O le Faamaualuga e Iʻu ai i le Faalumaina

“A sau le faamaualuga, ona sau ai lea o le mā; a o i ai le poto i e faamaulalo.”—FAATAOTO 11:2.

1, 2. O le ā le faamaualuga, ma i ā auala na taʻitaʻia ai i le malaia?

NA TAʻITAʻIA e se sā Levī matauʻa se vaega o tagata e tetee i pule na tofia e Ieova. O se aloalii fiasili na ia faia se faufauga leaga ina ia fāoa ai le nofoalii o lona tamā. O se tupu lē onosai na ia lē amanaʻia faatonuga maʻoti mai le perofeta a le Atua. O nei tagata Isaraelu e toʻatolu e tasi le mea latou te tutusa uma ai: o le faamaualuga.

² O le faamaualuga o se uiga o le loto ma e mafai ona avea ma lamatiaga i tagata uma. (Salamo 19:13) E maumauaʻi lava le tagata faamaualuga e sopotapulaa ma fai mea e aunoa ma sona faatagaga e faia ai. E masani lava, o lenei mea e iʻu ai i le malaia. O le mea moni, o le faamaualuga na faatamaʻia ai tupu ma faatoʻilaloina ai malo. (Ieremia 50:29, 31, 32; Tanielu 5:20) Ua oo lava foʻi ina maileia ai nisi o auauna a Ieova ma iʻu atu ai i lo latou faatamaʻiaina.

3. E faapefea ona aʻoaʻoina i tatou e faatatau i le mataʻutia o le faamaualuga?

³ E lelei tele la le māfuaaga na faapea mai ai le Tusi Paia: “A sau le faamaualuga, ona sau ai lea o le mā; a o i ai le poto i e faamaulalo.” (Faataoto 11:2) Ua aumaia ia i tatou e le Tusi Paia ni faaaʻoaʻoga e faamaonia ai le moni o lenei faataoto. O le iloiloina o nisi o nei faaaʻoaʻoga o le a fesoasoani ai ia i tatou e iloa le mataʻutia o le sopoʻia  o tapulaa tatau. O lea la, seʻi tatou iloiloina pe na faapefea e le matauʻa, le fiasili, atoa ma le lē onosai ona faapogaia tagata e toʻatolu e pei ona taʻua i le amataga e gaoioi faamaualuga, ma iʻu ai i lo latou faalumaina.

Koru—O Sē Fouvale ma le Matauʻa

4. (a) O ai Koru, ma o ā ni mea mataʻina na tupu i le talafaasolopito e mautinoa lava sa iai Koru? (e) I tausaga mulimuli o lona soifuaga, o le ā le gaoioiga matuā leaga lava na faapogaia e Koru?

⁴ O Koru o se sā Levī mai le aiga o Koato, e tauusoga lelei ma Mose ma Arona. E foliga mai sa faamaoni Koru ia Ieova mo le faitau sefulu o tausaga. Sa faaeaina Koru e iai faatasi ma i latou na faasaoina faavavega mai le Sami Ulaula, ma e foliga mai sa fai foʻi sana vaega i le faaooina mai o le faamasinoga a Ieova agaʻi i tagata Isaraelu na ifo i le tamaʻi povi i le Mauga o Sinai. (Esoto 32:26) Peitaʻi, na iʻu ina avea mulimuli ane Koru ma taʻitaʻi i se fouvalega faasaga ia Mose ma Arona lea sa aofia ai nisi sa tupuga mai ia Reupena e iai Tatano, o Apiramo, ma Ono, faatasi ai ma le 250 alii o Isaraelu. * Na latou fai atu ia Mose ma Arona: “Ua oulua faamaualuga lava, auā ua paia le faapotopotoga uma lava, o loo ia te i latou foi o Ieova, o lenei, se a ea le mea ua oulua faasili ai oulua i le faapotopotoga a Ieova?”—Numera 16:1-3.

5, 6. (a) Aiseā na fouvale ai Koru ia Mose ma Arona? (e) Aiseā e faapea atu ai e foliga mai sa manatu faatauvaa Koru i lona ia lava tulaga i le faatulagaga a le Atua?

