Taulaga na Finagalo Malie i ai le Atua

“Ua tofia ositaulaga sili uma ina ia ositaulaga i mea alofa ma taulaga.”—EPERU 8:3.

1. Aiseā e lagona ai e tagata le manaʻoga ina ia sulu atu i le Atua?

“O LE faia o taulaga e foliga mai o se mea ua ‘masani’ ai le tagata e pei o le faia o tatalo; e faaalia mai ai e lē o ofoina le taulaga ia ona faalogona e faatatau ia te ia lava, e pei foʻi ona faaalia mai e le tagata o loo tatalo ona faalogona e faatatau i le Atua,” ua tusi mai ai se tusitala o talafaasolopito o le Tusi Paia, o Alfred Edersheim. O le taimi lava na ulufale mai ai le agasala i le lalolagi, ua aumaia ai foʻi ma tigā o le nofosala, le faaesea mai le Atua, ma le lē mafesoasoania. Ua manaʻomia se mapusaga mai nei faalogona. Ua faigofie la ona malamalama e faapea, pe a oo tagata i sea tulaga fememeaʻi, latou te lagonaina le manaʻoga ina ia sulu atu i le Atua mo se fesoasoani.—Roma 5:12.

2. O le ā se faamaumauga o faiga taulaga i aso anamua na ofoina i le Atua, tatou te maua i le Tusi Paia?

² O le uluaʻi faamaumauga lava a le Tusi Paia i faiga taulaga, o taulaga ia na ofoina e Kaino ma Apelu i le Atua. Tatou te faitau i ai e faapea: “Ua oo ina atoa o aso, ona avatu ai lea e Kaino o le fua o le fanua o le taulaga ia Ieova. A o Apelu, ua ia avatu foi uluai tama a lona lafu, o e pepeti ai lava.” (Kenese 4:3, 4) E sosoo ai ma lo tatou faitauina e faapea, ina ua faasaoina e le Atua Noa mai le Lolo tele na faaumatia ai le tupulaga amioleaga o ona aso, sa faagaeetia o ia ma “ua ia fai aʻi taulaga mu i le fata” ia Ieova. (Kenese 8:20) Ona o folafolaga ma faamanuiaga a le Atua, e tele taimi sa faagaeetia ai Aperaamo le auauna faamaoni a le Atua ma o lana uō foʻi, ina ia ‘faia ai lea o le fata faitaulaga ma valaau atu i le suafa o Ieova.’ (Kenese 12:8; 13:3, 4, 18) Mulimuli ane, sa fetaiaʻi Aperaamo ma le tofotofoga sili ona faigatā o lona faatuatua ina ua faatonuina o ia e Ieova e ofo atu lona atalii o Isaako e fai ai le taulaga mu. (Kenese 22:1-14) O nei tala, e ui ina pupuu, ae tele se malamalamaga ua faapupula mai ai i le mataupu o taulaga, e pei o lea o le a tatou vaai i ai.

3. O le ā le matafaioi a taulaga e faia i le tapuaʻiga?

³ Mai nei tala ma isi foʻi tala a le Tusi Paia, ua manino mai ai e faapea, o le ofoina o se ituaiga o taulaga ua leva lava ona avea ma vaega faavae o le tapuaʻiga a o leʻi aumaia e Ieova tulafono patino e faatatau i ai. I le ōgatusa ma lena manatu, ua faamatala ai e se tasi tusitusiga le “taulaga” e faapea, o “se sauniga faalotu e ofo atu ai se mea i se atua ina ia mafai ona faavaeina, faatumauina, pe toe faafoʻisia se faiā lelei a le tagata ma lē o loo manatu i ai e paia.” Ae o lenei mea ua lāgā ai ni fesili tāua ua talafeagai ona tatou iloiloina ma le faaeteete, e pei o le: Aiseā e manaʻomia ai taulaga i le tapuaʻiga? O ā ituaiga o taulaga e taliaina e le Atua? Ma o le ā le uiga o taulaga anamua mo i tatou i aso nei?

Aiseā e Manaʻomia ai Taulaga?

