Pe o Oe o se Kerisiano e ‘Faatagata Matua’?

“O ONA po na ou itiiti ai, na ou tautala ai faatamaitiiti, na ou manatunatu faatamaitiiti, na ou filifili faatamaitiiti.” O le tusi mai lea a le aposetolo o Paulo. O le mea moni, sa iai le taimi na avea ai i tatou ma pepe sa lē mafesoasoania. Peitaʻi, tatou te leʻi tumau ai pea e faavavau. Na mātauina e le aposetolo o Paulo e faapea: “Ua oo ina ou tagata matua, ona ou tiai lea o mea a tamaiti.”—1 Korinito 13:11.

I se tulaga talitutusa, o Kerisiano uma lava na amata mai o ni pepe faaleagaga. Ae i se taimi mulimuli ane, e mafai ai e tagata uma ona “[maua] le loto gatasi i la le faatuatua, ma le iloa lelei o le Alo o le Atua, ia fai foi ma tagata matua, ia oo i le fua o le ua matua, e tatau ma le tumu o Keriso.” (Efeso 4:13) I le 1 Korinito 14:20, ua apoapoaʻia ai i tatou: ‘Le au uso e, aua tou te faatamaiti i le mafaufau . . . ia outou faatagata matutua i le mafaufau.’

O le iai o ni Kerisiano ua faatagata matutua ma taʻumatuaina, o se faamanuiaga lea i tagata o le Atua i aso nei, aemaise lava ona ua toʻatele naunau tagata fou. O le iai o Kerisiano faatagata matutua ma taʻumatuaina e maua ai le mausalī o se faapotopotoga. E iai sa latou taaʻiga lelei i manatu, po o le auala o loo mafaufau ai so o se faapotopotoga lava latou te auai atu i ai.

E ui ina e tai pei e otometi ona tuputupu aʻe se tasi faaletino, ae o le tuputupu aʻe faaleagaga e na o le taimi ma taumafaiga lava e mafai ai. E lē o se mea e faateʻia ai la, i tuā i aso o Paulo, na lē taulau ai mo isi Kerisiano ona “agaʻigaʻi i luma i le taʻumatuaina,” e ui lava ua autausagā o auauna i le Atua. (Eperu 5:12; 6:1, NW) Ae faapefea oe? E tusa  lava pe ua e auauna i le Atua mo le tele o tausaga pe mo na o sina vaitaimi puupuu lava, e talafeagai mo oe ona tilofaʻia ma le faamaoni oe lava. (2 Korinito 13:5) Pe o avea ea oe o se tasi o i latou e mafai ona taʻua moni o Kerisiano faatagata matutua, taʻumatuaina? Afai e leai, e faapefea ona avea oe ma se tasi o i latou na?

‘Faatagata Matua i le Mafaufau’

E faigofie lava mo se pepe faaleagaga ona “felafoaiina e pei o peau, ma feaveaiina i matagi uma lava o matāupu, i le pepelo o tagata, i togafiti leaga ua saunia e faasese ai.” O lea na timaʻi mai ai Paulo: “Ia tutupu i tatou ia te ia i mea uma, o le ulu lava ia, o ia foi o Keriso.” (Efeso 4:14, 15) E faapefea e se tasi ona faia faapea? Ua faapea mai le Eperu 5:14: “O mea aano, ma e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga.”

Ia mātau o tagata taʻumatuaina e iai o latou tomai e mafaufau ai ua toleniina e ala i le faaaogāina, po o mea ua latou maua ai le poto masani e ala i le faatatauina o mataupu silisili o le Tusi Paia. E manino mai la, e leai se tasi e mafai ona faafuaseʻi lava ona taʻumatuaina; e faaalu se taimi ina ia tuputupu aʻe ai faaleagaga. E ui i lea, e tele ni mea e mafai ona e faia ina ia matuā faafaigofieina ai lou tuputupu aʻe faaleagaga e ala i suʻesuʻega totino—aemaise lava i mea loloto o le Afioga a le Atua. I taimi e leʻi mamao tele atu na talanoaina ai e Le Olomatamata le tele o mataupu loloto. O tagata ua taʻumatuaina latou te lē alo ese mai na mataupu ona o loo iai “nisi upu faamatalagatā.” (2 Peteru 3:16) Na i lo lea, latou te faaaogāina ma le naunau na meaʻai aano!

ʻAutalaʻi ma Faiaʻoga Maelega

Na faatonu e Iesu ona soo e faapea: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) O le faia o se sao maelega i le galuega talaʻi e mafai foʻi ona uunaʻia ai lou tuputupu aʻe faaleagaga. Aiseā e lē tauivi ai ina ia faia se sao atoatoa i lena galuega pe a tusa ai ma lou tulaga?—Mataio 13:23.

I nisi o taimi, o omiga o le olaga e mafai ona avea ai o se luʻi le saʻilia o se taimi e talaʻi ai. E ui i lea, e ala i le “finafinau” o se tagata talaʻi, e te faaalia atu ai le faatāuaina o loo e tuu atu i le “tala lelei.” (Luka 13:24; Roma 1:16) E mafai ona vaai ai ia te oe o sē ua avea ma “faaaʻoaʻo i e ua faatuatua.”—1 Timoteo 4:12.