⁵ Ina ua mavae tausaga e tele sa faamaoni ai, aiseā na fouvale ai Koru? E mautinoa sa leʻi mafatia i le taimi o taʻitaʻia e Mose Isaraelu, auā o ia sa “matuā agamalu lava . . . e sili lava i tagata uma o i le lalolagi.” (Numera 12:3) Peitaʻi, e aliali mai sa matauʻa Koru ia Mose ma Arona ma lotovale i o la tulaga faamamaluina, ma na faapogaia ai o ia e faapea atu—ma le sesē—i la laʻua lava faitalia ma lo la manatu faapito sa la faasilia ai i laʻua i le faapotopotoga.—Salamo 106:16.

⁶ O se tasi o vaega o le faafitauli o Koru e foliga mai na te leʻi faapelepeleina ona lava faaeaga i le faatulagaga a le Atua. E moni, e leʻi avea sā Levī lea e tupuga mai le aiga o Koato ma ositaulaga, peitaʻi na fai i latou ma ē aʻoaʻo atu le Tulafono a le Atua. Sa latou tauaveina foʻi meafale ma ipu o le falefetafaʻi pe a oo i taimi e fesiitaʻi ai. E lē o se galuega faatauvaa lena mea, auā o ipu paia sa tatau ona tauaveina e na o latou sa mamā tau tapuaʻiga ma tau amio. (Isaia 52:11) O le māfuaaga lena, ina ua alu atu Mose ia Koru, sa faapea le uiga o lana fesili, Pe e te manatu faatauvaa ea i lou tofiga ua e manaʻo ai foʻi i le faiva o le ositaulaga?  (Numera 16:9, 10) Sa lē taulau ona iloa e Koru e faapea o le faamamaluga sili o le auauna lea ia Ieova ma le faamaoni e tusa ma lana faatulagaga—ae e lē o le ausiaina o ni tulaga po o ni tofiga faapitoa.—Salamo 84:10.

7. (a) Na faapefea ona feutagaʻi Mose ma Koru ma ona tagata? (e) Na faapefea ona iʻu le fouvale o Koru i se iʻuga malaia?

⁷ Sa valaaulia e Mose ia Koru ma ona tagata ina ia potopoto mai i le taeao e sosoo ai i le falefetafaʻi o le faapotopotoga ma aumai salefu ma mea manogi. E leʻi tofiaina Koru ma ona tagata e ofoina mea manogi, auā e lē o i latou o ni ositaulaga. Afai o le a latou ō mai ma salefu ma mea manogi, o le a faaalia manino ai o loo manatu pea nei tagata e iai la latou aiā e gaoioi ai e pei o ni ositaulaga—e ui o le pō atoa lea ua tuu atu e toe iloilo ai le mataupu. Ina ua latou ō mai i le taeao na sosoo ai, sa faaalia loa ma le saʻo e Ieova lona toʻasa. O le mea na tupu i nei tagata o le ituaiga o Reupena, na “faamaga le gutu o le eleele, ua folo ifo ia te i latou.” O isi e aofia ai ma Koru, na faaumatia i le afi mai le Atua. (Teuteronome 11:6; Numera 16:16-35; 26:10) O le faamaualuga o Koru na iʻu ai i se faalumaina sili ona leaga—o le lē mauaina o le finagalo malie o le Atua!

Tetee Atu i le ‘Naunau i le Mataua’

8. E faapefea ona aliali mai le ‘naunau i le mataua’ i Kerisiano?

⁸ O le tala ia Koru o se lapataʻiga ia i tatou. Talu ai o le ‘naunau i le mataua’ o loo i tagata lē lelei atoatoa, e mafai la ona aliali mai e oo lava i le faapotopotoga Kerisiano. (Iakopo 4:5) Mo se faaaʻoaʻoga, tatou te ono vaavaaivale i tulaga o tofiga. I le pei o Koru, tatou te ono matauʻa i isi o loo iai faaeaga ia o loo tatou mananaʻo i ai. A lē o lena foʻi, tatou te ono pei o le Kerisiano i le uluaʻi senituri e igoa ia Tioterifi. Sa ia faitioina malosi lava le pule a le ʻauaposetolo, atonu pe sa manaʻo e fai o ia ma pule. O le mea moni lava, na tusi mai Ioane e faapea o Tioterifi o “lē fia sili.”—3 Ioane 9.

