Talaaga o le Soifuaga

E Tauia Pea Lava e Ieova Ana Auauna Faamaoni

UA FAAMATALAINA E VERNON DUNCOMBE

Ua uma laʻu ʻaiga māmā o le afiafi pō ma ua tutu foʻi lau sikareti e pei ona masani ai. Ona ou fesili atu lea i laʻu avā o Aileen: “E ā mai le sauniga i lenei pō?”

NA IA faatali laʻitiiti ona faapea mai lea: “Sa faalauina se lisi o loo faasilasila mai ai tofiga fou, ma sa taʻua ai ma lou igoa. Ua tofia oe e avea ma auauna e vaaia mea faaleotele leo. Ua faapea mai le fuaiupu mulimuli i le tusi: ‘Afai o iai se tasi o nei uso ua faatoʻā uma ona tofia o loo ia faaaogāina le tapaa, e fautuaina ina ia tusi atu i le Sosaiete ina ia faapea atu latou te lē mafaia ona taliaina le tofiga.’” * Na faatosotosololoa laʻu tali atu ma le mautinoa, “A-a-a! Ia, o le mea la lena o loo fai mai ai.”

Na ū oʻu nifo ma ou tago atu ua matuā oomi i lalo le sikareti i le talefulefu sa i oʻu autafa ma vivili ina ia pē. “Ou te lē iloa le māfuaaga ua filifilia ai aʻu i lenei tofiga. Ae ou te leʻi teena lava se tofiga i lenei taimi, ma ou te lē o mafaufau foʻi e faia faapea.” Na faia ai loa laʻu faaiʻuga ou te lē toe ulaula lava. O lena faaiʻuga na matuā aafia ai lava loʻu olaga o se Kerisiano ma o se fai musika. Seʻi oʻu taʻu atu nisi o mea na tutupu e taʻitaʻia atu ai i laʻu faaiʻuga na faia.

Le Olaga Faaleaiga i le Amataga

Fanau i Toronto, i Kanata, ia Setema 21, 1914, o aʻu o le tama ulumatua a mātua agaalofa ma le galulue mamafa o Vernon ma Lila, o ē na maua lo la aiga e toʻafā tama ma teine e toʻalua. O le isi e sosoo mai ia te aʻu le matua o Yorke, sosoo ai ma Orlando, Douglas, Aileen, ma Coral. Ina ua faatoʻā iva oʻu tausaga, na tuuina mai ai e tinā ia te aʻu se vaiolini ma na ia faia se fuafuaga ina ia faia saʻu aʻoga musika i le Harris School of Music. Sa faalētonu le tulaga tau tamaoaiga, peitaʻi na maua lava e Tinā ma Tamā auala e totogi ai oʻu pasese mo femalagaaʻiga ma le pili o le aʻoga. Mulimuli ane na ou suʻesuʻeina  ai nisi o faamatalaga moni e uiga i musika ma lona faatulagaga i le Royal Conservatory of Music i Toronto, ma i le 12 o oʻu tausaga, na ou auai atu ai i se tauvaga na maimoa ai le toʻatele o tagata o le aai i le Massey Hall, le fale e maimoa ai i musika e sili ona lauiloa i le taulaga. Na filifilia aʻu i le manumalo ma tuuina mai ai ia te aʻu se vaiolini matagofie e faia i le paʻu o le alligator lona ato.

Ina ua mavae lena, na ou aʻoaʻoina ai foʻi le tāina o le piano faapea ma le selo. E masani lava ona tātā la matou vaega i pātī laiti i afiafi o Aso Faraile ma Aso Toonai ma siva a tamaiti aʻoga. O se tasi o nei siva na ma feiloaʻi ai ma Aileen. A o faagasolo loʻu tausaga mulimuli i le aʻoga, na matou tātā faatasi ai ma le tele o faaili mai le aai atoa. Ina ua mavae loʻu faauuga na valaaulia ai loa aʻu i le Ferde Mowry Orchestra, ma na faamaonia le avea ma galuega lelei ma le mautū seʻi oo mai i le 1943.