O Ē Tausia le Faamaoni

O le tuputupu aʻe ina ia taʻumatuaina e aofia ai foʻi le faia o taumafaiga ina ia tausia ai lou faamaoni. E pei ona faamauina i le Salamo 26:1, na faailoa atu ai faapea e Tavita: “Ieova e, ia e faamasino ia te au; auā o aʻu nei ua ou savali ma laʻu amio sao [“faamaoni,” NW].” O le faamaoni o le mamā lea tauamio, e atoatoa. Peitaʻi, e lē o lona uiga o le lelei atoatoa. O Tavita na ia faia ni agasala matuiā. Ae talu ai na ia talia le faasaʻoga ma faasaʻoina lona ala, na ia faaalia ai o loo iai pea i lona loto le alofa moni mo Ieova le Atua. (Salamo 26:2, 3, 6, 8, 11) O le faamaoni e aofia ai foʻi le tuutoina atu ma le loto atoatoa. Na taʻu atu e Tavita i lona atalii o Solomona e faapea: “Ia iloa e oe le Atua o lou tamā, ma auauna ia te ia ma le loto atoa.”—1 Nofoaiga a Tupu 28:9.

O le tausia o le faamaoni e aofia ai le avea ma “le ni o le lalolagi,” o le vavae ese mai faiga faapolotiki a atunuu ma a latou taua. (Ioane 17:16) E manaʻomia foʻi ona e aloese mai faiga piʻopiʻo, e pei o le faitaaga, mulilua, ma le faaaogāsesēina o fualaau faasāina. (Kalatia 5:19-21) O le tausia o le faamaoni e iai sona uiga e sili atu, na i lo le tau ina ʻalofia o na mea. Na lapataʻi mai Solomona:  “O lago mamate e elo ai ma masa ai le suauu manogi a le fai mea manogi; o le valea itiiti foi e leaga ai le ua taʻua o le poto ma le mamalu.” (Failauga 10:1) Ioe, e oo lava i sina “valea itiiti,” e pei o amio faaulaula po o le faatosina lē talafeagai i le isi ituaiga, e mafai ona faaleagaina ai se talaaga o se tasi “ua taʻua o le poto.” (Iopu 31:1) O lea, ia faaalia lou taʻumatuaina e ala i le saʻili ina ia avea oe ma faaaʻoaʻo i lau amio, ia ʻalofia e oo lava foʻi i se “foliga atu e leaga.”—1 Tesalonia 5:22, King James Version.

O Ē Alolofa Faamaoni

O se Kerisiano ua faatagata matua e alofa faamaoni foʻi. E pei ona tatou faitau i le Efeso 4:24, na apoapoaʻi mai ai le aposetolo o Paulo i Kerisiano e faapea: “Ia oofu outou i le tagata fou ua faia e foliga i le Atua, i le amiotonu ma le amio lelei e faamaoni [“alofa faamaoni,” NW].” I le Tusi Paia Eleni, o le upu sa iai i le uluaʻi gagana mo le “alofa faamaoni” sa uiga atu i le paia, amiotonu, migao. O se tagata e alofa faamaoni e tuutoina, maelega; na te tausia ma le faaeteete ona tiute uma i le Atua.

O ā nisi o vala e mafai ona e atiina aʻe ai lena alofa faamaoni? O le tasi vala e ala lea i le galulue soosoo tauʻau ma toeaina o lau faapotopotoga. (Eperu 13:17) O le iloaina faapea o Keriso o ia o le Ulu tofia o le faapotopotoga Kerisiano, e faaalia ai e Kerisiano taʻumatuaina le alofa faamaoni ia i latou ua tofia “e fai ma leoleo, . . . i le ekalesia a le Atua.” (Galuega 20:28) Pagā le lē talafeagai o le luʻia po o le vaai faatauvaa i le pule a toeaina tofia! E tatau foʻi ona e lagonaina se uiga alofa faamaoni agaʻi i le “auauna faamaoni ma le mafaufau” ma isi sui ua faaaogāina ina ia tufatufaina atu “mea e ʻai [faaleagaga] i ona itu aso.” (Mataio 24:45) Ia vave ona faitauina ma faatatauina faamatalaga o loo maua i Le Olomatamata ma isi lomiga o loo fai ma ona soa.

Faaalia le Alofa e Ala i Au Gaoioiga

Na tusi atu Paulo i Kerisiano i Tesalonia: “Ua faateleina foi lo outou fealofani [“alofa,” NW] o outou uma lava taitoatasi.” (2 Tesalonia 1:3) O le tupu aʻe i le alofa o se vala lea e tāua faapitoa o le tuputupu aʻe faaleagaga. Na fetalai Iesu, e pei ona faamauina i le Ioane 13:35: “O le mea lea e iloa ai e tagata uma lava o oʻu soo outou, pe afai ua outou fealofani [“alofa,” NW].” O lena alofa faaleuso e lē mātauliaina i le tau lava o faalogona, ma lagona. Na taʻua e le Vine’s Expository Dictionary of Old and New Testament Words e faapea: “Pau lava le mea e iloa ai le alofa o gaoioiga ia na te uunaʻia.” Ioe, e te agaʻigaʻi atu i le taʻumatuaina i lenei itu e ala i le faaalia o le alofa i gaoioiga!

