Lipoti a Ē Faalauiloa le Malo

E Tāua ia Ieova i Latou e Alolofa ia te Ia

SA ILOGA lava Lepanona i ona ala manuia faalenatura talu mai taimi o le Tusi Paia. (Salamo 72:16; Isaia 60:13) O mea sa sili ona faatāuaina, o ona arasi matuā ofoofogia, ia sa sili ona manaʻomia e tagata mo le fauina ai o fale ona o le matagofie, manogi, ma le anagatā. I le uluaʻi senituri, sa iai se mea e sili ona tāua na aumai mai Lepanona. Ua lipotia mai e le Evagelia a Mareko e faapea, mai i Turo ma Saitonu, le oganuu anamua o Lepanona, “e toatele lava ua o mai ia [Iesu], ina ua latou faalogo i ia mea sa faia e ia.”—Mareko 3:8.

E faapena foʻi aso nei, o loo faaauau pea ona fua mai e Lepanona fua e matuā tāua lava i le silafaga a Ieova. Ua faamatilatila mai e mea na tutupu ia o loo mulimuli mai lenei mea.

• Na talosagaina se Molimau talavou e igoa ia Wissam ina ia fai atu sana lauga e 30 minute i lana vasega i le aʻoga. Sa manatu Wissam e faapea o le a avea lenei ma avanoa lelei e avatu ai se molimau. O lea na ia faaaogā ai le tusi, Life—How Did It Get Here? By Evolution or by Creation? ma saunia ai se lauga i le mataupu o le foafoaga. Ae peitaʻi, ina ua vaai i le mataupu, na fai atu loa le faiaʻoga a Wissam e faapea, talu ai ona o se mataupu e tāua tele, e mafai la ona faaumiumi atu e Wissam lana lauga i le 45 minute.

A o amata e Wissam lana lauga, sa taofi o ia e lona faiaʻoga ma amia le pule aʻoga. E leʻi pine ae taunuu ane le pule aʻoga, ma na toe amata ai e Wissam lana lauga. A o ia faalogologo i fesili na lāgā e Wissam i le amataga o lana lauga, sa fiafia lava le pule aʻoga ma na faapea atu, e tatau ona tofu tamaiti aʻoga uma ma se kopi o le lauga.

I sina taimi mulimuli ane, sa mātauina ai e se tasi faiaʻoga na ui ane le matuā fiafia o tamaiti i le potu aʻoga ma na fesili po o le ā le mea o tupu. Ma ina ua faailoa atu ia te ia, sa ia fesili atu pe na taumafai ia Wissam e faamaonia le foafoaga po o le evolusione. Na sau le tali o le “foafoaga.” Ina ua ia iloa o Wissam o se tasi o Molimau a Ieova, na fai atu le faiaʻoga i le vasega: “O le a outou iloa ai i lana lauga e lagolagoina e le faasaienisi ia le foafoaga ae lē o le evolusione.”

I lea na iloa ai, o lenei faiaʻoga sa iai sana kopi o le tusi Creation ma sa ia faaaogāina e fai atu ai ana lesona i le iunivesite! A o leʻi alu, sa ia talosaga atu pe mafai ona ia toe foʻi mai i le aso e sosoo ai e aumai lana vasega ina ia mafai ona talanoa atu i ai Wissam. O lena mea na iʻu ai foʻi i le tuuina atu o se isi molimau lelei e uiga ia Ieova.

• O Nina, e luasefulu lua ona tausaga sa galala mo vai o le upu moni. I se tasi aso, na avatu ai e le tama a le tuafafine o lona tamā ia te ia se Tusi Paia ma faamasani atu o ia i le Lotu Penetekoso. Sa faitau ma le fiafia e Nina le Tusi Paia ma iloa ai mai lana faitau e faapea, e tatau i Kerisiano ona talaʻi, o lea sa amata ai ona ia talanoa atu i ē latou te masani. O tagata uma lava sa ia talanoa atu i ai, sa fesili atu ia te ia: “O oe o se tasi o Molimau a Ieova?” Sa matuā nunumi lava ia te ia lena fesili.

I le ono tausaga mulimuli ane, na asiasi atu ai Molimau a Ieova i le aiga o Nina ma taʻu atu ia te ia e uiga i le Malo o le Atua. I le taimi muamua sa taumafai o ia e suʻesuʻe mo ni mea na sesē ai la latou aʻoaʻoga. Ae peitaʻi, sa ia iloa na saʻo uma lava a latou tali ma sa faavae i le Tusi Paia.

O mea na aʻoaʻoina mulimuli ane e Nina—o le suafa o le Atua, o Ieova; o faamanuiaga o le Malo; ma isi mea faapena—sa faamautinoa ai ia te ia e faapea ua ia mauaina le upu moni. Sa ia tuuina atu lona ola i le Atua ma papatisoina ai o ia. Mo le fitu tausaga ua mavae, ua auauna ai Nina e avea o se faievagelia faataimi atoa. E moni, e faamanuia e Ieova i latou o ē alolofa moni ia te ia.—1 Korinito 2:9.