Ua Oo Ina Iloa Ieova

O le taimi muamua na faatoʻā iloa ai e oʻu mātua le upu moni o le Tusi Paia a o toeitiiti lava gāpā mai le Taua Muamua a le Lalolagi, a o galue Tamā o sē teuina faamalama o se tasi faleoloa telē i le taulaga i Toronto. I le potuʻai, e faalogologo atu ai o ia i talanoaga a ni tagata faigaluega se toʻalua o ni Tagata Aʻoga o le Tusi Paia (e pei ona lauiloa ai Molimau a Ieova i lena taimi), ona faapea lea ona ia faasoa atu mea na ia faalogo i ai ia Tinā pe a foʻi mai o ia i le fale i le afiafi. I nisi o tausaga mulimuli ane, i le 1927, na faia ai e Tagata Aʻoga o le Tusi Paia se tauaofiaga mataʻina i Toronto i le Fale Taalo tele i le Canadian National Exhibition Grounds. O lo matou fale, e lua poloka e va ai ma le faitotoʻa i le itu sisifo o le malae, sa faaaogāina e nonofo ai sui usufono e toʻa 25 mai Ohio, i le Iunaite Setete o Amerika.

Ina ua mavae lena, o se tasi o Tagata Aʻoga o le Tusi Paia, o Ada Bletsoe, na amata ona ia faia pea lava pea ni asiasiga ia Tinā, ma tuu ai ia te ia ni lomiga fou. I se tasi aso na ia faapea atu ai: “Lau susuga i le faletua o Duncombe, ua fai sina leva o oʻu tuua mekasini fou ia te oe. Pe na e faitauina ea se tasi o na lomiga?” E ui sa ia tausia ni tamaiti se toʻaono, ae na faia e Tinā se faaiʻuga i lena lava aso ma faasolo mai ai lava ona ia amata ona faitau i mekasini, ma na te leʻi tuua lava. Peitaʻi, ou te leʻi ano tele i lomiga. Sa ou tauivi ina ia faauu mai le aʻoga, ma sa ou matuā pisi lava foʻi i mea tau musika.

Ia Iuni i le 1935, na ma faaipoipo ai ma Aileen i le lotu Egelani. Talu ai na ou tuua le United Church ina o 13 oʻu tausaga, ma sa leai lava se isi lotu na iai soʻu piitaga; o lea na ou sainia ai le pepa lesitala o faaipoipoga faapea o aʻu o se Molimau a Ieova, e ui ou te leʻi avea ma Molimau i lena taimi.

Sa ma tulimataʻia le tausia aʻe o se aiga i se taimi i le lumanaʻi ma se faanaunauga ina ia avea o ni mātua lelei. O lea, na amata ai ona ma faitauina faatasi le Feagaiga Fou. Peitaʻi e ui lava i o ma faanaunauga lelei, ae e iai lava isi mea na faalavelave mai. Sa ma toe taumafai mulimuli ane e faitau faatasi ae o iʻuga lava na sa tulaʻi mai. O lea i le Kirisimasi i le 1935, na ma maua ai se tusi na afīfī faameaalofa mai e faamatuaina The Harp of God. Na faapea mai laʻu avā: “Oka, e fou lenei ituaiga o meaalofa o le Kirisimasi ua auina mai e lou tinā ia i taʻua.” E ui i lea, ina ua ou alu i le galuega, na ia amata ai ona faitauina, ma sa fiafia o ia i mea na ia faitau i ai. Ua mavae sina vaitaimi, ou te leʻi iloa lava se mea e faatatau i le tusi. E tusa ai o lo ma faamoemoega ina ia tausia aʻe se aiga, sa leʻi taulau. O le ma pepe teine, na fanau ia Fepuari 1, 1937, e leʻi ola. Pagā le matuitui o le faanoanoa na ma oo i ai!