9. (a) O le ā le vaaiga agaʻi i tiute tauave i le faapotopotoga e manaʻomia ona tatou alofia? (e) O le ā le vaaiga talafeagai e ao ona iai i o tatou tulaga i le faatulagaga a le Atua?

⁹ O le mea moni lava ia, e lē sesē mo se tane Kerisiano ona aapa atu mo tiute tauave i le faapotopotoga. O loo faalaeiauina foʻi e Paulo le laasaga lena. (1 Timoteo 3:1) Peitaʻi, e lē tatau ona tatou manatu i faaeaga i le faapotopotoga e pei o se faailoga e mātaulia pe faamamaluina ai, e pei e foliga mai a tatou maua ni faaeaga, ua siitia ai i luga lo tatou tulaga. Manatua, na fetalai Iesu: “O sē fia sili ia te outou, ia fai o ia ma a outou auauna; o sē fia muamua foi ia te outou, ia fai o ia ma a outou tautua.” (Mataio 20:26, 27) Ua manino mai, e sesē le matauʻa agaʻi ia i latou o loo sili atu tiute tauave o loo iai, ua pei e foliga mai e faalagolago lo tatou tāua i le Atua i o tatou “tulaga” i lana faalapotopotoga. Na fetalai Iesu: “O outou uma o le au uso outou.” (Mataio 23:8) Ioe, tusa lava pe o se tagata talaʻi po o se paeonia, pe faatoʻā papatiso pe ua loa tausaga o tausia le faamaoni—o i latou uma e auauna ia Ieova ma le lotoatoa o loo iai so latou tulaga tāua i lana faatulagaga. (Luka 10:27; 12:6, 7; Kalatia 3:28; Eperu 6:10) O se faamanuiaga moni lava le galulue soosoo tauʻau ma le faitau miliona o i latou o loo taumafai e faatatauina le fautuaga a le Tusi Paia e faapea: “Ia oofu outou uma lava i le loto maulalo o le tasi i le tasi.”—1 Peteru 5:5.

Apisaloma—O Sē Fiasili ma Saʻiliʻili Avanoa

10. O ai Apisaloma, ma na faapefea ona ia taumafai e faatosina mai ia te ia le lotomalie o tagata sa ō ane i le tupu mo le faia o faamasinoga?

¹⁰ O le olaga o Apisaloma, le atalii lona tolu o le tupu o Tavita, e saunia ai se lesona e faatatau i le fiasili. Sa taumafai lenei tagata saʻiliʻili avanoa ma faitogafiti e faatosina mai le lotomalie o i latou sa ō mai i le tupu mo le faia o a latou faamasinoga. Muamua na ia faauiga atu e lē o manatu mai Tavita i o latou manaʻoga. Ona sosoo ai loa lea ma lona lē toe faaʻaloʻalo ae taʻu saʻo lona manaʻo. Sa faapea mai ma le faasausili Apisaloma: “Ta fia fai ma faamasino o le nuu; ina ia o mai ia te au tagata e taitoatasi uma ua i ai se finauga po o se faamasinoga, ona ou faamasino tonu ai lea ia te ia.” Sa leai ni tapulaa o faufauga faapiʻopiʻo a Apisaloma. “A faalatalata mai se tasi e ifo ia te ia,” fai mai le Tusi Paia, “ona tuu atu lea e ia o lona lima, ma tago atu ia te ia, ma sogi ia te ia. Ua faapena ona fai e Apisaloma ia Isaraelu uma na o ane i le faamasinoga a le tupu.”  O le ā na iʻu i ai? “Ona faaliliu lea ia te ia e Apisaloma loto o tagata o Isaraelu.”—2 Samuelu 15:1-6.

