Faaaloalo i le Pule—Aiseā e Talafeagai Ai?

O AI sē lē faafetai ona ua iai i leoleo le pule e molia ai tagata solitulafono o ē gaoia a tatou meatotino pe faamataʻuina o tatou aiga? Ma pe tatou te lē talisapaia ea le iai i faamasinoga o le pule e faasala ai tagata solitulafono ina ia puipuia le nuu?

Atonu e manatua ai foʻi isi auaunaga aogā i le lautele, e pei o le faaleleia o auala, le tausia o le tumamā e ala i le taalaeina o otaota, ma aʻoaʻoga—ia e masani ona faatupeina e ala i lafoga ua aoina e faiga malo. O loo taulamua Kerisiano moni i lo latou faaalia atu faapea o le faaaloalo mo pule ua tofia o se tulaga ua matuā talafeagai. Ae o le ā le tele e ao ona faatino ai lena faaaloalo? Ma o ā vala o le olaga e manaʻomia ai le faaaloalo i le pule?

Pule i Totonu o le Nuu

Ua taʻu mai e le Tusi Paia i tagata uma lava, pe talitonu pe lē talitonu, ina ia faaaloalo i pule faaleolaga nei, lea e galue mo le lelei o le nuu. Na tusi atu le aposetolo Kerisiano o Paulo i ona uso talitonu i Roma e uiga i lenei mataupu, ma e aogā ona iloiloina mea o loo ia fai mai ai, e pei ona faamauina i le Roma 13:1-7.

O Paulo o ia o se tagatanuu Roma, ma sa avea Roma ma malo malosi o le lalolagi i lena vaitaimi. I le tusi a Paulo, lea na tusia pe tusa o le tausaga e 56 T.A., na ia fautuaina ai Kerisiano ina ia avea ma tagatanuu lelei. Na ia tusi atu: “Ia usiusitai tagata uma i faipule silisili; auā e leai se pule pe a le mai le Atua; o pule uma lava o loo fai nei, ua faatuina e le Atua.”

Iinei o loo faamatala ai e Paulo faapea na semanū e leai lava se pule faaletagata e iai pe ana lē faatagaina e le Atua. I lena la itu, ua maua ai e faipule silisili so latou tulaga e fai faatatau i totonu o le faatulagaga o fuafuaga a le Atua. O le mea lea ua faapea mai ai, “o le na te tetee i le pule, ua tetee e ia i le sauniga a le Atua.”

E ui atonu pe a fai e tagatanuu ni mea lelei ona viiviia lea o i latou e faipule silisili, peitaʻi ua tuuina foʻi i nei pule le aiā latou te faaoo atu ai faasalaga i ē fai measesē. O i latou e faia mea leaga ua lava ma totoe māfuaaga latou te matataʻu ai i le aiā a pule e gaoioi ai o “le na te taui atu,” talu ai o le mea lena o loo faia e faiga malo i lo latou galulue ai o se ‘auauna a le Atua.’

 Ua faaiʻu mai e Paulo ona manatu i le faapea mai: “O lenei, e tatau ona usiusitai, e le gata ona o le toasa, a e peitai ona o le loto fuatia ifo. O le mea foi lea tou te avatu ai taulaga, auā o auauna i latou a le Atua, o loo finafinau i lenei lava mea.”

O le tiute tauave mo le faaaogāina o lafoga e paʻū atu lea i faipule silisili, ae lē o le tagata totogi lafoga. I le avea o se Kerisiano ma se tagatanuu faamaoni, na te tausisia ai se lotofuatiaifo lelei. Na te iloa faapea, o lona gauaʻi atu i faipule silisili ma totogi lafoga e ao ona totogia, e lē gata o loo ia lagolagoina ai le faatulagaga a le nuu o loo ia nofo ai, ae o loo ia ola ai foʻi e ōgatusa ma mea e manaʻomia e le Atua.

Le Aiga ma le Pule

Ae faapefea le pule i le aiga? I pōpōfou lava o le olaga o se pepe, e masani ona manaʻo lava ia uaʻi atoatoa atu ia te ia lona tinā e ala i lona tagi pe oo foʻi ina ee. Peitaʻi o se matua e atamai o le a ia iloa lelei manaʻoga moni o le pepe ma e tusa lava po o le ā le faaliʻi i fea o le pepe e na te lē faataga lena mea e puleaina o ia. O nisi tamaiti, a o latou tutupu aʻe ma matutua, ua matuā tuufau lava ma faataga e faatulaga a latou lava tapulaa. Ae ona o le lē lava o se potomasani, e ono oo ai ina latou aafia i ni soligatulafono po o isi measesē, ma faavevesi ai le aiga ma le nuu, e pei ona nofouta lelei i ai le toʻatele o i latou o loo pulea nuu.