O le taimi lea o loo faia ai ma le maelega se sao o lo matou aiga i le galuega talaʻi, ma na ou iloa e na o Tamā lava le tagata talaʻi o le Malo i lo matou aiga e leʻi maua lava sana tusiga mo le mekasini o le Consolation (o le Ala Mai! i le taimi nei). Sa avea lena ma sini o le faiva i le fanua i lena masina. E ui lava e oo ane i le taimi lea ou te leʻi faitauina lava ma se lomiga a le Sosaiete, sa ou lagona le faanoanoa mo ia ma ou faapea atu: “Ua lelei, Tamā, ia saini mai loa la le tusiga mo aʻu; ona tutusa ai lava lea o oe ma isi tagata talaʻi.” Ua oo mai le taumāfanafana, ma ua see atu nei le ʻaufaaili i le aai e faafiafia ai i se mataaga. Sa maua mai le Consolation i le meli. Ua oo mai le tau e afu ai mea, ma ua toe foʻi mai le ʻaufaaili i Toronto. O loo faaauau pea ona sau le mekasini i lo ma tuatusi fou, ma ou te leʻi tatalaina lava se mekasini mai lona pepa o loo afīfī ai.

A o faagasolo se tasi o mālōlōga o le Kirisimasi, na ou tilotilo atu ai i le faaputuga o mekasini ma ou faapea ifo ai afai na ou totogia nei mekasini, e tatau lava la ona ou faitauina tau lava o nisi o na lomiga seʻi vaai po o le ā le mea o loo fai mai ai. O le mekasini muamua lava na ou tatalaina na faateʻia ai aʻu. O se faalauiloaga o se taupulepulega ma ni faiga piʻopiʻo faapolotiki i lena taimi. Na amata ona ou talanoa i aʻu uō fai musika e uiga i mea na ou  faitau ai. Peitaʻi, na latou teena le moni o mea na ou fai atu ai, ma o lea sa ou faaauau ai lava ona faitau ina ia mafai ona ou mautali mo aʻu lava. O lea mea ou te leʻi iloaina, o lea ua amata ona ou molimau e uiga ia Ieova. Ma talu mai lena taimi, ou te leʻi tuua ai lava le faitauina o lomiga faale-Tusi Paia matagofie a “le auauna faamaoni ma le mafaufau.”—Mataio 24:45.

E ui lava e fai si oʻu pisi i le galuega a o faagasolo le vaiaso, ae e leʻi umi lava ae ma auai ma Aileen i sauniga i Aso Sa. I le 1938, ina ua ma taunuu atu i le sauniga i se tasi Aso Sa, na faafeiloaʻia ai i maʻua e ni tuafāfine matutua se toʻalua, ma na fai mai le tasi tuafafine: “Uso talavou, pe ua e tū atu ea mo Ieova i lenei taimi? E te iloa, ua i faitotoʻa Amaketo!” Na ou iloa o Ieova ua na o ia le Atua moni, ma na ou mautinoa o lana faalapotopotoga lenei. Sa ou manaʻo ina ia avea aʻu ma se tasi o lea faalapotopotoga, o lea ia Oketopa 15, 1938, na ou papatiso ai loa. Na papatiso Aileen pe ā o le ono masina mulimuli ane ai. Ou te fiafia e faapea atu o tagata uma lava o lo matou aiga o ni auauna tuutoina atu a Ieova.

Maʻeu le faagaeetia ua ou oo i ai ona o le auaumea faatasi ma tagata o le Atua! E leʻi umi, ae ou lagona ua pei lava o loʻu aiga moni le iai faatasi ma i latou. Pe a lē mafai ona ou auai atu, e masani lava ona ou matuā naunau lava i le fia iloa po o ā mea na tutupu i sauniga. O le afiafi faapitoa lava lea na taʻua i le amataga, na faamaonia le avea o se tai liliu i laʻu auaunaga ia Ieova.