4. O le ā le iʻuga na oo ia Atamu ma Eva ina ua la agasala?

⁴ Ina ua agasala Atamu, sa ia faia ma le loto i ai.  O lona aveina ma le ʻaina o le fua mai le laau e iloa ai le lelei ma le leaga, o se gaoioiga ma le loto i ai o le lē usiusitai. O le faasalaga mo lena gaoioiga lē usiusitai o le oti lea, e pei ona sa fetalai manino mai ai le Atua: “O le aso e te ʻai ai e te oti ai lava.” (Kenese 2:17) Mulimuli ane, na selesele ai e Atamu ma Eva totogi o le agasala—sa feoti i laʻua.—Kenese 3:19; 5:3-5.

5. Aiseā na tausolomua ai Ieova e gaoioi mo se lelei o fanau a Atamu, ma o le ā na Ia faia mo i latou?

⁵ Ae faapefea i fanau a Atamu? Talu ai ua tuufaasolo mai ia i latou le agasala ma le lē lelei atoatoa mai ia Atamu, ua oo ai foʻi ia i latou lena lava faaesea mai le Atua, le leai o se faamoemoe, ma le oti lea na oo i le uluaʻi ulugalii faaletagata. (Roma 5:14) Peitaʻi ane, o Ieova e lē gata o ia o le Atua o le faamasinotonu ma le malosi ae—o le mea moni foʻi, i le tulaga autū—o le alofa. (1 Ioane 4:8, 16) O lea ua tausolomua ai o ia i le toe faaleleia o le faalētonu na iai. Ina ua uma ona taʻua faapea “o le oti, o le totogi lea o le agasala,” ona faapea atili mai lea o le Tusi Paia, “a o le ola [e] faavavau, o le mea foaifuaina mai lea e le Atua, i lo tatou Alii o Keriso Iesu.”—Roma 6:23.

6. O le ā le finagalo o Ieova e tusa ai o mea ua faaleagaina ona o le agasala a Atamu?

⁶ O le mea na mulimuli ane faia e Ieova le Atua ina ia faamautinoa ai le mauaina o lena meaalofa, o le saunia lea o se mea o le a suia ai le mea na leiloa ona o le agasala a Atamu. I le gagana Eperu, o le upu ka·pharʹ sa faauiga muamua i le “ufiufi” pe i le “tafiesea,” ma ua faaliliuina foʻi i le “togisala.” * I se isi faaupuga, na saunia e Ieova se auala talafeagai e ufiufi ai le agasala lea na tuufaasolo mai ia Atamu ma tafiesea mea ua faaleagaina ai ina ia mafai e i latou e agavaa mo le mauaina o lena meaalofa ona saʻoloto mai le faamalaiaina i le agasala ma le oti.—Roma 8:21.

7. (a) O le ā le faamoemoega na saunia e ala mai i le faasalaga a le Atua ia Satani? (e) O le ā le tau e ao ona totogia mo le tuusaʻolotoina o tagata mai le agasala ma le oti?

⁷ O le faamoemoe o le tuusaʻoloto mai le faapologaina i le agasala ma le oti, sa tau ataata mai i le taimi lava na agasala ai le uluaʻi ulugalii faaletagata. I le faasilasilaina atu o lana faasalaga mo Satani, o lē na faaatagia mai e le gata, na fetalai ai Ieova: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:15) E ala i lena faamatalaga faavaloaga, na susulu mai ai se faamoemoega mo i latou uma o le a faatuatua atu i lena folafolaga. Ae peitaʻi, e iai se tau e ao ona totogia mo lena tuusaʻolotoina. O le a oo mai le Fanau folafolaina, e lē mo na o le faaumatiaina o Satani; ae e ao ona tuʻimomomoina le mulivae o le Fanau, o lona uiga, e ao ona oti, e ui o le a lē tumau ai.

8. (a) Na faapefea ona iʻu ina avea Kaino ma lē taulau? (e) Aiseā na talia ai i le silafaga a le Atua le taulaga a Apelu?

⁸ E mautinoa lava sa matuā mafaufau loloto Atamu ma Eva i le po o ai o le a avea ma le Fanau folafolaina. Ina ua fanau e Eva lana tama ulumatua, o Kaino, sa ia faalauiloa ai: “Ua ou maua le tagata mai ia Ieova.” (Kenese 4:1) Pe na ia manatu ea atonu o lana tama lea o le a avea ma le Fanau? Pe na ia manatu faapena pe leai, ae na faamaonia le avea o Kaino, faapea foʻi ē na tupuga mai ia te ia, ma lē taulau. Ae i le isi itu, sa faaalia e lona uso o Apelu le faatuatua i le folafolaga a le Atua ma uunaʻia ai o ia e ofoina atu ni uluaʻi tama o lana lafu e fai ma taulaga ia Ieova. Tatou te faitau e faapea: “O le faatuatua na avatu ai e Apelu i le Atua le taulaga e sili ona lelei i lo Kaino; ona o lea ua taʻua ai o ia ua amiotonu.”—Eperu 11:4.

