E Faapefea Ona E Taulimaina Feeseeseaʻiga?

I ASO taʻitasi tatou te fetaiaʻi ai ma ituaiga eseese o uiga faaletagata. O lenei mea e masani lava ona aumaia ai ia i tatou le olioli ma ni manatu fou. I nisi o taimi, e mapuna aʻe ai foʻi ma feeseeseaʻiga, o nisi o ni mea matuiā a o nisi ua na o ni nai mea iti e tutupu i aso taʻitasi o o tatou olaga. Po o le ā lava o latou māfuaaga, ae o le auala tatou te feagai ai ma feeseeseaʻiga e aafia ai i tatou i le itu tau le mafaufau, faalogona, ma le faaleagaga.

O le faia o le mea tatou te mafaia e foʻia ai feeseeseaʻiga i se auala e malilie uma i ai, e saosaolaumea lea i lo tatou mauaina o se olaga mālōlōina ma ni faiā e sili atu ona filemu ma isi. Ua faapea mai se faataoto mai anamua: “O le loto lelei, o le ola lea o le tino; a o le mataua, o le mea e pala ai ivi lea.”—Faataoto 14:30.

I lona matuā tuufaafeagai ua tulaʻi mai ai le mea moni e faapea: “O le aai ua sofaia, ua leai se pa, o le tagata lea na te le mataofia lona loto.” (Faataoto 25:28) O ai o i tatou e manaʻo e tuu i tatou i se tulaga lamatia mai osofaʻiga a manatu sesē lea e mafai ona faapogaia ai lo tatou gaoioi i ni ala lē talafeagai—ala e mafai ona aumaia ai le tigā i isi ma i tatou? O le tali atu ma le lē pulea o le ita, e mafai ona tupu ai se mea faapena. I le Lauga i luga o le Mauga, na fautuaina ai e Iesu le tilofaʻia o auala o loo tatou mafaufau ai, lea e mafai ona aafia ai le auala tatou te taulimaina ai so o se feeseeseaʻiga ma isi. (Mataio 7:3-5) Na i lo le tatou faitio e uiga i isi, e ao ona tatou manatunatu i le auala e mafai ona tatou ati aʻe ai ma faatumauina ai ni faauōga ma i latou e ese o latou manatu ma o latou talaaga.

Auala o Loo Tatou Mafaufau Ai

O se laasaga muamua i le foʻiaina o se feeseeseaʻiga ua e manatu o loo iai ae leai, po o se feeseeseaʻiga moni foʻi, o le iloaina lea faapea e iai o tatou manatu sesē ma uiga lē saʻo. Ua faamanatu mai e le Tusi Paia ia i tatou faapea ua tatou agasala uma lava “ma ua le oo i le mamalu o le Atua.” (Roma 3:23, LF) E lē gata i lea, o le tofa mamao e ono faaalia ai faapea e lē o le isi tagata le māfuaaga o le faafitauli. I lenei itu, seʻi o tatou tilofaʻia ai le mea na tupu ia Iona.

O le faatonuga mai ia Ieova, na agaʻi atu ai Iona i le aai o Nineva e talaʻi atu le faamasinoga o loo faaloloʻi mai a Ieova i tagata o loo nonofo ai. O le iʻuga fiafia na iai o le salamō lea o le nuu atoa o Nineva ma faatuatua i le Atua moni. (Iona 3:5-10) Na lagona e Ieova ona o lo latou salamō ua talafeagai i ai le faamagaloga, o lea na ia faasaoina ai i latou. “Ua matua leaga lava lenei mea ia Iona, ua ita lava o ia.” (Iona 4:1) O le tali atu a Iona i le alofa o Ieova o se mea e faateʻia ai. Aiseā na ita ai Iona ia Ieova? E foliga mai, sa lofitūina Iona i ona lava lagona, i le manatu faapea ua leiloa lona mamalu sa iai i totonu o le nuu. Sa lē taulau o ia i le talisapaia o le alofa o Ieova. I se auala agalelei, na faapogaia ai e Ieova se mea e tupu ina ia aʻoaʻoina mai ai e Iona se lesona tāua na fesoasoani ia te ia e suia le auala o loo mafaufau ai ma ia vaai atu i  le silisili ona tautele o le alofa o Ieova. (Iona 4:7-11) E manino mai o le auala na mafaufau ai Iona, ae lē o Ieova, sa manaʻomia ona suia.

