“O Iai le Poto i Ē Faamaulalo”

“Se a foi se mea e finagalo ai Ieova ia te oe . . . ia feooai ma lou Atua ma le loto faamaulalo?”—MIKA 6:8.

1, 2. O le ā le faamaulalo, ma e faapefea ona ese mai le faamaualuga?

SA TEENA e se aposetolo o lē sa lauiloa e le toʻatele le tataʻi atu o manatu ia te ia. Sa taʻua e se faamasino lototele o Isaraelu ia lava o lē aupito itiiti i le aiga o lona tamā. O le tagata silisili i ē uma na soifua mai, sa ia taʻutino mai e lē o ia te ia le pule atoatoa. O tamāloloa taʻitoʻatasi uma lava nei sa latou faaalia le faamaulalo.

² O le faamaulalo o le tuufaafeagai o le faamaualuga. O le tagata e faamaulalo na te iloa lelei ona tomai ma mea e mafai ona ia fai ma lona tāua ma e lē faualuga. Na i lo le mimita, gugutu, po o le fiasili, o le tagata faamaulalo na te iloa lelei mea e gata ai lona mafai. O lona uiga, na te faaaloalogia ma amanaʻia faalogona ma manatu o isi.

3. E faapefea ona iai le poto “i e faamaulalo”?

³ Ua lelei tele la le faapea mai o le Tusi Paia: “O i ai le poto i e faamaulalo.” (Faataoto 11:2) O le tagata faamaulalo e atamai auā e mulimuli atu i le ala e faamaonia e le Atua, ma alofia le agaga faamaualuga lea e iʻu ai i le faalumaina. (Faataoto 8:13; 1 Peteru 5:5) O le poto o le faamaulalo o loo faamaonia mai i soifuaga o nisi o auauna a le Atua. Seʻi tatou iloiloina faaaʻoaʻoga e tolu o loo taʻua i le uluaʻi palakalafa.

Paulo—O se “Tautua” ma se “Auauna”

4. O ā faaeaga tutasi sa maua e Paulo?

⁴ Sa avea Paulo o se tagata lauiloa tele i uluaʻi Kerisiano, ma ua talafeagai lena tulaga. I le taimi o lana faiva, sa faimalaga Paulo i le faitau afe o maila i le sami ma le laueleele, ma amataina le tele o faapotopotoga. E faaopoopo atu i lena, sa faamanuia Ieova ia Paulo i le tuu atu i ai o faaaliga ma le meaalofa o le tautala i gagana eseese. (1 Korinito 14:18; 2 Korinito 12:1-5) Sa ia faagaeeina foʻi Paulo e tusia tusi e 14 ia ua avea nei o se vaega o Tusitusiga Kerisiano Eleni. E manino lava, e mafai ona faapea atu e sili atu galuega a Paulo na i lo isi aposetolo uma.—1 Korinito 15:10.

5. Na faapefea ona faaalia e Paulo sa ia te ia se manatu faamaulalo e uiga ia te ia lava?

⁵ Ona sa muaʻau Paulo i galuega faa-Kerisiano,  e ono faatalitalia la e nisi lona faauaʻi atu o manatu ia te ia, po o le faalialia foʻi i lana pule. Peitaʻi, e leʻi faapena, sa faamaulalo Paulo. Sa ia taʻua o ia, o “le aupito itiiti o le au aposetolo” ma na ia faaopoopo mai: “E le aoga ona taʻua o aʻu o le aposetolo, auā na ou saua atu i le ekalesia a le Atua.” (1 Korinito 15:9) I le avea o sē na sauā muamua i Kerisiano, e leʻi faagaloina ai e Paulo faapea, ana lē seanoa le alofa tunoa semanū e lē mafai ona ia maua se faiā ma le Atua, aemaise i faaeaga sa ia maua i le auaunaga. (Ioane 6:44; Efeso 2:8) O lea, sa leʻi manatu ai Paulo faapea o le a avea mea iloga sa mafai ona ia faataunuuina i le faiva ma pogai e faapea ai ua sili ia i lo isi.—1 Korinito 9:16.

