Aiseā ua Lē Faia ai ni a Latou Fanau?

O TELEA ma Folola, * o se ulugalii faaipoipo, e nonofo ma galulue i le ofisa o le lālā a le Sosaiete o le Olo Matamata i Nigeria. E leʻi umi talu ona la auauna iinā, ae asiasi ane loa i ai le tinā o Folola. E mamao lava le mea na faimalaga ane ai i lona fia talanoaina o se mataupu e faatatau i lana tama teine sa lē lelei ai sana moe i le tele o pō.

“O loo lua faia mea lelei mo aʻu,” o lana tala lea i le ulugalii. “Lua te aauina atu meaalofa, ma lua asiasi atu foʻi ia te aʻu. O na faailoaga o le alofa e tautele ia te aʻu. Peitaʻi i le taimi foʻi e tasi o na mea e oo mai ai ia te aʻu le mafatia talu ai ou te nofo pea ma tau manatu po o ai o le a faia na mea mo oulua pe a lua oo i le matua lea ua ou iai nei? O lenei ua lua tausaga o le lua faaipoipoga, ae leʻi faia lava se lua fanau. Pe lua te lē manatu ea ua tatau ona oo i le taimi lua te tuua ai le Peteli ae fai se lua fanau?”

O le manatu lenei o le tinā: Ua matuā lava le tele o le taimi ua faaalu e Telea ma Folola i le Peteli. Ua oo nei i le taimi ua tatau ona la mafaufau i so la lumanaʻi. E mautinoa lava e iai isi tagata e mafai ona latou faia galuega o loo la faia. E lē faapea o le a faamaamulu Telea ma Folola mai le faiva faataimi atoa, ae mafai lava ona la galulue i se isi vala o le auaunaga, se vala o le a mafai ai ona la faia ni fanau ma tofo ai i le olioli o le avea ma mātua.

Le Popolega o le Tinā

Ua malamalama lelei lava i le popolega o le tinā. O le faanaunauga ina ia fai se fanau o se faanaunauga autū ma e taatele i aganuu uma ma i taimi uma. O le faia o ni fanau e tutupu aʻe ai lagona o le olioli ma le faamoemoe. Ua faapea mai le Tusi Paia: “O e ua fanau mai, o le taui lea.” Ioe, o le malosi e mafai ona faia ai ni fanau o se meaalofa tautele mai Lē na Foafoaina i tatou e alofa.—Salamo 127:3.

I le tele o aganuu, e fesagaʻi ai ulugalii faaipoipo ma le anoanoaʻi o omiga faaleolaga nei ina ia faia ni fanau. Mo se faaaʻoaʻoga, i Nigeria, o se tuufaatatauga e tusa ma le toʻaono ni tamaiti e fanauina e se fafine, e taatele ai lava i faaipoipoga ona faalogo i faamanuiaga faapea i ulugalii fou: “I le isi iva masina o lumanaʻi nei, matou te faatalitalia ai le tagi mai o se pepe i le lua fale.” Atonu o se tasi o meaalofa o le a maua e le ulugalii fou i le la faaipoipoga o se moega pepe. E tulimataʻi lelei e tinā uma o le ulugalii le kalena. Afai e atoa le tausaga e leʻi maʻitō lava le tamaʻitaʻi faaipoipo, latou te matuā vaʻiliʻilia pe iai se faafitauli e mafai ona latou fesoasoani ai e foʻia.

E iai lava le lagona i le toʻatele o tinā faapea, o le māfuaaga e faaipoipo ai se ulugalii ina ia faia se fanau ma faaauau le gafa o le aiga. Na faapea atu le tinā o Folola ia te ia: “Aiseā na e faaipoipo ai pe afai e te lē o fia manaʻo i se fanau? Na fanauina oe e se tasi; e tatau foʻi la ona e fanauina mai sau oe lava fanau.”

E ese mai lena, e iai isi mataupu aogā e ao ona manatunatu i ai. I le tele o atunuu i Aferika, e itiiti ni sauniuniga ua fai e le malo mo le tausia o tagata matutua. I le aganuu masani la, o le fanau e tausia o latou mātua ua mātutua, e pei foʻi ona sa tausia e na mātua a latou fanau a o laiti. O le manatu la lena o le tinā o Folola, pe afai o le a lē faia  se fanau a lana fanau, o lona uiga i tausaga mulimuli ane, o le a latou oo ai i se tulaga lamatia o le tuua toʻatasi, e lē manaʻomia e se isi, e matitiva, ma leai se tasi e tanuina i latou pe a maliliu.