Pe e manaʻomia ea i nisi taimi mo i tatou ona suia o tatou manatu e uiga i se mataupu? Na timaʻi mai le aposetolo o Paulo ia i tatou e faapea: “Ia tausolomua ona ava o le tasi i le tasi.” (Roma 12:10) O le ā sa ia uiga i ai? I se tasi itu, o loo ia faalaeiauina i tatou ina ia fetuutuunaʻi ma ia faaalia atu i isi Kerisiano le faaaloalo loloto ma le āva. E aofia ai i lenei mea le iloaina faapea ua iai i tagata taʻitoʻatasi le faaeaga o le filifiliga saʻoloto. Na faamanatu mai foʻi e Paulo ia i tatou: “E taitasi ma ave i lana lava avega.” (Kalatia 6:5) O lea, a o leʻi oo ina avea se feeseeseaʻiga ma faafitauli matuiā, maʻeu le atamai o lo tatou tilofaʻia pe faamata e manaʻomia ona suia le auala o loo tatou mafaufau ai! E ao ona tatou galulue mamafa e faaatagia atu manatunatuga o Ieova ma tausia le filemu ma isi o ē alolofa moni i le Atua.—Isaia 55:8, 9.

La Tatou Vaai

Seʻi mafaufau i ni tamaiti se toʻalua o loo fefālōaʻi se meataalo, o loo matuā toso malosi le tagata lava ia ma le manatu ina ia maua mai. O faaupuga o le ita o le a ō atu faatasi i lea taimi o le fefinauaʻiga seʻia oo ina faamamulu atu e le tasi le meataalo ia po o le oso ane o se tasi ma vavao.

O loo taʻu mai e le tala i le Kenese faapea na faalogo Aperaamo o loo iai se fefinauaʻiga i le va o ana leoleo manu ma leoleo manu a Lota le atalii o lona uso. Na tausolomua Aperaamo i le alu atu ia Lota ma faapea atu: “Aua lava neʻi femisaʻi i taua, po o a taua leoleo manu; auā o le uso i taua.” O le faanaunauga sa ia Aperaamo ia aua lava neʻi faatagaina se fefinauaʻiga e faaleagaina ai le la faiā. I le ā lona tau? Sa nofosauni o ia e faataulaga lona faaeaga o le filifili muamua ona o ia e matua; sa lotomalie e lafoaʻia se mea sa ao ona ia maua. Na faataga e Aperaamo ia Lota ina ia filifili le vaipanoa e manaʻo e ave i ai lona aiga ma ana lafu manu. Na mulimuli ane filifilia e Lota le eleele lanulauʻava o Sotoma ma Komoro. Na faamavae Aperaamo ma Lota ma le filemu.—Kenese 13:5-12.

Ina ia faatumauina ni faiā filemu ma isi, pe ua tatou nofosauni e gaoioi i le agaga e pei ona sa faia e Aperaamo? Ua faataatia mai mo i tatou e lenei vaega o le Tusi Paia se faaaʻoaʻoga matagofie e faataʻitaʻi i ai pe a taulimaina se feeseeseaʻiga. Na augani atu Aperaamo: “Aua lava neʻi femisaʻi.” O le faanaunauga moni o Aperaamo ina ia taunuu i se taunuuga toʻafilemu. E mautinoa o se valaaulia faapena ina ia tausia pea faiā toʻafilemu o le a fesoasoani e faateʻa ese ai se lē femalamalamaaʻi. Ona faaiʻu loa lea e Aperaamo i le faaupuga faapea “auā o le uso i taua.” Aiseā e faataulaga ai se faiā tautele faapena ona o manaʻoga totino o le tagata lava ia po o le faamaualuga? Sa taulaʻi atu ma le manino Aperaamo i le mea e sili ona tāua. Na ia faia lena mea ma le faaaloalo totino ma le āva, ae i le taimi e tasi na faamamaluina ai le atalii o lona uso.

Pe a tulaʻi mai ni mea e tutupu e moomia ai se isi e ese mai i ē o loo feeseeseaʻi ina ia foʻia se feeseeseaʻiga, maʻeu le sili atu ona lelei pe a mafai ona foʻia le mataupu tau lava o i latou e aafia ai! Na faalaeiau mai Iesu ia i tatou ina ia tausolomua ona faatupu le filemu ma lo tatou uso, faatoese pe afai e manaʻomia. * (Mataio 5:23, 24) O le a manaʻomia ai le agamalu, po o le lotomaulalo, ae na tusi Peteru: “Ia oofu outou uma lava i le loto maulalo o le tasi i le tasi; auā, E tetee atu le Atua i e faamaualuluga, a e foaiina mai le alofa tunoa i e faamaulalo.” (1 Peteru 5:5, LF) O le auala tatou te feagai ai ma o tatou uso tapuaʻi e aafia tuusaʻo ai la tatou faiā ma le Atua.—1 Ioane 4:20.

I totonu o le faapotopotoga Kerisiano, e ono manaʻomia ai ona faamatuu atu so tatou aiā tatau  ina ia tausia ai le filemu. Ua iai se fuainumera toʻatele o i latou o loo auaumea faatasi ma Molimau a Ieova ua ō mai i le aiga o tagata tapuaʻi moni o le Atua i le lima tausaga ua tuanaʻi. Maʻeu le olioli ua aumaia e lenei mea i o tatou loto! O le auala tatou te amioaʻi ai e mautinoa o le a aafia ai i latou nei faapea ma isi i le faapotopotoga. O se māfuaaga lelei lea e ao ai ona tatou manatunatu lelei i a tatou filifiliga o faafiafiaga, mausa, mea e faapasi ai le taimi, po o galuega, i le manatu atu lea i faalogona o isi e uiga ia i tatou. Pe e iai sa tatou gaoioiga po o se faaupuga e ono tupu ai se lē femalamalamaaʻi ma avea ma mea e faatausuai ai isi?

