefea i lena mea ona fesoasoani mai ia i tatou? O le tatalo e faasagatonu ma faapaleniina ai o tatou mafaufauga. O le tatalo faatauanau o se faailoaga lea o lo tatou manaʻomia o se fesoasoani—o se faailoga o le agamalu ma le lotomaulalo. E naunau Ieova e tali mai i a tatou tatalo e ala i le foaʻiina mai ia i tatou o lona agaga paia, lea e fua mai ai le alofa, le agalelei, le mataalofa, ma le pulea totino. (Luka 11:13; Kalatia 5:22, 23, faatusatusa i le NW.) O le tatalo foʻi e faatoʻa mālie ai lagona popole ma le fiu. E ala i le tatalo, “e te maua ai faamāfanafanaga e te leʻi iloaina mai se isi puna,” o le faamatalaga lea a Elisapeta. E ioeina e Keveni lena manatu i lona faapea mai: “Ou te tatalo mo se loto filemu ma se mafaufau manino ina ia mafai ai ona oʻu faatautaia se faafitauli. E lē taitai faia e Ieova se mea ou te faanoanoa ai.” Sa iloa e le aposetolo o Paulo le tautele o le tatalo. O le pogai lena na ia fautua mai ai: “Ia faailoa atu o outou manao i mea uma lava i le Atua . . . O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:6, 7) Ioe, e matuā aogā lava le fesootaʻi atu ia Ieova, auā e fesoasoani ia i tatou ina ia ati aʻe ai le uiga o le fuafua tatau o mea tatou te faatalitalia mai ia i tatou lava faapea ma isi.

Peitaʻi, mai lea taimi i lea taimi, tatou te manaʻomia vave ai ni faalaeiauga. O le upu e fai i le taimi saʻo o le upu lelei lea. O se talanoaga e faia tau o oe ma se uō e maufaatuatuaina ma taʻumatuaina e mafai ona fesoasoani ia i tatou ina ia toe faafou ai la tatou vaai i se mea o loo faapogaia ai lagona tigā ma le popole ia i tatou. (Faataoto 15:23; 17:17; 27:9) O talavou o loo tauivi ma lagona tigā ua latou iloa, o fautuaga mai o latou mātua e fesoasoani ina ia latou maua ai le paleni. Ua taʻutino mai ma le agaga talisapaia e le tamaʻitaʻi talavou o Tagi: “O taʻiala alofa mai oʻu mātua ua mafai ai nei ona sili atu loʻu fuafua tatau ma loʻu paleni, ma ua fiafia ai foʻi isi matou te faifaimea faatasi.” Ioe, ua matuā talafeagai lelei ma le faamanatu mai a le Faataoto 1:8, 9: “Loʻu atalii e, faalogo mai ia i le aʻoaʻo atu a lou tamā; aua foi e te tuulafoaiina le upu a lou tinā; auā e fai ia mea ma pale matagofie i lou ulu, ma mea e asoa i lou ua.”

O āuga o mafaufauga o le tagata e manaʻo ia lelei atoatoa mea uma, ua aofaʻi lelei i se faaupuga faafaatusa e faapea: “O le faatalitalia o le olaga ina ia iʻu tonu i mea patino o loo tatou mananaʻo ai, ua leai se eseesega ma le valaaulia o lagona tigā e oo mai.” Ina ia alofia lena mea, e manaʻomia ai le toe fetuutuunaʻi o mafaufauga. O le lotomaulalo ma le agamalu—le iai o se vaaiga moni i o tatou tapulaa i mea e mafai ona tatou faia—e mautinoa o le a faatupu aʻe ai i o tatou loto le uiga paleni ma le fuafua tatau o mea tatou te faatalitalia. Ua talafeagai ai le lapataʻia o i tatou e le Roma 12:3 ina ia “aua le faasili le manatu o se tasi i le mea ua tatau ona manatu ai.” E lē gata i lea, ua faalaeiauina i tatou e le Filipi 2:3 ina ia lotomaulalo ma ia manatu e sili isi ia i tatou.

