Pe E te Manatua?

Pe na e talisapaia le faitauina o lomiga talu ai nei o Le Olomatamata? Seʻi vaai la pe mafai ona e taliina fesili o loo mulimuli mai:

• Aiseā e mafai ai ona tatou mautinoa faapea e sili atu mea o loo aofia ai i le faataunuuga o le valoaga i le “lagi fou ma le lalolagi fou” i le Isaia 65:17-19 na i lo le na o le toe foʻi mai o tagata Iutaia sa faaaunuua?

Talu ai o tusitusiga i le uluaʻi senituri T.A. a aposetolo o Peteru ma Ioane, sa faasino atu i se faataunuuga i le lumanaʻi, lea e aofia ai ma faamanuiaga o loo fotuaʻi mai. (2 Peteru 3:13; Faaaliga 21:1-4)—4/15, itulau 10-12.

• O le ā atonu na tupuga mai ai tala faafagogo anamua a Eleni e uiga i tagata tai pei ni atua e sauā?

O nei fagogo atonu e māfua mai i ni tala na faatele ma ni manatu ua mimilo sesē e faatatau i le mea moni faapea a o leʻi oo mai le Lolo, na liutino tagata ai nisi agelu ma faapea ona ola ai i ni olaga sauā ma le lē mamā i le lalolagi. (Kenese 6:1, 2)—4/15, itulau 27.

• O ā nisi o lamatiaga e manaʻomia mo Kerisiano taʻumatuaina ona puipui mai ai i taimi o faaipoipoga?

E tāua tele le ʻalofia o faatasitasiga pisapisaō, lea e ono tupu pe afai e lē taofiofia le faaaogāina o le ava malosi faapea ma le faia o siva lē taupulea i musika e soona faaleo tetele. Seʻi vaganā lava ua faamanino mai faapea o le a tatala le ʻaiga i tagata uma, ae e lē tatau ona auai i latou e leʻi valaauliaina. E tatau i le alii faaipoipo ona faamautinoa o le a iai pea ni Kerisiano maufaatuatuaina seʻia faaiʻuina le fiafia i se taimi talafeagai.—5/1, itulau 19-22.

• O le ā ua fafagu mai i o tatou mafaufau ona o le taʻua e le Salamo 128:3 o fanau “e pei o tamai olive” e vagavagaia le laoʻai a se tasi?

E masani lava o ni tātupu fou e oso aʻe mai le pogati o se ogalaau o le laau o le olive. Pe a lē toe fua tele mai le pogati autū o se laau ua matua, e ono avea tātupu fou ma lālā laau malolosi e siʻomia ai lena ogalaau. I se tulaga talitutusa, e mafai ona olioli mātua i le iai o ni fanau e fua mai o loo auauna faatasi ma i latou ia Ieova.—5/15, itulau 27.

• O ā nisi o aogā e utufia mai e le fanau i se siʻomaga toʻafimālie i le aiga?

Na te faataatiaina se faavae mo i latou ina ia mauaina se vaaiga lelei i le pule, le talisapaia o mea e tāua, ma faiā fiafia ma isi. O se siʻomaga foʻi faapena e mafai ona fesoasoani ai ia i latou e ati aʻe se faigauō ma le Atua.—6/1, itulau 18.

• I se tasi o atunuu i Sasaʻe Mamao, o le ā sa faia ina ia faalaeiauina ai le manatu faapea o Kerisiano uma lava o le ʻauuso?

Sa timaʻia faapotopotoga uma ina ia aua neʻi faaaogāina faalagilagiga mo tagata maualuluga e faasino atu ai i nisi patino. Na i lo lea, e tatau ona taʻua tagata uma i se tulaga tutusa o le ʻauuso.—6/15, itulau 21, 22.

• Pe e talia e Molimau a Ieova vailaau e faaaogā ai le toto?

Matou te talitonu e faapea o le faatonuga a le Tusi Paia ia ‘taumamao mai le toto’ ua faasāina ai tuiga toto e aofia ai le toto atoa po o ni ona vaega (suāvai o le toto, sela mumu, sela papaʻe, ma sela faatoʻa toto). (Galuega 15:28, 29) E tusa ai o vaega ninii e faia mai vaega autū, e filifili totino e le Kerisiano lava ia, faatasi ai ma le manatua pea o le mea o loo fai mai ai le Tusi Paia ma lana faiā ma le Atua.—6/15, itulau 29-31.

• Pe e mafai moni ea ona maua le filemu o le mafaufau i aso nei?

Ioe. E ala mai i le Tusi Paia, o loo taʻitaʻia ai e Iesu Keriso tagata i le ala o le tapuaʻiga mamā ma le filemu o loo faamatalaina i le Isaia 32:18. E lē gata i lena, o i latou e mauaina lena filemu e ia i latou le faamoemoe o le olioli i le filemu tumau i le lalolagi i le faataunuuina o le Salamo 37:11, 29.—7/1, itulau 7.

• O le ā le vaega sa faia e George Young i le talafaasolopito o le faatiokarate i aso nei?

Amata mai i le 1917, na faamaonia ai le avea o ia ma sē tauaveina atu le malamalama o le tala lelei o le Malo i le tele o atunuu. O lana faiva na oo atu ai o ia i Kanata, i atumotu o le atu Karipiane, i Pasili ma isi atunuu i Amerika i Saute ma Amerika Tutotonu, i Sepania, i Potukali, i le atunuu sa taʻua muamua o Soviet Union, ma le Iunaite Setete.—7/1, itulau 22-27.

• O le ā le uiga o le 1 Korinito 15:29 ina ua tautala e uiga i nisi o ē “ua papatisoina ma sui o e ua oti?”

O le manatu lena e faapea, a faauuina e le agaga paia Kerisiano, ona latou ulu atu lea i se olaga e taʻitaʻia atu ai i lo latou maliliu ma mulimuli ane toe faatūina i le olaga i le lagi.—7/15, itulau 17.

• O le ā sa faia e le aposetolo o Paulo a o faagasolo le vaitaimi na taʻua o ona tausaga lē mailoa?

Atonu sa ia fesoasoani ai ina ia faavaeina po o le faamalosia foʻi o faapotopotoga i Suria ma Kilikia. O le tele o puapuaga o loo taʻua i le 2 Korinito 11:23-27 atonu sa tutupu a o faagasolo le vaitaimi lena, e faaalia ai sa ia tauaveina se faiva maelega.—7/15, itulau 26, 27.

• O le ā e mafai ona fesoasoani ia i tatou ina ia fuafua tatau mea tatou te faatalitalia?

Ia manatua e finagalo malamalama Ieova. O le tatalo atu ia te ia e mafai ona fesoasoani ia i tatou e faapaleni o tatou mafaufauga, ma e faaalia ai le agamalu. O se isi fesoasoani o le maua lea o se isi vaaiga fou e ala i le talanoa atu i se uō taʻumatuaina.—8/1, itulau 29, 30.