11. Na faapefea ona taumafai Apisaloma e fāoa le nofoalii o Tavita?

¹¹ Sa maumauaʻi Apisaloma e fāoa le tulaga tautupu o lona tamā. I le lima tausaga muamua atu, na ia faatonuina le fasiotia o le atalii ulumatua o Tavita, o Amanono, e peiseai e taui ma sui ai i le faaleagaina o le tuafafine o Apisaloma o Tamara. (2 Samuelu 13:28, 29) Peitaʻi, e oo lava i lena taimi atonu ua leva ona manaʻo Apisaloma i le nofoalii, ma sa ia mafaufau faapea, o le fasiotia o Amanono o se avanoa lelei e aveese ai se tasi e faatavā ia te ia. * Po o le ā lava le tulaga, ae ina ua maua le avanoa, sa gaoioi loa Apisaloma. Sa ia faia ina ia faalauiloa atu lona nofotupu i le atunuu atoa.—2 Samuelu 15:10.

12. Faamatala mai pe na faapefea ona iʻu atu le faamaualuga o Apisaloma i le faalumaina.

¹² Sa taulau gaoioiga a Apisaloma mo sina taimi, auā na “tupu tele le fouvale, ma ua faatoʻateleina pea le nuu ia Apisaloma.” Mulimuli ane, sa faamalosia foʻi ona sola le tupu o Tavita mo lona ola. (2 Samuelu 15:12-17) Peitaʻi, e leʻi umi, na faapuupuuina taumafaiga a Apisaloma ina ua fasiotia o ia e Ioapo, ma lafo ia te ia i se lua tele, ma tuu ai se faaputuga maa. Seʻi tau ina tomanatu iai—i lenei tagata fiasili o lē na manaʻo e fai ma tupu sa leʻi faia se falelauasiga aloaʻia mo ia ina ua oti! * E mautinoa lava na iʻu atu le faamaualuga o Apisaloma i lona faalumaina.—2 Samuelu 18:9-17.

Alofia le Fiasili Manatu Faapito

13. E mafai faapefea ona mauaa se agaga fiasili i le loto o se Kerisiano?

¹³ O le tulaʻi mai o Apisaloma i le pule ma faasolo atu i lona paʻū ua fai ma lesona mo i tatou. I lenei lalolagi o amioga lē faatuaoia, ua fai ma masani a tagata le faatagā faaviivii atu i ē o i tulaga maualuluga atu na i lo i latou, e taumafai e fia lelei atu ia i latou ina ia tupu ai se manatu pe ia maua ai se faaeaga po o le siitia ai o latou tulaga. Ae i le taimi foʻi e tasi, atonu latou te faia ai ni faamatalaga faamaualuga i ē o loo iai i se tulaga maualalo ia i latou, ma le faamoemoe e fāoa le taʻuleleia ma le lagolago o loo avatu ia i latou. Afai tatou te lē faaeteete, e mafai ona mauaa se agaga fiasili faapena i o tatou loto. E foliga mai o le mea lena na tupu i nisi i le uluaʻi senituri, na manaʻomia ai i aposetolo ona avatu ni lapataʻiga malolosi faasaga i tagata faapena.—Kalatia 4:17; 3 Ioane 9, 10.

14. Aiseā e ao ai ona tatou alofia se agaga fiasili, po o le faasilisilia e le tagata o ia lava?

¹⁴ E lē faatagaina e Ieova se avanoa i lana faalapotopotoga mo tagata faufau leaga o ē faasilisilia i latou lava, ma o loo taumafai e ‘suesue o latou lava mamalu.’ (Faataoto 25:27) O lea, ua lapataʻi mai le Tusi Paia e faapea: “E vavae ese e Ieova o laugutu molemole uma lava, ma le laulaufaiva e tautala i mea faasausili.” (Salamo 12:3) Sa ia Apisaloma laugutu molemole. Sa tautala faaviivii atu ia i latou sa ia manaʻomia lo latou lotomalie mai—sa fai uma na faiga ina ia maua ai se tulaga o le pule sa naunau ai. I lona tuufaafeagai, maʻeu so tatou faamanuiaga i le iai i le lotolotoi o se ʻauuso o loo mulimuli atu i le fautuaga a Paulo e faapea: “Aua neʻi faia se mea e tasi ma le finau vale, ma le mitamita fua; a ia taitasi outou ma manatu ma le loto maulalo, ua sili nisi ia te ia.”—Filipi 2:3, LF.

