Lipoti a Ē Faalauiloa le Malo

Faasūsūina Fatu o le Upu Moni i Sili

I LE toafa i le itu i mātū o Sili, atonu e mavae ni tausaga faatoʻā paʻū ai se timu. Ae pe a oo mai le timu, ona liua ai lea o le eleele papa mātūtū i se laufanua ua ufitia atoa i fugalaau eseese felanulanuaʻi. O lenei vaaiga mataʻina e tosina mai ai turisi mai itu uma o le atunuu atoa.

Ae peitaʻi, e iai se isi mea mataʻina e sili atu ona fiafia ai o loo tupu i tagata o Sili. O loo tafe atu ai vai o upu moni o le Tusi Paia i itu uma o le atunuu, ma e toʻatele tagata lotofaamaoni o loo “fua mai” e avea ma soo o Iesu Keriso. O le tasi o auala o loo faaaogā e faasalalau atu ai nei vai o le upu moni, o le telefoni. O mea na tutupu ia o loo mulimuli mai ua faaalia ai iʻuga lelei ua maua i lenei ituaiga o molimau atu.

• O se faievagelia faataimi atoa e igoa ia Karina na talosaga atu i ai na te faia se faataʻitaʻiga i le polokalame o se fonotaga matagaluega i le auala e avatu ai se molimau i le telefoni. Ae peitaʻi, sa leʻi auai lava Karina i lena vala o le galuega molimau atu. Ina ia faalaeiauina o ia e faia se sao i le polokalame o le fonotaga, na autalu ai e se toeaina ma lona toʻalua faatasi ma Karina nisi o manatu i le auala e molimau atu ai i le telefoni. Sa la uunaʻia foʻi o ia ina ia tatalo mo le taʻitaʻiga a Ieova i le mataupu. Sa ia faia faapena ma na iʻu ina ia manatu e taumafai e faia se telefoni.

Na filifili e Karina le numera o se telefoni i se nuu tuaoi. Na tali mai se tali telefoni, ma na faamatala atu i ai e Karina le fuafuaga o lana telefoni. Sa tali lelei mai le tali telefoni ma na faia loa ni fuafuaga e toe talanoa i le tolu aso o muamua. O le toe asiga na faia i le telefoni na iʻu ai i le faia o se suʻesuʻega faale-Tusi Paia, e faaaogā ai le polosiua, O le ā e Manaomia e le Atua Mai ia i Tatou? Talu mai lena taimi, na la olioli ai i ni suʻesuʻega mananaia ma le olaola, ma aauina atu ai e Karina ia ni lomiga e tali ai fesili a le fafine.

• Na tausolomua lava ia Bernarda i le avatua o se molimau i se tamāloa na vili sesē mai i le numera o lana telefoni. Na i lo o le faaalia o le ita, na faailoa atu ai e Bernarda e faapea o ia o se tasi o Molimau a Ieova ma ofo atu i ai se fesoasoani. Na faia ai se talanoaga, ma sa faalogologo le tamāloa a o ia faamatala atu le auala o le a soloiesea ai e le Malo o le Atua ia faiga lē tonu. Na faailoa atu e le tamāloa le numera o lana telefoni ia Bernarda, ma sa ia faia foʻi ia toe asiga i luga lava o le telefoni. I se tasi o a la talanoaga, na faitau atu ai e Bernarda i le tamāloa se vaega o le tusi o Le Poto e Taʻitaʻia ai i le Ola e Faavavau. Na fesili atu le tamāloa pe faapefea ona ia maua se kopi o le tusi, ma na auina atu ai e Bernarda se tusi faatasi ma se Tusi Paia. Na faia se fuafuaga o le a asiasi atu se uso o le faapotopotoga ia te ia, ma o loo faaauauina pea e le uso i le taimi nei ona “faasūsū” lenei “laau” ua lauolaola.

Ioe, i se eleele faaleagaga ua mātūtū o lenei lalolagi, o loo faatalitali ai fatu o loo tanumia e totogo aʻe pe a oo atu i ai vai o le upu moni e maua ai le ola. O loo faaauau pea ona “totogo aʻe” ma “fua mai” le faitau afe o i latou o loo galala e avea ma auauna faamaoni a Ieova le Atua.—Isaia 44:3, 4.