6. Sa faapefea ona faaalia e Paulo le faamaulalo i ana feutagaʻiga ma tagata Korinito?

⁶ Sa faapitoa lava le faamaulalo o Paulo i ana feutagaʻiga ma tagata Korinito. E foliga mai, o nisi o i latou sa fiafia pe mataʻina ia i latou, tagata sa latou manatu i ai o ni ovasia lauiloa, e aofia ai Apolo, Kefa, ma Paulo lava ia. (1 Korinito 1:11-15) Peitaʻi, sa leʻi faatauanauina e Paulo viiviiga a tagata Korinito pe faaaogāsesē foʻi a latou saafiafiga faaviivii. Pe a asiasi atu Paulo ia i latou, na te leʻi faaalia atu o ia “ma le sili o le upu ma le poto.” Na i lo lena, na faapea mai Paulo e faatatau ia te ia ma ana aumea: “Ia faapea ona manatu o tagata ia te i matou, o auauna [“tautua,” NW ] a Keriso, o auauna foi e tausi i upu lilo a le Atua.” *—1 Korinito 2:1-5; 4:1.

7. Sa faapefea ona faaalia e Paulo le faamaulalo e oo lava i taimi e na te avatua ai fautuaga?

⁷ Sa faaalia foʻi e Paulo le faamaulalo pe a manaʻomia ona ia avatu faasaʻoga malolosi ma taʻiala. Sa ia ʻaiʻoi atu i ona uso Kerisiano e ala i le “alofa mutimuti vale o le Atua” ma “ona o le alofa” na i lo le faaaogā o lana pule faaaposetolo. (Roma 12:1, 2; Filemoni 8, 9) Aiseā na fai ai e Paulo lenei mea? Ona sa manatu moni lava Paulo ia te ia o sē e “fesoasoani” i ona uso, ae lē o sē e ‘fia pule i lo latou faatuatua.’ (2 Korinito 1:24) E mautinoa lava o le faamaulalo o Paulo na māfua ai ona matuā pele o ia i faapotopotoga Kerisiano i le uluaʻi senituri.—Galuega 20:36-38.

 Se Vaaiga Faamaulalo i o Tatou Faaeaga

8, 9. (a) Aiseā e ao ai ona iai sa tatou vaaiga faamaulalo ia i tatou lava? (e) E faapefea ia i latou o loo iai ni nai tiute tauave ona faaalia le faamaulalo?

⁸ Sa faataatia e Paulo se faaaʻoaʻoga lelei mo Kerisiano i aso nei. E tusa lava po o ā tiute tauave ua tuuina mai ia i tatou, e lē tatau ona manatu se tasi o i tatou e faapea ua sili i tatou i lo isi. Na tusia e Paulo e faapea: “Pe a manatu se tasi o le tagata aoga ia, a e leai, ua pelogia o ia e ia i lona manatu.” (Kalatia 6:3) Aiseā? Auā “ua agasala tagata uma lava, ma ua le oo i le mamalu o le Atua.” (Roma 3:23, LF; 5:12) Ioe, e lē tatau lava ona tatou faagaloina ua tuufaasolo mai ia i tatou uma lava le agasala ma le oti mai ia Atamu. E lē avea faaeaga faapitoa ma mea e siitia ai i tatou mai lo tatou tulaga faatauvaa ma le agasala. (Failauga 9:2) E pei ona moni i le tulaga o Paulo, ana lē seanoa le alofa tunoa semanū e lē mafai e tagata ona maua se faiā ma le Atua, aemaise le auauna atu ia te ia i se tulaga faaeaina.—Roma 3:12, 24.

⁹ I le iloaina o lenei mea, o le tagata e faamaulalo e lē vaai faaamuamu atu i isi ona o ona faaeaga, e lē gugutu foʻi i mea e mafai ona ia faia. (1 Korinito 4:7) Pe a avatu fautuaga po o taʻiala, na te avatu i le tulaga o ia o se tasi o le ʻaufaigaluega—ae lē o se pule. O le mea moni, e sesē mo se tasi o loo iai ni tomai patino ona ia faatauanauina le viiga mai uso talitonu po o le faaaogāsesēina o saafiafiga faaviivii mai ia i latou. (Faataoto 25:27; Mataio 6:2-4) Na pau lava le viiga talafeagai e tatau ona iai o le viiga mai isi tagata—ma e lē tatau ona faatauanauina. Afai e tupu lena mea, e lē tatau ona faapogaia ai i tatou e soona manatu faamaualuga ia i tatou lava.—Faataoto 27:2; Roma 12:3.