Saulo—O se Tupu Lē Onosai

15. I se taimi, sa faapefea ona faaalia e Saulo o ia e lotomaulalo?

¹⁵ Sa iai le taimi, sa faaalia ai e Saulo lea na mulimuli ane avea ma tupu o Isaraelu, lona lotomaulalo. Manatu mo se faaaʻoaʻoga, le mea na tupu a o talavou lona soifuaga. Ina ua taʻuleleia o ia e le perofeta o Samuelu, na tali atu ma le lotomaulalo Saulo e faapea: “E le o aʻu ea le sa Peniaminā, o le itu aiga aupito itiiti i Isaraelu, o loʻu aiga foi ua topito ona faatauvaa i aiga uma o le itu aiga o Peniamina? O le a le mea e te fetalai mai ai upu faapena ia te au?”—1 Samuelu 9:21.

16. O le ā le auala na faaalia ai e Saulo se uiga lē onosai?

 ¹⁶ Peitaʻi mulimuli ane, na mou atu le lotomaulalo o Saulo. A o fetauaʻi ma Filisitia, sa toe foʻi atu Saulo i Kilikala, le mea sa tatau ona ia faatali ai mo Samuelu e sau na te faia se ʻaiʻoiga i le Atua e ala i taulaga. Ina ua lē sau Samuelu i le taimi atofaina, na osi ai ma le faamaualuga e Saulo le taulaga mu. O le taimi lava na uma ai lana gaoioiga, ae taunuu loa Samuelu. “Se a lau mea ua fai na?” o le fesili lena a Samuelu. Na tali atu Saulo: “Na ou vaai, ua taape le nuu sa ia te au, ma oe foi ua e le sau i aso na atofaina mai . . . ona ou faamalosi lea, ma ou faia le taulaga mu.”—1 Samuelu 13:8-12.

17. (a) I le tau lava o le manatu i ai, aiseā e foliga mai ai sa saʻo le gaoioiga a Saulo sa fai? (e) Aiseā na taʻusalaina ai e Ieova Saulo i lana gaoioiga lē onosai?

¹⁷ I le tau lava o le manatu i ai, e foliga mai sa saʻo le gaoioiga a Saulo. Aemaise lava, sa iai tagata o le Atua i se tulaga “pagatia,” “atuatuvale,” ma tetemū ona o lo latou tulaga lē mautonu. (1 Samuelu 13:6, 7) E moni, e lē sesē le fai o se gaoioiga pe a tulaʻi mai se manaʻoga ua tatau ona fai. * Peitaʻi, e ao lava ona manatua, e mafai e Ieova ona silasila i o tatou loto ma silafia o tatou uunaʻiga loloto. (1 Samuelu 16:7) O lea, atonu sa ia silafia nisi o mea e faatatau ia Saulo ae e lē o taʻua i le tala a le Tusi Paia. Mo se faaaʻoaʻoga, atonu sa silafia e Ieova o le lē onosai o Saulo na māfua ona o le faamaualuga. Atonu pe sa matuā faatigā ia Saulo le manatu faapea o ia—o le tupu o Isaraelu uma—ae o lea o le a faatali i se perofeta o lē na ia manatu i ai o sē ua matua ma faimeatuu! Po o le ā lava le tulaga, sa manatu Saulo e faapea o le tuai mai o Samuelu na avatu ai ia te ia le aiā e fai ai e ia mea ma lē manatu mamafa i faatonuga maʻoti sa aumai. O le ā le iʻuga? E leʻi viia e Samuelu le gaoioiga na fai e Saulo. Na i lo le faia faapea, sa ia otegia Saulo i lona faapea atu: “E le tumau lou malo . . . auā ua e le tausia le mea na poloai mai ai Ieova ia te oe.” (1 Samuelu 13:13, 14) O lea foʻi ua toe tulaʻi mai, o le faamaualuga e iʻu ai i le faalumaina.