Se Taimi o Suiga Tetele mo i Maʻua

O se tasi suiga mataʻina mo i maʻua na tupu ia Me 1, 1943. Na ma auai ai i le ma uluaʻi tauaofiaga tele, le Fonotaga Faatiokarate o Le Lalolagi Fou o Setema 1942 (New World Theocratic Assembly) i Cleveland, i Ohio. Iinā, i le ogatotonugalemu o se taua mataʻutia, se taua sa leʻi iloa sona iʻuga, na matou faalogo atu ai i le uso o Knorr, le peresitene o le Sosaiete o le Olo Matamata i lena taimi, o tauaaoina mai ma le aasa le lauga i le lautele na faamatuaina, “Filemu—Pe Mafai Ona Tumau?” Ma te manatua pea le auala na ia faasino mai ai, mai le Faaaliga mataupu e 17, faapea o le a iai se vaitaimi o le filemu pe a mavae le taua lea o le a faataunuuina ai le galuega talaʻi sili atu ona telē.

O le mea e pito sili ona tosina ai i maʻua o se lauga na muamua atu a le uso o Knorr, “Iefata ma Lana Tautoga.” Na aumaia ai i lena taimi se talosaga mo nisi paeonia! Na ou tilotilo atu ia Aileen ua ia tilotilo mai foʻi ia te aʻu ma ma faapea atu faatasi (ma le isi toʻatele i lena taimi): “O i matou lena!” O le taimi lava lea na amata ai loa ona faia a ma fuafuaga ina ia agaʻi atu i se isi galuega tāua.

Sa iai se faasasaga i le galuega a Molimau a Ieova i Kanata talu mai Iulai 4, 1940. Ina ua amata ona ma paeonia ia Me 1, 1943, sa lē faatulafonoina i lena taimi le molimau atu e faatatau ia Ieova ma le ofoina atu foʻi o lomiga a le Sosaiete i le faiva i le fanua. I le auauna ai o ni Kerisiano, ma te tauaveina ai lava na o a ma kopi totino o le faaliliuga a le Tusi Paia o le King James. Ina ua mavae ni nai aso talu ona ma taunuu i le ma uluaʻi tofiga faapaeonia i Parry Sound, i Ontario, ae auina atu loa e le ofisa o le lālā ia Stewart Mann, o se paeonia tomai, ina ia matou galulue faatasi i le fanua. Maʻeu se sauniuniga alofa! E ese ma le tausaafia o uiga o le uso o Mann ma e laufofoga fiafia. Sa ma aʻoaʻoina mea mai ia te ia ma sa matagofie le taimi sa matou faatasi ai. E toe tofia mai i maʻua e le Sosaiete i le aai o Hamilton, ae ua fai si tele o suʻesuʻega faale-Tusi Paia o loo ma faia. E leʻi umi lava talu ona mavae lena, e ui ina ua ou pāsia tausaga faatulagaina mo le vaegaʻau, ae sa faamalosia aʻu ou te alu atu. O loʻu teena o le auai atu i le vaegaʻau na iʻu ai i le lokaina o aʻu ia Tesema 31, 1943. Ina ua māeʻa ona taulimaina taualumaga faalefaamasinoga, na faasalaina ai aʻu i le nofoaga e taofia ai i latou e mumusu e auai i le taua, lea sa ou nofo ai pea seʻia oo ia Aokuso 1945.

Ina ua toe tatalaina aʻu i tua na ma mauaina ai ma Aileen se tofiga faapaeonia lea na ma malaga  atu ai i Cornwall, i Ontario. E leʻi umi lava mulimuli ane ai, ae ma see atu i Quebec faatasi ai ma se tofiga faapitoa i mataupu tau faamasinoga mai le Matagaluega o Tulafono a le Sosaiete. O le vaitaimi lena o loo pulea ai e Duplessis ia Quebec a o sasao faaafi sauāga i Molimau a Ieova. O le tele o aso i vaiaso taʻitasi, ou te alu ai i fale faamasino eseese e fā e fesoasoani i le ʻauuso. O taimi o le faagaeetia ma faamalosia ai le faatuatua.