9. (a) O le ā sa faatuatua i ai Apelu, ma na faapefea ona ia faaalia mai? (e) O le ā na faataulauina e le taulaga a Apelu?

⁹ Sa leʻi ia Apelu le faatuatua lea e tau lava ina talitonu o loo iai se Atua, lea atonu sa iai foʻi ia Kaino. Sa faatuatua Apelu i le folafolaga a le Atua i se Fanau o le a aumaia le faaolataga i tagata faatuatua. Sa leʻi faaalia atu ia te ia le auala o le a faataunuu ai lena mea, peitaʻi o le folafolaga a le Atua na iloa ai e Apelu o le a iai se tasi e tuʻimomomoina le mulivae. Ioe, e foliga mai sa ia iloa e tatau ona  faamaligiina le toto—o le fuafuaga tonu lava lena o le taulaga. Sa ofoina e Apelu se meaalofa o loo i ai le ola ma le toto i le Puna o le ola, e foliga mai o se faailoaga o lona faanaunauga loloto ma lona faatalitalia o le faataunuuga o le folafolaga a Ieova. O lenei faailoaga o le faatuatua na māfua ai ona finagalo malie Ieova i le taulaga a Apelu, ma i se tulaga faatapulaa, sa faaalia ai le uiga moni o le taulaga—o se auala e mafai ai e tagata agasala ona faalatalata atu i le Atua ina ia maua mai lona finagalo malie.—Kenese 4:4; Eperu 11:1, 6.

10. Na faapefea ona manino mai le uiga o le taulaga ina ua tāpā e Ieova Aperaamo e ofoina atu Isaako?

¹⁰ O le uiga loloto o le taulaga sa matuā manino mai ina ua poloaʻi Ieova ia Aperaamo e ofoina atu lona atalii o Isaako e fai ma taulaga mu. E ui lava sa leʻi faataunuuina moni lena taulaga, ae na avea o se ata o le mea o le a iʻu ina fai e Ieova lava ia—e ofoina atu lona Alo pele e toʻatasi e fai ma taulaga silisili i taulaga uma, ina ia faataunuu ai Lona finagalo mo le fanau a tagata. (Ioane 3:16) I taulaga ma meaalofa na faia i le Tulafono Faa-Mose, sa faataatia ai e Ieova ni faatulagaga faavaloaga e aʻoaʻoina ai ona tagata filifilia i mea e ao ona latou fai ina ia maua le faamagaloga mo a latou agasala ma faamausalīina ai lo latou faamoemoe mo le faaolataga. O le ā se lesona tatou te aʻoaʻoina mai nei mea?

Taulaga e Taliaina e Ieova

11. O ā vasega e lua o taulaga o meaalofa na tuuina atu e le ositaulaga sili a Isaraelu, ma mo ā fuafuaga?

¹¹ Ua taʻua e le aposetolo o Paulo e faapea: “Ua tofia ositaulaga sili uma ina ia ositaulaga i mea alofa ma taulaga.” (Eperu 8:3) Seʻi mātau mai, ua vaevaeina e Paulo taulaga sa faia e le ositaulaga sili o Isaraelu anamua i vasega se lua, o “mea alofa” ma “taulaga,” po o “taulaga mo agasala.” (Eperu 5:1) E masani ona aumai e tagata meaalofa e faailoa mai ai o latou lagona māfana ma le talisapaia, aemaise foʻi ina ia ati aʻe ai se faigauō, se faiā lelei, po o le taliaina. (Kenese 32:20; Faataoto 18:16) I se tulaga talitutusa, e tele taulaga o loo faamatalaina i le Tulafono e mafai ona vaai i ai o ni “mea alofa” e ofo atu i le Atua ina ia maua mai ai lana faamaoniga ma lona finagalo malie. * O agasala o le Tulafono sa manaʻomia ai se toe faafoʻisiaga, ma ina ia toe faaleleia, sa ofoina ai “taulaga mo agasala.” I le Penetatuka, aemaise lava i tusi o Esoto, Levitiko, ma le Numera, o loo faamatalaina ai le anoanoaʻi o faamatalaga e faatatau i ituaiga eseese o taulaga ma meaalofa. E ui ina mafai ona avea o se matuā luʻi mo i tatou le taumafai e malamalama ma manatua uma auʻiliʻiliga, ae e iai ni manatu autū e faatatau i ituaiga eseese o taulaga e lelei ona tatou uaʻi atu i ai.