Ia Leoleo Faasaga i le Lē Onosai

18, 19. (a) Faamatala pe faapefea i le lē onosai ona faapogaia se auauna a le Atua i aso nei e gaoioi ma le faamaualuga. (e) O le ā e ao ona tatou manatua e faatatau i le faagaoioia o le faapotopotoga Kerisiano?

¹⁸ Ua tusia i le Tusi Paia le tala i le faamaualuga o Saulo mo lo tatou lelei. (1 Korinito 10:11) E faigofie tele ona tatou lē fiafia i faiga lē lelei atoatoa a o tatou uso. I le pei o Saulo, tatou te ono lē onosai ai, ma manatu ai faapea ua pau lava le auala e taulimaina ai ma le saʻo mea, o le faia lea e i tatou lava. Mo se faataʻitaʻiga, seʻi faapea e iai se uso e iai ni ona tomai faapitoa i le faamaopoopoina o mea. E tausi taimi, e na te iloa faatulagaga fou i feuiaʻiga faalefaapotopotoga, ma e talenia i le lauga ma le aʻoaʻo atu. Ma i le taimi lava e tasi, na te mātauina ai e lē tutusa isi ma lona tulaga ua iai, ma e lē taitai lava mafai ona latou faia mea ia lelei e pei o ia. Po ua mafai ai ea i lenei mea ona faataga ai o ia ia lē onosai? Pe e ao ea ona ia faitioina ona uso, ma fai ni faamatalaga faapea ana leai ana taumafaiga e lē faia mea o loo manaʻomia ona fai ma semanū e tautevateva le faapotopotoga? O le faamaualuga le mea lena!

¹⁹ Seʻi manatu lava i ai, o le ā o loo faatumauina se faapotopotoga o Kerisiano? O le iai ea o tomai e faamaopoopo ai? o le faimea māeʻa? o le tele o le poto? E moni, o le mauaina o nei mea, e aogā mo le sologa lelei o se faapotopotoga.  (1 Korinito 14:40; Filipi 3:16; 2 Peteru 3:18) Peitaʻi, na fetalai Iesu o le a mātauina patino lava ona soo i lo latou alofa. (Ioane 13:35) O le māfuaaga lena e iloa lelei ai e toeaina alolofa, e ui i so latou tulaga maopoopo, e faapea o le faapotopotoga e lē o se fale faigaluega e manaʻomia ai se pulega maumaututū; na i lo lena, e fai aʻe i se lafu e manaʻomia se tausiga faapelepele. (Isaia 32:1, 2; 40:11) O le lē amanaʻiaina ma le faamaualuga o na mataupu silisili e masani ona iʻu ai i finauga. I le tuufaafeagai, o le maopoopo faale-Atua e faatupu ai le filemu.—1 Korinito 14:33; Kalatia 6:16.

20. O le ā o le a talanoaina i le mataupu o loo sosoo mai?

²⁰ O faamatalaga a le Tusi Paia e uiga ia Koru, Apisaloma, ma Saulo ua faaalia manino ai o le faamaualuga e iʻu ai i le faalumaina, e pei ona taʻua i le Faataoto 11:2. Peitaʻi, o loo faaopoopo mai le fuaiupu lava lena o le Tusi Paia e faapea: “A o i ai le poto i e faamaulalo.” O le ā le faamaulalo po le lotomaulalo? O ā ni faaaʻoaʻoga mai le Tusi Paia e mafai ona fesoasoani e malamalama ai i lenei uiga, ma e faapefea ona tatou faaalia le lotomaulalo i aso nei? O fesili nei o le a talanoaina i le mataupu o loo sosoo mai.

[Faamatalaga pito i lalo]

Pe E te Manatua?

• O le ā le faamaualuga?

• Na faapefea e le matauʻa ona faapogaia Koru e gaoioi ma le faamaualuga?

• O le ā tatou te aʻoaʻoina mai le tala e uiga i le fiasili o Apisaloma?

• E faapefea ona tatou alofia le agaga lē onosai sa faaalia e Saulo?

[Fesili mo le Suʻesuʻega]

[Ata i le itulau 10]

Na iʻu ina lē onosai Saulo ma gaoioi ai ma le faamaualuga