10. Faamatala pe faapefea i nisi o ē foliga mai e i se tulaga faatauvaa ona “tamaoaiga i latou i le faatuatua.”

¹⁰ Pe afai e tuu mai ia i tatou ni tiute tauave, o le a fesoasoani le faamaulalo e taofia i tatou mai le soona faamamafa naʻuā o i tatou lava, ma faapogaia ni manatu faapea ua olaola ma lelei le faapotopotoga ona o a tatou taumafaiga ma o tatou tomai. Mo se faaaʻoaʻoga, atonu e matuā lelei lava la tatou aʻoaʻo atu. (Efeso 4:11, 12) Pe afai tatou te faamaulalo, e ao la ona tatou amanaʻia e faapea o nisi o lesona sili e aʻoaʻoina i se sauniga a le faapotopotoga e lē o aumaia e ala mai i le pulelaa. Pe e lē faalaeiauina ea oe i le vaai atu, mo se faaaʻoaʻoga, i se matua nofo toʻatasi o loo auai mai e lē aunoa i le Maota o le Malo faatasi ai ma lana fanau? Ia pe o se tagata lotomafatia foʻi o loo auai mai ma le faamaoni i sauniga e ui lava e iai faalogona tumau o le lē aogā? Ia po o se talavou o loo lelei lona agaʻigaʻi i luma faaleagaga e ui lava i aafiaga leaga i aʻoga ma isi vaipanoa? (Salamo 84:10) Atonu o nei tagata taʻitoʻatasi e lē o taʻutaʻua lo latou tulaga. O le tele lava o taimi e lē o iloa e tagata mea o loo latou fetaiaʻi e tofotofoina ai lo latou faamaoni. Peitaʻi atonu e “tamaoaiga i latou i le faatuatua” pei lava foʻi o isi o loo i tulaga aloaʻia. (Iakopo 2:5) O le mea moni lava ia, o le faamaoni o le mea lena e maua ai le finagalo malie o Ieova.—Mataio 10:22; 1 Korinito 4:2.

Kitiona—“O Le Aupito Itiiti” i le Aiga o Lona Tamā

11. O le ā le auala na faaalia ai e Kitiona le faamaulalo ina ua talanoa ma le agelu a le Atua?

¹¹ O Kitiona, o se tauleʻaleʻa talavou e maumauaʻi o le ituaiga o Manase, sa ola i se vaitaimi o le vevesi o le talafaasolopito o Isaraelu. E tusa ma le fitu tausaga sa mafatia ai tagata o le Atua i omiga mai ia Mitiana. Peitaʻi ane ua oo mai nei le taimi mo Ieova e faasaʻoloto ai ona tagata. O lea la, sa faaali mai ai loa se agelu ia Kitiona ma faapea mai: “Oe na le toa malosi, o ia te oe Ieova.” Sa faamaulalo Kitiona, o lea na ia leʻi mitamita ai ona o lenei faaviivii mai lea na te leʻi faatalitalia. Na i lo lena, sa ia fai atu ma le faaaloalo i le agelu: “E! le Alii e, afai ua ia te i matou Ieova, se a le mea ua oo mai ai ia mea uma ia te i matou?” Sa faamalamalama  atu e le agelu le tulaga o mea ma faapea atu ia Kitiona: “E te laveaiina Isaraelu ai le lima o Mitiana.” Sa faapefea ona tali atu Kitiona? Na i lo le naunau e talia loa le tofiga o se avanoa e avea ai o ia ma toa i le atunuu, na tali atu Kitiona e faapea: “E! le Alii [Ieova] e, ou te laveaiina Isaraelu i ni a? faauta mai, ua topito ona faatauvaa loʻu aiga i Manase; o aʻu foi, o le aupito itiiti i le aiga o loʻu tama.” Maʻeu se faamaulalo!—Faamasino 6:11-15.