Mo se faataʻitaʻiga, i le Roma 15:7, tatou te faitau ai faapea: “[Ia] talia ai le tasi e le tasi.” O se tasi auala e faaalia ai le alofa o le faafeiloaʻia lea o ou uso talitonu ma tagata fou i sauniga a le faapotopotoga—ma le māfana ma le faagaeetia! Ia matuā iloa lelei i latou. Ia iai se ‘naunau totino’ i isi. (Filipi 2:4) Atonu e mafai foʻi ona e faaalia le talimalo ma valaaulia nisi eseese i lou aiga. (Galuega 16:14, 15) O vaivaiga o isi e mafai i nisi taimi ona tofotofoina ai le loloto o lou alofa, peitaʻi a o e aʻoaʻoina ia ‘faapalepale ia i latou i le alofa,’ ua e faaalia atu ai ua e faatagata matua.—Efeso 4:2.

Faaaogāina o a Tatou Meatotino e Faaauiluma ai le Tapuaʻiga Mamā

I taimi anamua, sa lē faataunuuina ai e tagata uma o le Atua lo latou tiute tauave o le lagolagoina o le malumalu o Ieova. O lea na auina mai ai e Ieova ana perofeta, e pei o Hakai ma Malaki, ina ia uunaʻia Ona tagata i lenei itu. (Hakai 1:2-6; Malaki 3:10) O loo faaaogāina ma le olioli e Kerisiano taʻumatuaina i aso nei a latou meatotino ina ia lagolago ai le tapuaʻiga a Ieova. Ia faaaʻoaʻo  ia i latou na e ala i le mulimuli i le mataupu silisili o loo i le 1 Korinito 16:1, 2, o le “tuu ane” e lē aunoa o se mea e foaʻi atu i le faapotopotoga ma le galuega i le lalolagi aoao a Molimau a Ieova. Ua folafola mai e le Afioga a le Atua faapea: “O le ua tele ana e lulu, e tele foi ana e selesele mai.”—2 Korinito 9:6.

Aua e te melea isi meatotino o loo ia te oe, e pei o lou taimi ma lou malosi. Taumafai e ‘faaaogā tatau le taimi’ mai le faaalu i gaoioiga e faalētāua. (Efeso 5:15, 16; Filipi 1:10) Ia faamasani ia iloa ona matuā faaaogā tatau lou taimi. O le faia faapea e ono fesoasoani ai ia te oe ina ia faia sou sao i galuega o le faaleleia o Maota o le Malo ma isi lava galuega faapena e faaauiluma ai le tapuaʻiga ia Ieova. O le faaaogāina o a outou meatotino i lenei auala o le a maua ai nisi faamaoniga faaopoopo faapea o oe o se Kerisiano ua faatagata matua.

Agaʻigaʻi Atu i le Taʻumatuaina

O tane ma fafine o ē naunau e suʻesuʻe ma ua latou maua le poto, o ē talaʻi ma le maelega, o ē atoatoa lo latou faamaoni, o ē alolofa faamaoni ma agaalofa, ma o ē e lotonaunau e ofoina atu la latou lagolagosua faaletino ma a latou meatotino i le galuega o le Malo o le mea moni o se faamanuiaga tele. E lētioa la apoapoaʻi mai le aposetolo o Paulo: “Ina tatou tuua ai ia o aʻoaʻoga muamua a Keriso, a ia tatou faaoo atu i le faaatoatoaga [“taʻumatuaina,” NW]”!—Eperu 6:1.

Pe o oe o se Kerisiano faatagata matua, taʻumatuaina? Pe o loo e tai pei lava o se pepe faaleagaga i nisi o vala? (Eperu 5:13) I so o se itu lava, ia e maumauaʻi e matuā galue i le faia o suʻesuʻega totino, talaʻiga, ma ia faaalia le alofa i ou uso. Ia talia so o se fautuaga po o se aʻoaʻiga e ofoina atu e se tasi e taʻumatuaina. (Faataoto 8:33) Ia tauave lau avega atoa o tiute tauave faa-Kerisiano. Faatasi ai ma le taimi ma taumafaiga, e mafai foʻi e oe ona “oo atu . . . i le loto gatasi i la le faatuatua, ma le iloa lelei o le Alo o le Atua, ia fai foi ma tagata matua, ia oo i le fua o le ua matua, e tatau ma le tumu o Keriso.”—Efeso 4:13.

[Faamatalaga faaopoopo i le itulau 27]

O le iai o ni Kerisiano faatagata matutua e atili ai ona mausalī se faapotopotoga. E iai sa latou taaʻiga lelei i manatu, po o le ala o loo mafaufau ai se faapotopotoga

[Ata i le itulau 29]

O ē taʻumatuaina e saosaolaumea i le agaga o le faapotopotoga e ala i le faaalia o se naunau i isi