12. O gafea i le Tusi Paia e mafai ona tatou maua i ai se aotelega o faiga taulaga, po o taulaga o meaalofa, sa faia i lalo o le Tulafono?

¹² Atonu tatou te mātauina faapea i le Levitiko mataupu 1 e oo i le 7, e lima ituaiga autū o taulaga—taulaga mu, taulaga o mea e ʻai, taulaga faafetai, taulaga mo agasala, ma taulaga mo measesē—o loo faamatala taʻitasitasi mai ai, e ui lava o nisi o na taulaga sa tuufaatasi le faiga. Tatou te mātauina ai foʻi o nei taulaga o meaalofa e faalua ona faamatalaina mai i nei mataupu, ae i ni fuafuaga eseese: muamua, i le Levitiko 1:2 e oo i le 6:7, o loo auʻiliʻili mai ai po o ā mea sa tatau ona ofoina atu i luga o le fata faitaulaga, ma le lona lua, i le Levitiko 6:8 e oo i le 7:36, o loo faaalia ai vaega sa faataatitia ese mo ositaulaga ma vaega sa tuu ese mo le tagata na ofoina le taulaga. Ae i le Numera mataupu e 28 ma le 29, tatou te faitauina ai iinā se mea sa ono manatu i ai o se faatulagaga auʻiliʻili i le taimi, o loo  otooto mai ai po o ā taulaga sa tatau ona ofoina i aso taʻitasi, i vaiaso taʻitasi, i masina taʻitasi, ma i taimi o tausamiga faaletausaga.

13. Faamatala mai taulaga o meaalofa sa tauofoina atu e fai ma foaʻi i le Atua.

¹³ Mai taulaga o meaalofa sa ofoina atu o ni foaʻi pe o se auala e faalatalata atu ai i le Atua ina ia maua lona finagalo malie, sa aofia ai taulaga mu, o taulaga o mea e ʻai, ma taulaga o faafetai. E taofi nisi tagata atamamai faapitoa e faapea o le faaupuga Eperu mo le “taulaga mu” o lona uiga “o se taulaga e alu aʻe.” Ua fetaui lenei taʻu auā pe a fai le taulaga mu, sa susunu ai i luga o le fata faitaulaga le manu lea na fasi, ma o le manogi lelei mai lena manu ua susunuina sa alu aʻe i le lagi e agaʻi atu i le Atua. O le vala sili ona mataʻina o le taulaga mu o le taimi lea pe a uma ona sausauina faataamilo le fata faitaulaga i le toto o le manu o loo faia ai le taulaga, ona faaaogā atoa loa lea o le manu e ofo atu ai le taulaga i le Atua. “Ona susunuina ai lea atoa uma e le faitaulaga i luga o le fata faitaulaga, o le taulaga mu lea, o le taulaga e fai i le afi, o le mea manogi lelei ia Ieova.”—Levitiko 1:3, 4, 9; Kenese 8:21.

14. Sa faapefea ona ofoina le taulaga o mea e ʻai?

¹⁴ O le taulaga o mea e ʻai o loo faamatalaina mai i le Levitiko mataupu e 2. O se taulaga tauofo sa aofia ai le faaaogāina o le falaoamata lelei, e masani ona faasūsū i se suāuu, ona faaopoopo lea i ai ma le pulu lipano. “Na te [ositaulaga] luluu mai ai se luutaga a le falaoa atoa ma le suāuu, ma le pulu lipano uma lava, ona susunu ai lea e le faitaulaga lona faamanatuga i le fata faitaulaga, o le taulaga lea e fai i le afi, o le mea manogi lelei ia Ieova.” (Levitiko 2:2) O le pulu lipano o se tasi o mea sa manaʻomia ona tuu i le mea manogi paia lea sa susunu i luga o le fata faitaulaga o mea manogi i totonu o le fale fetafaʻi ma le malumalu. (Esoto 30:34-36) E foliga mai o le mea lena sa mafaufau i ai le tupu o Tavita ina ua ia faapea mai: “Ia saunia laʻu tatalo e faapei o le mea manogi e mu i ou luma; o le sii i luga o oʻu lima ia pei o le taulaga e fai i le afiafi.”—Salamo 141:2.