12. Sa faapefea ona faaalia e Kitiona le faautauta i le faataunuuina o lona tofiga?

¹² A o leʻi auina atu Kitiona i le taua, sa tofotofoina o ia e Ieova. Faapefea? Sa faatonuina Kitiona ina ia talepe i lalo le fata faitaulaga ia Paala a lona tamā ma tuu i lalo le pou paia sa tū ai i tafatafa ane. O lenei tofiga e manaʻomia ai le lototele, peitaʻi sa faaalia foʻi e Kitiona le faamaulalo ma le faautauta i le auala na ia faataunuuina ai. Na i lo le faia a o vaai uma mai lava tagata, sa gaoioi Kitiona i le pogisa o le pō ma e ono lē iloa mai o ia e nisi. E lē gata i lena, sa ia alu atu ma le faautauta i le faia o lona tofiga. Sa ia aveina auauna e toʻasefulu—atonu o nisi e mafai ona avea ma leoleo ae fesoasoani isi ia te ia e talepe le fata faitaulaga ma le pou paia. * Po o le ā lava le mea na fai, i le faamanuiaga a Ieova, sa faataunuu ai e Kitiona lona tofiga, ma mulimuli ane na faaaogā o ia e le Atua e laveaʻiina Isaraelu mai ia Mitiana.—Faamasino 6:25-27.

Faaalia o le Faamaulalo ma le Faautauta

13, 14. (a) E faapefea ona tatou faaalia le faamaulalo pe a tuu mai ia i tatou se faaeaga i le auaunaga? (e) Na faapefea ona faataatia e le uso o A. H. Macmillan se faaaʻoaʻoga lelei i le faaalia o le faamaulalo?

¹³ E tele mea e mafai ona tatou aʻoaʻoina mai i le faamaulalo o Kitiona. Mo se faaaʻoaʻoga, e faapefea ona tatou tali atu pe a tuu mai ia i tatou se faaeaga i le auaunaga? Pe muamua ea tau o tatou mafaufau i le mamalu lea e maua mai ai? Pe tatou te  faamaulalo ea ma tatalo ma iloilo pe tatou te mafaia mea e manaʻomia i le tofiga? Sa faataatia e le uso o A. H. Macmillan, o lē na faaiʻuina lana auaunaga i le lalolagi i le 1966, se faataʻitaʻiga lelei tele i lenei tulaga. I se tasi taimi na fesili atu ai le uluaʻi peresitene o le Sosaiete o le Olo Matamata o C. T. Russell, i le uso o Macmillan i sona manatu po o ai e ao ona vaavaaia le galuega pe a leai o ia. I le talanoaga na mulimuli fai, sa aunoa ma se taumafaiga a le uso o Macmillan ia faatulaʻi atu o ia lava, e ui sa faigofie ona ia faia faapena. I le iʻuga, na valaaulia ai e le uso o Russell le uso o Macmillan ina ia mafaufau loloto i le taliaina o le tofiga. Na tusia i ni tausaga mulimuli ane e le uso o Macmillan e faapea. “Sa ou tū ua ou lē magagana, sa ou mafaufau i ai ma le faaeteete lava, ma tatalo e faatatau i ai mo se taimi umi lava ona faatoʻā ou fai atu loa lea i ai o le a ou fiafia e fai mea uma e mafai ona ou fai e fesoasoani ai ia te ia.”

¹⁴ E leʻi umi lava talu mai le taimi lena, ae maliu loa le uso o Russell, ae tuua ai le Sosaiete o le Olo Matamata e aunoa ma se peresitene. Talu ai o le uso o Macmillan sa vaaia le galuega i le taimi mulimuli na alu ai le malaga talaʻi a le uso o Russell, o lea sa faapea atu ai se tasi uso: “Mac, e telē lava le avanoa e mafai ona avea ai oe ma peresitene. O oe lea sa avea ma sui faapitoa o le uso o Russell ina ua malaga, ma na fai mai foʻi Russell ia i matou uma ina ia fai mea e te fai mai ai. O lea la ua alu, ma ua lē toe foʻi mai. E foliga mai o oe le tagata e tatau ona suitulaga.” Sa tali mai le uso o Macmillan e faapea: “Uso, e lē o le auala lena e taulimaina ai le mataupu lenei. O le Alii e ana le galuega lenei, ma na pau lava le tulaga e te maua i le faalapotopotoga a le Alii o le mea e finagalo le Alii e fetaui mo oe; ma ua ou mautinoa e lē o aʻu le tagata e tatau ona tauaveina le tofiga.” Ona fautuaina loa lea e le uso o Macmillan se isi tagata mo le tulaga. I le pei o Kitiona, sa iai sana vaaiga faamaulalo ia te ia lava—o se vaaiga e ao ona maua e i tatou uma lava.