I le tele o vaipanoa o Aferika, e manatu ai o se malaia pe a leai se fanau. I nisi vaipanoa, ua oo ai lava ina faatalitalia tamaʻitaʻi ina ia faamaonia mai e mafai ona latou fanauina ni fanau a o leʻi faia le faaipoipoga. E toʻatele fafine o ē ua lē mafai ona latou afuafuaina ni tamaiti o le a vave ona saʻili atu i ni fualaau ma ni fofō i se taumafaiga ia mafai ona latou fananau ai.

Ona o nei vaaiga, ua manatu ai tagata i ulugalii faaipoipo o ē ua fuafua ma le loto i ai e lē faia ni a latou fanau, faapea ua latou melea se mea lelei sa ono latou maua. E masani ona manatu ia i latou ia faapea, atonu ua ese mai lava i isi uma tagata, e leai se faautauta, ma e misialofa ia i latou.

Le Olioli ma Tiute Tauave

Ua iloa lelei e tagata o Ieova, e ui ina iai le olioli i le tausia aʻe o fanau, ae iai foʻi ma se tiute tauave. Ua faapea mai le Tusi Paia i le 1 Timoteo 5:8: “A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faatuatua.”

E ao i mātua ona saunia le tausiga mo o latou aiga i le itu faaletino ma le faaleagaga foʻi, ma o lenei itu e tele se taimi ma ni taumafaiga e alu ai. E lē ia i latou se manatu faapea, talu ai o le Atua na ia saunia maia le fanau, e faitalia foʻi la le Atua ma tausia i latou. Latou te amanaʻia le mea moni faapea, o le tausia aʻe o se fanau i mataupu silisili a le Tusi Paia o se tiute tauave faataimi atoa ua tofia mai e le Atua i mātua; e lē o se tofiga e tatau ona faasafua atu i isi.—Teuteronome 6:6, 7.

Ua matuā fitā lava le tiute o le tausia aʻe o fanau i nei “aso e gata ai” o “aso faigata.” (2 Timoteo 3:1-5) E lē gata i tulaga sili ona leaga o le tamaoaiga, ae o le faateteleina o amioga faalēmataʻu a tagata o se isi lena luʻi i le tausia aʻe o fanau i aso nei. E ui lava i na tulaga, ae i le lalolagi aoao, e lē mafaitaulia ulugalii Kerisiano ua latou faafetaiaʻia lenei luʻi ma o loo taulau manuia ai i le tausia aʻe o fanau “i aoaiga ma apoapoaiga a le Atua [Ieova].” (Efeso 6:4) E alofa mai Ieova ma faamanuia mai i nei mātua i a latou galuega mamafa.

Le Pogai ua Lē Faia ai ni Fanau a Nisi

Ae i le isi itu, e toʻatele ulugalii Kerisiano ua lē faia ni a latou fanau. O nisi e lē o mafai ona fananau peitaʻi latou te lē o faia foʻi ni fanaufai. O isi ulugalii e iai le mafai e faia ai ni fanau, ae ua filifili e lē faia. O na ulugalii e lē faapea ua lē faia ni a latou fanau ona e mumusu i le tiute tauave pe fefefe e fesagaʻia luʻi o le avea ma mātua. Na i lo lea, ua latou filifili e uaʻi atoatoa atu i vala eseese o le faiva faataimi atoa, na o le a lē mafai ona faataunuuina pe afai e iai se fanau. O nisi o loo auauna o ni misionare. O isi e auauna ia Ieova i le galuega femalagaaʻi pe i Peteli.

I le pei o isi uma Kerisiano, ua latou iloa e iai se galuega faanatinati e ao ona faia. Na fetalai Iesu: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” O le galuega lenei ua faia i aso nei. O se galuega e mātua tāua, talu ai “o le gataaga” o le a uiga lea i le faaumatiaga mo i latou o ē lē utagia le tala lelei.—Mataio 24:14; 2 Tesalonia 1:7, 8.

O lo tatou vaitaimi e talitutusa atu i le taimi a o fausia e Noa ma lona aiga le vaa telē lea na faasaoina ai i latou i le Lolo tele. (Kenese 6:13-16; Mataio 24:37) E ui sa faaipoipo uma atalii e toʻatolu o Noa, ae aunoa ma se tasi o i latou na faia ni fanau seʻia oo ina ua uma le Lolo. Atonu o se tasi o māfuaaga o lena mea ona sa mananaʻo nei ulugalii e uaʻi atoatoa atu o latou mafaufau ma le malosi i le galuega lea na fai. O le isi māfuaaga atonu na latou faatalatū e tausia ni fanau i totonu o se lalolagi amio matagā ma sauā, lea sa “leaga tele lava tagata . . . o manatu uma ua mafaufau ifo ai i o latou loto ua na ona leaga ia i aso uma lava.”—Kenese 6:5.