15. O le ā le fuafuaga o le taulaga faafetai?

¹⁵ O le isi taulaga tauofo, o le taulaga faafetai, lea e faamatalaina i le Levitiko mataupu e 3. O le igoa o le taulaga e mafai foʻi ona faaliliuina i “le taulaga  o le filemu.” I le gagana Eperu, o le upu “filemu” e tele atu nisi mea e faasino i ai na i lo le na ona saʻoloto mai taua po o faafitauli. “I le Tusi Paia, o loo faasino atu i le uiga lenei, ma o loo taʻua ai foʻi le tulaga po o le faiā filemu ma le Atua, le sologa lelei, le olioli, ma le fiafia,” o se faamatalaga lea a le tusi, Studies in the Mosaic Institutions. O lea, na ofoina ai taulaga o faafetai, e lē ina ia maua ai se filemu ma le Atua, e peiseai ina ia faamālū ai lona finagalo, ae ina ia faaali atu ai le agaga faafetai pe ina ia faamanatu le tulaga faamanuiaina o le filemu ma le Atua lea na mauaina e i latou o ē sa ia finagalo malie i ai. Pe a uma ona ofoina atu ia Ieova le toto ma le gaʻo o le taulaga, ona ʻaina lea e ositaulaga ma lē ana le taulaga le aano o le manu na osi ai le taulaga. (Levitiko 3:17; 7:16-21; 19:5-8) I se uiga matagofie ma faafaatusa, sa peiseai ai o loo talisua faatasi lē ana le taulaga, o ositaulaga, ma Ieova le Atua i se taumafataga, e faailoga ai le faiā filemu lea sa iai i lo latou va.

16. (a) O le ā le fuafuaga o taulaga mo agasala ma taulaga mo measesē? (e) Na faapefea ona ese na taulaga mai le taulaga mu?

¹⁶ O taulaga na ofoina mo le saʻilia o le faamagaloga mo agasala pe ina ia totogi ai agasala i le Tulafono sa aofia ai taulaga mo agasala ma taulaga mo measesē. E ui o nei taulaga sa susunuina foʻi i luga o le fata faitaulaga, ae sa ese mai le taulaga mu lea sa lē ofoina atu ai le manu atoa i le Atua, ae sa na o lona gaʻo ma nisi o ona vaega. O le isi uma vaega o le manu sa tiaʻi i tua atu o le togālauapi pe i nisi taimi sa faaaogā e ositaulaga. E matuā uigā lava lenei eseesega. Sa ofoina atu le taulaga mu e fai ma meaalofa i le Atua ina ia mafai ai ona faalatalata atu ia te ia, o lea sa ofoina atu ai atoatoa i le Atua ma mo na o ia lava. Seʻi mātau foʻi, a o leʻi ofoina le taulaga mu, sa masani lava ona ofoina muamua le taulaga mo agasala po o le taulaga mo measesē, e taʻu mai ai ina ia taliaina e le Atua le meaalofa a le tagata agasala, sa manaʻomia se faamagaloga o agasala.—Levitiko 8:14, 18; 9:2, 3; 16:3, 5.

17, 18. Mo le ā na saunia ai le taulaga mo agasala, ma o le ā le fuafuaga o taulaga mo measesē?

¹⁷ E na o se agasala i le Tulafono sa faia ma le leʻi fuafuaina, o se agasala na faia ona o vaivaiga o le tino, e faatoʻā taliaina ai se taulaga mo agasala. “A agasala se tasi ma le sese i se tasi poloaiga a Ieova i mea e le tusa ona faia,” ona tatau lea i lē ua agasala ona ofo atu le taulaga mo agasala e faatatau i lona tulaga, i totonu o le nuu. (Levitiko 4:2, 3, 22, 27) Ae i le isi itu, o tagata agasala sa lē salamō na fasiotia; sa leʻi iai ni taulaga na fuafuaina mo i latou.—Esoto 21:12-15; Levitiko 17:10; 20:2, 6, 10; Numera 15:30; Eperu 2:2.