15. O ā nisi o auala aogā e mafai ona tatou faaaogā ai le faautauta pe a tatou talaʻi i isi?

¹⁵ E ao foʻi ona tatou faamaulalo i le auala e taulimaina ai lo tatou tofiga. Sa faautauta Kitiona, ma taumafai e aua le faia se mea e faaita ai ē sa tetee ia te ia e aunoa ma ni māfuaaga tatau. O le mea lava e tasi, i la tatou galuega talaʻi, e ao ona tatou faamaulalo ma faautauta i le auala tatou te talanoa atu ai i isi. E moni o loo tatou auai i le taua faaleagaga ina ia lepetia ai “ʻolo” ma “masalosaloga.” (2 Korinito 10:4, 5) Peitaʻi, e lē tatau ona tatou vaai maulalo i isi po o le avatu ia i latou o so o se māfuaaga tatau lava e tetee mai ai i la tatou feʻau. Na i lo lena, e tatau ona tatou faaaloalogia o latou manatu, faamamafa mea atonu tatou te talitonu faatasi i ai, ona taulaʻi loa lea i vala mautinoa o la tatou feʻau.—Galuega 22:1-3; 1 Korinito 9:22; Faaaliga 21:4.

 Iesu—Le Faaaʻoaʻoga Silisili o le Faamaulalo

16. Sa faapefea ona faaalia e Iesu sa ia te ia se vaaiga faamaulalo ia te ia lava?

¹⁶ O le faataʻitaʻiga lelei lava o le faamaulalo o Iesu Keriso. * E ui lava i le la faiā loloto ma lona Tamā, ae sa leʻi taofia ai Iesu mai lona faailoa mai e iai mea e lē oo i ai lana pule. (Ioane 1:14) O se faataʻitaʻiga, ina ua talosaga atu le tinā o Iakopo ma Ioane ina ia nonofo lana fanau tama e toʻalua i tafatafa o Iesu i lona malo, na tali atu Iesu e faapea: “O le nofo i loʻu itu taumatau ma loʻu itu tauagavale, e le o ia te au lea ona avatu.” (Mataio 20:20-23) I se tasi mea na tupu, na taʻutino atu e Iesu faapea: “Ou te le mafaia ona fai o se mea e tasi, na o aʻu; . . . ou te le usiusitai i loʻu lava loto, a o le finagalo o le Tamā, o le na auina mai aʻu.”—Ioane 5:30; 14:28; Filipi 2:5, 6.

17. Na faapefea ona faaalia e Iesu le faamaulalo i ana feutagaʻiga ma isi?

¹⁷ Sa maualuga aʻe Iesu i lo tagata lē lelei atoatoa i so o se tulaga lava, ma na ia maua mai lona Tamā, o Ieova, le pule e sili aʻe i so o se tagata lava. Ae ui lava i lea, sa faamaulalo Iesu i ana feutagaʻiga ma ona soo. Na te leʻi lofitūina i latou e ala i le faalialia o lona poto. Sa ia faaalia le faaeteete ma le alofa mutimutivale ma amanaʻia o latou manaʻoga faaletagata. (Mataio 15:32; 26:40, 41; Mareko 6:31) O lea la, e ui lava sa lelei atoatoa Iesu, ae na te leʻi faatalitalia faapea e tatau ona lelei atoatoa mea uma lava. Na te leʻi faamalosia lava mai ona soo se mea e sili atu i lo latou malosi, na te leʻi avatua foʻi ia i latou se mea e sili atu latou te lē mafai ona tatalia. (Ioane 16:12) E lētioa lava la toʻatele tagata sa maua le mapusaga ia te ia!—Mataio 11:29.