Na sosoo atu lava i le tauaofiaga i Cleveland i le 1946, le taunuu mai o tofiga mo le galuega matagaluega ma le galuega itumalo lea e ao ai ona ma malaga atu ma laʻu avā mai lea talafatai i le isi talafatai o Kanata. Na vave ona tutupu nei mea. I le 1948 na valaaulia ai i maʻua i le vasega lona 11 a le Aʻoga Faale-Tusi Paia a le Olomatamata o Kiliata. O uso o Albert Schroeder ma Maxwell Friend o nisi ia e toʻalua o o matou faiaʻoga, ma o le matou vasega e toʻa 108 tagata aʻoga e aofia ai ma le toʻa 40 o le vaega faauuina. Faatasi ai ma le toʻatele o auauna a Ieova ua loa ona auauna, sa matuā faaʻoaina ma tauia moni lena taimi!

I se tasi aso na asiasi mai ai le uso o Knorr mai Brooklyn. I lana lauga, na ia valaaulia ai ni tagata tauofo se toʻa 25 ina ia aʻoaʻo le gagana faa-Iapani. Na tauofo uma le toʻa 108! Ona totoe ai lea o le galuega a le peresitene o le filifilia lea po o ai o le a aʻoaʻoina. Ou te manatu na taʻitaʻia e Ieova le filifiliga auā na faataulauina lelei. O le toʻatele o le toʻa 25 na filifilia ma na mulimuli atu tofia ina ia tatalaina le galuega i Iapani o loo iai pea i o latou tofiga—ua matutua, ioe, o loo iai pea iinā. O nisi, e pei o Lloyd ma Melba Barry, na toe malaga atu i isi tofiga. O Lloyd o se tasi o le Vaega Pule seʻia oo i lona maliu i le tausaga ua tuanaʻi. Matou te olioli faatasi ma i latou uma i le taui ua aumaia e Ieova.

Na oo mai le aso o le faauuga, ma na tofia ai i maʻua i Iamaika. Peitaʻi, ona o nisi o faamasinoga e leʻi faataunuuina i Quebec, na faatonuina ai i maʻua e toe foʻi atu i Kanata.

Nisi Musika e Sili Atu

E ui ina ou tuua musika ona o le auaunaga paeonia, ae foliga mai e leʻi tuua aʻu e musika. I le tausaga na sosoo ai na malaga ane ai i le malae o le Maple Leaf Gardens, i Toronto, le peresitene o le Sosaiete, Nathan Knorr, ma lana failautusi o Milton Henschel. O le lauga a le uso o Knorr na faamatuaina “Ua Latalata Mai na i lo le Mea o Loo e Manatu i Ai!” na matuā faagaeetia ai ē uma na auai. Mo le taimi muamua, na valaaulia ai aʻu ou te vaaia le ʻaufaaili mo le tauaofiaga. Na matou saunia ni musika uosi e faaaogā ai nisi o pese lauiloa i le Kingdom Service Song Book (1944). E foliga mai na fiafia i ai uso. Ina ua faaiʻuina le polokalame i le aoauli o le Aso Toonaʻi, na matou faataʻitaʻia ai la matou polokalame ua uma ona fuafuaina mo le Aso Sa. Na maua atu lava i oʻu siʻu mata le kolosi ane o le uso o Henschel i le malae e agaʻi mai i le itu o loo matou i ai, ma na ou taofia le ʻaufaaili ae seʻi oʻu alu atu e faafeiloaʻi o ia. Na ia fesili mai, “E toʻafia le ʻaufai musika lena ua iai i lau ʻaufaaili i le taimi lenei?” Na ou tali atu, “Afai e ō mai uma, pe tusa ma le 35 le aofaʻi.” Na ia tali mai, “Ia, e faaluaina la le toʻatele o le a e maua i Niu Ioka pe a oo atu i le taumāfanafana o sosoo mai.”