E ui e lē faapea ai ua sesē le faia o ni fanau i aso nei, ae toʻatele ulugalii Kerisiano ua latou faafitia le faia o ni fanau ina ia latou faia ai se sao atoatoa i le galuega faanatinati ua tuuina mai e Ieova i ona tagata e fai. O nisi ulugalii e faatali mo sina vaitaimi a o leʻi faia ni a latou fanau; o isi ua filifili e lē faia lava ni fanau ae o loo mafaufau e faia ni fanau i totonu o le lalolagi fou amiotonu a Ieova. Po o se lē faautauta ea lena mea? Po ua latou misia ea la se mea lelei mai le olaga? Pe tatau ea ona misialofa ia i latou?

 Olaga Saogalemu ma Olioli

O Telea ma Folola lea na taʻua i le amataga, ua silia nei ma le sefulu tausaga talu ona faaipoipo, ae o loo tumau pea le la filifiliga ina ia lē faia se la fanau. Ua faapea mai Telea: “O loo ugauga mai pea o ma tauaiga e fai se ma fanau. O le itu lava lea o loo latou popole i ai o lo ma saogalemu i le lumanaʻi. E ma te faaalia lava i ai lo ma talisapaia mo lo latou mafaufau mai, ae ma te faamalamalama foʻi i ai i se auala faautauta e faapea, o loo matuā sili lo ma fiafia i le mea lea ma te faia. I le tulaga o le saogalemu, ma te taʻu atu i ai o loo tuu lo ma faatuatuaga ia Ieova, o lē na te tausia mai le lelei o i latou uma e tumau i le faatuatua ma faamaoni atu ia te ia. Ma te faamatala foʻi i ai, o le iai o se fanau e lē o se faamautinoaga lena e iloa ai o le a latou tausia o latou mātua pe a matutua. O nisi fanau e seāseā lava tausia o latou mātua, o isi ua lē mafai ona latou faia faapea, ae o isi foʻi ua feoti a o leʻi maliliu o latou mātua. Ae peitaʻi o lo ma lumanaʻi, e sili atu ona mautinoa pe a lafo ia Ieova.”

O Telea ma isi e pei o ia o loo faatuatua atu ma le mautinoa i le folafolaga a Ieova i ana auauna faamaoni: “Ou te le tuua lava oe, ou te le tuulafoai lava ia te oe.” (Eperu 13:5) Ua latou talitonu foʻi “e lei faapuupuuina le aao o Ieova, ia le mafaaola; e le tutuli foi ona taliga, ia le mafaafofoga.”—Isaia 59:1.

O le isi māfuaaga mo le mautinoa, o le mātauina lea o le auala e tausia ai e Ieova ana auauna faamaoni. Na tusi mai le tupu o Tavita: “Ua ou toeaina aʻu nei, sa aʻu taulealea; a ou te lei iloa se tagata amiotonu na lafoaiina.” Seʻi mafaufau i ai. Po o e silafia ea se auauna faamaoni a Ieova ua matuā “lafoaiina” lava?—Salamo 37:25.

O ē ua faaaluina o latou olaga atoa e auauna ai ia Ieova ma o latou uso Kerisiano, ua latou lagona le faamalieina pe a toe tomanatu i na taimi, na i lo le mafaufau i ai i ni lagona faanoanoa. O le uso o Iro Umah, ua 45 tausaga o iai i le auaunaga faataimi atoa, ma o loo auauna o se ovasia femalagaaʻi i Nigeria. Fai mai a ia: “E ui ina leai se ma fanau ma si aʻu avā, ae ma te manatua pea o loo tausia i maʻua e Ieova e lē gata i le itu faaleagaga ae i le faaletino foʻi. E leai se mea ma te lē o maua. E tusa lava pe a oo ina ma mātutua o le a ia lē tuulafoaʻia lava i maʻua. Ua ma faamaonia, o nei tausaga o loo ma auauna ai faataimi atoa, o tausaga sili nei ona fiafia i o ma olaga. Ma te faafetai ona ua mafai ona ma auauna atu i o ma uso, ma e talisapaia foʻi e o ma uso la ma auaunaga, ma latou fesoasoani mai ia i maʻua.”