O Elisapeta lea na muaʻi taʻua, sa lē lava lona onosai ia te ia ona o lona maʻi. I lona tulaga, sa ia manaʻomia se taimi e malamalama ai i le silafaga a Ieova e faatatau i mataupu, ma ia lelei ona faalogona i le iloaina e faapea, e na te lē o faagaloina la tatou auaunaga. O Kolini ua faatapulaa mea e mafai ona ia faia ona o se maʻi ua faavaivaia ai lona malosi. I le taimi muamua, sa ia te ia lagona faapea ua toetoe lava leai se aogā o lana faiva pe a faatusatusa atu i mea sa ia faia a o lelei lona soifua mālōlōina. Ae i lona manatunatu loloto i mau e pei o le 2 Korinito 8:12, sa mafai ai ona toe aveesea mai ia te ia na faalogona. O loo faapea mai lena fuaiupu: “Afai ua i ai le loto fiafia, e talileleia lea, e tusa ma mea ua ia te ia, a e le tusa ma mea e le o ia te ia.” Ua faapea mai Kolini: “E ui ua itiiti lava se mea o loo mafai ona ou foaʻi atu, ae o lea lava e mafai ona ou foaʻi atu, ma o le mea lena e taliaina e Ieova.” I le Eperu 6:10, (LF ), ua faamanatu mai ai ia i tatou e faapea: “E le amioletonu le Atua, na te le faagalogaloina la outou galuega ma le alofa ua outou faaali mai ai i lona suafa.”

E mafai la faapefea, ona tatou iloa po o fuafua tatau mea o loo tatou faatalitalia? Fesili ifo ia te oe lava, ‘Po o ōgatusa mea o loo oʻu faatalitalia ma mea o loo faatalitalia e le Atua?’ Ua faapea mai le Kalatia 6:4: “Ia taitoatasi ma faamasino i lana lava galuega, ona ia te ia lea o se mea e mitamita ai ia te ia lava, a e le o se tasi.” Manatua, na fetalai Iesu: “E avegofie laʻu amo, o laʻu avega foi e māmā.” O le mea moni, i le avea ai o ni Kerisiano, e iai sa tatou avega o loo amo, peitaʻi e “avegofie” ma “māmā,” ma ua folafola mai e Iesu faapea, pe afai tatou te iloa ona amoina ma le talafeagai, o le a faafouina ai i tatou.—Mataio 11:28-30.

O le Fuafua Tatau o Mea e Faatalitalia e Aumaia ai Faamanuiaga

O taui vave ma tumau e maua mai le faalogo atu ma faatatauina fautuaga a le Afioga a le Atua, a o  tatou taumafai e ati aʻe le uiga o le fuafua tatau o mea e faatalitalia. O se tasi o māfuaaga, ona e iai se iʻuga lelei o lenei mea i o tatou tino. Ua taʻutino mai e le tamaʻitaʻi talavou o Sieni, o lē na ia maua aogā mai faamanatuga a Ieova, e faapea: “Ua sili atu nei ona tele loʻu malosi ma loʻu naunau mo le olaga.” Ua talafeagai la le uunaʻia o i tatou e le Faataoto 4:21, 22 ina ia uaʻi atu i fetalaiga a Ieova e ala i mata o o tatou loto, “auā o ia mea o le ola lea i e ua maua; ma le mea e malolo ai o latou tino uma.”

O le isi taui o le faaleleia ai lea o o tatou mafaufau ma faalogona ootia. Fai mai Tiresa: “Ina ua ou faauaʻi atu loʻu mafaufau ma loʻu loto i le Afioga a le Atua, ua ou iloa ai le avea pea o aʻu o se tagata e sili atu ona fiafia.” E moni, o le a tatou tofo pea i ni lagona tigā i le olaga. Peitaʻi, o le a mafai ona tatou nofosauni e vave ona fesagaʻia na tulaga. Ua faalaeiau mai le Iakopo 4:8: “Ia outou faalatalata atu i le Atua, ona faalatalata mai lea o ia ia te outou.” O loo folafola mai foʻi e Ieova lona foaʻi mai o le malosi ia i tatou ina ia tatou manumalo ai mai luʻi o le olaga ma foaʻi mai le filemu.—Salamo 29:11.

O le fuafua tatau o mea tatou te faatalitalia e mafai ai ona tatou tausisia se tulaga mautū faaleagaga. O se faamanuiaga foʻi lena mea. E mafai ai ona tatou taulaʻi atu pea i mea e sili atu ona tāua i le olaga. (Filipi 1:10) Ona talafeagai ai lea o sini tatou te faatutū ma o ni sini e mafai ona ausia, lea e aumaia ai le tele o le olioli ma le faamalieina. O le a atili ai ona tatou naunau e tuuina atu tatou lava ia Ieova, i le iloaina e faapea, o le a ia faagaoioia mea mo i tatou i se tulaga e sili atu ona lelei. Ua faapea mai Peteru: “O le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai.” (1 Peteru 5:6) Pe iai ea se isi mea e sili atu ona tauia na i lo le faamamaluina e Ieova?

[Ata i le itulau 31]

O le ati aʻe o le uiga o le fuafua tatau o mea e faatalitalia e mafai ona fesoasoani ia i tatou ina ia manumalo ai i lagona lē fiafia ma le tigā