E ui i lea, a o leʻi oo atu i lena taumāfanafana, ae valaaulia loa aʻu i Brooklyn. Ona o nisi o tulaga, na muamua ai lava lē mafai ona ma ō faatasi ma Aileen. E leʻi uma ona fausia i lena taimi le fale fou o le 124 Columbia Heights, o lea sa ou moe ai i le fale muamua sa iai, i se tamaʻi potu faatasi ma ni uso se toʻalua o le vaega faauuina—o le uso matua o Payne ma Karl Klein, o le taimi muamua lea ua ou feiloaʻi atu i ai. Pe sa tumu tele le potu? Ioe. E ui i lea, ae sa lelei lava le matou nonofo faatasi ai. E faapalepale ma onosai uso matutua. Sa ou taumafai lava ia aua neʻi oʻu faalavelave i se tasi! Sa avea o se lesona sili ona tāua mea e mafai e le agaga o le Atua ona faataunuuina. Maʻeu ni faamanuiaga na aumaia ia te aʻu ona o le ma feiloaʻiga ma le galulue faatasi ai ma le uso o Klein! Sa agalelei ma fesoasoani mai pea o ia. Sa lelei lava lo ma galulue ai ma le tumau ona avea ma ni uō vavalalata mo le silia i le 50 tausaga.

Sa avea o se faaeaga mo aʻu le fesoasoani atu i musika o tauaofiaga i le Yankee Stadium i le 1950, 1953, 1955, ma le 1958, ma faapena foʻi le faataunuuina o nisi o tiute tauave mo le ʻaufaaili faatasi ma Al Kavelin i le tauaofiaga o le 1963 lea sa faia i le Rose Bowl i Pasadena, i Kalifonia. I le tauaofiaga i le 1953 i le Yankee Stadium, sa tauaaoina atu ai se polokalame o musika i le Aso Sa a o leʻi faia le lauga i le lautele. Na valaaulia mai e Erich Frost ia le tuafafine e pese i le leo i, o Edith Shemionik (mulimuli ane faaiʻu ia Weigand), o lē na ia usuina le pese na fatuina e Frost o le “Luma, Outou Molimau!” faatasi ma le musika sa tāina atu e la matou ʻaufaaili. Ma na faagaeetia i matou ina ua matou faalogo, i le taimi muamua, i le mālie ma le matagofie o siʻufofoga o o tatou uso ma tuafāfine Aferika. Na aumaia e le misionare o Harry  Arnott se lipine matagofie na puʻeina i Rhodesia i Matū (lea ua taʻua o Zambia i le taimi nei) ina ia matou faalogologo ma fiafia i ai. Na matuā lauloga le fale atoa i leo o pesega.

Le Puʻeina o le Tusi Pese o le 1966

Pe e te manatua le tusi pese faavaa vaivai lanu piniki, “Pepese atu Faatasi ma Musika i o Outou Loto”? Ina ua latalata lava ina faaiʻuina sauniuniga faaiʻu o lenei taumafaiga, na faapea mai ai le uso o Knorr: “O le a tapuʻeina ni a tatou pese. Ou te manaʻo e te faamaopoopoina se tamaʻi faaili, na o ni nai vaiolini lava ma ni nai fagufagu. Ou te lē manaʻo lava e ‘iliina se pu’ a se tasi!” O le a avea le Maota o le Malo o loo i Peteli ma a matou fale puʻe pese, ae sa iai nisi o itu na popole ai e faaaogā iinā. O le ā le mea o le a tupu pe afai e salalau le leo i le puipui e leai ni ie faamalama, o le fola e iai ona maa atofale, ma nofoa e faia i le uʻamea? O ai e mafai ona fesoasoani mai ia i tatou ina ia foʻia lena faafitauli i le leo? Na faapea mai se isi: “O Tommy Mitchell! E galue o ia i Fale Faasalalau a le ABC.” Na matou feiloaʻi ma le uso o Mitchell, o lē na naunau e fesoasoani mai.