¹⁸ Ua faamanino mai i le Levitiko mataupu e 5 ma le 6, le uiga ma le fuafuaga o le taulaga mo measesē. Atonu e faia e se tagata se agasala ma lona leʻi loto i ai. E ui i lea, o lana measesē na fai atonu ua avea o se agasala faasaga i aiā tatau a isi ona uso a tagata po o Ieova le Atua, ma sa tatau la ona toe faaleleia pe toe faasaʻo lena sesē ua fai. E tele ni vasega o agasala ua taʻua. O nisi agasala e patino i le tagata lava ia (Le 5:2-6), o nisi o agasala i “mea paia a Ieova” (Le 5:14-16), ma nisi, e ui sa leʻi faia ma le matuā lē iloa lelei, ae o ni agasala ua faia ona o tuʻinanauga sesē po o vaivaiga o le tino (Le 6:1-3). E lē gata la ina taʻutino na agasala, ae sa manaʻomia foʻi i lē ua agasala ona ia faia se taui sa manaʻomia ma ia ofo atu ia Ieova o se taulaga mo measesē.—Levitiko 6:4-7.

Se Mea e Sili Atu Ona Lelei o Fotuaʻi Mai

19. E ui sa ia i latou le Tulafono ma ona taulaga, ae aiseā na lē taulau ai ona mauaina e Isaraelu le finagalo malie o le Atua?

¹⁹ O le Tulafono Faa-Mose, ma le tele o ana taulaga ma meaalofa, sa tuuina i le fanauga a Isaraelu ina ia mafai ai ona latou faalatalata atu i le Atua ina ia mauaina ma faatumauina lona finagalo malie ma ana faamanuiaga seʻia taunuu mai le Fanau folafolaina. O le faamatalaina lenei e le aposetolo o  Paulo, o ia o se Iutaia moni: “Ua fai mo tatou taʻitaʻitama le tulafono, na te taʻitaʻiina i tatou ia Keriso, ina ia taʻuamiotonuina i tatou i le faatuatua.” (Kalatia 3:24) E faanoanoa lava, ona sa leʻi tali atu Isaraelu i lo latou tulaga o se nuu, i lena faatulagaga tau puipuiga, ae sa latou melea lena faaeaga. O le iʻuga, o le anoanoaʻi o a latou taulaga sa avea o se mea inosia ia Ieova, o lē na fetalai mai: “Ua ou fiu i taulaga mu e fai i mamoe poa, ma le gaʻo o manu pepeti; ou te le fiafia lava i toto o povi poa taanoa, ma tamai mamoe, atoa ma ʻoti poa.”—Isaia 1:11.

20. O le ā na tupu i le 70 T.A. e tusa ai o le Tulafono ma ona taulaga?

²⁰ I le 70 T.A., na faamuta ai le faiga o mea faa-Iutaia, faatasi ai ma lona malumalu ma lana faiva faaositaulaga. Ina ua mavae lena, sa lē toe mafai ona faia ni taulaga i le faiga lea sa faatulaga mai ai e le Tulafono. Po o le uiga ea o lenei mea ua matuā lē toe iai lava se aogā o taulaga mo tagata tapuaʻi o le Atua i aso nei, e pei ona sa avea ai ma vaega autū o le Tulafono? O le a tatou iloiloina lenei fesili i le mataupu o loo sosoo mai.

[Faamatalaga pito i lalo]

Pe Mafai Ona E Faamatala?

• O le ā na uunaʻia ai tane faatuatua anamua e ofoina atu taulaga ia Ieova?

• Aiseā na manaʻomia ai taulaga?

• O ā ituaiga autū o taulaga na ofoina atu i le taimi o le Tulafono, ma o ā a latou fuafuaga?

• E tusa ai ma manatu o Paulo, o le ā le fuafuaga autū na faia ai le Tulafono ma taulaga?

[Fesili mo le Suʻesuʻega]

[Ata i le itulau 14]

Sa taliaina le taulaga a Apelu talu ai sa faataʻitaʻia mai ai lona faatuatua i le folafolaga a Ieova

[Ata i le itulau 15]

Pe e te talisapaia ea le uiga tāua o lenei vaaiga?