“O loo tuai ona aʻoaʻia e mātua a latou fanau,” o le faamatalaga lena a le tamaʻitaʻi o Rosalind Miles, o le tusitala o le tusi, Children We Deserve. Fai mai a ia: “O le taimi e fanau mai ai le tamaitiiti, o le taimi lena e amata ai.” Pe afai e amata mai lava i le amataga ona tautala mātua i se tulaga e maumauaʻi ae agalelei ma alofa, ma e lē femoumouaʻi i a la faaiʻuga, e lē pine foʻi ae masani a latou fanau i le taliaina o lena pule ma aʻoaʻiga alofa o loo puna mai ai.

Ua iai i le Tusi Paia le anoanoaʻi o faamatalaga e faatatau i le pule i le aiga. I le tusi o Faataoto, o loo tataʻi atu ai e le tagata poto o Solomona manatu i le autasi o mātua o ē matataʻu i le Atua, a o vaavaai mai i ai a latou fanau. O loo faapea mai: “Loʻu atalii e, faalogo mai ia i le aʻoaʻo atu a lou tamā; aua foi e te tuulafoaiina le upu a lou tinā.” (Faataoto 1:8) Pe afai e tausisia e mātua lena ituaiga o autasi talafeagai a o vaavaai i ai a latou fanau, ona iloa lelei foʻi lea e le fanau mea e faatalitalia e o latou mātua mai ia i latou. Atonu latou te taumafai e maileia se tasi o matua i se taumafaiga ina ia fai ai se mea o latou loto i ai atonu sa lē ioeina e le isi matua, peitaʻi o le autasi o le pule a mātua o se puipuigamalu lea mo le fanau.

Ua faamatala mai e le Tusi Paia faapea, e paʻū atu i le tane le tiute tauave autū mo le lelei faaleagaga e lē gata mo lana fanau ae faapea foʻi mo lana avā. Ua faamatalaina lenei mea o le tulaga ulu. E faapefea ona faatinoina lenei tulaga ulu? Ua faasino mai e Paulo faapea, e pei lava ona avea Keriso ma Ulu o le faapotopotoga, ua faapena foʻi ona avea le tane ma ulu o lana avā. Ona toe faapea mai lea o Paulo: “O outou tane, ia outou alolofa atu i a outou lava avā, faapei o Keriso foi ona alofa mai i le ekalesia [lana faatoʻānofotane faaleagaga], ma foaiina mai o ia e ia e fai mona sui.” (Efeso 5:25, LF ) Pe a mulimuli atu se tane i le faaaʻoaʻoga a Iesu ma faataʻitaʻia lona tulaga ulu i se auala alofa, o le a ia maua foʻi le ‘faaaloalo loloto’ a lana avā. (Efeso 5:33, faatusatusa i le NW ) O fanau i se ʻauaiga faapena o le a latou vaai foʻi i le tāua o le pule mai le Atua ma faalaeiauina ai i latou e talia lea pule.—Efeso 6:1-3.

E mafai faapefea e mātua nofo toʻatasi, e aofia ai i latou ua toesea se paaga i le maliu, ona fesagaʻia lenei mataupu? Pe o le tamā po o le tinā, ae mafai lava ona latou faasino saʻo atu i le pule a Ieova le Atua ma Iesu Keriso. Sa  masani ona tautala atu Iesu ma le pule—le pule lea a lona Tamā ma le pule a le Tusi Paia faagaeeina.—Mataio 4:1-10; 7:29; Ioane 5:19, 30; 8:28.

Ua saunia e le Tusi Paia le anoanoaʻi o mataupu silisili aogā e fesootaʻi atu i faafitauli ua fesagaʻi ma le fanau. O le saʻili atu i nei mataupu silisili ma faatatauina, o le a mafai ai e se matua ona ia saunia fautuaga alofa ma le aogā mo le fanau. (Kenese 6:22; Faataoto 13:20; Mataio 6:33; 1 Korinito 15:33; Filipi 4:8, 9) E mafai foʻi e mātua ona faaaogā lomiga faale-Tusi Paia ua fuafuaina faapitoa e fesoasoani ia i latou i le toleniina o a latou fanau ina ia talisapaia e tamaiti aogā o le faaaloalo i le pule a le Tusi Paia. *

Le Faapotopotoga Kerisiano ma le Pule

“O loʻu Atalii pele lena, ou te fiafia ia te ia; ia outou faalogo ia te ia.” (Mataio 17:5) O fetalaiga nei, na fofoga mai e Ieova le Atua lava ia, e faamaonia ai o Iesu o se tasi o lē tautala ma le pule tauatua. O mea na ia fetalai ai o loo faamauina i tala a Evagelia e fā lea e faigofie ona tatou suʻe i ai.