Ua faamanatu mai e le aposetolo o Paulo ia i tatou e faapea: “Ua tataga mea uma ia te au, a ua le aoga mea uma; ua tataga mea uma ia te au, a ua le faamafanafana mea uma. Aua le saili se tasi i lona lava lelei, a ia taitasi ma saili i le lelei o le isi.” (1 Korinito 10:23, 24) I le avea ai o ni Kerisiano, o loo tatou manatu mamafa atu lava i le atiina aʻe o le alofa ma le autasi o le ʻauuso Kerisiano.—Salamo 133:1; Ioane 13:34, 35.

Upu Faalaeiau

E mafai ona iai se aafiaga malosi o upu mo le lelei. “O upu matagofie, o le meli ua sisina ifo ia; e suamalie i le loto, ma le mea e malolo ai ivi.” (Faataoto 16:24) Ua faataʻitaʻia mai le moni o lenei faataoto i le tala e faatatau i le taofiaina e Kitiona o se fetauaʻiga na semanū e tupu i lo latou va ma tagata Efaraima.

Na talosaga atu Kitiona, o lē sa matuā aafia i le taua ma Mitiana, i le ituaiga o Efaraima mo se fesoasoani. Peitaʻi, ina ua uma le taua, na liliu atu ai tagata Efaraima ma soona faitio atu ia Kitiona i lona lē muaʻi talosagaina o i latou i le taua. Ua taʻua i faamaumauga faapea “ua latou matuā finau tele mai ia te ia.” I le tali atu a Kitiona na ia faapea atu ai: “Se a se mea ua ou faia nei e tusa ma la outou? E lei sili ona lelei ea nai toe fuifui vine o Efaraima i le taugāvine o Apieseru? Ua tuuina atu e le Atua i o outou lima o tamaalii o Mitiana, o Oreva ma Seeva; se a foi se mea ou te mafaia ona fai e tusa ma outou?” (Faamasino 8:1-3) Ona o nei upu faatoʻafilemu, na filifilia lelei, na ʻalofia ai e Kitiona se taua mataʻutia na semanū e tupu i le va o ituaiga. Atonu sa iai i tagata o le ituaiga o Efaraima le faafitauli o le fia tāua ma le faamaualuga. Peitaʻi, e leʻi taofia e lena mea Kitiona mai le galue ina ia maua se taunuuga toʻafilemu. Pe e mafai ea ona tatou faia faapea?

E ono mapuna aʻe le ita i nisi ma faapogaia ai lo latou lē fiafia mai ia i tatou. Ia amanaʻia o latou faalogona, ma galue mamafa ina ia malamalama i o latou manatu. Pe atonu ea o iai se vala o loo tatou faapogaia ai na faalogona ia i latou? Afai o lena, aiseā e lē taliaina ai la tatou vaega ua fai i le faatupuina o le faafitauli ma faailoa atu lo tatou tigā alofa ona o lo tatou faaopoopo atu i le faafitauli. O nai upu ua saunia lelei e mafai ona toe faafoʻisia ai se faiā sa faaleagaina. (Iakopo 3:4) O nisi o loo lē fiafia atonu pau lava le mea o loo latou moomia o la tatou faamautinoaga ma le agalelei. Ua taʻua e le Tusi Paia faapea “a leai se fafie, e mate ai le afi.” (Faataoto 26:20) Ioe, o upu ua filifilia ma le faaeteete ma fai atu i le agaga saʻo e mafai ona “liliueseina ai le ita” ma avea ma vaifofō.—Faataoto 15:1.

Na fautua mai le aposetolo o Paulo: “Afai e mafaia ia te outou, ia outou nofo lelei ma tagata uma lava.” (Roma 12:18) E moni e lē mafai ona tatou pulea faalogona o isi, ae e mafai ona fai la tatou vaega ina ia faatupu ai le filemu. Na i lo le pulea e o tatou lava manatu lē lelei atoatoa po o manatu foʻi o isi, e mafai ona tatou gaoioi nei ina ia faatatauina mataupu silisili o le Tusi Paia e sili ona faavaeina lelei. O le taulimaina o feeseeseaʻiga i le auala ua faatonuina i tatou e Ieova e fai o le a iʻu ai i lo tatou mauaina o le filemu ma le fiafia e faavavau.—Isaia 48:17.

[Faamatalaga pito i lalo]

[Ata i le itulau 24]

Pe tatou te maumauaʻi e faia mea i la tatou lava auala?

[Ata i le itulau 25]

Na faataatia e Aperaamo se faaaʻoaʻoga lelei o le lolo gofie ina ia foʻia ai se feeseeseaʻiga