Faaaʻoaʻo i le Faaaʻoaʻoga a Iesu o le Faamaulalo

18, 19. E faapefea ona tatou faataʻitaʻi i le faamaulalo o Iesu i (a) le auala tatou te manatu ai ia i tatou lava, ma (e) le auala tatou te feutagaʻi ai ma isi?

¹⁸ Afai sa faaalia e le tagata silisili i ē uma na soifua mai le faamaulalo, e sili atu ai la ona talafeagai lo tatou faia faapea. E masani lava ona faatalatū tagata lē lelei atoatoa e taʻutino mai e faapea e lē o ia i latou le pule uma. Peitaʻi, i le faataʻitaʻi ia Iesu, e taumafai malosi ai Kerisiano ina ia faamaulalo. Latou te lē faamaualuga naʻuā ma lē tuu atu ai tiute tauave i ē ua agavaa e faia faapea; latou te lē faamaualuluga foʻi pe lē mananaʻo e talia taʻiala mai ia i latou ua tofia e faia faapea. I le faaalia o le agaga lagolagosua, latou te faatagaina mea uma i le faapotopotoga ina ia faia ma le “matagofie ma le sauni lelei.”—1 Korinito 14:40.

¹⁹ O le faamaulalo foʻi e ao ona uunaʻia ai i tatou e fetuutuunaʻi i mea tatou te faatalitalia mai isi ma ia amanaʻia o latou manaʻoga. (Filipi 4:5) E ono ia i tatou ni agavaa ma tomai e lē maua e isi. Peitaʻi, afai tatou te faamaulalo, o le a tatou lē faatalitalia ai i taimi uma lava isi e fai mea i le auala tatou te mananaʻo ai. O le iloa faapea e iai le mea e gata ai le mafai o tagata taʻitoʻatasi, o le a tatou faamaulalo ai ma faapalepale i vaivaiga o isi. Na tusi mai Peteru e faapea: “Ia muamua i mea uma ona maua e outou o le alofa naunau o le tasi i le tasi, auā o le alofa e ufiufi ai agasala e tele.”—1 Peteru 4:8.

20. O le ā e mafai ona tatou fai e foʻia ai so o se faanaunauga agaʻi i le lē faamaulalo?

²⁰ E pei ona tatou aʻoaʻoina nei, o loo iai moni le poto i ē faamaulalo. Ae faapefea la, pe afai, e te iloa ane o loo ia te oe faanaunauga agaʻi i le lē faamaulalo po o le faamaualuga? Aua e te lotovaivai ai. Na i lo lena, ia e mulimuli i le faaaʻoaʻoga a Tavita, o lē na tatalo: “Ia e taofi foi i lau auauna i agasala faamaualuga; aua neʻi pule ia ia te au.” (Salamo 19:13) E ala i le faaaʻoaʻo i le faatuatua o tane e pei o Paulo, Kitiona, ma—e sili atu i so o se isi lava—o Iesu Keriso, o le a tatou iloa totino ai le moni o upu nei: “O i ai le poto i e faamaulalo.”—Faataoto 11:2.

[Faamatalaga pito i lalo]

Pe E te Manatua?

• O le ā le faamaulalo?

• E faapefea ona tatou faataʻitaʻi i le faamaulalo o Paulo?

• O le ā tatou te aʻoaʻoina mai le faaaʻoaʻoga a Kitiona e uiga i le faamaulalo?

• Na faapefea ona faataatia e Iesu le faaaʻoaʻoga sili o le faamaulalo?

[Fesili mo le Suʻesuʻega]

[Ata i le itulau 15]

Ona o le faamaulalo o Paulo, sa pele ai o ia i ona uso Kerisiano

[Ata i le itulau 17]

Sa faaaogā e Kitiona le faautauta i le faia o le finagalo o le Atua

[Ata i le itulau 18]

E faaalia e Iesu, o le Alo o le Atua, le faamaulalo i mea uma lava na te faia