A o toeitiiti oo i le taimi e afio aʻe ai i le lagi, na faatonu atu ai e Iesu ona soo: “Ua tuuina mai ia te au le pule uma lava i le lagi ma le lalolagi.” (Mataio 28:18) Ona o Iesu o le Ulu o le ekalesia, sa lē gata ai i lona vaavaaia lelei o ona soo faauuina o i le lalolagi, ae talu mai lava le liligiina ifo o le agaga paia i le Penetekoso 33 T.A., ua ia faaaogā ai foʻi i latou e fai ma fofoga taumomoli o le upu moni, i le avea ma “auauna faamaoni ma le mafaufau.” (Mataio 24:45-47; Galuega 2:1-36) O le ā se mea ua ia faia e faataunuu ai nei mea uma ina ia faamalosia le faapotopotoga Kerisiano? “Na afio ae o ia i luga . . . , ua na foaiina foi mea alofa i tagata.” (Efeso 4:8) O nei “mea alofa i tagata” o toeaina Kerisiano, o ē ua tofia e le agaga paia ma ua foaʻiina i ai le pule mo le tausia o manaʻoga faaleagaga o o latou uso talitonu.—Galuega 20:28.

O le māfuaaga lenei ua fautua mai ai Paulo: “Ia outou manatua o outou taʻitaʻi, o e ua folafola atu le afioga a le Atua ia te outou; ia outou faaaʻoaʻo i lo latou faatuatua, ma ia mafaufau i le iuga o a latou amio.” Talu ai o loo mulimulituʻi nei tane faamaoni i tulagaaao o Iesu, e mautinoa la o se ala atamai pe a faataʻitaʻi i lo latou faatuatua. Ona toe faapea mai lea o Paulo: “Ia outou usiusitai i o outou taʻitaʻi ma outou gauai i ai; [“ia faaauau pea ona amanaʻia la latou pule ia te outou,” The Amplified Bible] auā o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tiga; auā e le aoga lea ia te outou.”—Eperu 13:7, 17.

O le ā e tupu pe a lē amanaʻiaina lena taʻiala? O le mea tonu lava lena sa faia e nisi tagata o le faapotopotoga a uluaʻi Kerisiano ma avea ai i latou ma aposetate. O loo taʻua Umenio ma Fileto o ni tane na la faaliliu ese nisi mai le faatuatua ma o a la upu faalelalolagi ‘na faalēaogā ai le mea e paia.’ O se tasi o manatu na la tau faaofi mai e faapea ua uma ona faia le toetū, e foliga mai a lē o le toetū faaleagaga o le toetū faafaatusa, ma o le a lē toe iai la se isi toetū i le lumanaʻi i lalo o le Malo o le Atua.—2 Timoteo 2:16-18, faatusatusa i le NW.

Sa laveaʻiina le mataupu e i latou na iai le tulaga pule. Sa mafai e toeaina Kerisiano ona  faamaonia le sesē o na finauga auā i lo latou avea ma sui o Iesu Keriso, sa latou faaaogā le pule a le Tusi Paia. (2 Timoteo 3:16, 17) O le tulaga moni lena o loo iai i aso nei i le faapotopotoga Kerisiano, lea ua faamatalaina ‘o le poutu ma le lagolago o le upu moni.’ (1 Timoteo 3:15) O le a lē taitai faatagaina aʻoaʻoga sesē e fāoa le “matua o upu e ola ai,” lea ua faasaosaoina i itulau o le Tusi Paia, e avea o se ʻoa aogā mo i tatou.—2 Timoteo 1:13, 14.

E ui o loo televave le mou atu o le faaaloalo i le pule i lenei lalolagi, ae ona o i tatou o Kerisiano, ua tatou iloa ai o pule talafeagai i le nuu, i le aiga, ma i le faapotopotoga Kerisiano ua faavaeina mo so tatou lelei. O le faaaloalo i le pule o se mea e manaʻomia mo lo tatou lelei i le tino, i faalogona, ma i le faaleagaga. O le taliaina ma le faaaloalo o lena pule mai le Atua, o le a puipuimaluina ai i tatou e pule e silisili atu—o Ieova le Atua ma Iesu Keriso—mo lo tatou manuia e faavavau.—Salamo 119:165; Eperu 12:9.

[Faamatalaga pito i lalo]

[Faamatalaga faaopoopo i le itulau 5]

Ua iai i le Tusi Paia le anoanoaʻi o faamatalaga e faatatau i le pule i le aiga

[Ata i le itulau 6]

E mafai e mātua nofo toʻatasi ona latou faasino saʻo atu i le pule a Ieova le Atua ma Iesu Keriso

[Ata i le itulau 7]

E iloa e Kerisiano o pule talafeagai i le aiga, i le faapotopotoga Kerisiano, ma i le nuu ua faavaeina mo so latou lelei

[Faamatalaga i Ata i le itulau 4]

Le ata na puʻeina e Josh Mathes, Collection of the Supreme Court of the United States