Ua oo mai nei le taeao o le Aso Toonai muamua mo le puʻeina o pese, a o faapea ona faailoa atu suafa o fai musika taʻitasi, o se tasi o uso sa ia te ia se ato o se pu toso. Na ou manatua le lapataʻiga a le uso o Knorr: “Ou te lē manaʻo lava e ‘iliina se pu’ a se tasi!” O le ā laʻu mea a fai? Na ou vaavaai atu a o seʻi aʻe e le uso lana pu toso mai lona ato, ua faapipii ona totoga, ma faapea ona faataʻitaʻi ona iliili. O le uso o Tom Mitchell, ma o ana uluaʻi nota sa matuā matagofie. Sa ia iliina le pu toso e pei lava o le leo o se vaiolini! Na ou manatu faapea, ‘e tatau ona tumau le uso lenei!’ E leʻi teena e le uso o Knorr lena fuafuaga.

I lena ʻaufaaili, sa iai se vaega o fai musika lelei o i latou foʻi o ni uso ma tuafāfine agaalofa. Sa leai se isi e maʻaleʻale ona uiga! O le puʻeina o pese o se galuega fitā, ae leai ma se isi na faitio. Ina ua uma le galuega, sa matou fetagisi; ma e tumau pea se lagona malosi o le faaleuō ia i latou sa faia ai se vaega. Sa matou olioli uma i le faaeaga, ma e faafetai ai ia Ieova, ona ua matou faaumaina le galuega.

Isi Faaeaga Tāua Faaopoopo

Ina ua mavae le tele o tausaga, sa faaauau ai pea ona ou olioli i le faiva faataimi atoa. Pe tusa ma le 28 nei tausaga o ma iai i tofiga i galuega matagaluega ma galuega itumalo—sa ma olioli i na tofiga uma. Na sosoo ai lea ma le lima tausaga o oʻu vaavaaia le Maota Fono i Norval i Ontario. O le iai o se fonotaga a matagaluega i faaiʻuga o vaiaso uma faapea ai ma se tauaofiaga itumalo e faia i se isi gagana, e masani lava ona ma pisi ai ma Aileen. I le 1979 seʻia oo i le 1980, na faaaogā ai e le ʻautusiata ma inisinia nisi o fale i le Maota Fono e pei ona latou fuafuaina ai se lālā i le lumanaʻi mo le Sosaiete i le Halton Hills. E sosoo atu i la ma galuega i le Maota Fono, se isi tofiga e faalautele atu ai se sao i le itu tau i musika i Brooklyn, mai le 1982 e oo i le 1984.

Na maliu si aʻu avā faapelepeleina ia Iuni 17, 1994, na o le fitu aso talu ona mavae le faamanatuina o le 59 o tausaga talu ona ma faaipoipo. Ua atoa lelei le 51 o tausaga o ma tuutoina atu faatasi i le auaunaga paeonia.

A o oʻu toe manatu i le tele o mea na tutupu i le olaga, ou te manatua ai le auala na avea ai le Tusi Paia ma taʻiala sili ona tāua. I nisi o taimi, ou te faaaogāina ai le Tusi Paia a Aileen ma ou te maua ai le matuā faafiafiaina i le mātauina o mau sa pāʻia ai lona loto—i fuaiupu atoa, ni faaupuga patino, ma nisi o upu taʻitasi sa ia faailogaina. E pei lava o Aileen, e iai foʻi mau e iai ni o latou uiga faapitoa mo aʻu. O se tasi o vaega o le Salamo lona 137, o loo faamatalaina mai ai lenei tatalo matagofie ia Ieova: “Ia faapea ona ou lē toe mafaia ona tāina le napeli pe afai e galo ia te aʻu oe, Ierusalema! Ia faapea ona ou lē toe mafaia ona pese pe afai ou te lē toe manatuaina oe, pe afai ou te lē toe manatu ia te oe e avea ma oʻu fiafiaga sili!” (Salamo 137:5, 6, Today’s English Version) E ui ou te fiafia i musika, ae o loʻu fiafiaga sili e maua mai le auauna ma le faamaoni ia Ieova, o lē na ia tauia aʻu i se olaga e faamalieina atoatoa.

[Faamatalaga pito i lalo]

[Ata i le itulau 28]

I maʻua ma Aileen i le 1947

[Ata i le itulau 30]

I se tasi o uluaʻi puʻega pese