E ui ina lē o iai ni fanau faaletino a le toʻatele o ulugalii, ae o loo ia i latou nisi ituaiga o fanau: o soo Kerisiano o ē auauna ia Ieova. Pe tusa ma le 100 tausaga o le aposetolo o Ioane i le taimi na ia tusi mai ai faapea: “E leai soʻu fiafia e sili i lenei, pe a ou faalogo ua savavali laʻu fanau i le upu moni.” (3 Ioane 4) Sa maua e Ioane le olioli tele, ona o le faamaoni o lana “fanau”—o i latou na ia talaʻia i ai “le upu moni.”

O le olioli foʻi lena o loo anoanoaʻi i aso nei. O Bernice, o se tuafafine mai Nigeria, ua 19 tausaga talu ona faaipoipo, ma o loo tumau pea lana filifiliga e lē faia sana fanau. Mo le 14 tausaga ua tuanaʻi, sa auauna ai o ia o se paeonia. A o oo atu o ia i le taimi o lona olaga ua lē toe mafai ai ona maua sana ia lava fanau, e leai lava ma sona faanoanoa i lona tuutoina atu o lona olaga i le faia o soo. Ua ia faapea mai: “Ou te fiafia i le vaai atu i aʻu fanau faaleagaga o loo malolosi aʻe. Pe ana faapea foʻi e iai saʻu lava fanau, ou te lē mautinoa pe tutusa so latou māfana mai ia te aʻu na i lo le māfana mai o i latou na ou fesoasoani e aʻoaʻo i ai le upu moni. Latou te vaai mai ia te aʻu e pei o so latou lava tinā moni, e matou te talatalanoa i mea latou te olioli ai ma o latou faafitauli ma fesili mai ia te aʻu mo ni fautuaga. Latou te tusi mai ia te aʻu ma matou feasiasiaʻi.

“E manatu nisi o se malaia pe a leai sau lava fanau moni. Ua latou faapea mai o le a e mafatia pe a oo ina e matua. Ae lē o loʻu manatu lena i ai. Ou te iloa, pe afai e tumau pea ona ou auauna ma le lotoatoa ia Ieova, o le a ia tauia mai aʻu ma tausia oʻu manaʻoga. O le a lē taitai ona ia lafoaʻia aʻu pe a ou matua.”

E Alofagia ma Faatāua e le Atua

O i latou ua fanauina ma tausia aʻe ni fanau o loo ‘savavali i le upu moni’ e tele lava mea e ao ona lotofaafetai ai. E lētioa faapea mai le Tusi Paia: “E matua olioli lava le tamā o le ua amiotonu; o le na fanaua le atalii poto e fiafia o ia ia te ia; e fiafia lou tamā ma lou tinā; e olioli lava le na fanau mai”!—Faataoto 23:24, 25.

 O Kerisiano ua lē o ia i latou le olioli i le tausia aʻe o fanau i lenei lalolagi ua faamanuiaina i latou i isi auala. O le toʻatele o nei ulugalii ua latou faatinoina se matafaioi matuā tāua i le faalauteleina o manaʻoga o le Malo i se itu e tele atu. A o faagasolo tausaga, ua latou maua le potomasani, le atamai, ma tomai e mafai ai ona latou faia se sao tāua i le galuega o le Malo. E toʻatele o loo iai i muaʻau o le galuega.

E ui ina lē faia ni a latou fanau ona o le fia faaauilumaina o manaʻoga o le Malo, ae ua faamanuia Ieova ia i latou i le iai o so latou aiga faaleagaga e alolofa, o loo matuā talisapaia taulaga ua latou faia. E pei ona sa fetalai Iesu: “Ai se tasi ua ia tuua [uiga i le uluaʻi gagana, “faamaamulu”] le fale, po o uso, po o tuafāfine, po o le tinā, po o le tamā, po o le fanau, po o fanua, ona o aʻu ma le tala lelei, e maua lava e ia taisautuaselau i lenei olaga, o fale, ma uso, ma tuafāfine, ma tinā, ma fanau, ma fanua, . . . a o le ola atali e maua ai le ola faavavau.”—Mareko 10:29, 30.

Maʻeu le tautele ia Ieova o i latou uma o ē faamaoni! O na tagata faamaoni uma, o i latou e fai fanau ma i latou e lē o faia ni fanau, ua faalaeiauina i latou e le aposetolo o Paulo e faapea: “E le amioletonu le Atua, na te le faagalogaloina la outou galuega ma le alofa ua outou faaali mai ai i lona suafa, auā na outou auauna i le au paia, i le o loo outou auauna i ai.”—Eperu 6:10.

[Faamatalaga pito i lalo]

[Ata i le itulau 23]

Ua faamanuiaina ulugalii e leai ni fanau i ni aiga faaleagaga e alolofa